1-2. (a) Ɛgɛ nɛ ɔkpá ku Aíita 16:31 ka a, ɛgɛnyá nɛ alɔ cika ō leyi má ayinɛ alɔ nōo le hilokplici ɛ ma? (b) Aɔka nyá nɛ alɔ gáā cila ipu ikpɛyi ɛlā nyā a?

ĀCƐ nōo gē gā ɛga ō mlɛnyɔ klla he ija nōo yɔ Arkansas, U.S.A. a, lɔfu má ɛcɔ o gbɔɔla nɛhi néē hi ka u diamond a ba ajɛ anca. Amāŋ, é bu audiamond a ŋma ajɛ, lɛ uwa ya aɔda ifa ɛ ŋ. Ohigbu ɛnyā, ācɛ alɛwa nōo gē má audiamond nyā a i kóō lɔfu jé ɔdā néē yɔ i má a ŋ, cɛɛ é le yɛ gla ɔ ta.

² Bɛɛka u diamond ɔɔma a, ayinɛ alɔ nōo hayi kpaakpa nōo le hilokplici ɛ ma, lɛbɛɛka ɔdā agbenu ō cɛgbá nɛhi a. Ubáyíbu ka inyilɛyi nɛhɛ ku uwa wɛ ukata. (Jé Aíita 16:31; 20:29) Naana a, ó lɔfu tɔɔtɛ ku alɔ jé lɛyikwu ɔdā agbenu nyā ŋ. Ayipɛ oklobiya alɛwa nōo jé ka ayinɛ alɔ nōo hayi kpaakpa nōo le hilokplici ɛ ma cɛgbá nɛhi a, lɔfu lɛ itene alɛwa ŋma ɛgiyi uwa nōo fiyɛ ije ō lɛ. Ipu oklɔcɛ nyā, alɔ géē cila ohi ku aɔka ɛta nōo kahinii: Ɔdiya nɛ Ujehofa gē leyi má ayinɛ alɔ nōo le hilokplici ɛ ma ka é cɛgbá nɛhi a? Ɛgɛnyá nɛ ayinɛ alɔ nōo le hilokplici ɛ ma, cɛgbá ipu ɔwa ku Ujehofa nɛhi a? Ɔdi nɛ alɔ lɔfu ya, o ya ku alɔ nwu ɛlā ŋma ocabɔ ku uwa a?

3. Ɛgɛ nɛ ɔkpá ku Aíjē Kú Ɛ̄gbā 92:12-15 ka a, ɔdiya nɛ ayinɛ alɔ nōo hayi kpaakpa lɛ Ujehofa nōo le hilokplici ɛ ma cɛgbá lɛ ɔ nɛhi a?

³ Ayinɛ alɔ nōo hayi kpaakpa nōo le hilokplici ɛ ma cɛgbá lɛ Ujehofa nɛhi. Ó jé ācɛ néē wɛ piii ipu ɔtu a, ɛnɛɛnɛ uce ō ya néē kē lɛ a jɛ Ujehofa eyī i bi. Ó gē he ɔ ɔtu nɛhi eko duuma nɛ ayinɛ alɔ nōo le hilokplici ɛ nōo hayi kpaakpa a, gē da ayipoklobiya ɛlā ijeeyi néē jé klla má ŋmifi ihayi alɛwa néē yuklɔ lɛ  ɔ a. (Ujób. 12:12; Aíit. 1:1-4) Ɔtu ō lé ku uwa kē wɛ ɔdā nōo he Ujehofa ɔtu nɛhi. (Umál. 3:16) É má unwalu alɛwa ipu oyeeyi ku uwa ɛ, amáŋ é kpɔtuce Ujehofa lɔfu lɔfu kpɔ. Eyiyoce ku uwa lɛyikwu ɛcɔbu a gē lɔfu tōōtɔ̄ɔ̄, fiyɛ eko néē gáā jé ɔkwɛyi ɛpɛpɛ a. Ujehofa klla yihɔtu uwa nɛhi ohigbu ka é gɔbu yɔ i “gwá īkpō eko nēé le hīla nááná.”​—Jé Aíjē Kú Ɛ̄gbā 92:12-15.

