1. Ɔdi nɛ Udefidi ka lɛyikwu ɛgɛ nɛ Ujehofa wɛ ɔcɛ ō tu iyi waajɛ a?

UJEHOFA wɛ ɔcɛ ō tu iyi nu waajɛ ɔkwɔɔkwɛyi? Ii gboo. Udefidi ka eko éyi kahinii: “Óndú, a í gbō um, klla ī hɛ́ um tá. Ɛlá nāa le kwu um ā [amāŋ “ɛgɛ nɛ a tu iyi uwɔ waajɛ a,” NW ] kwú um pīya ɔ̄cɛ nɛ̄hi ɛɛ́.” (Aíjē 18:35) Eko nɛ Udefidi ta ɔkpá nyā a, á jé ŋ, ó yɔ i gbɛla lɛyikwu ɛ̄cī nɛ Usamuwɛlu wa ɔlɛ adā nu, kóō gáā lɛ anɔ tu ɔcɛ nōo géē wɛ ɔcɛ́ ɛyipɛ ku ācɛ Isrɛlu a ɛyi. Ŋma ipu acɛnyilɔ ahaata nɛ adā Udefidi ma a, Udefidi wɛ ɛnɛŋcɛ ku uwa a, amáŋ anu nɛ Ujehofa ka é fu kóō kwɛyi Usɔlu nōo wɛ ɔcɛ́ a.—1 Usám. 16:1, 10-13.

2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

² Ó lɛ afuu ŋ, Udefidi cɛ mla ɛlā nɛ Ɔkpá ku Aíjē kú ɛ̄gbā ɛyi 113 ka lɛyikwu Ujehofa a. Ó kahinii: “Amáŋ, ó gē téeyī wāajɛ, má ɛcɛ mɛ́mla ɔkpáncō. Ó gē je aógbɛhá cāŋjɛ ŋmá úmúlá klla ī je ācɛ nɛ̄ ɛgbá ce uwá ā ŋmá ɛyétutulu, cɛ́ɛ́ ó cɛ̄ lɛ ācɛ kwú ɛdɔ kú ojīlīmā nēé gē lɛ ce aótrɛ̄yí kú uwā ú ce aógbɛhá ā.” (Aíjē 113:6-8) Ɔdā aflɛyi nɛ alɔ gáā nwu ipu ikpɛyi ɛlā nyā, wɛ aɛnɛɛnɛ ɛlā nōo cɛgbá nɛhi lɛyikwu ō tu iyi ɔcɛ waajɛ, ŋma lɛ ō kɛla lɛyikwu ɛgɛ nɛ Ujehofa ma uce ō ya nyā fu a. Alɔ klla géē nwu ɛlā lɛyikwu ō tu iyi ɔcɛ waajɛ, ŋma ocabɔ ku Usɔlu nōo wɛ ɔcɛ́, Udaniyɛlu nōo wɛ ɔcomɛɛbɛ mla Ujisɔsi.

3. Ɛgɛnyá nɛ Ujehofa gē ya ɛlā mla alɔ a, ɔdi nɛ ɛnyā kē mafu a?

³ Ujehofa mafu ku ó wɛ ɔcɛ ō tu iyi waajɛ, oŋma lɛ ɛgɛ nɛ ó gē ya ɛlā mla alɛɛcɛ nōó jila iyē ŋ ma. Ó gē miyɛ ɛ̄gbā nɛ  alɔ gē gba ɔ a foofunu ŋ, amáŋ ó gē leyi má alɔ bɛɛka aɔya ku nu duu. (Aíjē 25:14) O ya ɛɛ kóō tɔɔtɛ lɛ alɔ ō wɛ ɔya ku nu a, Ujehofa ta Ɔyinɔnyilɔ ku nu ɛhɔ kóō gáā lɛ iyi nu gwɛɛya ohigbu íne ō biya ku alɔ. Ujehofa wɛ ɔcɛ ō gbonɛnɛ nɛɛnɛhi!

