1. Ɔdi nɛ Upɔlu cɛ lɛyikwu iyi nu a?

UPƆLU nōo wɛ ɔyikpo ku Ujisɔsi a, cɛ ka ó lɛ ekoohi nɛ abɔ hɛ ɔ iyē. Ó cɛ ka ɔkpiye ku nu “yɔ i wa ɛmɛɛma,” ka ó nya cidaa o ya ɔdā okpaakpa, ka Ujehofa i kē cila ɔkɔ nɛ ó gba a eko doodu ɔwɛ nɛ ó leyice a ŋ. (2 Ukɔ́r. 4:16; 12:7-9; Uróm 7:21-23) Upɔlu klla cɛ ka ācɛ nōo ya ku uklɔ ku nu kóō lɔnɔ tu ɔ a má ɔ ka ó wɛ ɔcɛ olɔfu ŋ. * Naana a, ó cɛ lɛ ɔwɛ obɔbi nɛ ācɛ gbɛla lɛyikwu ɔ a amāŋ inyileyi ku nu kóō ya kóō má iyi nu bɛɛka ka ó tiile ŋ ma ŋ.—2 Ukɔ́r. 10:10-12, 17, 18.

2. Oŋma ɛlā nɛ 2 Ācɛ Ukɔ́rīnti 12:9, 10 ka a, ɛlā ō cɛgbá nyá nɛ Upɔlu nwu a?

² Ó lɛ ɛnɛɛnɛ ɛlā nɛ Upɔlu nwu, ka ó lɛ eko nɛ abɔ géē hɛ ɔcɛ iye amāŋ nɛ ó géē lɔfu iye kpɔ. (Jé 2 Ācɛ Ukɔ́rīnti 12:9, 10.) Ujehofa da Upɔlu kahinii: “ɔfú kú um gē lɔfú nɛ̄hi ipú ācɛ nēe kwáahi ā.” Ɛnyā mafu ka Ujehofa géē je ɔfu nɛ Upɔlu cɛgbá a lɛ ɔ. Aflɛyi, ku alɔ má ɔdā nōo ya nɛ alɔ i cika ō cɔnu, eko nɛ aolɛla ku alɔ yɔ i ca alɔ ɛca ŋ ma.

3. Ɔdiya ɛɛ nɛ alɔ cika ō yɔ i gweeye eko néē yɔ i ca alɔ ɛca a?

³ O gē he ɔcɛ duuma ku alɔ ɔtu kéē ca ɔ ɛca ŋ. Ohigbu  ɛnyā, ɔdaŋ ku ācɛ nōo gē wɔtu alɔ a, lɛ ɛca ca alɔ nōó kē kwu alɔ iye nɛhi, ó lɔfu cɛ lɛ abɔ kóō hɛ alɔ iyē. (Aíit. 24:10) O lɛ a, ɛgɛnyá nɛ alɔ cika ō má ɛca nɛ ācɛ nōo gē wɔtu alɔ gē ca alɔ a? Bɛɛka Upɔlu a, ‘ɔtu kóō he alɔ’ eko nɛ ācɛ yɔ i ca alɔ ɛca. (2 Ukɔ́r. 12:10) Ɔdiya a? Ohigbu ku ɛca mla ɔdobɔbi néē gē ya alɔ a gē mafu ku alɔ wɛ ayikpo ku Ujisɔsi ɔkwɔɔkwɛyi. (1 Upít. 4:14) Ujisɔsi ka kéē géē ya ayikpo ku anuɔ ŋmo. (Ujɔ́n. 15:18-20) Ɛnyā ya Ācɛ O Yɛce Ukraist ku eko aflɛyi a duu. Eko ɔɔma, ācɛ Ugriisi gē leyi má Ācɛ O Yɛce Ukraist taajɛ klla gē má uwa ku é jijeyi ŋ. Ācɛ Ujiyu a kē má Ācɛ O Yɛce Ukraist “kéē jɔ́kpá ŋ́ klla kē wɛ aógwuda,” bɛɛka ɔyikpo Upita mla Ujɔni a. (Ācot. 4:13) Ācɛ alɛwa gbɛla ku Ācɛ O Yɛce Ukraist i lɛ ɔfu iye klla lɛ ogbo tu duuma ŋ. É lɛ abɔ ipu ɛlā imeli ŋ, ohigbu ɛnyā é da igɔmɛnti kéē ya ɔdā duuma gla ŋ. É gē kpo icɔɔja ŋ, ohigbu ɛnyā, é lɛ ɔfu duuma o kpɛfu amāŋ gbo iyi uwa ŋ.

