1919—Ihayi Ofu Ɛhɔ NōO Gáā Yɛ A
IPU ihayi ku 1919, Ɛfú Nɛhi (ɛ̄nɛ̄ é gáā gbɔɔ ō hi ku Ɛfú Ku Oduudu Ɛcɛ I) néē kpo gaajɛ ihayi ɛnɛ a, gáā le ŋmɛyi. Ihayi nōo gboce ɔ a, aéwo a gáā lɛ abɔ ci unu néē yɔ i nu a. Ipu Ɔya Aflɛyi 18 ku 1919 a nɛ Paris Peace Conference a gbɔɔ a. Ɔdā okpɔcii éyi nɛ ōjila ɔɔma ya a, wɛ ō kagwo ku Versailles (Treaty of Versailles). Ɛlā néē kagwo nyā ya ku aéwo a kéē lɛ ocɛtɔhɔ lɛ, nōo bi oŋmɛyi wa lɛ ɛfú nɛ aolɛla ku Germany yɔ i kpo ta uwa a. Ɛ̄cī 28 ku Ɔya 6, ku ihayi 1919 néē lɛ abɔ ta ɔkpá lɛyikwu ocɛtɔha nyā a.
Ŋma ocɛtɔha nyā, é gáā lɛ ɔwa ɛyipɛ éyi kwaajɛ, é gē hi ɔ ku League of Nations. É lɛ ɔwa nyā kwaajɛ o ya ɛɛ kóō “bi ɛbɔ wa ɔtahɛ ku aéwo ɛyɛɛyɛyi.” Aɔwɛ o gba ɛ̄gbā alɛwa kē cɛtra ɔwa ɛyipɛ néē le kwaajɛ nyā. Ígwu néē gē hi ku The Federal Council of the Churches of Christ nōo yɔ Amɛrica a kahinii, “ɛnyā wɛ Ajɔɔcɛ Ku Ɔwɔico nōo yɔ ɛcɛ o bu ipu imeli.” É mafu ku ɔwa ku League of Nations néē le kwaajɛ a he uwa ɔtu nɛhi, anu ya ɛɛ néē tu ācɛ ɛhɔ gā ōjila ku Paris Peace Conference ɔɔma kéē nyɔ i kwɛyi uwa a. Ɔcɛ éyi néē tɛhɔ gā abɔɔ a ka ōjila a “lɛ opiyabɔ nōó ya ipu ɛcɛ nyā jejee ɛ ŋ bi wa ɛ.”
Opiyabɔ ɛyipɛ gáā gbɔɔ, amáŋ ó wɛ ācɛ nōo lɛ abɔ ipu ōjila ɔɔma gáā ya ɛnyā a ŋ. Ipu ihayi ku 1919, opiyabɔ ɛyipɛ ipu uklɔ ku ɔna ō ta a gbɔɔ eko nɛ Ujehofa gbɔɔ ō lɛ ɔfu tu ācɛ ɔlɛ nu iyē ɔwɛ nɛ ó ya jejee ɛ ŋ ma. Amáŋ, gbɔbu ɛɛ ku ɛnyā kóō ya, ācɛ nōo gē klɔcɛ ku Ubáyíbu a cɛgbá opiyabɔ éyi.
Ó LƆNƆ TA UWA Ō JE ƆDĀ NÉĒ GÉĒ YA
Joseph F. Rutherford
Usati, ɛ̄cī 4 ku Ɔya aflɛyi ku 1919 néē miya ō lɛ abɔ ba ɔkpá lɛ ācɛ néē dɔka ō fu kéē wɛ aotrɛyi ku Watch Tower Bible and Tract Society a. Eko ɔɔma, é lɛ Joseph F. Rutherford nōo gbɔbu ipu ɔwa ku Ācɛ Ocijali Ku Ujehofa a kwu gā agbá ipu Atlanta, Georgia, U.S.A, lɛyikwu ɔdā nōo ya a ŋ, anu mla acɛnyilɔ ahaapa. Ɔka a gáā wɛ kahinii: Ācɛ néē kwu gā agbá a néē gáā lɛ abɔ ba ɔkpá lɛ uwa kpɔ a nɛɛ? Kɛɛ kéē lɛ abɔ ba ɔkpá lɛ ācɛ ɔhá kéē kwɛyi uwa?
