1. Ɛdɔ unwalu ɛyɛɛyɛyi nyá nɛ ācɛ o gba Ujehofa gē má a?

A YƆ i má unwalu duuma nōo yɔ i biya uwɔ ɔtu nɛɛnɛhi? Á jé ŋ, ɔyinɛ éyi ipu ujɔ lɛ uwɔ ya cɔnu. (Ujɛ́m. 3:2) Amāŋ ācɛ nɛ a gē yuklɔ tɔha mla uwa amāŋ ayipɛ inɔkpá ku uwɔ, gē ŋmo uwɔ okonu abɔɔ a gē gba Ujehofa ɛ̄gbā a. (1 Upít. 4:3, 4) Ó lɔfu wɛ ku apɔlɛ ku uwɔ yɔ i ceyitikwu lɔfu lɔfu kéē lɛ uwɔ ci ŋma ō gā ōjila, amāŋ cɛ gā uwɔ ka ɔdā nɛ a kpɔtuce a lɛ ācɛ ɔhá ŋ. (Umát. 10:35, 36) Ɔdaŋ ka unwalu a yɔ i bɔbi tōōtɔ̄ɔ̄, a lɔfu gbɛla ka ó géē lɔhi fiyɛ ɔdaŋ ku a ma ō gba Ujehofa. Amáŋ ɛdɔ unwalu duuma nɛ a yɔ i má, a cɛgbá ō kpɔtuce ka Ujehofa géē je ijeeyi mla ɔfu nɛ a cɛgbá a gā uwɔ, o ya ɛɛ ku a je ɔdā olɔhi ō ya klla lɔtu ku unwalu a.

2. Ɛgɛ nɛ ɔkpá ku Ācɛ Uróm 15:4 ka a, ɛgɛnyá nɛ Ubáyíbu ō jé gáā ta alɔ abɔ a?

² Ipu Ubáyíbu, Ujehofa ya kéē lɛ ocabɔ ku ācɛ ɛyɛɛyɛyi nōó jila iyē ŋ, amáŋ lɔtu ku unwalu ɛyɛɛyɛyi a ta taajɛ. Ɔdiya a? O ya ɛɛ ku alɔ nwu ɛlā ŋma anu. Ɛnyā wɛ ipu ɔdā nɛ Ujehofa bi ɔyikpo Upɔlu ta taajɛ a. (Jé Ācɛ Uróm 15:4.) Eko duuma nɛ alɔ gē jé aɛga ku Ubáyíbu nyā, ó gē ya ku alɔ lɛ ɔtu ō tu kwu ɔtu mla eyiyoce. Amáŋ gbɔbu ɛɛ ku alɔ lɛ itene ŋma ɔdā nɛ alɔ yɔ i jé a, alɔ cɛgbá ō ya fiyɛ ō jé aɛga ku Ubáyíbu foofunu. Alɔ cɛgbá ō je ɛga lɛ ɔdā nɛ alɔ yɔ i jé a, kóō lɛ ɔwɛ nɛ alɔ gē gbɛla klla gē ya uce a piyabɔ. Ocabɔ mafu, ɔdi nɛ alɔ gáā ya ɔdaŋ ka alɔ cɛgbá ɛlā ō nwu, lɛyikwu unwalu éyi nōo yɔ i ya alɔ a? Alɔ lɔfu bi aɔdā ɛnɛ nyā le yuklɔ: (1) Gbɔɔkɔ, (2) Leyi yɛ ɔ ku a yɔ ipu āhɔ̄ ɔɔma, (3) Gbɛla tu ɔ lipu lipu, ku a klla (4) Bi ɔdā nɛ a nwu a le yuklɔ. Alɔ géē ka ɛgɛ nɛ alɔ lɔfu bi eyeeye ku uwa  le yuklɔ a. * Cɛɛ alɔ géē bi ɔwɛ ō le klɔcɛ nyā le nwu ɛlā, ŋma aɔdā nōo ya ipu oyeeyi ku Udefidi nōo wɛ Ɔcɛ́ a mla ɔcocɛhɔ Upɔlu.

