1. Ɛgɛnyá nɛ ɛlā ō ka tɛɛcɛ néē ya ipu ojileyi nɛhi ipu ihayi ku 1935 a, lɛ abɔ kwu ɔyinɛ alɔ nɔnyilɔ éyi a?

Ó lɛ apɔlɛ éyi nōo wɛ Ācɛ Ō Klɔcɛ Ku Ubáyíbu, iye nyā nɛ Ācɛ Ocijáli Ku Ujehofa lé gbɔbu a. Ɔba mla ɔnyā a lɛ ayi nɔnyilɔ ɛta mla acɛnya ɛpa, é kē nwu ayi a kéē gba Ujehofa ɛ̄gbā klla yɛce ocabɔ ku Ujisɔsi. Éyi ku ɔyi nɔnyilɔ ku uwa a wɛ ihayi igwaahata (18), eko nɛ ó ya Ubatisim ipu ihayi ku 1926 a. Bɛɛka ɛjɛɛji Ācɛ Ō Klɔcɛ Ku Ubáyíbu eko ɔɔma a, ɔyinɛ alɔ nɔnyilɔ nyā gē lé igbo klla gwa ejé eko ku Oblatu Ku Ikwū Ku Ujisɔsi. Amáŋ, eyiyoce ku nu lɛyikwu ɛcɔbu kwu piyabɔ, eko nɛ ó po ɛlā ō ka tɛɛcɛ nōo kahinii: “Ɛwa Nɛhi A.” Ɔyinɛ alɔ nɔnyilɔ J. F. Rutherford ya ɛlā ō ka tɛɛcɛ ɔɔma ipu ihayi ku 1935, ipu ojileyi nɛhi néē ya ipu éwo ku Washington, D.C., U.S.A a. Ɔdi nɛ Ācɛ Ō Klɔcɛ Ku Ubáyíbu a nwu ipu ojileyi nɛhi ɔɔma a?

2. Ɛlā ɔkwɛyi nyá nɛ Ɔyinɛ alɔ Rutherford je ta eyī peee ipu ɛlā ō ka tɛɛcɛ ku nu a?

² Ipu ɛlā ō ka tɛɛcɛ ku nu a, Ɔyinɛ alɔ Rutherford lɛ ɔ teyi peee ācɛ nōo wɛ “ɛwa nɛhi,” nɛ Ɔdā Nēé Mafú Lɛ Ujɔ́ni 7:9 kɛla lɛyikwu ɔ a. Jaa gā kwu eko ɔɔma, Ācɛ Ō Klɔcɛ Ku Ubáyíbu a gbɛla ku ɛwa nɛhi a wɛ ígwu ku alɛɛcɛ nōo géē gā ɔkpanco, amáŋ é hayi kpaakpa bɛɛka ācɛ néē lɛ anɔ tu uwa ɛyi a ŋ. Ɔyinɛ alɔ Rutherford bi Ubáyíbu lɛ ɔ ta uwa eyī peee, ka é fu ācɛ nōo wɛ ipu ɛwa nɛhi a kéē lā ɔkpanco ŋ, amáŋ é wɛ aala ɔhá * ku Ukraist nōo gē wi  ŋma “ōwe nɛ̄hi” a, klla géē lā ipu ɛcɛ nyā piyoo. (Mafú 7:14) Ujisɔsi cokonu kahinii: “N lɛ aálá ɔhá, nēé wɛ ákú ipú igá nyā ɛ́ɛ́ ŋ́. N géē kpó uwā wā inu piíí. É géē pó ɔkɔ kú um, cɛ́ɛ́ é géē je pīya ɔ́wá kú aálá éékpónú mɛ́mla ogbāálá éékpónú.” (Ujɔ́n. 10:16) Ācɛ nōo wɛ “aálá ɔhá” a wɛ Ācɛ Ocijáli Ku Ujehofa nōo hayi kpaakpa, nōo lɛ eyiyoce ō lā Uparadais ipu ɛcɛ nyā piyoo. (Umát. 25:31-33, 46) Ɔdā ɛyipɛ néē nwu ŋma ipu Ubáyíbu a, lɛ oyeeyi ku ācɛ alɛwa nōo gē gba Ujehofa ɛ̄gbā a piyabɔ, kwu aku ɔyinɛ alɔ nōo wɛ ihayi igwahaata (18) a.—Aíjē 97:11; Aíit. 4:18.