Evander J. Coward
Ɛpleeko nɛ ɔyinɛ alɔ nɔnyilɔ Rutherford yɔ inu agbá a, ó yɔ i gbɛla lɔfu lɔfu lɛyikwu ō jɛ gɔbu ku ɔwa nyā. Ó jé ku ācɛ ōhī yɔ i gbɛla ka ó géē lɔhi fiyɛ ɔdaŋ kéē lɛ abɔ ba ɔkpá lɛ ɔcɛ ɔhá kóō kwɛyi. Ohigbu ɛnyā, ó lɛ ɔkpá ta fu ācɛ nōo jila a, kéē lɛ abɔ ba ɔkpá lɛ Evander J. Coward, kóō wɛ ɔcɛ nōo géē kwɛyi nu. Rutherford ku Coward wɛ ɔcɛ ō “gbeyi gɔɔ,” “jijeeyi,” ó klla “le tutu ō ya ɔdā duuma ipu uklɔ ku Ondu a.” Amáŋ, ayinɛ alɛwa yɔ i gbɛla ɔdā ɔhá, é dɔka ō lɛ ɛ̄cī néē cika ō lɛ abɔ ba ɔkpá a ci jaa gbo Ɔya ɛhili ɔhá. Ígwu ku ācɛ nōo kɛpɔ kwɛyi ayinɛ alɔ nōo yɔ inu agbá a kē cɛ mla ōmiya nyā. Abɔ é yɔ i kɛlā nyā a, ayinɛ ōhī kwu cɔnu.
Richard H. Barber
Ó lɛ odee nōo ya, nɛ Richard H. Barber ka ka ó lɛbɛɛka ka ɔcɛ nōo dɔka ō ka ikpɛla nɛhi gwo a. Ɔyinɛ alɔ nɔnyilɔ éyi nōo yɔ ipu ōjila ɔɔma a lɛ ɔdā nōo yɔ ipu ɔtu ku nu a ka, ó kahinii: “N jé ɔdā nɛ íne ka a lɔɔlɔhi nóó, amáŋ n jé ɔdā nɛ ó wɛ ku ɔcɛ kóō yɔ kwu ɔcɛ ɔhá ajaajɛ. Uce ō ya ɔɔma nɛ Ujehofa kē cɛgbá ŋma ɛgiyi alɔ a. Ɔwɛ nɛ alɔ kē gáā mafu uce ō ya ɔɔma wɛ ō lɛ abɔ ba ɔkpá lɛ ɔyinɛ alɔ nɔnyilɔ Rutherford kpɔ, kóō gbɔbu ipu uklɔ ō bēē leyikwu ɔwa ku Ācɛ Ocijali Ku Ujehofa.”—Aíjē 18:25.
Alexander H. Macmillan
A. H. Macmillan néē kwu ta agbá mla Rutherford a ka anɔɔ bla, ka ɛ̄cī nōo gboce ɔ a, ɔyinɛ alɔ nɔnyilɔ Rutherford lɛ abɔ gbo ɔdɔ ku inu agbá nɛ ó yɔ a, anu nɛ ó kahinii, “Lɛ abɔ kwu ɔ bi wɛɛcɛ.” Rutherford kwu ɔkpá nɛ ayinɛ a ta fu ɔ a u lɛ ɔ. Abɔ u Macmillan lɛ ɛlā néē ta kpii ipu ɔkpá ɔɔma má a, ó lɛ ɛyi ku ɔkpá a jé boobu. Ɔkpá néē ta a kahinii: “RUTHERFORD WISE VAN BARBER ANDERSON BULLY MLA U SPILL ĀCƐ ƐTA NƐ ALƆ LƐ ABƆ BA ƆKPÁ LƐ UWA KÉĒ GBƆBU IPU UKLƆ Ō LEYI KWU ƆWA NYĀ ALƆ YIHƆTU ƐJƐƐJI AA.” Ɛyi ku nu wɛ kéē lɛ abɔ ba ɔkpá lɛ ācɛ ɛta nyā kpɔ. Ohigbu ɛnyā, Joseph Rutherford mla u William Van Amburgh géē gɔbu yuklɔ a. Cɛɛ, ɔyinɛ alɔ nɔnyilɔ Rutherford kē gɔbu ipu uklɔ ō bēē leyi kwu ɔwa a.