4. Ɔdi nɛ Ācɛ O Yɛce Ukraist ku eko aflɛyi a gē ya, eko duuma nɛ ācɛ nōo gē wɔtu uwa a, gbɔɔ ō ka obɔbi lɛyikwu uwa a?

⁴ Ācɛ O Yɛce Ukraist aflɛyi a cɛ lɛ abɔ kóō hɛ uwa iyē, ohigbu ɛca néē ca uwa a nɛɛ? Ehee. Ocabɔ mafu, ɔyikpo Upita mla Ujɔni má ɔ kóō wɛ ɔdā ojilima kéē ya uwa ŋmo, ohigbu kē yɔ i yɛce Ujisɔsi klla yɔ i nwu ācɛ ɛlā lɛyikwu ɔ. (Ācot. 4:18-21; 5:27-29, 40-42) Ɔdā duuma i tu ayikpo a uweyi ŋ. Naana néē lɛ ojilima ce Ācɛ O Yɛce Ukraist aflɛyi a ŋ ma, ɛgɛ néē ceyitikwu ta ācɛ abɔ a, fiyɛ ɛgɛ nɛ aolɛla ku uwa ta ācɛ ɔhá abɔ a. Ocabɔ mafu, aɔkpá ku Ubáyíbu nɛ ōhī ku uwa ta a, yɔ i je otabɔ mla eyiyoce lɛ ɛwa ku ācɛ icɛ. Ajɔɔcɛ néē kē tɔɔna lɛyikwu ɔ a gáā kwaajɛ ɛ, ó gáā gboji gɛ ŋ, ó géē lé ɔcɛ́ wa ipu ɛcɛ nyā duu. (Umát. 24:14) Igɔmɛnti ku ācɛ Urom nōo kē ya Ācɛ O Yɛce Ukraist ŋmo a mɛ ŋmiifi ihayi alɛwa ɛ. Amáŋ, Ācɛ O Yɛce Ukraist ɔɔma nōo hayi kpaakpa a cɔcɛ́ ɔkpanco babanya. Ācɛ nōo kē ya uwa ŋmo eko ɔɔma a gekwu ɛ, ɔdaŋ néē kóō géē he uwa eyī ŋma ɔlekwu, é géē yɔ ɛhaajɛ Ajɔɔcɛ nɛ Ācɛ O Yɛce Ukraist néē wɔtu uwa eko ɔɔma a tɔɔna lɛyikwu ɔ a.—Mafú 5:10.

5. Ɛgɛ nɛ ɔkpá ku Ujɔ́ni 15:19 ka a, ɔdiya nɛ ācɛ ku ɛcɛ i gē lɛ ojilima ce alɔ ŋ ma?

⁵ Icɛ, ācɛ i gē lɛ ojilima ce Ācɛ Ocijali Ku Ujehofa ŋ. É klla gē ŋmo alɔ okonu ka alɔ i lɔfu ŋ, ku alɔ i klla jijeeyi ŋ. Ɔdiya néē gē ya alɔ lɛ a? Ohigbu ku alɔ i gē ya uce bɛɛka ācɛ nōo yɛ jila alɔ ta a ŋ. Alɔ gē ceyitikwu ta iyi alɔ waajɛ, gē gbonɛnɛ, klla gē lɛyitaajɛ. Amāŋ, ācɛ icɛ gē dɔka ācɛ o yɔbɔɔcɛ, ācɛ nōo gē gɔ, mla ācɛ nōo gē ya ikpɛyi olɔfu. O ka tu ɔ, alɔ i gē lɛ abɔ ipu ɛlā imeli ŋ, alɔ i klla gē kpo icɔɔja ɛga duuma nɛ alɔ lā ŋ. Alɔ wɛ ɛyɛɛyi gwu ācɛ ku ɛcɛ ta, ohigbu ɛnyā, é gē gbɛla ku alɔ i faajɛ uwa ŋ.—Jé Ujɔ́ni 15:19; Uróm 12:2.

