1-2. Ɔnyɛ lɔfu je otabɔ lɛ ācɛ néē gē klɔcɛ ku Ubáyíbu mla uwa, kéē jɛ gɔbu ō gáā lɛ ubatisim ya a?

“N YIHƆTU ɛlā nɛ um yɔ i nwu ŋma ipu Ubáyíbu a. N jé ka ɔkwɛyi nɛ um yɔ i nwu a. Amáŋ abɔɔ um gbɔɔ ō lɛ eko taajɛ gē piyatɔha mla ayinɛ ipu ujɔ a, ɛnyā ta um abɔ ku um ya opiyabɔ nōo cɛgbá a, klla gáā lɛ ubatisim ya.” Amy nōo lā ipu éwo ku Fiji a ka ɛlā nyā a. Ɛnyā nwu alɔ ɔdā ō cɛgbá nɛhi éyi: Ɔcɛ néē gē klɔcɛ ku Ubáyíbu mla ɔ géē yɔ i jɛ gɔbu ō gáā lɛ ubatisim ya, ɔdaŋ ka ó miyɛ otabɔ ŋma ɛgiyi ācɛ ɔhá nōo yɔ ipu ujɔ a.

² Ɔnyɔɔnyɛ ku ācɛ ō tɔɔna ɛlā Ɔwɔico lɔfu tabɔ ya, ku ujɔ kóō yɔ i nwune tōōtɔ̄ɔ̄. (Āfi. 4:16) Leilani nōo wɛ ɔcɛ ō gbɔbu ɔna ō ta nōo lā u Vanuatu a kahinii: “Ó lɛ ita éyi nōo ka ka ɛwa gē bi ɔyi jɛ a. N gbɛla ka ɛgɔɔma nōó wɛ ō je ɔcɛ piya ɔyikpo ku Ukraist duu a. Ó gē je ɛjɛɛji ujɔ a kéē bi ɔcɛ éyi wa ipu ɔkwɛyi a.” Ohigbu ɛnyā, ɔyipɛ cɛgbá otabɔ ku ɛ́nɛ́ mla adā, aɔmaapu ku uwa, ācɛ nōo wɛ aɔya ku apɔlɛ ku uwa, aitica ipu inɔkpa, o ya ɛɛ kéē kwu piya ijinkpa. É kē i ya ɛnyā ŋma lɛ ō ta ɔyi a ɔtu kwu ɔtu mla ō nwu ɔ aɔdā ō cɛgbá. Ɔwɛ ekponu ɔɔma, ayinɛ alɔ nōo yɔ ipu ujɔ a lɔfu tu ukɔ́, je ɔtu ō tu kwu ɔtu, klla lɛ ocabɔ olɔhi taajɛ lɛ ācɛ nɛ alɔ gē klɔcɛ ku Ubáyíbu mla uwa a. Ɛnyā géē ta uwa abɔ kéē jɛ gɔbu ō gáā lɛ ubatisim ya.—Aíit. 15:22.

3. Ɔdi nɛ a nwu ŋma ɛlā nɛ Ana, Dorin, mla Leilani ka a?

³ Ɔdiya nɛ ɔyinɛ alɔ nōo gē ya oklɔcɛ mla ɔcɛ cika ō gweeye, ɔdaŋ ku ācɛ ɔhá ipu ujɔ a je otabɔ lɛ ɔcɛ nɛ ó gē klɔcɛ mla ɔ a? Ana nōo wɛ ɔcɛ ō gbɔbu ɔna ō ta ɛdɔ ɛyɛɛyi ipu éwo ku Moldova a kahinii: “Ācɛ néē gē klɔcɛ mla uwa a cɛgbá otabɔ alɛwa, ó kē i lɔnɔ ku ɔcɛ nōo gē ya oklɔcɛ mla uwa a kóō je ɛjɛɛji otabɔ  nyā anu foofunu.” Dorin nōo wɛ ɔcɛ ō gbɔbu ɔna ō ta ɛdɔ ɛyɛɛyi ipu éwo ku Moldova duu a kahinii: “Igbalɛwa, ācɛ ō tɔɔna ɛlā Ɔwɔico ɔhá gē kɛla nōo gē lɛ abɔ kwu ɔcɛ néē yɔ i klɔcɛ mla ɔ a ɔtu nɛhi, odee nɛ ń kóō gáā lɔfu gbɛla lɛyikwu ɔ ŋ.” Leilani klla kɛla ɔhá nōo ya nɛ alɔ cika ō yɔ i gweeye eko duuma nɛ ācɛ ɔhá yɔ i je otabɔ a. Ó kahinii: “Ihɔtu nɛ alɔ gē mafu lɛ ɔcɛ nɛ alɔ gē klɔcɛ mla ɔ a, gē mafu lɛ ɔ ka alɔ wɛ ācɛ ɔlɛ Ujehofa ɔkwɔɔkwɛyi.”—Ujɔ́n. 13:35.

4. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

⁴ Amáŋ a lɔfu gbɛla, ‘Ɔdi nɛ um lɔfu ya ku um je otabɔ lɛ ɔcɛ nōo gē klɔcɛ ku Ubáyíbu o ya kóō jɛ gɔbu, naana nōó wɛ ami yɔ i ya oklɔcɛ mla ɔ ŋ ma?’ Alɔ leyi yɛ ɔdā nɛ alɔ lɔfu ya eko duuma nɛ ɔcɛ éyi hi alɔ ígwu, ku alɔ ba ɔ iyē gáā ya oklɔcɛ mla ɔcɛ. Alɔ klla géē má ɔdā nɛ alɔ lɔfu ya eko duuma nɛ ɔcɛ néē gē klɔcɛ mla ɔ a gbɔɔ ō wa ōjila ku ujɔ. Alɔ klla géē má ɛgɛ nɛ anyakwɔcɛ ku ujɔ lɔfu je otabɔ lɛ ācɛ nōo gē klɔcɛ, o ya ɛɛ kéē jɛ gɔbu gáā lɛ ubatisim ya a.

5. Ɔdi nɛ a cika ō ya ɔdaŋ ka ɔcɛ da uwɔ ku a ba anuɔ iyē gáā lɛ oklɔcɛ ya a?

⁵ Eko ku oklɔcɛ, ɔcɛ nōo wɛ itica a lɛ uklɔ okpɔcii ō ta ɔcɛ nɛ ó yɔ i klɔcɛ mla ɔ a abɔ, kóō jɛyi Ɛlā Ku Ɔwɔico a. Ɔdaŋ ka itica a hi uwɔ igwú ku a ba ɔ iyē, a cika ō leyi má iyi uwɔ ku a wɛ ɔcɛ ō yuklɔ mla anu. Uklɔ ku uwɔ wɛ ō je otabɔ lɛ ɔ. (Ɔ̄cok. 4:9, 10) Amáŋ ɔdi nɛ a lɔfu ya ku a wɛ otabɔ olɔhi ɛpleeko néē yɔ i ya oklɔcɛ ku Ubáyíbu a?

6. Eko duuma nɛ a ba ɔcɛ iyē gáā klɔcɛ, ɛgɛnyá nɛ a gáā bi ukɔ́ nōo yɔ ipu Aíita 20:18 le yuklɔ a?

⁶ Lɛ Otutu Ya Lɛyikwu Oklɔcɛ A. Aflɛyi, da ɔyinɛ a ɔka kóō da uwɔ odee ligii lɛyikwu ɔcɛ nɛ ó gáā klɔcɛ mla ɔ a. (Jé Aíita 20:18.) A lɔfu da ɔ ɔka kahinii: “Ɔdi nɛ a jé lɛyikwu ɔcɛ nɛ a gē klɔcɛ mla ɔ a? Ikpɛyi ɛlā nyá nɛ a gáā klɔcɛ mla ɔ a? Ɔdi nɛ a dɔka kóō nwu ŋma oklɔcɛ nyā a? Ó lɛ ɔdā duuma nɛ um cika ō ya, amāŋ nɛ ń cika ō ya ŋ? Amāŋ ó lɛ ɔdā duuma nɛ um cika ō ka amāŋ nɛ ń cika ō ka ŋ? Ɔdi lɔfu ta ɔcɛ ɔɔma ɔtu kwu ɔtu kóō jɛ gɔbu a?” Ó lɛ aafu ŋ, itica a i gáā da uwɔ ɛlā otayinu ku ɔcɛ ɔɔma ŋ, amáŋ ɔdā duuma nɛ ó gáā da uwɔ a géē ta uwɔ abɔ. Joy nōo wɛ ɔcɛ o tɔɔna ipu éwo ɔhá a, ka anuɔ gē da ɔyinɛ nōo gē ba anuɔ iyē gā klɔcɛ a ɛlā ɛgɛnyā. Ó kahinii: “Ō da uwa ɛdɔ ɛlā ɛgɛnyā gē ya ku ɔcɛ nōo ba um iyē a, kóō je otabɔ lɛ ɔcɛ nɛ um gē klɔcɛ mla ɔ a. Ó klla gē ta uwa abɔ ō jé ɔdā ō ka eko nɛ alɔ yɔ i ya oklɔcɛ a.”

