IKPƐYI ƐLĀ Ō KLƆCƐ ƆMƐ 24
A Lɔfu Ya Ōmiya Ku Uwɔ Ipu Ɛ̄gbā Ō Gba Ku Ujehofa Jila
“Ɛ̄jɛ̄ kú ɔdā olɔhi ōyá kóō jɛ̄ alɔ ŋ́, ohígbū ka ɔ́dāŋ́ nɛ̄ alɔ í gbagbafú je cīgbīhi ŋ́, eko géē wā nɛ̄ alɔ géē cē ɔdɛ̄hɔ̄ kú nū.”—UGAL. 6:9.
IJÉ ƆMƐ 84 Ceyitikwu, Ku A Tabɔ
ƆDĀ NƐ ALƆ GÁĀ NWU A a
1. Ɔdi nɛ alɛwa ku alɔ nya mla ɔ ɛ ma?
A YA ōmiya duuma ipu ɛ̄gbā ō gba ku Ujehofa jeeje nōo yɔ i lɔnɔ tu uwɔ ō ya jila ɛ? b Ɔdaŋ ka ó lɛ a, ayika yɔ foofu uwɔ ŋ. Ocabɔ mafu, Philip dɔka ō ya lɔhi fiyɛ ɔwɛ ɛgɛ nɛ ó gē gbɔɔkɔ mla ɛgɛ nɛ ó lɔfu lɛ eko ō yɔ i gbɔɔkɔ eko doodu a, amáŋ ó gē lɔnɔ tu ɔ ō ya lɛ a. Erika miya ō bēē gā ōjila ku uklɔ ku ɔna ō ta teeko, amáŋ ó gē nyɔ igbihi eko ipu ōjila ku uklɔ ku ɔna ō ta doodu kpɔ. Tomáš ceyitikwu igbalɛwa ō lɛ ɛjɛɛji Ubáyíbu jé. Ó kahinii: “Ń gē jɔɔnyɛ Ubáyíbu ō jé ŋ. N ceyitikwu igbo ɛta ɛ, amáŋ eko doodu ɔkpá ku Ulifayi nɛ um gē kwɛji a.”
2. Ɔdiya nɛ ɔtu i cika ō gbenyi lɛ alɔ ɔdaŋ ka ó lɛ ōmiya éyi nɛ alɔ ya ipu ɛ̄gbā ō gba ku Ujehofa nɛ alɔ i ya jila ɛ ŋ ma?
2 Ɔdaŋ ka ó lɛ ōmiya duuma nɛ a ya amáŋ nōó tɔɔtɛ gā uwɔ ō ya jila ɛ ŋ, kōōcō ɔtu ka ó hii gbenyi gā uwɔ ŋ. Ō ya ōmiya nōo kóō le ligii a jila igbalɛwa gē cɛgbá oceyitikwu nɛhi. Oceyitikwu nɛhi ku uwɔ ō ya ōmiya ɔɔma jila a mafu ka ɛma ku uwɔ mla Ujehofa cɛgbá gā uwɔ nɛhi, ku a klla dɔka ō je ofiyɛ duu ku uwɔ lɛ ɔ. Oceyitikwu ku uwɔ a jɛ Ujehofa eyī nɛhi. Ku ɛlā ɔkwɛyi a ba, Ujehofa i leyice ku a géē ya fiyɛ ɛji ɔfu ku uwɔ ŋ. (Aíjē 103: 14; Umáy. 6:8) Ohigbu ɛnyā, eko duuma nɛ a gē ya ōmiya, le má ku a géē ya ɔ jila. Igbihi nɛ a lɛ ōmiya ya, ɔdi nɛ a lɔfu ya o ya ɛɛ ku a lɛ ɔ ya jila a? Alɔ kɛla lɛyikwu ɔdā ōhī nɛ a lɔfu ya a.
Ō LƐ ƆTU CACA Ō YA ŌMIYA KU UWƆ JILA CƐGBÁ NƐHI
Ba Ujehofa ɛba ku a lɛ ɔtu caca fiyɛ (Má ogwotu ɔmɛ 3-4)
3. Ɔdiya nɛ ɔtu caca cɛgbá nɛhi a?
