1-2. Bɛɛka Ulɔtu a, ɛdɔ unwalu nyá nɛ Ācɛ O Yɛce Ukraist gē má icɛ a?

 EKO duuma nɛ alɔ gē má ɔwɛ obɔbi nɛ ācɛ yɔ i lā oyeeyi ku uwa icɛ a, ɔtu gē ya alɔ ɛgɛ nōó ya Ulɔtu a. “Ucē obɔ̄bí ká ācɛ Usɔ́dɔm ā tū Ulɔ́tu íwɔ́tū nɛ̄hi,” ohigbu ka ó jé ka uce obɔbi ō ya i wɛ ɔdā nōo he Adā alɔ nōo yɔ ɔkpanco a ɔtu ŋ. (2 Upít. 2:7, 8) Ohigbu ka Ulɔtu yihɔtu ku Ɔwɔico klla lɛ ojilima ce ɔ nɛɛnɛhi a, uce ō ya obɔbi ku ācɛ nōo lā yɛ jila ɔ ta a gē wu ɔ ɔtu nɛhi. Bɛɛka Ulɔtu a, ācɛ nōó gē lɛ ojilima ce ɔwɛ nɛ Ujehofa dɔka ku alɔ lā oyeeyi ku alɔ ŋ ma le yɛ jila alɔ ta. Naana kpɔ a, alɔ lɔfu lɛ iyi alɔ tu yeŋee ɔdaŋ ku alɔ lɛ abɔ bi ihɔtu olɔfu nɛ alɔ lɛ lɛ Ɔwɔico klla ya ku alɔ lɛ ufi ɔkwɛyi a lɛ ɔ.—Aíit. 14:2.

² Ujehofa kē ta alɔ abɔ ō ya ɛnyā oŋma lɛ ɔtu ō tu kwu ɔtu nɛ ó je lɛ alɔ nōo yɔ ipu ɔkpá ku Aíita a. Ɛjɛɛji Ācɛ O Yɛce Ukraist, acɛnyilɔ mla acɛnya, aɛdrɔ mla ācɛ nōo le hilokpilici ɛ, lɔfu lɛ itene ŋma lɛ ō leyi yɛ ukɔ́ ku ijeeyi nōo yɔ ipu ɛga ku Ubáyíbu ɔɔma a.

3. Ɛgɛ nɛ ɔkpá ku Aíita 17:3 ka a, ɔdi wɛ ɔdā éyi nōo ya nōó cɛgbá ku alɔ gbo ɔtu ku alɔ a? (Má ifoto a.)

³ Ɔdā okpɔcii éyi nōo ya nɛ alɔ cika ō gbo ɔtu ku alɔ a, wɛ ka Ujehofa gē jila ɔtu ku alɔ má. Ɛnyā wɛ ka ó gē má fiyɛ ɔdá nɛ ācɛ gē bi eyī ku uwa má a, ó jé ɛdɔ ɔcɛ nɛ alɔ wɛ ɔkwɔɔkwɛyi a. (Jé Aíita 17:3.) Ó géē yihɔtu alɔ ɔdaŋ ku alɔ gɔbu yɔ i gbɛla lɛyikwu aukɔ́ ku nu, nōo géē lɔfu ta alɔ abɔ ō lā oyeeyi opiyoo a. (Ujɔ́n. 4:14) Oŋma lɛ ō ya lɛ a, alɔ i gáā jɛga lɛ ɛlā ɛkɛmgbɛ ku Usetan mla ācɛ obɔbi nōo yɔ ipu ɛcɛ ku nu a kóō gā ipu ɔtu ku alɔ ŋ, alɔ i klla gáā yɛce uce obɔbi nɛ ācɛ obɔbi gē ya a ŋ. (1 Ujɔ́n. 5:18, 19) Ɔdaŋ ku alɔ tubla Ujehofa ajaajɛ, ihɔtu mla  ojilima nɛ alɔ lɛ lɛ ɔ a géē yɔ i nwune tōōtɔ̄ɔ̄. Ohigbu ku alɔ i gáā dɔka ō ya ɔdā nōo géē biya Adā alɔ ɔtu ŋ ma, ɛlá ō gbo ō nyɔ gáā ya ɔdobɔbi géē wu alɔ ɔtu. Eko duuma nɛ alɔ yɔ i má ojama ō nyɔ gáā ya ɔdobɔbi, alɔ géē da iyi alɔ ɔka kahinii: ‘Ɔdiya nɛ um géē kweyi gedee biya ɔcɛ nōo humayi mafu ihɔtu nɛhi gā um a ɔtu a?’—1 Ujɔ́n. 4:9, 10.

