1-2. Ɔdi nɛ ocabɔ ku Angelito nwu alɔ ku alɔ cika ō ya a?

ADĀ uwɔ mla ɛ́nɛ́ uwɔ wɛ Ācɛ Ocijali Ku Ujehofa? Ɔdaŋ ka é wɛ Ācɛ Ocijali Ku Ujehofa, a cika ō bi ɔ ipu ɔtu ku a wɛ ɔya ku Ujehofa, ohigbu ku uwa a wɛ ɔya ku nu ŋ. Ɔdaŋ ku adā alɔ mla ɛ́nɛ́ alɔ gē gba Ujehofa ɛ̄gbā, amāŋ ka é gē gba ɔ ɛ̄gbā ŋ, eyeeye ku alɔ cika ō ceyitikwu lɛ ɛma olɔhi mla Ujehofa.

² Gbɛla kwu ocabɔ ku ɔyinɛ alɔ nɔnyilɔ éyi nōo lé ka Angelito ɛ. Ɛjɛɛji apɔlɛ ku nu wɛ Ācɛ Ocijali Ku Ujehofa. Eko nɛ ó wɛ ɔyipɛ oklobiya a, ó ka anuɔ i tubla Ɔwɔico lɛ a ŋ. Ó kahinii: “N yɔ i gba Ujehofa ɛ̄gbā ohigbu ku ɛjɛɛji apɔlɛ ku um yɔ i gba Ujehofa ɛ̄gbā.” Amáŋ, Angelito gbɔɔ ō lɛ eko taajɛ gē jé Ubáyíbu klla gē gbɛla tu ɔdā nɛ ó gē jé a. Ó klla gbɔɔ ō gbɔɔkɔ lɛ Ujehofa fiyɛ ɛgɛ nɛ ó tɛtɛ gē ya a. Ɔdi wɛ ɛlā nɛ ó nwu a? Angelito kahinii: “N má ku ɔwɛ ekponu nɛ um géē tubla Ujehofa nōo wɛ Adā um a, wɛ ō nwu ɛlā lɛyikwu ɔ abɔyi um.” Ocabɔ ku Angelito nyā cɛ lɛ alɔ gbɛla lɛyikwu aɔka ōhī nōo cɛgbá nɛhi a: Ɔdi wɛ ɛyɛɛyɛyi ku ō jé ɔda ōhī lɛyikwu Ujehofa mla ō jé Ujehofa lɔɔlɔhi a? Ɔdi nɛ alɔ kē lɔfu ya gla, ó ya ɛɛ ku alɔ jé Ujehofa lɔɔlɔhi a?

3. Ɔdi wɛ ɛyɛɛyɛyi ku ō jé odee lɛyikwu Ujehofa mla ō jé Ujehofa lɔɔlɔhi a?

³ Alɔ lɔfu gbɛla ku alɔ jé odee lɛyikwu Ujehofa, ohigbu ku alɔ jé iye ku nu, aɔdā ōhī nɛ ó ya amāŋ ka a. Amáŋ, ɔɔma i mafu ku alɔ jé Ujehofa lɔɔlɔhi ɛ ŋ. Alɔ cika ō lɛ eko taajɛ ku alɔ nwu aɛlā lɛyikwu Ujehofa mla auce ō ya ku nu ɛyɛɛyɛyi. Ɛnyā foofunu gáā ta alɔ abɔ jé ɔdā nōo ya nɛ Ujehofa gē ya  odee ɔwɛ nɛ ó gē ya odee a. Ɛnyā géē ta alɔ abɔ jé ɔdaŋ ku ɛlá ō gbo mla uce ō ya ku alɔ gē cɛ lɛ Ujehofa gweeye. Ɔdaŋ ku alɔ lɛ ɔdā nɛ Ujehofa tine ku alɔ ya a jé, alɔ cika ō lɛ ɔdā ɔɔma ya boobu.

4. Ɛgɛnyá nōo leyi yɛ aocabɔ ɛyɛɛyɛyi nōo yɔ ipu Ubáyíbu gáā ta alɔ abɔ a?