4. Ɔdi lɔfu ta ayinɛ alɔ nōo gbɔɔ ō je hilokplici ɛ ma ɔtu kwu ɔtu a?

⁴ Ɔdaŋ ku a gbɔɔ ō je hilokplici ɛ, jé kpɔcii ka Ujehofa blatu ɛjɛɛji uklɔ olɔhi nɛ a humayi ya lɛ ɔ ŋma igbihi a. (Uhíb. 6:10) A je otabɔ ipu uklɔ ku ɔna ō ta a lɔfu lɔfu ɛ, ɛnyā kē wɛ ɔdā nōo he Ujehofa ɔtu nɛhi. A lé ɔtu ku auwnalu ɛyɛɛyɛyi, kwu aɛnɛ ō kwu uwɔ iyē nɛɛnɛhi a duu. A lɛyitaajɛ klla kɛla lɛyikwu ɛgɛ nɛ Ujehofa dɔka ku alɔ lā oyeeyi ku alɔ a duu ɛ. A kē ya uklɔ ɛyɛɛyɛyi néē je gā uwɔ ipu ujɔ a gā ajaajɛ, klla nwu ācɛ ɔhá ɛgɛ néē géē ya lɔhi duu a. A klla ceyitikwu yɛce opiyabɔ ɛyɛɛyɛyi nɛ ɔwa ku Ujehofa ya a. A je otabɔ mla ɔtu ō tu kwu ɔtu lɛ ācɛ nōo gē yuklɔ lɛ Ujehofa eko doodu a. Ujehofa yihɔtu uwɔ nɛhi ohigbu ɛgɛ nɛ a yɔ kwu ɔ gā ajaajɛ a. Ó ce okonu ka anuɔ i gáā “kwu hɛ́ ācɛ ɔlɛ́ nū ā tá” gboogboo ŋ! (Aíjē 37:28) Ó ce okonu gā uwɔ kahinii: “Jāā gbéeko nɛ̄ aá kwu kpó hila ókplīcī le īnyīlɛ̄yí nɛ̄hɛ́ bū. Ami yɔ́ɔ́na kú aá ā, n kē í leyīkwu aá.” (Ayis. 46:4) Ó lɛ a, a hii gbɛla ka anuɔ i cɛgbá ipu ɔwa ku Ujehofa gɛ ŋ. A cɛgbá nɛhi!

5. Ɛlā nyá nɛ ayinɛ alɔ nōo kwu hilokplici ɛ ma, cɛgbá ō bi ɔtu a?

⁵ Ayinɛ alɔ nōo kwu hilokplici ɛ ma, lɛ ɔdā alɛwa ō ya ipu ɔwa ku Ujehofa. Ó wɛ ɔkwɛyi ka é lɛ ɔfu ɛgɛ néē lɛ gbɔbu a gɛ ŋ, amáŋ é lɔfu bi aɔdā alɛwa néē má ipu oyeeyi ku uwa ɛ ma le je otabɔ. Ujehofa kē lɔfu gɔbu yɔ i bi uwa yuklɔ ɔwɛ ɛyɛɛyɛyi, ɛgɛ nɛ alɔ géē má ŋma ocabɔ ku eko igble mla aku ó babanya a.

6-7. Da alɔ ocabɔ ŋma ipu Ubáyíbu ku ɛgɛ nɛ Ujehofa hɔhā ce ācɛ nōo le hilokplici, ohigbu ɛgɛ néē yɔ i gba ɔ ɛ̄gbā kpaakpa kpɔ a.

