1-2. Ɔdi nɛ alɔ lɔfu gbɛla lɛyikwu ɔ eko duuma nɛ alɔ gē gbɔɔkɔ a?

 A GBƐLA jeeje ɔdaŋ ka Ujehofa yɔ i cila ɔkɔ ō gba ku uwɔ ɛ? Ɔdaŋ ka ó lɛ a, á yɔ foofu uwɔ ŋ. Alɛwa ku ayinɛ alɔ ka ka é gbɛla tu ɛlā nyā duu ɛ, ofiyɛ duu eko néē yɔ i lɔtu ku unwalu. Ɔdaŋ ku alɔ yɔ i má owe, ó lɔfu lɔnɔ tu alɔ fiyɛ ō jé ɛgɛ nɛ Ujehofa yɔ i cila ɔkɔ ō gba ku alɔ a.

² Alɔ leyi yɛ ɛgɛ nɛ alɔ lɔfu lɔtuce kpɔcii ka Ujehofa gē cila ɔkɔ ō gba ku ācɛ nōo gē gba ɔ ɛ̄gbā a. (1 Ujɔ́n. 5:15) Alɔ géē kɛla lɛyikwu aɔka ɛpa nyā: Ɔdiya nōó lɔfu ya alɔ ekoohi bɛɛka Ujehofa i yɔ i cila ɔkɔ ō gba ku alɔ ŋ ma? Ɔwɛ ɛyɛɛyɛyi nyá nɛ Ujehofa gē bi le cila ɔkɔ ō gba ku alɔ icɛ a?

3. Ɔdiya nɛ Ujehofa dɔka ku alɔ gbɔɔkɔ lɛ ɔ a?

³ Ɔkpiihɔ cɛ lɛ alɔ jé kpɔcii ka Ujehofa yihɔtu alɔ nɛɛnɛhi, ka alɔ klla cɛgbá lɛ ɔ. (Uhág. 2:7; 1 Ujɔ́n. 4:10) Ɔɔma ya ɛɛ nɛ ó hi ɛjɛɛji alɔ igwú ō ba ɔ ɛba ku otabɔ ipu ɔkɔ ō gba a. (1 Upít. 5:6, 7) Ó dɔka ō ta alɔ abɔ o ya ɛɛ ku alɔ yɔ kwu ɔ ajaajɛ, mla ō ya ku alɔ lɔtu āhɔ̄ olɔnɔ duuma nɛ alɔ yɔ i má a.

4. Ɛgɛnyá nɛ alɔ bi le jé ka Ujehofa gē cila ɔkɔ ō gba ku ācɛ nōo gē gba ɔ ɛ̄gbā a? (Má ifoto a.)

⁴ Ipu Ubáyíbu, alɔ gē jé igbalɛwa ka Ujehofa gē cila ɔkɔ ō gba ku ācɛ nōo gē gba ɔ ɛ̄gbā a. A lɔfu gbɛla lɛyikwu ocabɔ duuma? Ocabɔ éyi wɛ Udefidi nōo wɛ Ɔcɛ́ a. Ó lɛ aolɛla obɔbi alɛwa ipu ɛjɛɛji oyeeyi ku nu, igbalɛwa ó kē ba Ujehofa ɛba ku otabɔ ipu ɔkɔ ō gba. Ipu āhɔ̄ éyi lɛ a, ó ba Ujehofa ɛba kahinii:  “Óndú pó ɔkɔ nɛ̄ n gbā ā. Kócōō, jāhɔ̄ lɛ ɛ̄ba nɛ̄ n ba uwɔ ā, cɛ́ɛ́ ká ā tá um abɔ̄, Ohígbū ka a lɔhi lɛ ācɛ ɔlɛ́ uwɔ, a klla gē yá okónu nāa ce lɛ uwá.” (Aíjē 143:1) Ujehofa lɛ ɔkɔ nɛ Udefidi gba a cila. (1 Usám. 19:10, 18-20; 2 Usám. 5:17-25) Udefidi lɔfu ka mla ɔtu ō ce kahinii: “Óndú ā kwu odúúdú ācɛ nēe gē hī ɔ̄ igwú ɔ̄kwɛ̄yi ā ajaajɛ.” Alɔ lɔfu lɛ ɔtu ō ce ɔɔma duu.—Aíjē 145:18.