4. Ɛgɛnyá nɛ ufi ku Ujehofa ō ya gbo ɔyinɛ alɔ nɔnya éyi ŋma ō nyɔ gáā gbo aja a?

⁴ Ɔyinɛ alɔ nɔnya éyi nōo lé ka u Marta nōo ŋma éwo ku Croatia nōo má ojama ō nyɔ gáā gbo aja a kahinii: “Ó tɔɔtɛ gā um ō gbɛla lɔɔlɔhi mla ō ta ō nyɔ gáā ya ɔdobɔbi ŋ. Amáŋ ufi ku Ujehofa lɛ ogbotu je gā um.” b Ɛgɛnyá nɛ ufi ku Ujehofa ō ya ta ɔ abɔ a? Marta ka anuɔ gbɛla lipu lipu tu ɔdā obɔbi nōo géē bɛɛcɛ, ɔdaŋ ka ó nyɔ gáā lɛ aja gbo a. Alɔ lɔfu ya lɛ a duu. Ɔdobɔbi nōo fiyɛ duu a wɛ ka alɔ géē biya Ujehofa ɔtu, alɔ i klla gáā lɛ ɛga ō gba ɔ ɛ̄gbā piyoo ŋ.—Ohút. 6:5, 6.

5. Ɔdi nɛ a lɔfu nwu ŋma ɔ̄kā ku Leo a?

⁵ Ɔdaŋ ku alɔ gē yuufi Ujehofa, alɔ géē leyi kwɛɛcɛ lɔɔlɔhi ku alɔ hii wɛ ɔkpa ku ācɛ nōo gē ya ɔdobɔbi a ŋ. Ɛlā nɛ u Leo nōo lā ipu éwo ku Congo a nwu a yɔ abɔɔ a. Ihayi ɛnɛ igbihi nɛ ó lɛ ubatisim ya a, ó gbɔɔ ō piyatɔha mla aɔkpa obɔbi. Ó gbɛla ka abɔ ó wɛ anu piii yɔ i ya aɔdobɔbi ɔɔma ŋ ma, anuɔ i yɔ i biya íne ku Ujehofa ŋ. Amáŋ ó wɛ ɔdā ō kwiiye ka ó gboji ŋ, aɔkpa ku nu a lɛ ɔ pi tu ipu ejé ō gwa fiyɛ ɔfu mla ikpo ɔnyā ō ce. Igbihaajɛ ó gáā gbɔɔ ō gbɛla tu ɔdā nɛ ɛ́nɛ́ mla adā nu nōo wɛ Ācɛ O Yɛce Ukraist a nwu ɔ gbɔbu a, mla ɛdɔ eeye nɛ ó gē lɛ eko nɛ ó yɔ i gba Ujehofa ɛ̄gbā a. Ɔdi bɛɛcɛ ŋma anu a? Ó gáā gbɔɔ ō ya ɔdā okpaakpa kpɔ. Mla otabɔ nɛ anyakwɔcɛ ku ujɔ je lɛ ɔ a, ó gáā gbɔɔ ō gba Ujehofa ɛ̄gbā kpɔ. Icɛ ó wɛ  ɔnyakwɔcɛ ku ujɔ klla yɔ i yuklɔ ku ɔcɛ o gbɔbu ɔna ō ta ɛdɔ ɛyɛɛyi mla eeye.