É LƐ UWA HƐTA!
Abɔ ayinɛ alɔ nɔnyilɔ ahata yɔ inu agbá a, ayinɛ alɔ ɛyɛɛyɛyi néē hi ka ĀCɛ Oklɔcɛ Ku Ubáyíbu a lɛ ɔkpá ta fu igɔmɛnti kéē habɔ uwa ta ŋma inu agbá. Aluka ku ayinɛ alɔ nɔnyilɔ mla ayinɛ alɔ nɔnya nōo lɛ ɔtu lɛ abɔ ta ɔkpá a fiyɛ 700,000. Ɛ̄cī 26 ku Ɔya ɔmɛta, ku ihayi 1919, gbɔbu ɛɛ ku ɔkpá a kóō faajɛ igɔmɛnti a, é lɛ ɔyinɛ alɔ nɔnyilɔ Rutherford mla ayinɛ ɔhá a hɛta ŋma inu agbá.
Ipu ɛlā nɛ Urutherford ka lɛ ācɛ nōo ya ɔ omaaba wa ɔlɛ a, ó kahinii: “N jé kpɔcii ku ɔdā nɛ ɛjɛɛji alɔ má nyā, lɛ alɔ tutu ohigbu eko nɛ āhɔ̄ géē lɔnɔ fiyɛ ɛnyā . . . Aa nuunu o ya ɛɛ ku aa lɛ alɔ hɛta ŋma inu agbá nóó. Ɔɔma i wɛ ɔdā okpɔcii nōo ya nɛ aa nuunu a ŋ. . . . Aa humayi nuunu, o ya ɛɛ ku aa je owoofu lɛ iye ku Ujehofa. Ɛjɛɛji aa nōo kē ya ɛnyā, kē miyɛ ɛnɛɛnɛ ɔhá ɛ.”
Ɔdaŋ ku a leyi má owe nɛ ayinɛ alɔ má a, āhɔ̄ nōo yɛ jila uwa ta a mafu ka Ujehofa yɔ i ma ɔwɛ fu lɛ uwa a. Ɛ̄cī 14 ku Ɔya ɔmɛhɔ, ku ihayi 1919, inu ɛpɔ ku apiili a kahinii: “Ācɛ néē kɛpɔ ta uwa ipu ɛlā nyā i jɔɔnyɛ ɛpɔ okpaakpa néē cika ō jɔɔnyɛ nu a ŋ, ohigbu ɛnyā, é géē kɛpɔ nyā kpɔ.” É lɛ ayinɛ a kwu, gáā kɛpɔ ta uwa ohigbu ɔdobɔbi nɛhi néē ka ayinɛ a ya a. Ɛgɛ duuma nɛ itala ku uwa lɛ ligii lɛ, ɔdaŋ kéē lɛ ɛpɔ ɔɔma ka tu uwa nɛɛ, ācɛ géē yɛ i bēē má uwa kéē wɛ ācɛ obɔbi. É má ɛlā duuma ō ka gɛ ŋ. Ohigbu ɛnyā, Urutherford nōo wɛ ɔcohɛpɔ a gɔbu mla íkwu nɛ ó lɛ ō kɛpɔ kwɛyi ācɛ ɔlɛ Ujehofa ipu inu ɛpɔ nōo fiyɛ duu ipu éwo ku United State. Abɔ é lɛ ɔ hɛta ŋma agbá a, ó lɛ ɛpɔ alɛwa nɛ ó ka lɛ a.
É LƐ ƆTU KU UWA YA EKPONU Ō TƆƆNA
Ɔyinɛ alɔ nɔnyilɔ Macmillan blakwu ɛlā éyi nōo kahinii: “Alɔ i gáā yaajɛ lɛ a anca, nɛ alɔ i gáā ya ɔdā duuma ŋ, yɔ i gbeyi ku Ondu a kóō gáā kpo alɔ gā Ɔkpanco ŋ. Alɔ má ka ó lɛ ɔdā nɛ alɔ cika ō ya piii gbɔbu ɛɛ ku alɔ géē jé ɔdā nɛ Ondu a tine ɔkwɔɔkwɛyi.”
