1. Ɔdi nɛ Ujehofa hi ācɛ nōo gē gba ɔ ɛ̄gbā a igwú kéē ya a? (Má ifoto a.)

 ƆNYƐ nɛ alɔ lɔfu ba ɔ ɛba ku ɔtu ō tu lé mla ō bi alɔ jé ɔwɛ a? Alɔ jé ohi ku ɔka ɔɔma. Alɔ lɔfu gbɔɔkɔ lɛ Ujehofa. Ujehofa hi alɔ igwú ku alɔ gbɔɔkɔ lɛ ɔ. Ubáyíbu da alɔ ku alɔ “kɛlā lɛ Ɔwɔicō ipú ɔkɔ ō gbā eko dóódu,” ohigbu ɛnyā alɔ jé ka ó dɔka ku alɔ gbɔɔkɔ lɛ ɔ. (1 Utes. 5:17) Alɔ lɔfu gbɔɔkɔ lɛ Ujehofa ŋma ipu ɔtu cɛɛ ku alɔ ba ɔ kóō bi alɔ jé ɔwɛ ipu ɛjɛɛji oyeeyi ku alɔ. (Aíit. 3:5, 6) Ohigbu ka Ujehofa wɛ ɔcɛ nōo gbonɛnɛ nɛhi a, ó da alɔ ka alɔ lɔfu gbɔɔkɔ lɛ ɔ igbo aluka duuma nɛ alɔ dɔka a.

2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

² Ɛga ku ɔkɔ ō gba nɛ Ujehofa je lɛ alɔ a wɛ ɛhi nōo jɛ alɔ eyī nɛhi. Amáŋ mla aɔdā ɛyɛɛyɛyi nɛ alɔ lɔfu lɛ ō ya a, ó lɔfu lɔnɔ tu alɔ ō lɛ eko taajɛ ō gbɔɔkɔ. Ɔtu kē lɔfu ya alɔ ka ó cɛgbá cɛɛ ku alɔ ya lɔhi fiyɛ ɔwɛ nɛ alɔ gē gbɔɔkɔ a. Amáŋ ó wɛ ɔdā ō jɛ alɔ eyī nɛhi ka alɔ lɔfu má aɛlā ō ta ɔtu kwu ɔtu mla ɔwɛ ō mafu alɛwa ipu Ubáyíbu. Ipu ikpɛyi ɛlā nyā, alɔ géē kɛla lɛyikwu ɛlā nɛ alɔ lɔfu nwu ŋma ɛgiyi Ujisɔsi lɛyikwu ɛgɛ nɛ alɔ géē lɛ eko taajɛ ō gbɔɔkɔ a. Alɔ klla géē kɛla lɛyikwu ɛgɛ nɛ alɔ lɔfu ya lɔhi fiyɛ ipu ɔkɔ ō gba ku alɔ, ŋma lɛ ō kɛla lɛyikwu aɔdā okpɔcii ɛhɔ nɛ alɔ lɔfu gbɔɔkɔ lɛyikwu ɔ a.

3. Ɔdi nɛ Ujisɔsi jé lɛyikwu ɔkɔ ō gba a?

³ Ujisɔsi jé ka ɔkɔ nɛ alɔ gē gba a cɛgbá lɛ Ujehofa nɛhi. Ihayi alɛwa gbɔbu ɛɛ ku ó wa ipu ɛcɛ nyā, Ujisɔsi má ɛgɛ nɛ Ujehofa  cila ɔkɔ ō gba ku ācɛ nōo hayi kpaakpa lɛ ɔ a. Ocabɔ mafu, Ujisɔsi yɔ mla adā nu eko nɛ ó cila ɔkɔ ō gba nɛ ācɛ bɛɛka Uhana, Udefidi, Ɛlayija, mla ācɛ ɔhá nōo hayi kpaakpa lɛ ɔ a gba ŋma ipu ɔtu ku uwa a. (1 Usám. 1:10, 11, 20; 1 Aɔ́cɛ́ 19:4-6; Aíjē 32:5) Ɔɔma ya ɛɛ nɛ Ujisɔsi nwu ayikpo ku nu kéē gbɔɔkɔ ojigogo mla ɔtu ō ce a!—Umát. 7:7-11.

4. Ɔdi nɛ alɔ nwu ŋma ɔkɔ ō gba ku Ujisɔsi a?

