A lɔfu cila ohi ku aɔka nōo ba nyā ŋma Ɔda Ō Gbaajɛ ku ihayi ku 2019 gla a?

Ɔdi wɛ ɛyi ku okonu ō ce ku Ɔwɔico nōo kahinii: “Ó lɛ íyɛ́fú dúúmā nēé bī wā gaá le nuunu tá uwɔ nōo géē lɔfú yá uwɔ ɔdā dúúmā glá ŋ́”? (Ayis. 54:17)

Alɔ lɔfu kpɔtuce ku Ɔwɔico géē gbo alɔ tu ŋma ɔfu ō ca ɔcɛ taajɛ ŋma ɛgiyi ‘ācobɔ̄bíipú nōo gē nuunu tá alɔ’ a. (Ayis. 25:4, 5) Aolɛla ku alɔ i gáā lɔfu ya alɔ ɔdā duuma nōo géē ŋmo alɔ piyoo gla ŋ.—w19.01, pp. 6-7.

Ɛgɛnyá nɛ ɔwɛ nɛ Ujehofa ya mla ācɛ ku Ukenan mɛmla ācɛ Isrɛlu néē ya ikpɛyi olɔfu ta ɔ a, mafu ka ó wɛ ɔcɛ ō dɔka ɛlā okpaakpa a?

Ɔwɔico kɛpɔ tu ācɛ nōo lɛ abɔ ipu aja ogbo mla ikpo ɔnyā ɔhá ō ce amāŋ ācɛ nōo yɔ i ya acɛnya mɛmla ayipɛ ɔdobɔbi a. Ó hɔha ce ācɛ nōo lɛyitaajɛ lɛ ɔ, nōo klla ya ɛlā okpaakpa lɛyikwu ācɛ ɔhá a.—w19.02, pp. 22-23.

Ɔdi nɛ alɔ cika ō ya, ɔdaŋ ku alɔ yɔ ɛga nɛ ɔcɛ nōó wɛ ɔcɛ ō gba Ujehofa ɛ̄gbā ŋ ma yɔ i gbɔɔkɔ a?

Alɔ lɔfu kla cii ɔwɛ ojilima. Amáŋ alɔ i gáā ka “ami” ŋ. Alɔ i kē gáā lɛ abɔ ta ācɛ ɔhá néē ba abɔ a abɔ ŋ. Alɔ lɔfu gbɔɔkɔ ku abɔyi alɔ ipu ɔtu ku alɔ gla.—w19.03, p. 31.

Ɛgɛnyá nōo biya ayipɛ bɔbi lɛ a?

Ō biya ayipɛ wɛ íne ō biya lɛyikwu ɔyi néē biya a, ujɔ, ɛgiyi igɔmɛnti mɛmla ɛgiyi Ɔwɔico. Ɔdaŋ ka íne ku ajɛ a tine kē lɛ ɔcɛ nōo ya uce obɔbi ɔɔma kpo ɛpɔ, anyakwɔcɛ géē cɛtɔha mla íne a.—w19.05, pp. 9-10.

Ɛgɛnyá nɛ a lɔfu piya ɔwɛ ɛgɛ nɛ a gē gbɛla a abɔ a?

Aɔwɛ a yɔ a: Kɛla lɛ Ujehofa ipu ɔkɔ ō gba. Ɔdaŋ ku a dɔka ō gbɛla tu odee, bi ɔ ipu ɔtu ku a yɔ i ya ɔ, o ya ɛɛ ku a jila iyi uwɔ má. Je ācɛ nɛ a géē dɔka kéē wɛ oklobiya amāŋ ancɛnya uwɔ a ɔwɛ ijeeyi.—w19.06, p. 11.

Ɔdiya nɛ alɔ lɔfu ya ō tutu babanya lɛyikwu owe amāŋ o ya ŋmo?