⁴ Ācɛ ōhī lɔfu yɛhɛ tu alɔ ohigbu ku alɔ dɔka ō gba Ujehofa ɛ̄gbā, é kē lɔfu lɛ alɔ piya olɛla ɔdaŋ ku alɔ gbɔɔ ō gā ojila ku ujɔ. Amáŋ ɔdaŋ ku alɔ lɔtuce Ujehofa, ó gáā cigbihi kwu alɔ gboogboo ŋ. Ó géē mafu ku alɔ dɔka ō lɛ ɛma nōo géē yɔ piyoo mla Ujehofa. Amáŋ, ó tɔɔtɛ ku alɔ jé Ujehofa lɔɔlɔhi gla a? Ii gboo, ó tɔɔtɛ! Ocabɔ ku ācɛ nōó jila iyē ŋ bɛɛka Umosisi mla Udefidi mafu ka ó tɔɔtɛ. Abɔ alɔ gáā kɛla lɛyikwu ɔdā néē ya a, alɔ géē cila aɔka ɛpa nyā: Ɛgɛnyá néē jé Ujehofa a? Ɛlā nyá nɛ alɔ kē nwu ŋma ocabɔ ku uwa gla?

5. Ɔdi nɛ Umosisi cɛ ō ya a?

⁵ Umosisi cɛ ō gba Ɔwɔico ɛ̄gbā. Ɛpleeko nɛ Umosisi lɛbɛɛka ihayi ofu ɛpa (40) a, ó cɛ ō piyatɔha mla ācɛ Isrɛlu nōo wɛ ācɛ ɔlɛ Ɔwɔico, ikɔkɔ néē géē jé ɔ ka “ɔyí adá kú Uféro” a. (Uhíb. 11:24) Umosisi leyi gwo ɛnɛɛnɛ ɛga nɛ ó lɛ a bonu. Abɔ Umosisi yɔ i cɛtra ācɛ Isrɛlu nōo wɛ aɔfiyɛ ipu éwo ku Ijipiti a, ó jé ka ɔɔma géē ya ku Ufero kóō cɔnu nɛɛnɛhi. Ufero wɛ ɔcɛ́ nōo lɔfu nɛhi. Ācɛ Ijipiti kē i má ɔ ka ó wɛ ɔwɔ. Ɛnyā mafu ku ɔtu okpoce ku Umosisi lɔfu nɛhi! Umosisi lɔtuce Ujehofa. Ɔtu okpoce ɔɔma ya ɛɛ nɛ Umosisi jɔɔnyɛ ɛma olɔhi mla Ujehofa ɛjɛɛji oyeeyi ku nu a.—Aíit. 3:5.

6. Ɔdi nɛ alɔ lɔfu nwu ŋma ocabɔ ku Umosisi a?

⁶ Ɛlā nyá nɛ alɔ kē nwu a? Bɛɛka Umosisi a, ɔdā duu nɛ alɔ dɔka ō ya a, yɔ ipu abɔ ku alɔ: Alɔ géē gba Ujehofa ɛ̄gbā klla piyatɔha mla ācɛ ɔlɛ nu? Ó lɔfu lɛ ɔdā ōhī nɛ alɔ cɛgbá ō leyi gwo uwa bonu o ya ɛɛ ku alɔ gba Ɔwɔico ɛ̄gbā. Ɛnyā kē lɔfu ya ku ācɛ nōó jé Ujehofa ŋ ma kéē lɛ alɔ piya olɛla ku uwa. Amáŋ, ɔdaŋ ku alɔ lɔtuce Adā alɔ nōo yɔ ɔkpanco a, ó géē ta alɔ abɔ!

7-8. Ɛlā nyá nɛ Umosisi nwu gɔbu a?

