1. Ɔdi wɛ ufi ku Ɔwɔico ō ya a, ɔdiya nōó kē cɛgbá lɛ ācɛ nōo yihɔtu ku Ujehofa a?

ĀCƐ O YƐCE UKRAIST yihɔtu ku Ɔwɔico, klla gē yuufi nu. Ācɛ ōhī lɔfu gbɛla ka ɛlā ɛpa ɔɔma i cɛtɔha ŋ. Amáŋ ó wɛ ɛdɔ ufi nōo gē hɛ uwɔ ɔtu kɔ a nɛ alɔ yɔ i kɛla lɛyikwu ɔ a ŋ. Alɔ géē kɛla lɛyikwu ɛnɛɛnɛ ufi éyi. Ācɛ nōo lɛ ɛdɔ ufi nyā gē lɛ ojilima ce Ɔwɔico ŋma ipu ɔtu. É dɔka ō ya ku Adā uwa nōo yɔ ɔkpanco a kóō hii cɔnu ŋ, ohigbu ka é dɔka ō biya ɛma olɔhi néē lɛ mla ɔ a ŋ.—Aíjē 111:10; Aíit. 8:13.

2. Oŋma ɛlā ku Udefidi nōo yɔ ipu Aíjē Kú Ɛ̄gbā 86:11 a, ɔdā ɛpa nyá nɛ alɔ gáā kɛla lɛyikwu ɔ a?

² Jé Aíjē Kú Ɛ̄gbā 86:11 ipu ɛlā néē ta ɛhaajɛ a. * Abɔɔ a yɔ i gbɛla lɛyikwu aɛlā ɔɔma a, a géē lɔfu má peee ka Udefidi jé ɛgbá ku ojilima ō le ce Ujehofa. Babanya, alɔ géē kɛla lɛyikwu ɛgɛ nɛ alɔ géē bi ɛlā nɛ Udefidi ka ipu ɔkɔ ō gba ku nu a le yuklɔ. Aflɛyi, alɔ géē má aɔdā ōhī nōo ya nɛ alɔ cika ō lɛ ojilima nɛhi ce iye ku Ɔwɔico a. Ɔmpa, alɔ géē kɛla lɛyikwu ɛgɛ nɛ alɔ géē mafu ku alɔ lɛ ojilima ce iye ku Ɔwɔico ɛ̄cī doodu a.

3. Ɔdi nɛ Umosisi má, nōo ta ɔ abɔ kóō yɔ i lɛ ojilima nɛhi ce iye ku Ɔwɔico tōōtɔ̄ɔ̄ a?

³ Gbɛla kwu ɛgɛ nɛ ɔtu ya Umosisi lɛ, eko nɛ ó tayinu ipu ɔgɛcɔ, nɛ ó má ɛgahi ku Ujehofa ipu ɛbɛ abɔ ó yɔ i yɛ a. “Ó lɛ aafu ŋ, ɛnyā géē wɛ ɛnɛɛnɛ ɛbɛ ō má lɛ ɔlɛɛcɛ duuma!”  Umosisi gáā po ɔkɛla nyā, á jé ŋ ŋma ɛgiyi alelekwu otɛhɔ nōo kahinii: “Ami Óndú ā, wɛ Ɔwɔicō nɛ̄ [ō] gbonɛnɛ nɛ̄hi, n kē ī [méyīnyinyi], ń kē ī cɔ̄nū fíya ŋ́. N klla gē ma ihɔtū nɛ̄hi fú lɛ ācɛ ɔlɛ́ um, cɛ́ɛ́ kéē lɛɔtūce um. N gē lɛ okónu nɛ̄ n ce lɛ ayááyí úlúúlā ā tū. N kē ī je ɔdōbɔ̄bí mɛ́mla ínoōbīya yɛ́ɛhi.” (Oyɛb. 33:17-23; 34:5-7) Umosisi géē lɔfu yɔ i gbɛla lɛyikwu ɛlā nyā, eko doodu nɛ ó gē hi iye ku Ujehofa a. Ohigbu ɛnyā, ó wɛ ɔdā ō ya eyijii ŋ, abɔ Umosisi pi ācɛ Isrɛlu ahɔ̄ kéē lɛ “ojilima ce iyē ohídáagó mɛ́mla iyē ōtūufi kú Óndú ā.”—Obla. 28:58.