3 Ó cɛgbá nɛhi ku a lɛ ɔtu caca ō ya ōmiya ku uwɔ jila. Ɔdaŋ ku a lɛ ɔtu caca lɛyikwu ōmiya ku uwɔ, a géē ceyitikwu lɔfu lɔfu ō lɛ ɔ ya jila. Alɔ lɔfu lɛ ɔtu caca nɛ alɔ lɛ ō ya ōmiya ku alɔ jila a, gbla owu nōo gē ta ɔkɔ abɔ kóō le yɛ faajɛ ɛga nōó yɔ i nyɔ a. Ɔdaŋ ka owu a gɔbu yɔ i ta, ɔcɛ nōo yɔ i pɛ ɔkɔ a lɔfu yɛ faajɛ ɛga nɛ ó yɔ i nyɔ a fiyaa. Ɔdaŋ ka owu a kē lɔfu, ó gáā kpo eko bonu fluflu ŋ. Ɔwɛ ekponu ɔɔma, ɔdaŋ ku alɔ lɛ ɔtu caca alɔ lɔfu ya ōmiya ku alɔ a jila fiyaa. Ɔyinɛ alɔ David nōo yɔ u El Salvador a kahinii: “Ɔdaŋ ku a lɛ ɔtu caca, a gē ceyitikwu lɔfu lɔfu. A gáā cɛ lɛ ɔda duuma ci uwɔ ŋma ō ya ōmiya ku uwɔ jila ŋ.” Ó lɛ a, ɔdi nɛ a lɔfu ya o ya ɛɛ ku a lɛ ɔtu caca fiyɛ a?
4. Ɔdi nɛ alɔ lɔfu gbɔɔkɔ lɛyikwu ɔ a? (Ācɛ Ufílipāyi 2:13) (Má ifoto a.)
4 Gbɔɔkɔ ku a lɛ ɔtu caca fiyɛ. Oŋma lɛ otabɔ ku Alelekwu Ihɔ ku Ɔwɔico, Ujehofa lɔfu ya ku a lɛ ɔtu caca ō ya ōmiya ku uwɔ jila. (Jé Ācɛ Ufílipāyi 2:13.) Ekoohi alɔ gē ya ōmiya ohigbu ku alɔ jé ku alɔ cika ō ya lɛ a, ɔɔma kē wɛ ɔdā olɔhi. Amáŋ á jé ŋ, alɔ i gáā lɔfu lɛ ɔtu caca ō ya ɔ jila ŋ. Ɔɔma wɛ ɔdā nōo ya da ɔyinɛ alɔ nɔnya Norina nōo yɔ Uganda a. Ó lɛ ōmiya ō gbɔɔ oklɔcɛ ku Ubáyíbu mla ācɛ, amáŋ ó lɛ ɔtu caca olɔfu ō ya ōmiya ɔɔma jila ŋ, ohigbu ka ó gbɛla ka ó wɛ ɛnɛɛnɛ itica ŋ. Ɔdi ta ɔ abɔ a? Ó kahinii: “N gbɔɔ ō ba Ujehofa ɛba ɛ̄cī doodu kóō ta um abɔ cɛɛ ku um lɛ ɔtu caca fiyɛ ō gbɔɔ oklɔcɛ ku Ubáyíbu. N kē yuklɔ nōo cɛtɔha mla ɔkɔ nɛ um gba a, n gbɔɔ ō ceyitikwu ya lɔhi fiyɛ ɔwɛ nɛ um gē nwu ācɛ ɛlā a. Igbihi nɛ ɔya ōhī le gla a, n gáā le má ka ɔtu caca ku um ō gbɔɔ oklɔcɛ ku Ubáyíbu kwu lɔfu fiyɛ ɛ. Ipu ihayi ɔɔma piii a, n gbɔɔ ō klɔcɛ ku Ubáyíbu mla ācɛ ɛpa.”
5. Ɔdi nɛ alɔ cika ō gbɛla tu ɔ nōo géē ya ku ɔtu caca nɛ alɔ lɛ ō ya ōmiya ku alɔ jila kóō lɔfu fiyɛ a?
5 Gbɛla lipu lipu tu aɔdā nɛ Ujehofa ya gā uwɔ ɛ ma. (Aíjē 143:5) Ɔyikpo Upɔlu gbɛla lipu lipu tu ɛgɛ nɛ Ujehofa gbonɛnɛ lɛ ɔ a, ɛnyā kē lɛ abɔ kwu ɔ ɔtu ō yuklɔ lɔfu lɔfu lɛ Ujehofa. (1 Ukɔ́r. 15:9, 10; 1 Utím. 1:12-14) Ɔwɛ ekponu ɔɔma, ɔdaŋ ku a gē gbɛla lɛyikwu aɔdā nɛ Ujehofa ya gā uwɔ ɛ ma, a géē lɛ ɔtu caca olɔfu ō ya ōmiya ku uwɔ jila. (Aíjē 116:12) Leyi bi ɔdā nōo ta ɔyinɛ alɔ nɔnya éyi nōo yɔ u Honduras a abɔ, kóō lɛ ōmiya ku nu ō wɛ ɔcɛ ō gbɔbu ɔna ō ta eko doodu a ya jila a. Ó kahinii: “N gbɛla lipu lipu tu ɛgɛ nɛ Ujehofa yihɔtu ku um nɛhi lɛ a. Ó ta um abɔ ō gáā lɛ ācɛ ɔlɛ nu jé. Ó leyikwu um klla je ogbotu gā um. Eko nɛ um gbɛla tu ɛlā nyā a, ihɔtu nɛ um lɛ lɛ Ujehofa a kwu lɔfu fiyɛ, n klla dɔka ō gbɔɔ ō gbɔbu ɔna ō ta.”