4. Ɛdɔ ɛga nyá nɛ Ujehofa je lɛ alɔ a, ɔdiya nɛ ó kē jɛga ɔɔma lɛ alɔ a?

⁴ Má ɔdā ɔhá nōo mafu ka Ujehofa wɛ ɔcɛ ō tu iyi nu waajɛ a. Abɔ ó wɛ Ujehofa ya alɔ a, ó géē yɛ i ya alɔ ɔwɛ nɛ alɔ i gáā miya ɔdā nɛ alɔ gē ya mla oyeeyi ku alɔ gla ŋ. Amáŋ ó kē ya lɛ a ŋ. Ó lɛ alɔ ya gbla iyi nu, klla jɛga ō ya ɔdā duuma nɛ alɔ tine ō ya a lɛ alɔ. Ó tine ku alɛɛcɛ nōó wɛ ɔdā duuma ŋ ma, kéē gba ɔ ɛ̄gbā ŋma ɔtu, ohigbu ihɔtu néē lɛ lɛ ɔ, mla ɛgɛ néē jé itene nōo i wa ŋma ō lɛyi taajɛ lɛ ɔ a. (Obla. 10:12; Ayis. 48:17, 18) Ó jɛ alɔ eyī nɛɛnɛhi ka Ujehofa wɛ ɔcɛ ō tu iyi nu waajɛ!

5. Ɛgɛnyá nɛ Ujehofa gē nwu alɔ ɛgɛ nɛ alɔ géē tu iyi alɔ waajɛ a? (Má ifoto nōo yɔ iyɔbu ku Ɔda Ō Gbaajɛ nyā.)

⁵ Ujehofa gē nwu alɔ ɛgɛ nɛ alɔ géē tu iyi alɔ waajɛ oŋma lɛ ɛgɛ nōó gē ya ɛlā mla alɔ a. Ujehofa wɛ ɔcɛ nōo jijeeyi fiyɛ duu a. Naana nɛ Ujehofa i cɛgbá ɔcɛ duuma kóō tu ɔ ukɔ́ ŋ ma a, ó le tutu ō jahɔ tu ɔdā nɛ ācɛ ɔhá gbɛla a kpɔ. Ocabɔ mafu, Ujehofa cɛ ku Ɔyinɔnyilɔ ku nu kóō ta ɔ abɔ ya ɛjɛɛji odee. (Aíit. 8:27-30; Ukól. 1:15, 16) Naana nɛ Ujehofa wɛ Ofiyɛ Duu a, ó gē je uklɔ ōhī lɛ ācɛ ɔhá kéē ya kpɔ. Ocabɔ mafu, ó lɛ Ujisɔsi fu kóō wɛ Ɔcɛ́ ku Ajɔɔcɛ a, ó klla géē je íkwu ōhī lɛ ācɛ ula ofigwaahata (144,000) nōo géē lé ɔcɛ́ mla Ujisɔsi a. (Ulúk. 12:32) Ujehofa nwu Ujisɔsi ku ó wɛ Ɔcɛ́ mla Ɔcogwɛɛya. (Uhíb. 5:8, 9) Ó klla nwu ācɛ nōo géē lé ɔcɛ́ mla Ujisɔsi a ɔwɛ néē géē yuklɔ nōo je lɛ uwa a, amáŋ ó gáā ceyitikwu kóō leyi kwu ɛjɛɛji ɔwɛ néē gáā  dɔka ō yuklɔ a ŋ. Ikɔkɔ ɔɔma, ó kpɔtuce ka é géē ya ɔdā nɛ ó tine a.—Mafú 5:10.

6-7. Ɛgɛnyá nɛ aotrɛyi ku apɔlɛ, anyakwɔcɛ ku ujɔ, mɛmla aɛ́nɛ́ mla aadā lɔfu gbla Ujehofa ya a?

