IKPƐYI ƐLĀ Ō KLƆCƐ ƆMƐ 23
Aɛ́nɛ́ Mla Aadā—Aa Ta Ayipɛ Ɔlɛ Aa Abɔ Kéē Yihɔtu Ku Ujehofa
“A géē yíhɔtū tū Óndú ā nōo wɛ Ɔwɔicō kú uwɔ ā, mɛ́mla ɛjɛ̄ɛ̄jī īkpɔ̄tū kú uwɔ, mɛ́mla ɛjɛ̄ɛ̄jī odo kú uwɔ.”—UMÁT. 22:37.
IJÉ ƆMƐ 134 Ayi Wɛ Ɛhi Ŋma Ɛgiyi Ɔwɔico
ƆDĀ NƐ ALƆ GÁĀ NWU A *
1-2. Ɔdiya nɛ aɛga ku Ubáyíbu ōhī gē cɛgbá lɛ alɔ fiyɛ, ɔdaŋ ka odee le piyabɔ ipu oyeeyi ku alɔ a.
EKO duuma nɛ ɔba mla ɔnyā gē lɛ iyi uwa, igbalɛwa é gē jahɔ tu ɛlā ō ka tɛɛcɛ ŋma Ubáyíbu lɛyikwu obatɔha ku ɔba mla ɔnyā. Aɛga ku Ubáyíbu nōo yɔ ipu ɛlā ō ka tɛɛcɛ ɔɔma i wɛ ɛyipɛ lɛ uwa nóó. Amáŋ, aɛga ku Ubáyíbu ɔɔma kwu cɛgbá lɛ uwa babanya fiyɛ ɛ. Ɔdiya a? Ohigbu ka é géē yɔ i bi uwa le yuklɔ abɔ é yɔ i je piya ɔba mla ɔnyā a.
2 Ɛgɔɔma nōó lɛ duu a, ɔdaŋ ka ɔba mla ɔnyā nōo wɛ Ācɛ O Yɛce Ukraist kwu piya ɛ́nɛ́ mla adā. Ihayi alɛwa nōo gáā yɛ a, é lɔfu humayi jahɔ tu aɛlā ō ka tɛɛcɛ, nɛ ikpɛyi ɛlā ku uwa kɛla lɛyikwu ō bi ayipɛ jɛ. Amáŋ aukɔ́ ku Ubáyíbu nōo yɔ ipu aɛlā ō ka tɛɛcɛ ɔɔma, kwu piya ɔdā nōo cɛgbá lɛ uwa fiyɛ babanya ɛ. É gáā lɛ ɔyi ku abɔyi uwa néē géē bi jɛ ɛ. Ɛnyā wɛ uklɔ nōo gbɛ nɛhi! Ohigbu ɛnyā, ɔdaŋ ku aɔdā ōhī le piyabɔ ipu oyeeyi ku alɔ, aɛga ku Ubáyíbu ōhī gē cɛgbá lɛ alɔ fiyɛ otɛtɛ. Ɛnyā wɛ ɔdā éyi nōo ya ɛɛ nɛ ācɛ nōo gē gba Ujehofa ɛ̄gbā a gē jé Ubáyíbu klla gē gbɛla tu ɔ lipu lipu, ɛgɛ néē da aɔcɛ́ ku Isrɛlu kéē ya “eko doodu,” ipu ɛjɛɛji oyeeyi ku uwa a.—Obla. 17:19.
3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
3 Aɛ́nɛ́ mla aadā, aa lɛ ɛnɛɛnɛ ɛga o cɛgbá nɛhi éyi nɛ Ācɛ O Yɛce Ukraist lɛ gla a, anu kē wɛ ō nwu ayipɛ ɔlɛ aa ɛlā lɛyikwu Ujehofa a. Amáŋ aa dɔka ō ya fiyɛ ō nwu uwa ɛlā ɔkwɛyi lɛyikwu Ɔwɔico ku alɔ ofoofunu. Aa dɔka ō ta ayipɛ ɔlɛ aa abɔ kéē yihɔtu ku nu nɛɛnɛhi. Ɔdi nɛ aa lɔfu ya ku aa nwu ayipɛ ɔlɛ aa kéē yihɔtu ku Ujehofa a? Ipu ikpɛyi ɛlā nyā, alɔ géē kɛla lɛyikwu aukɔ́ ku Ubáyíbu ɛnɛ (4) nōo géē ta aa nōo wɛ ɛ́nɛ́ mɛmla adā a abɔ. (2 Utím. 3:16) Alɔ klla géē má ɛgɛ nɛ Ācɛ O Yɛce Ukraist ōhī nōo wɛ ɛ́nɛ́ mla adā, lɛ itene ŋma ō bi aukɔ́ ku Ubáyíbu ɔɔma le yuklɔ a.