⁷ Umosisi nwu ɛlā lɛyikwu uce ō ya ku Ujehofa ɛyɛɛyɛyi, ó klla ya ɔdā nɛ Ujehofa tine. Ocabɔ mafu, eko nɛ Ujehofa da Umosis ka ó lɛ ācɛ Isrɛlu bi wɛɛcɛ ŋma ajɛ ku Ijipiti a, Umosisi mafu ka ó wɛ ɔcɛ ō yuufi. Ó da Ujehofa kóō lɛ ɛhɔ tu ɔcɛ ɔhá. Ɔwɔico lɛ enyinyi mafu lɛ Umosisi, ó lɛ ɔcɛ nōo géē ta ɔ abɔ je lɛ ɔ. (Oyɛb. 4:10-16) Ohigbu ɛnyā, Umosisi lɛ ɔtu hayi iyɔbu ku Ufero, klla lɛ ɛhɔ ku Ujehofa cɛ lɛ ɔ. Igbihaajɛ a, Umosisi gáā le má, ɛgɛ nɛ Ujehofa bi ɔfu ku nu le nya ācɛ Isrɛlu ta, klla je Ufero mla ācɛ ɔlɛ nu kpo yiifi ipu isu a.—Oyɛb. 14:26-31; Aíjē 136:15.

⁸ Abɔ Umosisi lɛ ācɛ Isrɛlu bi wɛɛcɛ ŋma Ijipiti a, é ka iŋiŋi tu Umosisi igbalɛwa. Naana a, Umosisi má ɛgɛ nɛ Ujehofa mafu ō gbeyicii ipu ɛma ku nu mla ācɛ nɛ ó hɛta ŋma ɔfiyɛ a. (Aíjē 78:40-43) Eko nɛ Umosisi gbɔɔkɔ lɛ Ujehofa kóō hii kpo ācɛ Isrɛlu a ŋmo ŋ ma, nɛ Ujehofa kē jahɔ tu ɔ a, ó gáā le mafu lɛ Umosisi ɛgɛ nɛ Ujehofa gē ta iyi nu waajɛ lɛ a.—Oyɛb. 32:9-14.

9. Oŋma ɛlā nōo yɔ ɔkpá ku Ācɛ Uhíbru 11:27 a, ɛgɛnyá nɛ ɛma ku Umosisi mla Ujehofa lɛ a?

⁹ Abɔ Umosisi kpo ācɛ Isrɛlu bɛɛcɛ ŋma ipu Ijipiti a, ɛma ku nu mla Ujehofa kwu lɔfu nɛhi bɛɛka ó yɔ i má Ɔwɔico eyī caa a. (Jé Ācɛ Uhíbru 11:27.) O ya ɛɛ ku alɔ jé  ɛgɛ nɛ ɛma ku uwa lɔfu lɛ a, Ubáyíbu da alɔ kahinii: “Óndú ā gē leyīkwu Umósīsi eyī gē kɛlā mla anú bɛ̄ɛka ɔ̄cɛ mla oklóbīya nū ā.”—Oyɛb. 33:11.

10. Ɔdi nɛ alɔ cika ō ya, o ya ɛɛ ku alɔ jé Ujehofa lɔɔlɔhi a?

¹⁰ Ɛlā nyá nɛ alɔ nwu a? Ɔdaŋ ku alɔ dɔka ō jé Ujehofa lɔɔlɔhi, ó wɛ uce ō ya ku nu foofunu nɛ alɔ gáā jé a ŋ, amáŋ alɔ cika ō ya ɔdā nɛ ó tine a. Ɔdā nɛ Ujehofa tine icɛ a wɛ ku “odúúdú ācɛ kéē lɛ ɛlā ɔkwɛyi ā jé, cɛ́ɛ́ kóō géē lɛ uwa nyatá.” (1 Utím. 2:3, 4) Ɔwɛ éyi nɛ alɔ géē ya ɔdā nɛ Ujehofa tine a, wɛ ō nwu ācɛ ɔhá ɛlā lɛyikwu ɔ.

11. Ɛgɛnyá nɛ alɔ gē jé Ujehofa lɔhi fiyɛ abɔ alɔ gē nwu ācɛ ɔhá ɛlā lɛyikwu ɔ a?

