1. Ɔka nyá lɔfu wa ipu ɔtu ku alɔ ɔdaŋ ku alɔ gbɛla lɛyikwu ɛjɛɛji ɔdā nɛ Ujehofa ya a?

ƆDAŊ ku alɔ gbɛla lɛyikwu ɛjɛɛji ɔdā nɛ Ujehofa ya a, ɔtu lɔfu ya alɔ ɛgɛ nōó ya Udefidi eko nɛ ó ba Ujehofa ɛba ipu ɔkɔ ō gba kahinii: “Eko nɛ̄ n leyī yi ɔkpáncō mɛ́mla ɛcɛ, ɔyā mɛ́mla inyílɔwɔ́ɔuwɔ nāa kpó kwu ɔkpáncō ā mla odúúdú úklɔ́ abɔ̄ kú uwɔ ā cíí, cɛ́ɛ́ n dɔ̄ɔ̄kā ka, ɔdí wɛ ɔlɛɛcɛ ɛ́ɛ́ nāa gē gbɛlá kwu ɔ́ dúú ā, ámāŋ ka ɔdí nɛ̄ ɔyí kú ɔlɛɛcɛ wɛ ɛ́ɛ́, nāa gē lɛ ɛlá kwu ɔ́ ā?” (Aíjē 8:3, 4) Bɛɛka Udefidi a, alɔ lɔfu gbɔɔ ō gbɛla ɛgɛ nɛ alɔ nyɛ lɛ, ɔdaŋ ku alɔ lɛ iyi alɔ miya mla ainyilɔwɔ nɛ Ujehofa ya a, cɛɛ ó gbɔɔ ō hɛ alɔ idaago ɛgɛ nɛ Ujehofa gē lɛ ɛlá wu alɔ a. Amáŋ, alɔ géē má ku Ujehofa lɛ ɛlá wu Adam mla Iifu alɛɛcɛ aflɛyi nɛ ó ya, klla kwu uwa u piya apɔlɛ ku nu.

2. Ɔdi nɛ Ujehofa dɔka ku Adam mla Iifu kéē ya a?

² Adam mla Iifu wɛ ayi aflɛyi nɛ Ujehofa lɛ ipu ɛcɛ nyā a, Ujehofa kē wɛ Adā uwa nōo lā ɔkpanco nōo yihɔtu uwa. Ó leyice ku ɔba mla ɔnyā nyā géē wɛ apɔlɛ nōo géē ma ayi. Ɔwɔico da uwa kahinii: “Aá ma ayí alɛwa kú aá nyīla tū ipú ɛcɛ. Cɛ́ɛ́ kú aá mīyɛ ɛcɛ tābɔ̄.” (Ohút. 1:28) Ɔwɔico dɔka kéē ma ayi, cɛɛ kéē leyi kwu ɛcɛ a lɔɔlɔhi. Ɔdaŋ kē géē yɛ i lɛyitaajɛ lɛ ɔdā nɛ Ɔwɔico da uwa kéē ya a nɛɛ, Adam mla Iifu mla ayi uwa géē yɛ i yɔ ipu apɔlɛ ku nu piyoo.

3. Ɔdiya nɛ alɔ lɔfu ka ka Ujehofa je ɛga ku ojilima lɛ Adam mla Iifu ipu apɔlɛ ku nu a?

³ Adam mla Iifu lɛ ɛnɛɛnɛ ɛga ipu apɔlɛ ku Ujehofa. Ipu ɔkpá ku Ācɛ Uhíbru 2:7 a, Ubáyíbu kɛla nyā lɛyikwu alɛɛcɛ nɛ Ujehofa ya a kahinii: ‘A le uwá yá nyɛ́ fíyɛ́ aálelékwū otɛ̄hɔ̄ ā . . . ,  a kwú ɔfulā kú ɔfú mɛ́mla ojīlīmā ú kwu ɔ́ ɛyí.’ Ó wɛ ɔkwɛyi ku Ujehofa i je ɔfu, ɔda ō jé, mla ɛhi ō ya odee lɛ alɛɛcɛ ɛgɛ nɛ ó je lɛ aalelekwu otɛhɔ a ŋ. (Aíjē 103:20) Naana a, Ujehofa klla lɛ ɔfula ku ɔfu mɛmla ojilima u kwu alɛɛcɛ ɛyi. A hɛbɛɛ ɛ! Eko nɛ Ujehofa ya adā alɔ mla ɛ́nɛ́ alɔ aflɛyi a, ó ya ɔ tɔɔtɛ kéē lɛ ɛnɛɛnɛ oyeeyi!