6. Ocabɔ ku acɛnya ɛpa nyá nɛ alɔ gáā kɛla lɛyikwu ɔ babanya a?

⁶ Babanya alɔ leyi yɛ ɔkpá ku Aíita ɛyi 9, ɛga nɛ alɔ jé odee lɛyikwu acɛnya ɛpa a. Éyi ku uwa kwɛyi ijeeyi ɔkwɛyi, ɔhá a kē kwɛyi olila. c Abɔ alɔ yɔ i ya ɛnyā a, bi ipu ɔtu ka ɛcɛ ku Usetan nyā le mu mla aja ō gbo mla ikpo ɔnyā ō ce mɛmla ifoto ku ācɛ otɔhɛwa. (Āfi. 4:19) Ohigbu ɛnyā, ó cɛgbá nɛhi ku alɔ gɔbu yɔ i lɛ ufi okpaakpa a lɛ Ɔwɔico mla ō kwu ŋma ɔdobɔbi ō ya. (Aíit. 16:6) Ku ɛlā ɔkwɛyi a ba, ɔdaŋ ku alɔ wɛ acɛnyilɔ amāŋ acɛnya, ɛjɛɛji alɔ lɔfu lɛ itene ŋma ɛlā nɛ ɛga ku Ubáyíbu nyā gáā nwu alɔ a. Eyeeye ku acɛnya ɛpa néē kɛla lɛyikwu uwa a, yɔ i hi ācɛ nōo wɛ ogwuda amāŋ “aólíla” a igwú. Eyeeye ku uwa yɔ i ka kahinii: ‘Wa ɔlɛ um, cɛɛ ku a wā í lé ɔdōlé.’ (Aíit. 9:1, 5, 6, 13, 16, 17) Amáŋ ɔdā nōo ya da ācɛ nōo cigwu ku acɛnya ɛpa nyā a wɛ ɛyɛɛyɛyi.

7. Ɛgɛ nɛ ɔkpá ku Aíita 9:13-18 ka a, ɔdi ya da ācɛ nōo cigwu ku ɔnyā nōo kwɛyi olila a? (Má ifoto a.)

⁷ Leyi yɛ igwú nɛ ‘ɔnyā olila’ a yɔ i hi a. (Jé Aíita 9:13-18.) Ó ya uweyi ŋ yɔ i hi ācɛ nōo wɛ aolila a igwú kéē wa i lé ɔdole tɔha mla ɔ ɔlɛ nu. Ɔdi ya da uwa a? “Ācɛ dóódu nēe cīigwú kú nū ā, í jé ka ikwū ō ŋmó ɔ̄cɛ, ɔ́ɔ yɔ̄ ɔlɛ́ nū ŋ́.” Alɔ lɔfu blakwu ɛlā ekponu ɔɔma néē ka o gbɔɔ ŋmaajɛ ku ɔkpá ku Aíita a. Ubáyíbu pi alɔ ahɔ̄ lɛyikwu “ɔnyā ōgbajā” ɔɔma. Ubáyíbu da alɔ kahinii: “Ɔ́dāŋ ka a le tá ɔlɛ́ nū, ɛ́mba ɔwɛ nōo yɛ ga ɔlékwū nāa yɔ̄ ī yɛ abɔ́ɔ á.” (Aíit. 2:11-19) Ɔkpá ku Aíita 5:3-10 klla pi alɔ ahɔ̄ lɛyikwu “ɔnyā ōgbajā” ɔhá, ka “ɔ́daŋ ka a cɛ̄ɛ̄lā kú nū, ó géē bī uwɔ ga ɔlékwū.”

8. Ōmiya nyá nɛ alɔ géē cɛgbá ō ya piii a?

⁸ Ācɛ doodu nōo yɔ i po igwú nɛ ɔnyā olila a yɔ i hi a, géē miya piii ɔdaŋ ka é géē cigwu a amāŋ ta. Alɔ lɔfu lɛ ɛdɔ ōmiya ekponu ɔɔma duu. Ɔdi nɛ alɔ gáā ya ɔdaŋ ka ɔcɛ éyi yɔ i kwu alɔ ō nyɔ gáā ya uce ku aja ō gbo amāŋ ikpo ɔnyā ō ce, amāŋ eko nɛ alɔ lɛ ifoto ku ācɛ otɔhɛwa má acigili a?

9-10. Ɔdi wɛ ɔdā ōhī nōo ya nɛ alɔ cika ō kwu ŋma uce ku aja ō gbo amāŋ ikpo ɔnyā ō ce a?

