Ujehofa ta ācɛ Isrɛlu a ɔtu kwu ɔtu kéē wɛ ācɛ otiihɔ. O ya ɛɛ ka ó ta uwa abɔ wɛ ācɛ otiihɔ a, ó da uwa kahinii: “Aá kóō híī yɔ̄ ī kɛ̄mgbɛ̄ lɛyíkwu ɔ̄cɛ dúúmā ŋmá amu ga ánū ŋ́. Aá cīījáalí nōo géē nya ɔ̄cɛ nēé yɔ̄ gē kɛpɔ̄ ɔ̄cɛ ō ŋmó tū ɔ̄ ā tá. Ami wɛ Óndú ā á.”​—Ulīf. 19:2, 16.

Ɛlā nōo ka ō “cīījáalí nōo géē nya ɔ̄cɛ” a wɛ ɛlā néē cɔwɔ ŋma ipu uce ku Uhibru, amáŋ ɔdi kē wɛ ɛyi ku nu a? Ɔkpá ku ācɛ Ujiyu éyi néē ta lɛyikwu ɔkpá ku Ulīfayi a kahinii: “Aya ku Ubáyíbu nyā . . . lɔnɔ ō jɛyi nu, ohigbu ku ɔcɛ i jɛyi ɛlā ku Uhibru ɔɔma piii néē bi le yuklɔ a ŋ. Ɛyi nu ɔwɛ ɔlamu wɛ ku ‘a hii cijaali ɛkɛmgbɛ ku ɔcɛ ō ŋmo tu ɔcɛ ŋ.’”

Ācɛ ō jé ɔkpá nɛhi ōhī gbɛla ka ɛlā nyā tɛɛma kwu ɔgba igwo ɛhɔ (15) nōo kahinii: “Aá géē hɛ́ɛ́pɔ̄ okpaakpa ɛga okɛpɔ̄ kú aá. Aá kóō híī méyīnyinyi ɔ̄cogbɛhá ŋ́, ɛ́ɛ́ nɛ̄ aá gē yúfi ɔ̄colɔdu ŋ́.” (Ulīf. 19:15) Ɔdaŋ kóō lɛ a ɔkwɔɔkwɛyi, ayika íne nōo yɔ ipu ɔgba 16 nōo ku aa cijaali nōo géē nya ɔcɛ ta a wɛ kahinii, é gáā ya ɔmpa uwa ɔdobɔbi ipu inu ɛpɔ, ipu ɛlā ku ɔhi ō ta, ipu apɔlɛ, amáŋ ō ce ɛlā ba ohigbu itene ku iyi uwa ŋ. Ó wɛ ɔkwɛyi ku alɔ i cika ō ya aɔdā ɛgɛnyā ŋ, amáŋ ó lɛ ɔwɛ ɔhá nɛ alɔ lɔfu jɛyi ɔgba 16 nyā kpɔ.

Gbɛla tu ɛgɛ nɛ ɔgba ɔɔma gbɔɔ lɛ a ɛ. Ɔwɔico da ācɛ ɔlɛ nu kéē hii yɔ i kɛmgbɛ ŋma ɛga éyi gā ɛga ɔhá ŋ. Ó wɛ ɔkwɛyi ka ō ya awanda amāŋ kɛmgbɛ lɛyikwu ācɛ ɔhá gē bi unwalu wa. Amáŋ ɛdɔ ɛkɛmgbɛ ɛgɛnyā kóō bɔbi fiyɛ a. (Aíit. 10:19; Ɔ̄cok. 10:12-14; 1 Utím. 5:11-15; Ujɛ́m. 3:6) Igbalɛwa, ɛdɔ ɛkɛmgbɛ ɛgɛnyā gē mafu ipu ɛlā ō ka ku ɔcɛ, ó kē i biya iye ku ɔcɛ ɔhá. Ɛdɔ ɔcɛ ɛgɛnyā lɔfu cijaali ɛkɛmgbɛ ba ɔmpa nu, ɔdaŋ ku ɛkɛmgbɛ a kóō lɛ oyeeyi ku ɔmpa nu kwu ikwū ajaajɛ naana, ó lɛ ɛlá wu ɔ ŋ. A lɔfu bla ku ɛdɔ ācɛ ō kɛmgbɛ ɛgɛnyā cijaali ɛkɛmgbɛ ba Unabɔtu a. Ɛkɛmgbɛ nyā kē ya kéē ta ɛcɔ fiyɛ Unabɔtu jaa gbeeko néē lɛ ɔ ŋmo. (1 Aɔ́cɛ́ 21:8-13) Ɔcɛ o cijaali ɛkɛmgbɛ ɛgɛnyā lɔfu ya kéē ŋmo ɔmpa nu ɛgɛ nɛ aya ɔmpa ku Ulīfayi 19:16 ka a.

Ɔdā ɔhá nōo lɔfu ya ku ɔcɛ kóō cijaali ɛkɛmgbɛ ba ɔmpa nu a, wɛ ohigbu ka ó wɔtu nu. Ɔkpá ku 1 Ujɔ́ni 3:15 da alɔ kahinii: “Ɔ̄cɛ dúúmā nōo ī wɔ́tū ɔyínɛ́ nu wɛ ɔ̄coŋmɔ́cɛ, aá kē jé ka ɔ̄cɛ dúúmā nōo wɛ ɔ̄coŋmɔ́cɛ, í kē lɛ oyēeyī opiyóó glá ŋ́.” Igbihi nɛ Ɔwɔico lɛ ɛlā nōo yɔ ipu ɔgba 16 a ka, ó klla kahinii: “Aá híī bī ɛlā kú ayínɛ́ aá tɔ̄ɔ̄tū ŋ́.”​—Ulīf. 19:17.

Ó lɛ a, íne néē ta taajɛ ipu ɔkpá ku Ulīfayi 19:16 a, wɛ ɛnɛɛnɛ ahɔ̄ ō pi lɛ ɛjɛɛji Ācɛ O Yɛce Ukraist. Alɔ kóō hii bi ɛlā obɔbi ipu ɔtu, ɛɛ nɛ alɔ gē cijaali ɛkɛmgbɛ ba ɔmpa alɔ ŋ. A jé ŋ, ɔdaŋ ku alɔ ta ō “cijaali nōo géē nya ɔ̄cɛ” ta ohigbu ku alɔ i yihɔtu ɔcɛ ɔɔma ŋ, amāŋ ku alɔ yɔ i mimalanyi ku nu, ɛnyā lɔfu wɛ ocabɔ nōo mafu ku alɔ yɔ i wɔtu ku nu. Ācɛ O Yɛce Ukraist cika ō leyi kwɛɛcɛ, o ya ɛɛ kéē hii wɔtu ɔcɛ duuma ŋ.​—Umát. 12:36, 37.