1. Ɔdi nɛ alɔ cika ō ya o ya ɛɛ ku alɔ le wi ɛ̄cī ku Ondu a?

 EKO duuma nɛ Ubáyíbu kɛla lɛyikwu ‘ɛ̄cī ku Ondu a,’ ó yɔ i kɛla lɛyikwu ɛ̄cī nɛ Ujehofa ca aolɛla ku nu taajɛ klla je ohɛta lɛ ācɛ ɔlɛ nu a. Ɛpleeko ikee a, Ujehofa ca aéwo ōhī taajɛ ɛ. (Ayis. 13:1, 6; Isík. 13:5; Usɛf. 1:8) Ɛpleeko ku alɔ nyā, ‘ɛ̄cī ku Ondu’ a géē gbɔɔ eko nɛ aotrɛyi ku igɔmɛnti gáā gbɔɔ ō ca Ubabilɔn Nɛhi a taajɛ, nōo géē ŋmɛyi ipu ɛfú ku Amagɛdɔn a. O ya ɛɛ ku alɔ le wi “ɛci” ɔɔma, alɔ cika ō le tutu taajɛ babanya. Ku ɛlā ɔkwɛyi a, Ujisɔsi nwu alɔ ku alɔ cika yɔ i ya ‘otútū taajɛ’ lɛyikwu eko ku “ōwē nɛ̄hi” a, ɛnyā kē mafu ka ó wɛ ɔdā nɛ alɔ cika ō gɔbu yɔ i ya.—Umát. 24:21; Ulúk. 12:40.

2. Ɔdiya nɛ alɔ lɔfu lɛ itene ŋma ɔkpá ku 1 Ācɛ Utesaloníka a?

² Ipu ɔkpá aflɛyi nɛ ó ta gē lɛ Ācɛ Utesaloníka a, ɔyikpo Upɔlu bi ɔdā ō bi gbla ɛlā alɛwa le yuklɔ o ya ɛɛ kóō ta Ācɛ O Yɛce Ukraist nōo yɔ abɔɔ a abɔ, kéē lɛ otutu ya taajɛ gbeyi ɛ̄cī nɛ Ujehofa géē wa i kɛpɔ tu aolɛla ku nu a. Ɔyikpo Upɔlu jé ka ɛ̄cī ku Ondu a i gáā wa ɛpleeko ɔɔma piii ŋ. (2 Utes. 2:1-3) Naana kpɔ a, Upɔlu tu ayinɛ nōo yɔ abɔɔ a ukɔ́ kéē le tutu bɛɛka ɔdā nɛ ɛ̄cī a yɔ i wa oci a, alɔ kē cɛgbá ō bi ukɔ́ nɛ ó tu ayinɛ ɔɔma le yuklɔ duu. Alɔ leyi yɛ ɛgɛ nɛ ó je aɛlā nōo ba nyā teyi peee lɛ a: (1) ɛgɛnyá nɛ ɛ̄cī ku Ondu a gáā wa lɛ a? (2) anyɛ i gáā wi ɛ̄cī ɔɔma ŋ ma? mla (3) ɛgɛnyá nɛ alɔ gáā tutu taajɛ o ya ɛɛ ku alɔ le wi a?

3. Ɛgɛnyá nɛ ɛ̄cī ku Ondu a gáā wa bɛɛka uwi nōo wa ahaapa otu a? (Má ifoto a.)