4. Ɔdi gáā ta alɔ abɔ ku alɔ lɛ ojilima ce Ujehofa fiyɛ a?

⁴ Eko duuma nɛ alɔ yɔ i hi iye ku Ujehofa, alɔ cika ō gbɛla lɛyikwu ɛdɔ ɔcɛ nɛ ó wɛ a. Alɔ cika ō gbɛla lɛyikwu auce ō ya ku nu, bɛɛka ɔfu ku nu, ijeeyi, okpaakpa ku nu mla ihɔtu ku nu a. Ō gbɛla lɛyikwu auce ō ya nyā mla ɛyɛɛyɛyi ɔhá nɛ ó lɛ a géē ya ku alɔ lɛ ojilima ce ɔ nɛɛnɛhi fiyɛ.—Aíjē 77:11-15.

5-6. (a) Ɔdi wɛ ɛyi ku iye ku Ɔwɔico a? (b) Oŋma ɛlā nōo yɔ ipu Oōyɛbɛ̄ɛcɛ 3:13, 14 mla Ayisáya 64:8 a, ɛgɛnyá nɛ Ujehofa gē bi le ya ɔdā nɛ ó tine a?

⁵ Ɔdi nɛ alɔ jé lɛyikwu ɛyi ku iye ku Ɔwɔico a? Ācɛ ō jé ɔkpá nɛɛnɛhi alɛwa cɛtɔha ku ɛyi ku iye ku Ujehofa wɛ kahinii: “N géē Wɛ Ɔ̄cɛ Nɛ̄ N Géē Wɛ.” Ɛyi ɔɔma tu alɔ ɛlá kwu ɔ, ka ɔdā duuma i ci Ujehofa ŋma ō ya ɔdā nɛ ó tine a gla ŋ, ó klla lɔfu ya ku ɔdā doodu kóō ya gla. Ɛgɛnyá a?

⁶ Ujehofa gē ya ku ɔdā doodu kóō ya, ŋma lɛ ō je piya ɔdā duuma nɛ ó cɛgbá, o ya ɛɛ kóō lɛ ɔdā nɛ ó tine a ya. (Jé Oōyɛbɛ̄ɛcɛ 3:13, 14.) Igbalɛwa ipu aɔkpá ku alɔ, é gē ta alɔ ɛlá kwu ɔ, ku alɔ kóō bēē gbɛla lɛyikwu ɛnɛɛnɛ aya nyā ku uce ō ya ku Ɔwɔico. Ujehofa klla lɔfu ya ku ācɛ nōo gē gba ɔ ɛ̄gbā nōó jila iye ŋ ma, kéē kwu piya ɔdā duuma nōo cɛgbá, o ya ɛɛ kéē gba ɔ ɛ̄gbā klla ya ɔdā nɛ ó tine a. (Jé Ayisáya 64:8.) Ujehofa gē bi ɔwɛ nyā le ya ococɛ ku nu jila. Ɔdā duuma i gáā ci ɔ ŋma ō ya ɔdā nɛ ó tine a ŋ.—Ayis. 46:10, 11.

7. Ɔdi nɛ alɔ lɔfu ya, o ya ɛɛ ku alɔ kóō bēē ta Adā alɔ nōo yɔ ɔkpanco a ahinya tōōtɔ̄ɔ̄ klla lɛ ojilima ce ɔ fiyɛ a?