3-4. Ipu ojileyi nɛhi ku 1935 a, ɔdi nɛ ɛyinɛhi ku ācɛ gáā jé lɛyikwu eyiyoce ku uwa a, ɔdi kē ya a?

³ Ó wɛ ɔdā eeye ipu ojileyi nɛhi ɔɔma, eko nɛ ɔcɛ ō ya ɛlā ō ka tɛɛcɛ a da ācɛ nōo yɔ i jahɔ a ɔka kahinii: “Ācɛ nōo lɛ eyiyoce ō lā ipu ɛcɛ nyā piyoo a lɔfu caŋjɛ gla?” Ɔyinɛ alɔ nɔnyilɔ éyi nōo yɔ ojileyi ɔɔma a, ka anuɔ má ācɛ nōo fiyɛ ō kɔ ɛpa ku ācɛ nōo yɔ i jahɔ a caŋjɛ. Anɔɔ Ɔyinɛ alɔ Rutherford kahinii: “Aa má ɔ! Ɛwa nɛhi ku ācɛ a!” Igbihi ɔɔma, ɛjɛɛji ācɛ nōo yɔ i jahɔ a gbɔɔ ō gweeye nɛhi. Ó le ta ɛjɛɛji ācɛ nōo caŋjɛ a eyī peee, ku Ujehofa i fu uwa kéē lā ɔkpanco ŋ. É jé peee ka alelekwu ihɔ i lɛ anɔ tu uwa ɛyi ŋ. Ɛ̄cī ɔmpa ku ojileyi nɛhi a, Ācɛ Ocijali Ku Ujehofa ɛyipɛ nōo lɛbɛɛka 840 a lɛ ubatisim ya, ɛyinɛhi ku uwa wɛ ipu aala ɔhá a.

⁴ Igbihi ɛlā ō ka tɛɛcɛ ɔɔma, ɔyinɛ alɔ nɛ alɔ kɛla lɛyikwu ɔ gbɔbu a mla alɛwa ku ācɛ ɔhá, lɛ abɔ ci ō lé igbo mla ō gwa ejé ipu Oblatu ku Ikwū Ku Ujisɔsi. Ɔtu ya ācɛ alɛwa bɛɛka ɔyinɛ alɔ nɔnyilɔ nōo tu iyi nu waajɛ nōo kahinii: “Oblatu Ku Ikwū Ku Ujisɔsi néē ya ihayi ku 1935 a wɛ eko amoomɛ nɛ um lé igbo klla gwa ejé a. N jé ku Ujehofa i bi alelekwu ihɔ ku nu le fu um ō lā ɔkpanco ŋ. Ikɔkɔ ɔɔma, n lɛ eyiyoce ō lā ipu ɛcɛ nyā klla géē wɛ ipu ācɛ nōo gē tabɔ ya, ku ɛcɛ nyā kóō kwu piya uparadais a.” (Uróm 8:16, 17; 2 Ukɔ́r. 1:21, 22) Ŋma eko ɔɔma, ācɛ ku ɛwa nɛhi a le nwune fiyɛ klla humayi yuklɔ tɔha, mla ohile ku ācɛ néē lɛ anɔ tu uwa ɛyi a.

5. Ɛgɛnyá nɛ Ujehofa gē má ācɛ, nōo ma ō lé igbo klla gwa ejé eko ku Oblatu a?

⁵ Ɛgɛnyá nɛ Ujehofa gē má ācɛ, nōo ma ō lé igbo klla gwa ejé eko ku Oblatu, igbihi ku ihayi ku 1935 a? Ɛgɛnyá nɛ Ujehofa kē má ācɛ nōo ya ubatisim icɛ, nōo gē lé igbo klla gwa ejé eko Oblatu ku ikwū ku Ukraist a ŋma ɔtu ekponu, amāŋ igbihaajɛ, é gáā le jé ka Ɔwɔico i fu aa ō gā ɔkpanco ŋ ma? (1 Ukɔ́r. 11:28) Ó lɛ ācɛ ōhī nōo lé igbo a ohigbu kéē jé eyiyoce ku uwa piii gbɔbu ŋ. Amāŋ ɔdaŋ ka é má ka inyileyi nɛ aa ya a, anɔɔ é gwa gɛ ŋ, klla hayi kpaakpa ipu ɛ̄gbā ō gba ku Ujehofa a, ó lɛ aafu ŋ, Ujehofa géē miyɛ uwa ka é wɛ ipu aala ɔhá a. Naana néē lé igbo klla gwa ejé gɛ ŋ ma, é cɛgbá ō wa Oblatu Ku Ikwū Ku Ukraist kpɔ, ohigbu ka ɔdā nɛ Ujehofa mla Ujisɔsi ya a je uwa eyī nɛhi.

