1. Ɔdiya nɛ Ujisɔsi da Ujehofa kóō gbo ayikpo ku nu a?

OTU amoomɛ gbɔbu ɛɛ ku Ujisɔsi kóō kwu a, ó yɔ i gbɛla lɛyikwu ɛjɛɛji unwalu nɛ ayikpo ku nu géē má a. Ohigbu ihɔtu nɛ Ujisɔsi lɛ lɛ ayikpo ku nu a, ó da Adā nu kóō “lɛ uwá gbō ŋmá ɛgiyí ɔ̄cɛ obɔ̄bí ā.” (Ujɔ́n. 17:14, 15) Ujisɔsi jé ka ó gáā gboji ŋ, anuɔ géē cigbihi gā ɔkpanco, ka Ebilii kē i gɔbu yɔ i nuunu ta ɔcɛ duuma nōo dɔka ō gba Ujehofa ɛ̄gbā a. Ɛnyā mafu ka ācɛ ɔlɛ Ujehofa géē cɛgbá ō gbotu.

2. Ɔdi cɛ lɛ alɔ jé kpɔcii ku Ujehofa géē cila ɔkɔ ō gba ku alɔ a?

² Ujehofa lɛ ɔkɔ ō gba ku Ujisɔsi po, ohigbu ka ó yihɔtu Ɔyinɔnyilɔ ku nu. Ɔdaŋ ka alɔ ceyitikwu mla ɛjɛɛji ɔfu ku alɔ, o ya ɔdā nōo he Ujehofa ɔtu a, ó géē yihɔtu alɔ duu. Ó géē po ɔkɔ ō gba ku alɔ kóō ta alɔ abɔ klla gbo alɔ tu. Ujehofa wɛ Adā ihɔtu. Ohigbu ɛnyā, ó géē gɔbu yɔ i leyi kwu ayipɛ ɔlɛ nu. Ɔdaŋ ka ó ya lɛ a ŋ, ó géē biya iye ku nu!

3. Ɔdiya nɛ alɔ cɛgbá ō gbotu ku Ujehofa icɛ a?

³ Alɔ cɛgbá ō gbotu ku Ujehofa babanya fiyɛ otɛtɛ. Ohigbu ka é lɛ Ebilii nu ŋma ɔkpanco ɛ ma, “ó le cɔ̄nū nɛ̄hi.” (Mafú 12:12) Ó ya ku ācɛ ōhī kéē gbɔɔ ō gbɛla, ku eko duuma néē gē ya alɔ ŋmo, é yɔ i “cɛ̄ Ɔwɔicō ɛhɔ̄.” (Ujɔ́n. 16:2) Ācɛ ōhī nōó kē kpɔtuce Ɔwɔico ŋ ma gē ya alɔ ŋmo, ohigbu ku alɔ wɛ ɛyɛɛyi gwu ācɛ nōo yɔ ipu ɛcɛ a ta. Ɔdā duuma nōo ya ɛɛ nɛ ācɛ gē ya alɔ ŋmo a, alɔ i gē yufii ŋ. Ɔdiya a? Ohigbu ku Ɛlā ku Ɔwɔico kahinii: “Óndú ā tōō kpɔ́tūce, ó kē géē lɔfú tū aá iyē, í klla gáā cɛ lɛ ɔ̄cɛ oyá ɔdōōbɔbí ā yá aá odée ŋ́.” (2 Utes. 3:3) Ɛgɛnyá nɛ Ujehofa gē gbo alɔ a? Alɔ géē kɛla lɛyikwu ɔdā ɛpa nɛ ó je lɛ alɔ a.

4. Ɛgɛ nɛ ɔkpá ku Ācɛ Ɛ́fēsɔsi 6:13-17 ka a, ɔdi nɛ Ujehofa je lɛ alɔ nōo géē gbo alɔ a?