6. Ɔdā ɔhá nyá lɔfu ta alɔ abɔ o ya ɛɛ ku alɔ lɛ ɔtu caca fiyɛ ō lɛ ōmiya ku alɔ ya jila a?
6 Lɛ ɔtu ku uwɔ kwu itene nɛ a géē lɛ ɔdaŋ ku a lɛ ōmiya ku uwɔ ya jila. Leyi bi ɔda nōo ta u Erika nɛ alɔ kɛla lɛyikwu ɔ gbɔbu a abɔ, kóō lɛ omiya ku nu ō bēē gā ōjila ku uklɔ ku ɔna ō ta teeko ya jila a. Ó kahinii: “N gáā le má ka ó lɛ aɔdā alɛwa nōo gē hɛ um abɔ ohigbu ku um gē gā uklɔ ku ɔna ō ta igbihi eko. Amáŋ abɔ um gbɔɔ ō nyɔ teeko a, ó le tɔɔtɛ gā um ō hɛ okonu tu ayinɛ alɔ a klla lɛ eko ō yɔ mla uwa. Ó klla gē tɔɔtɛ gā um ō jahɔ tu aɛlā ocɛgbá nōo lɔfu ta um abɔ ō jɔɔnyɛ uklɔ ku ɔna ō ta ku um mla ō ya lɔhi fiyɛ anu.” Erika lɛ ɔtu ku nu kwu itene nɛ ó géē lɛ ɔdaŋ nɛ ó gē gā ōjila ku uklɔ ku ɔna ō ta teeko, ó kē lɛ ōmiya ɔɔma ya jila. Itene nyá nɛ a lɔfu lɛ ɔtu ku uwɔ kwu ɔ a? Ɔdaŋ ka ōmiya ku uwɔ wɛ ō ya lɔhi fiyɛ ɛgɛ nɛ a gē jé Ubáyíbu mla ɔkɔ ō gba, gbɛla tu ɛgɛ nōó lɔfu ya ku ɛma ku uwɔ mla Ujehofa kóō lɔfu fiyɛ a. (Aíjē 145:18, 19) Ɔdaŋ ka ōmiya ku uwɔ wɛ ō lɛ ɛnɛɛnɛ uce ō ya ku Ācɛ O Yɛce Ukraist, lɛ ɔtu ku uwɔ kwu ɛgɛ nōó lɔfu ya ku a lɛ ɛma olɔhi mla ācɛ ɔhá a. (Ukól. 3:14) Ó géē lɔhi nɛhi ɔdaŋ ku a lɛ ɔdā nōo ya ɛɛ nɛ a dɔka ō ya ōmiya ku uwɔ jila a ta taajɛ. Bēē jila aɛlā nɛ a ta taajɛ a má ŋma eko teeko. Tomáš nɛ alɔ kɛla lɛyikwu ɔ gbɔbu a kahinii: “Ɔdaŋ ka ó lɛ ɔdā ocɛgbá nɛhi éyi nōo ya ɛɛ nɛ um cika ō lɛ ɔda nɛ um miya a ya jila, n gē ceyitikwu lɔfu lɔfu ō lɛ ɔdā ɔɔma ya piii.”
7. Ɔdi ta u Julio mla ɔnyā nu abɔ kéē lɛ ōmiya ku uwa ya jila a?
7 Lɛ eko taajɛ ō yɔ mla ācɛ nōo géē ta uwɔ ɔtu kwu ɔtu ō lɛ ōmiya ku uwɔ ya jila. (Aíit. 13:20) Leyi bi ɔdā nōo ta u Julio mla ɔnyā nu abɔ kéē lɛ ōmiya ku uwa ō nyɔ gā ɛga nɛ ɛgbá ku ācɛ o tɔɔna ɛlā Ɔwɔico yɔ fiyɛ a ya jila a. Ó kahinii: “Alɔ fu aɔkpa nōo géē ta alɔ ɔtu kwu ɔtu ō ceyitikwu ō lɛ ōmiya ku alɔ ya jila, alɔ klla gē kɔka lɛyikwu ōmiya ku alɔ a mla uwa. Alɛwa ku uwa lɛ ɛdɔ ōmiya ekponu ɔɔma ya jila gbɔbu duu ɛ, ohigbu ɔɔma é gē da alɔ aɛlā ocɛgbá nōo géē ta alɔ abɔ. Aɔkpa ku alɔ a klla gē da alɔ ɔka lɛyikwu ɛgɛ nɛ ōmiya ku alɔ a yɔ i nyɔ lɛ a, é klla gē ta alɔ ɔtu kwu ɔtu eko nɛ alɔ cɛgbá nu a.”