3. Gbɔbu ɛɛ ku a gbɔɔ ō jé Ubáyíbu, ɔdi nɛ a cika ō ya a, ɔdi kē ya a?

³ (1) Gbɔɔkɔ. Gbɔbu ɛɛ ku a gbɔɔ ō jé Ubáyíbu, gbɔɔkɔ lɛ Ujehofa kóō ta uwɔ abɔ lɛ itene ŋma ɔdā nɛ a gáā jé a. Ocabɔ mafu, ɔdaŋ ku a yɔ i dɔka ukɔ́ nōo géē ta uwɔ abɔ ipu unwalu éyi, gbɔɔkɔ lɛ Ujehofa kóō ta uwɔ abɔ má aukɔ́ ŋma ipu Ubáyíbu, nōo géē ta uwɔ abɔ je ɔdā nɛ a géē ya a.—Ufíl. 4:6, 7; Ujɛ́m. 1:5.

4. Ɔdi gáā ta uwɔ abɔ je ɛyi ɛlā ku Ubáyíbu teyi peee tōōtɔ̄ɔ̄ a?

⁴ (2) Leyi yɛ ɔ ku a yɔ ipu āhɔ̄ ɔɔma. Ō leyi yɛ ɛlā ipu ɔtu ku alɔ wɛ ɔfu ohidaago éyi nɛ Ujehofa je lɛ alɔ. O ya ɛɛ kóō tɔɔtɛ gā uwɔ ō je ɛlā nɛ a yɔ i jé a teyi peee a, kwu iyi uwɔ i ta ipu āhɔ̄ ku ɔcɛ nɛ a yɔ i jé odee lɛyikwu ɔ a. Ceyitikwu ku a má ɔdā nɛ ɔcɛ a yɔ i má piii a, ɔtu kóō ya uwɔ ɛgɛ nōó ya ɔcɛ ɔɔma piii a.

5. Ɔdi wɛ ō gbɛla tu ɛlā lipu lipu a, ɛgɛnyá nɛ a kē gáā gbɛla tu ɛlā lipu lipu lɛ a?

⁵ (3) Gbɛla tu ɔ lipu lipu. Ō gbɛla tu ɛlā lipu lipu wɛ ō gbɛla tu ɔdā nɛ a yɔ i jé a lɔɔlɔhi, klla má ɛgɛ nɛ ɛlā a lɛ abɔ kwu uwɔ iyē a. Ó gē ta uwɔ abɔ ku a lɛ ɛlā a gbla ɛlā ɔhá, cɛɛ ku a jɛyi ɔdā nɛ a yɔ i jé a lɔɔlɔhi. Ɔdaŋ ku a gē jé Ubáyíbu nɛ a gbɛla tu ɔ ŋ, a géē lɛbɛɛka ɔcɛ nōo dɔka ō he ɔdole a, ɔdaŋ ka ɔcɛ ɔɔma i kpo aɔdā ɛyɛɛyɛyi néē gē bi le he ɔdole a tɔha kóō he ɔ ŋ, ɔdole duuma i gáā yɔ kóō jɔɔnyɛ nu ŋ. Ō gbɛla tu ɔdā nɛ alɔ jé a lɛbɛɛka ō kpɔ aɔdā ɛyɛɛyɛyi ō bi le he ɔdole a tɔha klla lɛ ɔ he a, ɛnyā géē ya ku alɔ jɔɔnyɛ nu nɛhi. O ya ɛɛ kóō tɔɔtɛ gā uwɔ ō gbɛla tu ɔ lipu lipu a, a lɔfu da iyi uwɔ aɔka nōo ba nyā: ‘Ɔdi nɛ ɔcɛ néē yɔ i kɛla lɛyikwu ɔ piii a ya kóō ta iyi nu abɔ a? Ɛgɛnyá nɛ Ujehofa ta ɔ abɔ a? Ɛgɛnyá nɛ um gáā bi ɔdā nɛ um nwu a le lɔtu ku ojama a?’

6. Ɔdiya ɛɛ nɛ alɔ cɛgbá ō bi ɔdā nɛ alɔ nwu a le yuklɔ piii a?