5. Ujehofa cila ɔkɔ ō gba ku ācɛ nōo gba ɔ ɛ̄gbā eko ikee ɔwɛ néē leyice piii a nɛɛ? Je ocabɔ mafu éyi. (Má ifoto a.)

⁵ Ujehofa i lɔfu cila ɔkɔ ō gba ku alɔ ɔwɛ nɛ alɔ leyice piii a ŋ. Ɔɔma wɛ ɔdā nōo ya da ɔyikpo Upɔlu a. Ó ba Ɔwɔico ɛba kóō ya ka ‘ōcē kú ɔkpíye nōo lɔnɔ bɛ̄ɛka ujē ō kwu ācɛ uklo ā’ kóō mɛ. Igbo ɛta, Upɔlu gbɔɔkɔ lɛ Ujehofa lɛyikwu unwalu olɔnɔ nɛhi nyā. Ujehofa lɛ ɔkɔ ō gba ɔɔma cila? Ii gboo, amáŋ ó wɛ ɔwɛ nɛ Upɔlu leyice piii a ŋ. Ikɔkɔ nɛ ó géē ya ku unwalu a kóō mɛ a, Ujehofa lɛ ɔfu nɛ ó cɛgbá a je lɛ ɔ o ya ɛɛ kóō gɔbu yɔ i gba ɔ ɛ̄gbā kpaakpa.—2 Ukɔ́r. 12:7-10.

6. Ɔdiya nōó lɔfu ya alɔ ekoohi bɛɛka Ujehofa i yɔ i cila ɔkɔ ō gba ku alɔ ŋ ma?

⁶ Ekoohi Ujehofa lɔfu cila ɔkɔ ō gba ku alɔ ɔwɛ nɛ alɔ i kóō leyice ŋ. Alɔ lɔfu jé kpɔcii ka Ujehofa jé ɔwɛ olɔhi fiyɛ duu ō bi le ta alɔ abɔ. Ó kóō lɔfu “yá lɛ alɔ fíyɛ́ ɛ́gɛ́nɛ̄ alɔ kōō gbɛlá nū ā.” (Āfi. 3:20) Ohigbu ɛnyā, ó lɔfu cila ɔkɔ ō gba ku alɔ eko amāŋ ɔwɛ nɛ alɔ i kóō leyice ŋ.

7. Ɔdiya nōó lɔfu cɛgbá ku alɔ ya opiyabɔ lɛyikwu ɔdā nɛ alɔ gē gbɔɔkɔ lɛyikwu ɔ a? Je ocabɔ mafu éyi.

⁷ Alɔ lɔfu cɛgbá ō ya opiyabɔ lɛyikwu ɔdā nɛ alɔ gē gbɔɔkɔ lɛyikwu ɔ a, eko duuma nɛ ɔdā nōo wɛ ococɛ ku Ujehofa a le ta alɔ eyī peee fiyɛ. Leyi yɛ ocabɔ ku Martin Poetzinger ɛ. Eko kpii igbihi nɛ ó lɛ ɔnyā lɛ a, é kwu ɔyinɛ alɔ Poetzinger u ta agba ipu Nazi néē gē ya ācɛ owe nɛɛnɛhi a. Eko aflɛyi a, ó ba Ujehofa ɛba kóō ya kéē lɛ ɔ hɛta ŋma inu agba a, o ya ɛɛ kóō lɔfu teyi kwu ɔnyā nu mla ō gbɔɔ uklɔ ku ɔna ō ta ku nu kpɔ. Amáŋ igbihi nɛ alaadi ɛpa le gla a, ó má ɔdā duuma nōo mafu ka Ujehofa géē ya kéē lɛ ɔ hɛta ŋma inu agba a ŋ. Ohigbu ɛnyā, ó gbɔɔ ō gbɔɔkɔ kahinii: Ujehofa kōōcō lɛ ɔdā nɛ a dɔka ku um ya a mafu gā um.” Oŋma ɔɔma, ó gbɔɔ ō gbɛla lɛyikwu ɔdā nɛ ayinɛ alɔ ɔhá nōo yɔ ipu inu agba a yɔ i lɔtu ku nu a. Alɛwa ku uwa yɔ i junwalu lɛ iyi uwa lɛyikwu ɔnyā uwa mla ayipɛ ɔlɛ uwa. Ɔyinɛ alɔ Poetzinger klla kahinii: “Ujehofa, ahinya ku uklɔ ɛpɛpɛ nɛ um lɛ a. Ta um abɔ ku um lɛ ɔfu tu ayinɛ um iyē mla ō je ɔtu ō ta kwu ɔtu  lɛ uwa.” Ó kē bi ihayi ahaanɛ nɛ ó ya inu agba a le ta ayinɛ nu ɔtu kwu ɔtu!