⁴ Ujehofa lɛ aiyɛɛfu je lɛ alɔ, nōo lɔfu gbo alɔ ŋma ɛfú nɛ Ebilii yɔ i kpo tu alɔ a. (Jé Ācɛ Ɛ́fēsɔsi 6:13-17.) Iyɛɛfu nōo ŋma ɛgiyi Ɔwɔico a lɔfu nɛhi, klla gē yuklɔ lɔɔlɔhi! Amáŋ, alɔ géē gɔbu yɔ i yuklɔ mla aya doodu ku aiyɛɛfu a, ɔdaŋ ku alɔ dɔka kóō gbo alɔ. Ɔdi nɛ aya eyeeye ku iyɛɛfu a kwɛyi nu a? Alɔ géē kɛla lɛyikwu eyeeye ku uwa.

5. Ɔdi wɛ ɔkpá okwɛnyɔ ku ɔkwɛyi a, ɔdiya nɛ alɔ kē cika ō lɛ ɔ kwɛnyɔ a?

⁵ Ɔkpá okwɛnyɔ ku ɔkwɛyi a, kwɛyi ku ɛlā ɔkwɛyi nōo yɔ ipu Ɛlā ku Ɔwɔico nōo wɛ Ubáyíbu a. Ɔdiya nɛ alɔ cika ō lɛ ɔ kwɛnyɔ a? Ohigbu ku Ebilii “wɛ ɔ̄cokɛ̄mgbɛ̄ mɛ́mla ádā kú ɛ̄kɛ̄mgbɛ̄.” (Ujɔ́n. 8:44) Ó humayi kɛmgbɛ klla plla “odúúdú ācɛ kú ipú ɛcɛ” a ŋmiifi ihayi alɛwa ɛ! (Mafú 12:9) Amáŋ ɔkwɛyi nōo yɔ ipu Ubáyíbu a gē gbo alɔ, o ya ɛɛ ku aɛlā ɛkɛmgbɛ a kóō hii plla alɔ ŋ. Ɛgɛnyá nɛ alɔ gáā lɛ ɔkpá okwɛnyɔ ku ɔkwɛyi nyā kwɛnyɔ a? Alɔ lɔfu ya ɛnyā ŋma lɛ ō nwu ɛlā lɛyikwu Ujehofa, ō gba ɔ ɛ̄gbā “ipú alelékwū mɛ́mla ɔkwɛ̄yi,” mla ō yɔ i ya ɔdā nōo lɔhi eko doodu.—Ujɔ́n. 4:24; Āfi. 4:25; Uhíb. 13:18.

6. Ɔdi wɛ ɔkplɛfu ō kla ɔtu ku ɔdā okpaakpa ō ya a, ɔdiya nɛ alɔ kē cika ō lɛ ɔ kla ɔtu a?

⁶ Ɔkplɛfu ō kla ɔtu ku ɔdā ō kpaakpa ō ya a, kwɛyi ɔwɛ okpaakpa nɛ Ujehofa dɔka ku alɔ lā oyeeyi ku alɔ a. Ɔdiya nɛ alɔ cika ō bi ɔkplɛfu nyā le kla ɔtu a? Ɛgɛ nɛ ɔkplɛfu ō kla ɔtu gē gbo ɔtu ku icɔɔja a, ɛgɔɔma nɛ ɔkplɛfu ō kla ɔtu ku ɔdā okpaakpa ō ya a gē gbo alɔ duu a. Ɛnyā géē ya ku ɔdobɔbi ku ipu ɛcɛ nyā kóō lɛ abɔ kwu alɔ ŋ. (Aíit. 4:23) Ujehofa leyice ku alɔ géē yihɔtu ku nu, klla gba ɔ ɛ̄gbā mla ɛjɛɛji ɔtu ku alɔ. (Umát. 22:36, 37) Ohigbu ɛnyā, Ebilii gē ceyikwu kóō ci alɔ ŋma ō gba Ujehofa ɛ̄gbā mla ɛjɛɛji ɔtu ku alɔ. Ó kē i ya ɛnyā ŋma lɛ ō ya ku alɔ yihɔtu ku aɔdā nōo yɔ ipu ɛcɛ ku nu, nōó klla he Ujehofa ɔtu ŋ ma. (Ujɛ́m. 4:4; 1 Ujɔ́n. 2:15, 16) Amáŋ ɔdaŋ ku ula nyā i yuklɔ ŋ, ó gē ce ufi tu alɔ iyē, o ya ɛɛ ku alɔ ya ɔdā nōó he Ujehofa ɔtu ŋ.

