Ujack mla Umarie-Line yɔ ipu uklɔ ō ya lɛ Ujehofa eko doodu ŋmiifi ihayi ku 1988. É ya opiyabɔ klla miyɛ uklɔ alɛwa ɛyɛɛyɛyi ipu ajɛ ku Uguadeloupe mla Ufrench Uguiana. Abɔ ku ɛga ō yuklɔ ku alɔ nōo yɔ Ufrance a gē leyi kwu ɛga ɛpa nyā a. Alɔ lɛ aɔka ōhī da Ujack mla Umarie-Line ɛ.

Ɔdiya nɛ a nyɔ ipu uklɔ ō ya lɛ Ujehofa eko doodu a?

Umarie-Line: Eko nɛ um wɛ ɔyipɛ nɛ um yɔ i jɛ ipu ajɛ ku Uguadeloupe a, igbalɛwa, n gē yɛce umama ku um nyɔ i tɔɔna ŋma ɔcɔɔci jaa gbotu. Eko ɔɔma, Umama ku um gē tɔɔna mla ɔtu caca. N yihɔtu ācɛ, ohigbu ɛnyā, ipu ihayi ku 1985 abɔ um lɛ inɔkpa ya mɛ a, n gáā kwu piya ɔcɛ ō gbɔbu ɔna ō ta.

Ujack: Eko nɛ um wɛ ɛdrɔ a, n gē yɔ mla ācɛ nōo yɔ ipu uklɔ ō ya lɛ Ujehofa eko doodu, nōo klla dɔka uklɔ ku ɔna ō ta a nɛhi. Eko duuma nɛ inɔkpa kwu gwu, n gē bi eko ɔɔma le gbɔbu ɔna ō ta ŋma eko ta eko. Oŋmɛyi ku alaadi, ami mɛmla ɛ́nɛ́ amāŋ ɔyinɛ ɔhá ipu ujɔ ku alɔ gē ce umoto ekoohi nyɔ i ta ācɛ ō gbɔbu ɔna ō ta a ɛga nɛ uwa a gē tɔɔna a. Alɔ gē tɔɔna ŋma ɔcɔɔci jaa gbotu, cɛɛ oŋmɛyi ku nu, alɔ le yɛ ta okonu ɔkpá éyi. N jɔɔnyɛ ɛpleeko ɔɔma nɛɛnɛhi!

Abɔ um gáā lɛ Umarie-Line lɛ ipu ihayi ku 1988 a, ó gboji ŋ, n gáā da iyi um kahinii: ‛Alɔ i lɛ ɔdā duuma nōo yɔ i kwu alɔ bi ŋ, alɔ cika ō ya nwune ipu uklɔ ku ɔna ō ta.’ N gbɔɔ ō yuklɔ ku ɔcɛ ō gbɔbu ɔna ō ta mla Umarie-Line. Abɔ ihayi éyi gáā le yɛ a, é gáā lɛ alɔ higwu wa Inɔkpa Ku Ācɛ Ō Gbɔbu Ɔna Ō Ta. Ɛpleeko ɔɔma néē gáā je alɔ piya ācɛ ō gbɔbu ɔna ō ta ɛdɔ ɛyɛɛyi a. Ipu ajɛ ku Uguadeloupe, alɔ jɔɔnyɛ uklɔ alɛwa gbɔbu ɛɛ néē ku alɔ ŋma abɔɔ gā ajɛ ku Ufrench Uguiana a.

É piya uklɔ ku uwɔ abɔ igbalɛwa ɛ. Ɔdi ta uwɔ abɔ yɔ i gɔbu ipu āhɔ̄ ɛyɛɛyɛyi nɛ a má iyi uwɔ a?

Umarie-Line: Ayinɛ nōo yɔ abɔ ku ɛga ō yuklɔ ku alɔ nōo yɔ Ufrench Uguiana a jé ka ɔkpá ku Ayisáya 6:8 wɛ ɛga ku Ubáyíbu nōo he alɔ ɔtu fiyɛ a. Ohigbu ɔɔma, eko duuma néē lɛ uwaya gwo fu alɔ, é gē bi ija le da alɔ ɔka kahinii: “Aa blakwu ɛga ku Ubáyíbu nōo he aa ɔtu fiyɛ a?” Ɔdaŋ ka é le ka lɛ a, alɔ jé ka é gáā je uklɔ ɛpɛpɛ lɛ alɔ ɛ. Cɛɛ, alɔ a gē da uwa kahinii: “Alɔ yɔ a! Tu alɔ ɛhɔ mɛɛnɛ!”