ƆDAŊ KU ALƆ I LƐ ƆTU CACA NƐ ALƆ CƐGBÁ A Ŋ
Ceyitikwu lɔfu lɔfu ku a lɛ ɔdā nɛ a miyɛ a ya jila (Má ogwotu ɔmɛ 8)
8. Ɔdi lɔfu ya ɔdaŋ ku alɔ gē ceyitikwu ō ya ɔdā nɛ alɔ miya a jila eko nɛ alɔ lɛ ɔtu caca foofunu a? (Má ifoto a.)
8 Ku ɛlā ɔkwɛyi a ba, ó lɛ ekoohi nɛ alɔ i gē lɛ ɔtu caca ō ya ɔdā nɛ alɔ miya a jila ŋ. Ɛnyā wɛ ku alɔ i gáā ceyitikwu ō lɛ ōmiya ku alɔ a ya jila ŋ nɛɛ? Ehee. Owu lɔfu tabɔ nɛhi cɛɛ ku ɔkɔ kóō le yɛ faajɛ ɛga nōó yɔ i nyɔ a. Amáŋ, ó lɛ ekoohi nɛ owu nōo yɔ i ta a i gáā lɔfu ŋ, ó kē lɛ eko nɛ owu i kóō gáā ta ŋ duudu. Ɛnyā wɛ ka ɔcɛ nōo yɔ i pɛ ɔkɔ a i gáā gɔbu mla iyawu ku nu ŋ nɛɛ? Ehee, ó lɛ a ŋ. Ocabɔ mafu, ɔkɔ ōhī lɛ engine amāŋ ɔcí néē gē bi le pɛ ɔ. Ɔcɛ nōo yɔ i pɛ ɔkɔ a lɔfu bi engine amāŋ ɔcí ō pɛ ɔkɔ le gɔbu mla iyawu ku nu. Alɔ lɔfu lɛ ɔtu caca nɛ alɔ lɛ a gbla owu ɔɔma. Ó lɛ ɛ̄cī ōhī nɛ ɔtu caca nɛ alɔ lɛ a i gáā lɔfu ŋ. Ó kē lɛ ɛ̄cī ōhī nɛ alɔ i kóō gáā lɛ ɔtu caca fluflu ŋ. Ohigbu ɛnyā, ɔdaŋ ku alɔ gē ceyitikwu ō ya ɔdā nɛ alɔ miya a jila eko nɛ alɔ lɛ ɔtu caca foofunu, ayika alɔ i gáā ya ɔdā nɛ alɔ miya a gboogboo gla ŋ. Amáŋ ɛgɛ nɛ ɔcɛ ō pɛ ɔkɔ a gē dɔka ɔwɛ ɔhá nōó géē yɛ faajɛ ɛga nōó yɔ i nyɔ a, alɔ lɔfu ceyitikwu ō lɛ ɔdā nɛ alɔ miya a ya jila ɔdaŋ ku alɔ i kóō gē lɛ ɔtu caca nɛ alɔ cɛgbá a ekoohi ŋ. Ku ɛlā ɔkwɛyi a ba, ō ya ɛnyā i gáā lɔfu tɔɔtɛ ŋ. Amáŋ a géē lɛ eeye nɛhi ɔdaŋ ku a lɛ ɔdā nɛ a miya a ya jila. Gbɔbu ɛɛ ku alɔ kɛla lɛyikwu ɔdā nɛ alɔ lɔfu ya a, alɔ lɛ ɛlā ka lɛyikwu ɔka nōo lɔfu wa ipu ɔtu ku alɔ a.
9. Ó cɛgbá ku alɔ ceyitikwu ō lɛ ɔda nɛ alɔ miya a ya jila ɔdaŋ nɛ alɔ i kóō lɛ ɔtu caca ō ya ɔ ŋ? Lɛ ɔ teyi peee.
9 Ujehofa dɔka ku alɔ gba ɔ ɛ̄gbā mla eeye ka ó lɛbɛɛka é kwu alɔ ba ɔ a ŋ. (Aíjē 100:2; 2 Ukɔ́r. 9:7) Ohigbu ɛnyā, ó cɛgbá cɛɛ ku alɔ ceyitikwu lɔfu lɔfu ō lɛ ɔdā nɛ alɔ miya ō ya ipu ɛ̄gbā ō gba ku Ujehofa a ya jila, ɔdaŋ nɛ alɔ i kóō lɛ ɔtu caca ō ya ɔ ŋ? Leyi yɛ ocabɔ ku ɔyikpo Upɔlu. Ó kahinii: “Lɛbɛ̄ɛka ɔ̄cotákwū ā, n gē tū iyē kú um akwū klla gē kwu ɔkpíyē kú um tū kóō yá ɔdā nɛ̄ n tíne ā.” (1 Ukɔ́r. 9:25-27) Naana nōó lɛ ekoohi nɛ Upɔlu i gē lɛ ɔtu caca ō ya ɔdā nɛ Ujehofa dɔka kóō ya a ŋ ma, ó ceyitikwu lɔfu lɔfu ō ya ɔ kpɔ. Ujehofa gweeye ohigbu ɔdā nɛ Upɔlu ya lɛ ɔ a? Ii gboo! Ujehofa kē lɛ ɔhā hɛ ce ɔ ohigbu oceyitikwu ku nu a.—2 Utím. 4:7, 8.