⁶ Alɔ lɔfu má aocabɔ alɛwa ŋma ipu Ubáyíbu, ku ācɛ nōo gɔbu yɔ i gba Ujehofa ɛ̄gbā naana néē kwu hilokplici a. Ocabɔ mafu, Umosisi wɛ ihayi ofu ɛnɛ (80) eko nɛ ó  je piya ɔcomɛɛbɛ ku Ujehofa mla otrɛyi ku ācɛ Isrɛlu a. Udaniyɛlu gɔbu yɔ i yuklɔ ku ɔcomɛɛbɛ ku Ujehofa kpɔ, naana nɛ ó le fiyɛ ihayi ofu ɛnɛ ce igwo (90) a. Ɔyikpo Ujɔni kē le faajɛ ihayi ofu ɛnɛ ce igwo, ɛpleeko nɛ ó kē ta ɔkpá ku Ɔdā Nēé Mafú Lɛ Ujɔ́ni a duu.

⁷ Ocabɔ ku ācɛ alɛwa ɔhá nōo hayi kpaakpa yɔ ipu Ubáyíbu, nɛ ācɛ i lɔfu jé lɛyikwu uwa ŋ. Naana a, Ujehofa jé, ó kē hɔhā ce uwa ku ɛgɛ néē yɔ kwu ɔ gā ajaajɛ a. Ocabɔ mafu, Ubáyíbu kɛla ligii lɛyikwu Usimiyɔn “ɔ̄cɛ nōo gē yá ɔdā okpaakpa, klla ī lɛ ojīlīmā ce Ɔwɔicō” a. Ohigbu ɛnyā, ó kē lɛ ɛnɛɛnɛ ɛga je lɛ ɔ kóō lɛ Ujisɔsi má eko nɛ ó wɛ ɔyipɛ nɛncɛ a, kóō klla lɛ ɔdā nōo géē ya da ɔyi a mla ɛ́nɛ́ nu ka taajɛ. (Ulúk. 2:22, 25-35) Gbɛla tu ocabɔ ku ɔnyokwū Ana nōo wɛ ɔcomɛɛbɛ a duu. Ó wɛ ihayi ofu ɛnɛ ce ɛnɛ (84), amáŋ “ó kē nyɛ̄ɛ̄ ŋmá Agblīihɔ-nɛ̄hi ā” jeeje ɛɛ ŋ. Ujehofa lɛ ɔhā hɛ ce ɔ ohigbu ka ó gē gā Agbliihɔ nɛhi a eko doodu, ó klla cɛ lɛ ɔ lɛ Ujisɔsi ɔyi ɛpɛpɛ néē ma a má. Usimiyɔn mla Ana cɛgbá ipu eyī ku Ujehofa nɛhi.​—Ulúk. 2:36-38.

8-9. Ɔdi nɛ ɔyinɛ alɔ nɔnya éyi ya ipu ɔwa ku Ujehofa eko nɛ ɔba nu gekwū a?

⁸ Ɛpleeko ku alɔ nyā, ayinɛ alɔ nōo hayi kpaakpa nōo le hilokplici ɛ ma, wɛ ɛnɛɛnɛ ocabɔ lɛ aɛdrɔ duu. Ku alɔ leyi yɛ ocabɔ ku ɔyinɛ alɔ nɔnya Lois Didur. Ó wɛ ihayi ofu ce éyi (21) eko nɛ ó gbɔɔ ō yuklɔ ku ɔcɛ ō gbɔbu ɔna ō ta ɛdɔ ɛyɛɛyi ipu éwo ku Canada a. Igbihi ɔɔma, anu mla ɔba nu John yuklɔ ku ɔcɛ o leyikwu usɛkut ihayi alɛwa. Igbihaajɛ é gā gbɔɔ ō yuklɔ Abɔ Ku Ɛga Ō Yuklɔ Ku Alɔ, nōo yɔ u Canada a fiyɛ ihayi ofu (20). Eko nɛ ɔyinɛ alɔ Lois kwu piya ihayi ofɛɛpa ce igwahata (58) a, é lɛ anu mla ɔba nu John higwū ku uklɔ ɔhá ipu éwo ku Ukraine. Ɔdi néē gáā ya a? É gbɛla ku aa le hilokplici ō nyɔ gáā yuklɔ ipu éwo ɔhá nɛɛ? É miyɛ uklɔ a, é klla kwu John i piya ɔcɛ éyi ku Ígwu Nōo Gē Leyi Kwu Abɔ Ku Ɛga Ō Yuklɔ Ku Alɔ a. Igbihi nɛ ihayi ahaapa gáā le yɛ a John gekwū, amáŋ ɔyinɛ alɔ Lois le miya ō gɔbu ipu uklɔ ku nu. Babanya ó wɛ ihayi ofɛɛnɛ ce éyi (81). Naana a, ó yɔ i yuklɔ lɛ Ujehofa kpaakpa, ipu Abɔ Ku Ɛga Ō Yuklɔ Ku Alɔ nōo yɔ Ukraine a.

