1. Ɛnɛɛnɛ ɛga nyá nɛ alɔ lɛ a?

Ó WƐ ƐNƐƐNƐ ɛga lɛ alɔ ō wɛ ipu ɔwa ku Ujehofa! Alɔ gē jɔɔnyɛ ɛbɔ mla eeye nɛɛnɛhi abɔ alɔ gē gba Ujehofa ɛ̄gbā mla ayinɛ alɔ ipu ujɔ a. Uklɔ nyá nɛ a lɛ ō ya ipu ujɔ a?

2. Aciije nyá nɛ Upɔlu bi le yuklɔ ipu auleta alɛwa nɛ Alelekwu Ihɔ ta ɔ abɔ kóō ta nōo yɔ ipu Ubáyíbu a?

² Alɔ lɔfu nwu ɔdā alɛwa lɛyikwu ɛdɔ uklɔ nɛ alɔ lɛ ō ya ipu ujɔ a, ŋma aciije nɛ Upɔlu bi le yuklɔ igbalɛwa ipu auleta ku nu nōo yɔ ipu Ubáyíbu a. Alelekwu ihɔ ku Ɔwɔico kē ta ɔ abɔ ɛɛ nɛ ó ta auleta ɔɔma a. Ipu eyeeye ku auleta nyā a, Upɔlu lɛ ujɔ a gbla ɔkpiye ku ɔlɛɛcɛ a. Ó klla lɛ ɔnyɔɔnyɛ ku alɔ nōo yɔ ipu ujɔ a gbla aya ɛyɛɛyɛyi ku ɔkpiye a.—Uróm 12:4-8; 1 Ukɔ́r. 12:12-27; Āfi. 4:16.

3. Aɛlā ɛta nyá nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Ipu ikpɛyi ɛlā nyá, alɔ géē leyi yɛ aɔdā ɛta nōo cɛgbá nɛhi nɛ alɔ lɔfu nwu ŋma ipu aciije ku Upɔlu a. Aflɛyi, alɔ géē nwu ku ɔnyɔɔnyɛ ku alɔ lɛ uklɔ * ō ya ipu ujɔ ku Ujehofa. Ɔmpa, alɔ géē kɛla lɛyikwu ɔdā nɛ alɔ lɔfu ya, ɔdaŋ ka ó yɔ i lɔnɔ ta alɔ ō jé uklɔ nɛ alɔ lɛ ō ya ipu ujɔ a. Ɔmɛta, alɔ géē kɛla lɛyikwu ɔdā nōo ya nōó cɛgbá ku alɔ ceyitikwu yɔ i yuklɔ nɛ Ujehofa je lɛ ɔnyɔɔnyɛ ku alɔ ipu ujɔ a.

4. Ɔdi nɛ ɔkpá ku Ācɛ Uróm 12:4, 5 nwu alɔ a?

⁴ Ɛlā aflɛyi nɛ alɔ nwu ŋma aciije ku Upɔlu a, wɛ ku eyeeye ku alɔ lɛ ɛnɛɛnɛ ɛga ipu apɔlɛ ku Ujehofa. Upɔlu gbɔɔ aciije ku nu ŋma lɛ ō ka kahinii: “Ɛgɛ́nɛ́ ɔnyɔɔnyɛ kú alɔ lɛ ɔkpíyē nōo lɛ ābɔ̄ ɛyɛɛyɛyi alɛwa nēe kē ī yúklɔ́ ɛyɛ́ɛyɛ́yí ā. Ɔwɛ ékpónú ɔ́ɔmā, nááná nɛ̄ alɔ wɛ ācɛ ɛyɛ́ɛyɛ́yí alɛwa ā, alɔ lɛbɛ̄ɛka ɔ̄cɛ ékpónú mla Ohɔ́nyɛtá ā. Ɔnyɔɔnyɛ kú alɔ kē wɛ ābɔ̄ kú ɔ́mpā nū nēe cɛgbá ācɛ ohile.” (Uróm 12:4, 5) Ɔdi wɛ ɛyi ɛlā ku Upɔlu a? Eyeeye ku alɔ lɛ uklɔ ɛyɛɛyɛyi ipu ujɔ, eyeeye ku alɔ klla cɛgbá nɛhi.

5. Ɔdi nɛ Ujehofa je lɛ ujɔ a?

