A GĒ má iyi uwɔ ku a wɛ ɔcɛ nōo gē ta ahinya amāŋ ɔcɛ nɛ odee gē jɛ ɔ eyī? Ɛjɛɛji alɔ cika ō gbɛla lɛyikwu ɔka ɔɔma. Ubáyíbu le ka taajɛ gbɔbu ku ɛpleeko ku alɔ nyā, ācɛ alɛwa géē je piya ācɛ “nɛ̄ ɔdā dúúmā í gáā jɛ̄ uwā eyī ŋ́.” (2 Utím. 3:2) A kóō lɔfu jé ācɛ ōhī nōo gē gbɛla ku ācɛ ɔhá cika ō je odee amāŋ ya odee lɛ uwa piii. Ó gē ya ācɛ nōo ba nyā bɛɛka é cika ō ta ahinya ku ɔdā duuma néē je lɛ uwa a ŋ. A gē dɔka ō yɔ pi ɛdɔ ācɛ ɛgɔɔma a?

Amáŋ Ubáyíbu da ācɛ nōo gē gba Ujehofa ɛ̄gbā kahinii: ‘Aá kóō yɔ̄ ī tá ahínyá eko dóódu.’ Alɔ cika ō bēē “tá . . . ahínyá ipú ɔdā dóódu.” (Ukól. 3:15; 1 Utes. 5:18) Ku ɔkwɛyi a, ó lɔhi ku alɔ kóō wɛ ācɛ nōo gē ta ahinya amāŋ ɔcɛ nɛ odee gē jɛ ɔ eyī. Ó lɛ ɔdā alɛwa nōo ya nɛ alɔ ka lɛ a.

Ɔdā ō cɛgbá nɛhi éyi nōo ya nɛ alɔ cika ō bēē ta ahinya a wɛ ka ó géē ya ku alɔ kóō bēē gweeye mla iyi alɔ. Ɔdaŋ ka ɔcɛ gē ta ahinya eko duuma néē ya odee amāŋ je odee lɛ ɔ, ó lɔfu cɛ lɛ ɔ bēē gweeye mla iyi nu. Ɔcɛ nōo kē yɔ i ta ɔ ahinya a, gáā gweeye fiyɛ a. Ɔdiya nɛ ahinya ō ta gē je eeye lɛ alɔ mla ācɛ ɔhá a? Má ocabɔ nyā ɛ: Ɔdaŋ ku a gáā le má ku ācɛ ɔhá le tutu ō ya odee gā uwɔ, a gbɛla ku a cika jɛ ɔdā ɔɔma anu ya ɛɛ néē je ɔ gā uwɔ a ŋ? É lɛ ɛlá wu uwɔ. Ɔdaŋ ku a kē gbɔɔ ō má ɔ lɛ a, ó géē ya ku a gweeye mla iyi uwɔ. Alɔ lɔfu má ɔkwɛyi ku ɛlā nyā ŋma ɔ̄kā ku Urutu. Ubowasi gbonɛnɛ lɛ Urutu nɛhi. Abɔ Urutu gáā le má ku Ubowasi lɛ ɛlá wu ɔ nɛhi a, ó cɛ lɛ ɔ kóō gweeye mla iyi nu.—Urút 2:10-13.

Ó lɔhi nɛɛnɛhi ku alɔ bēē ta Ɔwɔico ahinya. Ó lɛ aafu ŋ, ekoohi a gē gbɛla lɛyikwu ɛhi ɛyɛɛyɛyi nɛ ó je lɛ alɔ ɛ, mla aɛ̄nɛ̄ ó yɔ i je lɛ alɔ kpɔ ɛ ma. (Obla. 8:17,18; Ācot. 14:17) Amáŋ, ikɔkɔ nɛ alɔ géē bēē gbɛla ligii lɛyikwu aɔdā olɔhi nɛ Ɔwɔico gē ya lɛ alɔ a, ó géē lɔhi fiyɛ ku alɔ lɛ eko taajɛ lɔɔlɔhi ō gbɛla lɛyikwu ɔhā alɛwa nɛ Ɔwɔico yɔ i hɛ ce alɔ a. Ɔdaŋ ku a gē ya lɛ a, ó géē ta uwɔ abɔ ku a bēē ta ɔ ahinya tōōtɔ̄ɔ̄. Ó klla géē cɛ gā uwɔ jé ɛgɛ nɛ ó yihɔtu uwɔ mla ɛgɛ nɛ a jɛ ɔ eyī nɛhi lɛ a.—1 Ujɔ́n. 4:9.

Alɔ kóō bēē gbɛla kwu aɔdā nɛ Ujehofa géē je lɛ alɔ klla bēē ta ɔ ahinya. (Aíjē 100:4, 5) É gē ka kahinii: “Ō ta ācɛ ɔhá ahinya gē cɛ lɛ ɔcɛ gweeye nɛhi.”