 Alɔ i gē lɛ uklɔ ɛpɛpɛ ku alɔ miya ɛ̄nɛ̄ alɔ ya tɛtɛ a ŋ, ohigbu ku ɛnyā lɔfu ya ku alɔ hii jɔɔnyɛ uklɔ ɛpɛpɛ a ŋ. Alɔ klla gē ceyitikwu ya ku ayinɛ alɔ nɔnyilɔ mla ayinɛ alɔ nɔnya nōo yɔ ɛga nɛ alɔ gē yuklɔ ɛpɛpɛ a kéē je piya aɔya ku alɔ.

Ujack: Gbɔbu a, ayinɛ alɔ ōhī i dɔka ku alɔ nyɔ ŋ, ohigbu ɔɔma é gē ceyitikwu ya ku alɔ lɛ ɔtu ku alɔ piyabɔ. Amáŋ eko nɛ alɔ nyɛɛ ŋma Uguadeloupe a, ɔyinɛ alɔ nɔnyilɔ éyi ta alɔ ɛlá kwu ɛlā ku Ujisɔsi, nōo yɔ ipu ɔkpá ku Umátiyu 13:38 a, nōo kahinii: “Ɛhɔ̄ ā wɛ ɛcɛ ā á.” Ohigbu ɛnyā a, eko duuma néē je uklɔ ɔhá lɛ alɔ, alɔ gē ta iyi alɔ ɛlá kwu ɔ kahinii, ɛga duuma nɛ alɔ yɔ a, alɔ yɔ i yuklɔ ipu ɛhɔ ekponu ɔɔma kpɔ ɛ. Ɔdā nōo cɛgbá fiyɛ duu a, wɛ ācɛ mla ɛga nɛ alɔ gē tɔɔna anu a!

Eko duuma nɛ alɔ faajɛ ɛga ɛyipɛ a, alɔ gē má ku ācɛ nōo lā abɔɔ a gē jɔɔnyɛ o lā oyeeyi ku uwa. Ohigbu ɔɔma alɔ gē ceyitikwu ku alɔ lā oyeeyi bɛɛka uwa a. Ɔdole ku uwa lɔfu wɛ ɛyɛɛyi, amáŋ alɔ gē lé ɔdā néē gē lé a klla gē gwa ɔdā néē gē gwa a. Amáŋ alɔ gē leyi kwɛɛcɛ, o ya ɛɛ ku alɔ hii lé amāŋ gwa ɔdā duuma nōo géē ya ku alɔ doōcē ŋ. Alɔ gē ceyitikwu ku alɔ ka ɔdā olɔhi lɛyikwu uklɔ duuma nɛ alɔ gē ya a.

Umarie-Line: Alɔ nwu ɔdā alɛwa ŋma ɛgiyi ayinɛ alɔ duu. N blakwu ɔdā éyi nōo ya boobu nɛ alɔ faajɛ Ufrench Uguiana a. Ɔwɔ yɔ i ya nɛɛnɛhi, ohigbu ɔɔma alɔ gbɛla ku alɔ cika ō gbeyi ku ɔwɔ a kóō le hɛ, gbɔbu ɛɛ ku alɔ bɛɛcɛ gáā tɔɔna. Amáŋ ɔyinɛ alɔ nɔnya éyi da um ɔka kahinii: “A le tutu ō bɛɛcɛ gáā tɔɔna ɛ?” N le hidaago, anu um da ɔ kahinii: “Ɛgɛnyá a?” Ó tu um ohi kahinii: “Kwu ɔkɛnɔ ku uwɔ u ku alɔ nyɔ, alɔ géē ce ɛgɛlɛ ku alɔ.” Ɛ̄cī ɔɔma, n nwu ɛgɛ néē i pɛ ɛgɛlɛ mla abɔ éyi klla bi ɔkɛnɔ abɔ ɔhá a. Ɔdaŋ ka ń nwu ŋ nɛɛ, ń géē yɛ i lɔfu tɔɔna eko ku ɔgwa ɔɔma ŋ!

A ŋma ɛga éyi gā ɛga ɔhá igbo igwo ɛhɔ ɛ. A lɛ ɔdā duuma o da ācɛ nōo yɔ i tutu o gā ɛga ɔhá duu a?