6. Uklɔ nɛhi nyá nɛ Ujehofa yɔ i ta ācɛ ɔlɛ nu abɔ kéē ya a?

⁶ Naana nɛ ācɛ gbɛla ku alɔ i lɔfu iye ŋ ma a, Ujehofa yɔ i bi alɔ le ya aɔdā nɛhi alɛwa. O bi alɔ yɔ i le ya uklɔ ku ɔna ō ta nɛ ɛdɔ ku nu i ya jejee ipu ɛcɛ nyā ɛ ŋ ma. Ācɛ ɔlɛ nu icɛ, gē ya aɔkpá néē gē cɔwɔ gā ipu uce alɛwa fiyɛ duu nōo klla gē yɛ fu abɔ ku ācɛ alɛwa fiyɛ ipu oduudu ɛcɛ a. É klla bi Ubáyíbu le tu ācɛ alɛwa abɔ o ya ku oyeeyi ku uwa kóō le lɔhi fiyɛ. Ujehofa gē ya ɛnyā tɔɔtɛ a. O bi ācɛ nɛ ācɛ ku ɛcɛ nyā gbɛla kéē lɔfu iye ŋ ma, le ya uklɔ o lɔfu nyā. Amáŋ eyeeye ku alɔ kē bɛ? Ujehofa ta alɔ abɔ ku alɔ lɔfu iye gla a? Ó lɛ a, ɔdi nɛ alɔ cika ō ya, o ya ku alɔ lɛ otabɔ nyā lɛ a?  Ku alɔ má aɔdā ɛta nɛ alɔ lɔfu nwu ŋma ocabɔ ku ɔyikpo Upɔlu a.

7. Ɔdi wɛ ɔdā éyi nɛ alɔ nwu ŋma ocabɔ ku Upɔlu a?

⁷ Ɔdā éyi nɛ alɔ nwu ŋma ocabɔ ku Upɔlu a wɛ kahinii: Alɔ hii gbolo ce ɔfu ku abɔyi alɔ, amāŋ ɔdā nɛ alɔ ya gla a ipu ɛ̄gbā o gba Ujehofa ŋ. Ācɛ alɛwa dɔka Upɔlu ohigbu āhɔ̄ ku nu mla ɔdā nōó lɔfu ya gla a. O lɔfu wɛ ɔdā ō tɔɔtɛ lɛ Upɔlu kóō wɛ ɔcɛ o yɔbɔɔcɛ nōo klla gē gbolo ce iyi nu. Ó jɛ ipu igeli nɛhi ku Utasɔsi, ipu ajɛ ku Urom. Utasɔsi lɛ inɔkpa nɛhi éyi nɛ ācɛ alɛwa jé, ɔla gē lá lɛ ācɛ nōo i tɔɔhi abɔɔ a nɛhi duu. Upɔlu jé ɔkpá nɛɛnɛhi. Otrɛyi ku ācɛ Ujiyu éyi nɛ ācɛ lɛ ojilima ce ɔ nɛhi, nōo lé ka Ugamaliyelu a nwu ɔ ɔkpá a. (Ācot. 5:34; 22:3) Ó lɛ eko éyi nɛ Upɔlu wɛ ɔcɛ o cɛgbá nɛhi, ɔtahɛ ku ācɛ Ujiyu ɔmpa nu duu. O kaihnii: “N tɔ́ɔbū lɛ ɛyínɛ̄hi aɛ́gɔ́ um kɔ́ɔ́ gē gbā Ɔwɔicō ɛ̄gbā ɔwɛ nɛ̄ ācɛ Ujíyu ī gbā ɔ̄ ɛ̄gbā a.” (Ugal. 1:13, 14; Ācot. 26:4) Amáŋ Upɔlu i gbolo ce iyi nu ŋ.

8. Ɛgɛ nɛ ɔkpá ku Ācɛ Ufílipāyi 3:8 ka a, ɛgɛnyá nɛ Upɔlu má aɔdā nɛ ó leyi gwo uwa bonu a, ɔdiya nɛ ‘ɔtu gē he ɔ nɛhi kóō moowe ohibgu Ohɔnyɛta’ a?