⁹ Ó lɛ ɔdā olɔhi alɛwa nōo ya nɛ alɔ cika ō kwu ŋma uce ku ikpo ɔnyā ō ce mla aja ō gbo. Ɔnyā olila néē kɛla lɛyikwu ɔ a yɔ i ka kahinii: “Éŋkpɔ̄ ō gwá nēé hɛ́ uwī ā lɔnyɛ fíyɛ́ á.” Ɔdi nɛ “éŋkpɔ̄ ō gwá nēé hɛ́ uwī ā” wɛ a? Ubáyíbu lɛ ō gwuta ku ɔba mla ɔnyā gbla eŋkpɔ nɛ ɔcɛ gē gwa nōo gē gbo ɔtu nɛɛ a. (Aíit. 5:15-18) Ɔcɛnya  mla ɔcɛnyilɔ nōo lɛ iyi uwa lɛ ɛ, lɛ íkwu ō gwuta mla iyi uwa. Amáŋ ɛnyā wɛ ɛyɛɛyi kpanaa gwu “éŋkpɔ̄ ō gwá nēé hɛ́ uwī ā” ta. Ɛnyā lɔfu yɔ i kɛla lɛyikwu ikpo ɔnyā ō ce amāŋ aja ō gbo. Ācɛ nōo gē gbo aja amāŋ ce ikpo ɔnyā a gē ceyitikwu ō ya ɔ tayinu, ɛgɛ nɛ uwi gē je odee uwi tayinu nɛ ācɛ ɔhá i gē jé ŋ ma. “Éŋkpɔ̄ ō gwá nēé hɛ́ uwī” nyā gē lɛbɛɛka ó lɔnyɛ a, ɔdaŋ ka ācɛ nōo lɛ abɔ ipu uce ō ya nōó kpaakpa ŋ ma gbɛla ka ɔcɛ duuma i gáā jé lɛyikwu ɔ ŋ. É yɔ i ya iyi uwa olila, ohigbu ka Ujehofa gē má ɛjɛɛji ɔdā doodu. Ɔdaŋ ka alɔ i teyi olɔhi ku Ujehofa ŋ, ɔdā duuma i bɔbi bɛɛka ɔɔma gɛ ŋ. Ɔɔma i kē wɛ ɔdā ‘olɔnyɛ’ ŋ. (1 Ukɔ́r. 6:9, 10) Amáŋ ó lɛ ɔdā alɛwa ɔhá nōo lɔfu ya alɔ.

¹⁰ Aja ō gbo amāŋ ikpo ɔnyā ō ce lɔfu ya ku uweyi kóō kwu uwɔ, ó lɔfu ya uwɔ bɛɛka tiile ŋ, a lɔfu yɔ ipu eko nɛ á leyice ŋ, ó klla lɔfu je apɔlɛ kɔ. Ó teyi peee, ka ó géē wɛ ɔdā ijeeyi ō ta igwú nɛ ɔnyā olila a yɔ i hi a. Batɔ ɛma ku uwa mla Ujehofa nōo géē hɛ uwa abɔ a, ācɛ alɛwa nōo gē gbo aja amāŋ ce ikpo ɔnyā a gē kpo ōcē obɔbi nōo lɔfu je uwa ŋmo fiyaa. (Aíit. 7:23, 26) Ɔgba 18 ku ɛyi 9 lɛ ɛlā ŋmɛyi ɔwɛ ɛgɛnyā kahinii: “O bēhé okómpīinu ga ɔlɛ́ nū ā, mla o bēhé ga ɔlékwū wɛ ɔdā ékpónú.” Ó lɛ a, ɔdiya nɛ ācɛ alɛwa gē cigwu ku nu nōo gē bi uwa gā ipu unwalu a?—Aíit. 9:13-18.

11. Ɔdiya nōo má ifoto ku ācɛ otɔhɛwa bɔbi nɛhi a?