AUKƆ́ KU UBÁYÍBU ƐNƐ (4) NŌO GÉĒ TA AƐ́NƐ́ MLA AADĀ ABƆ
Ɛgɛnyá nōó gáā lɛ abɔ kwu ayipɛ ɔlɛ uwɔ iyē ɔwɛ olɔhi, ɔdaŋ ku a gē gbolo ce otabɔ ku Ujehofa eko doodu klla lɛ ocabɔ olɔhi taajɛ lɛ uwa a? (Má ogwotu ɔmɛ 4, 8)
4. Ɔdi wɛ ukɔ́ éyi nōo lɔfu ta aɛ́nɛ́ mla aadā abɔ kéē bi ta ayipɛ ɔlɛ uwa abɔ, kéē wa i yihɔtu ku Ujehofa ŋma ipu ɔtu ku uwa a? (Ujɛ́mīsi 1:5)
4 Ukɔ́ 1: Gbolo ce otabɔ ku Ujehofa. Ba Ujehofa ɛba kóō je ijeeyi nɛ aa cɛgbá a lɛ aa, ō bi le ta ayipɛ ɔlɛ aa abɔ kéē wa i yihɔtu ku Ujehofa. (Jé Ujɛ́mīsi 1:5.) Anu wɛ ɔcɛ nōo lɔhi fiyɛ duu ō tu ɔcɛ ukɔ́ a. Ó lɛ aɔdā alɛwa nōo ya ɛɛ nɛ alɔ ka lɛ a. Leyi yɛ ɛpa ku uwa. Aflɛyi, Ujehofa wɛ ɔcɛ nōo jé odee fiyɛ duu ō wɛ adā a. (Aíjē. 36:9) Ɔmpa, aukɔ́ ijeeyi nɛ ó gē tu a gē lɛ itene lɛ alɔ eko doodu.—Ayis. 48:17.
5. (a) Ɔdi nɛ ɔwa ku Ujehofa ya tɔɔtɛ nōo géē ta aɛ́nɛ́ mla aadā abɔ a? (b) Ɛgɛ néē ma ɔ fu ipu uvidio a, ɔdi nɛ a nwu ŋma ɔwɛ ɛgɛ nɛ Ɔyinɛ alɔ nɔnyilɔ mla Ɔyinɛ alɔ nɔnya Amorim bi ayipɛ ɔlɛ uwa jɛ lɛ a?
5 O bu ipu Ɛlā ku nu mla ɔwa ku nu, Ujehofa nwu aɛ́nɛ́ mla aadā ɔdā nōo géē ta uwa abɔ, kéē bi ayipɛ ɔlɛ uwa jɛ kéē yihɔtu ku Ujehofa. (Umát. 24:45) Ocabɔ mafu, aa lɔfu má auvido alɛwa nōo cɛgbá ipu ikpɛyi ɛlā nōo ka u “Help for the Family,” nōo bɛɛcɛ ipu Awake! ōhī néē ya wɛɛcɛ ihayi ōhī nōo gáā yɛ a, ó kē yɔ ipu uwɛbusite ku alɔ babanya. Alɛwa ku auvidio ku alɔ yɔ ipu jw.org, nōo lɔfu ta aɛ́nɛ́ mla aadā abɔ kéē bi ukɔ́ ku Ujehofa yuklɔ, abɔ é yɔ i bi ayipɛ ɔlɛ uwa jɛ a. *—Aíit. 2:4-6.
6. Ɛgɛnyá nɛ ɔtu ya adā éyi lɛyikwu otabɔ nɛ anu mla ɔnyā nu miyɛ ŋma ɔwa ku Ujehofa a?