⁴ Oŋma lɛ ɔkɔ ku abɔyi nu nɛ ó gba lɛ Ujehofa a, Ujisɔsi lɛ ɛnɛɛnɛ ocabɔ taajɛ lɛ ayikpo ku nu kéē yɛce. Ipu ɛjɛɛji uklɔ ku ɔna ō ta ku nu, Ujisɔsi gbɔɔkɔ ojigogo. Ó cɛgbá ō lɛ eko taajɛ ō gbɔɔkɔ ohigbu ka ó gē lɛ ɔdā alɛwa ō ya eko doodu, ācɛ alɛwa klla gē yɔ mla ɔ. (Umák. 6:31, 45, 46) Ó gē heyi oflɔɔci o ya ɛɛ kóō lɔfu lɛ eko ō yɔ foofunu ō gbɔɔkɔ. (Umák. 1:35) Ɛpleeko éyi lɛ a, ó gbɔɔkɔ ɛjɛɛji otu gbɔbu ɛɛ kóō ya ōmiya ocɛgbá nɛhi éyi. (Ulúk. 6:12, 13) Ujisɔsi klla gbɔɔkɔ igbalɛwa otu amoomɛ gbɔbu ɛɛ kóō kwū, o ya ɛɛ kóō lɛ uklɔ amoomɛ nɛ ó lɛ ipu ɛcɛ nyā nōo lɔnɔ nɛhi a ya kwɛyi.—Umát. 26:39, 42, 44.

5. Ɛgɛnyá nɛ alɔ lɔfu gbla Ujisɔsi ya a?

⁵ Ocabɔ ku Ujisɔsi nwu alɔ ka ɛgɛ duuma nɛ alɔ kóō yɔ i yuklɔ nwune lɛ naana, alɔ cɛgbá ō lɛ eko taajɛ ō gbɔɔkɔ. Bɛɛka Ujisɔsi a, alɔ cika ō lɛ eko nɛ alɔ géē yɔ i gbɔɔkɔ a miya taajɛ. Á jé ŋ, alɔ lɔfu heyi oflɔɔci amāŋ lɛ eko taajɛ ō gbɔɔkɔ ɛpleeko otu gbɔbu ɛɛ ku alɔ nyɔ gáā gwuta. Ɔdaŋ ku alɔ ya lɛ a, alɔ gē mafu lɛ Ujehofa ka ɛnɛɛnɛ ɛga ku ɔkɔ ō gba a jɛ alɔ eyī. Ɔyinɛ alɔ nɔnya éyi nōo lé ka u Lynne a, blakwu ɛgɛ nōó jɛ ɔ eyī nɛhi lɛ eko aflɛyi nɛ ó nwu ɛlā lɛyikwu ɛnɛɛnɛ ɛga ku ɔkɔ ō gba nɛ alɔ lɛ a. Ó kahinii: “Eko nɛ um nwu ku um lɔfu kɛla lɛ Ujehofa eko duuma gla a, ó ta um abɔ ō leyi má Ujehofa ka ó wɛ ɔya ku um nōo kwu um ajaajɛ, klla cɛ gā um dɔka ō ya lɔhi fiyɛ ɔwɛ nɛ um gē gbɔɔkɔ a.” Ó lɛ aafu ŋ, ɔtu ya alɛwa ku alɔ lɛ a duu. Babanya, alɔ kɛla lɛyikwu aɔdā okpɔcii ɛhɔ nɛ alɔ lɔfu gbɔɔkɔ lɛyikwu ɔ a.

6. Oŋma ɛlā nōo yɔ ipu ɔkpá ku Ɔdā Nēé Mafú Lɛ Ujɔ́ni 4:10, 11 a, ɔdi nɛ Ujehofa cika jɛ ō miyɛ a?

⁶ Cɛtra Ujehofa. Ipu ɛbɛ ohidaago éyi, ɔyikpo Ujɔni má anyakwɔcɛ ofu ce ɛnɛ ɔkpanco yɔ i gba Ujehofa ɛ̄gbā. É cɛtra Ɔwɔico yɔ i ka kahinii: “A cíkā nēe ī cɛtra uwɔ, lɛ ojīlīmā ce uwɔ, klla cɛ̄tra uwɔ ohígbū ɔfú nɛ̄hi kú uwɔ.”  (Jé Ɔdā Nēé Mafú Lɛ Ujɔ́ni 4:10, 11.) Aalelekwu otɛhɔ nōo hayi kpaakpa a lɛ aɛlā alɛwa nōo ya ɛɛ néē cika ō cɛtra Ujehofa. É yɔ mla ɔ ɔkpanco klla lɛ ɔ jé lɔɔlɔhi ɛ. É gē má ɛnɛɛnɛ auce ō ya ku nu ipu aɔdā nɛ ó ya a. Eko duuma néē má ɛgɛ nɛ Ujehofa gē ya odee lɛ a, ó gē lɛ abɔ kwu uwa ɔtu ō cɛtra ɔ.—Ujób. 38:4-7.