10. Ɔdi wɛ itene nɛ alɔ lɔfu lɛ ɔdaŋ ku alɔ ceyitikwu ō ya ɔdā nɛ alɔ miya a jila, ɔdaŋ nɛ alɔ i kóō lɛ ɔtu caca ō ya ɔ ŋ ma?
10 Ɔwɛ ekponu ɔɔma, Ujehofa gē gweeye nɛhi ō má alɔ yɔ i ceyitikwu ō ya ɔdā nɛ alɔ miya a jila, ɔdaŋ nɛ alɔ i kóō lɛ ɔtu caca ō ya lɛ a ŋ. Ó gē gweeye nɛhi ohigbu ka ó jé ka ɔdaŋ ku alɔ i dɔka ɔdā nɛ alɔ gē ya igbalɛwa a ŋ naana, alɔ gē ya ɔ ohigbu ku alɔ yihɔtu ku nu. Ɛgɛ nɛ Ujehofa hɔha ce Upɔlu a, ó géē hɔha ce oceyitikwu ku alɔ duu. (Aíjē 126:5) Abɔ alɔ kē i má ɔwɛ ɛyɛɛyɛyi nɛ Ujehofa gē hɔha ce alɔ a, ó géē ya ku alɔ lɛ ɔtu caca fiyɛ. Ɔyinɛ alɔ nɔnya Lucyna nōo ŋma éwo ku Poland a kahinii: “Ekoohi ń gē dɔka ō gɛɛcɛ ku uklɔ ku ɔna ō ta ŋ, ofiyɛ duu eko nɛ ɛ̄jɛ̄ le jɛ um. Amáŋ, eeye nɛ um gē lɛ eko duuma nɛ um gɛɛcɛ ku uklɔ ku ɔna ō ta a wɛ ɛhi nōó lɛ ɛdɔ ŋ.” Ohigbu ɛnyā, alɔ má ɔdā nɛ alɔ lɔfu ya eko duuma nɛ alɔ i lɛ ɔtu caca ō ya ɔdā nɛ alɔ miya a ŋ ma.
11. Ɛgɛnyá nɛ Ujehofa lɔfu ta alɔ abɔ ku alɔ gbɔbu yɔ i ceyitikwu ō lɛ ɔdā nɛ alɔ miya a ya jila a?
11 Ba Ujehofa ɛba kóō je Alelekwu Ihɔ ku nu gā uwɔ. Alelekwu Ihɔ ku Ɔwɔico lɔfu ta alɔ abɔ ō lɛ ɛnɛɛnɛ uce ō ya nɛ alɔ cɛgbá, o ya ɛɛ ku alɔ ceyitikwu ō lɛ ɔdā nɛ alɔ miya a ya jila. Ofiyɛ duu a, eko nɛ ɔdā nɛ alɔ miya ō ya a le lɔnɔ, amāŋ eko nɛ alɔ i lɛ ɔtu caca ō ya ɔdā nɛ alɔ miya a ŋ. Ohigbu ɛnyā, ba Ujehofa ɛba kóō je Alelekwu Ihɔ ku nu gā uwɔ o ya ɛɛ ku a lɛ uce ō ya olɔhi nōo géē ta uwɔ abɔ ō lɛ ɔdā nɛ a miya a ya jila. (Ulúk. 11:13; Ugal. 5:22, 23) David nɛ alɔ kɛla lɛyikwu ɔ gbɔbu a ka ɛgɛ nɛ ɔkɔ ō gba ta ɔ abɔ lɛ a. Ó dɔka ō bēē ya oklɔcɛ ku abɔyi nu ojigogo. Ohigbu ɛnyā ó ba Ujehofa ɛba kóō je Alelekwu Ihɔ ku nu lɛ ɔ, o ya ɛɛ kóō gɔbu yɔ i ceyitikwu ō lɛ ɔdā nɛ ó miya a ya jila. Ó kahinii: “Mla otabɔ ku Ujehofa, ó le tɔɔtɛ gā um ō gbɔɔ oklɔcɛ ku Ubáyíbu ku abɔyi um, n klla gē ya ɔ ojigogo.”
12. Ɛgɛnyá nɛ ukɔ́ nōo yɔ ipu ɔkpá ku Ɔ̄cokóītá 11:4 a, lɔfu ta alɔ abɔ ō ya ōmiya ku alɔ jila a?