⁹ Bɛɛka ɔyinɛ alɔ nɔnya Lois a, aanyā okwū alɛwa yɔ icɛ néē lɔfu jé lɛyikwu uwa lɔɔlɔhi, bɛɛka eko nɛ ɔba uwa yɔ a gɛ ŋ. Naana a, é cɛgbá nɛhi kpɔ. Anyā okwū alɛwa nōo ta ɔba uwa abɔ ŋmifi ihayi alɛwa, nōo klla gɔbu yɔ i gbā Ujehofa ɛ̄gbā kpaakpa babanya kpɔ a, cɛgbá lɛ Ujehofa nɛhi. (1 Utím. 5:3) Anyā okwū nyā klla gē ta aɛdrɔ ɔtu kwu ɔtu nɛhi.

10. Ɛnɛɛnɛ ocabɔ nyá nɛ ɔyinɛ alɔ Tony le taajɛ a?

¹⁰ Ayinɛ alɔ alɛwa nōo hayi kpaakpa nōo le hilokplici, nēe yɔ inɛcí ɛga néē gē leyikwu ācɛ nōo le hilokplici ɛ ma cɛgbá nɛhi duu. Ocabɔ mafu, ɔyinɛ alɔ éyi néē hi ka u Tony a yɔ ɛdɔ inɛcí nyā duu. Ó ya ubatisim Ɔya Ɔmahata ku ihayi ku 1942 eko nɛ ó wɛ ihayi ofu (20) a, ipu igeli ku Pennsylvania, U.S.A. Ó gboji ŋ nɛ ó lɛ  ubatisim ya a, é da ɔ ka ó gā wɛ ipu icɔɔja. Amáŋ abɔɔ ó ta kóō wɛ a, é kwu ɔ ta agba ihayi ɛpa ce ɔya ɛhili. Anu mla ɔnyā nu Hilda, bi ayi ku uwa ɛpa jɛ ipu ɔkwɛyi a. Ŋmifi ihayi alɛwa nōo gā yɛ a, ɔyinɛ alɔ Tony yuklɔ ku presiding overseer (babanya néē gē hi ka ɔcɛ o leyikwu ōmiya ku anyakwɔcɛ ku ujɔ a) ipu ujɔ ɛyɛɛyɛyi ɛta mla ɔcɛ o leyikwu ojileyi ku usɛkut duu ɛ. Ó gē nyɔ gā inu agba gáā tɔɔna klla klɔcɛ ku Ubáyíbu mla ācɛ. Naana nɛ ó le faajɛ ihayi ofu ɛnɛ ce igwahata (98) ɛ ma, ɔyinɛ alɔ Tony i dɔka ō habɔ uklɔ ō ya lɛ Ujehofa ta ŋ kpɔ. Ó ceyitikwu mla ɛjɛɛji ɔfu ku nu, yɔ i gba Ujehofa ɛ̄gbā tɔha mla ayinɛ nōo yɔ ipu ujɔ ku nu a!