³ “Ɛ́gɛ́nɛ̄ ɔ̄cowūwī gē wā eko nɛ̄ ɔ̄cɛ í yɔ̄ ī leyīce ŋ́ mā.” (1 Utes.  5:2) Ɛnyā wɛ ɛlā aflɛyi nɛ ɔyikpo Upɔlu bi le yuklɔ ō bi le gbla ɛgɛ nɛ ɛ̄cī ku Ondu a gáā wa lɛ a. Igbalɛwa, uwi gē wa acigili ahaapa otu eko nɛ ɔcɛ duuma i leyice ŋ. Ɛ̄cī ku Ondu a géē wa acigili duu eko nɛ ācɛ i leyice ŋ. Ó kóō lɔfu hɛ Ācɛ O Yɛce Ukraist ɔkwɛyi idaago duu ɛgɛ nɛ odee ya fiyaa fiyaa lɛ a. Amáŋ Ujehofa i gáā ca alɔ taajɛ bɛɛka ācɛ obɔbi a ŋ.

4. Ɔwɛ nyá nɛ ɛ̄cī ku Ondu a lɛbɛɛka ɔnɔ ku ɔma nōo i kwu ɔnyā a?

⁴ “Ɛ́gɛ́nɛ̄ ɔnɔ ɔ̄ma géē wā ɛgiyí ɔnyā nōo gáā ma ɔyí ā.” (1 Utes. 5:3) Ɔnyā nōo yɔ ipu i gáā lɔfu jé eko nɛ ɔma ku ɔyi ō ma a gáā kwu ɔ piii a ŋ. Amáŋ ó lɛ aafu ŋ, ó jé ka ɔma a géē kwu ɔ piii. Eko duuma nōó kē gbɔɔ ō ya ɔ, ó géē gbɔɔ acigili, géē lɔnɔ nɛhi, ɔdā duuma i klla gáā ci ɔ gla ŋ. Ɔwɛ ekponu ɔɔma, alɔ i jé ɛ̄cī amāŋ eko piii nɛ ɛ̄cī ku Ondu a gáā wa a ŋ. Naana a, alɔ jé kpɔcii ka ɛ̄cī nɛ Ondu a géē wa i kɛpɔ tu acobɔbiipu a géē wa acigili nɛ ɔcɛ duuma i gáā kwu gwu ɔ ta gla ŋ.

5. Ɔwɛ nyá nɛ eko ku owe nɛhi a lɛbɛɛka eyi ō nya a?

⁵ Bɛɛka eyi ō nya a. Ɛlā ō bi gbla ɛlā ɔmɛta nɛ ɔyikpo Upɔlu bi le yuklɔ a wɛ ocabɔ ku auwi nōo wa gáā wuwi ahaapa otu. Amáŋ babanya, Upɔlu yɔ i lɛ ɛ̄cī ku Ondu a gbla eyi ō nya. (1 Utes. 5:4) Ekoohi, ó lɛ aɔdā ɛyɛɛyɛyi nōo gē je auwi ɛlá néē gē bla ō jila eko ŋ. Ɛnyā lɔfu ya ku eyi kóō nya da uwa acigili, cɛɛ ɔdā néē yɔ i ya a gáā teyi peee. Ɔwɛ ekponu ɔɔma, eko ku owe nɛhi nōo yɔ i wa a géē je aɔdobɔbi nɛ ācɛ yɔ i ya bɛɛka acowuuwi ipu ajɛ odobu a teyi peee. Amáŋ alɔ i lɛbɛɛka uwa ŋ. Alɔ le tutu ō lɛ abɔ ci auce ō ya nōó he Ujehofa ɔtu ŋ, mla ō ya “ɛjɛ̄ɛ̄jī aɔ́dā nōo lɔhi, aɔ́dā nēe le kpaakpa mɛ́mla aɔ́dā nēe wɛ ɔkwɛ̄yi á.” (Āfi. 5:8-12) Upɔlu klla gɔbu bi ɛlā ō gbla ɛlā ɛpa nōo tɛɛma kwu ɛnyā a le yuklɔ, o ya ɛɛ kóō kɛla lɛyikwu ācɛ nōó gáā wi ŋ ma.