⁶ Ɔdaŋ ku Adā alɔ nōo yɔ ɔkpanco nōó cɛgbá otabɔ ŋma ɛgiyi ɔcɛ duuma ŋ ma, gē je íkwu lɛ ācɛ ɔhá, ó lɛ a, alɔ a i cika ō ya ɛgɔɔma lɛ ācɛ ɔhá ŋ? Ocabɔ mafu, a wɛ otrɛyi ku apɔlɛ amāŋ ɔnyakwɔcɛ ku ujɔ? Yɛce ocabɔ ku Ujehofa ŋma lɛ ō je uklɔ lɛ ācɛ ɔhá kéē ya, amáŋ a hii ceyitikwu ku a leyi kwu ɛjɛɛji ɔwɛ néē gē bi le yuklɔ a lɛ a ŋ. Eko duuma nɛ alɔ gbla Ujehofa ya, uklɔ a i gáā ya foofunu ŋ, amáŋ a géē lɛ ɛga ō nwu ācɛ ɔhá ɛlā, klla ta uwa abɔ kéē lɛ ɔtooce tōōtɔ̄ɔ̄. (Ayis. 41:10) Ɔdā ɔhá nyá nɛ ācɛ nōo dee lɛ íkwu a lɔfu nwu ŋma ɛgiyi Ujehofa kpɔ a?

⁷ Ubáyíbu mafu ka Ujehofa gē lɛ ɛlá wu ɔdā nɛ aalelekwu otɛhɔ ku nu gbɛla a. (1 Aɔ́cɛ́ 22:19-22) Aɛ́nɛ́ mla aadā, ɛgɛnyá nɛ aa gáā gbla ocabɔ ku Ujehofa ya a? Eko duuma nōó cɛgbá, da ayipɛ ɔlɛ uwɔ ɔka lɛyikwu ɔwɛ néē gbɛla ka ɔcɛ lɔfu yuklɔ ōhī lɛ a. Eko duuma nōó kē cika, yɛce ɛlā ɔɔma néē ka a.

8. Ɛgɛnyá nɛ Ujehofa gbeyi cii le Ebraham mla Usara a?

⁸ Ɔwɛ ɔhá nɛ Ujehofa gē mafu ka ó wɛ ɔcɛ ō tu iyi nu waajɛ a, wɛ ɛgɛ nɛ ó gē gbeyi cii a. Ocabɔ mafu, Ujehofa gbeyi cii eko nɛ ācɛ nōo gē gba ɔ ɛ̄gbā a i cɛ mla ōmiya ku nu ŋ ɔwɛ ku ojilima. Ujehofa jahɔ lɔɔlɔhi eko nɛ Ebraham da ɔ ka anuɔ i gbɛla ka ó kpaakpa ō lɛ igeli ku Usɔdɔm mla Ugɔmora cataajɛ ŋ. (Ohút. 18:22-33) A blakwu ɛgɛ nɛ Ujehofa ya ɛlā mla Usara nōo wɛ ɔnyā ku Ebraham a kpɔ ɛ? Ujehofa i cɔnu mla Usara eko nɛ ó yɛhɛ abɔ ó cokonu ka ó géē ma ɔyi eko nɛ ó le hilokplici a ŋ. (Ohút. 18:10-14) Ikɔkɔ ɔɔma, ó ya ɛlā mla Usara ipu ojilima.

9. Ɔdi nɛ aɛ́nɛ́, aadā mɛmla anyakwɔcɛ ku ujɔ lɔfu nwu ŋma ocabɔ ku Ujehofa a?