4. Ɔdiya da Adam mla Iifu ohigbu ka é lɛyitaajɛ lɛ Ujehofa ŋ ma, ɔdi nɛ alɔ kē gáā kɛla lɛyikwu ɔ ipu ikpɛyi ɛlā nyā a?

 ⁴ Ó wɛ ɔdā ō kwiiye, ka ohigbu ka Adam mla Iifu i lɛyitaajɛ lɛ Ujehofa ŋ ma, é yɔ ipu apɔlɛ ku Ujehofa gɛ ŋ. Ɛgɛ nɛ alɔ gáā má ŋma ipu ikpɛyi ɛlā nyā a, ɔdā néē ya a bi unwalu nɛhi gē lɛ ayi uwa. Amáŋ ɔdā nɛ Ujehofa bi ɔtu a i piyabɔ ŋ kpɔ. Ó dɔka ku alɛɛcɛ nōo gē lɛyitaajɛ lɛ ɔ a kóō wɛ ayi nu piyoo. Aflɛyi, alɔ géē kɛla lɛyikwu ɛgɛ nɛ Ujehofa mafu lɛ alɔ, ku alɔ cɛgbá lɛ ɔ nɛɛnɛhi a. Alɔ klla géē kɛla lɛyikwu ɔdā nɛ alɔ lɔfu ya babanya ō mafu ku alɔ dɔka ō yɔ ipu apɔlɛ ku Ɔwɔico a. Amoomɛ, alɔ géē kɛla lɛyikwu ɔdā olɔhi, nɛ ācɛ nōo yɔ ipu apɔlɛ ku Ujehofa géē lɛ ipu ɛcɛ nyā piyoo a.

5. Ɛgɛnyá nɛ alɔ gáā mafu lɛ Ɔwɔico ku ɔwɛ nɛ ó ya alɔ, nɛ alɔ lɛ auce ō ya bɛɛka anu a jɛ alɔ eyī a?

⁵ Ujehofa lɛ ojilima ce alɔ ŋma lɛ ō ya alɔ gbla iyi nu. (Ohút. 1:26, 27) Ohigbu ka Ɔwɔico lɛ alɔ ya gbla iyi nu a, alɔ lɔfu nwu ō mafu ɛnɛɛnɛ auce ō ya ku nu. Ocabɔ mafu, alɔ lɔfu mafu ihɔtu, ogbonɛnɛ, ō lɔtu ō ce, mla ō ya ɔdā okpaakpa. (Aíjē 86:15; 145:17) Ɔdaŋ ku alɔ mafu auce ō ya ɛgɔɔma, alɔ gē je owoofu lɛ Ujehofa klla gē mafu ku ɔdā nɛ ó ya a jɛ alɔ eyī. (1 Upít. 1:14-16) Eko duuma nɛ alɔ ya odee ɔwɛ nōo he Adā alɔ nōo yɔ ɔkpanco a ɔtu, alɔ géē gweeye. Abɔ alɔ klla lɛ ɛnɛɛnɛ auce ō ya bɛɛka Ujehofa a, alɔ lɔfu wɛ ɛdɔ ācɛ nɛ ó dɔka ipu apɔlɛ ku nu a gla.

6. Ɛgɛnyá nɛ Ujehofa ya ɛlā mla alɛɛcɛ ɔwɛ ku ojilima eko nɛ ó ya ɛcɛ nyā a?