⁸ Upɔlu gweeye nɛhi, o habɔ aɔdā nōo gē ya ku ācɛ kóō má ɔ ku ɔ lɔfu nɛhi a ta a. Igbihaajɛ, anu abɔyi nu ka ka anuɔ je uwa “bɛ̄ɛka īmū icííci ā.” (Jé Ācɛ Ufílipāyi 3:8) Upɔlu má unwalu alɛwa ohigbu ka ó kwu piya Ɔcɛ Ō Yɛce Ukraist. Ācɛ éwo ku ɔlɛ nu wɔtu nu nɛɛnɛhi. (Ācot. 23:12-14) Ācɛ Urom ɔmpa nu gɔ ɔ mla itali klla lɛ ɔ ta agba. (Ācot. 16:19-24, 37) O ka tu ɔ, ó kwu Upɔlu iye nɛhi eko nɛ ó gáā jé, ka ɔ lɛ aɔdā ōhī nɛ anuɔ i ya gla ŋ ma. (Uróm 7:21-25) Naana a, ó ta o yɛce Ukraist ohigbu uwalu nɛ ó má a ŋ. Ikɔkɔ ɔɔma, ‘ɔtu gē he ɔ nɛhi kóō moowe ohibgu Ohɔnyɛta.’ Ɔdiya a? Ohigbu ka eko nɛ ó má ku abɔ ku anuɔ gē waajɛ, eko ɔɔma nɛ ó gē má ɛgɛ nɛ Ɔwɔico gē ta ɔ abɔ a.—2 Ukɔ́r. 4:7; 12:10.

9. Ɛgɛnyá nɛ alɔ cika ō má aɔdā nōo gē ya kóō lɛbɛɛka alɔ i lɔfu iye ŋ ma?

⁹ Ɔdaŋ ku alɔ dɔka ō lɛ ɔfu nōo ŋma ɛgiyi Ujehofa a, alɔ kóō hii gbɛla ku ɔfu iye ku alɔ, ɔkpá ō jé, ɛga nɛ alɔ ŋma, amāŋ agbenu ku alɔ gáā mafu ɛgɛ nɛ alɔ cɛgbá  a ŋ. Ó wɛ aodee ɛgɛnyā gē ya ku alɔ cɛgbá ɛgiyi Ujehofa a ŋ. Ku ɔkwɛyi a, ó wɛ alɛwa ku ācɛ ɔlɛ Ɔwɔico “jééyī ámāŋ lɔfú nɛ̄hi ámāŋ [néē] ma tū ipɔ́ɔnū kú olɔdu [a] ŋ́.” Ikɔɔkɔ ɔɔma, Ujehofa le “ɔdā nɛ̄ alɛɛcɛ je koó lɔfú ŋ́ mā” fu, o ya kóō bi uwa le yuklɔ. (1 Ukɔ́r. 1:26, 27) Ohigbu ɛnyā, ɔdaŋ nɛ á lɛ aɔdā néē cɔci o gbɔɔ ŋma ajɛ ku ogwotu nyā a ŋ naana, a gba Ujehofa ɛ̄gbā gla. Ikɔkɔ ɔɔma, má aɔdā nɛ á lɛ ŋ ma kéē wɛ ɛnɛɛnɛ ɛga, nɛ a géē bi le má ɛgɛ nɛ Ujehofa géē bi ɔfu ku nu le yuklɔ, ipu oyeeyi ku uwɔ a. Ocabɔ mafu, ɔdaŋ ka gē yuufi ācɛ nōo gē ya ku a lɛ ɔtu o bɛɛpa lɛyikwu ɔtu ō kpoce ku uwɔ, lɛ ɔkɔ gba lɛ Ujehofa kóō je ɔtu ō lɛ gā uwɔ, o ya ɛɛ kóō tɔɔtɛ gā uwɔ o ka ɔdā nɛ a kpɔtuce ɔ a. (Āfi. 6:19, 20) Ɔdaŋ ka lɛ uwalu ku iye duuma, gbɔɔkɔ lɛ Ujehofa kóō je ɔfu nɛ a cɛgbá a gā uwɔ, o ya ɛɛ ku a ya ɛjɛɛji ɔfu ku uwɔ ipu ɛ̄gbā ō gba ku nu. Eko duuma nɛ a má ɛgɛ nɛ Ujehofa ta uwɔ abɔ lɛ a, ɔtu okpoce ku uwɔ géē gbɔɔ ō nuwne klla géē lɔfu fiyɛ.

10. Ɔdiya ɛɛ nɛ alɔ cika ō klɔcɛ ku aocabɔ mafu nōo yɔ ipu Ubáyíbu, bɛɛka ipu ɔkpá ku Uhibru 11:32-34 a?