7. Ɔdi nɛ alɔ lɔfu cɛtra Ujehofa ku nu a?

⁷ Alɔ cika ō cɛtra Ujehofa ipu ɔkɔ ō gba ku alɔ duu. Alɔ lɔfu ya ɛnyā ŋma lɛ ō da ɔ ɔdā nōo ya ɛɛ nɛ alɔ yihɔtu ku nu, mla ɔdā nōo ya ɛɛ nɛ alɔ gē lɛ ojilima ce ɔ a. Eko duuma nɛ a gē jé klla gē klɔcɛ ku Ubáyíbu, ceyitikwu ku a lɛ abɔ kwu ɛnɛɛnɛ auce ō ya ku Ujehofa nōo he uwɔ ɔtu fiyɛ duu a. (Ujób. 37:23; Uróm 11:33) Oŋma ɔɔma, da Ujehofa ɛgɛ nɛ ɔtu gē ya uwɔ lɛyikwu auce ō ya nyā. Alɔ klla lɔfu cɛtra Ujehofa ohigbu ka ó gē ta alɔ abɔ mla ɛjɛɛji ayinɛ alɔ nōo wɛ Ācɛ O Yɛce Ukraist a. Ó gē leyikwu alɔ eko doodu klla gē je ogbotu lɛ alɔ.—1 Usám. 1:27; 2:1, 2.

8. Ɔdi wɛ aɔdā ōhī nōo ya nɛ alɔ gē ta Ujehofa ahinya a? (1 Ācɛ Utesaloníka 5:18)

⁸ Bēē ta Ujehofa ahinya. Alɔ lɛ ɔdā alɛwa nōo ya ɛɛ nɛ alɔ cika ō ta Ujehofa ahinya ipu ɔkɔ ō gba ku alɔ. (Jé 1 Ācɛ Utesaloníka 5:18.) Alɔ lɔfu ta Ujehofa ahinya ku ɔdā olɔhi duuma nɛ alɔ lɛ a, ohigbu ka ɛjɛɛji ɔdā olɔhi doodu ŋma ɛgiyi nu. (Ujɛ́m. 1:17) Ocabɔ mafu, alɔ lɔfu ta ɔ ahinya ku ɛcɛ oheyifuu ku alɔ mla ɛnɛɛnɛ aɔdā ɛyɛɛyɛyi nɛ ó ya a. Alɔ klla lɔfu ta Ujehofa ahinya ku oyeeyi ku alɔ, aku ācɛ apɔlɛ ku alɔ, aku aɔkpa ku alɔ, mla eyiyoce ku ɛcɔbu nɛ alɔ lɛ a. Alɔ klla gē ta Ujehofa ahinya ku ɛga nɛ ó je lɛ alɔ ō jɔɔnyɛ ɛnɛɛnɛ ɛma mɛmla ɔ a.

9. Ɔdiya nɛ alɔ cika ō mafu ka ɔdā nɛ Ujehofa ya lɛ alɔ a jɛ alɔ eyī a?

⁹ Alɔ cika ō ceyitikwu nɛhi ō gbɛla lɛyikwu aɔdā nōo ya, nɛ alɔ abɔyi alɔ cika ō mafu ka ɔdā nɛ Ujehofa ya lɛ alɔ a jɛ alɔ eyī a. Alɔ lā ipu ɛcɛ nɛ odee i gē jɛ ācɛ alɛwa eyī ŋ. Igbalɛwa, ācɛ gē gbɛla lɛyikwu ɛgɛ néē lɔfu lɛ ɔdā néē dɔka a foofunu, ikɔkɔ néē géē gbɛla lɛyikwu ɛgɛ néē géē mafu ka ɔdā néē lɛ a jɛ uwa eyī a. Ɔdaŋ ku alɔ gbɔɔ ō ya ɛgbla ku ɛdɔ uce ō ya ɛgɔɔma, ɔkɔ ō gba ku alɔ géē lɛbɛɛka odee nɛ alɔ gē ba ɛba ku nu foofunu a. O ya ɛɛ ku alɔ jɛga lɛ ɔɔma ka ó hii ya ŋ ma, alɔ cika ō gɔbu yɔ i mafu ka ɛjɛɛji aɔdā nɛ Ujehofa ya lɛ alɔ a jɛ alɔ eyī klla ta ɔ ahinya ku nu.—Ulúk. 6:45.