⁶ (4) Bi ɔdā nɛ a nwu a le yuklɔ. Ujisɔsi kahinii: Ɔdaŋ ku alɔ i bi ɔdā nɛ alɔ nwu a le yuklɔ ŋ, alɔ lɛbɛɛka ɔcɛ nōo gwo ɔlɛ ce ɛyi ajɛ a. O yuklɔ lɔfu lɔfu, amáŋ ó lɛ itene duuma ŋma anu ŋ. Ɔdiya a? Ohigbu ka abɔ owu le ta nɛ ɔwɔ le ya nɛ eŋkpɔ kwu ceenyi kla ɛcɛ a, ɔlɛ a kwu wulataajɛ. (Umát. 7:24-27) Ɔwɛ ekponu ɔɔma, ɔdaŋ ku alɔ gbɔɔkɔ, leyi yɛ ɛlā bɛɛka alɔ yɔ ipu āhɔ̄ ɔɔma, klla gbɛla tu ɔ lipu lipu amáŋ nɛ alɔ i bi ɔdā nɛ alɔ nwu a le yuklɔ ŋ, ɛnyā wɛ ka alɔ lɛ eko mla ɔfu ku alɔ kpo bonu. Ohigbu ɛnyā, eko duuma nɛ alɔ gbɔɔ ō má unwalu amāŋ o ya ŋmo, ɔtu okpoce ku alɔ i gáā lɔfu iyē nɛɛnɛhi gɛ ŋ. Amáŋ, eko duuma nɛ alɔ gbɔɔ ō bi ɔdā nɛ alɔ nwu a le yuklɔ, cɛɛ alɔ géē je ɔdā olɔhi, géē lɛ ɛbɔ, klla géē lɛ ɔtu okpoce olɔfu. (Ayis. 48:17, 18) O ya ɛɛ ku alɔ bi ɔdā nɛ alɔ nwu a le yuklɔ a, ku alɔ má ɔdā nɛ alɔ lɔfu nwu ŋma ɔdā nōo ya ipu oyeeyi ku Udefidi nōo wɛ Ɔcɛ́ a.

7. Ɔka ku Ubáyíbu nyá nɛ alɔ gáā kɛla lɛyikwu ɔ babanya a?

⁷ Oklobiya uwɔ, ɔncɛnya uwɔ amāŋ ka ɔcɛ apɔlɛ ku uwɔ, ya uwɔ ɔdā ō kwu uwɔ iyē jeeje ɛ? Ɔdaŋ ka ó lɛ a, ɔdā nōo gáā ta uwɔ abɔ a wɛ ō klɔcɛ lɛyikwu ɔdā nɛ Udefidi nōo wɛ Ɔcɛ́ a ya, eko nɛ ɔyi nu Absalɔm ya ɔdā ō kwu ɔ iyē klla yɔ i ceyitikwu kóō kwu piya ɔcɛ́ a.—2 Usám. 15:5-14, 31; 18:6-14.

8. Ɔdi nɛ a lɔfu gbɔɔkɔ lɛ Ujehofa lɛyikwu ɔ a?

⁸ (1) Gbɔɔkɔ. Gbɔbu ɛɛ ku a jé ɛga ku Ubáyíbu nyā, da Ujehofa ɛgɛ nɛ ɔtu ya uwɔ lɛyikwu ɔdā obɔbi nɛ ācɛ ya uwɔ a. (Aíjē 6:6-9) Da  Ujehofa ɛgɛ nɛ ɔtu ya uwɔ lɛ piii a. Cɛɛ ku a gbɔɔkɔ lɛ ɔ kóō ya ku a má aukɔ́ nōo géē ta uwɔ abɔ a.

9. Ɛgɛnyá nɛ a gáā je ɔdā okpɔcii nōo ya ɔtahɛ ku Udefidi mla Absalɔm a teyi peee a?

⁹ (2) Leyi yɛ ɔ ku a yɔ ipu āhɔ̄ ɔɔma. Gbɛla tu ɔdā nōo ya ɛga ku Ubáyíbu nyā a, cɛɛ ku a leyi yɛ ɛgɛ nɛ ɛlā a lɛ abɔ kwu Udefidi nōo wɛ Ɔcɛ́ a lɛ a. Absalɔm nōo wɛ ɔyi ku Udefidi a yuklɔ ihayi alɛwa o ya ɛɛ ku ācɛ kóō yihɔtu nu. (2 Usám. 15:7) Eko nɛ Absalɔm má ka eko kpaakpa a gā ɛ ma, ó lɛ ācɛ o jila ajɛ má tɛhɔ gā oduudu ajɛ ku Isrɛlu kéē da ācɛ kéē kwu ɔ piya ɔcɛ́ ku uwa. Ó kóō lɛ Ahitofɛl ɔkpa ku Udefidi nōo yɔ kwu ɔ ajaajɛ klla gē nwu ɔ ɛlā a pla, kwu yɛce ɔ duu. Absalɔm le ka tɛɛcɛ ka anuɔ kwu piya ɔcɛ́ ɛ. Ó klla gbɔɔ ō ceyitikwu nɛɛnɛhi kóō lɛ adā nu Udefidi, nōo lɔfu yɔ i doōcē eko ɔɔma nɛɛnɛhi a kwu kóō lɛ ɔ ŋmo. (Aíjē 41:1-9) Udefidi lɛ ɔdā nɛ Absalɔm yɔ i ya a jé anu ó le kwu ŋma Ujerusalɛm a. Aijcɔɔja ku Absalɔm gbɔɔ ō kpɛfu ta aicɔɔja ku Udefidi. Aicɔɔja ku Udefidi le yale, anu é lɛ Absalɔm ŋmo a.