 ⁷ Alɔ géē yɔ i ta Adā alɔ nōo yɔ ɔkpanco a ahinya tōōtɔ̄ɔ̄, ɔdaŋ ku alɔ gē gbɛla tu ɔdā nɛ ó ya lɛ alɔ ɛ, mla aɔdā nɛ ó ta alɔ abɔ ku alɔ ya ɛ ma. Ocabɔ mafu, ɔdaŋ ku alɔ gē gbɛla lɛyikwu uklɔ abɔ ku Ujehofa, ɛjɛɛji ɔdā nɛ ó ya a gē jɛ alɔ eyī nɛɛnɛhi. (Aíjē 8:3, 4) Ɔdaŋ ku alɔ kē gbɛla lɛyikwu aɔdā nɛ Ujehofa ta alɔ abɔ ku alɔ ya ɛ, o ya ɛɛ ku ɔdā nɛ ó tine a kóō le ya a, alɔ géē gbɔɔ ō lɛ ojilima ce ɔ nɛɛnɛhi fiyɛ. Iye ku Ujehofa lɛ ojilima nɛhi i bi! Ó lɛ ō ya mla ɛjɛɛji ɔdā nɛ Adā alɔ wɛ a, ɛjɛɛji ɔdā nɛ ó ya ɛ, mla ɛjɛɛji ɔdā nɛ ó géē ya a.—Aíjē 89:7, 8.

8. Oŋma ɛlā nōo yɔ ipu ɔkpá ku Oblatūkíne 32:2, 3 a, ɔdi nɛ Ujehofa dɔka ku ācɛ ɔlɛ nu kéē ya mla iye ku nu a?

⁸ Gbɔbu ɛɛ ku ācɛ Isrɛlu kóō gā ipu ajɛ nɛ Ɔwɔico cokonu ō je lɛ uwa a, Ujehofa nwu Umosisi aɛlā ku ijé éyi. (Obla. 31:19) Umosisi abɔyi nu kē cika ō nwu ācɛ a ijé a duu. (Jé Oblatūkíne 32:2, 3 ipu ɛlā néē ta ɛhaajɛ a. *) Abɔ alɔ gē gbɛla tu ɔgba 2 mla 3 a, ó teyi peee ku Ujehofa i dɔka ku iye ku nu kóō tayinu, amāŋ kéē je ɔ ka ó le tiihɔ nɛhi, é cika ō hi ɔ tɛɛcɛ ŋ. Ó dɔka ku ɛjɛɛji ācɛ kéē jé iye nu! Ó wɛ ɛnɛɛnɛ ɛga lɛ ācɛ ku Isrɛlu kéē po abɔ Umosisi yɔ i nwu uwa lɛyikwu Ujehofa mla iye otiihɔ ku nu a! Ɔdā nɛ Umosisi nwu uwa a ta uwa ɔtu kwu ɔtu klla ya ku ɔtu okpoce ku uwa kóō lɔfu, ɛgɛ nɛ ɔwɔ gē ta ɔcí abɔ kóō jɛ a. Ɛgɛnyá nɛ alɔ gáā ceyitikwu ya ku ɛgɛ nɛ alɔ gē nwu ɛlā a kóō lɛ ɛgɔɔma a?

9. Ɛgɛnyá nɛ alɔ gáā tabɔ ya ku iye ku Ujehofa kóō le ya tiihɔ a?

⁹ Eko duuma nɛ alɔ yɔ i tɔɔna, alɔ lɔfu bi Ubáyíbu ku alɔ le mafu lɛ ācɛ iye ku Ɔwɔico nōo wɛ Ujehofa a. Alɔ lɔfu je ɛnɛɛnɛ ɔkpá ku alɔ lɛ uwa, aɛnɛɛnɛ uvidio, mla aɔdā ɔhá nōo yɔ ipu uwɛbsaiti ku alɔ nōo gē bi owoofu gē lɛ Ujehofa a. Ɛga nɛ alɔ gē yuklɔ, ipu inɔkpa, amaŋ eko nɛ alɔ yɔ i gā iyawu, alɔ lɔfu lɛ ɛnɛɛnɛ ɛga ō kɛla lɛ ācɛ lɛyikwu Ɔwɔico mla ɛdɔ ɔcɛ nɛ ó wɛ a. Alɔ lɔfu da uwa lɛyikwu ɔdā nɛ Ujehofa gáā ya lɛ alɔ mɛmla ɛcɛ a. Eko néē lɛ aɛlā ɛgɛnyā po, ɔɔma lɔfu wɛ eko aflɛyi néē gáā má ɛgɛ nɛ Ujehofa yihɔtu uwa lɛ a. Abɔ alɔ yɔ i da ācɛ ɛlā ɔkwɛyi lɛyikwu Adā alɔ nōo yihɔtu alɔ nɛɛnɛhi a, alɔ yɔ i tabɔ ō lɛ iye ku Ɔwɔico ya tiihɔ. Alɔ gē ta ācɛ abɔ jé peee ka é lɛ ɛkɛmgbɛ alɛwa ka lɛ uwa lɛyikwu Ɔwɔico ɛ. Ɔdā nɛ alɔ gē nwu ācɛ ŋma ipu Ubáyíbu a, wɛ ɔdā ogbɔtu nɛɛ fiyɛ duu néē lɔfu nwu á.—Ayis. 65:13, 14.