10. Ɛgɛnyá nōo mafu ka odee jɛ ɔcɛ eyī ta ɔyinɛ alɔ nɔnya éyi abɔ kóō lɔtu a? (Má ifoto a.)

¹⁰ Ɔdaŋ ka odee gē jɛ alɔ eyī, ó lɔfu ta alɔ abɔ ō lɔtu āhɔ̄ olɔnɔ. Leyi yɛ ɔ̄kā ku ɔyinɛ alɔ Kyung-sook nōo yɔ ipu Ɔda Ō Gbaajɛ ku Ɔya Aflɛyi 15, 2015 a. Ó lɛ ōcē ku canca nōo gē ya ɔcɛ ipu ufɔ a. Ó kahinii: “Ōcē nyā cɛ lɛ ɔtu gbenyi gā um nɛhi. Ɔtu ya um bɛɛka ɛjɛɛji odee le hɛ um abɔ ɛ, ɛnyā kē ce ufi ta um iyē nɛhi.” Ɔdi ta ɔ abɔ ō lɔtu a? Ó ka ka eko otu doodu gbɔbu ɛɛ kóō nyɔ gáā gwuta, ó gē nyɔ gē ɛhico ku inu ku nu gē gbɔɔkɔ tɛɛcɛ  gboomgboom lɛyikwu aɔdā ɛhɔ nōo jɛ ɔ eyī ɛ̄cī ɔɔma a. Ɛnyā ya ka ó hii junwalu lɛ iyi nu fiyɛ ɔfu ŋ, klla lɛ abɔ kwu ɔ ɔtu ō mafu ɛgɛ nɛ ó yihɔtu ku Ujehofa lɛ a. Ó má ɛgɛ nɛ Ujehofa je otabɔ lɛ ācɛ nōo gē gba ɔ ɛ̄gbā kpaakpa eko duuma néē yɔ ipu unwalu nɛhi, ó klla le ta ɔ eyī peee ka ó lɛ aɔdā alɛwa nɛ alɔ gē jɔɔnyɛ nu ipu oyeeyi fiyɛ aunwalu nɛ alɔ lɛ a. Bɛɛka uKyung-sook a, alɔ lɛ ɔdā alɛwa ō ta Ujehofa ahinya ku nu ɔdaŋ ku alɔ kóō yɔ ipu unwalu naana. Ō mafu lɛ Ujehofa ku aɔdā nɛ ó ya a jɛ alɔ eyī ipu ɔkɔ ō gba ku alɔ, géē ta alɔ abɔ ō lɔtu mla ō lɛ abɔ bi eeye ku alɔ.

11. Ɔdiya nɛ ayikpo ku Ujisɔsi cɛgbá ɔtu ō lɛ igbihi nɛ Ujisɔsi le cigbihi gā ɔkpanco a?

¹¹ Ba Ujehofa ɛba ku ɔtu ō lɛ eko duuma nɛ a gē tɔɔna. Gbɔbu ɛɛ kóō cigbihi gā ɔkpanco a, Ujisɔsi ta ayikpo ku nu ɛlá kwu uklɔ ocɛgbá néē lɛ ō tɔɔna lɛyikwu ɔ ipu “Ujerúsālɛm mɛ́mla Ujudíya dóódu mɛ́mla Usamérīya klla jāā ga oŋmɛ́yí kú ɛcɛ” a. (Ācot. 1:8; Ulúk. 24:46-48) Igbihi nɛ eko kpii le gla a, aotrɛyi ku ācɛ Ujiyu lɛ ɔyikpo Upita mla Ujɔni kwu, lɛ uwa bi wa iyɔbu ku ōjila ku ācɛ ohɛpɔ. É lɛ ɔ́da je lɛ acɛnyilɔ nōo hayi kpaakpa nyā, kéē lɛ abɔ ci uklɔ ku ɔna o ta klla lɛ ufi ce ta uwa iyē. (Ācot. 4:18, 21) Ɔdi nɛ Upita mla Ujɔni ya a?