10. Ɔdi nɛ Udefidi nōo wɛ Ɔcɛ́ a géē yɛ i ya a?

¹⁰ Leyi yɛ ɛgɛ nɛ ɔtu yɔ i ya Udefidi lɛ, abɔɔ ɛjɛɛji ɔdā nōo ba nyá yɔ i ya da ɔ a. Ó yihɔtu ku Absalɔm klla kpɔtuce Ahitofɛl. Naana a, ɛjɛɛji uwa ya ɔdā nōo kwu ɔ iyē i bi. É yɔ cɔnu nɛhi klla dɔka ō lɛ ɔ ŋmo. Udefidi géē lɔfu yɛ i gbɛla ka aɔkpa ku anuɔ ohile kwu yɛce Absalɔm ɛ, klla ma ō kpɔtuce uwa. Amāŋ gbɔɔ ō gbɛla iyi nu foofunu klla ceyitikwu kóō le kwu ŋma éwo a foofunu. Amāŋ ya ku abɔ kóō hɛ ɔ iyē. Amáŋ Udefidi i ya lɛ a ŋ. Ikɔkɔ ɔɔma a, ó lɛ unwalu nyā yale. Ɔdiya ɛɛ nóō tɔɔtɛ lɛ ɔ ō ya ɛnyā gla a?

11. Ɔdi nɛ Udefidi ya ipu āhɔ̄ olɔnɔ nyā a?

¹¹ (3) Gbɛla tu ɔ lipu lipu. Aukɔ́ nyá nɛ a lɔfu nwu ŋma ɛgā ku Ubáyíbu nyā a? Lɛ ohi ku ɔka a cila, “Ɔdi nɛ Udefidi ya o ya ɛɛ kóō ta iyi nu abɔ a?” Udefidi i gbɔɔ ō yuufi klla ŋmuleyikwu ya ōmiya duuma fiya ŋ. Ó piyɔkwaajɛ amāŋ cɛ lɛ ufi ya ku abɔ kóō hɛ ɔ iyē ŋ. Ikɔkɔ ɔɔma, ó gbɔɔkɔ lɛ Ujehofa kóō ta ɔ abɔ. Ó da aoklobiya ku nu kéē ta ɔ abɔ duu. Ó klla lɛ ɔdā nɛ ó miya a ya fiyaa. Naana nɛ Udefidi cɔnu nɛhi a, ó ma ō kpɔtuce ācɛ amāŋ gbɔɔ ō wɔtu ācɛ ɔhá ŋ. Ó gɔbu yɔ i kpɔtuce Ujehofa mla aoklobiya ku nu.

12. Ɔdi nɛ Ujehofa ya kóō ta Udefidi abɔ a?

¹² Ɛgɛnyá nɛ Ujehofa ta Udefidi abɔ a? Ɔdaŋ ku a bɔkwɔ ɛlā lɛyikwu ɔ, a géē má ka Ujehofa je ɔfu nɛ Udefidi cɛgbá nu a lɛ ɔ kóō lɔtu ojama a. (Aíjē 3:1-8; Ɛlā néē ta o gbɔɔ ku ɛyi ku Ubáyíbu) Ujehofa lɛ ɔhā hɛ ce ɔdā nɛ Udefidi miya o ya a. Ó klla ta aoklobiya ku Udefidi abɔ eko néē yɔ i nuunu kéē lɛ ɔcɛ́ ku uwa gbo tu a.