6. Ɔdi nɛ Ujisɔsi je ɔ́da lɛ aalelekwu otɛhɔ a kéē ya a?

⁶ Abɔɔ eko ku owe nɛhi a i gboji gɛ ŋ ma, ó géē wɛ ɔdā ō ta ɔtu kwu ɔtu, ku alɔ kɛla lɛyikwu ɛlā nɛ ɔkpá ku Ɔdā Nēé Mafú Lɛ Ujɔ́ni 7 ka, lɛyikwu Ācɛ O Yɛce  Ukraist néē lɛ anɔ tu uwa ɛyi mla ígwu ku aala ɔhá a. Ujisɔsi je ɔ́da lɛ aalelekwu otɛhɔ kéē bi owu ku ocataajɛ nōo ŋma ɔkika ɛnɛ ku ɛcɛ a. É cika ō habɔ owu a ta kóō ta kla ɛcɛ a ŋ jaa gbeeko nɛ Ujehofa cɛ, ka Ācɛ O Yɛce Ukraist néē lɛ anɔ tu uwa ɛyi a hayi kpaakpa lɛ ɔ gā ajaajɛ. (Mafú 7:1-4) Ule nɛ Ujehofa gáā gba lɛ ayinɛ ku Ukraist nōo hayi kpaakpa a, wɛ ō je uwa piya ɔcɛ́ mla ācɛ o gwɛɛya mla ɔ ɔkpanco. (Mafú 20:6) Ujehofa, Ujisɔsi mla ɛjɛɛji aalelekwu otɛhɔ a géē gweeye nɛhi ō má ācɛ ula ofigwaahata (144,000), néē lɛ anɔ tu uwa ɛyi a eko néē miyɛ ule ku uwa le ta ɔkpanco a.

7. Ɛgɛ nɛ Ɔdā Nēé Mafú Lɛ Ujɔ́ni 7:9, 10 ka a, anyɛ nɛ Ujɔni má ipu ɛbɛ a, ɔdi néē kē yɔ i ya a? (Má ifoto nōo yɔ iyɔbu a.)

⁷ Igbihi nɛ Ujɔni lɛ ɛlā ka lɛyikwu aɔcɛ́ mla acogwɛɛya ula ofigwaahata (144,000) nyā a, ó klla má ɔdā ō hidaago ɔhá, “ɛwa nɛ̄hi kú ācɛ” nōo wi ŋma ɛfú ku Amagɛdɔn. Ígwu nyā i lɛbɛɛka ígwu aflɛyi a ŋ, ígwu ɔmpa nyā fiyɛ ígwu aflɛyi a, é klla gbaaluka ku uwa gla ŋ. (Jé Ɔdā Nēé Mafú Lɛ Ujɔ́ni 7:9, 10.) É lɛ “awulú nɛ̄hɛ́ wiyē,” ɛnyā mafu kéē lɛ ‘iyi uwa tū ŋma ɔdobɔbi’ ku ipu ɛcɛ ku Usetan, klla yɔ kwu Ɔwɔico mla Ukraist gā ajaajɛ. (Ujɛ́m. 1:27) É dɛgba ka aa lɛ ohɛta lɛ, ohigbu ɔdā nɛ Ujehofa mla Ujisɔsi nōo wɛ Ɔyí ala ku Ɔwɔico ya a. É klla bi ankpali abɔ, ɛnyā mafu ka é gweeye klla cɛ ka Ujisɔsi nɛ Ujehofa fu kóō wɛ ɔcɛ́ a.—Klla má Ujɔ́ni 12:12, 13.

8. Ɔdi nɛ Ɔdā Nēé Mafú Lɛ Ujɔ́ni 7:11, 12 da alɔ lɛyikwu apɔlɛ ku Ujehofa nōo yɔ ɔkpanco a?