12 A hii gbeyi gbeeko nɛ āhɔ̄ ku uwɔ le lɔhi ŋ. Ipu ɛcɛ ka obabanya, alɔ i gáā lɛ āhɔ̄ olɔhi nɛ alɔ gē dɔka a eko doodu ŋ. Ɔdaŋ ku alɔ yɔ i gbeyi gbeeko nɛ āhɔ̄ ku alɔ kwu lɔhi ɛgɛ nɛ alɔ dɔka a, alɔ i gáā ya ōmiya ku alɔ jila gboogboo gla ŋ. (Jé Ɔ̄cokóītá 11:4.) Ɔyinɛ alɔ nɔnyilɔ éyi nōo lé ka u Dayniel a kahinii: “Ó lɛ āhɔ̄ ku ɔcɛ duuma nōo gē nyɔ mɛɛlɛ eko doodu ŋ. Ohigbu ɛnyā, alɔ i cika ō gbeyi gbeeko nɛ āhɔ̄ ku alɔ kwu lɔhi ɛgɛ nɛ alɔ dɔka a ŋ, alɔ kóō gbo ɔdā nɛ alɔ miya a boobu.” Ɔyinɛ alɔ Paul nōo yɔ Uganda a klla ka ɔdā ɔhá nōo ya ɛɛ nɛ alɔ i cika ō pi ɔkwu ajɛ ō ya ɔdā nɛ alɔ miya a ŋ ma. Ó kahinii: “Ɔdaŋ ku alɔ gbɔɔ ɔdā nɛ alɔ miya ō ya a eko nɛ āhɔ̄ a kóō le lɔnɔ naana, Ujehofa géē ta alɔ abɔ.”—Umál. 3:10.
13. Ɔdiya nōó lɔhi cɛɛ ku alɔ gbɔɔ ɔdā nɛ alɔ miya a ɛmɛɛma a?
13 Gbɔɔ ɛmɛɛma. Alɔ i lɔfu lɛ ɔtu caca ō ya ɔdā nɛ alɔ miya a jila ŋ, ohigbu ku ɔdā nɛ alɔ miya a le lɔnɔ nɛhi. Ɔdaŋ ku ɛnyā wɛ āhɔ̄ ku uwɔ a, a lɔfu tu ɔdā nɛ a miya a waajɛ ligii gla? Ɔdaŋ ka ōmiya ku uwɔ wɛ ō lɛ ɛnɛɛnɛ uce ō ya éyi, ó géē lɔhi cɛɛ ku a gbɔɔ mla ō mafu uce ō ya nyā ɛmɛɛma. Ɔdaŋ ka ōmiya ku uwɔ wɛ ō lɛ ɛjɛɛji Ubáyíbu jé, a lɔfu ya ōmiya ku Ubáyíbu ō jé ligii ligii. Tomáš nɛ alɔ kɛla lɛyikwu ɔ gbɔbu a nya mla ōmiya ku nu ō lɛ ɛjɛɛji Ubáyíbu jé ipu ihayi. Ó kahinii: “N gáā le má ka ōmiya ku Ubáyíbu ō jé nɛ um ya a le nwune fiyɛ ɔfu. Ohigbu ɛnyā, n lɛ miya ō gbɔɔ kpɔ, amáŋ babanya n gē jé ɔ ɛmɛɛma ɛ̄cī doodu klla gē gbɛla tu ɔ lipu lipu. Ohigbu ɛnyā, n gbɔɔ ō jɔɔnyɛ Ubáyíbu ō jé ku um.” Ohigbu ka u Tomáš gbɔɔ ō jɔɔnyɛ Ubáyíbu ō jé ku nu a, ó dɔka ō gbɔɔ ō bi eko nwune le jé ɔ. Igbihaajɛ, ó gáā lɛ ɛjɛɛji Ubáyíbu jé mɛ. c
ƆTU KA Ó HII GBENYI GĀ UWƆ ƆDAŊ KA ODEE YƆ I CI UWƆ ŊMA Ō YA ŌMIYA KU UWƆ JILA Ŋ
14. Ɔdi wɛ aɔdā ōhī nōo lɔfu ya cɛɛ kóō lɔnɔ tu alɔ ō ya aɔdā nɛ alɔ miya a jila a?
14 Ó wɛ ɔdā okwiiye ku ɛgɛ duuma nɛ alɔ lɛ ɔtu caca amāŋ kwu iyi alɔ bi lɛ, odee lɔfu ci alɔ ŋma ō ya ɔdā nɛ alɔ miya a jila. Ocabɔ mafu, ‘ɔdā nɛ alɔ i leyice ŋ’ lɔfu je alɔ eko amāŋ ɛlá, nōo lɔfu ya ku alɔ lɛ eko nwune ō ya ɔdā nɛ alɔ miya a jila ŋ. (Ɔ̄cok. 9:11) Āhɔ̄ lɔfu lɔnɔ tu alɔ nɛhi nōo lɔfu cɛ lɛ ɔtu gbenyi lɛ alɔ, amāŋ ya ku alɔ i lɛ ɔfu nɛ alɔ cɛgbá ō ya ōmiya ku alɔ jila ŋ. (Aíit. 24:10) Ohigbu ka alɔ i jila iyē ŋ ma, alɔ lɔfu ya inyileyi nōo lɔfu ya kóō lɔnɔ tu alɔ fiyɛ ō ya ɔdā nɛ alɔ miya a jila. (Uróm 7:23) Amāŋ ɛ̄jɛ̄ lɔfu jɛ alɔ. (Umát. 26:43) Ɔdi lɔfu ta alɔ abɔ ku alɔ lɛ ōmiya ku alɔ ya jila ɔdaŋ ka ó lɛ odee nōo yɔ i ci alɔ a?