Ɔdā ɔhá nōo ya nōó lɔhi ku a bēē ta ahinya a wɛ kahinii, ó géē ya ku ɛma ku uwɔ mla ācɛ ɔhá kóō lɔfu. Ɛjɛɛji alɔ dɔka ku ācɛ ɔhá kéē bēē ta alɔ ahinya, eko duuma nɛ alɔ lɛ odee ya lɛ uwa. Eko duuma nɛ a ta ɔcɛ ahinya ku ɔdā nɛ ó ya gā uwɔ a, aa ɛplɛɛpa géē wa i lɛ ɛma olɔhi fiyɛ. (Uróm 16:3, 4) Ɔdā ɔhá wɛ kahinii, ɔdaŋ ku alɔ wɛ ācɛ nōo gē ta ahinya, ó géē ta alɔ abɔ ku alɔ je otabɔ lɛ ācɛ ɔhá fiyɛ. Ɔdaŋ ku ācɛ ɔhá lɛ ɔdā ogbonɛnɛ ya lɛ alɔ, alɔ géē jé. Ó klla géē lɛ abɔ kwu alɔ ɔtu ku alɔ ya ɔdā ogbonɛnɛ lɛ uwa duu. Ku ɔkwɛyi a ba, ō ta ācɛ ɔhá abɔ gē bi ogweeye wa. Ó lɛbɛɛka ɛlā nɛ Ujisɔsi ka a, ó kahinii: ‘Eeye yɔ̄ lɛ ɔ̄cɛ nōo gē je fíyɛ́ ɔ̄cɛ nōo gē mīyɛ ā.’—Ācot. 20:35.

Adā éyi nōo le ka Urobert Emmons nōo leyikwu ɔkpá ō nwu éyi lɛyikwu ahinya ō ta a ipu Inɔkpa Nɛhi ku Ucalifornia a kahiini: “O ya ɛɛ ku alɔ wɛ ācɛ nōo gē ta ahinya amāŋ ācɛ nɛ odee gē jɛ uwa eyī a, alɔ cika ō bi ɔtu ku ɛjɛɛji alɔ gē gbolo ce iyi alɔ. Ekoohi alɔ gē je odee lɛ ācɛ, eko ɔhá ācɛ ɔhá kē i je odee lɛ alɔ a.” Alɔ cika ō gbolo ce ācɛ ɔhá ɔwɛ éyi amāŋ ɔwɛ ɔhá, ɔdaŋ ku alɔ dɔka ō yeeyi klla  lɛ eeye ipu oyeeyi ku alɔ. Ocabɔ mafu, é lɔfu je ɔdole lɛ alɔ amāŋ ta alɔ abɔ eko duuma nɛ alɔ yɔ i doōcē. (1 Ukɔ́r. 12:21) Ɔdaŋ ku ɔcɛ wɛ ɔcɛ ō ta ahinya, ó géē mafu peee ka ɔdā nɛ ācɛ ɔhá gē ya lɛ ɔ a jɛ ɔ eyī nɛhi. Ó lɛ a, a kwu ɔ u piya uce ō ya ku uwɔ ō bēē ta ahinya eko duuma nɛ ācɛ ɔhá lɛ odee ya gā uwɔ ɛ?

Ɔdā ɔhá nōo ya nōó lɔhi ku alɔ kóō je piya ācɛ ō ta ahinya a wɛ kahinii, ó géē ta alɔ abɔ ku alɔ lɛ ɔtu ku alɔ kwu aɔdā olɔhi fiyɛ aɔdobɔbi. Ó géē ya ku alɔ lɛ ɔtu kwu aɔdā olɔhi fiyɛ ō lɛ ɔtu kwu unwalu ku alɔ. Abɔ a gē ta ahinya nwune nwune a, ɛgɔɔma nōó gáā bēē ta uwɔ abɔ ku a bēē má aɔdā olɔhi fiyɛ a. Ɛnyā kē i ya ku a bēē ta ahinya tōōtɔ̄ɔ̄. Ɔdaŋ ku alɔ gē lɛ ɔtu ku alɔ kwu aɔdā nɛ alɔ lɔfu ta ahinya ku nu, ó géē ta alɔ abɔ ku alɔ ya ɔdā nɛ Upɔlu ta ayinɛ ɔtu kwu ɔtu kéē ya a. Ó kahinii: “Ɔtū kú aá kóō wɛ ɛnɛ̄hɛ́ ojigógó abɔ̄ aá pīyatɔ̄há mla Óndú ā.”—Ufíl. 4:4.