⁸ Jé Ɔdā Nēé Mafú Lɛ Ujɔ́ni 7:11, 12. Ɔdi ya ɔkpanco eko néē lɛ ɛwa nɛhi a má a? Ujɔni má ka ɛjɛɛji uwa nōo yɔ ɔkpanco a gbɔɔ ō gweeye, klla cɛtra Ɔwɔico abɔ é lɛ ɛwa nɛhi a má a. Ɛjɛɛji apɔlɛ ku Ujehofa nōo yɔ ɔkpanco a géē gweeye nɛhi, eko nɛ ɛbɛ nyā géē ya jila nɛ ɛwa nɛhi ku ācɛ a, géē wi ŋma eko ku owe nɛhi a.

9. Ɛgɛ nɛ Ɔdā Nēé Mafú Lɛ Ujɔ́ni 7:13-15 ka a, ɔdi nɛ ɛwa nɛhi ku ācɛ a yɔ i ya babanya a?

⁹ Jé Ɔdā Nēé Mafú Lɛ Ujɔ́ni 7:13-15. Ujɔni kahinii: Ɛwa nɛhi ku ācɛ a “lɛ awulú kú uwā kpó na, klla le yá kóō le pīya ɛnɛ̄hɛ́ ipú oyī kú Ɔyí álá ā.” Ɛyi ku ɛnyā wɛ ka é lɛ ɔtu oyeŋee klla hayi kpaakpa ipu eyī ku Ujehofa. (Ayis. 1:18) É wɛ Ācɛ O Yɛce Ukraist nōo lɛ iyi uwa gwɛɛya, lɛ ubatisim ya, nōo kpɔtuce ɛya nɛ Ujisɔsi gwo a lɔfulɔfu klla lɛ ɛma olɔhi mla Ujehofa. (Ujɔ́n. 3:36; 1 Upít. 3:21) Ɛnyā ya nɛ Ɔwɔico gē gweeye mla uwa néē klla gē “cɛ̄ ɔ̄ ɛhɔ̄ ɔlɛ́ɛnɔ mɛ́mla otú” ipu ɛcɛ nyā a. Babanya, é lɛ ɔtu caca yɔ i tɔɔna ku Ajɔɔcɛ a klla yɔ i lɛ ācɛ piya ayikpo, ohigbu ku Ajɔɔcɛ ku Ɔwɔico wɛ ɔdā nōo cɛgbá lɛ uwa a.—Umát. 6:33; 24:14; 28:19, 20.

10. Ɔdi nɛ ɛwa nɛhi ku ācɛ a jé kpɔcii a, okonu ō ce nyá néē gáā má nōo gáā ya jila a?

¹⁰ Ɛwa nɛhi nōo wi ŋma eko ku owe nɛhi a jé kpɔcii ka Ɔwɔico géē yɔ i teyi ta uwa, ohigbu ka “Anú nōo cīīce akpa kú ɔcɛ́ ā géē yɔ̄ pī uwā klla í gbō uwā.” Okonu ō ce nɛ aala ɔhá a yɔ i leyice gboji gboji a géē kwu ya jila duuudu: “[Ɔwɔico] géē nya ɛjɛ̄ɛ̄jī agīje ŋmá īkpēyī kú uwā. Ikwū í gáā yɔ̄ gɛ ŋ́ ācɛ í gáā yēkwu gɛ ŋ́, ācɛ í gáā jikwū gɛ ŋ́, ācɛ í kē gáā jɔ́ɔnɔ gɛ ŋ́.”—Mafú 21:3, 4.

11-12. (a) Ɛgɛ nɛ ɔkpá ku Ɔdā Nēé Mafú Lɛ Ujɔ́ni 7:16, 17 ka a, ɔhā nyá yɔ lɛ ɛwa nɛhi ku ācɛ a ɛcɔbu a? (b) Ɔdi nɛ ācɛ ku ala ɔhá a lɔfu ya ipu ōjila ku Oblatu a, ɔdi kē ya a?