¹¹ Igbalɛwa, alɔ gē jé Ujehofa lɔɔlɔhi eko nɛ alɔ i nwu ācɛ ɔhá ɛlā lɛyikwu ɔ. Ocabɔ mafu, alɔ gē má enyinyi ku Ujehofa eko duuma nɛ ó lɛ alɔ bi gā ɛgiyi ācɛ nōo dɔka ō wɛ ɔya ku nu. (Ujɔ́n. 6:44; Ācot. 13:48) Alɔ gē má ɔfu ku Ɔwɔico ɔwɛ ɛgɛ nɛ Ubáyíbu gē ta ācɛ abɔ kéē lɛ abɔ ci uce ō ya nōo bɔbi, klla lɛ opiyabɔ ya ipu oyeeyi ku uwa a. (Ukól. 3:9, 10) Alɔ kē i má ocabɔ ku ɛgɛ nɛ Ɔwɔico gē gbeyicii a, ohigbu ka ó gē jɛga alɛwa lɛ ācɛ kéē nwu ɛlā ɔkwɛyi lɛyikwu ɔ, o ya ɛɛ kéē le nyata.—Uróm 10:13-15.

12. Oŋma ɛlā nōo yɔ ɔkpá ku Oōyɛbɛ̄ɛcɛ 33:13 a, ɔdi nɛ Umosisi ba Ujehofa a, ɔdi kē ya nɛ ó da Ujehofa lɛ a?

¹² Ɛma nɛ Umosisi lɛ mla Ujehofa a jɛ ɔ eyī nɛhi. Ujehofa bi Umosisi le yuklɔ idaago alɛwa. Ohigbu ɛnyā, Umosisi jé Ujehofa lɔɔlɔhi. Naana, Umosisi klla gbɔɔkɔ lɛ Ujehofa kóō ta ɔ abɔ kóō jé lɔɔlɔhi fiyɛ. (Jé Oōyɛbɛ̄ɛcɛ 33:13.) Eko nɛ Umosisi kɛla nyā, ó le fiyɛ ihayi ofu ɛnɛ (80) ɛ, amáŋ ó jé ka ó lɛ aɔdā alɛwa nɛ ó cika ō nwu lɛyikwu Ujehofa kpɔ.

13. Ɔdi wɛ ɔwɛ éyi nɛ alɔ lɔfu mafu ku ɛma ku alɔ mla Ujehofa jɛ alɔ eyī nɛhi a?

¹³ Ɛlā nyá nɛ alɔ nwu a? Ɛgɛ duuma nɛ alɔ humayi gba Ujehofa ɛ̄gbā ɛ, alɔ jama jama leyi gwo ɛma ku alɔ mla Ujehofa bonu ŋ. Ɔwɛ éyi nɛ alɔ géē mafu ku ɛma ku alɔ mla Ujehofa jɛ alɔ eyī a, wɛ ō kɛla lɛ ɔ ipu ɔkɔ ō gba.

14. Ɔdiya nɛ ɔkɔ ō gba cɛgbá nɛhi ō ta alɔ abɔ ku alɔ nwu ɛlā lɛyikwu Ɔwɔico a?

¹⁴ Ɔka ō ka gē ya ku ɛma ku ācɛ ɛpa kóō lɔfu. O ya ɛɛ ku a lɛ ɛnɛɛnɛ ɛma mla Ujehofa, bēē gbɔɔkɔ lɛ ɔ ŋma ɔtu. A kē yuufi ō da ɔ ɔdā nōo yɔ ipu ɔtu ku uwɔ a ŋ. (Āfi. 6:18) Ukrista nōo lā Uturkey a kahinii: “Eko duuma nɛ um lɛ ɔkɔ gba lɛ Ujehofa, nɛ um kē má ɛgɛ nɛ ó yɔ i ta um abɔ a, Ihɔtu mla ɔtu okpoce nɛ um lɛ lɛ ɔ a gē lɔfu tōōtɔ̄ɔ̄. Ō má ɛgɛ nɛ Ujehofa gē cila ɔkɔ ō gba ku um a, gē ta um abɔ ku um má Ujehofa bɛɛka Adā um mla Ɔya ku um.”

