ƐHAAJƐ íne ku Umosisi a, okooho mla ɔklɛɛbɛtɛ wɛ igbaanɔ néē lɔfu bi gwɛɛya lɛ Ujehofa nɛ ó gē miyɛ. Igbalɛwa é gē kɛla lɛyikwu aigbaanɔ ɛpa nyā ipu aíne a lɛyikwu ɛya ō gwo, é kē lɔfu bi éyi yuklɔ kwɛyi ɔhá. (Ulīf. 1:14; 12:8; 14:30) Ɔdiya ɛɛ nɛ ɛnyā kē wɛ ɔdā olɔhi a? Ɔdā éyi nōo ya a, wɛ ka ó wɛ eko doodu néē dɔka ō bi okooho le gwɛɛya a nōó gē yɔ a ŋ. Ɔdiya kē ya a?

Okooho wɛ igbaanɔ nōo gē lā ɛga doodu ipu ajɛ ku Isrɛlu ipu Ɔya ōhī nɛ iyē gē kwɔla a. Ipu Ɔya igwo doodu, é gē calɛ gē ipu aéwo ōhī nōo yɔ ɛhaajɛ nɛ iyē gē kwɔla fiyɛ a, cɛɛ é le cigbihi wa Isrɛlu eko duuma nɛ ɔgwa gáā le yɛ. (Usól. 2:11, 12; Ujɛr. 8:7) Ɛpleeko néē ta Ubáyíbu a, ɛnyā wɛ ka ó gē lɔnɔ ku ācɛ Isrɛlu kéē bi okooho gwɛɛya eko ɔgwa.

Amáŋ, ɔklɛɛbɛtɛ i gē calɛ ŋma ɛga éyi gā ɛga ɔhá lɛ a ŋ, ohigbu ɛnyā, é gē yɔ ihayi doodu. Ɔdā olɔhi ku ɔklɛɛbɛta kpɔ a wɛ kē wɛ ɛ́bɛ́ ɔlɛ. (Má Ujɔ́ni 2:14, 16.) Ɔkpá néē hi ku Bible Plants and Animals a kahinii: “Ɛjɛɛji aipɔlɛ mla aigeli nōo yɔ ipu Palestine a lɛ aɔklɛɛbɛtɛ nōo gē lá ɔlɛ a. Ɔnyɔɔnyɛ ku ācɛ nōo lɛ ɔlɛ ku abɔyi uwa a, lɛ ɔlɛ néē gwo ɛyɛɛyi lɛ aɔklɛɛbɛtɛ, amāŋ ɔgɔ nōo gē yɔ ipu ɔdɔ, nɛ aigbaanɔ nyā géē lɔfu lā anu gla.”—Má Ayisáya 60:8.

O bu ɔwɛ nyā, Ujehofa le mafu ka ó wɛ ɔcɛ nōo lɛ ihɔtu klla gē leyi má ɛlā tu ɔ mla ācɛ, ŋma lɛ ō miyɛ aigbaanɔ nōo géē tɔɔtɛ lɛ ācɛ Isrɛlu ō bi le gwɛɛya ipu ihayi doodu.