¹¹ Jé Ɔdā Nēé Mafú Lɛ Ujɔ́ni 7:16, 17.  Babanya, ɛmiyɛ yɔ i ŋmo ācɛ o gba Ujehofa ōhī nɛhi ohigbu ka é lɛ ije nwune ō lá ɔdole ŋ, amáŋ ohigbu unwalu mla ɛfu ō kpo. Ōhī ku uwa yɔ agba ohigbu ɔtu okpoce ku uwa. Amáŋ ɛwa nɛhi ku ācɛ a yɔ i gweeye nɛhi, ohigbu ka é jé ka igbihi néē le wi ŋma ō cataajɛ ku ɛcɛ nyā a, é géē lɛ ɔdole caba-caba o lé mla ɛnɛɛnɛ ukɔ́ ŋma ɛgiyi Ujehofa. Eko nɛ Ujehofa lɛ ɛcɛ ku Usetan obɔbi nyā cataajɛ, ó géē gbo ɛwa nɛhi ku ācɛ a tu ŋma icɔnu ku nu nōo lɛbɛɛka “iyē okwɔ́ɔlá” a. Eko nɛ owe nɛhi a le ŋmɛyi, Ujisɔsi géē gbo ācɛ nōo wi a “ga njɔɔlɔ kú éŋkpɔ̄ nōo gē je oyēeyī [opiyoo]” a. Gbɛla tu ɛnɛɛnɛ eyiyoce nōo yɔ lɛ ɛwa nɛhi ku ācɛ a. Ubiliyɔn alɛwa ku ācɛ nōo gáā yɔ a, i gáā kwū gboogboo gɛ ŋ!—Ujɔ́n. 11:26.

¹² Aala ɔhá a lɛ ɛnɛɛnɛ eyiyoce néē gē ta Ujehofa mla Ujisɔsi ahinya ku nu! Naana nɛ Ujehofa i fu uwa kéē lā ɔkpanco ŋ ma, ó yihɔtu uwa ɛgɛ nɛ ó yihɔtu ku ācɛ néē lɛ anɔ tu uwa ɛyi a. Ígwu ɛplɛɛpa a lɔfu je owoofu lɛ Ɔwɔico mla Ukraist. Ɔwɛ éyi néē gē ya ɛnyā a, wɛ oŋma lɛ ō nyɔ gā Oblatu Ku Ikwū Ku Ukraist.

13-14. Ɔdiya ɛɛ nóō wɛ ɛjɛɛji ācɛ cika ō bēē gā Oblatu ku Ikwū Ku Ukraist a?

¹³ Ihayi ōhī nōo gā yɛ a, ɔcɛ ekponu ŋma ipu utajan (1,000) ku ācɛ nōo gē wa Oblatu a, gē lé igbo klla gē gwa ejé a. Ipu ɛyinɛhi ku ujɔ, ɔcɛ duuma i gē lé igbo klla gwa ejé eko ku Oblatu a ŋ. Ó teyi peee ka ɛyinɛhi ku ācɛ nōo gē wa oblatu a lɛ eyiyoce ō lā ipu ɛcɛ nyā. O lɛ a, ɔdiya néē gē wa Oblatu Ku Ikwū Ku Ukraist kpɔ a? Ō wa Oblatu ku uwa lɛbɛɛka ka ɛgɛ nɛ oklobiya gē gā ɔlɛ omɛɛlɛ mɛɛlɛ ku oklobiya ku nu a. Ɔdāŋ ka oklobiya gā ɔlɛ omɛɛlɛ mɛɛlɛ ku oklobiya ku nu, ó gē mafu ka ó yihɔtu ācɛ nōo yɔ i ya omɛɛlɛ mɛɛlɛ a klla cɛ mla ɔdā néē yɔ i ya a. Ɛgɔɔma duu, aala ɔhá a gē gā Oblatu a ohigbu kéē dɔka ō mafu ihɔtu ku uwa lɛ Ukraist, mla ācɛ néē lɛ anɔ tu uwa ɛyi a. Ō nyɔ gā Oblatu ku aala ɔhá a, klla gē mafu ka ɛya nɛ Ujisɔsi gwo lɛ uwa a jɛ uwa eyī, ɛya nōo ya ɔ tɔɔtɛ lɛ uwa kéē yɔ piyoo ipu ɛcɛ nyā a.