6 Aɛ́nɛ́ mla aadā alɛwa ka ó jɛ uwa eyī nɛhi, ku otabɔ nɛ Ujehofa je o bu ipu ɔwa ku nu a. Adā éyi nōo le ku Joe a kahinii: “Ō bi ayipɛ ɛta jɛ ipu ɔkwɛyi a i wɛ uklɔ ija nóó. Ami mla ɔnyā um gē gbɔɔkɔ lɛ Ujehofa eko doodu kóō ta alɔ abɔ. Ɔtu kē i ya alɔ eko doodu ku ikpɛyi ɛlā amāŋ uvidio gē bɛɛcɛ eko kpaakpa, nōo géē ta alɔ abɔ ku alɔ ya unwalu nɛ alɔ yɔ i má a le. Alɔ humayi gbolo ce ukɔ́ ku Ujehofa.” Joe mla ɔnyā nu gáā le má ku aikpɛyi ɛlā mla auvidio nyā, yɔ i ta ayipɛ ɔlɛ uwa abɔ kéē pi bla Ujehofa ajaajɛ.
7. Ɔdiya nōó cɛgbá ku aɛ́nɛ́ mla aadā kéē ya ɔdā duuma néē ya gla, ō lɛ ocabɔ olɔhi taajɛ lɛ ayipɛ ɔlɛ uwa a? (Ācɛ Uróm 2:21)
7 Ukɔ́ 2: Wɛ ocabɔ olɔhi. Ayi alɔ gē má alɔ lɔɔlɔhi, igbalɛwa é gē ya ɛgbla ku ɔdā néē gē má a. Ó wɛ ɔkwɛyi ku ɛ́nɛ́ amāŋ adā duuma i jila iyē ŋ. (Uróm. 3:23) Amáŋ, aɛ́nɛ́ mla aadā cika ō ya ɔdā duuma néē ya gla, ō lɛ ocabɔ olɔhi taajɛ lɛ ayipɛ ɔlɛ uwa. (Jé Ācɛ Uróm 2:21.) Ō kɛla lɛyikwu ayi, adā éyi kahinii: “É lɛbɛɛka udɔnlop nōo gē gwa eŋkpɔ tu iyē a.” Ó klla ka kpɔ kahinii: “É géē da alɔ eko duuma nɛ alɔ i yɔ i ya ɔdā nɛ alɔ da uwa kéē ya a ŋ ma.” Ohigbu ɛnyā, ɔdaŋ ku alɔ dɔka ku ayipɛ ɔlɛ alɔ kéē yihɔtu ku Ujehofa, ihɔtu nɛ alɔ lɛ lɛ ɔ a cika ō lɔfu klla teyi peee.
8-9. Ɔdi nɛ a nwu ŋma ɛlā nɛ Andrew mla Emma ka a?
8 Ó lɛ ɔwɛ alɛwa nɛ aɛ́nɛ́ mla aadā lɔfu nwu ayipɛ ɔlɛ uwa ɛlā kéē yihɔtu ku Ujehofa. Má ɔdā nɛ ɔyinɛ alɔ nɔnyilɔ Andrew nōo wɛ ihayi igwo ahaapa (17) a ka a: “Ɛ́nɛ́ um mla adā um gē nwu um eko doodu ka ó cɛgbá nɛɛnɛhi ō gbɔɔkɔ. Eko otu doodu, upapa ku um gē gbɔɔkɔ mɛmla um, naana nɛ um kóō lɛ ɔkɔ ku abɔyi um gba ɛ ma. Ɛ́nɛ́ um mla adā um gē ta ami mla ɔyinɛ um ɔhá a ɛlá kwu ɔ kahinii: ‘A lɔfu kɛla lɛ Ujehofa igbo aluka duuma nɛ a dɔka.’ Ohigbu ɔɔma, ɔkɔ ō gba kwu piya ɔdā ō cɛgbá gā um nɛhi. Babanya, ó gē tɔɔtɛ gā um ō gbɔɔkɔ, ɔtu klla gē ya um ka Ujehofa wɛ Adā nōo yihɔtu ku um ɔkwɔɔkwɛyi.” Aɛ́nɛ́ mla aadā, aa bla eko doodu ku ihɔtu nɛ aa abɔyi aa lɛ lɛ Ujehofa a, lɔfu ta ayipɛ ɔlɛ aa abɔ kéē ya lɛ a duu.