¹¹ Ɔdā éyi nōo gē ja ācɛ ma ō cigwu ku nu a wɛ ukpa ku ifoto ku ācɛ otɔhɛwa ō má. Ācɛ ōhī gē gbɛla ka ō má ifoto ku ācɛ otɔhɛwa i wɛ ɔdobɔbi ŋ. Ku ɛlā ɔkwɛyi a, ō má ifoto ku ācɛ otɔhɛwa i lɔhi ŋ duudu. Ó gē ya ku ɔcɛ kóō lɛ ojilima ipeyi ku iyi nu mla aku ācɛ ɔhá ŋ, ó klla lɔfu lɔnɔ nɛhi ō lɛ abɔ ci ifoto ku ācɛ otɔhɛwa ō má. Ɔdaŋ ka ɔcɛ lɛ ifoto ku ācɛ otɔhɛwa má, ó gē tɔɔtɛ ō je ɔ mlanyi fiyaa ŋ. Ifoto ku ācɛ otɔhɛwa ō má i gē ta ɔcɛ abɔ kóō fu unwu obɔbi ŋma ɔtu ku nu ŋ, ikɔkɔ ɔɔma ó gē ya ku unwu obɔbi ɔɔma kóō lɔfu tōōtɔ̄ɔ̄. (Ukól. 3:5; Ujɛ́m. 1:14, 15) Ku ɛlā ɔkwɛyi a, ō má ifoto ku ācɛ otɔhɛwa kwu ācɛ alɛwa kéē nyɔ i lɛ aja gbo amāŋ lɛ ikpo ɔnyā ce ɛ.

12. Ɛgɛnyá nɛ alɔ gáā mafu ku alɔ yɔ i ceyitikwu ō kwu ŋma ō má ifoto nōo gē cɛ lɛ ɛlá ku aja ō gbo amāŋ ikpo ɔnyā ō ce kóō wa ipu ɔtu ku alɔ a?

¹² Abɔ alɔ wɛ Ācɛ O Yɛce Ukraist a, ɔdi nɛ alɔ cika ō ya eko duuma nɛ alɔ lɛ ifoto ku ācɛ otɔhɛwa má acigili a? Alɔ kwu eyī ku alɔ u ŋma anu boobu. Ō ya ɔɔma géē tɔɔtɛ lɛ alɔ fiyɛ ɔdaŋ ku alɔ bla ka ɔdā ocɛgbá fiyɛ duu nɛ alɔ lɛ a, wɛ ɛma ku alɔ mla Ujehofa. Aifoto ōhī nōó kóō wɛ ifoto ku ācɛ otɔhɛwa piii ŋ ma, lɔfu ya ku ɛlá ku aja ō gbo amāŋ ikpo ɔnyā ō ce kóō wa ipu ɔtu ku alɔ. Ɔdiya nɛ alɔ cika ō ta ō má uwa a? Ohigbu ka alɔ i dɔka ō ya ɔdā duuma nōo géē cɛ lɛ alɔ lɛ ɛlá ku aja ō gbo amāŋ ikpo ɔnyā ō ce ŋ. (Umát. 5:28, 29) Ɔnyakwɔcɛ ku ujɔ éyi nōo lé ka u David nōo ŋma u Thailand a kahinii: “N gē da iyi um ɔka kahinii: ‘Ɔdaŋ nɛ ifoto a i kóō wɛ ifoto ku ācɛ otɔhɛwa ŋ naana, ɔtu géē he Ujehofa ɔdaŋ ka um gɔbu yɔ i má ɔ?’ Ɛdɔ ɛlá ō gbo ɛgɛnyā gē ta um abɔ ya ɛlā ɔwɛ ku ijeeyi.”

13. Ɔdi gē ta alɔ abɔ ō ya ɛlā ɔwɛ ku ijeeyi a?

¹³ Ō yuufi ō ya ɔdā duuma nōo géē cɛ lɛ Ujehofa cɔnu, géē ta alɔ abɔ ō ya ɛlā ɔwɛ ku ijeeyi. “Ɔ̄cɛ dúúmā nōo gē lɛ ojīlīmā ce Óndú ā klla gē lɛyítáajɛ lɛ ɔ́ ā, gbɔɔ́ ō jéeyī ɛɛ́.” (Aíit. 9:10) Alɔ má ɛlā nyā o gbɔɔ ŋmaajɛ ku ɔkpá ku Aíita ɛyi 9, ɛga néē lɛ ijeeyi ɔkwɛyi a gbla ɔnyā ɔhá a.

14. Igwú ō hi ɛyɛɛyi nyá nɛ alɔ jé odee lɛyikwu ɔ ipu ɔkpá ku Aíita 9:1-6 a?

¹⁴ Jé Aíita 9:1-6. Ipu aɔgba nyā, alɔ jé odee lɛyikwu igwú ō hi nōo ŋma ɛgiyi Ujehofa nōo ya alɔ, nɛ ɛjɛɛji ijeeyi ŋma ɛgiyi nu a. (Aíit. 2:6; Uróm 16:27) Ipu āhɔ̄ nyā, alɔ jé odee lɛyikwu  ɔlɛ nɛhi éyi nɛ akanaba ahaapa bi ɔ hayi a. Ɛnyā mafu ka Ujehofa gē nwula abɔ nɛhi, ó klla gē ya ɛjɛɛji ācɛ nōo dɔka ō nwu ɛlā ŋma ɛgiyi nu o ya ɛɛ kéē jijeeyi a omaaba.