8. Ɔdā ocɛgbá nyá nɛ alɔ cika ō blakwu ɔ eko duuma nɛ alɔ yɔ i gbɔɔkɔ a?

⁸ Alɔ bla ka Ujehofa lɛ ɔda nɛ ó bi ɔtu nɛ ó géē ya jila eko kpaakpa nɛ ó miya taajɛ a. Ɔdā nɛ ó kē bi ɔtu ō ya jila ɔɔma lɛ ō ya ku ɛjɛɛji unwalu nɛ alɔ gē má icɛ a kóō mɛ. Unwalu bɛɛka amiya nōo gē ya abɔyi uwa, ōcē, mɛmla ikwū. Ujehofa géē ya ɔdā nɛ ó bi ɔtu a jila o bu ipu Ajɔɔcɛ ku nu. (Udán. 2:44; Mafú 21:3, 4) Amáŋ jaa gbeeko ɔɔma, Ujehofa yɔ i jɛga lɛ Usetan kóō lé ɔcɛ́ ku ɛcɛ nyā. b (Ujɔ́n. 12:31; Mafú 12:9) Ɔdaŋ ka Ujehofa ya ku ɛjɛɛji unwalu nɛ alɛɛcɛ yɔ i má a kóō mɛ babanya, ó lɔfu lɛbɛɛka Usetan yɔ i ya lɔhi ɔwɛ nɛ ó yɔ i lé ɔcɛ́ ku ɛcɛ nyā a. Ohigbu ɛnyā, naana nɛ alɔ géē cɛgbá ō gbeyi ku Ujehofa kóō lɛ okonu ō ce ku nu ya jila a, ɛnyā i wɛ ka ó habɔ alɔ ta lɛ a nóó. Alɔ leyi yɛ aɔdā ōhī nɛ Ujehofa ya o ya ɛɛ kóō ta alɔ abɔ a.

9. Ɛgɛnyá nɛ Ujehofa gáā ta alɔ abɔ ɔdaŋ ku alɔ cɛgbá ō ya ōmiya a? Lɛ ɔ teyi peee.