15. Ɔdaŋ ka odee lɛ alɔ ci ŋma ō ya ɔdā nɛ alɔ miya a, ɛnyā wɛ ku alɔ i cika ō ceyitikwu ō ya ɔ jila gɛ ŋ? Lɛ ɔ teyi peee. (Aíjē Kú Ɛ̄gbā 145:14)
15 Bla ka ɔdaŋ ka odee lɛ uwɔ ci ŋma ō ya aɔdā nɛ a miya a, ɔɔma i wɛ ku á cika ō ceyitikwu ō ya ɔ jila ŋ nɛ ŋ. Ubáyíbu ka ka alɔ lɔfu má iyi alɔ ipu āhɔ̄ olɔnɔ. Amáŋ Ubáyíbu klla lɛ ɔ ta alɔ eyī peee ka alɔ lɔfu ceyitikwu ō ya ɔdā nɛ alɔ miya a jila kpɔ, ofiyɛ duu mla otabɔ ku Ujehofa. (Jé Aíjē Kú Ɛ̄gbā 145:14.) Ɔyinɛ alɔ Philip nɛ alɔ kɛla lɛyikwu ɔ gbɔbu a kahinii: “Ń gē lɛ ɔtu kwu eko nɛ ń ya ōmiya ku um jila a ŋ. Ikɔkɔ ɔɔma, n gē lɛ ɔtu ku um kwu eko nɛ um gbɔɔ ō ceyitikwu ō lɛ ōmiya ku um ya jila kpɔ a.” David nɛ alɔ kɛla lɛyikwu ɔ gbɔbu a kahinii: “N gē ceyitikwu ō leyi má ɔdā nōo ci um ŋma ō ya ɔdā nɛ um miya a jila a, ka ó wɛ ɛnɛɛnɛ ɛga gā um ō mafu lɛ Ujehofa ɛgɛ nɛ um yihɔtu ku nu lɛ a.” Ŋma lɛ ō ceyitikwu lɔfu lɔfu ō ya ōmiya ku alɔ jila ɔdaŋ nɛ āhɔ̄ a kóō le lɔnɔ, alɔ gē mafu lɛ Ujehofa ku alɔ dɔka ō ya ɔdā nōo he ɔ ɔtu a. Ɔtu gē he Ujehofa nɛhi eko duuma nɛ ó má ɛgɛ nɛ a yɔ i ceyitikwu lɔfu lɔfu ku a lɛ ɔdā nɛ a miya a ya jila a!
16. Ɔdi nɛ a lɔfu nwu ɔdaŋ ka odee lɛ uwa ci ŋma ō ya ɔdā nɛ a miya a jila a?
16 Nwu ɛlā ŋma ɔdā nōo ci uwɔ ō ya ōmiya ku uwɔ jila a. Gbɛla lɛyikwu ɔdā nōo ya a, cɛɛ ku a da iyi uwɔ ɔka kahinii: ‘Ɔdi nɛ um lɔfu ya cɛɛ ku ɔdā nōo ci um ŋma ō ya ōmiya ku um jila a kóō hii ya gɛ ŋ ma?’ (Aíit. 27:12) Amáŋ, ɔdaŋ nōó gē lɔnɔ tu uwɔ nɛhi ō ya ɔdā nɛ a miya a jila, ɔɔma lɔfu mafu ka ɔdā nɛ a miya a le fiyɛ uwɔ ɔfu. Ɔdaŋ ku a má ka ɛnyā wɛ āhɔ̄ ku uwɔ a, ayika leyi yɛ ōmiya ku uwɔ a kpɔ, o ya ɛɛ ku a má ɔdaŋ ka ó wɛ ōmiya nōo géē tɔɔtɛ gā uwɔ ō ya jila. d Ujehofa i gáā gbɛla ku a le ya bɔbi, ohigbu ka ɔdā nɛ a miya i tɔɔtɛ gā uwɔ ō ya jila ŋ.—2 Ukɔ́r. 8:12.
17. Ɔdiya nɛ alɔ i cika ō je aɔdā nɛ alɔ ya jila gbɔbu ɛ ma mlanyi ŋ ma?