⁵ Ɔdaŋ ku a gbɔɔ ō gbɛla lɛyikwu ācɛ nōo lɛ uklɔ ō ya ipu ujɔ a, ɔtu ku uwɔ lɔfu nyɔ gā ɛgiyi ācɛ nōo gē leyi kwu alɔ ipu ujɔ a boobu. (1 Utes. 5:12; Uhíb. 13:17) Ó wɛ ɔkwɛyi ka Ujehofa kpo “ɛhi lɛ ācɛ” ipu ujɔ ku nu, o bu ipu Ukraist. (Āfi. 4:8) “Ɛhi” nyá lɛ ō ya mla Ígwu Nōo Gē Leyi Kwu Ɔwa Ku Alɔ, ācɛ nōo ge ta Ígwu Nōo Gē Leyi Kwu Ɔwa Ku Alɔ abɔ, Ígwu Nōo Gē Leyi Kwu Abɔ Ku Ɛga Ō Yuklɔ Ku Alɔ, ācɛ ō leyi kwu usɛkut, ācɛ nōo gē nwu ɔkpá ipu Inɔkpa ku Ubayibu ku alɔ, anyakwɔcɛ ku ujɔ, mɛmla ācɛ ō ta anyakwɔcɛ ku ujɔ abɔ. Alelekwu Ihɔ ku Ujehofa lɛ ɛjɛɛji ayinɛ alɔ nɔnyilɔ nyā fu, kéē teyi tu aala ku Ujehofa nōo cɛgbá lɛ ɔ a mɛmla ō ya ku ujɔ a kóō lɔfu.—1 Upít. 5:2, 3.

6. Oŋma ɛlā nōo yɔ ipu ɔkpá ku 1 Ācɛ Utesaloníka 2:6-8 a, ɔdi nɛ ayinɛ alɔ nɔnyilɔ nɛ Alelekwu Ihɔ ku Ujehofa fu gē ceyitikwu kéē ya a?

⁶ Alelekwu Ihɔ ku Ujehofa lɛ ayinɛ alɔ nɔnyilɔ fu kéē leyi kwu uklɔ ɛyɛɛyɛyi. Ɛgɛ nɛ aya ku ɔkpiye bɛɛka abɔ mla ikpo gē yuklɔ kóō tiile lɛ ɛjɛɛji ɔkpiye a, ayinɛ alɔ nɔnyilɔ nɛ Alelekwu Ihɔ ku Ujehofa fu a, gē yuklɔ lɔfu lɔfu, o ya ɛɛ ku ɛjɛɛji ujɔ a kóō lɛ itene. É gē ceyitikwu kéē ya ku ācɛ ɔhá kóō je owoofu lɛ uwa ŋ. Ikɔkɔ ɔɔma, é gē ceyitikwu kéē lɛ ɔfu ta ayinɛ uwa nɔnyilɔ mla ayinɛ uwa nɔnya iyē. (Jé 1 Ācɛ Utesaloníka 2:6-8.) Alɔ ta Ujehofa ahinya ku ayinɛ alɔ nɔnyilɔ nōo cika jɛ nyā, nōo gē je ɛgbá ku ācɛ ɔhá ta ɔbu gbɔbu lɛ aku uwa a!

7. Aɔhā nyá nɛ alɛwa ku ācɛ nōo gē yuklɔ lɛ Ujehofa eko doodu lɛ a?

⁷ É lɔfu fu ācɛ ōhī nōo yɔ ipu ujɔ kéē yuklɔ ku ācɛ ō tɔɔna ipu éwo ɔhá, ācɛ ō gbɔbu ɔna ō ta ɛdɔ ɛyɛɛyi, amāŋ ācɛ ō gbɔbu ɔna ō ta eko doodu. Ipu oduudu ɛcɛ, ó kóō lɛ ayinɛ alɔ ōhī nōo le miya kē géē bi ɛjɛɛji oyeeyi ku uwa le yuklɔ ō tɔɔna mla ō je ācɛ piya ayikpo ku Ukraist a. Ohigbu ɔdā néē miya nyā a, é lɛ otabɔ je lɛ ācɛ alɛwa kē kwu piya ayikpo ku Ujisɔsi Ukraist ɛ. Naana nɛ ɛyinɛhi ku ācɛ nōo gē yuklɔ lɛ Ujehofa eko doodu nyā i lɛ ije amāŋ aɔdā agbenu alɛwa ŋ ma a, Ujehofa kē lɛ aɔdā olɔhi alɛwa je lɛ uwa ɛ. (Umák. 10:29, 30) Alɔ yihɔtu ayinɛ alɔ nyā, alɔ kē gweeye kē wɛ ipu ujɔ a!