Amáŋ, ayinɛ a nōo gē yuklɔ ŋma ɔtahɛ ku ɛga ō yuklɔ ku alɔ a i cigbihi igbekponu gáā gbɔɔ ō yuklɔ néē tɛtɛ gē ya ihayi alɛwa a gla ŋ. Ohigbu ɔdi? Ohigbu ku eko néē yɔ inu agbá a, ɛjɛɛji aɔdā néē gē bi le ya aɔkpá ku alɔ a kwu biya ɛ. Ɛnyā wɛ ɔdā ō kwiiye nɛɛnɛhi. Ó cɛ lɛ ācɛ alɛwa gbɔɔ ō gbɛla ku alɔ i gáā yuklɔ ku ɔna ō ta nyā gboogboo gla gɛ ŋ.
Ɔna nɛ ācɛ oklɔcɛ ku Ubáyíbu yɔ i ta lɛyikwu Ajɔɔcɛ a wɛ ɔdā nōo he ācɛ ɔtu kpɔ? O ya ɛɛ kéē jé ohi ku ɔka ɔɔma, ɔyinɛ alɔ nɔnyilɔ Urutherford lɛ ɛlā éyi ka tɛɛcɛ. É hi ɛwa ku ācɛ igwú wɛ ɛlā ō ka tɛɛcɛ a. Ɔyinɛ alɔ nɔnyilɔ Macmillan kahinii: “Ɔdaŋ ku ɔcɛ duuma i wa ōjila ɔɔma ŋ, alɔ géē yɛ i jé ku uklɔ ku ɔna ō ta a mɛ ɛ.”
Ɔkpá ku ɔ̄kā nōo yɔ i mafu ɛlā ō ka tɛɛcɛ ku Ɔyinɛ alɔ nɔnyilɔ Urutherford nōo kahinii: “Eyiyoce Nōo Yɔ Lɛ Ācɛ Nɛ Ɛ̄jɛ̄ Le Jɛ Uwa,” ipu Los Angeles, California, ipu ihayi ku 1919
Ɛ̄cī 4 ku Ɔya ɔmɛhɔ, ku ihayi 1919, naana nɛ ɔyinɛ alɔ nɔnyilɔ Urutherford yɔ i doōcē nɛɛnɛhi a, ó lɛ ɛlā ɔɔma ka tɛɛcɛ kpɔ ipu igeli ku Los Angeles, California. Ikpɛyi ɛla ku ɛlā ō ka tɛɛcɛ ɔɔma kahinii: “Eyiyoce nōo yɔ lɛ ācɛ nɛ ɛ̄jɛ̄ le jɛ uwa.” Ācɛ nōo wa ɛlā ō ka tɛɛcɛ nyā lɛbɛɛka 3,500 a. Ācɛ alɛwa ɔhá le cigbihi gā ɔlɛ, ohigbu ku ɛga i jɛ uwa ŋ. Ɛ̄cī nōo gboce ɔ a, aluka ku ācɛ nōo lɛbɛɛka 1,500 klla wa ōjila a. Ayinɛ a lɛ ohi ku ɔka néē yɔ i da a jé ɛ. Ɔ̄kā lɛyikwu Ajɔɔcɛ a wɛ ɔdā nōo he uwa ɔtu nɛhi!
Ó ŋma ɔɔma, ɔdā nɛ ayinɛ a ya mɛ a lɛ abɔ kwu ɔwɛ nɛ Ācɛ Ocijali Ku Ujehofa gē tɔɔna jaa kwu eko ku alɔ nyā.