13. Ɛgɛnyá nɛ a lɔfu gbla Udefidi ya ɔdaŋ ka ɔcɛ lɛ uwɔ ya cɔnu bɔbi bɔbi ɔwɛ éyi amāŋ ɔhá a? (Umátiyu 18:15-17)

¹³ (4) Bi ɔdā nɛ a nwu a le yuklɔ. Da iyi uwɔ ɔka kahinii, ‘Ɛgɛnyá nɛ um gáā gbla Udefidi ya a?’ A cɛgbá ō ya odee o ya ɛɛ ku unwalu a kóō mɛ. Oŋma lɛ āhɔ̄ a, a lɔfu yɛce ukɔ́ ku Ujisɔsi nōo yɔ ipu ɔkpá ku Umátiyu ɛyi 18 a. (Jé Umátiyu 18:15-17.) Amáŋ a cika ō ŋmuleyikwu ya ɔdā duuma eko nɛ a yɔ i cɔnu ŋ. Gbɔɔkɔ lɛ Ujehofa kóō ya ku ɔtu ku uwɔ kóō waajɛ. Ba ɔ kóō je ijeeyi nɛ a cɛgbá a gā uwɔ, ku a jé ɛgɛ nɛ a géē yɛ lɛyikwu unwalu a. A hiii ma ō kpɔtuce aoklobiya uwɔ ŋ. Ikɔkɔ ɔɔma, miyɛ otabɔ néē yɔ i je gā uwɔ a. (Aíit. 17:17) Ɔdā ō cɛgbá fiyɛ duu a, wɛ ku a yɛce ukɔ́ nɛ Ujehofa tu uwɔ ŋma ipu Ɛlā ku nu a.—Aíit. 3:5, 6.

14. Āhɔ̄ nyá lɔfu ya ku ɔkpá ku 2 Utímōti 1:12-16; 4:6-11, 17-22 kóō ta uwɔ ɔtu kwu ɔtu?

¹⁴ Apɔlɛ ku uwɔ yɔ i ya uwɔ ŋmo ohigbu ku a yɔ i gba Ujehofa ɛ̄gbā nɛɛ? Kɛɛ ku a lā ipu éwo  néē lɛ abɔ ci aya amāŋ ɛjɛɛji uklɔ ku Ācɛ Ocijáli Ku Ujehofa? O lɛ a, a géē lɛ ɔtu ō tu kwu ɔtu ŋma ō jé ɔkpá ku 2 Utímōti 1:12-16 mla 4:6-11, 17-22. * Upɔlu ta aɔgba ku Ubáyíbu nyā eko nɛ ó yɔ ipu agba a.

15. Ɔdi nɛ a lɔfu gbɔɔkɔ lɛ Ujehofa lɛyikwu ɔ a?

¹⁵ (1) Gbɔɔkɔ. Gbɔbu ɛɛ ku a jé ɛga ku Ubáyíbu nyā, da Ujehofa lɛyikwu unwalu a mla ɛgɛ nōó yɔ i ya uwɔ lɛ a. Da ɔ ɛgɛ nɛ ɔtu yɔ i ya uwɔ lɛ piii a. Da Ujehofa kóō ta uwɔ abɔ má aukɔ́, nōo yɔ ipu ɔka ku aɔdā nōo ya ipu oyeeyi ku Upɔlu, nōo géē ta uwɔ abɔ jé ɔdā nɛ a géē ya eko nɛ a yɔ i má unwalu.

16. Ɔdi ya da Upɔlu a?

¹⁶ (2) Leyi yɛ ɔ ku a yɔ ipu āhɔ̄ ɔɔma. Leyi yɛ ɔ bɛɛka awɔ wɛ Upɔlu a. É lɛ agba kwu ɔ abɔ ipu inu agba Urom. Ó gā inu agba gbɔbu ɛ, amáŋ babanya é géē je ɔ ŋmo. Ɛjɛɛji aoklobiya ku nu klla habɔ ta, ɛ̄jɛ̄ ku ɔkpiye kóō le jɛ ɔ.—2 Utím. 1:15.

17. Ɔdi nɛ Upɔlu géē yɛ i ya a?

¹⁷ Upɔlu géē yɛ i gbɔɔ ō gbɛla lɛyikwu ɔdā nōo ya ipu oyeeyi ku nu ɛ ma, ka ɔdaŋ ka anuɔ i gē je piya Ɔcɛ O Yɛce Ukraist ŋ nɛɛ, é géē yɛ i kwu anuɔ ŋ. Upɔlu géē yɛ i gbɔɔ ō cɔnu mla ayinɛ ku Esiya nōo habɔ ta a, amāŋ ma ō kpɔtuce aoklobiya nu ohile. Amáŋ Upɔlu i ya lɛ a ŋ. Ɔdi ta ɔ abɔ kpɔtuce ka aoklobiya nu géē yɔ kwu ɔ gā ajaajɛ, ka Ujehofa klla géē cila ɔ ule a?