Umarie-Line: Ō yɔ i ŋma ɛga éyi gā ɛga ɔhá i gē tɔɔtɛ nóó. Naana a, ó cɛgbá ku a dɔka ɛga nɛ a géē yɔ nɛ ɔtu ku uwɔ géē gbo, nɛ a géē jɔɔnyɛ ō mlɛnyɔ lɔɔlɔhi eko duuma nɛ a cigbihi wa ɔlɛ ŋma uklɔ ku ɔna ō ta.

Ujack: Igbalɛwa, n gē pɛnti inu ɛyɛɛyɛyi ku ɔlɛ ɛyipɛ ku alɔ a kpɔ. Ɔdaŋ ku ayinɛ nōo yɔ abɔ ku ɛga o yuklɔ ku alɔ a le jé ku alɔ i gáā gboji abɔɔ ŋ, é gē da um kahinii: “Ujack a hii pɛnti ɔlɛ a nóó.”

Umarie-Line jé ō gwo iyo lɔɔlɔhi! Ó gē je ɛjɛɛji odee ta ipu ikpati, cɛɛ ó le iyē ta ce ɛyi ikpati a, ocabɔ mafu, “iyo ku inu ō gwiiye,” “aku inu ō gbiyɔla,” amāŋ “aku inu ō he ɔdole.” Ohigbu ɛnyā, ɔdaŋ ku alɔ gā ɔlɛ ɛpɛpɛ duuma, ó gē tɔɔtɛ lɛ alɔ  ō je iyo a ta ipu inu néē cika ō yɔ a. Ó gē gwo iyo a lɛ a, o ya ɛɛ kóō tɔɔtɛ lɛ alɔ ō jé ɛga nɛ ɔdā nɛ alɔ cɛgbá fiyɛ duu a yɔ a.

Umarie-Line: Abɔ alɔ le nwu ɛgɛ néē gē gwo odee tu lɔɔlɔhi ɛ ma, ɔdaŋ ku alɔ faajɛ, ó gē tɔɔtɛ lɛ alɔ ō gbɔɔ uklɔ ku ɔna ō ta a boobu.

Ɛgɛnyá nɛ aa gē miya eko ku aa, o ya ɛɛ ku aa “yá ɛjɛ̄ɛ̄jī ɔdā nāa cíkā ó yá” ipu uklɔ ku ɔna ō ta a?—2 Utím. 4:5.

Umarie-Line: Alɔ gē bi ɛ̄cī aflɛyi ku alaadi (Monday) le mlɛnyɔ klla tutu ku ōjila. Cɛɛ, ō gbɔɔ ŋma ɛ̄cī ɔmpa ku alaadi (Tuesday) gɔbu a, alɔ gē nyɔ gā tɔɔna.

Ujack: Naana nɛ alɔ lɛ aluka ku awa nɛ alɔ cika ō bēē ya ipu ɔya doodu a, alɔ i gē lɛ ɔtu ku alɔ kwu awa a ŋ. Uklɔ ku ɔna ō ta a cɛgbá lɛ alɔ fiyɛ a. Ŋma eko nɛ alɔ nyɛɛ ŋma ɔlɛ a, jaa gbeeko nɛ alɔ gbɔɔ ō cigbihi gā ɔlɛ, alɔ gē ceyitikwu tɔɔna lɛ ɛjɛɛji ācɛ nɛ alɔ má a.

Umarie-Line: Eko duuma nɛ alɔ bɛɛcɛ ō gáā jɔɔnyɛ iyi alɔ, n gē bi utrati ku alɔ ipu ɛkpa. Ācɛ ōhī gē wa gáā ta alɔ gē da alɔ ku alɔ je aɔkpá ku alɔ lɛ uwa, naana nɛ alɔ i kóō da uwa ku alɔ wɛ Ācɛ Ocijali ku Ujehofa ɛ ŋ ma. Ohigbu ɛnyā, alɔ gē leyi kwɛɛcɛ gɛɛ lɛyikwu ɛdɔ uwe nɛ alɔ gē le wiiye mla ɛgɛ nɛ alɔ gē ya odee a. Ācɛ gē leyi taajɛ ku ɔdā ɛpa ɔɔma nɛhi.

Ujack: Alɔ klla gē tɔɔna ŋma lɛ ō ya aɔdā olɔhi lɛ aoladogbe ku alɔ. N gē kpo imu ŋma ajɛ, gē nyɔ i piya imu a bonu, klla gē gwu epu nōo ba ajɛ a. Aoladogbe ku alɔ gē má ɔdā nɛ um gē ya nyā klla gē da um ɔka kahinii: “A lɛ Ubáyíbu nɛ a géē je gā um?”