⁶ Ujehofa lɛ ɔlɛ nōó lɛ ɛdɔ ŋ ma tutu lɛ alɔ. Ihayi alɛwa gbɔbu ɛɛ kóō ya ɔlɛɛcɛ aflɛyi a, Ujehofa lɛ ɛcɛ nyā tutu lɛ alɛɛcɛ. (Ujób. 38:4-6; Ujɛr. 10:12) Abɔ Ujehofa wɛ ɔcɛ ogbonɛnɛ klla gē nwulabɔ a, ó lɛ aɔdā olɔhi alɛwa ya nōo géē cɛ lɛ alɔ gweeye. (Aíjē 104:14, 15, 24) Ekoohi, ó gē lɛ eko taajɛ cɛɛ kóō gbɛla lɛyikwu ɔdā nɛ ó ya a, ó kē “má kɔ́ɔ lɔhi.” (Ohút. 1:10, 12, 31) Ujehofa lɛ ojilima ce alɛɛcɛ ŋma lɛ ō je uwa piya “otrɛ̄yí kú ɔdā dóódu” nōo heyifuu nɛ ó ya ipu ɛcɛ nyā a. (Aíjē 8:6) Ɔwɔico dɔka ku alɛɛcɛ nōó lɛ ɛnyá duuma ŋ ma, kéē jɔɔnyɛ ō leyi kwu aɔdā oheyifuu nɛ ó ya a piyoo. A gē ta Ujehofa ahinya ojigogo ku ɛnɛɛnɛ okonu ō ce ɔɔma a?

7. Ɛgɛnyá nɛ ɔkpá ku Ujóssuwa 24:15 mafu ku alɛɛcɛ lɛ ɛga ō ya ōmiya néē dɔka a?

⁷ Ujehofa jɛga lɛ alɔ ku alɔ miya ɔdā nɛ alɔ géē ya abɔyi alɔ a. Alɔ lɔfu miya ɔdā nɛ alɔ géē ya ipu oyeeyi ku alɔ. (Jé Ujóssuwa 24:15.) Ɔwɔico nōo yihɔtu alɔ a gē gweeye eko duuma nɛ alɔ le miya ō gba ɔ ɛ̄gbā. (Aíjē 84:11; Aíit. 27:11) Alɔ lɔfu bi ɛga nɛ alɔ lɛ ō ya ōmiya a, le miya aɔdā olɔhi alɛwa ɔhá nɛ alɔ lɔfu ya a. Gbɛla lɛyikwu ocabɔ mafu ku Ujisɔsi éyi, lɛyikwu ɛgɛ nɛ ó bi ɛga nɛ ó lɛ ō bi le miya odee abɔyi nu a le yuklɔ a.

8. Ɔwɛ nyá nɛ Ujisɔsi bi ɛga nɛ ó lɛ ō ya ōmiya a le yuklɔ a?

⁸ Alɔ lɔfu ya ɛgbla ku Ujisɔsi, ŋma lɛ ō miya ō je ɛgbá ku ācɛ ɔhá ta iyɔbu gbɔbu lɛ aku alɔ. Ɛ̄cī éyi, eko nɛ ɛ̄jɛ̄ le jɛ Ujisɔsi mla ayikpo ku nu a, é le yɛ gā ɛga éyi nōo yɔ cii néē leyice ku uwa lɔfu mlɛnyɔ ligii gla. Amáŋ, é lɛ omlɛnyɔ néē leyice a ŋ. Ɛwa nɛhi éyi lɛ uwa má, é kē lɛ ɔtu caca ku Ujisɔsi kóō nwu uwa ɛlā. Amáŋ Ujisɔsi i cɔnu fluflu ŋ. Ikɔkɔ ɔɔma, ācɛ a le tu ɔ eyinyinyi. Ó lɛ a, ɔdi nɛ Ujisɔsi ya a? “Ó gbɔɔ́ ō nwū uwā ɔdā alɛwa.” (Umák. 6:30-34) Ɔdaŋ  ku alɔ ya ɛgbla ku Ujisɔsi ŋma lɛ ō bi eko mla ɔfu ku alɔ le je otabɔ lɛ ācɛ ɔhá, alɔ gē bi owoofu gē lɛ Adā alɔ nōo yɔ ɔkpanco a. (Umát. 5:14-16) Alɔ klla gē mafu lɛ Ujehofa ka alɔ dɔka ō wɛ ipu apɔlɛ ku nu.