⁹ Ó gē je ijeeyi lɛ alɔ. Ujehofa cokonu ka ó géē je ijeeyi nɛ alɔ cɛgbá a lɛ alɔ o ya ɛɛ ku alɔ ya ōmiya olɔhi. Alɔ cɛgbá ijeeyi nōo ŋma ɛgiyi Ɔwɔico a, ofiyɛ duu ɔdaŋ ku alɔ dɔka ō ya ōmiya nōo géē lɛ abɔ kwu ɛjɛɛji oyeeyi ku alɔ. Ōmiya bɛɛka ɔdaŋ ku alɔ géē lɛ ɔba amāŋ ɔnyā amāŋ ku alɔ i gáā lɛ ŋ. (Ujɛ́m. 1:5) Leyi yɛ ocabɔ ku ɔyinɛ alɔ nɔnya éyi nɛ ó lɛ ɔba ŋ nōo lé ka u Maria a. c Ó yɔ i yuklɔ ku ɔcɛ ō gbɔbu ɔna o ta eko doodu mla eeye eko nɛ ó gáā jé ɔyinɛ alɔ nɔnyilɔ éyi a. Ó kahinii: “Abɔ alɔ yɔ i jé iyi alɔ tōōtɔ̄ɔ̄ fiyɛ a, ɛgɔɔma nɛ alɔ yɔ i yihɔtu ku iyi alɔ lɛ a. N jé ka um cɛgbá ō ya ōmiya. N gbɔɔkɔ nɛɛnɛhi lɛyikwu ɛlā ɔɔma. N dɔka ku Ujehofa kóō bi um jé ɔwɛ, amáŋ n klla jé ka Ujehofa i gáā ya ōmiya ɔɔma gā um.” Ɔtu ya ɔ ka Ujehofa lɛ ɔkɔ ō gba ɔɔma cila. Ɛgɛnyá a? Ó jila ɛlā má ŋma ipu aɔkpá ku alɔ, ɛnyā kē ya kóō le tɔɔtɛ lɛ ɔ ō má aikpɛyi ɛlā nōo ta ɔ abɔ ō cila ohi ku aɔka nɛ ó lɛ a. Ó klla jahɔ tu ukɔ́ nɛ ɛ́nɛ́ nu nōo hayi kpaakpa ipu ɛ̄gbā ō gba ku Ujehofa tu ɔ a. Ukɔ́ ɔɔma ta u Maria abɔ kóō leyi yɛ ɛgɛ nɛ ɔtu yɔ i ya ɔ lɛ a. Ohigbu ɛnyā, ó le tɔɔtɛ lɛ ɔ ō ya ōmiya ku ijeeyi.

10. Ɛgɛ nɛ ɔkpá ku Ācɛ Ukɔ́rīnti 4:7 ka a, ɔdi nɛ Ujehofa géē ya o ya ɛɛ kóō ta ācɛ nōo gē gba ɔ ɛ̄gbā abɔ a? Je ocabɔ mafu éyi. (Má ifoto a.)

¹⁰ Ó gē je ɔfu nɛ alɔ cɛgbá ō lɔtu a lɛ alɔ. Ɛgɛ nɛ ó ya lɛ ɔyikpo Upɔlu a, Ujehofa géē je ɔfu nɛ alɔ cɛgbá ō lɔtu ku unwalu nɛ alɔ lɛ a lɛ alɔ. (Jé 2 Ācɛ Ukɔ́rīnti 4:7.) Leyi yɛ ɛgɛ nɛ Ujehofa je otabɔ lɛ ɔyinɛ alɔ éyi nōo lé ka u Benjamin, o ya ɛɛ kóō lɔfu lɔtu āhɔ̄ olɔnɔ a. Eko nɛ ó wɛ ɛdrɔ a, Benjamin mla ācɛ apɔlɛ ku nu lā  ɛga nɛ ācɛ gē kwinya ɛfú nyɔ ipu éwo ku Africa a. Benjamin kahinii: “N gbɔɔkɔ lɛ Ujehofa eko doodu, yɔ i ba ɔ kóō je ɔfu nɛ um cɛgbá a gā um o ya ɛɛ ku um ya ɔdā nōo he ɔ ɔtu a. Ujehofa lɛ ɔkɔ ō gba ku um cila ŋma lɛ ō je ɔtu ɛbɔ gā um, ɔtu ō lɛ ō gɔbu ipu uklɔ ku ɔna ō ta, mla aɔkpá ku alɔ nɛ um cɛgbá o ya ɛɛ ku um yɔ kwu ɔ ajaajɛ a.” Ó klla kahinii: “Ō jé ɔ̄kā lɛyikwu ɔdā nɛ ayinɛ alɔ má ipu oyeeyi ku uwa ɛ, mla ō nwu ɛlā lɛyikwu ɛgɛ nɛ Ujehofa ta uwa abɔ ō lɔtu a, lɛ ɔfu ta um iyē ku um hayi kpaakpa ipu ɛ̄gbā ō gba ku nu.”

11-12. Ɛgɛnyá nɛ Ujehofa lɔfu miya ō bi ayinɛ alɔ le cila ɔkɔ ō gba ku alɔ a? (Má ifoto a.)