12. Oŋma ɛlā nōo yɔ ipu ɔkpá ku Úklɔ́ kú Ācotɛ̄hɔ̄ 4:29, 31 a, ɔdi nɛ ayikpo a ya a?

¹² Upita mla Ujɔni ta aotrɛyi ku ɔwɛ ō gba ɛ̄gbā ku ācɛ Ujiyu a ohi ohigbu ufi néē ce ta uwa iyē a kahinii: “Ó cíkā iyɔ̄bū kú Ɔwɔicō ká ɔ̄cɛ kóō lɛyítáajɛ lɛ aá ikɔkɔ ōlɛyítáajɛ lɛ Ɔwɔicō, aá géē hɛ́pɔ̄ nyā á. Ohígbū ka alɔ abɔ̄ alɔ í lɔfú habɔ̄ ō yɔ̄ ī kɛlā kú ɔdā nɛ̄ alɔ abɔ̄yī alɔ má ā klla pó ā tá glá ŋ́.” (Ācot. 4:19, 20) Eko néē lɛ Upita mla Ujɔni hɛta a, ayikpo a gbɔɔkɔ lɛ Ujehofa lɛyikwu ō ya ɔdā nōo wɛ ococɛ ku nu a. É gbɔɔkɔ kahinii: “Lɛ ɔfú tū alɔ iyē, alɔ ɔ̄cocɛ̄hɔ̄ kú uwɔ, ká ālɔ̄ cɛ̄ olɛhɔ̄ kú uwɔ pāālā mla ɔtōōlɛ.” Ujehofa lɛ ɔkɔ néē gba ŋma ɔtu ɔɔma cila.—Jé Úklɔ́ kú Ācotɛ̄hɔ̄ 4:29, 31.

13. Ɔdi nɛ alɔ lɔfu nwu ŋma ocabɔ ku Jin-hyuk a?

¹³ Alɔ lɔfu gbla ayikpo a ya ŋma lɛ ō gɔbu yɔ i tɔɔna, ɔdaŋ ka ācɛ igɔmɛnti kóō lɛ ɔ́da je lɛ alɔ ō lɛ abɔ ci uklɔ ku ɔna ō ta a. Leyi yɛ ocabɔ ku ɔyinɛ alɔ Jin-hyuk néē le ta agba ohigbu ka ó ta ō wɛ ipu icɔɔja a. Ipu inu agba a, é lɛ ɔ fu kóō bēē bi ɔdole gē lɛ aalagba ōhī nōo yɔ inu agba nɛ ɔcɛ ekponu foofunu gē yɔ a, amáŋ é jɛga lɛ ɔ ō kɛla duuma fiyɛ ɔdā nɛ aalagba a cɛgbá nu a ŋ. É jɛga lɛ ɔ ō kɛla lɛ uwa lɛyikwu Ubáyíbu ŋ. Ó gbɔɔkɔ ku ɔtu ō lɛ mla ijeeyi ō bi le tɔɔna eko duuma nɛ ó lɛ ɛga ɔɔma lɛ. (Ācot. 5:29) Ó kahinii: “Ujehofa lɛ ɔkɔ ō gba ku um cila, ŋma lɛ ō je ɔtu ō lɛ mla ijeeyi gā um ō gbɔɔ oklɔcɛ ku Ubáyíbu ku uminiti ɛhɔ iyɔbu ku inu agba a. Cɛɛ eko otu, n gē ta auleta nɛ um géē je lɛ aalagba a oŋma ɔci nu.” Alɔ lɔfu lɔtuce kpɔtuce duu ka Ujehofa géē ta alɔ abɔ ō yuklɔ ku ɔna ō ta ku alɔ jila. Bɛɛka u Jin-hyuk a, alɔ lɔfu gbɔɔkɔ ku ɔtu ō lɛ mla ijeeyi

14. Ɔdi lɔfu ta alɔ abɔ eko duuma nɛ alɔ yɔ i má unwalu a? (Aíjē Kú Ɛ̄gbā 37:3, 5)