9. Ɛnɛɛnɛ ɛhi nyá nɛ Ujehofa je lɛ alɛɛcɛ a?

⁹ Ujehofa jɛga lɛ alɛɛcɛ kéē lɔfu ma ayi, ó klla je uklɔ lɛ uwa kéē nwu ayipɛ ɔlɛ uwa kéē yihɔtu nu klla gba ɔ ɛ̄gbā. Ɔdaŋ ku a wɛ ɛ́nɛ́ amāŋ adā, ɛnɛɛnɛ ɛga nɛ a lɛ nyā jɛ uwɔ eyī? Ujehofa je ɛnɛɛnɛ ɛhi alɛwa lɛ aalelekwu otɛhɔ, amáŋ, ó je ɛnɛɛnɛ ɛhi ō ma ayi lɛ uwa ŋ. Ohigbu ɛnyā, ɔdaŋ ku a wɛ ɛ́nɛ́ amāŋ adā, ɛnɛɛnɛ ɛga nɛ a lɛ ō bi ayi jɛ a cika ō jɛ uwɔ eyī. Ujehofa je uklɔ nōo cɛgbá nɛhi lɛ ɛ́nɛ́ mɛmla adā, kéē bi ayipɛ ɔlɛ uwa jɛ ‘ipu ɔwɛ mla ō nwu ku Ujehofa.’ (Āfi. 6:4; Obla. 6:5-7; Aíjē 127:3) O ya ɛɛ ku ɛ́nɛ́ mla adā kéē lɛ otabɔ néē cɛgbá ō bi le ya ɛnyā a, ɔwa ku Ujehofa lɛ aɔdā alɛwa ya tɔɔtɛ nōo ŋma ipu Ubáyíbu, bɛɛka aɔkpá ku alɔ, auvidio, aijē, mla aɛlā ɛyɛɛyɛyi nōo yɔ ipu uwɛbsiti ku alɔ a. Ó teyi peee, ka Adā alɔ nōo yɔ ɔkpanco mla Ɔyinɔnyilɔ ku nu yihɔtu aɛdrɔ ku alɔ. (Ulúk. 18:15-17) Ɔdaŋ ku ɛ́nɛ́ mla adā gbolo ce Ujehofa klla ya ɔdā néē ya gla, ō leyi kwu ayipɛ ɔlɛ uwa nōo cɛgbá nɛhi a, Ujehofa géē gweeye. Aɛ́nɛ́ mla aadā nyā klla gē ta ayipɛ ɔlɛ uwa abɔ, kéē lɛ eyiyoce ō wɛ ipu apɔlɛ ku Ujehofa piyoo!

10-11. Ɔdi nɛ Ujehofa ya tɔɔtɛ lɛ alɔ oŋma lɛ ɛya nɛ Ujisɔsi gwo a?