⁹ Aɛ́nɛ́, aadā mɛmla anyakwɔcɛ ku ujɔ, ɔdi nɛ aa lɔfu nwu ŋma ocabɔ ku Ujehofa a? Ɔdi nɛ a gē ya eko duuma nɛ ayipɛ ɔlɛ uwɔ, amāŋ ācɛ ōhī ipu ujɔ i cɛ mla ɔdā nɛ a miya ō ya ŋ ma? A gē da uwa boobu ka aku uwa i kpaakpa ŋ nɛɛ? Kɛɛ ku a gē ceyitikwu ku a jé ɔdā nōo ya ɛɛ néē gbɛla lɛ a? Apɔlɛ mla ujɔ géē lɛ itene, ɔdaŋ ku ācɛ nōo lɛ íkwu ipu uwa gē gbla Ujehofa ya. Alɔ humayi kɛla lɛyikwu ɔdā nɛ alɔ lɔfu nwu lɛyikwu ō tu iyi ɔcɛ waajɛ ŋma ocabɔ ku Ujehofa ɛ. Babanya, alɔ géē nwu ɛgɛ nɛ alɔ lɔfu mafu ku alɔ gē tu iyi alɔ waajɛ, ŋma ipu ocabɔ ōhī nōo yɔ Ubáyíbu a.

10. Ɛgɛnyá nɛ Ujehofa gē bi ocabɔ ku ācɛ ɔhá le nwu alɔ ɛlā a?

¹⁰ Abɔ Ujehofa wɛ ɔcɛ nōo jé ō ‘nwū alɔ ɛlā fíyɛ́ duu’ a, ó jé ocabɔ alɛwa lɛ alɔ ipu Ubáyíbu, o ya ɛɛ kóō bi ɔ le nwu alɔ ɛlā. (Ayis. 30:20, 21) Aɔ̄kā nōo yɔ ipu Ubáyíbu a gē nwu alɔ ɛlā lɛyikwu ācɛ nōo lɛ uce ō ya ɛyɛɛyɛyi nōo he Ujehofa ɔtu, uce bɛɛka ō tu iyi ɔcɛ waajɛ a. Alɔ klla gē nwu ɛlā ŋma ɛgiyi ācɛ nōo ta ō ma uce ō ya olɔhi ɛgɔɔma fu a.—Aíjē 37:37; 1 Ukɔ́r. 10:11.

11. Ɔdi nɛ alɔ lɔfu nwu ŋma ocabɔ obɔbi ku Usɔlu a?

¹¹ Gbɛla lɛyikwu ɔdā nōo ya Usɔlu nōo wɛ ɔcɛ́ a ka a. Eko aflɛyi a, ó wɛ ɔcɛ ō tu iyi nu waajɛ. Eko nɛ ó wɛ ɛdrɔ a, ó jé ɔdā nōo lɔfu ya gla, ó klla ta ō miyɛ uklɔ alɛwa. (1 Usám. 9:21; 10:20-22) Amáŋ abɔ eko yɔ i nyɔ a, Usɔlu kwu piya ɔcɛ ō yɔbɔɔcɛ, klla gbɔɔ ō ya aɔdā nɛ ó lɛ íkwu ō ya ŋ. Ó gbɔɔ ō ma uce obɔbi nyā fu igbihi nɛ ó kwu piya ɔcɛ́ a. Eko éyi lɛ a, ó gbeyi cii mla Usamuwɛlu nōo wɛ ɔcomɛɛbɛ a eko nɛ ó yɔ i leyice ō wa ku  nu a ŋ. Ikɔkɔ nɛ ó géē kpɔtuce Ujehofa kóō ya odee kwɛyi ācɛ ɔlɛ nu a, Usɔlu gáā lɛ ɛya gwo, naana nɛ ó lɛ íkwu ɔɔma ŋ ma. Ohigbu ɔɔma Ujehofa i gweeye mla Usɔlu gɛ ŋ, igbihaajɛ a, Ujehofa klla ta ɔcɛ́ ō lé ku nu. (1 Usám. 13:8-14) Ó géē wɛ ɔdā ijeeyi, ɔdaŋ ka alɔ nwu ɛlā ŋma ocabɔ nyā nōo wɛ ahɔ̄ ō pi lɛ alɔ a. Alɔ kóō hii ya ɔdā duuma néē je íkwu lɛ alɔ ku alɔ ya ŋ.

12. Ɔdiya nɛ Udaniyɛlu wɛ ocabɔ olɔhi a?