7. Ɔdiya nɛ a cɛgbá ō ya otutu, ɔdaŋ ku a gáā ba ɔcɛ iyē gáā ya oklɔcɛ ku Ubáyíbu mla ɔcɛ a?

⁷ Ɔdaŋ ka ɔyinɛ eyī da uwɔ ku a ba anuɔ iyē gáā klɔcɛ mla ɔcɛ, ó géē lɔhi ɔdaŋ ku a lɛ ɛga nɛ oklɔcɛ a gáā ŋma a tutu. (Ɛ́sra 7:10) Dorin, ɔyinɛ nɛ alɔ kɛla lɛyikwu ɔ gbɔbu a  kahinii: “Ó gē he um ɔtu ɔdaŋ ku ɔcɛ nōo ba um iyē a lɛ otutu ya. Cɛɛ, ó géē ta ɛnɛɛnɛ ohi ipu oklɔcɛ a.” Ó wɛ ɔɔma foofunu ŋ, ɔcɛ néē i klɔcɛ mla ɔ a géē má ku aa ɛplɛɛpa le tutu lɔɔlɔhi, ɛnyā kē i lɛ ɛnɛɛnɛ ocabɔ taajɛ lɛ ɔ. Ɔdaŋ ku a kóō má ɛga ya otutu lɔɔlɔhi ŋ naana, bi eko ligii ku a lɛ aɛlā okpɔci kpɔci a jé.

8. Ɔdi nɛ a lɔfu ya cɛɛ ku ɔkɔ nɛ a gē gba eko ku oklɔcɛ ku Ubáyíbu a kóō lɔhi fiyɛ a?

⁸ Ɔkɔ ō gba wɛ aya ɛnɛɛnɛ ipu Ubáyíbu oklɔcɛ mla ācɛ. Ohigbu ɛnyā, lɛ ɛlá gbo taajɛ lɛyikwu ɔdā nɛ a lɔfu ka, ɔdaŋ ka itica a da uwɔ ku a lɛ ɔkɔ gba. Ɛnyā géē ya ku ɔkɔ nɛ a gáā gba a kóō lɛ abɔ kwu ɔcɛ ɔɔma ɔtu. (Aíjē 141:2) Hanae nōo lā u Japan a blakwu ɔkɔ nɛ ɔyinɛ nɔnya éyi gba a. Eko ɔɔma, ɔyinɛ a ba ɔcɛ nōo gē ya oklɔcɛ ku Ubáyíbu mla u Hanae a iyē. Ó kahinii: “N má ka ó lɛ ɛma olɔfu mla Ujehofa, n kē dɔka ō lɛbɛɛka anu a. N klla má ka ó yihɔtu um abɔɔ ó hi iyē ka um ipu ɔkɔ nɛ ó gba a.”