18. Ɔdi nɛ Upɔlu ya ipu āhɔ̄ olɔnɔ nɛ ó yɔ anu a?

¹⁸ (3) Gbɛla tu ɔ lipu lipu. Lɛ ohi ku ɔka nyā cila. “Ɔdi nɛ Upɔlu ya kóō ta iyi nu abɔ a?” Naana nɛ Upɔlu jé ka ó gboji ŋ anuɔ géē kwu a, ó je mlanyi ka ó cɛgbá nɛhi ō bi owoofu gē lɛ iyē ku Ujehofa ŋ. Ó klla yɔ i gbɛla ɛgɛ nɛ ó géē ta ācɛ ɔhá ɔtu kwu ɔtu a. Ó gbolo ce Ujehofa yɔ i gbɔɔkɔ lɛ ɔ eko doodu. (2 Utím. 1:3) Upɔlu i yɔ gbɛla lɛyikwu ayinɛ nōo habɔ ta a eko doodu ŋ. Ikɔɔkɔ ɔɔma, ó ka anuɔ gweeye nɛhi ɛgɛ nɛ aoklobiya ku nu, ta ɔ abɔ ɔwɛ ɛyɛɛyɛyi a. O ka tu ɔ, Upɔlu ceyitikwu yɔ i klɔcɛ ku ɛlā Ɔwɔico gɔbu. (2 Utím. 3:16, 17; 4:13) Ɛnɛ ō fiyɛ duu a wɛ ka ó kpɔtuce lɔfu lɔfu ka Ujehofa mla Ujisɔsi yihɔtu ku nu. Ó kē kpɔtuce ka é géē gba ule ku ɛjɛɛji uklɔ nɛ ó ya a lɛ ɔ.

19. Ɛgɛnyá nɛ Ujehofa bi le je otabɔ lɛ Upɔlu a?

¹⁹ Ujehofa ya ku Upɔlu kóō le jé ka ó géē cɛgbá ō lɔtu ku o ya ŋmo, abɔɔ ó wɛ Ɔcɛ O Yɛce Ukraist a. (Ācot. 21:11-13) Ɛgɛnyá nɛ Ujehofa ta Upɔlu abɔ a? Ó lɛ ohi ku ɔkɔ ō gba ku Upɔlu cila, klla lɛ ɔfu je lɛ ɔ abɔ eko yɔ i nyɔ a. (2 Utím. 4:17) Upɔlu jé kpɔcii ka anuɔ géē miyɛ ule ku ɛjɛɛji uklɔ nɛ anuɔ ya a. Ujehofa klla bi aoklobiya ku Upɔlu nōó habɔ ta ŋ ma, le je otabɔ nɛ ó cɛgbá a lɛ ɔ.

20. Ɛgɛ nɛ ɔkpá ku Ācɛ Uróm 8:38, 39 ka a, ɛgɛnyá nɛ alɔ gáā yɛce ocabɔ ku Upɔlu a?

²⁰ (4) Bi ɔdā nɛ a nwu a le yuklɔ. Da iyi uwɔ ɔka nyā nōo kahinii: ‘Ɛgɛnyá nɛ um gáā yɛce ocabɔ ku Upɔlu a?’ Bɛɛka Upɔlu a, alɔ leyice ka é géē ya alɔ ŋmo abɔɔ alɔ gē gba Ujehofa a. (Umák. 10:29, 30) O ya ɛɛ ku alɔ hayi kpaakpa lɛ Ujehofa eko duuma nɛ alɔ yɔ i má unwalu ɛyɛɛyɛyi a, alɔ cɛgbá ō gbɔɔkɔ lɛ ɔ, klla yɔ i klɔcɛ ku Ubáyíbu eko doodu. Ɔdā nōo cɛgbá fiyɛ duu nɛ alɔ cika ō ya a, wɛ ō bi owoofu gē lɛ iyē ku Ujehofa. Alɔ cɛgbá ō jé ka Ujehofa i gáā habɔ alɔ ta gboogboo ŋ, ó kē lɛ ɔdā duuma nɛ ɔcɛ lɔfu ya nōo géē ya kóō ma ō yihɔtu ta alɔ ŋ.—Jé Ācɛ Uróm 8:38, 39; Uhíb. 13:5, 6.