¹² Leyi má ocabɔ olɔhi ku Udaniyɛlu nōo wɛ ɔcomɛɛbɛ a ka a. Ocabɔ ku nu wɛ ɛyɛɛyi gwu aku Usɔlu a ta. Ipu ɛjɛɛji oyeeyi ku Udaniyɛlu a, ó tu iyi nu waajɛ klla gē da Ujehofa ɔka kóō bi ɔ jé ɔwɛ eko doodu. Ocabɔ mafu, eko nɛ Ujehofa bi ɔ le ka ɛyi ku ɔna nɛ Unebukadinesa na a lɛ ɔ a, Udaniyɛlu i ka ku ó ŋma ɔfu nu nɛ ó bi le ka ɛyi ku ɔna a ŋ. Ikɔkɔ ɔɔma a, ó kwu ɛjɛɛji owofu a u lɛ Ujehofa. (Udán. 2:26-28) Ɔdi nɛ ɛnyā yɔ i nwu alɔ a? Ɔdaŋ ku ayinɛ alɔ dɔka ɛlā ō ka tɛɛcɛ ku alɔ, amāŋ ɔdaŋ ka alɔ lɛ ɔdā olɔhi má ipu uklɔ ku ɔna ō ta, alɔ bla ka alɔ cika ō je owoofu a lɛ Ujehofa. Alɔ cika ō cɛ peee ku alɔ i gáā ya oduuma ku uwa gla ŋ, ɔdaŋ ku Ujehofa i ta alɔ abɔ ŋ. (Ufíl. 4:13) Ɔdaŋ ku alɔ gē ya lɛ a, ó géē mafu ku alɔ yɔ i gbla ocabɔ olɔhi ku Ujisɔsi ya. Ɛgɛnyá a?

13. Ɔdi nɛ alɔ nwu ŋma ɛgiyi Ujisɔsi oŋma ɛlā nōo yɔ ipu ɔkpá ku Ujɔ́ni 5:19, 30 a?

¹³ Ujisɔsi gbolo ce Ujehofa, naana nɛ ó wɛ Ɔyi Ɔwɔico nōo lɛ ɛnyá duuma ŋ ma. (Jé Ujɔ́ni 5:19, 30.) Ó ceyitikwu ya ku ó miyɛ íkwu ŋma abɔ Adā nu nōo yɔ ɔkpanco a ŋ. Ācɛ Ufílipāyi 2:6 da alɔ ku Ujisɔsi i “gbɛlá ka anúɔ le jōnjīlɛ abɔ̄fú mla Ɔwɔicō ŋ́.” Ujisɔsi jé ɛji ku nu klla lɛ ojilima ce íkwu ku Adā nu.

14. Eko néē da Ujisɔsi ɔka kóō ya odee nɛ ó lɛ íkwu ō ya ŋ ma, ɛgɛnyá nɛ ó ta ohi a?

¹⁴ Gbɛla lɛyikwu ɔdā nɛ Ujisɔsi ka, eko nɛ Ujɛmisi mla Ujɔni ayikpo ku nu mɛmla ɛ́nɛ́ uwa gáā dā ɔka lɛyikwu ɔdā nōó lɛ íkwu duuma ō je ŋ ma. Boobu ɔɔma, Ujisɔsi ka ku Adā anuɔ nōo yɔ ɔkpanco a lɛ íkwu ō fu ɔcɛ nōo géē yaajɛ abɔlɔna amāŋ abɔlufiye ku nu ipu Ajɔɔcɛ a. (Umát. 20:20-23) Ujisɔsi mafu ku ó lɛ ojilima ce ɛji ku nu. Ó tu iyi nu waajɛ. Ó ya ɔdā duuma nɛ Ada i je íkwu lɛ ɔ kóō ya ŋ. (Ujɔ́n. 12:49) Ɛgɛnyá nɛ alɔ gáā lɔfu gbla ocabɔ olɔhi ku Ujisɔsi ya a?