8. Ɔdiya nɛ ɛjɛɛji ācɛ ō tɔɔna ɔkoolɔhi a cɛgbá lɛ Ujehofa nɛɛnɛhi a?

⁸ Ayinɛ alɔ nɔnyilɔ nōo gē leyi kwu alɔ mla ācɛ nōo gē yuklɔ lɛ Ujehofa eko doodu foofunu lɛ uklɔ ō ya ipu ujɔ a nɛɛ? Ehee! Ɛjɛɛji ācɛ ō tɔɔna lɛyikwu ɔkoolɔhi a, cɛgbá lɛ Ɔwɔico mla ujɔ a nɛhi. (Uróm 10:15; 1 Ukɔ́r. 3:6-9) Ó kē lɛ a ohigbu ka ɔdā ō cɛgbá nɛɛnɛhi nɛ ujɔ cika ō ya a, wɛ ō je ācɛ piya ayikpo ku Ondu alɔ Ujisɔsi Ukraist. (Umát. 28:19, 20; 1 Utím. 2:4) Ɛjɛɛji ācɛ nōo gē tɔɔna a, kwu ācɛ nōo lɛ ubatisim ya mla ācɛ nōó ya ubatisim ɛ  ŋ ma, gē ceyitikwu kéē lɛ uklɔ nyā piya ɔdā ō cɛgbá fiyɛ duu ipu oyeeyi ku uwa.—Umát. 24:14.

9. Ɔdiya nɛ ayinɛ alɔ nɔnya cɛgbá lɛ alɔ nɛɛnɛhi a?

⁹ Ujehofa mafu ojilima lɛ ayinɛ alɔ nɔnya duu, ŋma lɛ ō je ɛnɛɛnɛ uklɔ lɛ uwa ipu ujɔ. Anyā, aɛ́nɛ́, anyokwu, mla ayinɛ alɔ nɔnya nōo yɔ ofoofu uwa nōo kē yɔ i gba Ujehofa ɛ̄gbā kpaakpa a, cɛgbá lɛ ɔ nɛɛnɛhi. Ubáyíbu kɛla lɛyikwu acɛnya alɛwa nōo ya ɔdā nōo he Ɔwɔico ɔtu a. É cɛtra uwa ka uwa wɛ ɛnɛɛnɛ ocabɔ ku ijeeyi, ɔtu okpoce, ɔtu caca, ɔtu ō lɛ, ācɛ ō nwula abɔ, mla uklɔ lɔhi ō ya. (Ulúk. 8:2, 3; Ācot. 16:14, 15; Uróm 16:3, 6; Ufíl. 4:3; Uhíb. 11:11, 31, 35) Alɔ ta Ujehofa ahinya ku alɔ lɛ acɛnya nōo lɛ ɛdɔ uce ō ya olɔhi ɛgɛnyā ipu ujɔ ku alɔ!

10. Ɔdiya nɛ aokpliici nōo yɔ ipu alɔ a jɛ alɔ eyī nɛhi a?

¹⁰ Alɔ klla gweeye nɛhi ku ācɛ alɛwa nōo le hila okpliici ɛ ma yɔ ipu ujɔ. Ujɔ ōhī lɛ ayinɛ nōo kwu hila ɛ, nōo humayi gba Ujehofa ɛ̄gbā kpaakpa gboji gboji ɛ. Ōhī ku uwa jé ɔkwɛyi a, ó lɔfu gboji lɛ a ɛ ŋ. Alɛwa ku ku uwa kē lɛ unwalu ku ōcē ɛyɛɛyɛyi ohigbu kē yɔ i hila okpliici tōōtɔ̄ɔ̄. Unwalu nyā lɔfu ci uwa ŋma ō ya ɔdā alɛwa ipu ujɔ mla ipu uklɔ ku ɔna ō ta a. Naana a, é kē i yɔ i ya ɔdā néē ya gla ipu uklɔ ku ɔna ō ta, klla bi ɛjɛɛji ɔfu ku uwa le ta ācɛ ɔhá ɔtu kwu ɔtu mla ō nwu uwa ɛlā! Alɔ kē i lɛ itene ŋma ɔdā néē jé ɛ ma. E heyifuu nɛhi ɛgiyi Ujehofa mla ɛgiyi alɔ.—Aíit. 16:31.