11. Ɛgɛnyá nɛ alɔ gáā mafu ku alɔ lɛ ɛlá wu ayinɛ alɔ nōo le hilokplici ɛ, nōo yɔ inɛcí ɛga néē gē leyikwu ācɛ nōo le hilokplici a?

¹¹ Ɛgɛnyá nɛ alɔ gáā mafu ojilima lɛ ayinɛ alɔ nōo le hilokplici ɛ, nōo yɔ inɛcí ɛga néē gē leyikwu ācɛ nōo le hilokplici ɛ ma? Eko nɛ ó tɔɔtɛ, anyakwɔcɛ ku ujɔ lɔfu ta uwa abɔ wa ōjila ku ujɔ, amāŋ jahɔ ta ōjila ku ujɔ klla gɛɛcɛ ku uklɔ ku ɔna ō ta. Alɔ kē lɔfu mafu ku alɔ lɛ ɛlá wu uwa ŋma lɛ ō nyɔ gáā má uwa, amāŋ hi uwa igwú o bu ipu uvidio. Alɔ mafu ku alɔ lɛ ɛlá wu ayinɛ alɔ nōo yɔ inɛcí, ɛga néē gē leyikwu ācɛ nōo le hilokplici, nōo yɔ ligbo ligbo ŋma ɛga nɛ ujɔ ku uwa yɔ a. Alɔ cɛgbá ō leyikwu ɛcɛ lɔɔlɔhi o ya ɛɛ ku alɔ hii leyi gwu uwa bonu ŋ. Eko duuma nɛ alɔ gē kɛla lɛ uwa, ó lɔfu tɔɔtɛ lɛ ōhī ku uwa ō kɛla lɛyikwu iyi uwa ŋ. Amáŋ alɔ géē lɛ ɔtu ō tu kwu ɔtu nɛhi, ɔdaŋ ku alɔ bi eko alɛwa da uwa ɔka klla jahɔ lɔɔlɔhi, eko néē yɔ i kɛla lɛyikwu eeye néē lɛ ipu ɔwa ku Ujehofa ɛ ma.

12. Ɛdɔ ācɛ nyá nɛ alɔ lɔfu má ipu ujɔ ku alɔ a?

¹² Ó kē lɔfu hɛ alɔ idaago ō jé ka ocabɔ ku ayinɛ alɔ nōo hayi kpaakpa, klla le hilokplici ɛ ma yɔ ipu ujɔ ku alɔ duu. Ɔyinɛ alɔ nɔnya Harriette gba Ujehofa ɛ̄gbā kpaakpa ihayi alɛwa, ipu ujɔ nōo yɔ ɛga nɛ ó ŋma a New Jersey, U.S.A. Anɔɔ ó nyɛɛ ŋma abɔɔ gáā lā mla ɔyi nu nɔnya éyi a. Ayinɛ nɔnyilɔ nōo yɔ ipu ujɔ ɛpɛpɛ ku nu a, gē tubla ɔ ajaajɛ o ya ɛɛ kéē lɛ ɔ jé lɔɔlɔhi, anɔɔ é gáā le má ka ɔyinɛ alɔ nyā lɛ ɔdā o cɛgbá nɛhi a. Ó gē ka uwa ɔka o ta ɔtu kwu ɔtu lɛyikwu ɔdā nɛ ó má ipu uklɔ ku ɔna ō ta, ɛpleeko nɛ ó miyɛ ɛlā ɔkwɛyi a ɛpla ihayi ku 1920 a. Ɛpleeko ɔɔma, eko duuma nɛ ó gā ɛcɛ gáā yuklɔ ku ɔna ō ta, ó gē bi ɔdā ō le na ayinu ku nu ohigbu néē géē je ɔ kwu ta inu agba. Igbo ɛpa ɛpla ihayi ku 1933, é kwu ɔ ta inu agba ipu alaadi ɛpa. Ɛpleeko ɔɔma, ɔba nu nɛ ó wɛ Ɔcɛ Ocijali ku Ujehofa ŋ ma, gē lɛ ɛlá wu ɔ lɔɔlɔhi klla gē leyikwu ayipɛ ɔlɛ nu ɛta nɛ ó ma eko ɔɔma a. Ku ɛlā ɔkwɛyi, ayinɛ alɔ nōo hayi kpaakpa bɛɛka ɔyinɛ alɔ nɔnya Harriette a cɛgbá ō lɛ ojilima ce uwa!