¹¹ Ó gē bi ayinɛ alɔ nōo gē gba ɔ ɛ̄gbā a le ta alɔ abɔ. Otu gbɔbu ɛɛ kóō je oyeeyi ku nu gwɛɛya a, Ujisɔsi gbɔɔkɔ ŋma ɔtu. Ó ba Ujehofa ɛba kóō hii jɛga lɛ ācɛ ɔhá kéē gbɛla ka ó wɛ ɔcɛ nōo gē ka obɔbi lɛyikwu Ɔwɔico, cɛɛ kéē ŋmo ɛpɔbi ohigbu ɔɔma ŋ. Ikɔkɔ nɛ Ujehofa géē ya ɔɔma a, ó ta Ujisɔsi abɔ ŋma lɛ ō ta alelekwu otɛhɔ éyi ɛhɔ kóō lɛ ɔfu tu ɔ iyē. (Ulúk. 22:42, 43) Ujehofa lɔfu ta alɔ abɔ duu, ŋma lɛ ō ya ku ɔyinɛ alɔ éyi kóō gwo uwaya fu alɔ o ya ɛɛ kóō ta alɔ ɔtu kwu ɔtu, amāŋ ō ya ku ɔyinɛ alɔ éyi kóō gáā jila alɔ má. Ɛjɛɛji alɔ lɔfu dɔka ɛnɛɛnɛ ɛga ō kɛla ogbotu nɛɛ lɛ ayinɛ alɔ.—Aíit. 12:25.

¹² Leyi yɛ ocabɔ ku ɔyinɛ alɔ nɔnya éyi nōo lé ka u Miriam a. Alaadi ōhī igbihi nɛ ɔba nu kwū a, Miriam yɔ ɔlɛ foofunu nɛ ɔtu ya ɔ bɛɛka ó lɛ eyiyoce duuma gɛ ŋ, nɛ ɔtu klla le gbenyi lɛ ɔ duu a. Ó yɔ i jikwu nɛɛnɛhi nɛ ó cɛgbá ɔcɛ éyi nɛ ó géē ka ɔtu ku nu lɛ ɔ. Ó kahinii: “Abɔ ń lɛ ɔfu ō gwo uwaya fu ɔcɛ duuma ŋ ma, n gbɔɔ ō gbɔɔkɔ lɛ Ujehofa. Abɔ um yɔ i jikwu klla yɔ i gbɔɔkɔ a, ɔcɛ éyi gbɔɔ ō gwo uwaya fu um. Ɔnyakwɔcɛ ku ujɔ éyi nōo kwu alɔ ajaajɛ a nɛ.” Miriam miyɛ ɔtu ō tu lé ŋma ɛgiyi ɔnyakwɔcɛ ku ujɔ ɔɔma mla ɔnyā nu. Ó jé kpɔcii ka Ujehofa lɛ abɔ kwu ɔyinɛ alɔ ɔɔma ɔtu cɛɛ kóō gwo uwaya fu ɔ a.

13. Je ocabɔ éyi ku ɛgɛ nɛ Ujehofa lɔfu bi ācɛ nōó gē gba ɔ ɛ̄gbā ŋ ma le cila ɔkɔ ō gba ku alɔ a.

¹³ Ó lɔfu bi ācɛ nōó gē gba ɔ ɛ̄gbā ŋ ma le ta ācɛ ɔlɛ nu abɔ. (Aíit. 21:1) Ekoohi Ujehofa lɔfu cila ɔkɔ ō gba ku ācɛ ɔlɛ nu, ŋma lɛ ō lɛ abɔ kwu ācɛ nōó gē gba ɔ ɛ̄gbā ŋ ma ɔtu cɛɛ  kéē ta uwa abɔ. Ocabɔ mafu, Ujehofa lɛ abɔ kwu Atasasɛsi nōo wɛ Ɔcɛ́ a ɔtu kóō jɛga lɛ Unehemiya kóō le cigbihi gā Ujɛrusalɛm, o ya ɛɛ kóō tabɔ ō lɛ igeli a tugwo. (Uneh. 2:3-6) Icɛ duu, Ujehofa lɔfu ya ku ācɛ nōó gē gba ɔ ɛ̄gbā ŋ ma kéē ta alɔ abɔ eko nɛ alɔ cɛgbá nu a.