7. Ɛganyá nɛ alɔ gáā lɛ ɔkplɛfu ku ɔdā okpaakpa ō ya a wiye a?

⁷ Alɔ géē lɛ ɔkplɛfu ku ɔdā okpaakpa ō ya a wiiye, ŋma lɛ ō lɛyitaajɛ lɛ ɔwɛ nɛ Ujehofa dɔka ku alɔ lā oyeeyi ku alɔ a. Mla ō yɛce ɛjɛɛji ɔdā nɛ ó dɔka ku alɔ ya a. (Aíjē 97:10) Ɔtu gē ya ācɛ ōhī ku ɔwɛ nɛ Ujehofa dɔka ku alɔ lā oyeeyi ku alɔ a, gē ya ku alɔ hii lɛ ɛga abɔyi alɔ ŋ. Amáŋ, ɔdaŋ ku alɔ lɛ abɔ ci ō yuklɔ mla ukɔ́ ku Ubáyíbu ipu oyeeyi ku alɔ, alɔ géē lɛbɛɛka icɔɔja nōo kwu ɔkplɛfu ō kla ɔtu ku nu i fu ɔgbɛfu, ohigbu ka ó gbɛla ku ɔkplɛfu ō kla ɔtu a gbɛnu nɛhi. Ɔɔma géē wɛ ɔdā ila nɛɛnɛhi! Amáŋ, ɔdaŋ ku alɔ yihɔtu ku Ujehofa, alɔ géē má ku íne ku nu “í kē lɔnɔ” ŋ, amáŋ ó gē nya oyeeyi ta.—1 Ujɔ́n. 5:3.

8. Ɔdi wɛ ɛyi kóō le tutu ō lɛ ablakpa ō gáā tɔɔna ku ɔkoolɔhi a wikpo a?

⁸ Upɔlu klla ta alɔ ɔtu kwu ɔtu ku alɔ le tutu ō lɛ ablakpa ō gáā tɔɔna ku ɔkoolɔhi ku ɛbɔ a wikpo. Ɔɔma wɛ ku alɔ cika ō le tutu eko doodu, ō tɔɔna ku ɔkoolɔhi ku Ajɔɔcɛ a. Eko duuma nɛ alɔ da ācɛ ɔhá lɛyikwu ɔkoolɔhi a, ɔtu okpoce ku alɔ gē lɔfu tōōtɔ̄ɔ̄. Ó gē ta alɔ ɔtu kwu ɔtu ō má ɛgɛ nɛ ācɛ ɔlɛ Ujehofa nōo yɔ ipu oduudu ɛcɛ a, gē bi ɛga duuma néē lɛ a le tɔɔna. Ocabɔ mafu, é gē tɔɔna ɛga uklɔ, inɔkpa, ŋma ɔlɛ gā ɔlɛ, ɔwɛ ɛga néē gē je ɔla lá, eko duuma néē gē lá ɔla, amāŋ eko duuma néē nyɔ gáā má aɔmaapu uwa nōó wɛ ācɛ ō gba Ujehofa ɛ̄gbā ŋ, amāŋ lɛ ācɛ néē jé a. Ɔdaŋ ku ufi gbɔɔ ō ya alɔ nɛhi nɛ alɔ lɛ abɔ ci  ō tɔɔna, alɔ géē lɛbɛɛka icɔɔja nōo kwu ablakpa ku nu i pla ɛpleeko nōó yɔ i kpɛfu, ó géē tɔɔtɛ nɛhi ku ikpo ku nu kóō lɛ agbe. Ohigbu ɛnyā, ó gáā tɔɔtɛ lɛ ɔ ō gbo iyi nu eko duuma néē gbɔɔ ō kpɛfu tu uwa gɛ ŋ, ó klla gáā tɔɔtɛ lɛ ɔ kóō yɛce ɔ́da ku ɔkpani nu ŋ.

