IPU Ujerusalɛm, ó lɛ ɛcɔ éyi néē ta ɔkpá tu ɔ ɛpla ihayi ku 700 gā ta ihayi ku 600 Gbɔbu Lɛ Eko Ku Ukriast. Ɛcɔ nyā yɔ ɛga néē gē kpo aɔdā igble tu, nōo gē mafu aɔdā alɛwa lɛyikwu ajɛ ɛyɛɛyɛyi néē hi ipu Ubáyíbu a. É je ɛcɔ a ŋma ɔgɛcɔ néē je piya unoji nóō ligbo ŋma Uhebrɔn ipu ajɛ ku Isrɛlu ŋ. Ɔdā néē ta ba ɛcɔ a kahinii: “Okonu ō tá kóō yɔ lɛ u Hagaf ɔyi ku Hagav ŋma ɛgiyi Yahweh Sabaot.” Ɛgɛnyá nɛ ɛlā néē ta ba ɛcɔ nyā cɛtɔha mla ɛlā ku Ubáyíbu a? Ó mafu ka iye ku Ɔwɔico nōo wɛ Ujehofa, néē ta ɔ ka YHWH ipu uce ku Uhibru a, é jé ɔ lɔɔlɔhi klla gē bi ɔ le yuklɔ ɛpleeko néē ta Ubáyíbu. Ó klla lɛ aɔdā alɛwa ɔhá néē ta ba aɔgɛcɔ ɛyɛɛyɛyi nōo yɔ abɔɔ néē má, nōo mafu ka ācɛ gē wa i jila tɔha klla gē kwu tayinu abɔɔ. Igbalɛwa, é gē ta iye ku Ɔwɔico ba aɛcɔ a, mla iye ku abɔyi uwa nōo lɛ aya ku iye ku Ɔwɔico anu.

Idɔkitɔ éyi néē hi ka u Rachel Nabulsi nōo yɔ inɔkpá nɛhi ku Georgia a, kɛla lɛyikwu iye néē ta ba aɛcɔ nyā kahinii: “Alɔ nwu ɛnɛɛnɛ ɛlā ŋma iye ku YHWH néē ta ba aɛcɔ ɛyɛɛyɛyi a. Ɛlā néē ta mla ɛgɛ néē ta ɔ ba aɛcɔ a, mafu ɛgɛ nɛ ɔcɛ néē hi ka u YHWH a cɛgbá ipu oyeeyi ku ācɛ Isrɛlu mla ācɛ Ujuda a.” Ɛnyā cɛtɔhá mla ɛlā ku Ubáyíbu, ohigbu ka iye ku Ɔwɔico néē ta ka u YHWH ipu uce ku Uhibru a, bɛɛcɛ igba utajan alɛwa. Eko duuma néē ta iye ku uwa é gē ta iye ku Ɔwɔico duu.

Ɛyi ɛlā néē hi ka u “Yahweh Sabaot,” néē ta ba ɛcɔ nōo yɔ ipu ɔgɛcɔ a wɛ kahinii: ‘Ujehofa nōo lɔfu fiyɛ duu a.’ Ɛnyā mafu kóō lɛbɛɛka ācɛ ɛpleeko ku Ubáyíbu a, gē bi iye ku Ɔwɔico mla ɛlā néē hi ka ‘Ujehofa nōo lɔfu fiyɛ duu a’ le yuklɔ lɔɔlɔhi. Ɛnyā teyi peee ohigbu ku Ubáyíbu bi ɛlā néē hi ka ‘Ujehofa nōo lɔfu fiyɛ duu a’ le yuklɔ igba ofu igwaahata ce ɛta (283) ŋma ipu ɔkpá ku Uhibru, bɛɛka ɛnyā nɛ Ayisaya, Ujɛrɛmiya mla Usakariya ta a.