É LE TUTU KU Ō JƐ GƆBU NŌO GÉĒ WA ƐCƆBU
Ipu Watch Tower ku Ɔya Ɔmahata 1, ku 1919 a, é le ka tɛɛcɛ ka ipu Ɔya Ɔmahaanɛ, é géē ya ojileyi nɛhi éyi Cedar Point, Ohio. Ɔyinɛ alɔ Uclarence B. Beaty nōo wɛ ɔcɛ oklɔcɛ ku Ubáyíbu, nōo kē lā Umissouri a bla ku “Ɛjɛɛji ācɛ yɔ i ka ku aa cika ō yɔ abɔɔ.” Ācɛ wa ojileyi a fiyɛ ɛgɛ nɛ ayinɛ a leyice, aluka ku uwa fiyɛ 6,000 a. Ɔdā nōo kóō cɛ lɛ ojileyi ɔɔma lɔɔnyɛ fiyɛ duu a wɛ ku ācɛ nɛ aluka ku uwa fiyɛ 200 a lɛ ubatisim ya ipu Lake Erie nōo yɔ kwu abɔɔ ajaajɛ a.
Ayinɛ alɔ nɔnyilɔ ipu Brooklyn, New York, mla umoto nōo le mu mla ɔkpá ku The Golden Age a
Ɛ̄cī Ɔmɛhɔ ku Ɔya Ɔmahaanɛ, ku 1919 a, nōo wɛ ɛ̄cī ɔmɛhɔ ku ojileyi a, ipu aya nōo kahinii: “Ɛlā lɛyikwu ayinɛ nōo gē yuklɔ tɔha mla um a,” ɔyinɛ alɔ nɔnyilɔ Urutherford lɛ ɔkpá ɛpɛpɛ éyi bi wɛɛcɛ néē hi ka The Golden Age. * Ɔkpá a géē “kɛla lɛyi aɔ̄kā nōo bɛɛcɛ ɛpɛpɛ, nōo klla cɛgbá. Ó géē mafu ŋma ipu Ubáyíbu ɔdā nōo ya nɛ aɔdā alɛwa yɔ i ya a.”
É je ɔtu ō tu kwu ɔtu lɛ ɛjɛɛji ācɛ oklɔcɛ ku Ubáyíbu a kéē ceyitikwu bēē bi ɔkpá ɛpɛpɛ nyā le tɔɔna mla ɔtu ō lɛ. Ɔkpá éyi nōo kɛla lɛyikwu ɛgɛ néē géē yuklɔ a kahinii: “Ɛjɛɛji ācɛ nōo lɛ ubatisim ya ɛ ma cika ō bla kóō wɛ ɛnɛɛnɛ ɛga ō yuklɔ nyā. Kéē lɛ abɔ bi ɛnɛɛnɛ ɛga néē lɛ nyā ō ya ɔdā néē ya gla ipu uklɔ ku ɔna ō ta a.” Ɛnyā lɛ abɔ kwu ācɛ alɛwa ɔtu néē gbɔɔ ō tɔɔna! Ipu Ɔya Ɔmigwɛɛpa, ayinɛ nōo lɛ ɔtu caca ku ɔna ō ta a miyɛ ɔkpá nyā. Aluka ku ɛ̄nɛ̄ é miyɛ a fiyɛ 50,000.
Iyɔbu ku The Golden Age aflɛyi néē ya a, aku Ɔya Ɔmigwo ku ihayi ku 1919
Oŋmɛyi ku ihayi 1919, ācɛ ō gba Ujehofa ɛ̄gbā lɛ iyi uwa tutu lɔlɔɔhi klla lɛ ɔfu tu iyē ō yuklɔ nyā. Ɔhá ku nu, akacɛ alɛwa lɛyikwu eko amoomɛ a yɔ i ya jila ɛ. Ojama mla ō na yeŋee ku ācɛ ɔlɛ Ɔwɔico néē kɛla lɛyikwu ɔ ipu ɔkpá ku Umálakāyi 3:1-4, le ya jila duu ɛ. Ācɛ ɔlɛ Ujehofa lɛ ohɛta lɛ ŋma ɔfiyɛ néē yɔ i cɛ lɛ “Ubábīlɔn. . . nɛ̄hi” a, Ujisɔsi klla lɛ “ɔ̄cocɛ̄hɔ̄ nēé cíkā ō lɛ ɔtū ce ɔ́, nōo jéeyī” a fu kwɛɛcɛ * (Mafú 18:2, 4; Umát. 24:45) Babanya, ācɛ oklɔcɛ ku Ubáyíbu a le tutu ō yuklɔ nɛ Ujehofa tine kéē ya a ɛ.