A tɔɔna ipiipu ipɔlɛ ɛyɛɛyɛyi igbalɛwa ɛ. Ó lɛ ɔdā duuma kpɔcii nɛ a bla ŋma oduuma ku uwa a?

Ujack: Ipu ajɛ ku Uguiana, ó tɔɔtɛ ō nyɔ ɛga ōhī gáā tɔɔna ŋ. Igbaalɛwa, ipu alaadi doodu alɔ gē gā iyawu nōo lɛbɛɛka umali ofu igwo ahata ce igwo (370). Ɔwɛ a i kē lɔhi ŋ. Iyawu éyi nɛ alɔ nyɔ gā ipu ɔlɛ éyi néē hi ku St. Élie nōo yɔ ipu upu ku Amazon a, wɛ iyawu nɛ alɔ i gáā je mlanyi gboogboo gla ŋ. Ó je alɔ awa alɛwa ō faajɛ abɔɔ, ohigbu ku alɔ yɛ ɔwɛ nɛ Umoto igble gē yɛ mla Ugbenyi. Ɛyinɛhi ku ācɛ nōo lā abɔɔ a wɛ ācɛ ō bu ajɛ, o ya ɛɛ kéē dɔka ugoolu. Aɔkpá ku alɔ gē jɛ uwa eyī nɛhi, ohigbu ɛnyā, ōhī ku uwa gē je ɛcɔ ku ugoolu lɛ alɔ, kóō wɛ ɛhi ku uwa lɛyikwu uklɔ a! Ɔnɔɔnɛ, alɔ gē ma uvidio ku alɔ éyi fu lɛ uwa. Ācɛ alɛwa nōo lā abɔɔ a gē wa i má uvideo a.

Umarie-Line: Ó gboji lɛ a ɛ ŋ, é hi Ujack kóō wa i ya ɛlā ō ka tɛɛcɛ ku Oblatu Ku Ikwū Ku Ujisɔsi ipɔlɛ ku Camopi. O ya ɛɛ ku alɔ gā ipɔlɛ ɔɔma, alɔ bi ugbeenyi gā iyawu a ɛyi isu ku Oyapock awa ɛnɛ. Alɔ jɔɔnyɛ iyawu ɔɔma nɛɛnɛhi.

Ujack: Ɛga duuma nɛ eŋkpɔ ku isu a gbɔɔ o tu waajɛ, ó gē kwinya nɛɛnɛhi, ofiyɛ duu ɛyi apatɛcɔ a. Ɛnyā lɔfu lɛ oyeeyi kwu ikwū ajaajɛ. Naana a, ɛga nɛ eŋkpɔ a gē pɛ mla ɔfu a, gē lɔnyɛ ō má eyī nɛhi. O ya ɛɛ ku ɔcɛ ō pɛ ugbeenyi a kóō lɔfu bu abɔɔ, ó cika ō jé ō pɛ ugbeenyi lɔɔlɔhi. Amáŋ, alɔ jɔɔnyɛ iyawu ɔɔma i bi. Naana nɛ alɔ nōo wɛ ayinɛ a wɛ ɛhilii foofunu a, ācɛ nōo wa oblatu a lɛbɛɛka ācɛ ofu ɛpa ce igwo (50) a, kwu ācɛ ōhī ku Amerindian kóō wa duu!

Umarie-Line: Aɛdrɔ lɔfu jɔɔnyɛ ɛnɛɛnɛ ɛga nyā ɔdaŋ ka é dɔka ō yuklɔ lɛ Ujehofa fiyɛ. Eko nɛ a yɔ ipu āhɔ̄ ɛgɛnyā, a cika ō kpɔtuce Ujehofa, ɔɔma kē i ya ku ɔtu okpoce ku uwɔ kóō lɔfu fiyɛ. Igbalɛwa alɔ gē má ɛgɛ nɛ Ujehofa gē ta alɔ abɔɔ a.

Aa lɛ uce alɛwa nwu ɛ. Ó gē tɔɔtɛ lɛ aa ō nwu uce ɛpɛpɛ nɛɛ?

