A lɛ Ɔda Ō Gbaajɛ ku ihayi nyā jé lɔɔlɔhi ɛ? Ó lɛ a, má ɔ ɔdaŋ ku a géē lɔfu cila ohi ku aɔka nyā gla:

Ɛgɛnyá nɛ alɔ cika ō ya odee mla ācɛ néē lɛ anɔ tu uwa ɛyi a?

Ɔtu okpoce ku uwa jɛ alɔ eyī, amáŋ alɔ i gē hɔɔkɔ uwa fiyɛ ɔfu ŋ. Alɔ i gē da uwa ɔka nōo lɛ ō ya mla uwa foofunu lɛyikwu eyiyoce ku uwa ŋ.—w20.01, p. 29.

Ɔdi cika ō cɛ gā uwɔ jé kpɔcii ka Ujehofa jé uwɔ lɔɔlɔhi a?

Ubáyíbu mafu ka ó jé uwɔ eko nɛ a yɔ ipu ku ɛ́nɛ́ uwɔ a. Ó klla gē po ɔkɔ ō gba ku uwɔ. Ó jé ɛlá nɛ a gē gbo ipu ɔtu ku uwɔ a, uce ō ya ku uwɔ kē i lɛ abɔ kwu ɔ ɔtu. (1 Úklɔ́ 28:9; Aíit. 27:11) Anu piya uwɔ wa ɛgiyi nu a.—w20.02, p. 12.

Ɔdi wɛ aocabɔ ku eko nɛ a cika ō kɛla mla eko nɛ a cika ō lɛ okonu kla cii a?

Alɔ gē kɛla lɛyikwu Ujehofa mla eeye. Alɔ gē kɛla ɔdaŋ ku alɔ má ku ɔcɛ yɔ i ya ɔdā nōo géē ya kóō nyileyi bɔbi bɔbi. Anyakwɔcɛ ku ujɔ gē kɛla eko duuma néē má kéē cɛgbá ō ta ɔcɛ ukɔ́. Alɔ gē lɛ okonu kla cii, ɔdaŋ kē da alɔ ɔka lɛyikwu ɛgɛ nɛ alɔ gē yuklɔ ku alɔ ipu aéwo néē lɛ uklɔ ku alɔ ci a. Alɔ i gáā ka aɔdā ō tayinu duuma lɛyikwu ujɔ ku alɔ tɛɛcɛ ŋ.—w20.03, pp. 20-21.

Ɔdi wɛ ɛyɛɛyɛyi ku aefuma nōo yɔ ipu Ujówɛ̄lu ɛyi 2 mla aku Ɔdā Nēé Mafú Lɛ Ujɔ́ni ɛyi 9 a?

Ujówɛ̄lu 2:20-29 ka ka Ɔwɔico lɛ aefuma a nu klla cokonu ō kpo aɔdā néē biya a cigbihi. Oŋma ɔɔma a, Ɔwɔico géē ce alelekwu ku nu. Aya nyā le ya jila eko nɛ ācɛ Ubabilɔn gáā nuunu tu ācɛ Isrɛlu mɛmla igbihaajɛ a. Ɔdā Nēé Mafú Lɛ Ujɔ́ni 9:1-11 kɛla lɛyikwu ācɛ nēé lɛ anɔ tu uwa ɛyi ɛpleeko ku alɔ nyā nōo lɛbɛɛka aefuma a. Ɛgɛ néē i tɔɔna olɛhɔ lɛyikwu ɛpɔ nɛ Ɔwɔico gáā ka tu ɛcɛ obɔbi nyā a. Olɛhɔ a kē i ya ku ācɛ nōo gē cɛtra ɛ̄cī obɔbi nyā kéē hii lɛ ɛbɔ ŋ.—w20.04, pp. 3-6.

Ɔnyɛ wɛ ɔcɛ́ ku ɛhico icɛ a?