¹⁰ Upɔlu wɛ ɔcɛ nōo klɔcɛ ku Ɛlā ku Ɔwɔico nɛɛnɛhi. Ó gē klɔcɛ ku Ɛlā Ɔwɔico eko doodu, ó klla nwu ɛlā alɛwa ŋma ocabɔ ku ācɛ ɔlɛ Ujehofa nɛ ó klɔcɛ lɛyikwu uwa a. Eko nɛ ó yɔ i ta ɔkpá fu Ācɛ O Yɛce Ukraist nōo gē ka uce ku Uhibru a, Upɔlu da uwa kéē gbɛla lɛyikwu ocabɔ mafu ku ācɛ igble, nōo hayi kpaakpa ipu ɛ̄gbā o gba Ujehofa a. (Jé Ācɛ Uhíbru 11:32-34.) Alɔ kɛla lɛyikwu éyi ku uwa, Udefidi nōo wɛ Ɔcɛ́ a. Unwalu nɛ ó má a i ŋma ɛgiyi aolɛla ku nu foofunu ŋ, amáŋ ɛgiyi ācɛ nōo wɛ oklobiya nu piii a. Abɔ alɔ yɔ i má ocabɔ ku Udefidi a, alɔ géē má ɛgɛ nɛ ō gbɛla tu ocabɔ ku nu lɔfu ta Upɔlu abɔ a, mla ɛgɛ nɛ alɔ lɔfu gbla ɔ ya a.

11. Ɔdiya nɛ Udefidi lɛbɛɛka ó lɔfu iye ŋ ma a? (Má ifoto nōo yɔ iyɔbu a.)

¹¹ Ugoliyati nōo lɔfu abɔ ɔlamu a, leyi má Udefidi kóō lɔfu duuma ŋ. Eko nɛ Ugoliyati lɛ Udefidi má a, “ó i tū ɔ̄ eyīnyinyi nɛ̄hi.” Ofluflu a, Ugoliyati jɛ agwu klla gbɛ fiyɛ Udefidi, ó bi iyɛfu klla jé ō kpɛfu fiyɛ ɔ duu. Amāŋ Udefidi kē wɛ ɔyipɛ nɛ̄ŋcɛ́, ó bi iyɛfu nɛ ó cika ō bi a ŋ, ohigbu ka ó jé ō kpɛfu ŋ. Naana a, Udefidi kwu āhɔ̄ nɛ ó yɔ anu lɛbɛɛka ó lɔfu iye ŋ ma, i piya ɔfu iye ku nu. O gbolo ce Ujehofa kóō je ɔfu lɛ ɔ, anɔ ó lɛ Ugoliyati yale a.—1 Usám. 17:41-45, 50.

12. Unwalu ɔhá nyá nɛ Udefidi cɛgbá ō lɔtu nu a?

¹² O lɛ unwalu ɔhá nɛ Udefidi má, nōo ya kóō yɔ bɛɛka ó lɔfu iye ŋ ma. Udefidi lɛyitaajɛ lɛ Usɔlu, ɔcɛ nɛ Ujehofa fu kóō wɛ ɔcɛ́ ku Isrɛlu a. Aflɛyi, Ɔcɛ́ Usɔlu lɛ ojilima ce Udefidi. Amāŋ igbihaajɛ, ɔbɔcɛ o ya ku Usɔlu cɛ lɛ ɔ gbɔɔ ō mimalanyi ku Udefidi. Usɔlu ya Udefidi ɔdā obɔbi nɛhi, klla dɔka ō je ɔ ŋmo.—1 Usám. 18:6-9, 29; 19:9-11.

13. Ɛgɛnyá nɛ Udefidi ya eko nɛ Ɔcɛ́ Usɔlu yɔ i ya ɔdā obɔbi a?

¹³ Naana nɛ Ɔcɛ́ Usɔlu yɔ i ya Udefidi ɔdā obɔbi a, Udefidi ceyitikwu lɛ ojilima ce ɔ kpɔ, ohigbu ku Usɔlu nɛ Ujehofa fu kóō wɛ ɔcɛ́ a. (1 Usám. 24:6) Udefidi i cɔnu mla Ujehofa ohigbu ɔdā obɔbi nɛ Usɔlu ya a ŋ. Ikɔɔkɔ ɔɔma a, Udefidi gbolo ce Ujehofa kóō je ɔfu nɛ ó cɛgbá a lɛ ɔ, o ya ɛ kóō lɔtu ku ojama a.—Aíjē 18:1.