11-12. Ɛgɛnyá nɛ a miyɛ ɔtu ō tu kwu ɔtu ŋma ɛgiyi aɛdrɔ nōo yɔ ipu ujɔ ku uwɔ a?

¹¹ Gbɛla lɛyikwu aɛdrɔ ku alɔ duu. É gē má unwalu ɛyɛɛyɛyi, ohigbu kē yɔ i jɛ ipu ɛcɛ nōo yɔ ipu abɔ ku Ebilii, nōo klla le mu mla aɛlā obɔbi a. (1 Ujɔ́n. 5:19) Naana a, ó gē ta ɛjɛɛji alɔ ɔtu kwu ɔtu eko duuma nɛ alɔ má aɛdrɔ ku alɔ yɔ i je ohi ipu ōjila, gē yuklɔ ku ɔna ō ta, amāŋ eko duu nɛ alɔ po kē cɛpɔ ɔtu kpoce ku uwa mla ɔtu ō lɛ a. Ó lɛ aafu ŋ, aɛdrɔ lɛ ɛnɛɛnɛ ɛga ipu ujɔ ku Ujehofa!—Aíjē 8:2.

¹² Amáŋ, ó gē lɔnɔ tu ayinɛ alɔ ōhī kéē  kpɔtuce kē tiile ipu ujɔ a. Ɔdi gáā ta alɔ abɔ ku alɔ má ku eyeeye ku alɔ lɛ uklɔ ō ya ipu ujɔ a? Alɔ má ɔ ɛ.

13-14. Ɔdiya nɛ ācɛ ōhī gē gbɛla ka é tiile ipu ujɔ ŋ ma?

¹³ Ɛlā ɔmpa nɛ alɔ lɔfu nwu ŋma aciije ku Upɔlu a, géē ya ku alɔ gbɛla lɛyikwu unwalu nɛ alɛwa ku ācɛ lɛ icɛ a. Ó gē lɔnɔ ku ācɛ alɛwa kéē kpɔtuce kē tiile ipu ujɔ a. Upɔlu ta ɔkpá kahinii: “Ɔ́dāŋ nɛ̄ ikpó kōō kahíníī, ‘Ohígbū ka ń wɛ abɔ̄ ŋ́ mā, ń wɛ ákú iyē ā gɛ ŋ́,’ ɛ̄nyā í yá kóō híīī wɛ āyā kú iyē ŋ́ nɛɛ ŋ́. Ɔ́dāŋ nɛ̄ ahɔ̄ kōō kahíníī, ‘Ohígbū ka ń wɛ eyī ŋ́ mā, ń wɛ ákú iyē ā gɛ ŋ́’ ɛ̄nyā í yá kóō híīī wɛ āyā kú iyē ŋ́ nɛɛ ŋ́.” (1 Ukɔ́r. 12:15, 16) Ɔdi nɛ Upɔlu yɔ i nwu alɔ a?

¹⁴ Ɔdaŋ ku a gbɔɔ ō miya iyi uwɔ mla ācɛ ɔhá ipu ujɔ, a géē gbɔɔ ō gbɛla ku anuɔ i cɛgbá ipu ujɔ a ŋ. Ōhī ku ācɛ nōo yɔ ipu ujɔ a lɔfu lɛ ɛhi ō wɛ itica olɔhi, ācɛ nōo jé ō ta odee bi lɔɔlɔhi, amāŋ ācɛ nōo jé ō je ɔtu ō tu le mla ɔtu ō tu kwu ɔtu lɛ ācɛ ɔhá lɔɔlɔhi. Ó lɔfu ya uwɔ bɛɛka a gáā ya lɔhi bɛɛka uwa a gla ŋ ma. Ɔɔma mafu ku a wɛ ɔcɛ ō tu iyi uwɔ waajɛ. (Ufíl. 2:3) Amáŋ lɛ ɛlá kwu ɔ. Ɔdaŋ ku a gē miya iyi uwɔ mla ācɛ nōo jé ō ya odee lɔɔlɔhi eko doodu, ɔtu ku uwɔ géē je gbenyi. Ɛgɛ nɛ Upɔlu ka a, a géē gbɔɔ ō gbɛla ku a tiile ipu ujɔ a fluflu ŋ. Ɔdi gáā ta uwɔ abɔ ku a hii bēē gbɛla lɛ a ŋ ma?