15. Ɔdi nɛ Ɔwɔico yɔ i hi alɔ igwú ō ya a?

¹⁵ Ujehofa wɛ ɔcɛ nōo gē nwula abɔ nɛhi klla gē je aɔdā nɛ alɔ cɛgbá a lɛ alɔ caba caba. Ocabɔ ku ɔnyā nōo kwɛyi ijeeyi ɔkwɛyi nōo yɔ ɔkpá ku Aíita ɛyi 9 a kē ma ɛnyā fu peee. Ɛga ku Ubáyíbu nyā da alɔ ka ɔnyā a lɛ ācɛ higwú wa ɔlɛ nu kéē wa i lé ɔdole olɔɔnyɛ mla ɛbɛ́ mɛmla ejé nɛ ó tutu a. (Aíit. 9:2) Ɔgba 4 mla 5 klla da alɔ kpɔ kahinii: “[Ɔnyā nōo kwɛyi ijeeyi ɔkwɛyi a] da aólíla ā kahíníī, ‘wā í lé ɔdōlé kú um.’” Ɔdiya nɛ alɔ cika ō cigwu nɛ ɔnyā nyā yɔ i hi alɔ a? Ujehofa dɔka ku ayipɛ ɔlɛ nu kéē jijeeyi klla lɛ ogbotu. Ó dɔka ku alɔ ya inyileyi duuma nōo géē bi alɔ gā ipu unwalu ŋ. Ɔɔma ya ɛɛ nɛ ó “lɛ íjééyī nōo ī tá ɔ̄cɛ abɔ̄ ā kpó tū lɛ ācɛ okpaakpa ā.” (Aíit. 2:7) Ɔdaŋ ka alɔ lɛ ufi okpaapa a lɛ Ujehofa, alɔ géē dɔka ō ya ɔdā nōo he ɔ ɔtu a. Alɔ gē jahɔ tu ukɔ́ ijeeyi ku nu, klla gē gweeye ō bi ɔ le yuklɔ.—Ujɛ́m. 1:25.

16. Ɛgɛnyá nɛ ufi ku Ɔwɔico ō ya ta Alain abɔ kóō ya ōmiya olɔhi a, ɔdi kē bɛɛcɛ ŋma anu a?

¹⁶ Leyi yɛ ɛgɛ nɛ ufi ku Ɔwɔico ō ya ta Alain abɔ kóō ya ōmiya olɔhi a. Alain wɛ ɔnyakwɔcɛ ku ujɔ mla ɔcɛ o nwu ɔkpá ipu inɔnkpa. Ó kahiniii: “Ācɛ alɛwa nɛ um gē yuklɔ tɔha mla uwa a gē leyi má ifoto ku ācɛ otɔhɛwa ka ɔwɛ ō bi le nwu iyi uwa ɛlā.” Amáŋ Alain jé ka ɛlā nyā i wɛ ɔkwɛyi ŋ. Ó kahinii: “Ohigbu ka um yihɔtu ku Ujehofa klla gē lɛ ojilima ce ɔ a, n ta ō má aufilm ɛgɔɔma. N klla lɛ ɔdā nōo ya nɛ um ta ō má ɛdɔ aufilm ɛgɔɔma a ta ācɛ nɛ um gē yuklɔ tɔha mla uwa a eyī peee.” Ó lɛ aafu ŋ, ó yɔ i bi ukɔ́ nɛ ɔnyā nōo kwɛyi ijeeyi a tu a le yuklɔ ō “yɛce ɔwɛ kú ɔdōōjé.” (Aíit. 9:6) Ɛlā nyā lɛ abɔ kwu alɛwa ku aitica a ɔtu nɛhi, nōo ya kéē cɛ ō klɔcɛ ku Ubáyíbu mla ō gā ōjila ku ujɔ babanya.