¹⁴ Ɔdā ō cɛgbá ɔhá nōo ya nɛ aala ɔhá a  gē gā Oblatu a, wɛ ka é dɔka ō lɛyitaajɛ lɛ ɔ́da ku Ukraist. Eko nɛ Ujisɔsi ya Oblatu aflɛyi mla ayikpo ku nu a, ó da uwa kahinii: “Aá yá ɛ̄nyā kú aá bī le blakwu um.” (1 Ukɔ́r. 11:23-26) Ohigbu ɛnyā, aala ɔhá a géē bēē gā Oblatu Ku Ikwū Ku Ukraist, abɔɔ ācɛ néē lɛ anɔ tu uwa ɛyi a yɔ ipu ɛcɛ nyā kpɔ ɛɛ ma. Aala ɔhá a klla gē hi ācɛ ɔhá igwú kéē wa i ya Oblatu a tɔha mla uwa duu.

15. Ɔdi nɛ alɔ lɔfu ya, o ya ku alɔ je owoofu lɛ Ɔwɔico mla Ukraist eko ku Oblatu a?

¹⁵ Eko ku Oblatu, alɔ gē lɛ ɛnɛɛnɛ ɛga ō je owoofu lɛ Ɔwɔico mla Ujisɔsi, eko duuma nɛ alɔ yɔ i gwo ijé klla gbɔɔkɔ tɔha. Ikpɛyi ɛlā ku ɛlā ō ka tɛɛcɛ ku Oblatu ku ihayi nyā kahinii: “Mafu Ku Ɔdā Nɛ Ɔwɔico Mla Ujisɔsi Ya A Jɛ Uwɔ Eyī!” Ɛnyā géē ya ku ɔdā nɛ Ujehofa mla Ujisɔsi ya lɛ alɔ a kóō jɛ alɔ eyī tōōtɔ̄ɔ̄. Eko néē bi igbo mla ejé gā yɛ iyɔbu alɔ eko ku Oblatu, ó gē cɛ lɛ alɔ bla tu ɔdā nóō kwɛyi nu a, ɔkpiye mɛmla oyi ku Ujisɔsi. Alɔ klla gē gbɛla tu ɛdɔ ihɔtu nɛ Ujehofa mafu lɛ alɔ, eko nɛ ó cɛ lɛ Ɔyi nu kóō gekwū cɛɛ ku alɔ yeeyi a. (Umát. 20:28) Ɔcɛ doodu nōo yihɔtu Adā alɔ nōo yɔ ɔkpanco a mla Ɔyi nu, géē dɔka ō nyɔ gā Oblatu Ku Ikwu Ku Ukraist.

16. Ɔwɛ ɛgɛnyá nɛ ācɛ néē lɛ anɔ tu uwa ɛyi mla aala ɔhá a jonjilɛ a?

¹⁶ Ipu ɔwɛ ōhī, ācɛ néē lɛ anɔ tu uwa ɛyi mla aala ɔhá a jonjilɛ. Ujehofa i yihɔtu ku ígwu duuma fiyɛ ɔhá ŋ. Ācɛ néē lɛ anɔ tu uwa ɛyi mla aala ɔhá a cɛgbá lɛ Ujehofa nɛhi. Ó yihɔtu ɛjɛɛji uwa jonjilɛ. Alɔ jé ɛnyā ohigbu ka ule nɛ ó gba lɛ ācɛ néē lɛ anɔ tu uwa ɛyi a, nɛ ó gba lɛ aala ɔhá a duu a, ɔɔma kē oyeeyi ku Ɔyi nɔnyilɔ ku nu. Ɛyɛɛyi ku uwa wɛ ka eyiyoce ku uwa wɛ ɛyɛɛyɛyi. Ígwu ɛplɛɛpa a géē lɛyitaajɛ lɛ Ɔwɔico mla Ukraist piii. (Aíjē 31:23) Alɔ bla kpɔ, ku alelekwu ku Ɔwɔico gē yuklɔ jonjilɛ mla ɛjɛɛji alɔ. Alɔ klla bla ka Ujehofa gē je alelekwu ihɔ ku nu lɛ ɛjɛɛji alɔ ɛgɛnɛ nɛ ɔnyɔɔnyɛ ku alɔ cɛgbá a, ɔdāŋ kéē lɛ anɔ tu uwɔ ɛyi amāŋ ku a wɛ ipu ígwu ku aala ɔhá a.

17. Ɔdi nɛ ācɛ néē lɛ anɔ tu uwa ɛyi ohile, nōo yɔ ipu ɛcɛ a yɔ i leyice a?