¹⁴ Ba Ujehofa ɛba kóō ta uwɔ abɔ ō lɔtu unwalu nɛ a lɛ a. Alɛwa ku alɔ gē má owe ohigbu ōcē, ɔdā nōo gē junwalu lɛ alɔ ipu ɔtu, ɔcɛ nɛ alɔ yihɔtu ku nu nōo kwū, unwalu nɛ alɔ gē má ipu apɔlɛ ku alɔ, o ya ŋmo, amāŋ aunwalu ɔhá. Aodee bɛɛka ōcē nōo gē tu ipu oduudu ɛcɛ mla ɛfú ō kpo, ya ku aunwalu nyā kóō le lɔnɔ nɛhi ō lɔtu ku nu. Da Ujehofa ɛgɛ nɛ ɔtu gē ya uwɔ lɛ piii a. Da ɔ lɛyikwu āhɔ̄ ku uwɔ ɛgɛ nɛ a géē da ɔkpa ku uwɔ nōo kwu uwɔ ajaajɛ a. Le jé kpɔcii ka Ujehofa “géē tá uwɔ abɔ̄ í yá ɔdā nōo ce uwɔ ɛgbá ā.”—Jé Aíjē Kú Ɛ̄gbā 37:3, 5.

15. Ɛgɛnyá nɛ ɔkɔ ō gba gáā ta alɔ abɔ ō lɔtu “ipú odúúdú unwalu kú alɔ” a? Je ocabɔ éyi.

 ¹⁵ Ō gbɔɔkɔ eko doodu géē ta alɔ abɔ ō lɔtu “ipú odúúdú unwalu kú alɔ.” (2 Ukɔ́r. 1:4) Ujehofa jé ɔdā nɛ ācɛ nōo yɔ i gba ɔ ɛ̄gbā a yɔ i lɔtu ku nu a—“ó gē pó ɔkɔ [ku otabɔ] nēé gē gbā” a. (Aíjē 145:18, 19) Kristie nōo wɛ ihayi ofu ce ahaanɛ nōo wɛ ɔcɛ ō gbɔbu ɔna ō ta a má ku ɛlā nyā wɛ ɔkwɛyi. Acigili ó gbɔɔ ō doōcē bɔbi bɔbi. Ohigbu ɛnyā, ɔtu le gbenyi lɛ ɔ nɛhi. Igbihaajɛ ó gáā le jé ka ɛ́nɛ́ nu lɛ ōcē éyi nōo géē je ɔ ŋmo. Kristie kahinii: “N gbɔɔkɔ lɛ Ujehofa ŋma ɔtu kóō je ɔfu nɛ um cɛgbá ɛ̄cī doodu a gā um. N ceyitikwu ō yɛce ōmiya ku ɛ̄gbā ō gba ɛyɛɛyɛyi bɛɛka ō gā ōjila ku ujɔ mla ō ya oklɔcɛ ku abɔyi um.” Ó klla kahinii: “Ɔkɔ ō gba ta um abɔ ō lɔtu eko olɔnɔ ɔɔma. N jé ka Ujehofa yɔ kwu um eko doodu, ɛnyā kē ta um abɔ ō lɛ ɔtu ogbonɛ. Naana nɛ ōcē ku um i mɛ boobu ŋ ma, Ujehofa lɛ ɔkɔ ō gba ku um cila ŋma lɛ ō je ɔtu ɛbɔ mla ɔtu ogbonɛ gā um.” Alɔ hii je mlanyi ŋ, “Ɔwɔicō jé ɛ́gɛ́nɛ̄ ó gē nyā ācɛ o lɛyítáajɛ lɛ ɔ́ tá ŋmá ojámá kú uwā lɛ ā.”—2 Upít. 2:9.

16. Ɔdiya nɛ alɔ cɛgbá otabɔ ku Ujehofa o ya ɛɛ ku alɔ nya cidaa ō ta ojama a?

