ƐPLEEKO nyā “nɛ̄ ɛcɛ gáā mɛ ā,” ɛjɛɛji alɔ kpɔtuce ku Ujehofa yɔ i bi ācɛ ɔlɛ nu jé ɔwɛ klla yɔ i je aɔdā néē cɛgbá a lɛ uwa, o ya ɛɛ kéē yɔ kwu ɔ ajaajɛ. (2 Utím. 3:1) Amáŋ ɛjɛɛji alɔ cika ō lɛyitaajɛ lɛ ɔ. Alɔ lɔfu lɛ āhɔ̄ ku alɔ gbla aku ācɛ Isrɛlu eko néē yɔ ipu igbli a. É cika ō ya odee eko duuma néē lɛ opo ta.

Ujehofa da Umosisi kóō lɛ opo ku oje nɛhɛ ɛpa ya, kéē bēē bi ɔ le “hī ācɛ igwú tɔ̄ɔhá, mɛ́mla o bī lɛ da ācɛ kéē tútū ō cālɛ́.” (Áluk. 10:2) Acogwɛɛya cika ō piyeyi fu ɛga ɛyɛɛyɛyi eko duuma néē yɔ i ta opo a, o ya ɛɛ kéē mafu lɛ ācɛ a ɔdā néē cika ō ya a. (Áluk. 10:3-8) Icɛ, Ujehofa gē bi ɔwɛ alɛwa le da ācɛ ɔlɛ nu ɔdā néē cika ō ya a duu. Ipu ikpɛyi ɛlā nyā a, alɔ géē kɛla lɛyikwu ɔwɛ ɛyɛɛyɛyi ɛta nɛ Ujehofa gē bi le da alɔ ɔdā nɛ alɔ géē ya a. Oŋma ɔɔma a, alɔ géē lɛ ɔwɛ ɛta a gbla opo néē gē ta ɛpleeko ku ācɛ Isrɛlu ku eko igble a. Ɔwɛ ɛta a wɛ eko duuma néē hi alɔ igwú wa ōjila nɛhi, eko duuma néē yɔ i nwu anyakwɔcɛ ku ujɔ ɛlā, mɛmla eko duuma néē lɛ opiyabɔ ya amāŋ lɛ ɔwɛ nɛ ɛjɛɛji ujɔ gē ya odee a tuya.

Eko duuma nɛ Ujehofa dɔka ku ‘ɛjɛɛji ācɛ ā’ kéē jila eyī ɛnɔɔci ku okompiinu ku Aklɔkpiihɔ a, acogwɛɛya a géē ta opo ɛplɛɛpa a. (Áluk. 10:3) Ɛjɛɛji ipɔɔma ku ācɛ Isrɛlu nōo lā aya ɛnɛ yɛ jila Aklɔkpiihɔ a ta biili a géē po uya ku opo néē ta a. Ígwu nōo dee lā kwu Aklɔkpiihɔ a ajaajɛ a i gáā lɔfu cigwu a fiya fiya ŋ. Ígwu ōhī kē lā ligbo ligbo, é géē cɛgbá eko mla oceyitikwu fiyɛ gbɔbu ɛɛ kéē lɔfu faajɛ abɔɔ. Amáŋ, ɔdaŋ néē kóō lā ligbo ligbo o, kɛɛ kéē lā ajaajɛ nɛɛ o, Ujehofa dɔka ku ɛjɛɛji uwa kéē jila tɔha, o ya ɛɛ kéē po ɔdā nɛ ó gáā da uwa a.

Alɔ i gē jila ipu Aklɔkpiihɔ icɛ gɛ ŋ, amáŋ Ɔwɔico gē hi alɔ igwú wa ōjila ku ācɛ ɔlɛ nu. Ōjila nyā lɛ ō ya mla ojileyi nɛhi mɛmla aɛnɛɛnɛ ōjila ɔhá, nɛ alɔ gē nwu aɛlā ō cɛgbá nɛhi mla aɔdā nɛ alɔ cika ō bēē ya ŋma a. Ipu ajɛ ɛyɛɛyɛyi nōo yɔ ipu oduudu ɛcɛ a, ācɛ ɔlɛ Ujehofa gē jɔɔnyɛ ōmiya ekponu. Ohigbu ɔɔma a, ɛjɛɛji ācɛ nōo gē cɛ ō wa ōjila ɛyɛɛyɛyi nyā, géē wa i wɛ ipu ɛwa ku ācɛ nōo lɛ eeye nɛhi. Ācɛ gē wa ŋma ɛga oligbo, ɛga nɛ ācɛ ōhī kē i ŋma a dee ba. Amáŋ, ɛjɛɛji ācɛ nōo wa a gē jé ka oceyitikwu ku uwa i bonu ŋ.