9 Lɛyi yɛ ocabɔ ku Emma duu ɛ. Eko nɛ adā nu habɔ uwa ta a, ó bi ācɛ alɛwa ule nɛ ɛ́nɛ́ nu géē cɛgbá ō gba cigbihi. Emma kahinii: “Ó lɛ eko alɛwa nɛ umama ku um i lɛ ije nōo géē jɛ ɔ ŋ, amáŋ ó gē kɛla eko doodu lɛyikwu ɛgɛ nɛ Ujehofa gē teyi kwu ācɛ nōo gē gba ɔ ɛ̄gbā a. N gē má ŋma ɔwɛ nōó gē lā oyeeyi ku nu a, ka ó kpɔtuce ɛlā nōó gē ka a. Umama ku um yuklɔ mla ɛlā nōó gē nwu um a.” Ɔdi nɛ ɛnyā nwu alɔ a? Aɛ́nɛ́ mla aadā lɔfu nwu ayipɛ ɔlɛ uwa ɛlā ŋma ocabɔ ku uwa, ɔdaŋ nɛ āhɔ̄ a kóō le lɔnɔ naana.—Ugal. 6:9.
10. Ɛnɛɛnɛ ɛga alɛwa nyá nɛ alɛwa ku aɛ́nɛ́ mla aadā ku ācɛ Isrɛlu lɛ, ō kɛla mla ayipɛ ɔlɛ uwa a? (Oblatūkíne 6:6, 7)
10 Ukɔ́ 3: Bēē kɛla mla ayipɛ ɔlɛ uwɔ eko doodu. Ujehofa dā ācɛ Isrɛlu ku ikee a, kéē nwu ayipɛ ɔlɛ uwa ɛlā lɛyikwu ɔ eko doodu. (Jé Oblatūkíne 6:6, 7.) Aɛ́nɛ́ mla aadā ɔɔma lɛ ɛnɛɛnɛ ɛga alɛwa ipu ɛjɛɛji ɛ̄cī a kéē kɛla mla ayipɛ ɔlɛ uwa, cɛɛ kē klla nwu uwa kéē wa i yihɔtu ku Ujehofa ŋma ipu ɔtu ku uwa. Ocabɔ mafu, ɔcɛnyilɔ ku Isrɛlu nōo wɛ ɛdrɔ lɔfu bi awa alɛwa yɔ i ta adā nu abɔ ō nyi ikpɔda, amāŋ ō kpo aɔdā néē ce ŋma ɛhɔ a wa ɔlɛ. Ɔyinɛ nu nɔnya lɔfu bi ɛyinɛhi ku ɛ̄cī a yɔ i ta ɛ́nɛ́ nu abɔ gā ili, ō wi aili, amāŋ ō yuklɔ ɔlɛ ɔhá. Abɔ aɛ́nɛ́ mla aadā gē yuklɔ tɔha mla ayipɛ ɔlɛ uwa a, é lɔfu kɛla lɛyikwu aikpɛyi ɛlā alɛwa nōo cɛgbá. Ocabɔ mafu, é lɔfu kɛla lɛyikwu ɛgɛ nɛ Ujehofa lɔhi lɛ, mla ɛgɛ nɛ ó yɔ i ta apɔlɛ a abɔ a.