¹⁶ Ba Ujehofa ɛba kóō ta uwɔ abɔ ō ta ojama. Ohigbu ka alɔ i jila iyē ŋ ma, alɔ cɛgbá ō nya cidaa eko doodu ō ta ojama ō nyɔ gáā ya ɔdobɔbi. Usetan yɔ i ya ɔdā duuma nɛ ó ya gla o ya ɛɛ kóō ya ɔɔma kóō le lɔnɔ tu alɔ. Ɔwɛ éyi nɛ ó gē ceyitikwu ō biya ɛlá ō gbo ku alɔ a, wɛ oŋma lɛ ō ya ku alɔ bi aɔdā nōó lɔhi ŋ le jɔɔnyɛ iyi alɔ. Aɔdā ō bi jɔɔnyɛ iyi alɔ ɛgɛnyā lɔfu ya ku ɛlá ō gbo obɔbi kóō le mu ipu ɔtu ku alɔ, nōo lɔfu ya ku alɔ hii le yeŋee ipeyi ku Ujehofa ŋ, klla ya ku alɔ nyɔ gáā biya íne bɔbi bɔbi.—Umák. 7:21-23; Ujɛ́m. 1:14, 15.

17. Igbihi nɛ alɔ lɛ ɛba ka otabɔ ba, ɔdi nɛ alɔ cika ō ya o ya ɛɛ ku alɔ ta ojama a? (Má ifoto a.)

¹⁷ Alɔ cɛgbá otabɔ ku Ujehofa ɔdaŋ ku alɔ dɔka ō ta ojama ō nyɔ gáā ya ɔdobɔbi. Ujisɔsi  ba Ujehofa ɛba nyā ipu ɔkɔ ō gba nɛ ó nwu ayikpo ku nu a. Ó kahinii: “Ā híīī bī alɔ ga ipú ojámá nɛ̄hi ŋ́, amáŋ lɛ alɔ nyatá ŋmá ɔdōōbɔ̄bí.” (Umát. 6:13) Ujehofa dɔka ō ta alɔ abɔ, amáŋ alɔ géē ba ɔ ɛba ku otabɔ ku nu piii. Igbihi nɛ alɔ lɛ ɛba ku otabɔ ba, alɔ cika ō ya ɔdā nōo cɛtɔha mla ɔkɔ nɛ alɔ gba a. Alɔ lɔfu ceyitikwu ō ya ɔdā nɛ alɔ ya gla, ō lɛ abɔ ci ō jé amāŋ ō jahɔ tu ɛlá ō gbo obɔbi nōo kpɔ ipu ɛcɛ ku Usetan nyā a. (Aíjē 97:10) Alɔ lɔfu ya ku alɔ gbɛla lɛyikwu aɔdā olɔhi ŋma lɛ ō jé mla ō klɔcɛ ku Ubáyíbu. Ō gā ōjila ku ujɔ mla ō yuklɔ ku ɔna ō ta lɔfu gbo ɛlá ō gbo ku alɔ duu. Ujehofa kē cokonu ka ó gáā jɛga ku ojama nōo fiyɛ alɔ ɔfu kóō ya alɔ ŋ.—1 Ukɔ́r. 10:12, 13.

18. Lɛyikwu ɔkɔ ō gba, ɔdi nɛ eyeeye ku alɔ cɛgbá ō ya a?

¹⁸ Eyeeye ku alɔ cɛgbá ō gbɔɔkɔ fiyɛ otɛtɛ, o ya ɛɛ ku alɔ hayi kpaakpa lɛ Ujehofa ɛpleeko olɔnɔ amoomɛ nyā a. Lɛ eko taajɛ ɛ̄cī doodu nɛ a géē gbɔɔkɔ ŋma ɔtu. Ujehofa dɔka ku alɔ ‘da ɔ́ odúúdú unwalu kú alɔ’ ipu ɔkɔ ō gba. (Aíjē 62:8) Bēē cɛtra Ujehofa ku a klla ta ɔ ahinya ku ɛjɛɛji ɔdā nɛ ó ya a. Ba ɔ kóō ta uwɔ abɔ ō je ɔtu ō lɛ gā uwɔ ipu uklɔ ku ɔna ō ta. Ba ɔ kóō ta uwɔ abɔ ō lɔtu unwalu duuma nɛ a lɛ a, ka ó klla ta uwɔ abɔ ō ta ojama duuma nɛ a lɔfu yɔ i má a. A hii cɛ lɛ ɔdā duuma amāŋ ɔcɛ duuma ci uwɔ ŋma ō gbɔɔkɔ lɛ Ujehofa eko doodu ŋ. Ɛgɛnyá nɛ Ujehofa gē cila ɔkɔ ō gba ku alɔ a? Alɔ géē kɛla lɛyikwu ɔka ocɛgbá ɔɔma ipu ikpɛyi ɛlā nōo gboce ɛnyā a.