21. Ɔdi ta Aya mla u Hector abɔ kéē lɛ unwalu néē yɔ i má a yale a?

²¹ Ipu āhɔ̄ duuma nɛ alɔ yɔ anu, aocabɔ nōo yɔ ipu Ubáyíbu a géē ta alɔ abɔ lɔtu. Ocabɔ  mafu, Aya nōo wɛ ɔcɛ o gbɔbu ɔna ō ta ipu éwo ku Japan a kahinii: Ɔka ku Ujona ta um abɔ ku um hii yuufi ō tɔɔna ɛga nɛ ɛwa ba gɛ ŋ. Hector nōo wɛ ɛdrɔ nōo lā ipu éwo ku Indonesia, nɛ ācɛ apɔlɛ ku nu i wɛ ācɛ Ocijáli Ku Ujehofa ŋ ma kahinii: Ocabɔ ku Urutu ta anuɔ abɔ ka anuɔ dɔka ō nwu ɛlā lɛyikwu Ujehofa klla gba ɔ ɛ̄gbā.

22. Ɔdi gáā ta uwɔ abɔ ku a lɛ itene ŋma audrama ku Ubáyíbu amāŋ eko nɛ a yɔ i jé ɔkpá néē hi ka “Imitate Their Faith” a?

²² Imi nɛ a gáā má aocabɔ ku Ubáyíbu nōo géē lɛ ɔfu tu uwɔ iyē a? Auvido mla Ubáyíbu ō jé tɛɛcɛ mla ocabɔ nu mla aikpɛyi ɛlā nōo kahinii: “Imitate Their Faith” gē ya ku aɔka ku Ubáyíbu kóō teyi peee. * Gbɔbu ɛɛ ku a má auvidio, jahɔ ta aɔkɛla ogwotu, amāŋ jé aɔkpá néē jila ɛlā má lɛyikwu uwa nɛɛnɛhi nyā, ba Ujehofa kóō ta uwɔ abɔ má aɛlā o cɛgbá nɛ a lɔfu bi le yuklɔ. Leyi yɛ ɔ ku a yɔ ipu āhɔ̄ ku ɔcɛ néē yɔ i kɛla lɛyikwu ɔ piii a. Gbɛla lipu lipu tu ɔdā nɛ ācɛ ō gba Ujehofa ɛ̄gbā nyā ya a, mla ɛgɛ nɛ ó ta uwa abɔ ya unwalu ku uwa lé lɛ a. Cɛɛ, a bi ɛlā nɛ a nwu a le yuklɔ ipu āhɔ̄ nɛ a yɔ a. Ta Ujehofa ahinya ku otabɔ nɛ ó humayi je gā uwɔ a. Ku a mafu ka ó jɛ uwɔ eyī oŋma lɛ ō dɔka ɔwɛ ɛyɛɛyɛyi o le ta ācɛ ɔhá ɔtu kwu ɔtu klla je otabɔ lɛ uwa.

23. Ɛgɛ nɛ ɔkpá ku Ayisáya 41:10, 13 ka a, ɔdi nɛ Ujehofa ce okonu ku nu lɛ alɔ a?

²³ Oyeeyi ku alɔ ipu ɛcɛ ku Usetan nyā i wɛ ɔdā otɔɔtɛ fluflu ŋ, ekoohi alɔ i kóō gē jé ɔdā ō ya ŋ. (2 Utím. 3:1) Amáŋ alɔ i cɛgbá ō lɛ ɔtooplico amāŋ yuufi ŋ. Ujehofa jé ɔdā nɛ alɔ yɔ i má a. Ó ce okonu ka anuɔ géē lɛ abɔ tu alɔ abɔ yɔ i lɔfu tu alɔ iyē, eko duuma nɛ alɔ cɛgbá otabɔ. (Jé Ayisáya 41:10, 13.) Alɔ jé kpɔcii ku Ujehofa géē ta alɔ abɔ, ó kē i yɔ i je ɔfu nɛ alɔ cɛgbá nu a lɛ alɔ o bu ipu Ubáyíbu, o ya ɛɛ ku alɔ lɔtu ku ojama duuma nɛ alɔ yɔ i má a.