10. Eko duuma nɛ alɔ gē klɔcɛ mla ācɛ, ɔdiya nɛ alɔ i cika ō nwu uwa lɛyikwu aíne ku Ɔwɔico foofunu ŋ ma?

¹⁰ Eko nɛ alɔ gē klɔcɛ ku Ubáyíbu mla ācɛ, alɔ dɔka ō ta uwa abɔ kē gáā jé iye ku Ujehofa klla bi ɔ le yuklɔ. Ɔdā ɔhá wɛ kahinii, alɔ dɔka ō ta uwa abɔ kéē gáā lɛ Ujehofa jé lɔɔlɔhi. Alɔ géē ya ɛnyā gla, ɔdaŋ ku alɔ gē nwu uwa ɛlā, íne ku Ɔwɔico mla ɔwɛ néē géē lā oyeeyi ku uwa a foofunu gla a? Ɔcɛ oklɔcɛ ku Ubáyíbu olɔhi gē nwu aíne ku Ɔwɔico, klla géē dɔka uwa. Amáŋ ɔcɛ ɔɔma géē lɛyitaajɛ lɛ Ujehofa ohigbu kóō yihɔtu ku nu? Bla ka Iifu jé íne ku Ɔwɔico, amáŋ ó yihɔtu Ɔwɔico ɔkwɔɔkwɛyi ŋ. Ɛgɔɔma nōó kē lɛ mla Adam duu a. (Ohút. 3:1-6) Ohigbu ɛnyā a, alɔ cika ō ya fiyɛ ō nwu ācɛ lɛyikwu uce okpaakpa nɛ Ɔwɔico dɔka a, mla ɔdā nōo he ɔ ɔtu a.

11. Ɔdaŋ ku alɔ yɔ i nwu ācɛ nɛ alɔ gē klɔcɛ mla uwa a aíne ku Ɔwɔico, ɛgɛnyá nɛ alɔ gáā ta uwa abɔ kéē yihɔtu ɔcɛ nōo je íne a kwaajɛ a?

 ¹¹ Aíne ku Ujehofa lɔhi lɛ alɔ eko doodu. (Aíjē 119:97, 111, 112) Amáŋ ācɛ nɛ alɔ gē klɔcɛ mla uwa a i lɔfu má ɔ lɛ a ŋ, ɔdaŋ ka é jé ku Ujehofa je aíne a ohigbu kóō yihɔtu uwa ŋ. Ó lɛ a, alɔ lɔfu da uwa ɔka kahinii: “Ɔdiya nɛ a gbɛla ku Ɔwɔico da ācɛ ɔlɛ nu kéē ya odee amāŋ kéē hii ya ɔ ŋ ma? Ɔdi nɛ ɛnyā da alɔ lɛyikwu Ɔcɛ nɛ ó wɛ a?” Ɔdaŋ ku alɔ ta ācɛ nɛ alɔ gē klɔcɛ mla uwa a abɔ kéē gbɛla lɛyikwu Ujehofa klla gbɔɔ ō lɛ ihɔtu ɔkwɔɔkwɛyi lɛ iye ku nu, ó géē ya ku ɛlā ā kóō lɛ abɔ kwu uwa ɔtu fiyɛ. Ācɛ nɛ alɔ gē klɔcɛ mla uwa a géē gbɔɔ ō yihɔtu ku íne a mla ɔcɛ nōo je íne a. (Aíjē 119:68) Ɔtu okpoce ku uwa géē lɔfu nɛhi. Ó klla géē ta uwa abɔ kéē lɔtu ipu ojama olɔnɔ duuma nōo gáā wa a.—1 Ukɔ́r. 3:12-15.