Ācɛ nōo lā ipiipɔlɛ ligbo ligbo ŋma ɛga néē gē ya aōjila nɛhi nyā, lɔfu lɛ itene ŋma anu gla a? Ohigbu onwuleyi nōo yɔ babanya a, alɛwa ku ācɛ nōo ba nyā gē lɛ itene ŋma ōmiya ekponu ɔɔma, ó klla gē ya uwa bɛɛka é yɔ ɛga néē yɔ i ya ōjila nɛhi a duu. Ocabɔ mafu, ɛpleeko éyi nɛ ɔcɛ éyi néē tɛhɔ ŋma ɔlɛ ɔtahɛ ku ɛga ō yuklɔ ku alɔ a wa Ubenin a, abɔ ku ɛga ō yuklɔ ku alɔ nōo yɔ Ubenin a, lɛ ɔ ya tɔɔtɛ ku ayinɛ a kéē lɔfu jɔɔnyɛ ōmiya a ipu ajɛ ku Arlit, Niger, igeli nɛ̄ŋcɛ́ éyi néē gē bu ɔdā ɛyɛɛyɛyi ŋma ajɛ abɔɔ, nōo yɔ ipu  Sahara Desert a. Ɛjɛɛji ācɛ nōo wa ōjila ɔɔma, kwu ācɛ nɛ ɛlā ku alɔ he uwa ɔtu a wɛ ofu ce éyi. Naana néē yɔ ɛga oligbo a, ó ya uwa bɛɛka é yɔ tɔha mla ɛwa nɛhi nōo wɛ u 44,131 nōo yɔ ōjila ɔɔma a. Ɔyinɛ alɔ nɔnyilɔ éyi kahinii: “Ahinya nwune nwune ɛgɛ nɛ aa ya ɔ tɔɔtɛ ku alɔ jahɔ tu ōmiya a. Ó mafu lɛ alɔ ɛgɛ nɛ aa yihɔtu alɔ nɛɛnɛhi a.”

Eko duuma nɛ acogwɛɛya ku Isrɛlu lɛ opo éyi ta, “ótrɛ̄yí kú aípɔ́ɔma kú Ísrɛ̄lu” foofunu cika ō wa gáā jila Aklɔkpiihɔ a. (Áluk. 10:4) Abɔɔ a néē gáā miyɛ ɛlā néē cɛgbá ō jé mla ɛlā ō nwu ŋma ɛgiyi Umosisi a. Ɔɔma kéē i ta uwa abɔ, kéē teyi tu uklɔ néē lɛ a ipu ipɔɔma ku uwa lɔɔlɔhi. Ɔdaŋ ku a wɛ ɔcɛ éyi ipu otrɛyi ku ācɛ ku Isrɛlu, á gáā ya ɔdā duuma nɛ a ya gla, o ya ɛɛ ku a yɔ ōjila ɔɔma, cɛɛ ku a lɛ itene ŋma anu ŋ?

Anyakwɔcɛ ku ujɔ icɛ i wɛ “ótrɛ̄yí” ŋ. É klla gē lɛ ogblo wu abɔ gē gbo ācɛ nɛ Ɔwɔico kpo tu uwa abɔ kéē leyi kwu uwa ŋ. (1 Upít. 5:1-3) Amáŋ é gē ceyitikwu ya ɔfu ku uwa, o ya ɛɛ kéē leyi kwu uwa lɔɔlɔhi. Ohigbu ɔɔma a, é gē tutu ō cigwu, eko duuma néē hi uwa igwú kéē gáā nwu ɛlā tōōtɔ̄ɔ̄, bɛɛka igwú ō gā u Kingdom Ministry School. Ipu inɔkpa nyā a, anyakwɔcɛ ku ujɔ gē nwu ɛgɛ néē géē ya lɔhi fiyɛ, ɔwɛ néē gē teyi tu aɛlā nōo lɛ ō ya mla ujɔ a. Ohigbu ɛlā néē gē nwu a, anyakwɔcɛ ku ujɔ mla ɛjɛɛji ācɛ néē gē leyi kwu uwa a lɔfu tubla Ujehofa ajaajɛ. Ɔdaŋ ku á kóō gā inɔkpa ɛgɛnyā jejee ɛ ŋ, a gē lɛ itene ŋma anu kpɔ, ohigbu ku ācɛ nōo nyɔ a gē bi aɛlā néē nwu ŋma inɔkpa a le ta ujɔ a abɔ.

Ó lɛ ekoohi nɛ acogwɛɛya ku Isrɛlu gē ta opo nɛ ɔkɔ ku nu gē lɛ kpii kpii. Ɛnyā gē mafu lɛ ācɛ a ka Ujehofa dɔka kéē calɛ. (Áluk. 10:5, 6) Eko duuma nɛ ācɛ a gē calɛ, é gē ya ɔ ɔgbɔɔgba, é ge fiyakata nóó, amáŋ ó wɛ uklɔ ku ija lɛ ɛjɛɛji uwa ŋ. Ekoohi ācɛ Isrɛlu ōhī i gē lɛ ɔtu caca ō calɛ ŋma ɛga éyi gā ɛga ɔhá ŋ. Ɔdiya a?