13. Ɔdi nɛ alɔ nwu ŋma ɛga nɛ ayinɛ alɔ nōo hayi kpaakpa, nōo kwu hilokplici ɛ ma lɛ ipu ɔwa ku Ujehofa a?

¹³ Ayinɛ alɔ nōo le hilokplici ɛ ma, cɛgbá lɛ Ujehofa mla ɔwa ku nu nɛhi. É má ɛgɛ nɛ Ujehofa hɛ ɔhā ce ɔwa ku nu, mla uwa abɔyi uwa igbalɛwa ɛ ma. É klla nwu ɛlā alɛwa ŋma inyileyi ku uwa duu ɛ. Ceyitikwu ku a má ɛlā ijeeyi néē gē ka a bɛɛka “éŋkpɔ̄ ɔkpá” a, cɛɛ ku a nwu ɛlā ŋma ɛgiyi uwa. (Aíit. 18:4) Ɔdaŋ ku a gē lɛ eko taajɛ o ya ɛɛ ku a jé uwa lɔɔlɔhi, ɔtu okpoce ku uwɔ géē yɔ i lɔfu tōōtɔ̄ɔ̄, a klla géē nwu ɔdā alɛwa ŋma ɛgiyi uwa!

14. Ɔdi nɛ ɔkpá ku Oblatūkíne 32:7 ta ayipoklobiya ɔtu kwu ɔtu kéē ya a?

¹⁴ Awɔ gáā ya ōmiya ku a kɛla lɛ ayinɛ alɔ nōo le hilokplici ɛ ma a. (Jé Oblatūkíne 32:7.) Ɔkwɛyi, é lɔfu mɛɛbɛ lɔɔlɔhi gla gɛ ŋ, é kē lɔfu yiyawu lɔɔlɔhi bɛɛka otɛtɛ gɛ ŋ, é kē lɔfu kɛla nwune gla gɛ ŋ duu. Naana a, é dɔka ō yuklɔ lɛ Ujehofa kpɔ. É lɛ “iyē olɔhi” lé mla Ujehofa gbɔbu ɛ. (Ɔ̄cok. 7:1) Blatu ɔdā nōo ya  ɛɛ néē cɛgbá lɛ Ujehofa a. Gɔbu yɔ i lɛ ojilima ce uwa. Lɛbɛɛka Ɛlayissa a, ó ta kóō habɔ Ɛlayija ta ɛ̄cī amoomɛ néē yɔ tɔha a. Igbɛta Ɛlayissa kahinii: “Ń gāa cīgbīhi gwū uwɔ tá ŋ́.”​—2 Aɔ́cɛ́ 2:2, 4, 6.

15. Aɔka nyá nɛ alɔ lɔfu da ayinɛ alɔ nōo le hilokplici ɛ ma?

¹⁵ Mafu ka lɛ ɛlá wu ayinɛ alɔ nōo le hilokplici ɛ ma, ŋma lɛ ō da uwa ɔka ɛyɛɛyɛyi. (Aíit. 1:5; 20:5; 1 Utím. 5:1, 2) A lɔfu da uwa aɔka ɛgɛnyā: “Eko nɛ a wɛ ɔyipɛ a, ɔdi cɛ gā uwɔ jé kpɔcii ku a lɛ ɔkwɛyi a jé ɛ ma?” “Ɛgɛnyá nɛ aɔdā ɛyɛɛyɛyi nōo ya da uwɔ ɛ ma, ta uwɔ abɔ ku a tubla Ujehofa ajaajɛ a?” “Ɔdi ta uwɔ abɔ ku a yɔ i lɛ eeye ipu uklɔ ō ya lɛ Ujehofa a?” (1 Utím. 6:6-8) Cɛɛ a jahɔ lɔɔlɔhi eko néē yɔ i ka uwɔ ɔka ku uwa a.