12. Ɛgɛnyá nɛ Udefidi nyileyi ipu ō lɛ ɔtu ekponu eko éyi a, ɔdi kē bɛɛcɛ ŋma anu a?

¹² Ɛlā nɛ Udefidi nōo wɛ Ɔcɛ́ a ka a ipu Aíjē Kú Ɛ̄gbā 86:11 a, wɛ ɛlā ō cɛgbá nɛhi, ó kahinii: “Nwu um ku um lɛ ɔtu ku um ya ekponu.” Ipu oyeeyi ku nu, ó má ɛgɛ nɛ ó tɔɔtɛ lɛ, ku ɔcɛ kóō habɔ ɔtu ku nu kóō le kɔ ɛpa a. Ó lɛ eko éyi nɛ ó yɔ i yɛ ico ku ɔlɛ nu, anu ó má ɔnyā ɔcɛ ɔhá yɔ i gwiiye a. Eko ɔɔma pii a, ɔtu ku Udefidi wɛ ekponu nɛɛ, kɛɛ ka ó kwu kɔ ɛpa? Ó jé íne ku Ujehofa: “Aá híī yúnwū kú ɔnyā . . . [ɔ́mpa] ŋ́.” (Oyɛb. 20:17) Naana a, ó yɔ i má ɔnyā a kpɔ. Ɔtu ku nu gáā kwu kɔ ɛpa, lɛyikwu unwu nɛ ó lɛ lɛ Ubatssɛba a, mla unwu ō ya ɔdā nɛ Ujehofa dɔka a. Naana nɛ Udefidi yihɔtu Ujehofa gboji ɛ ma, ó yɛce unwu ku ɔkpiye ku nu kpɔ. Ohigbu ɔɔma, Udefidi lɛ aɔdobɔbi alɛwa ya. Ó lɛ uweyi bi gē lɛ Ujehofa. Udefidi klla ya ku ɔdobɔbi nɛhi kóō le ya ācɛ nɛ ó lɛ abɔ ipu ɛlā a ŋ ma, kwu apɔlɛ ku nu duu.—2 Usám. 11:1-5, 14-17; 12:7-12.

13. Ɛgɛnyá nɛ alɔ jé ka ɔtu ku Udefidi gáā kwu piya ekponu kpɔ a?

¹³ Ujehofa lɛ itala ya Udefidi, anɔɔ ó lɛ ɛma olɔhi lɛ mla Ujehofa kpɔ a. (2 Usám. 12:13; Aíjē 51:2-4, 17) Udefidi blakwu unwalu mla akanya nōo bɛɛcɛ eko nɛ ó cɛ lɛ ɔtu ku nu kóō le kɔ ɛpa a. Ujehofa ta Udefidi abɔ ku ɔtu ku nu kóō wɛ ekponu? Ii gboo, ohigbu ka Ɛlā ku Ujehofa gáā ka igbihaajɛ ka Udefidi wɛ ɔcɛ nōo “yá ucē nōo he Ɔwɔicō ɔtū . . . mla ɔtū ékpónú.”—1 Aɔ́cɛ́ 11:4; 15:3.

14. Ɔka nyá nɛ alɔ cika ō da iyi alɔ a, ɔdi kē ya a?