15. Ɛdɔ ɔcɛ nyá nɛ Ujehofa ka Udefidi ɔ wɛ a?

¹⁵ Eko néē ma Udefidi nōo wɛ ɔcɛ́ a, adā nu, ɛ́nɛ́ nu mɛmla ɛjɛɛji ācɛ nōo lā pi uwa a wɛ ācɛ ō gba Ujehofa ɛ̄gbā. Amáŋ, Udefidi i gba Ujehofa ɛ̄gbā foofunu ohigbu ku apɔlɛ ku nu yɔ i gba Ujehofa ɛ̄gbā ŋ. Ó lɛ ɛma ku abɔyi nu mla Ɔwɔico. Ohigbu ɛnyā, Ɔwɔico yihɔtu nu nɛɛnɛhi. Lɛyikwu Udefidi, Ujehofa kahinii: O “wɛ ɛdɔ ɔ̄cɛ nōo he um ɔtū.” (Ācot. 13:22) Ɔdiya nɛ ɛma ku Udefidi mla Ujehofa lɔfu nɛɛnɛhi a?

16. Ɔdi nɛ Udefidi nwu lɛyikwu Ujehofa ŋma ō leyi yɛ aɔdā nɛ Ujehofa ya a?

¹⁶ Udefidi nwu ɛlā lɛyikwu Ujehofa ŋma aɔdā nɛ Ujehofa ya a. Eko nɛ Udefidi wɛ ɔyipɛ oklobiya a, igbalɛwa ó gē lɛ eko taajɛ gē leyikwu aala ku adā nu. Á jé ŋ, eko ɔɔma nɛ ó gbɔɔ ō gbɛla lɛyikwu aɔdā nɛ  Ujehofa ya a. Ocabɔ mafu, eko nɛ Udefidi leyi má ɔkpanco otu, ó gē má ainyilɔwɔ lɛwa lɛwa. Amáŋ, ó wɛ ainyilɔwɔ foofunu nɛ ó gē má a nóó. Ɛbɛ nɛ ó gē má ɔɔma gē ta ɔ abɔ kóō jé auce ō ya ɛyɛɛyɛyi ku ɔcɛ nōo ya uwa a. Udefidi abɔyi nu kahinii: “Eko nɛ ɔ̄cɛ jeyī gicō má Ɔkpáncō, ó í má péee ɛ́gɛ́nɛ̄ Ɔwɔicō lɔfú nɛ̄hi lɛ ā. Ɔkpancō klla gē ma úklɔ́ abɔ̄ nɛ̄ Ɔwɔicō yá ā fú péee.” (Aíjē 19:1, 2) Eko duuma nɛ Udefidi gbɔɔ ō gbɛla lɛyikwu ɛgɛ nɛ Ɔwɔico ya alɛɛcɛ a, ó géē ta ɔ abɔ kóō má ɛgɛ nɛ Ujehofa jijeeyi nɛhi lɛ a. (Aíjē 139:14) Abɔ Udefidi gbo juju tu aɔdā nɛ Ujehofa ya a, ó má ku anuɔ lɛ ligii ɛgiyi Ujehofa.—Aíjē 139:6.

17. Ɔdi nɛ alɔ lɔfu nwu ŋma ō gbɛla kwu aɔdā nɛ Ujehofa ya a?

¹⁷ Ɛlā nyá nɛ alɔ nwu a? Ō bēē leyi yɛ aɔdā nɛ Ɔwɔico ya a kóō he uwɔ ɔtu ō ya. Lɛ eko taajɛ ku a bēē má ɛcɛ ku alɔ nyā nɛ Ujehofa ya nōo heyifuu nɛhi a. Kóō bēē hɛ uwɔ idaago! Ɛ̄cī doodu, gbɛla kwu ɛlā nɛ a gē nwu lɛyikwu Ujehofa ŋma ō leyi yɛ aɛbɛ, epu, aɔcí mla alɛɛcɛ. Cɛɛ a géē yɔ i nwu ɛlā ɛ̄cī doodu lɛyikwu Ujehofa nōo wɛ Adā ku ihɔtu a. (Uróm 1:20) Ɛ̄cī doodu, a géē má ku ɛma ku uwɔ mla Ujehofa géē yɔ i lɔfu tōōtɔ̄ɔ̄.