¹⁷ É ma ācɛ néē lɛ anɔ tu uwa ɛyi a mla eyiyoce kóō lā ɔkpanco ŋ. Ɔwɔico je eyiyoce ɔɔma lɛ uwa a. É gē gbɛla lɛyikwu eyiyoce ku uwa, gē gbɔɔkɔ lɛyikwu ɔ, klla gē leyice eko doodu kéē miyɛ ule ku uwa ɔkpanco. É jé ɛgɛ nɛ ɔkpiye ku uwa gáā lɛ ɔkpanco a ɛɛ ŋ. (Ufíl. 3:20, 21; 1 Ujɔ́n. 3:2) Amāŋ, é yɔ i leyice kéē má Ujehofa,  Ujisɔsi, aalelekwu otɛhɔ mla ācɛ néē lɛ anɔ tu ɛyi ohile a. O yɔ i ŋmo uwa unwu cɛɛ kéē gā yɔ ɛga ku abɔyi uwa, ɔtahɛ ku ɔmpa uwa ɔkpanco duu.

18. Ɔdi nɛ aala ɔhá a yɔ i leyice a?

¹⁸ Aala ɔhá a leyice ō lā oyeeyi opiyoo ipu ɛcɛ nyā. Ɛnyā kē wɛ ɔdā nōo yɔ ipu ɔtu ku ɛjɛɛji ācɛ. (Ɔ̄cok. 3:11) É yɔ i leyice eko néē géē tabɔ je ɛjɛɛji ɛcɛ nyā piya uparadais a. É yɔ i ya ɔtu caca lɛyikwu eko néē géē gwo ɔlɛ ku abɔyi uwa, hi ɛhɔ ku uwa, klla bi ayipɛ ɔlɛ uwa jɛ nɛ ōcē duuma i gáā yɔ gɛ ŋ. (Ayis. 65:21-23) É yɔ i leyice eko néē géē gā ɛga ɛyɛɛyɛyi ipu ɛcɛ, ō gā má aɛfu, ipu upu ɛyɛɛyɛyi, aisu mla ō klɔcɛ lɛyikwu aɔdā ɛyɛɛyɛyi nɛ Ujehofa ya a. Amāŋ, é gē gweeye fiyɛ ō jé ka ɛma ku uwa mla Ujehofa géē yɔ i lɔfu tōōtɔ̄ɔ̄.

19. Ɔdi nɛ eyeeye ku alɔ lɛ ɛga ō ya eko ku Oblatu a, eko nyá néē gáā ya Oblatu a ihayi nyā a?

¹⁹ Ujehofa lɛ ɛnɛɛnɛ eyiyoce lɛyikwu ɛcɔbu a je lɛ ācɛ nōo gē gba ɔ ɛ̄gbā a. (Ujɛr. 29:11) Oblatu Ku Ikwū Ku Ukraist wɛ ɛnɛɛnɛ eko lɛ eyeeye ku alɔ, o je owoofu lɛ Ɔwɔico mla Ukraist ohigbu ɔdā néē ya lɛ alɔ, ō ya ɛɛ ku alɔ jɔɔnyɛ oyeeyi opiyoo a. Oblatu Ku Ikwū Ku Ukraist wɛ ōjila nōo cɛgbá fiyɛ duu lɛ Ācɛ O Yɛce Ukraist ɔkwɔɔkwɛyi ipu ihayi doodu a. É géē ya aku ihayi nyā ɔnɔɔnɛ ku ɛ̄cī Usati, Ɔya Ɔmɛta 27, 2021. Ācɛ alɛwa lā ɛga nɛ ɔcɛ duuma i gáā ci uwa ŋma ō gā ōjila ō cɛgbá nyā ŋ. Ācɛ ōhī kē i nyɔ gā ōjila a naana néē yɔ i má oyaŋmo a. Ācɛ ōhī géē ya ōjila nyā ipu agba. Abɔɔ alɔ jé ka Ujehofa, Ujisɔsi, aalelekwu otɛhɔ mla ācɛ néē lɛ anɔ tu uwa ɛyi nōo yɔ ɔkpanco a yɔ i má ɔdā nōo yɔ i ya a, ɛjɛɛji ujɔ, ígwu, mla eyeeye ku alɔ kóō jɔɔnyɛ Oblatu Ku Ikwū Ku Ukraist nyā!