Alɔ cika ō ya ku ɛma ku alɔ mla Ujehofa kóō lɔfu. Lɛ ɔtuce ka Ujehofa yihɔtu alɔ nɛhi ka ó klla gáā cigbihi kwu alɔ gboogboo ŋ. Bēē jé Ubáyíbu ɛ̄cī doodu, ku a klla bēē gbɔɔkɔ eko doodu duu. Lɛ ɔtu okpoce ka Ujehofa géē ya ɛjɛɛji ɔdā nɛ ó cokonu lɛyikwu Ajɔɔcɛ ku nu a. Bēē jé ɛga ku Ubáyíbu ɛyɛɛyɛyi nōo he uwɔ ɔtu a tu ɛyi mɛmla aijé nɛ alɔ gē bi le cɛtra Ujehofa a.—w19.07, pp. 2-4.

Ɔdi nɛ alɔ lɔfu ya, o ya ɛɛ ku alɔ ta ācɛ ɔlɛ alɔ abɔ kéē lɛ onyata lɛ a?

Ó géē cɛgbá nɛɛnɛhi ku alɔ mafu ku alɔ jé ɛgɛ nɛ ɔtu gē ya uwa lɛ a, lɛ ocabɔ olɔhi taajɛ lɛ uwa. Gbonɛnɛ lɛ uwa, amáŋ a hii cɛ kéē piya ɔtu ku uwɔ abɔ ŋ.—w19.08, pp. 15-17.

Ɛgɛnyá nɛ Ujisɔsi gē je omlɛnyɔ lɛ alɔ, ɛgɛ nɛ ó cokonu ipu ɔkpá ku Umátiyu 11:28 a?

Alɔ lɛ ācɛ olɔhi fiyɛ duu nōo gē leyi kwu alɔ. Alɔ klla lɛ aoklobiya mla ancɛnya mla uklɔ nōo lɔhi fiyɛ duu.—w19.09, p. 23.

Ɛgɛnyá nɛ Ɔwɔico lɔfu ya ku ɔtu kóō he alɔ klla je ɔfu lɛ alɔ, o ya ɛɛ ku alɔ ya ɔdā nɛ ó dɔka ku alɔ ya a? (Ufíl. 2:13)

Abɔ alɔ gē jé Ubáyíbu klla gē gbɛla tu ɛlā nɛ alɔ jé a, Ɔwɔico lɔfu je ɔfu iyē lɛ alɔ, o ya ɛɛ ku ɔtu kóō he alɔ, ku alɔ ya ɔdā nɛ ó dɔka ku alɔ ya a. Alelekwu ihɔ ku nu lɔfu ta alɔ abɔ ku alɔ ya ɔdā nɛ alɔ jé ō ya a gbɔbu a ɔwɛ olɔhi fiyɛ.—w19.10, p. 21.

Ɔdi wɛ aɔdā ɛhɔ nōo wɛ ɔdā ijeeyi nɛ alɔ cika ō ya gbɔbu ɛɛ ku alɔ miya ɔdā ō ya a?

Aɔdā ɛhɔ a wɛ kahinii: Jila aɛlā má lipu lipu. Gbɔɔkɔ lɛ Ujehofa kóō jijeeyi gā awɔ. Leyi yɛ ɔdā nɛ a bi ɔtu gbɔbu ɛɛ nɛ a dɔka ō miya ɔdā ɔɔma a. Lɛ odee nɛ a dɔka ō ya piii a. Miya ɔdā nɛ a jé ku a ya gla.—w19.11, pp. 27-29.

Ɛlā ō nwu lɛyikwu odo i gē kwū ŋ ma hutu ŋma ɔdā nɛ Ebilii da Iifu a nɛɛ?

Ehee. Ebilii da Iifu ka ó gáā kwū ŋ. Ó wɛ ka ó da ɔ ka ó géē lɛbɛɛka ó gekwu nóó. Ó lɛ ɔwɛ ō gba ɛ̄gbā duuma nōo yɔ igbihi nɛ eŋkpɔ cenyi kla ɛcɛ eko ŋ. Ācɛ lɔfu gbɔɔ ō kpɔtuce ka odo i gē kwū ŋ, gbɔbu lɛ eko nɛ Ɔwɔico kóō je uce ku ācɛ fiyakata eko néē yɔ i gwo inɔɔda ku Ubabɛlu a.—w19.12, p. 15.