¹⁰ Ujehofa kwu Ɔyinɔnyilɔ ku nu nōo he ɔ ɔtu nɛhi a u gwɛɛya, o ya ɛɛ ku alɔ lɔfu gáā wɛ ipu apɔlɛ ku nu kpɔ. Ɛgɛ nɛ alɔ ka ipu  ogwotu ɔmɛ 4 a, eko nɛ Adam mla Iifu lɛ íne biya a, é wɛ ipu apɔlɛ ku Ujehofa gɛ ŋ, ɛgɔɔma nōó kē lɛ mla ayipɛ ɔlɛ uwa duu a. (Uróm 5:12) Adam mla Iifu kweyigede lɛ íne ku Ɔwɔico biya, ohigbu ɔɔma, ó cika kóō lɛ uwa fu ŋma ipu apɔlɛ a. Amáŋ ɔdi kē gáā ya da ayipɛ ɔlɛ uwa a? Ujehofa yihɔtu alɛɛcɛ nɛhi, ohigbu ɔɔma, ó lɛ ɔ ya tɔɔtɛ ku ayipɛ ɔlɛ uwa nōo lɛyitaajɛ lɛ ɔ a, kéē lɔfu wɛ ipu apɔlɛ ku nu. Ó ya ɛnyā oŋma lɛ ɛya nɛ Ɔyinɔnyilɔ ekponu ku nu nōo wɛ Ujisɔsi Ukraist gwo a. (Ujɔ́n. 3:16; Uróm 5:19) Ohigbu ɛya nɛ Ujisɔsi gwo a, Ujehofa lɔfu miyɛ alɛɛcɛ ula ofigwaahata nōo hayi kpaakpa lɛ ɔ a bɛɛka ayi nu.​—Uróm 8:15-17; Mafú 14:1.

¹¹ Ó klla lɛ alɛwa ku ācɛ ɔhá nōo hayi kpaakpa nōo yɔ i ya ɔdā nōo wɛ ɔcocɛ ku Ɔwɔico a. É leyice ō je piya apɔlɛ ku Ɔwɔico igbihi ojama amoomɛ, oŋmɛyi ku ihayi ula ɛpa ce ofu igwo a. (Aíjē 25:14; Uróm 8:20, 21) Ohigbu kē lɛ eyiyoce nyā a, babanya é kóō gē hi Ujehofa nōo ya uwa a ka “Ádā.” (Umát. 6:9) Ācɛ nōo géē heyi ŋma ɔlekwu a géē lɛ ɛga ō nwu ɔdā nɛ Ujehofa cɛgbá ŋma ɛgiyi uwa a. Ācɛ nōo miya ō lɛyitaajɛ lɛ ɔwɛ nɛ ó gē mafu a géē je piya apɔlɛ ku nu duu.

12. Ɔka nyá nɛ alɔ gáā cila babanya a?

¹² Ɛgɛ nɛ alɔ má ɛ ma, Ujehofa humayi ya aɔdā olɔhi alɛwa, o ya ɛɛ kóō ya ɛlā mla alɛɛcɛ ɔwɛ ku ojilima. Ó kóō lɛ eyiyoce je lɛ ācɛ nōo wɛ “ɛwa nɛ̄hi” a, kéē kwu piya apɔlɛ ku nu ipu ɛcɛ ɛyipɛ a ɛ. (Mafú 7:9) Ɔdi nɛ alɔ lɔfu ya babanya, ō mafu lɛ Ujehofa ku alɔ dɔka ō wɛ ipu apɔlɛ ku nu piyoo a?

13. Ɔdi wɛ ɔdā nɛ alɔ lɔfu ya, o ya ɛɛ ku alɔ je piya ɔcɛ éyi ipu apɔlɛ ku Ɔwɔico a? (Umáki 12:30)

¹³ Mafu ku a yihɔtu ku Ujehofa ŋma lɛ ō gba ɔ ɛ̄gbā mla ɛjɛɛji ɔtu ku uwɔ. (Jé Umáki 12:30.) Ohigbu ku Ɔwɔico gbonɛnɛ a, ó ya alɔ ɛhi alɛwa ɛ. Ɛhi éyi nōo fiyɛ ɛjɛɛji ɛhi nɛ ó je lɛ alɔ a, wɛ ɛhi ō gba ɔ ɛ̄gbā. Alɔ gē mafu lɛ Ujehofa ku alɔ yihɔtu nu ŋma lɛ ō ‘lɛ íne kú nū tū.’ (1 Ujɔ́n. 5:3) Ɔ́da éyi nɛ Ujehofa dɔka ku alɔ lɛyitaajɛ lɛ ɔ a, wɛ ɔ́da nɛ Ujisɔsi je lɛ alɔ, ō lɛ  ācɛ piya ayikpo ku nu mla ō ya uwa ubatisim a nɛ. (Umát. 28:19) Ó klla je ɔ́da lɛ alɔ ō yihɔtu aɔmpa alɔ. (Ujɔ́n. 13:35) Ujehofa géē ya ācɛ nōo gē lɛyitaajɛ lɛ ɔ́da ku nu a omaaba, wa ipu apɔlɛ ku nu nōo gē gba ɔ ɛ̄gbā ipu oduudu ɛcɛ a.​—Aíjē 15:1, 2.