18. Oŋma ɛlā nōo yɔ ipu ɔkpá ku Aíjē Kú Ɛ̄gbā 18 a, ɔdi nɛ Udefidi jé a?

¹⁸ Udefidi jé ku Ujehofa yɔ i ta ɔ abɔ a. Ocabɔ mafu, eko nɛ Udefidi gbo aala ku adā nu ŋma ɛgiyi agaba mla ɔgwú a, ó jé ku Ujehofa ta ɔ abɔ ŋmo aɛ́bɛ́ obɔbi ɔɔma a. Eko nɛ ó ŋmo Ugoliyati a, Udefidi má peee ku Ujehofa yɔ i ta ɔ abɔ a. (1 Usám. 17:37) Eko nɛ Udefidi kwinya ŋma ɛgiyi Usɔlu nōo yɔ i mimalanyi nu, klla dɔka ō ŋmo ɔ a, ó jé ku Ujehofa ta ɔ abɔ a. (Aíjē 18) Ɔdaŋ ku Udefidi wɛ ɔcɛ nōo gē yɔbɔɔcɛ nɛɛ, ó géē yɛ i gbɛla ku ɔfu ku nu nɛ ó bi le nuunu a. Amáŋ abɔ Udefidi wɛ ɔcɛ nōo gē ta iyi nu waajɛ a, ó jé ku Ujehofa géē ta ɔ abɔ a.—Aíjē 138:6.

19. Ɔdi nɛ alɔ lɔfu nwu ŋma ocabɔ ku Udefidi a?

¹⁹ Ɛlā nyá nɛ alɔ nwu a? Alɔ i cika ō gbɔɔkɔ lɛyikwu otabɔ ku Ujehofa foofunu ŋ. Amáŋ, alɔ cika ō ceyitikwu ku alɔ jé eko nɛ ó gē ta alɔ abɔ mla ɛgɛ nɛ ó gē bi le ya ɔ a. Ɔdaŋ ku alɔ gē ta iyi alɔ waajɛ, alɔ géē cɛ ku alɔ i ya ɛjɛɛji odee abɔyi alɔ gla ŋ. Alɔ klla géē cɛ ku Ujehofa gē ta alɔ abɔ ō ya ɔdā duuma nɛ alɔ i ya abɔyi alɔ gla ŋ ma. Eko duuma nɛ alɔ má ku Ujehofa yɔ i ta alɔ abɔ, ɛma ku alɔ mla anu géē bēē lɔfu tōōtɔ̄ɔ̄. Ó lɛ ɔyinɛ alɔ nɔnyilɔ éyi nōo lā ipu éwo ku Ufiji nōo má ku ɛlā nyā wɛ ɔkwɛyi. Iye nu lé ka Ayisiki, ó kē humayi gba Ujehofa ɛ̄gbā gboji gboji ɛ. Ó kahinii: “Ɔdaŋ ka um leyi má oyeeyi ku um, n gē má ɛgɛ nɛ Ujehofa ta um abɔ ŋma eko nɛ um gbɔɔ ō klɔcɛ ku Ubáyíbu jaa kwu icɛ. Ohigbu ɛnyā, n gē má Ujehofa ka ó yɔ ɔkwɔɔkwɛyi.”

20. Ɔdi nɛ alɔ lɔfu nwu ŋma ɛma nɛ Udefidi lɛ mla Ɔwɔico a?