16. Ɛgɛnyá nɛ ō kɛla tɔha gáā ta ɔyinɛ alɔ nōo le hilokplici ɛ ma, mla ɔyinɛ alɔ nōo wɛ ɛdrɔ a abɔ a?

¹⁶ Eko nɛ ɔyinɛ alɔ nōo le hilokplici ɛ mla ɔyinɛ alɔ nōo wɛ aɛdrɔ gē kɛla tɔha, ɛjɛɛji uwa gē lɛ ɔtu ō tu kwu ɔtu. (Uróm 1:12) Aa nōo wɛ aɛdrɔ a géē gáā jé lɔɔlɔhi ka Ujehofa gē lɛ ɛlá wu ācɛ ɔlɛ nu, ɔyinɛ alɔ nōo kē le hilokplici ɛ ma kéē i má ku a yihɔtu nu. Ɛnyā géē ya kóō gweeye ō da uwɔ, ɛgɛ nɛ Ujehofa hɛ ɔhā ce ɔ ɛ ma.

17. Ɔdiya nɛ alɔ ka ka abɔɔ ihayi alɛwa gē wa i yɛ a, ayinɛ alɔ nōo kwu hilokplici ɛ ma gē lɔhi tōōtɔ̄ɔ̄ a?

¹⁷ Igbalɛwa, abɔ ɔcɛ gē je hilokplici a, ɔhi ku eyiyɛɛcɛ ku nu gē je ca, amáŋ ācɛ nōo hayi kpaakpa lɛ Ujehofa a gē lɔhi tōōtɔ̄ɔ̄ abɔɔ ihayi alɛwa yɔ i gáā yɛ a. (1 Utes. 1:2, 3) Ɔdiya nɛ ɛlā nyā wɛ ɔkwɛyi a? Ohigbu ka abɔɔ ihayi alɛwa yɔ i wa gáā yɛ a, é gē je ɛga lɛ alelekwu ihɔ ku Ɔwɔico kóō yɔ i nwu uwa klla ta uwa abɔ yɔ i lɛ uce ō ya olɔhi tōōtɔ̄ɔ̄. Abɔɔ alɔ gē ceyitikwu tubla ayinɛ alɔ nōo kwu hilokplici, gē lɛ ojilima ce uwa klla gē nwu ɛlā ŋma ocabɔ ku uwa a, ɛgɔɔma nɛ alɔ gáā leyi má uwa ka é cɛgbá nɛhi lɛ duu a!

18. Ɔdi nɛ alɔ gáā leyi yɛ ɔ ipu ikpɛyi ɛlā ɔhá a?

¹⁸ Ujɔ gē jɛ klla gē lɔfu tōōtɔ̄ɔ̄ fiyɛ, eko nɛ aɛdrɔ gē leyi má ayinɛ nōo le hilokplici ɛ ma ka é cɛgbá nɛhi foofunu ŋ, amáŋ ɔdaŋ ka ayinɛ nōo le hilokplici ɛ ma, gē leyi má aɛdrɔ ka é cɛgbá nɛhi duu. Ipu ikpɛyi ɛlā oklɔcɛ ɔhá a, alɔ géē kɛla lɛyikwu ɛgɛ nɛ ayinɛ alɔ nōo kwu hilokplici ɛ ma, géē mafu ka aɛdrɔ nōo yɔ ipu ujɔ a cɛgbá nɛhi a.