Ehee. Ebilii i da Iifu ka ɔdaŋ ka ó lé ikpɔci nɛ Ɔwɔico da uwa kéē hii lé ŋ ma, ka ɔkpiye ku nu géē kwū, amáŋ aya éyi ku iyē ku nu nɛ eyī i gē má gla ŋ ma (ɔdā nɛ ācɛ ōhī gē ka icɛ a ka odo i gē kwū ŋ ma) géē nyɔ i bēē lá ɛga ɔhá nóó. Ebilii kɛla lɛ Iifu o bu ipu ɛgwa. Ó da ɔ ka ɔdaŋ ka ó lɛ ikpo ku ɔcí ɔɔma lé, ‘ó gáā kwú’ gboogboo ŋ. Ɔɔma mafu ka Ebilii yɔ i da Iifu ka ó géē yeeyi piyoo klla géē jɔɔnyɛ oyeeyi olɔhi ipu ɛcɛ nyā. Ɛdɔ oyeeyi nɛ Ɔwɔico i kóō gáā lɔfu da uwa ɔdā néē cika ō ya a ŋ.—Ohút. 2:17; 3:3-5.

Ɔdaŋ ka ɛlā ɛkɛmgbɛ nyā néē i nwu ācɛ icɛ a ka odo i gē kwū ŋ ma i hutu ŋma Idɛn ŋ, oŋma eko nyá nɛ ācɛ gbɔɔ ō gbɛla nu a mɛ? Alɔ i jé kpaakpa ŋ. Amáŋ alɔ jé ka ɛjɛɛji ɛ̄gbā ō gba ku ɛkɛmgbɛ a le kpo yiifi eko nɛ eŋkpɔ cenyi kla ɛcɛ ɛpleeko ku Unowa a. Unowa mɛmla apɔlɛ ku nu foofunu wi eko ɔɔma a. Abɔ ɛjɛɛji uwa kē wɛ ācɛ ō gba Ujehofa ɛ̄gbā a, ó lɛ ɔcɛ duuma nōo géē yɔ i nwu aɛlā ɛkɛmgbɛ ɛpleeko ɔɔma gla gɛ ŋ.

Ó lɛ a, ɛlā néē i nwu icɛ a ka odo i gē kwū ŋ ma gbɔɔ ŋma igbihi ku eko nɛ eŋkpɔ cenyi kla ɛcɛ a. Eko nɛ Ɔwɔico lɛ uce ku ācɛ gbaji ipu Ubabɛlu, nɛ ācɛ klla le pahila “ga ɛga dóódu kú ɛcɛ ā,” ó lɛ aafu ŋ, é bi ɛlā ō nwu ɔɔma mla iyi uwa duu. (Ohút. 11:8, 9) Amáŋ, ɛga duuma nɛ ɛlā ō nwu ɔɔma kóō hutu ŋma naana, alɔ jé kpɔcii ka Ebilii nōo wɛ “ádā kú ɛ̄kɛ̄mgbɛ̄” a lɛ abɔ ipu nu. Ó kē he ɔ ɔtu abɔ ɛlā ō nwu nyā yɔ i nyila gā ɛga doodu ipu ɛcɛ nyā a.—Ujɔ́n. 8:44.