11. Eko nyá nɛ aɛ́nɛ́ mla aadā lɔfu kɛla mla ayipɛ ɔlɛ uwa icɛ a?
11 Icɛ, oyeeyi wɛ ɛyɛɛyi kpanaa gwu ɛgɛ nōó lɛ eko ikee a ta. Ipu ajɛ alɛwa, oŋma ɔcɔɔci gā ɔnɔɔnɛ ó gē tɔɔtɛ lɛ aɛ́nɛ́ mla aadā alɛwa kéē lɛ eko taajɛ, yɔ tɔha mla ayipɛ ɔlɛ uwa ŋ. Aɛ́nɛ́ mla aadā a lɔfu yɔ ɔnu uklɔ, ayipɛ a kē lɔfu yɔ inɔkpa. Ohigbu ɛnyā, aɛ́nɛ́ mla aadā cika ō ceyitikwu kéē dɔka eko néē géē lɔfu kɛla mla ayipɛ ɔlɛ uwa. (Āfi. 5:15, 16; Ufíl. 1:10) Eko ku ɛ̄gbā ō gba ku apɔlɛ wɛ éyi ku ɛnɛɛnɛ ɛga ɔɔma. Ɔyinɛ alɔ nɔnyilɔ Alexander nōo wɛ ɔyipɛ oklobiya a kahinii: “Upapa ku um gē ya ōmiya ku ɛ̄gbā ō gba ku apɔlɛ eko doodu, ó kē i cɛ lɛ ɔdā duuma ci alɔ ŋma ō lɛ eko ō yɔ tɔha nyā ŋ. Igbihi nɛ alɔ lɛ oklɔcɛ a ya mɛ, alɔ gē kɛla lɛyikwu ɔdā duuma nōo cɛgbá.”
12. Ɔdi nɛ otrɛyi ku apɔlɛ cika ō bi ipu ɔtu ɛpleeko néē yɔ i ya ɛ̄gbā ō gba ku apɔlɛ a?
12 Ɔdaŋ ku a wɛ otrɛyi ku apɔlɛ, ɔdi nɛ a lɔfu ya cɛɛ ku ayipɛ ɔlɛ uwɔ kéē jɔɔnyɛ ɛ̄gbā ō gba ku apɔlɛ a? A lɔfu bi ɛnɛɛnɛ ɔkpá ku alɔ ɛpɛpɛ nōo wɛ u Jɔɔnyɛ Oyeeyi Nōó Gáā Mɛ Gboogboo ŋ ma! le klɔcɛ mla uwa. Ɔkpá nyā lɛ ɔ ya tɔɔtɛ ku alɔ lɛ ɛnɛɛnɛ ɔka ō ka. A dɔka ku ayipɛ ɔlɛ uwɔ kéē da uwɔ lɛyikwu ɔdā nōo wɛ unwalu ku uwa a, ó lɛ a, a hii bi ɛ̄gbā ō gba ku apɔlɛ le ŋmo uwa okonu amāŋ na uwa ta ɔwɛ ŋ. A kē hii cɔnu ɔdaŋ ku ekoohi, é ka ɔdā ōhī ɛ̄nɛ̄ ó cɛtɔha mla ukɔ́ ku Ubáyíbu ŋ. Ikɔkɔ ɔɔma, gweeye ka é da uwɔ ɔkwɔɔkwɛyi lɛyikwu ɔdā nōo yɔ ipu ɔtu ku uwa a, cɛɛ ku a klla ya kóō tɔɔtɛ lɛ uwa ō ya lɛ a gɔbu. Ɔwɛ olɔhi fiyɛ duu foofunu nɛ a gáā bi ta ayipɛ ɔlɛ uwɔ abɔ gla a, wɛ eko duuma nɛ a jé ɔdā nōo yɔ ipu ɔtu ku uwa ɔkwɔɔkwɛyi a nɛ.
Ɛgɛnyá nɛ aɛ́nɛ́ mla aadā lɔfu bi aɔdā nɛ Ɔwɔico ya a, le nwu ayipɛ ɔlɛ uwa ɛlā lɛyikwu uce ō ya ku Ujehofa a? (Má ogwotu ɔmɛ 13)
13. Ɛnɛɛnɛ ɛga ɔhá nyá nɛ aɛ́nɛ́ mla aadā lɛ, kéē ta ayipɛ ɔlɛ uwa abɔ kéē pi bla Ujehofa ajaajɛ a?