9. Ɔdiya nōó cɛgbá ku alɔ bi ɔkplɛfu ku ɔtu okpoce a?

⁹ Ɔkplɛfu ku ɔtu okpoce a, kwɛyi ɔtu okpoce nɛ alɔ lɛ lɛ Ujehofa a. Alɔ kpɔtuce ka ó géē ya okonu nɛ ó ce a jila. Ɔtu okpoce ɔɔma géē ta alɔ abɔ ō ‘nyí ɔlá kú ɔyí ō cɔ̄lá nɛ̄ Ebilíi ī tá lɛ alɔ ā.’ Ɔdiya nɛ alɔ cɛgbá ō bi ɔkplɛfu nyā a? Ohigbu ka ó gē gbo alɔ, o ya ɛɛ ku aɛlā ō nwu ku ācɛ nōo cigbihi kwu ɛ̄gbā ō gba ku Ujehofa a kóō hii plla alɔ, amāŋ ya ku alɔ lɛ ɔtu ogbenyi eko duuma nɛ ācɛ gē ŋmo alɔ okonu ŋ. Ɔdaŋ ku alɔ i lɛ ɔtu okpoce ŋ, alɔ i gáā lɔfu ō lɛyitaajɛ lɛ Ujehofa eko duuma nɛ ācɛ ɔhá yɔ i kwu alɔ abɔfu ō ya ɔda nɛ̄ Ujehofa i dɔka ŋ ma ŋ. Amáŋ eko duuma nɛ alɔ ta ō ya ɔdā nɛ Ujehofa i dɔka ŋ ɛga uklɔ amāŋ inɔkpa, ayika ɔtu ɔkpoce ku alɔ yɔ i gbo alɔ a. (1 Upít. 3:15) Eko duuma nɛ alɔ ta ō yuklɔ néē géē gba ije nwune lɛ alɔ, amáŋ nōó gáā jɛga lɛ alɔ ō ya nwune ipu ɛ̄gbā ō gba ku alɔ lɛ Ujehofa ŋ, ayika ɔtu ɔkpoce ku alɔ yɔ i gbo alɔ a. (Uhíb. 13:5, 6) Ɔdaŋ ku alɔ yɔ i gba Ujehofa ɛ̄gbā naana néē yɔ i ya alɔ ŋmo, ayika ɔtu ɔkpoce ku alɔ yɔ i gbo alɔ a.—1 Utes. 2:2.

10. Ɔdi wɛ ɔkpu ō kwɛyi ku onyata a, ɔdiya nɛ alɔ kē cika ō lɛ ɔ kwɛyi a?

 ¹⁰ Ɔkpu ō kwɛyi ku onyata a wɛ eyiyoce nɛ Ujehofa je lɛ alɔ a. Ó wɛ eyiyoce ka ó géē cila ɛjɛɛji ācɛ nōo ya ɔdā nōo wɛ ococɛ ku nu a ule, ɔdaŋ nɛ alɔ kóō gekwu naana, ó géē je alɔ heyi ŋma ɔlekwu. (1 Utes. 5:8; 1 Utím. 4:10; Utáy. 1:1, 2) Ɛgɛ nɛ ɔkpu ō kwɛyi gē gbo ɛyi ku icɔɔja a, eyiyoce ku onyata a gē gbo ɛlá ō gbo ku alɔ. Ɛgɛnyá a? Eyiyoce ɔɔma gē lɛ ɔtu ku alɔ kwu okonu ō ce ku Ɔwɔico, klla gē ta alɔ abɔ ku unwalu nɛ alɔ lɛ a kóō hii cɛ lɛ abɔ hɛ alɔ iyē fiyɛ ɔfu ŋ. Ɛgɛnyá nɛ alɔ gáā lɛ ɔkpu ō kwɛyi nyá kwɛyi a? Alɔ lɔfu ya ɛnyā ŋma lɛ ō gbɛla ɔwɛ nɛ Ujehofa gē gbɛla a. Ocabɔ, alɔ i kpɔtuce ɔdā agbenu ku alɔ nōo géē mɛ anaana a ŋ, amāŋ alɔ kpɔtuce Ɔwɔico.—Aíjē 26:2; 104:34; 1 Utím. 6:17.