17-18. Ɔhā nyá nɛ ācɛ nōo cigwu ku ɔnyā nōo kwɛyi ‘ijeeyi ɔkwɛyi’ a yɔ i jɔɔnyɛ nu a, ɔdi néē ka é yɔ i leyice ɛcɔbu a? (Má ifoto a.)

¹⁷ Ujehofa bi ocabɔ ku acɛnya ɛpa nyā le mafu lɛ alɔ ɛgɛ nɛ alɔ lɔfu lɛ eeye ɛcɔbu a. Ācɛ nōo cigwu ku ɔnyā nōo kwɛyi ‘olila’ a, gē ceyitikwu kéē jɔɔnyɛ auce obɔbi ō ya bɛɛka aja ō gbo amāŋ ikpo ɔnya ō ce. Amáŋ é jé ka ɔdā néē yɔ i ya babanya a géē lɛ abɔ kwu uwa ɛcɔbu ŋ. Ɔdā néē yɔ i ya a géē ŋmɛyi tu ikwū.—Aíit. 9:13, 17, 18.

¹⁸ Amáŋ ācɛ nōo cigwu ku ɔnyā nōo kwɛyi ‘ijeeyi ɔkwɛyi’ a, géē lɛ ɛcɔbu nōo wɛ ɛyɛɛyi. É yɔ i gweeye babanya, ohigbu ka é lɛ ɛjɛɛji ɔdā néē cɛgbá o ya ɛɛ kéē yɔ kwu Ujehofa ajaajɛ a.  (Ayis. 65:13) O bu ipu Ayisaya nōo wɛ ɔcomɛɛbɛ a, Ujehofa kahinii: “Aá jāhɔ̄ gā um lɔhi lɔhi kú aá yá ɔdā nɛ̄ n ka ā, cɛ́ɛ́ aá í lé aɔ́dōlé nōo lɔhi fíyɛ dúú ā.” (Ayis 55:1, 2) Alɔ yɔ i nwu ɛgɛ nɛ alɔ géē dɔka aɔdā nōo he Ujehofa ɔtu mla ō wɔtu aɔdā nɛ ó dɔka ŋ ma. (Aíjē 97:10) Alɔ klla gē gweeye ohigbu ku alɔ lɔfu hi ācɛ ɔhá igwú kéē wa i nwu ɛlā ŋma ‘ijeeyi ɔkwɛyi’ a. Alɔ lɛbɛɛka acocɛhɔ néē “tɛ̄hɔ̄ gāá hi ācɛ igwú [a]. É ba i ka kahinii: ‘Ɔ̄cɛ nōo wɛ ogwuda ā kóō wā.’” Itene nɛ alɔ mla ācɛ ɔhá nōo cigwu a gáā lɛ a i gáā lɛ oŋmɛyi ŋ. Itene nɛ alɔ mla ācɛ nōo cigwu nyā gáā lɛ a, géē yɔ babanya jaa gā ɛcɔbu. Ó géē ya ku alɔ “yēeyī” ogboogbo ɛcɛ, abɔ alɔ géē gɔbu yɔ i “yɛce ɔwɛ kú ɔdōōjé” a.”—Aíit. 9:3, 4, 6.

19. Ɛgɛ nɛ ɔkpá ku Ɔ̄cokóītá 12:13, 14 ka a, ɔdi nɛ alɔ cika ō lɛ ɔtu ku alɔ ya ekponu ō ya a? (Má ikpati nyā nōo kahinii: “ Ufi Ku Ɔwɔico Ō Ya Gē Tiile lɛ Alɔ.”)

¹⁹ Jé Ɔ̄cokóītá 12:13, 14. Ufi okpaakpa nɛ alɔ lɛ lɛ Ujehofa a géē gbo alɔ, klla géē ta alɔ abɔ ō yɔ kwu Ujehofa ajaajɛ ɛpleeko amoomɛ nōo bɔbi nɛhi nyā. Alɔ géē gɔbu yɔ i hi ācɛ alɛwa igwú kéē dɔka ‘ijeeyi ɔkwɛyi’ a klla nwu ɛlā ŋma anu ɛgɛ nōó tɔɔtɛ lɛ alɔ gla a, ohigbu ka alɔ yihɔtu ku Ujehofa klla lɛ ojilima ce ɔ ŋma ɛjɛɛji ɔtu ku alɔ.