15. Oŋma ɛlā nōo yɔ ipu ɔkpá ku 1 Ācɛ Ukɔ́rīnti 12:4-11 a, ɔdi nɛ alɔ cika ō jé lɛyikwu ɛhi duuma nɛ alɔ lɔfu lɛ a?

¹⁵ Leyi yɛ ɛlā nyā ɛ: Ujehofa je ɛhi ohidaago ku Alelekwu Ihɔ ku nu lɛ Ācɛ O Yɛce Ukraist ku eko aflɛyi a, amáŋ ó wɛ oduudu Ācɛ O Yɛce Ukraist a miyɛ ɛhi ekponu a ŋ. (Jé 1 Ācɛ Ukɔ́rīnti 12:4-11.) Ujehofa je ɛhi ku ɔdā ɛyɛɛyɛyi lɛ uwa, amáŋ ɔnyɔɔnyɛ ku uwa kē cɛgbá. Icɛ, alɔ i lɛ ɛhi ohidaago ku Alelekwu Ihɔ a ŋ. Amáŋ ɛgɛ nōó lɛ mla Ācɛ O Yɛce Ukraist ku eko aflɛyi ɔɔma, ɛgɔɔma nōó lɛ mla alɔ icɛ duu a. Ɛjɛɛji alɔ i gáā lɔfu lɛ ɛhi  ekponu gla ŋ, naana a, ɛjɛɛji alɔ tiile lɛ Ujehofa kpɔ.

16. Ukɔ́ ku Upɔlu nyá nɛ alɔ cika ō bi le yuklɔ a?

¹⁶ Ikɔkɔ nɛ alɔ géē yɔ i miya iyi alɔ mla Ācɛ O Yɛce Ukraist ɔhá a, alɔ cika ō yuklɔ mla ukɔ́ ku Upɔlu nōo yɔ ipu Ubáyíbu a: “Ɔnyɔɔnyɛ kóō jila úklɔ́ nɛ̄ ó yá ā má kóō má ɔ̄ ɔ́daŋ koó lɔhi, cɛ́ɛ́ kóō lɔfú gwō kú ɔdā nɛ̄ ó yá abɔ̄yī nū ā. Ó gáā lɛ ɔdā nɛ̄ ó yá ā gbla ɛ̄n̄ɛ ɔ̄cɛ ɔhá yá ā ŋ́.”—Ugal. 6:4.

17. Ɛgɛnyá nɛ alɔ gáā lɛ itene ɔdaŋ nɛ alɔ yɛce ukɔ́ ku Upɔlu a?

¹⁷ Ɔdaŋ nɛ alɔ yɛce ukɔ́ ku Upɔlu nōo yɔ ipu Ubáyíbu klla leyi yɛ aɔdā nɛ alɔ gē ya a, alɔ lɔfu gbɔɔ ō má ku alɔ lɛ ɛnɛɛnɛ ɛhi nɛ ācɛ ɔhá i kóō lɛ ŋ. Ocabɔ mafu, ɔnyakwɔcɛ ku ujɔ éyi i lɔfu jé ō ya ɛlā ō ka tɛɛcɛ lɔɔlɔhi ŋ, amáŋ ó lɔfu jé ō lɛ ācɛ piya ayikpo ku Ukraist lɔɔlɔhi. Amāŋ ó lɔfu jé ō ta odee bi lɔɔlɔhi bɛɛka anyakwɔcɛ ohile nōo yɔ ipu ujɔ ku nu a ŋ, amáŋ ó kē lɔfu wɛ ɔcɛ ō gbonɛnɛ, nōo klla lɛ ihɔtu, ɔcɛ nɛ ayinɛ i gáā yuufi ō da ɔ kóō tu uwa ukɔ́ ŋma Ubáyíbu ŋ. Amāŋ ó kē wɛ ɔcɛ nōo lɛ iye olɔhi ō miyɛ ācɛ wa ɔlɛ nu. (Uhíb. 13:2, 16) Ɔdaŋ nɛ alɔ gē má ɛdɔ ɛhi nɛ alɔ lɛ a peee,ó géē ya ku alɔ lɛ ɔtu olɔhi lɛyikwu ɔdā nɛ alɔ lɔfu ya lɛ ujɔ a gla. Ɛnyā géē ya ku alɔ hii bēē má ayinɛ alɔ nōo lɛ ɛhi ɛyɛɛyɛyi gwu aku alɔ a imalanyi ŋ.