14. Ɛdɔ unwalu nyá nɛ ɔyikpo Upɔlu má nōo lɛbɛɛka aku Udefidi a?

¹⁴ Ɔyikpo Upɔlu má ɛdɔ ojama nɛ Udefidi má nyā duu. Aolɛla ku Upɔlu lɔfu fiyɛ ɔ nɛhi. Alɛwa ku ācɛ nōo wɛ otrɛyi eko ɔɔma a gē wɔtu nu. Igbalɛwa, é gɔ ɔ klla je ɔ ta agba. Bɛɛka Udefidi a, ācɛ nōo cika  ō wɛ oklobiya ku Upɔlu a klla ya ɔ ɔdā obɔbi a. Ācɛ ōhī ipu ujɔ kóō wɔtu nu duu. (2 Ukɔ́r. 12:11; Ufíl. 3:18) Naana kpɔ a, Upɔlu lɛ ɛjɛɛji ācɛ nōo yɔ i wɔtu nu a yale. Ɛgɛnyá a? O ceyitikwu tɔɔna, naana néē yɔ i ya unwalu ta ɔ a. Upɔlu i habɔ ayinɛ nɔnyilɔ mla ayinɛ nɔnya ta ŋ, naana néē lɛ ɔ abɔ gaajɛ a. O fiyɛ duu a, ó hayi kpaakpa lɛ Ɔwɔico jaa gā oŋmɛyi ku oyeeyi ku nu. (2 Utím. 4:8) Ɔdā nōo ta ɔ abɔ ya ɛnyā a wɛ ō gbolo ce Ujehofa ikɔkɔ ō gbolo ce ɔfu ku iyi nu.

15. Ɔdi nɛ alɔ miya o ya a, ɛgɛnyá nɛ alɔ kē gáā ya ɔ gla a?

¹⁵ Ayipɛ inɔkpa ku uwɔ, ācɛ ɛga nɛ a gē ya uklɔ a amāŋ ācɛ apɔlɛ ku uwɔ nōó wɛ Ācɛ Ō Cijali Ku Ujehofa ŋ ma, gē ca uwɔ ɛca klla gē ya uwɔ ŋmo? Ɔyinɛ duuma ipu ujɔ ya uwɔ ɔdobɔbi jejee ɛ? Ɔdaŋ kóō lɛ a, blakwu ocabɔ ku Udefidi mla Upɔlu. Ɔɔma géē cɛ lɛ uwɔ “bī ɔdā olɔhi ō yá le yá ɔdōbɔ̄bí lé.” (Uróm 12:21) Eko nɛ ācɛ gē ya alɔ ɔdobɔbi, alɔ i gē nuunu ta uwa ɛgɛ nɛ Udefidi nuunu ta Ugoliyati a ŋ. Ikɔkɔ ɔɔma, alɔ gē bi ɔdā olɔhi le ya ɔdobɔbi lé ŋma le ō nwu ācɛ ɛlā ɔkwɛyi lɛyikwu Ujehofa mla Ubáyíbu. A ya ɛnyā gla ŋma lɛ ō gbolo ce ō bi Ubáyíbu le cila ɔka ku ācɛ, ō gbonɛnɛ klla lɛ ojilima ce ācɛ nōo gē ya uwɔ ɔdobɔbi a, mla oŋma lɛ ō ya ɔdā olɔhi lɛ ɛjɛɛji ācɛ, kwu aolɛla ku uwɔ duu.—Umát. 5:44; 1 Upít. 3:15-17.

16-17. Ɔdi nɛ Upɔlu i je mlanyi gboogboo ŋ ma?

¹⁶ Gbɔbu ɛ ku ɔyikpo Upɔlu kóō je piya Ɔcɛ O Yɛce Ukraist a, ó wɛ ɔyipɛ oklobiya nōó gē lɛ ojilima ce ɔcɛ ŋ, ó klla gē ya Ācɛ Ō Yɛce Ukraist ŋmo nɛɛnɛhi. (Ācot. 7:58; 1 Utím. 1:13) Ujisɔsi kwu Upɔlu néē hi ku Usɔlu a u ci ŋma ō ya ujɔ ku Ācɛ O Yɛce Ukraist a ŋmo. Ujisɔsi kɛla lɛ Upɔlu ŋma ɔkpanco klla kwu ɔ ikpeyi pu. O ya kóō gbɔɔ ō mɛɛbɛ kpɔ a, ó cɛgbá ō miyɛ ōtabɔ ŋma ɛgɛiyi ācɛ nɛ ó yɔ i ya ŋmo pii a. O ta iyi nu waajɛ miyɛ otabɔ ŋma ɛgiyi ɔyikpo néē hi ka Ananiyasi nōo ya kóō gbɔɔ ō mɛɛbɛ kpɔ a.—Ācot. 9:3-9, 17, 18.