14. Ɛgɛnyá nɛ alɔ lɔfu mafu ihɔtu lɛ ācɛ ɔhá a? (Umátiyu 9:36-38; Ācɛ Uróm 12:10)

¹⁴ Mafu ihɔtu lɛ ācɛ ɔhá. Uce ō ya ku Ujehofa nōo cɛgbá fiyɛ duu a wɛ ihɔtu. (1 Ujɔ́n. 4:8) Ujehofa mafu ihɔtu lɛ alɔ gbɔbu ɛɛ ku alɔ kóō jé ɔ. (1 Ujɔ́n. 4:9, 10) Alɔ gē gbla ɔ ya eko duuma nɛ alɔ mafu ihɔtu lɛ ācɛ ɔhá. (Āfi. 5:1) Ɔwɛ éyi nōo lɔhi fiyɛ duu nɛ alɔ lɔfu mafu ihɔtu lɛ ācɛ a, wɛ ō je otabɔ lɛ uwa kéē wa i nwu ɛlā lɛyikwu Ujehofa abɔ eko yɔ kpɔ ɛ ma. (Jé Umátiyu 9:36-38.) Ɔdaŋ ku alɔ je otabɔ lɛ uwa, é lɔfu nwu ɔdā néē cika ō ya, ō gáā wɛ ipu apɔlɛ ku Ɔwɔico a. Igbihi nɛ ɔcɛ lɛ ubatisim ya, alɔ cika ō gɔbu yɔ i mafu ihɔtu lɛ ɔ mla ō lɛ ojilima ce ɔ. (1 Ujɔ́n. 4:20, 21) Ɛgɛnyá nɛ alɔ lɔfu ya ɛnyā a? Ocabɔ mafu éyi wɛ ku alɔ cika ō lɛ ɔtuce ɔ ka ó bi ɔdā olɔhi ipu ɔtu. Cɛɛ ɔdaŋ ka ó lɛ ɔdā éyi ya nōó ta alɔ eyī peee ŋ, alɔ i gáā gbɛla ka ó ya ɔ ohigbu ka ó bi iyi nu ɔtu foofunu ŋ. Ikɔkɔ ɔɔma, alɔ géē mafu ojilima lɛ ɔyinɛ alɔ, klla géē leyi má ɔ ka ó fiyɛ alɔ.​—Jé Ācɛ Uróm 12:10; Ufíl. 2:3.

15. Anyɛ nɛ alɔ cika ō mafu eyinyinyi mla ogbonɛnɛ lɛ uwa a?

¹⁵ Mafu eyinyinyi mla ogbonɛnɛ lɛ ɛjɛɛji ācɛ. Ɔdaŋ ku alɔ dɔka ō wɛ ipu apɔlɛ ku Ujehofa piyoo, alɔ cika ō yuklɔ mla Ɛlā ku Ɔwɔico ipu oyeeyi ku alɔ. Ocabɔ mafu, Ujisɔsi nwu alɔ ku alɔ cika ō mafu eyinyinyi mla ogbonɛnɛ lɛ ɛjɛɛji ācɛ, kwu ācɛ nōo kōó wɛ aolɛla ku alɔ a. (Ulúk. 6:32-36) Ekoohi, ɛnyā lɔfu lɔnɔ tu alɔ ō ya. Ɔdaŋ ka ó lɛ, alɔ cika ō nwu ō gbɛla mla ō ya odee bɛɛka Ujisɔsi a. Ɔdaŋ ku alɔ ya ɔdā nɛ alɔ ya gla ō lɛyitaajɛ lɛ Ujehofa mla ō gbla Ujisɔsi ya, alɔ gē mafu lɛ Adā alɔ nōo yɔ ɔkpanco a ku alɔ dɔka ō wɛ ipu apɔlɛ ku nu piyoo.