18. Ɛgɛnyá nɛ alɔ lɔfu je piya itica olɔhi gla a?

¹⁸ Ɛgɛ duuma nɛ uklɔ nɛ a gē ya ipu ujɔ a lɛ a, ɛjɛɛji alɔ cika ō lɛ unwu ō yɔ i ya lɔhi fiyɛ ipu uklɔ nɛ alɔ lɛ mla ɛhi ku alɔ. O ya ɛɛ kóō ta alɔ abɔ ya lɔhi fiyɛ a, Ujehofa gē je ɛnɛɛnɛ ɛlā ō nwu lɛ alɔ ō bu ipu ɔwa ku nu. Ocabɔ mafu, ipu ōjila nɛ alɔ gē lɛ ɔtahɛ ku alaadi a, alɔ gē miyɛ ɛlā ō nwu lɛyikwu ɔwɛ nɛ alɔ géē ya lɔhi fiyɛ ipu uklɔ ku ɔna ō ta. A yɔ i ceyitikwu ku a bi aɛlā nyā le yuklɔ?

19. Ɛgɛnyá nɛ a lɔfu ya ku a miya ō gā Inɔkpa Ku Ācɛ Ō Tɔɔna Lɛyikwu Ajɔɔcɛ a?

¹⁹ Ɛnɛɛnɛ ɔwɛ ɔhá nɛ alɔ lɔfu nwu ɛlā gla a, wɛ o bu ipu Inɔkpa Ku Ācɛ Ō Tɔɔna Lɛyikwu Ajɔɔcɛ (SKE) a nɛ. Ācɛ nōo lɔfu gā inɔkpa nyā gla a, wɛ ayinɛ alɔ nōo gē yuklɔ ku ɔna ō ta eko doodu, nōo wɛ ihayi ofu ce ɛta (23) gā ihayi ofu ɛta ce ɛhɔ (65) a. Ó lɔfu ya uwɔ bɛɛka a gáā ya ɛnyā gla ŋ. Amáŋ ikɔkɔ nɛ a géē yɔ i ta aɔdā nōo ya nɛ a gáā nyɔ inɔkpa nyā gla ŋ ma a, lɛ ōmiya ku aɔdā nōo ya nɛ a tine ō nyɔ gā inɔkpa a ta taajɛ. Lɛ ōmiya ya nōo géē ta uwɔ abɔ ya ɔdā nōo cɛgbá ɛɛ ku a géē lɛ abɔ ta ɔkpá a. Oŋma lɛ otabɔ ku Ujehofa mla ō ceytikwu ku awɔ abɔyi uwɔ, a géē lɔfu ya ɔdā nɛ a gbɛla ka ó tɔɔtɛ gā uwɔ ō ya ŋ ma.

20. Ɔdi nɛ alɔ lɔfu nwu ŋma ɔkpá ku Ācɛ Uróm 12:6-8 a?

²⁰ Ɛlā ɔmɛta nɛ alɔ nwu ŋma aciije ku Upɔlu a yɔ ipu ɔkpá ku Ācɛ Uróm 12:6-8. (Jé.) Upɔlu mafu amanya kpɔ ku ācɛ nōo yɔ ipu ujɔ a lɛ ɛhi ɛyɛɛyɛyi. Amáŋ babanya, ó lɛ ɔ teyi peee ku alɔ cika ō bi ɛhi duuma nɛ alɔ lɛ a le yuklɔ, o ya ɛɛ ku ujɔ a kóō jɛ klla lɔfu iyē.

21-22. Ɔdi nɛ alɔ lɔfu nwu ŋma ɛgiyi Urobert mla Ufelice a?