11. Ɔdi wɛ ɔkpacaŋgeli ku Alelekwu Ihɔ a, ɔdiya nōó kē cɛgbá ku alɔ bi ɔ le yuklɔ a?

¹¹ Ɔkpacaŋgeli ku Alelekwu Ihɔ a wɛ ɛlā ku Ɔwɔico nōo wɛ Ubáyíbu a. Ɔkpacaŋgeli ɔɔma lɔfu ca ɛlā ɛkɛmgbɛ duuma tɛɛcɛ, mla ō ya ku ācɛ kéē lɛ ohɛta ŋma aɛlā ō nwu ɛkɛmgbɛ mla auce obɔbi ō ya. (2 Ukɔ́r. 10:4, 5; 2 Utím. 3:16, 17; Uhíb. 4:12) Alɔ lɔfu nwu ō bi ɔkpacaŋgeli ɔɔma yuklɔ lɔɔlɔhi, ŋma lɛ ō ya oklɔcɛ ku abɔyi alɔ, mla ō jahɔ tu ɛlā nɛ ɔwa ku alɔ gē nwu alɔ a. (2 Utím. 2:15) Ó wɛ ɔkplɛfu foofunu nɛ Ujehofa je lɛ alɔ a ŋ, amáŋ Ujehofa je ɛdɔ ogbotu ɔhá lɛ alɔ. Ɔdi nōó wɛ a?

12. Ɔdā ɔhá nyá nɛ alɔ cɛgbá kpɔ a, ɔdi kē ya a?

¹² Icɔɔja nōo jé ō kpɛfu lɔɔlɔhi, jé ku anu cɛgbá otabɔ ku aicɔɔja ɔhá o ya ɛɛ kóō yale gla. Ɔwɛ ekponu ɔɔma, alɔ cɛgbá otabɔ ku ayinɛ alɔ o ya ɛɛ ku alɔ ya unu ku Ebilii lé. Ujehofa lɛ ɔ ya tɔɔtɛ ɔwɛ nɛ ācɛ ɔhá lɔfu ta alɔ abɔ. Uwa kē wɛ “ācɔ̄lóhɔ́nyɛtá ɔ́mpa” alɔ nōo yɔ ipu oduudu ɛcɛ a.—1 Upít. 2:17.

13. Ɛgɛ nɛ ɔkpá ku Ācɛ Uhíbru 10:24, 25 ka a, ɛgɛnyá nɛ ōjila ku alɔ gē ta alɔ abɔ a?