15-16. Ɛgɛnyá nɛ alɔ gáā bi ukɔ́ nōo yɔ ipu ɔkpá ku 1 Ācɛ Ukɔ́rīnti 4:6 le yuklɔ a?

¹⁵ Alɔ gē gbla ocabɔ ku Ujisɔsi ya ŋma lɛ  ō yɛce ukɔ́ ku Ubáyíbu nōo yɔ ipu ɔkpá ku 1 Ācɛ Ukɔ́rīnti 4:6 a. Abɔɔ a da alɔ kahinii: ‘Aá hii gla ɛji ku íne okpaakpa néē ta a ŋ.’ Ohigbu ɛnyā, ɔdaŋ ka ɔcɛ wa i ta alɔ ku alɔ tu ɔ ukɔ́, alɔ i cika ō kwu ɔcɛ ɔɔma abɔfu kóō miya ɔdā nɛ alɔ a gbɛla, amāŋ kɛla duuma nōo wa ipu ɔtu ku alɔ kpla ŋ. Ikɔkɔ ɔɔma, alɔ cika ō tu ɔcɛ ɔɔma ɛlá kwu ukɔ́ nōo yɔ ipu Ubáyíbu mla aɔkpá ku alɔ a. Ó bu ipu ɔwɛ nyā, alɔ géē yɔ i mafu ku alɔ jé ku alɔ i jé ɛjɛɛji odee ŋ. Ɔdaŋ ku alɔ ya ɛnyā, alɔ wɛ ācɛ ō tu iyi alɔ waajɛ, ohigbu ku alɔ géē yɔ i mafu ku alɔ jé ku ukɔ́ ku Ujehofa lɔhi fiyɛ aku alɔ a.—Mafú 15:3, 4.

¹⁶ Ó wɛ ohigbu owoofu ō je lɛ Ujehofa foofunu ya ɛɛ nɛ alɔ cika ō tu iyi alɔ waajɛ a ŋ. Ó lɛ aɔdā olɔhi alɛwa ɔhá nōo ya nɛ alɔ cika ō ya lɛ a. Ɛgɛnyá nōo tu iyi alɔ waajɛ géē je eeye lɛ alɔ klla ta alɔ abɔ ku alɔ kóō yɔ ɛbɔ mla ācɛ ɔhá a? Ɔdā nɛ alɔ gáā kɛla lɛyikwu ɔ babanya a yɔ abɔɔ a.

17. Ɔdiya nɛ ācɛ nōo gē tu iyi uwa waajɛ a gē lɛ eeye a?

¹⁷ Eko duu nɛ alɔ tu iyi alɔ waajɛ, alɔ gē bēē lɛ eeye tōōtɔ̄ɔ̄. Ɔdiya? Ohigbu ka ɔdaŋ ku alɔ cɛ ka ó lɛ aɔdā ōhī nɛ alɔ i ya gla ŋ, nɛ alɔ gáā miyɛ otabɔ duuma ŋma ɛgiyi ācɛ ɔhá, ó géē jɛ alɔ eyī nɛɛnɛhi. Ocabɔ mafu, gbɛla lɛyikwu eko nɛ Ujisɔsi lɛ ācɛ igwo nōo lɛ agwu a hɛta a. Ɔcɛ ekponu ŋma ipu uwa gā ta Ujisɔsi ahinya, abɔɔ ó hɛ ɔ ta ŋma ōcē obɔbi nɛhi ɔɔma a. Adā nōo tu iyi nu waajɛ nyā, jé ka anuɔ i gáā lɔfu hɛ iyi nu ta gla ŋ. Ohigbu ɛnyā a, otabɔ nɛ ó miyɛ a jɛ ɔ eyī nɛhi, ó klla je owoofu a lɛ Ɔwɔico.—Ulúk. 17:11-19.