16. Ɛgɛnyá nɛ alɔ lɔfu ya ku alɔ hii biya iye olɔhi ku apɔlɛ ku Ujehofa ŋ ma?

¹⁶ A hii biya iye olɔhi ku apɔlɛ ku Ujehofa ŋ. Ipu apɔlɛ, igbalɛwa ɔyipɛ nɛ̄ŋ́cɛ́ gē ya ɛgbla ku ɔdā nɛ ɔnyakwɔcɛ ku nu gē ya a. Ɔdaŋ ku ɔnyakwɔcɛ ku nu gē yuklɔ mla ukɔ́ ku Ubáyíbu ipu oyeeyi ku nu, ó géē wɛ ocabɔ olɔhi lɛ ɔcɛ nōo wɛ ɛnɛ̄ŋ́cɛ́ ku nu a. Ɔdaŋ ku ɔnyakwɔcɛ a ké i ya aɔdā nōó lɔhi ŋ, ɛnɛ̄ŋ́cɛ́ ku nu a géē gbla ocabɔ obɔbi ku nu a ya. Ɛgɔɔma nōó lɛ mla apɔlɛ ku Ujehofa duu a. Ɔdaŋ ka Ɔcɛ O yɛce Ukraist kwu piya ɔcɛ nōo kwu igbihi u ce kwu ɛ̄gbā ō gba ku Ujehofa, amāŋ gbɔɔ ō lā oyeeyi ku aja ō gbo amāŋ ikpo ɔnyā ō ce, amāŋ gbɔɔ ō lā oyeeyi nōó lɔhi fluflu ŋ, ācɛ ɔhá lɔfu gbla ɔ ya, ō ya ɔdā nōó lɔhi ŋ ma. Ācɛ nōo gē ya ɛnyā a gē bi iye obɔbi gē lɛ apɔlɛ ku Ujehofa nōo gē gba ɔ ɛ̄gbā a. (1 Utes. 4:3-8) Alɔ i cika ō gbla ocabɔ obɔbi ya, klla jɛga lɛ ɔdā duuma kóō biya ɛma nɛ alɔ lɛ mla Adā alɔ nōo yɔ ɔkpanco a ŋ.

17. Ɛdɔ ɛlá ō gbo nyá nɛ alɔ cika ō lɛ abɔ ci ɔ a, ɔdi kē ya a?

¹⁷ Kpɔtuce Ujehofa ikɔkɔ aɔdā agbenu. Ujehofa cokonu ka anuɔ géē je ɔdole, ile, mla ɛga ogwuta lɛ alɔ, ɔdaŋ ku alɔ kwu Ajɔɔcɛ ku nu i ta aflɛyi, klla lɛyitaajɛ lɛ ɔwɛ nɛ ó dɔka ku alɔ lā oyeeyi ku alɔ a. (Aíjē 55:22; Umát. 6:33) Ɔdaŋ ku alɔ kpɔtuce okonu ō ce ɔɔma, alɔ i gáā gbɛla ku aɔdā agbenu ku ɛcɛ nyā géē gbo alɔ amāŋ cɛ lɛ alɔ gweeye ŋ. Alɔ jé ku ɔwɛ éyi nɛ alɔ lɔfu lɛ ɛbɔ ku ɔtu ku ɔkwɔɔkwɛyi a, wɛ ō ya ɔdā nōo wɛ ococɛ ku Ujehofa a nɛ. (Ufíl. 4:6, 7) Ɔdaŋ nōó kōó tɔɔtɛ lɛ alɔ ō lá aɔdā alɛwa naana, alɔ cika ō gbɛla ɔdaŋ ku alɔ géē lɛ eko amāŋ ɔfu ō bi le teyi tu ɛjɛɛji aɔdā ɛgɔɔma. Ó tɔɔtɛ ku alɔ kwu ɛjɛɛji ɔtu ku alɔ u kwu aɔdā agbenu nɛ alɔ lɛ a? Alɔ cika ō bla ka Ɔwɔico lɛ uklɔ je lɛ alɔ ō ya ipu apɔlɛ ku nu.  Ɛnyā wɛ ku alɔ i cika ō jɛga lɛ ɔdā duuma kóō je alɔ ɛlá ŋma uklɔ ɔɔma ŋ. Alɔ i dɔka ō lɛbɛɛka oklobiya ɔɔma nōo ta ō yɛce Ujisɔsi ohigbu ka ó yihɔtu ku aɔdā nɛ ó lɛ nɛhi a ŋ. Ohigbu ɔɔma, ɛnɛɛnɛ ɛga ō gba Ujehofa ɛ̄gbā a hɛ ɔ abɔ. Ɛnɛɛnɛ ɛga ō kwu piya éyi ku ayi nu Ujehofa gē miyɛ wɛ ipu apɔlɛ ku nu a klla hɛ ɔ abɔ duu!​—Umák. 10:17-22.