Ō bēē ta ahinya géē ta uwɔ abɔ ku a hii bēē gbɛla ɔwɛ obɔbi ŋ. Ó tɔɔtɛ ku ɔtu ku ɔcɛ kóō le mu mla ahinya ō ta, imalanyi ō má mla icɔnu igbenkponu gla a? Ɔdā ɔhá wɛ kahinii, ācɛ nōo gē ta ahinya a i gē yihɔtu ku aɔdā agbenu fiyɛ ɔfu ŋ. Ɔdā néē lɛ a gē jɛ uwa eyī. É klla gē ceyitikwu eko doodu o ya ɛɛ kéē lɛ fiyɛ ŋ.—Ufíl. 4:12.

Abɔ a wɛ Ɔcɛ O Yɛce Ukraist a, a jé ka Ebilii géē dɔka ō bi akanya amāŋ owe nɛ a yɔ i má eko amoomɛ nyā, le ya ku ɔtu kóō biya gā uwɔ, ku abɔ kóō klla hɛ uwɔ iyē nɛɛnɛhi. Ó géē he ɔ ɔtu ɔdaŋ ku a lɛ uce obɔbi lɛ klla yɔ i lɛ eyī má ɛjɛɛji odee ɔwɛ obɔbi. Ɔdaŋ ku a wɛ ɛdɔ ɔcɛ ɛgɔɔma, ó gáā tɔɔtɛ lɛ ācɛ kéē jahɔ gā uwɔ eko nɛ a yɔ i kɛla Ɔwɔico lɛ uwa a ŋ. Ahinya ō ta mla ikpo ku alelekwu ku Ɔwɔico tɛɛma kwu iyi uwa. Ocabɔ mafu, alɔ gē lɛ eyee ohigbu ku alɔ gē má aɔdā olɔhi nɛ Ɔwɔico gē je lɛ alɔ a. Alɔ klla kpɔtuce aɔdā nɛ ó cokonu ku anuɔ géē ya lɛ alɔ ɛcɔbu a.—Ugal. 5:22, 23.

Abɔ a wɛ éyi ku Ācɛ Ocijali Ku Ujehofa a, a géē cɛ ku aɔdā néē ka lɛyikwu ahinya ō ta ipu ikpɛyi ɛlā nyā wɛ ɔkwɛyi. Naana a, a géē má ka ō ta ahinya mla ō lɛ ohilipu olɔhi i wɛ aɔdā nōo tɔɔtɛ ō ya ŋ. Amáŋ, a hii cɛ ku ɔɔma kóō ya ku abɔ kóō hɛ uwɔ iyē ŋ. A lɔfu ya ku a je piya ɔcɛ nōo gē ta ahinya gla. Ɛgɛnyá a? Lɛ eko taajɛ ɛ̄cī doodu ku a bēē gbɛla lɛyikwu aɔdā ōhī ipu oyeeyi ku uwɔ nɛ a lɔfu ta ahinya ohigbu nu a. Abɔ a gē ya lɛ a gɔbu a, ɛgɔɔma nɛ ahinya ō ta géē je piya ɔdā ɔlamu tu uwɔ a. Ɛnyā kéē i cɛ gā uwɔ lɛ eyee nɛhi fiyɛ ācɛ nōo gē lɛ ɛlá wu unwalu ku oyeeyi a. Bēē gbɛla lɛyikwu aɔdā olɔhi nɛ Ɔwɔico mla ācɛ ɔhá ya gā uwɔ, nōo ta uwɔ ɔtu kwu ɔtu klla cɛ gā uwɔ gweeye a. A kóō lɔfu gbɔɔ ō ta uwa taajɛ ipu ɔkpá. Ipu ɔkpá a, a lɔfu ta odee bɛɛka ɛpa amāŋ ɛta nōo jɛ uwɔ eyī nɛhi ɛ̄cī doodu.

Ācɛ nōo gē bɔkwu odee a kahini: “Ɔdaŋ ku alɔ gē ta ācɛ ahinya ojigogo, ó géē piya ɔwɛ nɛ ɔkɔtɔ ku alɔ gē yuklɔ a abɔ, cɛɛ ó géē tɔɔtɛ lɛ alɔ ō yɔ i gweeye lɛyikwu oyeeyi ku alɔ.” Ɔcɛ ō ta ahinya gē lɛ eeye nɛhi. Ó lɛ a, bēē gbɛla lɛyikwu aɔdā olɔhi ɛyɛɛyɛyi nɛ a miyɛ ɛ ma, bēē jɔɔnyɛ aɔdā olɔhi nōo yɔ i ya ipu oyeeyi ku uwɔ a. A kē hii mlanyi ō bēē ta ahinya eko doodu ŋ! Ikɔkɔ nɛ alɔ géē yɔ i leyi gwo aɔdā olɔhi a, alɔ kóō “tá Óndú ā ahínyá, ohígbū ka Óndú ā lɔhi.” Ii, alɔ kóō “tá . . . ahínyá ipú ɔdā dóódu.”—1 Úklɔ́ 16:34; 1 Utes. 5:18.