18. Ɛgɛnyá nóō tu iyi alɔ waajɛ gáā ta alɔ abɔ ku alɔ yɔ ɛbɔ mla ācɛ ɔhá a? (Ācɛ Uróm 12:10)

¹⁸ Ó lɛ afuu ŋ, ācɛ nōo gē tu iyi waajɛ gē yɔ ɛbɔ mla ācɛ ɔhá fiyɛ, klla wɛ ācɛ nōo gē  lɛ aɔya nōo géē yɔ kwu uwa ajaajɛ. Ɔdiya? E gweeye ō cɛ ku ācɛ ɔhá lɛ ɛnɛɛnɛ uce ɛyɛɛyɛyi, é klla gē lɛ ɔtuce uwa. Ācɛ ō tu iyi uwa waajɛ gē gweeye eko duuma nɛ ācɛ ɔhá ya lɔhi ipu uklɔ duuma néē je lɛ uwa a. É klla gē kpo eko bonu ō ta ācɛ ɔhá ahinya mla ō lɛ ojilima ce uwa ŋ.—Jé Ācɛ Uróm 12:10.

19. Ɔdā ōhī nyá ya nɛ alɔ i cika ō wɛ ācɛ ō yɔbɔɔcɛ ŋ ma?

¹⁹ Ācɛ ō yɔbɔɔcɛ wɛ ɛyɛɛyi gwu ācɛ ō tu iyi uwa waajɛ a ta. Ó gē lɔnɔ ta ācɛ ō yɔbɔɔcɛ kéē ta ācɛ ɔhá ahinya, ohigbu ka ó gē he uwa ɔtu fiyɛ, ɔdaŋ ku ācɛ ɔhá gē cɛtra uwa. Ó gē tɔɔtɛ lɛ ɔcɛ ō yɔbɔɔcɛ kóō lɛ iyi nu gbla ɔcɛ ɔhá, mla ō ceyitikwu kóō ya odee lɔhi fiyɛ ɔcɛ ɔhá. Ó gē gbɛla ka anu cika ō ya ɛjɛɛji odee abɔyi nu a, ohigbu ku ipu ɔtu ku nu, ācɛ ɔhá i gáā ya ɔ lɔhi bɛɛka anu a ŋ. Ɔcɛ ō yɔbɔɔcɛ gē dɔka ō ya kóō cɛgbá fiyɛ ācɛ ɔhá, ó klla gē mimalanyi eko duuma nɛ ācɛ ɔhá lɛ odee ya lɔhi fiyɛ uwa. (Ugal. 5:26) Ācɛ ɛgɛnyá i gē lɛ ɔya nōo i lɛɛcɛ ŋ. Ɔdaŋ ku alɔ gáā le má ku alɔ yɔ i lɛ uce ō ya ku ɔbɔɔcɛ, alɔ cika ō gbɔɔkɔ lɛ Ujehofa kóō ta alɔ abɔ ‘lɛ ɔwɛ nɛ̄ alɔ gē gbɛlá ā pīyabɔ̄,’ o ya ɛɛ kóō hii je piya uce ō ya ku alɔ ŋ.—Uróm 12:2.

20. Ɔdiya nɛ alɔ cika ō tu iyi alɔ waajɛ a?

²⁰ Ocabɔ ku Ujehofa wɛ ɔdā nōo jɛ alɔ eyī nɛɛnɛhi! Alɔ má ɛgɛ nɛ ó gē tu iyi nu waajɛ lɛ a, ŋma ɔwɛ nōo ya ɛlā mla ācɛ nōo gē gba ɔ ɛ̄gbā a, alɔ kē dɔka ō gbla ɔ ya. Ɔdā ɔhá ku nu, alɔ cika ō yɛce ocabɔ olɔhi ku ācɛ nōo tu iyi uwa waajɛ gba Ujehofa ɛ̄gbā a. Alɔ kóō bēē je owoofu mla ojilima nɛ Ujehofa cɛgbá a lɛ ɔ. (Mafú 4:11) Ɔdaŋ ku alɔ ya ɛjɛɛji aɔdā nyā, alɔ géē wɛ ɔya ku Ujehofa piyoo, ohigbu ku ó yihɔtu ācɛ nōo gē tu iyi uwa waajɛ a.