Ujack: Ó tɔɔtɛ nóó. Amáŋ n nwu auce a, o ya ɛɛ ku um lɔfu tɔɔna klla je otabɔ ipu ujɔ. Gbɔbu ɛɛ ku um kóō yuklɔ ku Ubáyíbu ō jé ɛyi ede ipu uce ku Usranantongo a, * é ku um gbɔɔ mla o ya aya ku oklɔcɛ ku Ɔda Ō Gbaajɛ. Eko nɛ um gaajɛ ŋma ɛyi ede a, n da ɔyinɛ alɔ nɔnyilɔ éyi ɔka ɔdaŋ ku um ya ɔ lɔhi. Ó ta um ohi kahinii: “Ekoohi, alɔ i gē jɛyi ku ɛlā ōhī nɛ a ka a ŋ, naana a, a ya ɔ lɔɔlɔhi kpɔ.” Ayipɛ nɛ̄ŋcɛ́ a tu um abɔ nɛhi duu. Eko duuma nɛ um le nyileyi, é gē da um, amáŋ anyakwɔcɛ a i gē da um ŋ. N nwu ɔdā alɛwa ŋma ɛgiyi ayipɛ nɛ̄ŋcɛ́ a.

Umarie-Line: Ɛga éyi nɛ alɔ gē tɔɔna a, n lɛ ācɛ nɛ um gē ya oklɔcɛ mla uwa ipu uce ku Ufrench, Uportuguese, mla Usranantongo. Ɔyinɛ alɔ nɔnya éyi tu um ukɔ́ ka eko duuma nɛ um dɔka ō gáā ya oklɔcɛ, n gbɔɔ mla ō ya oklɔcɛ mla ɔcɛ nɛ uce ku nu i gē tɔɔtɛ gā um ō ka ŋ, cɛɛ n lɛ ɛ̄cī a ŋmɛyi mla  oklɔcɛ ku ɔcɛ nɛ um jé ō ka uce ku ɔlɛ nu lɔɔlɔhi. Igbihaajɛ a, n gáā lɛ ijeeyi nōo yɔ ipu ukɔ́ ɔɔma a má.

Ɛ̄ci éyi, n lɛ oklɔcɛ ɛpa nɛ um cika ō ya. Aku aflɛyi a wɛ ipu uce ku Usranantongo, ɔmpa a kē wɛ ipu uce ku Uportuguese. Ikɔkɔ nɛ um gē yɛ i gbɔɔ mla ɔcɛ nōo gē ka Uportuguese, nɛ ń jé ō ka lɔɔlɔhi ŋ ma a, n nyɔ i gbɔɔ mla aku Usranantongo a. Ohigbu ɔɔma eko nɛ um gbɔɔ oklɔcɛ ɔmpa a, ɔyinɛ alɔ nɔnya nɛ um yɔ i yuklɔ mla ɔ a gáā da um kahinii: “Umarie-Line, unwalu éyi yɔ fa!” Eko ɔɔma nɛ um gáā jé klɔdɔɔ ka um yɔ i ka uce ku Usranantongo lɛ ɔcɛ Ubrazil, ikɔkɔ ō ka Uportuguese a!

Ācɛ nɛ aa yuklɔ tɔha mla uwa ɛ ma yihɔtu aa nɛɛnɛhi. Ɛgɛnyá nɛ aa je piya ɛnɛɛnɛ oklobiya ku ayinɛ a?

Ujack: Aíita 11:25 kahinii: “Ɔ̄cɛ onwūlabɔ̄ ā géē lɛ ije mɛ́mla agbénú tū ɔ̄ gɔbū.” Alɔ gē je eko ku alɔ taajɛ lɛ ayinɛ alɔ klla gē ya odee lɛ uwa. Ɔdaŋ ka ó gā aya ku otubi ku Agbla ku Ajɔɔcɛ, ayinɛ alɔ nɔnyilɔ ōhī gē da um kahinii: “Ma ɔ ta ku ayinɛ ɔhá kéē ya ɔ.” Amáŋ n gē ta uwa ohi kahinii: “N wɛ ɔyinɛ duu nɛ. Ó lɛ a, ɔdaŋ ka uklɔ duuma yɔ ō ya, n géē dɔka ō ya ɔ.” Ó wɛ ɔkwɛyi ku ɛjɛɛji ācɛ gē cɛgbá eko néē géē yɔ ofoofu uwa, naana a, alɔ a i dɔka ku ɔdā ɛgɔɔma kóō ci alɔ ŋma ō ya ɔdā olɔhi lɛ ācɛ ɔhá ŋ.