¹³ Ɔwɛ éyi nɛ alɔ gē miyɛ otabɔ a wɛ ō gā ōjila ku alɔ. (Jé Ācɛ Uhíbru 10:24, 25.) Ekoohi, ɔtu gē gbenyi lɛ ɛjɛɛji alɔ. Eko duuma nɛ ɔɔma le ya, ōjila ku ujɔ lɔfu ta alɔ ɔtu kwu ɔtu. Alɔ gē lɛ ɔtu ō tu kwu ɔtu ŋma ohi nɛ ayinɛ alɔ gē ta ŋma ipu ɔtu a. Aɛlā ō ka tɛɛcɛ ŋma Ubáyíbu mla uklɔ néē gē ya ɛyi ede a, gē lɛ abɔ kwu alɔ ɔtu ō gɔbu yɔ i gba Ujehofa ɛ̄gbā. Alɔ kē i lɛ ɔtu ō tu kwu ɔtu eko duuma nɛ alɔ kɛla mla uwa gbɔbu ɛɛ ku ōjila kóō gbɔɔ mla oŋmɛyi ku ōjila. (1 Utes. 5:14) Ōjila ku alɔ klla gē ya ɔ tɔɔtɛ lɛ alɔ ō je otabɔ lɛ ācɛ ɔhá, ɔɔma kē i cɛ lɛ alɔ gweeye. (Ācot. 20:35; Uróm 1:11, 12) Ōjila ku alɔ klla gē nwu alɔ ō jé ō tɔɔna lɔɔlɔhi. Ocabɔ mafu, alɔ gē nwu ō jé ō yuklɔ mla aɔkpá nōo yɔ ipu Aɔdā Nɛ Alɔ Gē Bi Le Ya Oklɔcɛ Mla Ācɛ a lɔɔlɔhi. Ohigbu ɛnyā, ya otutu ku ōjila lɔɔlɔhi. Ɛpleeko ku ōjila, jahɔ lɔɔlɔhi. Igbihi nɛ ōjila le ŋmɛyi, yuklɔ mla aɛlā nɛ a nwu a. Ō ya aɔdā nōo ba nyā, géē ya ku a je piya “icɔ́ɔ́ja olɔhi kú Ohɔ́nyɛtá Ujísɔ̄si.”—2 Utím. 2:3.

14. Otabɔ ɔhá nyá yɔ lɛ alɔ a?

¹⁴ Alɔ klla lɛ otabɔ ku umiliyɔn alɛwa ku aalelekwu otɛhɔ nōo lɔfu nɛhi. Gbɛla lɛyikwu ɔdā nɛ alelekwu otɛhɔ ekponu lɔfu ya a! (Ayis. 37:36) Leyi yɛ ocabɔ ku aalelekwu otɛhɔ nōo wɛ icɔɔja a. Ó lɛ ɔlɛɛcɛ duuma, amāŋ alelekwu obɔbi nōo ya aicɔɔja olɔfu ku Ujehofa lé gla ŋ. Ujehofa wɛ ɔcɛ nōo lɔfu fiyɛ duu a. Ó lɛ aafu ŋ, ɔdaŋ ka ó yɔ mla alɔ, alɔ géē lɔfu fiyɛ ācɛ nōo gē ya alɔ ŋmo, ɛgɛ duuma néē kóō lɛwa lɛ a. (Ācoh. 6:16) Ɛlā nyā wɛ ɔkwɛyi i bi! Ācɛ ɛgiyi uklɔ ku uwɔ, ayipɛ inɔkpa ku uwɔ, amāŋ ācɛ apɔlɛ ku uwɔ nōó jé Ujehofa ŋ ma, lɔfu kɛla amāŋ ya ɔdā nōo géē cɛ lɛ ɔtu ku uwɔ gbeenyi. Eko  ɛgɔɔma, gbɛla lɛyikwu ɛjɛɛji ācɛ nōo lɔfu je otabɔ gā uwɔ a. Bla, ku á yɔ foofu uwɔ ipu unu nyā ŋ. A yɔ i yɛce ɔwɛ nɛ Ujehofa yɔ i mafu gā uwɔ a.

15. Ɛgɛ nɛ ɔkpá ku Ayisáya 54:15, 17 ka a, ɔdiya nɛ ɔcɛ duuma i gáā ci ācɛ ɔlɛ Ɔwɔico ŋma ō tɔɔna gla ŋ ma?