Ekoohi, ōhī ku uwa lɔfu yɔ i má ɔ ku igwú a yɔ i wa cɔha cɔha, mla eko néē leyice ŋ. “Eko ōhī ojuja ā yɔ̄ ŋmá ɔ̄nɔ̄ɔ̄nɛ̄ gaá kwu ɔ̄cɔ̄ɔ̄cī.” Eko ɔhá, gbɔbu ɛɛ kéē calɛ a, ó lɔfu yɔ “ɛ̄cī ɛpa, ɔyā éyi, iháyí éyi, ó kōō fíyɛ́ ɔ́ɔmā” gla. (Áluk. 9:21, 22) Igbɛmula nɛ ācɛ Isrɛlu calɛ a? Ɔkpá ku Aluka ɛyi ofu ce igwo ɛta kɛla lɛyikwu ɛga ofu ɛpa (40) nɛ ācɛ Isrɛlu calɛ nyɔ a.

Ekoohi, ōhī ku uwa gē nyɔ i lā ɛga nɛ obobo yɔ. Ō lā ɛga ɛgɔɔma gē wɛ ɛga ō gbo iyē nɛɛ ipu “ígbíli obɔ̄bí nɛ̄hi” a. (Obla. 1:19) Ohigbu ɛnyā a, é lɔfu má ojama ō yɔ i gbɛla, ka ō calɛ a géē bi uwa gā ɛga obɔbi fiyɛ.

Eko duuma néē gbɔɔ ō calɛ, ipɔɔma ōhī géē cɛgbá ō gbeyi kóō faajɛ uwa. Ɛjɛɛji uwa gē po ɔkɔ ku opo a, amáŋ ó wɛ ɛjɛɛji uwa gáā calɛ igbekponu a ŋ. Opo néē i ta ɔkɔ kpii kpii a gē mafu ka ipɔɔma nōo lā ɛnɔɔci a gáā calɛ aflɛyi a, bɛɛka ipɔɔma ku Ujuda, Issaka, mla Usɛbulɔn. (Áluk. 2:3-7; 10:5, 6) Ɔdaŋ ku uwa a kwu calɛ, cɛɛ acogwɛɛya a géē ta opo a ɔwɛ ɛgɔɔma igbɔmpa. Ɔɔma géē mafu ka ipɔɔma ɛta nōo lā ɛhaajɛ a cika ō calɛ mɛɛ a. Acogwɛɛya a géē yɔ i ya lɛ a, jaa gbeeko nɛ ɛjɛɛji ipɔɔma a kwu calɛ.

Á jé ŋ, ó lɛ eko éyi nɛ ó tɔɔtɛ gā uwɔ ō cɛ mla opiyabɔ ōhī néē ya ipu ɔwa ku alɔ ŋ. Ɔdiya a? A lɔfu gbɛla ku opiyabɔ a le lɛwa i bi ɛ. Amāŋ, ó lɔfu wɛ ku a dɔka ɛgɛ nɛ odee yɔ lɛ gbɔbu, ohigbu ɔɔma, á dɔka kéē piya uwa abɔ ŋ. Ɔdā duuma nōo ya naana, a géē yɔ i má, ka ó yɔ i lɔnɔ ta uwɔ ō lɛ ɔtoole, abɔ a gē ya ku opiyabɔ a kóō jɛ uwɔ iyē a. Ó kóō lɔfu je uwɔ eko nɛhi. Amáŋ, ɔdaŋ ku alɔ miya opiyabɔ ɔɔma fiya fiya ɛgɛ nɛ alɔ cika ō ya a, alɔ géē wa i má ka opiyabɔ a lɔhi lɛ alɔ, ku Ujehofa klla yɔ i gweeye mla alɔ duu.

Ɛpleeko ku Umosisi a, Ujehofa gbo umiliyɔn ku acɛnyilɔ, acɛnya, mɛmla ayipɛ nɛ̄ŋcɛ́ kéē lɔfu bu ipu igbili a. Ɔdaŋ ka ó géē yɛ i gbo uwa klla bi uwa jé ɔwɛ ŋ nɛɛ, ɛjɛɛji uwa géē yɛ i gekwu. Icɛ, Ujehofa gē gbo alɔ ku alɔ lɔfu bu ipu ɛcɛ obɔbi nyā. Ó gē ta alɔ abɔ ku alɔ yɔ kwu ɔ ajaajɛ, ku ɔtu okpoce ku alɔ kóō lɔfu! Ó lɛ a, ɛjɛɛji alɔ kóō ceyitikwu ya ɛgbla ku ācɛ Isrɛlu nōo lɛyitaajɛ lɛ ɔkɔ ku opo néē ta a!