²¹ Leyi yɛ ocabɔ ku ɔyinɛ alɔ nɔnyilɔ éyi nɛ alɔ lɔfu hi ɔ ka Urobert ɛ. Igbihi nɛ ó yuklɔ ipu éwo ɔhá a, é gáā le da ɔ kóō gáā yuklɔ ipu Ubɛtɛlu ipu éwo nōó ŋma a. Naana nɛ ayinɛ a ta ɔ ɔtu kwu ɔtu ka ó ya ɔdobɔbi duuma ŋ ma a, ó kahinii: “Ɔya alɛwa ɔtu le biya gā um nɛhi ohigbu ku um yɔ i gbɛla ku um ya lɔhi ipu uklɔ néē je gā  um a ŋ. Ó lɛ ekoohi nōó gē ya um ku um lɛ abɔ ci uklɔ ō ya ipu Ubɛtɛlu a.” Ɛgɛnyá nɛ ó gáā lɛ eeye ku nu cigbihi a? Ɔnyakwɔcɛ ɔhá ta ɔ ɛlá kwu ɔ ku Ujehofa gē nwu alɔ ɛlā ipu uklɔ ɛyɛɛyɛyi nɛ alɔ gē ya gbɔbu a, o ya ɛɛ ku alɔ tiile fiyɛ ipu uklɔ nɛ alɔ yɔ i ya babanya a. Urobert gáā le má ku ó cɛgbá ō lɛ abɔ ci ō má igbihi, cɛɛ kóō leyi kwu ɔdā nɛ ō lɔfu ya babanya a.

²² Ɔyinɛ alɔ nɔnyilɔ Ufelice Episcopo má ɛdɔ unwalu ɛgɛnyá duu. Anu mɛmla ɔnyā nu ya mɛ ŋma inɔkpa ku Ugilɛdi ihayi ku 1956, klla gbɔɔ ō yuklɔ ku ācɛ ō leyi kwu usɛkut ipu éwo ku Ubolivia. Ipu ihayi ku 1964 é gáā lɛ ɔyi éyi ma. Ufelice kahinii: “Ó lɔnɔ ta alɔ nɛhi ō habɔ uklɔ nɛ alɔ yihɔtu ku nu nɛhi a ta. N géē ka ku ipu ihayi éyi ɔtu le gbenyi gā um nɛhi. Amáŋ mla otabɔ ku Ujehofa, n lɛ uce ō ya ku um piyabɔ, anu n leyi kwu uklɔ ɛpɛɛpɛ ku um ō wɛ adā a.” Ɔtu gē ya uwɔ bɛɛka Urobert mla Ufelice a nɛɛ? Abɔ gē hɛ uwɔ iyē ohigbu ku á lɛ uklɔ ekponu ō ya bɛɛka ɛ̄nɛ̄ a gē ya gbɔbu a gɛ ŋ? Ɔdaŋ ka ó lɛ a, a géē lɛ eeye fiyɛ, ɔdaŋ ku a lɛ ɔdā nɛ a lɛ ɔtu kwu ɔ gbɔbu a piyabɔ, cɛɛ a lɛ ɔ kwu ɔdā nɛ a lɔfu ya babanya ō gba Ujehofa mla ayinɛ uwɔ a lɔɔlɔhi. Bi odee gē ya, bēē bi ɛhi kwu uwɔ le ta ācɛ ɔhá abɔ, cɛɛ, a géē lɛ eeye abɔ a gē ya ku ujɔ a kóō jɛ gɔbu a.

23. Ɔdi nɛ alɔ cika ō lɛ eko taajɛ ō ya a, ɔdi nɛ alɔ kē gáā kɛla lɛyikwu ɔ ipu ikpɛyi ɛlā nōo gboce ɛnyā a?

²³ Ɔnyɔɔnyɛ ku alɔ tiile ɛgiyi Ujehofa nɛhi. Ó tine ku alɔ wɛ ipu apɔlɛ ku nu. Ɔdaŋ nɛ alɔ lɛ eko taajɛ ku alɔ gbɛla lɛyikwu ɔdā nɛ alɔ lɔfu ya, o ya ɛɛ ku ayinɛ alɔ kóō jɛ gɔbu, alɔ kóō ceyitikwu ya ɔdā ɔɔma. Ɔɔma géē ya ɔtu i gáā lɔfu ya alɔ bɛɛka alɔ i tiile ipu ujɔ a ŋ! Amáŋ ɔwɛ nɛ alɔ gē leyi má ācɛ ɔhá ipu ujɔ a bɛ? Ɛgɛnyá nɛ alɔ gáā mafu ku alɔ yihɔtu klla lɛ ojilima ce uwa a? Alɔ géē kɛla lɛyikwu ɛlā ō cɛgbá nɛhi ɔɔma ipu ikpɛyi ɛlā nōo gboce ɛnyā a.