9. Oŋma ɛlā nōo yɔ ipu ɔkpá ku Ujɛ́mīsi 1:19 a, ɔdi nɛ a gáā ya ku a wɛ ɔcɛ ō ba ɔcɛ iyē olɔhi a?

⁹ Je otabɔ lɛ itica a eko ku oklɔcɛ a. Omamuyovbi nōo wɛ ɔcɛ ō gbɔbu ɔna ō ta ɛdɔ ɛyɛɛyi ipu Nigeria a kahinii: “Ɔcɛ o ba ɔcɛ iyē olɔhi gē jahɔ lɔɔlɔhi eko ku oklɔcɛ a. Ó klla gē ta ɛnɛɛnɛ ohi amáŋ ó gē kɛla nwune ŋ, ohigbu ka ó jé ka ó wɛ uklɔ ku itica a ō leyi kwu oklɔcɛ a.” Ó lɛ a, eko nyá nɛ a gáā kɛla a, ɔdi nɛ a kē gáā ka a? (Aíit. 25:11) Jahɔ lɔɔlɔhi eko nɛ itica a mla ɔcɛ nɛ ó yɔ i klɔcɛ mla ɔ a yɔ i kɛla. (Jé Ujɛ́mīsi 1:19.) O bu ɔwɛ nyā foofunu nɛ a gáā je otabɔ eko kpaakpa gla a. Ɔkwɛyi, a cɛgbá ō gbɛla tu ɛlā lɔɔlɔhi gbɔbu ɛɛ ku a kɛla. Ocabɔ mafu, a gáā kɛla nwune amāŋ ŋmo ɛlā tu itica a okonu eko nɛ ó yɔ i je ɛlā eyī teyi peee ŋ. A klla gáā kɛla lɛyikwu ikpɛyi ɛlā ɔhá kpanaa ŋ. Amáŋ ŋma ohi kpiii nɛ a ta, aciije nɛ a bi le yuklɔ, amāŋ ku ɔka nɛ a da, lɔfu je ɛyi ɛlā néē yɔ i kɛla lɛyikwu ɔ a teyi peee. Ekoohi, a lɔfu gbɛla ku á lɛ ɛlā ō nwune ō ka tu ipu oklɔcɛ a ŋ. Amáŋ ɔdaŋ ku a ta ɔcɛ néē yɔ i klɔcɛ mla ɔ a ahinya klla mafu ku a lɛ ɛlā wu ɔ, a géē ta ɔcɛ ɔɔma abɔ kóō jɛ gɔbu lɔɔlɔhi.

10. Ɛgɛnyá nɛ ō ka ɔdā nɛ a má ipu oyeeyi ku uwɔ ɛ ma, lɔfu ta ɔcɛ néē yɔ i klɔcɛ mla ɔ a abɔ a?

¹⁰ Da uwa lɛyikwu ɔdā nɛ a má ipu oyeeyi ku uwɔ ɛ ma. Ɔdaŋ ka ó ta ɔcɛ a abɔ gla, a lɔfu da ɔ lɛyikwu ɛgɛ nɛ a gā jé ɔkwɛyi a, ɛgɛ nɛ a ya unwalu alɛwa lé ɛ, mla ɛgɛ nɛ Ujehofa ta uwɔ abɔ a. (Aíjē 78:4, 7) Ɛnyā lɔfu wɛ ɔdā nɛ ɔcɛ néē yɔ i klɔcɛ mla ɔ a cɛgbá ō jé a. Ɛnyā lɔfu ya ku ɔtu okpoce ku nu kóō lɔfu tōōtɔ̄ɔ̄, amāŋ ta ɔ ɔtu kwu ɔtu kóō yɔ i jɛ gɔbu lɔɔlɔhi ō gáā lɛ ubatisim ya. Ó kē lɔfu ta ɔ abɔ kóō lɛ unwalu duuma nɛ ó yɔ i má a yale. (1 Upít. 5:9) Gabriel nōo lā ipu éwo ku Brazil nōo wɛ ɔcɛ ō gbɔbu ɔna ō ta babanya a, blakwu ɔdā nōo ta ɔ abɔ eko nɛ ó yɔ i klɔcɛ ku Ubáyíbu a. Ó kahinii:  “Eko nɛ um lɛ ɔdā nōo ya ipu oyeeyi ku ayinɛ alɔ po a, n gáā le jé ka Ujehofa jé unwalu nɛ alɔ yɔ i má a. Ɔdaŋ ka é ya unwalu a le gla, ayika n ya ɔ lé gla duu.”

11-12. Ɔdiya nɛ alɔ cika ō ya ācɛ néē gē klɔcɛ mla uwa, nōo wa ōjila ku ujɔ a omaaba lɔɔlɔhi a?