¹⁵ Ó lɛ ɔdā alɛwa nōo ya nɛ Ebilii mla ɛcɛ ku nu gē wɔtu alɔ. Alɔ i gē lɛ abɔ ipu ɛlā imɛli amāŋ ɛfú ō kpo ŋ. Alɔ gē da ācɛ lɛyikwu iye ku Ɔwɔico, klla gē tɔɔna ku Ajɔɔcɛ ku nu foofunu gáā lɔfu bi ɛbɔ wa, klla ya odee ɔwɛ nɛ Ɔwɔico dɔka a. Alɔ gē lɛ ɔ ta ācɛ eyī peee, ku ɔcɛ nɛ ɛcɛ nyā yɔ ipu abɔ ku nu a wɛ ɔcɛ obɔbiipu mla ɔcɛ ō ŋmo ɔcɛ. (Ujɔ́n. 8:44) Alɔ klla gē tɔɔna ka ó gáā gboji gɛ ŋ, é géē je ɛcɛ ku Ebilii nu cataajɛ. Amáŋ, Ebilii mla ācɛ nōo gē yɛce ɔ a i gáā lɛ abɔ ci uklɔ ku ɔna ō ta ku alɔ gboogboo gla ŋ. Ikɔkɔ ɔɔma, alɔ géē gɔbu yɔ i cɛtra Ujehofa ɔwɛ duuma nōo tɔɔtɛ! Naana nɛ Ebilii lɔfu nɛhi a, ó tɔɔtɛ lɛ ɔ kóō ci ɔkoolɔhi lɛyikwu Ajɔɔcɛ a ŋma ō yɛ fu ācɛ nōo yɔ ipu oduudu ɛcɛ a ŋ. Ɛnyā tɔɔtɛ, ohigbu ku Ujehofa yɔ i gbo alɔ.—Jé Ayisáya 54:15, 17.

16. Ɔdi nɛ Ujehofa gáā ya lɛ ācɛ ɔlɛ nu ɛpleeko ku owe nɛhi a?

¹⁶ Ɔdi nɛ alɔ yɔ i leyi ce ɛcɔbu a? Ɛpleeko ku owe nɛhi a, Ujehofa géē gbo alɔ ɔwɛ ohidaago. Aflɛyi, ó géē nya ācɛ nōo hayi kpaakpa lɛ ɔ a ta, ɛpleeko nɛ ó gáā ya ku aɔcɛ́ ku ɛcɛ kéē ca Ubabilɔn Nɛhi nōo wɛ ɔwa ku ɛ̄gbā ō gba ɛkɛmgbɛ taajɛ a. (Mafú 17:16-18; 18:2, 4) Oŋma ɔɔma, ó géē nya ācɛ ɔlɛ nu ta eko nɛ ó gáā ca aya ohile ku ɛcɛ ku Ebilii nyā taajɛ ipu ɛfú ku Amagɛdɔn a.—Mafú 7:9, 10; 16:14, 16.

17. Ɛgɛnyá nɛ alɔ gáā lɛ itene ŋma ō yɔ kwu Ujehofa ajaajɛ a?

¹⁷ Ɔdaŋ ku alɔ yɔ kwu Ujehofa ajaajɛ, Ebilii i gáā ya alɔ ɔdobɔbi duuma nōo géē lɛɛcɛ piyoo ŋ. Ku ɛlā ɔkwɛyi a, anu néē kóō gáā je cataajɛ piyoo a. (Uróm 16:20) Ó lɛ a, lɛ ɛjɛɛji aiyɛɛfu a kpo wiiye cɛɛ ku a bi uwa le yuklɔ eko doodu! A hii ceyitikwu nuunu ta Ebilii mla ɛcɛ ku nu abɔyi uwɔ ŋ. Je otabɔ lɛ ayinɛ uwɔ. Cɛɛ ku a klla yɛce ɔwɛ nɛ Ujehofa gē mafu a. Ɔdaŋ ku a ya lɛ a, le jé kpɔcii ku Adā uwɔ nōo yɔ ɔkpanco nōo yihɔtu uwɔ a, géē lɛ ɔfu tu uwɔ iyē, klla géē gbo uwɔ.—Ayis. 41:10.