Éwo ku Russia mla aéwo nōo gē ta ɔ abɔ a. É gē junwalu lɛ ācɛ ɔlɛ Ɔwɔico, ŋma lɛ o je uklɔ ku uwa ci mɛmla o wɔtu Ācɛ Ocijali Ku Ujehofa a. Ɔcɛ́ ku ɛhico a humayi nya mla ɔcɛ́ ku ɛhaajɛ a gboji gboji ɛ.—w20.05, p. 13.

Auce ō ya néē cɔci ipu ɔkpá ku Ācɛ Ugalésīya 5:22, 23 a, wɛ “Īkpō kú Alelékwū” foofunu a nɛɛ?

Ehee. Alelekwu Ihɔ ku Ɔwɔico gē ta alɔ abɔ ku alɔ lɛ auce ō ya olɔhi ɔhá, bɛɛka okpaakpa a. (Āfi. 5:8, 9)—w20.06, p. 17.

Ɔdi wɛ unwalu éyi nɛ alɔ lɔfu má ɔdaŋ ku alɔ gē kpo amāŋ ta odee lɛyikwu iyi alɔ ipu ɛga ō kɔka ipu intanɛti a?

Ɔdā nɛ a je ta abɔɔ a lɔfu ya ku ācɛ ɔhá kéē gbɔɔ ō gbɛla ku a yɔ i je iyi uwɔ gico, ku a wɛ ɔcɛ ō tu iyi uwɔ waajɛ ŋ.—w20.07, pp. 6-7.

Ɔdi nɛ Ācɛ O Yɛce Ukraist nōo gē tɔɔna ɛlā Ɔwɔico a lɔfu nwu ŋma ɛgiyi ācɛ ō kwu ɛbeenyi a?

É gē yuklɔ eko mɛmla ɛga néē jé kē géē má ɛbeenyi gla. É gē nwu ɛgɛ néē géē jé ō bi ɔdā ō yuklɔ ku uwa le yuklɔ lɔɔlɔhi. É klla gē lɛ ɔtu ō yuklɔ ipu āhɔ̄ duuma gla. Alɔ lɔfu ya lɛ a ipu uklɔ ku ɔna ō ta ku alɔ duu.—w20.09, p. 5.

Ɔdi wɛ ɔwɛ ōhī nɛ alɔ lɔfu ta ācɛ nɛ alɔ gē klɔcɛ mla uwa a abɔ kéē gáā yihɔtu ku Ujehofa nɛɛnɛhi a?

Alɔ lɔfu ta uwa ɔtu kwu ɔtu kéē bēē jé Ubáyíbu ɛ̄cī doodu mɛmla ō gbɛla tu ɛlā néē jé a. Alɔ kē lɔfu nwu uwa ɛgɛ néē gē gbɔɔkɔ a.—w20.11, p. 4.

Anyɛ nɛ ɛlā nōo kahinii: “É í héyi ŋmá ɔlékwū ohígbū ɛma kú uwā mla Ohɔ́nyɛtá ā” lɛ ō ya mɛmla uwa a?—1 Ukɔ́r. 15:22.

Upɔlu i yɔ i ka kē géē je ɛjɛɛji ācɛ nōo kwū a heyi ŋma ɔlekwu ŋ. Ó yɔ i kɛla lɛyikwu ācɛ néē lɛ anɔ tu uwa ɛyi “nɛ̄ Ɔwɔicō abɔ̄yīnū fu kéē wɛ ācɛ otiihɔ ku ɔlɛ́ nū” a. (1 Ukɔ́r. 1:2; 15:18)—w20.12, pp. 5-6.

Ɔdi nɛ ācɛ néē lɛ anɔ tu uwa ɛyi a gáā ya, igbihi néē le ‘pīyabɔ̄ bɛ̄ɛka eyī ōcēbeé, eko nēé le opo amōōmɛ ā tá’ a?—1 Ukɔ́r. 15:51-53.

É géē yuklɔ mla Ukraist ō gbo aéwo doodu mla ogblo ku oje. (Mafú 2:26, 27)—w20.12, pp. 12-13.