13 Aɛ́nɛ́ mla aadā aa dɔka ɛga ɛ̄cī doodu, cɛɛ ku aa ta ayipɛ ɔlɛ aa abɔ kéē pi bla Ujehofa ajaajɛ. Aa cika ō gbeyi gbeeko nɛ aa gē ya oklɔcɛ ku Ubáyíbu gbɔbu ɛɛ ku aa nwu uwa ɛlā lɛyikwu Ɔwɔico ku alɔ nōo yihɔtu alɔ a ŋ. Má ɔdā nɛ ɛ́nɛ́ éyi nōo lé ka u Lisa a ka a: “Alɔ gē bi ɛjɛɛji ɔdā nōo yɛ jila alɔ ta a le nwu ayipɛ ɔlɛ alɔ ɛlā lɛyikwu Ujehofa. Ocabɔ mafu, eko duuma nɛ éwo ku alɔ lɛ odee ya nōo gē cɛ lɛ ayipɛ a yɛhɛ, alɔ gē da uwɔ ku ɛnyā mafu ka Ujehofa wɛ Ɔwɔico ku eeye, ó klla ya ɔ tɔɔtɛ cɛɛ ku alɔ gweeye mla ō jɔɔnyɛ aɔdā nōo gē cɛ lɛ alɔ yɛhɛ a.”
Aɛ́nɛ́ mla aadā, aa jé ācɛ nōo wɛ aɔkpa ku ayipɛ ɔlɛ aa a? (Má ogwotu ɔmɛ 14) *
14. Ɔdiya nōó cɛgbá ku aɛ́nɛ́ mla aadā kéē ta ayipɛ ɔlɛ uwa abɔ kéē fu aɔkpa ɔwɛ ijeeyi a? (Aíita 13:20)
14 Ukɔ́ 4: Ta ayipɛ ɔlɛ uwɔ abɔ kéē fu aɔkpa olɔhi. Ɛlā ku Ɔwɔico lɛ ɔ ta alɔ eyī peee, ku aɔkpa nɛ alɔ lɛ a lɔfu lɛ abɔ kwu alɔ iyē ɔwɛ obɔbi amāŋ ɔwɛ olɔhi. (Jé Aíita 13:20.) Aɛ́nɛ́ mla aadā, aa jé ācɛ nōo wɛ ɔkpa ku ayipɛ ɔlɛ aa a? Aa má uwa klla le eko taajɛ ō yɔ tɔha mla uwa jeeje ɛ? Ɔdi nɛ aa lɔfu ya ō ta ayipɛ ɔlɛ aa abɔ kéē ya ɔkpa mla ācɛ nōo yihɔtu ku Ujehofa a? (1 Ukɔ́r. 15:33) Aa lɔfu ta ayipɛ ɔlɛ aa abɔ kéē ya aɔkpa olɔhi, ŋma lɛ ō hi ācɛ nōo lɛ ɛma olɔhi mla Ujehofa igwú kéē ya odee tɔha mla aa mla ayipɛ ɔlɛ aa.—Aíjē 119:63.
15. Ɔdi nɛ aɛ́nɛ́ mla aadā lɔfu ya kéē ta ayipɛ ɔlɛ uwa abɔ lɛ aɔkpa olɔhi a?
15 Leyi yɛ ɔdā nōo ya ipu oyeeyi ku adā éyi nōo le ka u Tony a. Ó kɛla lɛyikwu ɔdā nɛ anu mla ɔnyā ya, o ya ɛɛ kéē ta ayipɛ ɔlɛ uwa abɔ kéē lɛ aɔkpa olɔhi a. Ó kahinii: “Ŋmiifi ihayi alɛwa, ami mla ɔnyā um gē hi ayinɛ alɔ nɔnyilɔ mla ayinɛ alɔ nɔnya ɛyɛɛyɛyi igwú wa ɔlɛ alɔ, kwu aɛ̄nɛ̄ ō wɛ oklobiya mla aɛ̄nɛ̄ ō le hilokplicii ɛ. Alɔ gē le ɔdole klla gē ya ɛ̄gbā ō gba ku apɔlɛ tɔha. Ɛnyā wɛ ɛnɛɛnɛ ɔwɛ ō bi le jé ācɛ nōo yihɔtu ku Ujehofa, klla gē gba ɔ ɛ̄gbā mla eeye a. Alɔ lɛ ɛnɛɛnɛ ɛga ō lɛ ācɛ ō leyi kwu usɛkut, ācɛ ō tɔɔna ipu éwo ɔhá, mla ācɛ ɔhá ō kla ɔlɛ alɔ. Ayipɛ ɔlɛ alɔ nwu ɛlā alɛwa ŋma aɔ̄kā néē ka alɔ, ɔtu caca néē mafu, mla ɛgɛ néē yuklɔ lɔfu lɔfu ipu ɛ̄gbā ō gba ku Ujehofa a. Ɛjɛɛji aɔdā nōo ba nyā ta ayipɛ ɔlɛ alɔ abɔ kéē pi bla Ujehofa ajaajɛ.” Aɛ́nɛ́ mla aadā, aa lɛ ɔtu ku aa ya ekponu ō ta ayipɛ ɔlɛ aa abɔ kéē piyatɔha mla ɛnɛɛnɛ ācɛ.