¹⁴ Ocabɔ ku Udefidi wɛ ɔtu ō tu kwu ɔtu mla ahɔ̄ ō pi lɛ alɔ. Ɛgɛ nɛ ó gā ipu íne ō  biya nɛhi a wɛ ahɔ̄ ō pi lɛ ācɛ ɔlɛ Ɔwɔico icɛ. Ɔdaŋ ku alɔ humayi gba Ujehofa ɛ̄gbā ihayi alɛwa o, amāŋ nōó kóō gboji ɛ ŋ, alɔ cika ō da iyi alɔ ɔka kahinii: ‘N yɔ i ta ojama nɛ Ebilii dɔka ō bi le ya ku ɔtu ku um kóō le kɔ ɛpa a?’

15. Eko nɛ alɔ lɛ ifoto nōo gē cɛ lɛ ɔcɛ lɛ unwu ku aja ō gbo má acigili, ɛgɛnyá nɛ ufi ku Ɔwɔico ō ya gáā gbo alɔ a?

¹⁵ Ocabɔ mafu, ɔdaŋ ku a lɛ ifoto nōo gē ya ku ɔcɛ kóō lɛ unwu ku aja ō gbo má ipu TV amāŋ intanɛti, ɔdi nɛ a gáā ya a? Ó tɔɔtɛ ō ka ku ifoto amāŋ uvidio a i kē wɛ aku ācɛ ō toohɛwa ŋ. Amáŋ ó lɔfu wɛ ɔdā nɛ Ebilii dɔka ō bi le ya kóō lɛ ɔtu ku uwɔ kɔ ɛpa? (2 Ukɔ́r. 2:11) Ifoto ɔɔma lɔfu lɛbɛɛka oje piloo nɛ ɔcɛ lɔfu bi le yila ɛwu nɛhi a. Aflɛyi, ó géē ya ku ɛga ō piloo ku oje a kóō le ta ipu ɛwu a. Cɛɛ, abɔ ó yɔ i lɛ odee fiyɛ oje a kóō gā ipu nu tōōtɔ̄ɔ̄ a, ɛwu a géē je yila. Aifoto ku ācɛ nōó toohɛwa duudu ŋ ma lɔfu lɛbɛɛka ɛga ō piloo ku oje ɔɔma gla a? Ō má aɔdā ɛgɛnyā nōo lɛbɛɛka é bɔbi lɛ ŋ ma, lɔfu ya ku ɔcɛ kóō biya íne ku Ujehofa igbihaajɛ. Ohigbu ɛnyā, alɔ kóō hii jɛga lɛ ɔdobɔbi duuma kóō gā ipu ɔtu ku alɔ ŋ! Lɛ ɔtu ku uwɔ ya ekponu ō yuufi iye ku Ujehofa!

16. Eko duuma nɛ alɔ yɔ ipu ojama ō ya ɔdobɔbi, aɔka nyá nɛ alɔ cika ō da iyi alɔ a?

¹⁶ Ó wɛ ifoto nōo gē cɛ lɛ alɔ gbɛla aja ō gbo foofunu nɛ Ebilii gē bi le je alɔ má a ŋ, ó gē bi aɔdā ɛyɛɛyɛyi ɔhá le yuklɔ duu. Ɔdi nɛ alɔ gáā ya a? Ó tɔɔtɛ ō gbɛla ku aɔdā nyā i bɔbi nɛhi ŋ. Ocabɔ mafu, alɔ lɔfu gbɛla kahinii: ‘É gáā je um taajɛ ŋma ipu ujɔ ohigbu ō ya odee ɛgɛnyā ŋ ma, ohigbu ɔɔma, ó wɛ ɔdobɔbi nɛhi lɛ a ŋ.’ Ɛdɔ ɛlá ō gbo ɛgɔɔma i kpaakpa ŋ duudu. Ó géē lɔhi ku alɔ da iyi alɔ aɔka nyā: ‘Ebilii dɔka ō bi ojama nyā lɛ um ɔtu kɔ ɛpa nɛɛ? Ɔdaŋ ka um lɛ ɔdobɔbi nyā ya, n géē bi uweyi gē lɛ  Ujehofa? Ɔdā nɛ um gáā ya nyā géē piya um bla Ɔwɔico, kɛɛ ka ó géē biya ɛma ku ami mla ɔ?’ Gbɛla tu ɛdɔ aɔka nyā. Gbɔɔkɔ lɛ Ɔwɔico kóō lɛ ijeeyi je gā uwɔ ku a cila aɔka a ŋma ɔtu. (Ujɛ́m. 1:5) Ō ya ɛnyā géē gbo uwɔ. Ó géē ta uwɔ abɔ ku a ta ojama lɔfulɔfu, ɛgɛ nɛ Ujisɔsi ya eko nɛ ó kahinii: “Nyɛ̄ɛ̄ ŋmá amānyā, Usétan!”—Umát. 4:10.