14. Ɛgɛnyá nɛ ɔ̄kā ku Soo Hing ta uwɔ ɔtu kwu ɔtu lɛ a? (Má ifoto a.)

¹⁴ Ɔtu ya ɔyinɛ alɔ nɔnya éyi nōo lé ka u Soo Hing a ka Ujehofa ta ɔ abɔ o bu ipu idɔkitɔ ku nu. Ɔyinɔnyilɔ ku nu lɛ ōcē alɛwa nōo gē ya ɔcɛ ɔkɔtɔ eko nɛ ó wɛ ɔyipɛ obene a. Amáŋ igbihi nɛ ihayi ōhī le gla a, ɔyinɔnyilɔ ku nu a klla le miya ŋma ɛyi inu lɛ amiya lɛ bɔbi bɔbi. Ohigbu ɛnyā, anu mla ɔba nu lɛ abɔ ci uklɔ néē gē ya a o ya ɛɛ kéē lɔfu teyi kwu ɔ. Ɛnyā ya kéē gbɔɔ ō lɛ unwalu ku ije. Soo Hing ka ka ɔtu ya ɔ bɛɛka ó gáā lɔtu unwalu a gla gɛ ŋ ma. Ó gbɔɔkɔ lɛ Ujehofa ŋma ɔtu, yɔ i ba ɔ ɛba ka otabɔ. Idɔkitɔ a le miya ō dɔka ɔwɛ nɛ ó géē ta anu mla ācɛ apɔlɛ ku nu abɔ. Ɛnyā ya kéē miyɛ otabɔ ŋma ɛgiyi igɔmɛnti klla lɛ ɛga néē géē lā nōó gbɔɔla nɛhi ŋ ma lɛ. Igbihi nɛ eko le gla ligii a, Soo Hing kahinii: “Alɔ má ɛgɛ nɛ Ujehofa ta alɔ abɔ lɛ a. Ó gē ‘pó ɔkɔ nɛ̄ ɔ̄cɛ gē gbā ā’ ɔkwɔɔkwɛyi.”—Aíjē 66:19, 20.

15. Ɔdi ta ɔyinɛ alɔ nɔnya éyi abɔ kóō gáā jé ka Ujehofa yɔ i cila ɔkɔ ō gba ku nu a?

¹⁵ Ujehofa i gē cila ɔkɔ ō gba ku alɔ eko doodu ɔwɛ nɛ alɔ leyice piii a ŋ. Amáŋ ɔwɛ nɛ Ujehofa gē cila ɔkɔ ō gba ku alɔ a wɛ ɔdā nɛ alɔ cɛgbá yilii o ya ɛɛ ku alɔ hayi kpaakpa lɛ ɔ a. Ohigbu ɛnyā, leyi taajɛ lɔɔlɔhi ku a má ɛgɛ nɛ Ujehofa gē cila ɔkɔ ō gba ku uwɔ a. Ɔtu ya ɔyinɛ alɔ nɔnya éyi nōo lé ka u Yoko a ka Ujehofa i yɔ i cila ɔkɔ ō gba ku nu ŋ, amáŋ ó gáā gbɔɔ ō ta aɔdā nɛ ó ba Ujehofa ɛba ku nu a taajɛ ipu ɔkpá. Igbihi nɛ eko le gla ligii a, ó gáā lɛ ɔkpá a jila anu ó gáā le má ka Ujehofa lɛ ɛyinɛhi ku ɔkɔ ō gba ku nu cila ɛ, kwu aɛ̄nɛ̄ ó kóō kwu mlanyi ɛ ma. Ŋma eko teeko, alɔ cɛgbá ō gbɛla lɛyikwu ɛgɛ nɛ Ujehofa yɔ i cila ɔkɔ ō gba ku alɔ a.—Aíjē 66:19, 20.