Ɛ̄JƐ̄ KU EYIYOCE NƐ A LƐ A KÓŌ HII JƐ UWƆ Ŋ!
16. Ɔdi nɛ a gáā ya ɔdaŋ ku ɔyipɛ ɔlɛ uwɔ éyi, ka anuɔ i gáā dɔka ō gba Ujehofa ɛ̄gbā ŋ ma?
16 Ɔdi nɛ a gáā ya, ɔdaŋ ku a lɛ ɛjɛɛji ɔdā nɛ a cika ō ya a ya, amáŋ ɔyipɛ ɔlɛ uwɔ éyi ka anuɔ i dɔka ō gba Ujehofa ɛ̄gbā ŋ bɛ? A hii ŋmo iyi uwɔ ɛpɔbi ka ya ɔdā nɛ a cika ō ya a ŋ nɛ ŋ. Ujehofa je ɛga lɛ ɛjɛɛji alɔ—kwu ayipɛ ɔlɛ uwɔ. ɛga nyā lɛ ō ya mla ɛhi kóō ya ɔdā duuma nɛ alɔ dɔka ō ya a, mla ō miya ɔdaŋ ka alɔ géē gba ɔ ɛ̄gbā amāŋ ku alɔ i gáā gba ɔ ɛ̄gbā ŋ. Ɔdaŋ ku ɔyipɛ ɔlɛ uwɔ le miya ō habɔ Ujehofa ta, ɛ̄jɛ̄ kóō leyice ka ó géē cigbihi ka ó hii jɛ uwɔ ŋ. Bla kwu aciije ku ɔyinɔnyilɔ nōo bi a. (Ulúk. 15:11-19, 22-24) Ɔyipoklobiya ɔɔma le nya ŋma ɔwɛ okpaakpa a, amáŋ oŋmɛyi ku nu, ó kwu cigbihi. Ācɛ ōhī lɔfu ka kahinii: “Ɔ̄kā anca nɛ ɔɔma wɛ a.” “Ɔyi um lɔfu kwuce wa ɛgiyi Ujehofa gla a?” Ii gboo, ó ya lɛ a gla! Ku ɛlā ɔkwɛyi a ba, ɔɔma wɛ ɔdā nōo ya ipu āhɔ̄ ku oklobiya éyi nōo lé ka Elie a.
17. Ɛgɛnyá nɛ ɔ̄kā ku Elie ta uwɔ ɔtu kwu ɔtu a?
17 Elie kɛla lɛyikwu ɛ́nɛ́ mla adā nu kahinii: “É ya ɔdā néē ya gla kéē ta um abɔ ku um yihɔtu ku Ujehofa mla Ɛlā ku nu nōo wɛ Ubáyíbu a. Eko nɛ um lɛbɛɛka ihayi igwo ɛhɔ a, n gbɔɔ ō ya ikpɛyi olɔfu.” Elie gbɔɔ ō ya ɔdā nōó kpaakpa ŋ ma tayinu. Ɛ́nɛ́ mla adā nu ceyitikwu kéē ta ɔ abɔ yɔ kwu Ujehofa ajaajɛ, amáŋ ó ta ō jahɔ lɛ uwa. Igbihi nɛ ó nyɛɛ ŋma ɔlɛ a, ó gbɔɔ ō ya ɔdā nōó lɔhi ŋ ma. Naana kpɔ a, ekoohi ó gē kɛla lɛyikwu Ubáyíbu lɛ oklobiya ku nu éyi. Elie kahinii: “Ɛgɛ nɛ um gē kɛla lɛyikwu Ujehofa lɛ oklobiya ku um tōōtɔ̄ɔ̄ lɛ a, ɛgɔɔma nɛ um gē má iyi um gē gbɛla lɛyikwu Ujehofa tōōtɔ̄ɔ̄ lɛ duu a. Ɛmɛɛma, aɛlā ku Ubáyíbu nɛ ɛ́nɛ́ mla adā um nwu um nɛ ń bi uwa yuklɔ ŋ ma, gbɔɔ ō jɛ ipu ɔtu ku um.” Abɔ eko le gla ligii a, Elie le cigbihi wa ipu ɔkwɛyi a. * Gbɛla lɛyikwu ɛgɛ nɛ ɛ́nɛ́ mla adā nu géē gweeye lɛ, ka é ceyitikwu kéē nwu ɔ kóō yihɔtu ku Ujehofa ŋma eko nōó wɛ ɛdrɔ a!—2 Utím. 3:14, 15.