¹¹ Gbɔbu ɛɛ ku ɔcɛ néē yɔ i klɔcɛ mla ɔ a kóō ya ubatisim, ó cɛgbá ō wa ōjila ku ujɔ eko doodu klla lɛ itene ŋma anu. (Uhíb. 10:24, 25) Á jé ŋ, itica a lɔfu hi ɔ igwú wa ōjila ku ujɔ eko aflɛyi a. Ɔdaŋ ka ó gā, ɛjɛɛji alɔ lɔfu ta ɔ ɔtu kwu ɔtu kóō bēē wa kpɔ. Ɔwɛ ɛyɛɛyɛyi nyá nɛ alɔ lɔfu ya ɛnyā a?

¹² Ya ɔ omaaba lɔɔlɔhi ŋma ɔtu. (Uróm 15:7) Ɔdaŋ ka alɔ ya ɔ omaaba lɔɔlɔhi wa ōjila, ó géē he ɔ ɔtu kóō yɔ i wa kpɔ. Ɔwɛ nɛ alɔ gē mafu ku alɔ lɛ ɛlá wu ɔ a kóō fiyɛ ɔfu ŋ, ya ɔ omaaba lɔɔlɔhi, ku a klla ma ɔ fu lɛ ayinɛ ɔhá. Kɛla mla ɔ, ohigbu ku á jé ŋ itica ku nu yɔ i yuklɔ ɔhá néē je lɛ ɔ ipu ōjila amāŋ i kóō wa ōjila ɛ ŋ. Jahɔ ta ɛlā duuma nɛ ó yɔ i da uwɔ a lɔɔlɔhi, ku a klla mafu lɛ ɔ ku a lɛ ɛlá wu ɔ. Ɛgɛnyá nɛ ɛnyā lɔfu lɛ abɔ kwu ɔ ɔtu lɛ a? Má ocabɔ ku Dmitrii, nōo ya ubatisim ihayi ōhī nōo gā yɛ a, nōo kē wɛ ɔcɛ ō ta anyakwɔcɛ ku ujɔ abɔ babanya a. Eko nɛ ó gē gbɛla kwu eko aflɛyi nɛ ó wa ōjila ku ujɔ a, ó gē kahinii: “Ɔyinɛ nɔnyilɔ éyi má um hayi iyɔbu Agbla ku Ajɔɔcɛ a, uweyi yɔ i ya um, anu ó bi ɔwɛ ogbonɛnɛ gā lɛ um bi gā ipu inu a. Ācɛ alɛwa gā hɛ okonu ta um. Ó ya um eyijii nɛhi. Ó he um ɔtu nɛhi, ó ya um bɛɛka ōjila kóō yɔ ɛ̄cī doodu a. Ń má ɛdɔ odee ɛgɛnyā nōo lɛ abɔ kwu um ɔtu lɛ a ɛga ɔhá jejee ɛ ŋ.”

13. Ɛgɛnyá nɛ uce ō ya ku uwɔ, gáā ta ācɛ nɛ alɔ gē klɔcɛ mla uwa a abɔ a?

¹³ Lɛ ocabɔ olɔhi taajɛ. Uce o ya ku uwɔ lɔfu ya ku ɔcɛ nōo gē klɔcɛ ku Ubáyíbu a, kóō jé ka alɔ wɛ Ācɛ O Yɛce Ukraist ɔkwɔɔkwɛyi. (Umát. 5:16) Vitalii nōo gē yuklɔ ku ɔcɛ o gbɔbu ɔna ō ta, ipu éwo ku Moldova a kahinii: “N gē má ɛgɛ nɛ ɔnyɔɔnyɛ gē lā oyeeyi, klla gē ya uce lɛ ipu ujɔ a. Ɛnyā cɛ gā um jé peee ka Ācɛ Ocijáli Ku Ujehofa wɛ ācɛ ɛlā Ɔwɔico ɔkwɔɔkwɛyi.”

14. Ɛgɛnyá nɛ ocabɔ ku uwɔ lɔfu ta ācɛ ɔhá abɔ kéē yɔ i jɛ gɔbu a?