16. Ɛgɛnyá nɛ alɔ lɔfu mafu ɔtu okpoce eko duuma nɛ alɔ gē gbɔɔkɔ a? (Ācɛ Uhíbru 11:6)

¹⁶ Alɔ gē mafu ka alɔ kpɔtuce Ujehofa ō wɛ oŋma lɛ ō yɔ i gbɔɔkɔ lɛ ɔ foofunu ŋ, amáŋ ō cɛ mla ɔwɛ nɛ ó cila ɔkɔ ō gba ku alɔ a. (Jé Ācɛ Uhíbru 11:6.) Leyi yɛ ocabɔ ku Mike mla ɔnyā nu Chrissy. É lɛ ōmiya ō yuklɔ ipu Ubɛtɛlu.  Mike kahinii: “Alɔ lɛ abɔ tu ɔkpá igbalɛwa klla gbɔɔkɔ lɛ Ujehofa lɛyikwu ōmiya nyā, amáŋ é hi alɔ higwú ō gáā yuklɔ ipu Ubɛtɛlu ŋ.” Mike mla ɔnyā nu Chrissy lɔtuce lɔfu lɔfu ka Ujehofa jé ɔwɛ olɔhi fiyɛ duu ō bi uwa yuklɔ ipu ɛ̄gbā ō gba ku nu. É gɔbu ya ɔdā duuma néē ya gla ō wɛ ācɛ ō gbɔbu ɔna ō ta eko doodu ɛga nɛ ɛgbá ku ācɛ ō tɔɔna ɛlā Ɔwɔico yɔ fiyɛ, mla ō je otabɔ lɛ uklɔ ku ɔlɛ ō gwo ipu ɔwa ku alɔ. Babanya, é yɔ i yuklɔ ku ācɛ ō leyikwu usɛkut. Mike kahinii: “Ujehofa i cila ɔkɔ ō gba ku alɔ eko doodu ɛgɛ nɛ alɔ leyice piii a ŋ. Amáŋ ó lɛ ɔkɔ ō gba ku alɔ cila ɔwɛ nōo lɔhi fiyɛ ɛgɛ nɛ alɔ kóō leyice a.”

17-18. Oŋma ɛlā nōo yɔ ipu ɔkpá ku Aíjē Kú Ɛ̄gbā 86:6, 7 a, ɔdi nɛ alɔ lɔfu lɔtuce kpɔcii a?

¹⁷ Jé Aíjē Kú Ɛ̄gbā 86:6, 7. Udefidi nōo wɛ ɔcɛ éyi nōo ta ɔkpá ku Aíjē Kú Ɛ̄gbā a, jé kpɔcii ka Ujehofa gē po ɔkɔ ō gba ku nu klla gē cila ɔ. A lɔfu lɛ ɔtu ō ce ekponu ɔɔma duu. Aocabɔ nɛ alɔ kɛla lɛyikwu ɔ ipu ikpɛyi ɛlā nyā a, cɛ lɛ alɔ jé kpɔcii ka Ujehofa lɔfu je ijeeyi mla ɔfu nɛ alɔ cɛgbá o ya ɛɛ ku alɔ lɔtu a lɛ alɔ. Ó lɔfu bi ayinɛ alɔ nōo gē gba ɔ ɛ̄gbā a le ta alɔ abɔ, amāŋ bi ācɛ nōó gē gba ɔ ɛ̄gbā babanya ɛ ŋ ma le ta alɔ abɔ ɔwɛ ōhī.

¹⁸ Naana nɛ Ujehofa i lɔfu cila ɔkɔ ō gba ku alɔ eko doodu ɔwɛ nɛ alɔ leyice piii a ŋ ma, alɔ jé kpɔcii ka ó géē cila uwa. Ó géē je ɔdā nɛ alɔ cɛgbá yilii a lɛ alɔ, mla eko okpaakpa nɛ alɔ cɛgbá nu a. Ohigbu ɛnyā, gɔbu ku a yɔ i gbɔɔkɔ klla kpɔtuce ka Ujehofa géē po ɔkɔ ō gba ku uwɔ, mla ō lɔtuce lɔfu lɔfu ka Ujehofa géē teyi kwu uwɔ babanya, klla géē ya “ɛgbá kú odúúdú aɔ́dā nēe yēeyī ā yá lɛ uwá” ipu ɛcɛ ɛyipɛ nōo yɔ i wa a.—Aíjē 145:16.