6. Ɔwɛ nyá nɛ alɔ lɔfu ka ka ācɛ alɛwa yɔ i gbiyɔla icɛ a? (1 Ācɛ Utesaloníka 5:6, 7)

⁶ ‘Ācɛ nōo yɔ i gbiyɔla a.’ (Jé 1 Ācɛ Utesaloníka 5:6, 7.) Upɔlu lɛ ācɛ nōó gáā wi ɛ̄cī ku Ondu a ŋ ma gbla ācɛ nōo yɔ i gbiyɔla. Ācɛ nōo yɔ i gbiyɔla i jé ɔdā duuma nōo yɔ i ya yɛ jila uwa ta amāŋ ɛgɛ nɛ eko yɔ i nyɔ lɛ a ŋ. Ohigbu ɛnyā, é gáā lɔfu jé eko nɛ ɔdā ocɛgbá duuma lɔfu ya klla ya ɔdā duuma lɛyikwu ɔ ŋ. Ācɛ alɛwa icɛ lɛbɛɛka ācɛ nōo yɔ i gbiyɔla a. (Uróm 11:8) É kpɔtuce aɔdā ocabɔ ɛyɛɛyɛyi nōo mafu ku alɔ lā “eko ámōōmɛ,” ka ó gboji ŋ eko ku owe nɛhi a géē gbɔɔ ŋ. Eko nɛ opiyabɔ nɛhi le ya ipu ɛcɛ nyā, ɛlā ku Ajɔɔcɛ Ku Ɔwɔico nɛ alɔ gē bi le tɔɔna a géē gbɔɔ he ōhī ku uwa ɔtu. Naana kpɔ a, alɛwa ku uwa géē je cigbihi gā iyɔla ō gbo ikɔkɔ ō leyi kwɛɛcɛ. Ācɛ ōhī nōo kóō kpɔtuce ka ɛ̄cī ɛpɔ ku Ondu a yɔ i wa a gē gbɛla ka ó ligbo kpɔ ɛ. (2 Upít. 3:3, 4) Amáŋ ɛ̄cī doodu ó cɛgbá nɛhi ku alɔ leyi kwɛɛcɛ.

7. Ɛgɛnyá nɛ ācɛ nɛ Ɔwɔico gáā je yiifi a lɛbɛɛka ācɛ nɛ ejé lɛ uwa kwu a?

⁷ ‘Ācɛ nɛ ejé lɛ uwa kwu.’ Ɔyikpo Upɔlu lɛ ācɛ ɔhá nɛ Ɔwɔico gáā je yiifi a gbla ācɛ nɛ ejé lɛ uwa kwu. Ó gē tɔɔtɛ fiyaa lɛ ācɛ nɛ ejé lɛ uwa kwu a ō ya odee lɛyikwu ɔdā nōo gē ya yɛ jila uwa ta a ŋ, ɛnyā gē ya kéē ya ōmiya olɔhi ŋ. Ɔwɛ ekponu ɔɔma, acobɔbiiipu a i gē yɛce ukɔ́ nɛ Ɔwɔico gē tu uwa a ŋ. É fu ɔwɛ ō lā oyeeyi nōo géē bi uwa gā ifi. Amáŋ é pi Ācɛ O Yɛce Ukraist ahɔ̄ kéē leyi kwɛɛcɛ lɔɔlɔhi klla gbeyigɔɔ. (1 Utes. 5:6) Ɔcɛ oklɔcɛ ku Ubáyíbu nɛɛnɛhi éyi ka “ka ɔcɛ o gbeyigɔɔ gē tu ɔtu waajɛ, ó klla gē lɛ ɔtooplico iciici ŋ. Ó gē gbɛla lɔɔlɔhi o ya ɛɛ kóō lɔfu ya ōmiya olɔhi a.” Ɔdiya nɛ alɔ cika ō tu ɔtu waajɛ klla gbeyigɔɔ a? O ya ɛɛ ku alɔ lɛ abɔ ipu ɛlā imeli amāŋ ɔwɛ ō ya odee ku ɛcɛ nyā ŋ. Aɔdā nōo lɔfu kwu alɔ ō nyɔ gáā lɛ abɔ ipu aɔdā néē ba nyā, géē yɔ i nwune tōōtɔ̄ɔ̄ abɔ ɛ̄cī ku Ondu a yɔ i ba ajaajɛ a. Amáŋ, alɔ i gáā cɛgbá ō junwalu lɛ iyi alɔ lɛyikwu ɛgɛ nɛ alɔ géē ya lɛ ipu āhɔ̄ ɔɔma ŋ. Alelekwu ihɔ ku Ɔwɔico lɔfu ta alɔ abɔ ō ta ɔtu waajɛ klla gbeyigɔɔ, o ya ɛɛ ku alɔ ya ōmiya olɔhi.—Ulúk. 12:11, 12.