18. Ɛnɛɛnɛ ojilima mla ɔhā nyá nɛ ācɛ nōo lɛyitaajɛ lɛ Ujehofa géē jɔɔnyɛ nu piyoo a?

¹⁸ Ojilima nōo fiyɛ duu nɛ alɛɛcɛ nōo lɛyitaajɛ lɛ Ujehofa géē jɔɔnyɛ nu a, wɛ ō yihɔtu ku Ujehofa mla ō gba ɔ ɛ̄gbā piyoo! Ācɛ nōo lɛ eyiyoce ō lā oyeeyi ipu ɛcɛ nyā a klla géē gweeye ō leyi kwu ɛcɛ, nɛ Ujehofa ya kóō wɛ ɛnɛɛnɛ ɔlɛ uwa a. Ó gáā gboji gɛ ŋ, Ajɔɔcɛ ku Ɔwɔico géē ya ku ɛcɛ nyā mla ɛjɛɛji aɔdā nōo ya anu a kóō heyifuu kpɔ. Ɛjɛɛji unwalu nōo ya ohigbu ōmiya ku Adam mla Iifu ō nyɛɛ ŋma apɔlɛ ku Ɔwɔico a, Ujisɔsi géē ya kóō mɛ. Ujehofa géē je umiliyɔn ku ācɛ heyi ŋma ɔlekwu klla géē je ɛnɛɛnɛ ɛga lɛ uwa ō lā oyeeyi opiyoo, oyeeyi nōó lɛ ɛnyá ŋ, ipu ɛcɛ nyā nōo géē je piya uparadais a. (Ulúk. 23:42, 43) Ɔdaŋ ku alɛɛcɛ nōo gē gba Ujehofa ɛ̄gbā kwu piya ācɛ nōó lɛ ɛnyá duuma ŋ, é géē lɛ ‘ɔfú mɛ́mla ojīlīmā’ nɛ Ubáyíbu kɛla lɛyikwu ɔ a.​—Uhíb. 2:7.

19. Ɔdi nɛ alɔ cika ō bi ɔtu a?

¹⁹ Ɔdaŋ ku a wɛ ipu “ɛwa nɛ̄hi” a, a lɛ ɛnɛɛnɛ eyiyoce. Ɔwɔico yihɔtu uwɔ, ó kē dɔka ku a wɛ ipu apɔlɛ ku nu. Ohigbu ɔɔma, ceyitikwu ku a ya ɔdā nōo he ɔ ɔtu a. Bi okonu ō ce ku Ɔwɔico ipu ɔtu, abɔ a gē lā oyeeyi ku uwɔ ɛ̄cī doodu a. Ɛga nɛ a lɛ ō gba Adā alɔ nōo yɔ ɔkpanco ɛ̄gbā a kóō jɛ uwɔ eyī, ku ɛga nɛ a klla lɛ ō je owoofu lɛ ɔ piyoo a kóō jɛ uwɔ eyī duu!