Umarie-Line: Alɔ gē ceyitikwu mafu lɛ eyeeye ku ayinɛ alɔ ku alɔ lɛ ɛlá wu uwa. Ɛnyā gē cɛ lɛ alɔ jé eko néē cɛgbá ɔcɛ nōo géē leyi kwu ayipɛ ɔlɛ uwa amāŋ nōo géē kpo uwa wa ɔlɛ ŋma inɔkpa. Cɛɛ, alɔ lɛ ōmiya ku alɔ tuya, ɔwɛ nɛ alɔ géē lɔfu ta uwa abɔ gla. Ɛnyā gē ta alɔ abɔ ku alɔ je piya oklobiya mla ɔncɛnya uwa, ohigbu ku alɔ le tutu ō ta uwa abɔ eko néē cɛgbá nu a.

Aɔhā nyá nɛ aa lɛ ŋma ō yuklɔ ɛga nɛ ɛgbá yɔ a?

Ujack: Alɔ lɛ eyeeye ɔkwɛyi mla ɔhā alɛwa ŋma ō bi oyeeyi ku alɔ le ya uklɔ lɛ Ujehofa eko doodu. Igbalɛwa, alɔ gē lɛ ɛga ō jɔɔnyɛ ō má aɔdā nɛ Ujehofa ya a. Naana nɛ ó gē tɔɔtɛ ekoohi ŋ ma a, alɔ lɛ ɛbɔ ku ɔtu, ohigbu ku alɔ jé ku alɔ géē miyɛ otabɔ ŋma ɛgiyi ācɛ ɔlɛ Ujehofa ɛga duuma nɛ alɔ yɔ a.

Eko nɛ um wɛ ɛdrɔ a, é lɛ um ta agba ipu ajɛ ku Ufrench Uguiana ohigbu o hayi kpaakpa ku um. Ń kóō gbɛla ka ɛ̄cī éyi géē wa nɛ um géē cigbihi gā abɔɔ gā tɔɔna ŋ, ɛɛ néē klla géē cɛ gā um nyɔ i má aalagba, cɛɛ ka n kɛla Ɔwɔico lɛ uwa ŋ. Ku ɛlā ɔkwɛyi a, Ujehofa lɛ ɔhā hɛ ce um nɛɛnɛhi ɛ!

Umarie-Line: Ō je iyi um tɛɛcɛ ka um yuklɔ lɛ ācɛ ɔhá, wɛ ɔdā nōo gē cɛ gā um gweeye nɛhi. Ɔtu he alɔ nɛhi ō yɔ ipu uklɔ ō ya lɛ Ujehofa eko doodu. Ó klla ya ku obatɔha ku alɔ kóō lɔfu tōōtɔ̄ɔ̄. Ekoohi, Ujack gē da um ɔka ɔdaŋ ku alɔ lɔfu hi ɔba mla ɔnyā nōo cɛgbá ɔtu ō tu kwu ɔtu wa ɔlɛ alɔ kéē gáā lé ɔdole tɔha mla alɔ gla. Igbalɛwa n gē da ɔ kahinii: “Ɔdā ekponu ɔɔma nɛ um kóō yɔ i gbɛla duu a!” Igbalɛwa alɔ gē gbɛla ɔwɛ ekponu.

Ujack: Babanya n gē doōcē éyi néē hi ka prostate cancer a. Naana nɛ ɔnyā um Umarie-Line i gē dɔka ō po ka n lɛ ōcē nyā ŋ ma a, n gē da ɔ kahinii: “O he um ɔtu e, ń hila okpliici nɛɛnɛhi ɛ ŋ, amáŋ ɔdaŋ nɛ um kóō gekwu babanya, n jé ku um bi oyeeyi ku um le ya ɔdā ō cɛgbá a, n bi ɔ le gba Ujehofa ɛ̄gbā, ɔɔma kē cɛ gā um gweeye nɛhi.”—Ohút. 25:8.

Umarie-Line: Ujehofa lɛ uklɔ alɛwa nɛ alɔ i kóō leyice uwa ŋ ma je lɛ alɔ ipu ɔwa ku nu. Ó klla ta alɔ abɔ ku alɔ ya aɔdā nɛ alɔ i kóō gbɛla ku alɔ géē ya gbɔbu gla ŋ ma. Oyeeyi ku alɔ le mu mla aɔdā olɔhi alɛwa. Ɛga duuma nɛ ɔwa ku Ujehofa tu alɔ ɛhɔ nyɔ, alɔ géē nyɔ, ohigbu ku alɔ lɛ ɔtuce lɔfu lɔfu ka Ujehofa géē yɔ i ta alɔ abɔ!