¹⁷ Igbihajɛ Upɔlu kwu piya ɔcɛ néē jé lɔɔlɔhi ipu ujɔ ku Ācɛ Ō Yɛce Ukraist,  naana a, ó mlanyi ɔdā nɛ Ujisɔsi nwu ɔ ɔwɛ eko nɛ ó yɔ i nyɔ gā Udamasikɔsi a ŋ. Upɔlu ta iyi nu waajɛ, klla dɔka ō miyɛ otabɔ ŋma ɛgɛiyi ayinɛ nu nɔnyilɔ mla ayinɛ nu nɔnya. O cɛ ka ‘é ta anuɔ abɔ nɛhi.’—Ukól. 4:10, 11.

18. Ɔdiya ɛɛ nɛ alɔ i gē dɔka ō miyɛ otabɔ ŋma ɛgiyi ācɛ ɔhá ekoohi ŋ ma?

¹⁸ Ɔdi nɛ alɔ lɔfu nwu ŋma ɛgiyi Upɔlu a? Eko nɛ alɔ gbɔɔ ō jé ɔkwɛyi ɛpɛɛpɛ a, alɔ gē ceyitikwu ya ku ācɛ ɔhá kéē ta alɔ abɔ, ohigbu ku alɔ jé kóō lɛ ɔdā alɛwa nɛ alɔ cɛgbá ō jé kpɔ ɛ. (1 Ukɔ́r. 3:1, 2) Amāŋ abalɔbanya bɛ? Ɔdaŋ ku alɔ yɔ i gba Ujehofa ɛ̄gbā ŋmifi ihayi alɛwa klla lɛ ɔdā alɛwa jé ɛ, alɔ i gáā cɛ ō miyɛ otabɔ lɛ a gɛ ŋ, ofiyɛ duu a, ɔdaŋ ku otabɔ a ŋma ɛgiyi ɔcɛ nōo yɔ i gba Ujehofa ɛ̄gbā nōó gboji bɛɛka alɔ ŋ ma. Ɔkwɛyi a wɛ ka Ujehofa gē bi ayinɛ alɔ nɔnyilɔ mla ayinɛ alɔ nɔnya le je ɔfu iye lɛ alɔ. (Uróm 1:11, 12) O lɛ a, ɔdaŋ ku alɔ dɔka ō miyɛ otabɔ ŋma ɛgiyi Ujehofa, alɔ cɛgbá ō miyɛ otabɔ nɛ ayinɛ ipu ujɔ gē je lɛ alɔ a.

19. Ɔdiya ɛɛ nōó tɔɔtɛ lɛ Upɔlu kóō ya aɔdā ohidaago nɛ ó ya a?

¹⁹ Upɔlu ya ɔdā ohidaago alɛwa abɔ ó kwu piya Ɔcɛ Ō Yɛce Ukraist a. Ɔdiya a? Ohigbu kóō jé ku ɛga nɛ ɔcɛ ŋma, ɔkpá nɛ ó jé, mla agbenu nɛ ɔcɛ lɛ i wɛ ɔdā duuma ŋ. Amāŋ ɔdaŋ ku ɔcɛ tu iyi nu waajɛ klla gbolo ce Ujehofa, ó géē ya ɔdā olɔhi alɛwa. Ɛjɛɛji alɔ cika ō yɛce ocabɔ ku Upɔlu ŋma lɛ (1) ō gbolo ce Ujehofa, (2) ō nwu ɛlā ŋma aocabɔ ku Ubáyíbu, mla (3) ō miyɛ otabɔ ŋma ɛgiyi ayinɛ alɔ ipu ujɔ. Cɛɛ ɛgɛ duu nɛ alɔ gbɛla ku alɔ i lɔfu iye ŋ lɛ, Ujehofa géē tu alɔ abɔ ya ku alɔ lɔfu iye!