17. Ɔdiya nōó lɔhi ku ɔtu ku alɔ kóō kɔ ɛpa ŋ ma? Je ocabɔ mafu.

¹⁷ Ɔtu ō kɔ ɛpa i wɛ ɔdā olɔhi ŋ. Leyi yɛ ɔ ka ó lɛ ígwu ku ācɛ ō ta ubɔɔlu éyi nɛ ācɛ nōo yɔ ipu nu a i gē piyatɔha mla iyi uwa ŋ. Ōhī ku uwa dɔka owoofu lɛ iyi uwa foofunu, ōhī i gē yɛce íne a ŋ, ó kē lɛ ācɛ ɔhá nōó gē lɛ ojilima ce ɔcɛ nōo gē leyi kwu uwa ŋ. Ó géē lɔnɔ ku ɛdɔ ígwu nyā kóō yale, eko duuma néē kweyi mla ācɛ ɔhá. Amáŋ ígwu duuma nōo piyatɔha mla iyi uwa, géē lɛ ɛga ō yale fiyɛ. Ɔtu ku uwɔ lɛbɛɛka ígwu ɔmpa a gla, ɔdaŋ ku ɛlá ō gbo ku uwɔ, ɔdā nɛ a dɔka mla ɔwɛ nɛ ɔtu gē ya uwɔ a wɛ ekponu ipu ō gba Ujehofa ɛ̄gbā. Lɛ ɛlá kwu ɔ, Ebilii dɔka ō lɛ ɔtu ku uwɔ kɔ ɛpa. Ó dɔka ku ɔwɛ nɛ a gē gbɛla, mla ɔwɛ nɛ a gē leyi má ɛlā a kóō cɛtɔha mla íne ku Ujehofa ŋ. Amáŋ a kē cɛgbá ɔtu ekponu, o ya ɛɛ ku a gba Ujehofa ɛ̄gbā. (Umát. 22:36-38) A hii cɛ lɛ Ebilii kóō lɛ uwɔ ɔtu kɔ ɛpa ŋ!

18. Oŋma lɛ ɛlā ku Umáyíka 4:5 a, ɔdi nɛ a lɛ ɔtu ku uwɔ ya ekponu ō ya a?

¹⁸ Gbɔɔkɔ lɛ Ujehofa ɛgɛ nɛ Udefidi ya a. Da ɔ kahinii: “Nwu um ku um lɛ ɔtu ku um ya ekponu ō yuufi iye ku uwɔ.” Ceyitikwu ku a bi ɔkɔ nɛ a gba a le yuklɔ ipu oyeeyi ku uwɔ. Ɛ̄cī doodu, ceyitikwu ku ɔdā duuma nɛ a je ō ya a, ŋma ɛnɛŋcɛ gā ɛnɛhi a kóō mafu ku a lɛ ojilima ce iye otiihɔ ku Ujehofa. Abɔ a wɛ Ɔcɛ Ocijáli Ku Ujehofa a, ō ya ɛnyā géē bi owoofu gē lɛ iye ɔɔma. (Aíit. 27:11) Ɔɔma géē ya ku alɔ ka ɛlā ekponu nɛ Umayika ka a: “Alɔ ā géē gbā Óndú ā, Ɔwɔicō kú alɔ, klla lɛyí táajɛ lɛ ɔ́ piyóó.”—Umáy. 4:5.