Ubáyíbu i da alɔ ɔdā nōo ya piii a ŋ. Amáŋ ó kɛla lɛyikwu aɔdā ocɛgbá ōhī nōo ya néē lɔfu miya ō cigbihi gā Unasareti eko ɔɔma ŋ ma.

Alelekwu otɛhɔ éyi wa gáā da Umeri ka ó géē yɔ ipu klla géē ma ɔyi. Eko nɛ alelekwu a otɛhɔ gáā cɛhɔ nyā a, Umeri mla Ujosɛfu lā Unasareti nōo wɛ igeli éyi ipu Ugalili a. (Ulúk. 1:26-31; 2:4) Igbihaajɛ, eko néē le piyɛyi ŋma Ijipiti a, é le cigbihi gā Unasareti. Abɔɔ nɛ Ujisɔsi jɛ néē klla gbɔɔ ō hi ɔ ka ɔcɛ Unasareti a. (Umát. 2:19-23) Ɔɔma ya ɛɛ nɛ ɛlá ku alɔ gē gā Unasareti eko duuma nɛ alɔ lɛ iye ku Ujisɔsi, Ujosɛfu, mla Umeri hi a.

Umeri lɛ ɔmaapu éyi néē hi ka u Ɛlizabeti nōo lā Ujudiya a. Ɛlizabeti wɛ ɔnyā ku ɔcogwɛɛya éyi néē hi ka u Usɛkariya a, anu klla wɛ ɛ́nɛ́ ku Ujɔni o ya Ubatisim a. (Ulúk. 1:5, 9, 13, 36) Umeri nyɔ gáā má Ɛlizabeti klla yɔ mla anu ɔya ɛta ipu Ujudiya. Anu Umeri kwu cigbihi gā Unasareti a. (Ulúk. 1:39, 40, 56) Ɔdā nōo ya ɛɛ nɛ Umeri jé abɔɔ a yɔ a.

Igbihaajɛ Ujosɛfu nyɛɛ ŋma Unasareti gā Ubɛtlɛhɛm ohigbu ka ācɛ Urom dɔka ku ɔnyɔɔnyɛ kéē nyɔ gáā ta “iyē uwā tāajɛ” ipu “igelī nɛ̄ŋ́cɛ́ kú [uwa].” Ubɛtlɛhɛm klla wɛ ɛga néē gáā ma Umesayiya ɛgɛ nɛ akacɛ ka taajɛ a. (Ulúk. 2:3, 4; 1 Usám. 17:15; 20:6; Umáy. 5:2) Igbihi nɛ Umeri lɛ Ujisɔsi ma abɔɔ a, Ujosɛfu i cɛ kóō bi ɔyi néē ma ɛpɛpɛ a gā iyawu oligbo ɔɔma gā Unasareti ŋ. É yɔ Ubɛtlɛhɛm, nōo ligbo ku nu lɛbɛɛka ukilomita ahaanɛ (umilu 6) ŋma Ujerusalɛm a. Ɛnyā géē tɔɔtɛ lɛ uwa ō bi ɔyi uwa gā agbliihɔ nɛhi a gáā gwɛɛya ɛgɛ nɛ Íne a cɛgbá a.—Ulīf. 12:2, 6-8; Ulúk. 2:22-24.

Alelekwu otɛhɔ ku Ɔwɔico a da Umeri taajɛ gbɔbu ka ɔyi nɛ ó gáā ma a géē “cɔcɛ́ ɛ́gɛ́nɛ̄ ádáádā nū, Udéfīdi lé ā.” Ó klla géē “cɔcɛ́ í gbō ācɛ kú Ísrɛ̄lu piyóó.” Á jé ŋ, Ujosɛfu mla Umeri lɔfu gbɛla ka ó géē wɛ ɔdā ocɛgbá nɛhi ka é lɛ Ujisɔsi ma ipu igeli nɛ Udefidi ŋma a. (Ulúk. 1:32, 33; 2:11, 17) É klla lɔfu gbɛla duu ka ó géē wɛ ɔdā ijeeyi nɛhi ō yɔ abɔɔ jaa gbeeko néē lɛ ɔdā ɔhá nɛ Ɔwɔico dɔka kéē ya a jé.

Alɔ i jé eko néē yɔ Ubɛtlɛhɛm gáā kwu gbɔbu ɛɛ nɛ acojeeyi a wa a ŋ. Amáŋ ɛpleeko ɔɔma, apɔlɛ a lɛ ɔlɛ lɛ gáā yɔ anu ɛ, ɔyi a kē gbɔɔ ō ‘jɛ’ duu ɛ, ó wɛ ɔyipɛ obene gɛ ŋ. (Umát. 2:11) Ó lɛbɛɛka ikɔkɔ néē géē cigbihi gā Unasareti boobu a, é dēē yɔ Ubɛtlɛhɛm eko kpii, é kóō lɔfu kwu Ubɛtlɛhɛm u piya ɔlɛ uwa ɛ.

Uherɔdu lɛ ɔ́da je kéē lɛ ‘ayípɛ̄nɛ́ŋ́cɛ́ nɔ̄nyīlɔ dóódu nēe wɛ iháyí ɛpa wāajɛ nēe bá igelī nēé hī ka Ubɛtlɛhɛm’ a kpo ŋmo. (Umát. 2:16) Abɔ alelekwu otɛhɔ lɛ Ujosɛfu ahɔ̄ pi ohigbu ɛnyā a, ó kwu Umeri mɛmla Ujisɔsi u le kwu gā Ijipiti jaa gbeeko nɛ Uherɔdu gekwu. Igbihaajɛ, Ujosɛfu kwu apɔlɛ ku nu u le yɛ gā Unasareti. Ɔdiya néē cigbihi gā Ubɛtlɛhɛm ŋ ma? Ohigbu ka eko ɔɔma ɔyi ku Uherɔdu éyi néē hi ka Akelɔsi a yɔ i lé ɔcɛ́ ipu Ujudiya, ó kē wɛ ɔcɛ o bɔbi ɔtu nɛhi. Alelekwu otɛhɔ a klla lɛ ukɔ́ tu Ujosɛfu lɛyikwu ō gā abɔɔ, ohigbu ɔɔma ó kwu apɔlɛ ku nu u kpo gā ajɛ ku Unasareti. Abɔɔ a wɛ ɛga nɛ ogbotu yɔ nɛ ó lɔfu bi Ujisɔsi jɛ a.—Umát. 2:19-22; 13:55; Ulúk. 2:39, 52.

Ó teyi peee ka Ujosɛfu gekwu gbɔbu ɛɛ nɛ Ujisɔsi kwū klla ya ɔ tɔɔtɛ lɛ ācɛ ɔhá ō gā ɔkpanco a. Ohigbu ɛnyā, é géē he Ujosɛfu eyi ŋma ɔlekwu wa ipu ɛcɛ nyā. Ó géē tɔɔtɛ lɛ ācɛ alɛwa ō má ɔ klla nwu ɛlā alɛwa ŋma ɛgiyi nu, ɔdā nōo ya ɛɛ nɛ anu mla Umeri gɔbu yɔ Ubɛtlɛhɛm igbihi néē lɛ Ujisɔsi ma a.