18. Ɛgɛnyá nɛ ɔtu gē ya uwɔ lɛyikwu aɛ́nɛ́ mla aadā nōo gē yuklɔ lɔfu lɔfu ō nwu ayipɛ ɔlɛ uwa ɛlā kéē yihɔtu ku Ujehofa a?
18 Aɛ́nɛ́ mla aadā Ujehofa lɛ ɛnɛɛnɛ ɛhi lɛ aa, anu kē wɛ ō bi aipɔɔma ɛyipɛ jɛ nōo géē gba Ujehofa ɛ̄gbā a. (Aíjē 78:4-6) Ɔɔma i wɛ uklɔ ija nóó, alɔ kē ta aa ahinya ŋma ipiipu ɔtu ku uklɔ nɛ aa yɔ i ya lɔfu lɔfu ō ta ayipɛ ɔlɛ aa abɔ a! Ɔdaŋ ku aa gɔbu yɔ i ya ɔdā duuma nɛ aa ya gla ō ta ayipɛ ɔlɛ aa abɔ kéē yihɔtu ku Ujehofa, klla nwu uwa kéē lɛyitaajɛ lɛ ɔ, aa le jé kpɔcii ku ɔtu géē he Adā alɔ nōo yɔ ɔkpanco nōo yihɔtu alɔ nɛhi a.—Āfi. 6:4.
IJÉ ƆMƐ 135 Ujehofa Yɔ I Ba Uwɔ: “Ɔyi Um, Lɛ Ijeeyi Jé”
^ Aɛ́nɛ́ mla aadā nōo wɛ Ācɛ O Yɛce Ukraist yihɔtu ayipɛ ɔlɛ uwa nɛhi. É gē yuklɔ lɔfu lɔfu kéē teyi tu ayipɛ ɔlɛ uwa lɔɔlɔhi, o ya ɛɛ kéē lɛ aɔdā néē cɛgbá klla lɛ eeye. Ɔdā ō cɛgbá fiyɛ duu a, wɛ ku aɛ́nɛ́ mla aadā nyā gē ya ɔdā néē ya gla, kéē ta ayipɛ ɔlɛ uwa abɔ kéē yihɔtu ku Ujehofa. Ikpɛyi ɛlā nyā géē kɛla lɛyikwu aukɔ́ ku Ubáyíbu ɛnɛ (4), nōo géē ta aɛ́nɛ́ mla aadā abɔ o ya ɛɛ kéē lɛ ɛnyā ya gla.
^ Má uvidio nyā ipu jw.org nōo kahinii: Taught by Jehovah to Raise Our Family.
^ Má ikpɛyi ɛlā nōo kahinii: “The Bible Changes Lives” nōo bɛɛcɛ ipu Ɔda Ō Gbaajɛ ku Ɔya Ɔmɛnɛ 1, ku 2012 aku oyibo a.
^ ƆDĀ NŌO YƆ I YA IPU IFOTO: O ya ɛɛ kóō jé ācɛ nōo wɛ aɔkpa ku ɔyi nu a, adā éyi yɔ i ta u basketball mla ɔyinɔnyilɔ ku nu mla ɔkpa ku ɔyi nu a.