¹⁴ Gbɔbu ɛɛ ku ɔcɛ néē gē klɔcɛ mla ɔ a kóō ya ubatisim, ó cɛgbá ō bi ɔdā nɛ ó yɔ i nwu a le yuklɔ. Ɛnyā i wɛ ɔdā ō tɔɔtɛ eko doodu ŋ. Amáŋ eko nɛ ɔcɛ nɛ a gē klɔcɛ mla ɔ a má itene nɛ a gē lɛ, eko duuma nɛ a bi ukɔ́ ku Ubáyíbu le yuklɔ, ó géē dɔka ō yɛce ocabɔ ku uwɔ. (1 Ukɔ́r. 11:1) Leyi yɛ ocabɔ ku ɔyinɛ alɔ Hanae, nɛ alɔ kɛla lɛyikwu ɔ gbɔbu a. Ó kahinii: “Ɔdā nɛ um yɔ i nwu ō ya a, ayinɛ nɔnyilɔ mla ayinɛ nɔnya yɔ i ya ɔ gbɔbu ɛ. N má ɛgɛ nɛ um géē ta ācɛ ɔtu kwu ɔtu, ō je yɛɛhi klla mafu ihɔtu lɛ ācɛ ɔhá. É gē kɛla ogbonɛnɛ  lɛyikwu ācɛ ɔhá eko doodu. N dɔka ō yɛce ocabɔ ku uwa.”

15. Ɛgɛnyá nɛ alɔ lɔfu bi Aíita 27:17 le yuklɔ lɛyikwu ācɛ nɛ alɔ gē klɔcɛ mla uwa a?

¹⁵ Kwu ɔ piya oklobiya amāŋ ɔncɛnya ku uwɔ. Abɔɔ ɔcɛ néē yɔ i klɔcɛ mla ɔ a yɔ i ceyitikwu wa ōjila a, bēē mafu lɛ ɔ ku a lɛ ɛlá wu ɔ. (Ufíl. 2:4) A lɔfu ceyitikwu ya ku a jé ɔ lɔɔlɔhi. A lɔfu da ɔ lɛyikwu ɛgɛ nɛ a yɔ i gweeye lɛ, ohigbu opiyabɔ nɛ ó yɔ i ya a. A klla lɔfu da ɔ ɔka lɛyikwu oklɔcɛ, apɔlɛ mla uklɔ nɛ ó yɔ i ya a. Amáŋ lɛ ɛlá kwu ɔ ku a hii da ɔ ɔka duuma nōo lɔfu ya ku uweyi kóō kwu ɔ ŋ. Ō kɔka tɔha ɛgɛnyā lɔfu ya ku aa tubla iyi aa ajaajɛ. Eko duuma nɛ a kwu ɔ piya oklobiya amāŋ ɔncɛnya ku uwɔ, ó géē ta ɔ abɔ jɛ gɔbu kóō lɛ ubatisim ya. (Jé Aíita 27:17.) Babanya, Hanae wɛ ɔcɛ ō gbɔbu ɔna ō ta eko doodu. Eko duuma nɛ ó bla kwu eko nɛ ó gā ōjila aflɛyi a, ó gē kahinii: “Abɔɔ um lɛ ancɛnya lɛ ipu ujɔ a, um gē leyice ɛ̄cī ku ōjila eko doodu, um kē i ceyitikwu gā ōjila naana nɛ ɛ̄jɛ̄ kóō le jɛ um. Um gē jɔɔnyɛ ō yɔ tɔha mla ancɛnya ɛpɛɛpɛ ku um nɛhi, ɛnyā ta um abɔ ku um habɔ ancɛnya nɛ um tɛtɛ lɛ néē jé Ujehofa ŋ ma ta. N dɔka ō tubla Ujehofa ajaajɛ mla ɛjɛɛji ayinɛ nɔnyilɔ mla ayinɛ nɔnya a. Ohigbu ɛnyā, n le miya ō lɛ ubatisim ya.”

16. Ɔdi ɔhá nɛ a lɔfu ya kóō ta ɔcɛ néē gē klɔcɛ mla ɔ a abɔ, kóō yɔ i lɛ eeye eko duuma nɛ ó yɔ ipu ujɔ a?