17 A hii je ɔdā nɛ a ya jila gbɔbu ɛ ma mlanyi ŋ. Ubáyíbu ka ka “Ɔwɔicō gē yá ɔdā okpaakpa piyóó. Ó gáā mlanyī úklɔ́ nɛ̄ [a] yá lɛ ɔ́ ā ŋ́.” (Uhíb. 6:10) Ohigbu ɛnyā, á cika ō je ɔdā nɛ a ya a mlanyi ŋ duu. Gbɛla lɛyikwu ōmiya nɛ a ya jila ɛ ma. Ōmiya ku uwɔ a lɔfu wɛ ō ya ku a kwu piya ɔya ku Ujehofa, ō kɛla lɛyikwu ɔ lɛ ācɛ ɔhá, amāŋ ō gáā lɛ ubatisim ya. Ɛgɛ nɛ a ceyitikwu lɔfu lɔfu ō ya ɔdā nɛ a miya gbɔbu a jila a, a lɔfu ceyitikwu gɔbu cɛɛ ku á lɛ ɔdā nɛ a miya babanya a ya jila duu.—Ufíl. 3:16.
Leyitaajɛ cɛɛ ku a má ɔwɛ ɛyɛɛyɛyi nɛ Ujehofa yɔ i ta uwɔ abɔ, abɔ a yɔ i ceyitikwu ō ya ɔdā nɛ a miya a jila a (Má ogwotu ɔmɛ 18)
18. Ɔdi nɛ alɔ cika ō bla ō ya abɔ alɔ yɔ i ceyitikwu ō ya ɔdā nɛ alɔ miya a jila a? (Má ifoto a.)
18 Ɛgɛ nɛ ɔcɛ o pɛ ɔkɔ gē yɛ faajɛ ɛga nɛ ó gē nyɔ mla eeye a, mla otabɔ ku Ujehofa a lɔfu ya ɔdā nɛ a miya a jila mla eeye. Amáŋ bla, ka ācɛ nōo gē pɛ ɔkɔ a gē jɔɔnyɛ iyawu ku uwa duu. Ɔwɛ ekponu ɔɔma, leyitaajɛ eko doodu ku a má ɛgɛ nɛ Ujehofa yɔ i ta uwɔ abɔ a, ɛnyā ka é géē ta uwɔ abɔ cɛɛ ku a lɛ eeye abɔ yɔ i ceyitikwu ō ya ɔdā nɛ a miya a jila a. (2 Ukɔ́r. 4:7) Ɔdaŋ ku á cɛ lɛ abɔ hɛ uwɔ iyē ŋ, a géē miyɛ ɔhā nɛhi ŋma ɛgiyi Ujehofa.—Ugal. 6:9.
IJÉ ƆMƐ 126 Leyī Kwɛcɛ, Hayi Lɔfu, Lɛ Ɔfu Tiiye
a Ɔwa ku Ujehofa gē ta alɔ ɔtu kwu ɔtu igbalɛwa, ō gbɛla lɛyikwu ɔwɛ ɛyɛɛyɛyi nɛ alɔ lɔfu ya lɔhi fiyɛ ipu ɛ̄gbā ō gba ku alɔ lɛ Ujehofa. Amáŋ ɔdi nɛ alɔ lɔfu ya ɔdaŋ ku alɔ ceyitikwu ō ya lɔhi fiyɛ ɔwɛ ōhī, amáŋ ó tɔɔtɛ lɛ alɔ ō ya lɛ a ŋ ma? Ikpɛyi ɛlā oklɔcɛ nyā géē da alɔ ɔdā nɛ alɔ lɔfu ya, o ya ɛɛ ku alɔ lɛ ōmiya ku alɔ ya jila a.
b ƐLĀ Ō JE TEYI PEEE: Ō ya ōmiya ipu ɛ̄gba ō gba ku Ujehofa lɔfu lɛ ō ya mla ɔdā duuma nɛ a yɔ i ceyitikwu ō ya lɔhi fiyɛ ipu nu, amāŋ ō ya jila o ya ɛɛ ku a gba Ujehofa ɛ̄gbā lɔɔlɔhi fiyɛ mla ō ya ku ɔtu kóō he ɔ. Ocabɔ mafu, a lɔfu ya ōmiya ō lɛ ɛnɛɛnɛ uce ō ya ku Ācɛ O Yɛce Ukraist, amāŋ ō ya lɔhi fiyɛ ipu odee nɛ a gē ya ō gba Ujehofa ɛ̄gbā bɛɛka Ubáyíbu ō jé eko doodu, oklɔcɛ ku abɔyi uwɔ, amāŋ ō yuklɔ ku ɔna ō ta.
c Má ɔkpá nyā nōo kahinii: Benefit From Theocratic Ministry School Education, pp. 10-11, ogwotu ɔmɛ 4.
d O ya ɛɛ ku a nwu ɛlā fiyɛ, má ikpɛyi ɛlā nyā nōo kahinii: “Cultivate Reasonable Expectations, and Be Joyful” nōo yɔ ipu Ɔda Ō Gbaajɛ ku Ɔya Ɔmahaapa 15, 2008 aku oyibo a.