²⁰ Udefidi ya ɛgbla ku uce ō ya ku Ujehofa. Ujehofa ya alɔ ɔwɛ nɛ alɔ gbla uce ō ya ku nu gla. (Ohút. 1:26) Abɔ alɔ yɔ i nwu ɛlā lɛyikwu uce ō ya ɛyɛɛyɛyi ku Ujehofa a, ó géē ta alɔ abɔ gbla ɔ ya lɔhi fiyɛ. Udefidi yɛce ocabɔ ku Ujehofa ipu ɛma ku nu mla ācɛ ɔhá ohigbu ka ó jé Ujehofa lɔɔlɔhi. Alɔ Leyi yɛ ocabɔ éyi. Udefidi lɛ íne ku Ujehofa biya eko nɛ ó cikpo ku Ubatssɛba nōo wɛ ɔnyā ku ɔcɛ ɔhá a. Ó klla ya kéē lɛ ɔba nu ŋmo. (2 Usám. 11:1-4, 15) Amáŋ, Ujehofa menyinyi Udefidi, ohigbu ku Udefidi wɛ ɔcɛ ō menyinyi ācɛ ɔhá. Abɔ Udefidi lɛ ɛma olɔhi mla Ujehofa  a, ācɛ Isrɛlu yihɔtu nu nɛɛnɛhi, ó klla le piya ocabɔ olɔhi lɛ aɔcɛ́ ɔhá.—1 Aɔ́cɛ́ 15:11; 2 Aɔ́cɛ́ 14:1-3.

21. Oŋma ɛlā nōo yɔ ɔkpá ku Ācɛ Ɛfēsɔsi 4:24 mla 5:1 a, itene nyá nɛ alɔ géē lɛ, ŋma ō gbla “ucē kú Ɔwɔicō yá” a?

²¹ Ɛlā nyá nɛ alɔ nwu a? Alɔ cika ō gbla “ucē kú Ɔwɔicō yá.” Eko duuma nɛ alɔ le ya lɛ a, alɔ géē lɛ itene, klla jé ɔdā alɛwa lɛyikwu ɔ. Eko duuma nɛ alɔ ya ɛgbla ku uce ō ya ku Ɔwɔico, alɔ yɔ i mafu ku alɔ wɛ ayipɛ ɔlɛ nu.—Jé Ācɛ Ɛfēsɔsi 4:24; 5:1.

22-23. Ɔdi gáā ya ɔdaŋ ku alɔ gē bi ɔdā nɛ alɔ jé lɛyikwu Ujehofa a le yuklɔ ipu oyeeyi ku alɔ a?

²² Oŋma ɛlā nɛ alɔ humayi ka a, alɔ lɔfu nwu ɛlā lɛyikwu Ujehofa ŋma aɔdā nɛ ó ya a mla ō jé Ubáyíbu nōo wɛ ɛlā ku nu a. Ipu Ubáyíbu, ó lɛ aocabɔ ku ācɛ alɛwa nōo hayi kpaakpa ipu ɛ̄gbā ō gba ku Ujehofa bɛɛka, Umosisi mla Udefidi. Ujehofa lɛ ukpɛ ku nu ya ɛ. Alɔ cika ō ya ukpɛ ku alɔ ŋma lɛ ō nwu aɛlā alɛwa nɛ alɔ jé ku alɔ nwu gla a lɛyikwu ɔ.

²³ Alɔ i gáā nwu ɛlā lɛyikwu Ujehofa mɛ gboogboo gla ŋ. (Ɔ̄cok. 3:11) Ó wɛ ɔdā nɛ alɔ jé lɛyikwu Ujehofa a cɛgbá fiyɛ a ŋ, amáŋ ɔdā nɛ alɔ gē ya mla ɔdā nɛ alɔ jé lɛyikwu Ujehofa a nɛ. Ɔdaŋ ku alɔ gē bi ɔdā nɛ alɔ nwu a le yuklɔ, klla gē yɛce ocabɔ ku Ujehofa, ó géē yɔ i tubla alɔ ajaajɛ fiyɛ. (Ujém. 4:8) Ujehofa da alɔ ipu Ubáyíbu, ku anuɔ i gáā cigbihi kwu ācɛ nōo gē ceyitikwu kéē jé ɔ lɔɔlɔhi a gboogboo ŋ.