¹⁶ Abɔ ɔcɛ néē gē klɔcɛ mla ɔ a yɔ i ceyitikwu ya opiyabɔ a, ta ɔ abɔ kóō jé ka ó wɛ ɔcɛ éyi ipu ujɔ a. Alɔ lɔfu ya ɛnyā ŋma lɛ ō gbonɛnɛ lɛ ɔ. (Uhíb. 13:2) Eko nɛ u Denis nōo lā ipu éwo ku Moldova a, blakwu eko nɛ ó yɔ i klɔcɛ ku Ubáyíbu a, ó kahinii: “Igbalɛwa, ami mla ɔnyā um gē nyɔ ɛga ohija tɔha mla ayinɛ alɔ. É gē da alɔ ɛgɛ nɛ Ujehofa ta uwa abɔ ɛ ma. Ɔɔma gē je ɔtu ō tu kwu ɔtu lɛ alɔ nɛhi. Alɔ gáā le jé peee ku alɔ dɔka ō gba Ujehofa, ɔdaŋ ku alɔ kē ya lɛ a, alɔ géē lɛ abahi ku ɛnɛɛnɛ oyeeyi.” Ɔdaŋ ka ɔcɛ néē gē klɔcɛ mla ɔ a kwu piya ɔcɛ ō tɔɔna Ɛlā Ɔwɔico, a lɔfu da ɔ kóō ba uwɔ iyē eko nɛ a yɔ i yuklɔ ku ɔna ō ta. Diego, nōo wɛ ɔcɛ ō tɔɔna Ɛlā Ɔwɔico ŋma ipu éwo ku Brazil a kahinii: “Ayinɛ nɔnyilɔ alɛwa gē da um ka um ba uwa iyē nyɔ gā yuklɔ ku ɔna ō ta. Ɛnyā wɛ ɛga olɔhi fiyɛ duu ō bi le jé uwa lɔɔlɔhi a. Ō ya ɛnyā cɛ gā um nwu ɔdā alɛwa, ɛnyā ya ku um tubla Ujehofa mla Ujisɔsi ajaajɛ fiyɛ.”

17. Ɛgɛnyá nɛ anyakwɔcɛ ku ujɔ lɔfu je otabɔ lɛ ācɛ nɛ ayinɛ gē klɔcɛ mla uwa a?

¹⁷ Lɛ eko taajɛ lɛ ācɛ nɛ alɔ gē klɔcɛ ku Ubáyíbu mla uwa a. Anyakwɔcɛ ku ujɔ, eko duuma nɛ aa mafu ku aa yihɔtu klla lɛ ɛlá wu ācɛ nɛ ayinɛ gē klɔcɛ mla uwa a, ó gē ta uwa abɔ kéē lɛ ubatisim ya. A lɔfu kɛla mla ācɛ néē gē klɔcɛ mla uwa a, ipu ōjila eko doodu gla a? É géē jé ku a lɛ ɛlá wu uwa ɔdaŋ ku a blakwu iyē ku  uwa, ofiyɛ duu eko néē gbɔɔ ō ta ohi ipu ōjila. A lɔfu ya ɛga, ō ba ɔcɛ ō tɔɔna ɛlā Ɔwɔico duuma iyē eko nɛ ó yɔ i nyɔ gā klɔcɛ mla ācɛ? A lɔfu ta ɔcɛ néē gē klɔcɛ mla ɔ a abɔ fiyɛ ɛgɛ nɛ a gbɛla a. Ɔcɛ o gbɔbu ɔna ō ta éyi nɛ iyē ku nu lé ku Jackie nōo lā ipu éwo ku Nigeria a, kahinii: “Ācɛ alɛwa nɛ um gē klɔcɛ mla uwa a gē hidaago, eko néē le jé ka ɔcɛ nōo ba um iyē gáā klɔcɛ mla uwa a, wɛ ɔnyakwɔcɛ ku ujɔ. Ɔcɛ éyi nɛ n gē klɔcɛ mla ɔ a kahinii: ‘Upastor ku alɔ i gáā ya lɛ a gboogboo ŋ. Ācɛ o lɛ ije foofunu nɛ ó gē nyɔ gáā má a, ɔdaŋ ka é lɛ ije gba lɛ ɔ!’ ” Ɔcɛ nɛ um gē klɔcɛ mla ɔ nyā gē wa ōjila babanya.

18. Ɛgɛnyá nɛ anyakwɔcɛ ku ujɔ gáā bi ɛlā nōo yɔ ipu ɔkpá ku Úklɔ́ kú Ācotɛ̄hɔ̄ 20:28 a le yuklɔ a?

¹⁸ Nwu ācɛ nēe gē klɔcɛ mla uwa a ɛlā ku a klla ta uwa ɔtu kwu ɔtu. Anyakwɔcɛ ku ujɔ, aa lɛ uklɔ o cɛgbá nɛhi ō ta ācɛ o tɔɔna ɛlā Ɔwɔico abɔ, kéē yuklɔ ku ɔna ō ta ku uwa mla Ubáyíbu ō nwu ācɛ lɔɔlɔhi. (Jé Úklɔ́ kú Ācotɛ̄hɔ̄ 20:28.) Ɔdaŋ ka ɔcɛ gē yuweyi o klɔcɛ mla ācɛ eko nɛ a yɔ mla ɔ, a lɔfu tabɔ lɛ oklɔcɛ a ya. Jackie nɛ alɔ kɛla lɛyikwu ɔ gbɔbu a kahinii: “Anyakwɔcɛ ku ujɔ gē da um ɔka eko doodu lɛyikwu ācɛ nɛ um gē klɔcɛ mla uwa a. Eko duuma nɛ um gbɔɔ ō má unwalu ipu oklɔcɛ duuma, é gē tu um ukɔ́ nōo gē ta um abɔ nɛhi.” Anyakwɔcɛ ku ujɔ cika ō yuklɔ lɔfu lɔfu kéē ta ācɛ nōo gē klɔcɛ mla ācɛ a ɔtu kwu ɔtu. (1 Utes. 5:11) Jackie klla ka kpɔ kahinii: “Ó gē he um ɔtu nɛhi eko duuma nɛ anyakwɔcɛ ku ujɔ ta um ɔtu kwu ɔtu, klla da um ka uklɔ nɛ um yɔ i ceyitikwu ya a jɛ uwa eyī. Ɛlā ɛgɛnyā gē lɛ ɔfu tu um iyē, ɛgɛ nɛ enkpɔ nōo hilaŋdɔ gē je ɔfu iyē lɛ ɔcɛ eko nɛ ɛnɔ yɔ i cɛ nɛhi a. Eko duuma nɛ anyakwɔcɛ ku ujɔ da um lɛyikwu ɛgɛ nɛ um gē ya lɔhi lɛ a, ó gē cɛ lɛ ɔtu he um klla gē ya ku eeye nɛ um gē lɛ ŋma ō klɔcɛ mla ācɛ a, kóō nwune tōōtɔ̄ɔ̄.”—Aíit. 25:25.

19. Ɔdiya ɛɛ nɛ ɛjɛɛji alɔ lɔfu lɛ eeye a?

¹⁹ Ɔdaŋ ku alɔ i lɛ ɔcɛ duuma yɔ i klɔcɛ mla ɔ babanya ŋ naana, alɔ lɔfu ta ācɛ abɔ kéē jɛ gɔbu gáā lɛ ubatisim ya gla. Ɔdaŋ ka alɔ i kóō kɛla nwune eko nɛ alɔ ba ācɛ iyē gā klɔcɛ mla ācɛ ŋ naana, oŋma lɛ otutu nɛ alɔ ya lɔɔlɔhi a, alɔ lɔfu bi ɛnɛɛnɛ ohi ku alɔ le je otabɔ lɛ itica a. Alɔ lɔfu je uwa piya oklobiya amāŋ ɔncɛnya ku alɔ eko néē gbɔɔ ō wa ōjila, alɔ klla lɔfu je piya ocabɔ olɔhi lɛ uwa duu. Anyakwɔcɛ ku ujɔ klla lɔfu ta uwa ɔtu kwu ɔtu ŋma lɛ ō lɛ eko taajɛ lɛ uwa, mla ō nwu ācɛ nōo gē klɔcɛ mla uwa a ɛlā, klla ta uwa ahinya ku uklɔ néē yɔ i ya a. Alɔ gē gweeye nɛhi eko duuma nɛ alɔ ceyitikwu ya odee, ɛgɛ duuma nōó nyɛ lɛ naana, ku alɔ bi le ta ācɛ abɔ kéē gā yihɔtu ku Ujehofa klla gba ɔ ɛ̄gbā!