8. Ɛgɛnyá nɛ ɔkpá ku 1 Ācɛ Utesaloníka 5:8 mafu auce ō ya nōo géē ta alɔ abɔ ō leyi kwɛɛcɛ klla gbeyigɔɔ a? (Má ifoto a.)

⁸ ‘Kwu oje ō le klá ɔtū kpɛ́fú mɛmla ɔkpú ō je klá ɛyí a u kwɛyi.’ Upɔlu lɛ alɔ gbla aicɔɔja nōo lɛ ili ɛfú ō kpo wiiye klla le tutu ō kpo ɛfú eko doodu. (Jé 1 Ācɛ Utesaloníka 5:8.) Ācɛ leyice ku aicɔɔja géē le tutu ɛfú ō kpo eko doodu nɛ ɛfú yɔ. Ɛgɔɔma nōó lɛ lɛ alɔ duu a. Alɔ le tutu yɔ i gbeyi ɛ̄cī ku Ondu a ŋma lɛ ō lɛ oje ō le kla ɔtu nōo kwɛyi ɔtu okpoce mla ihɔtu a kla ɔtu, mla ō lɛ ɔkpu ō kla ɛyi nōo kwɛyi eyiyoce a kla ɛyi. Auce ō ya nōo ba nyā gée ta alɔ abɔ nɛɛnɛhi.

9. Ɛgɛnyá nɛ ɔtu okpoce ku alɔ gē gbo alɔ a?

⁹ Oje ō le kla ɔtu gē gbo ɔtu ku icɔɔja. Ɛgɔɔma nɛ ɔtu okpoce mla ihɔtu gē gbo ɔtu ku alɔ duu a. Ó gē ta alɔ abɔ ō gɔbu yɔ i gba Ɔwɔico ɛ̄gbā mla ō yɔ i yɛce Ujisɔsi. Ɔtu okpoce gē cɛ lɛ alɔ jé kpɔcii ka Ujehofa géē hɔha ce alɔ, abɔ alɔ yɔ i lɛyitaajɛ lɛ ɔ mla ɛjɛɛji ɔtu ku alɔ a. (Uhíb. 11:6) Ó klla géē lɛ abɔ kwu alɔ ɔtu ō gɔbu yɔ i lɛyitaajɛ Iɛ Otrɛyi ku alɔ nōo wɛ Ujisɔsi a, ɔdaŋ nōó kóō cɛgbá ku alɔ lɔtu āhɔ̄ olɔnɔ naana. Alɔ lɔfu ya ku ɔtu okpoce ku alɔ kóō lɔfu fiyɛ o ya ɛɛ ku alɔ lɔtu āhɔ̄ olɔnɔ, oŋma lɛ ō nwu ɛlā ŋma ocabɔ ku ayinɛ alɔ icɛ nōo hayi kpaakpa lɛ Ujehofa, naana néē ya uwa ŋmo néē klla lɛ unwalu ku ije a. Alɔ klla lɔfu lɛ abɔ ci ō yihɔtu ije amāŋ aɔdā agbenu fiyɛ ɔfu, ɔdaŋ ku alɔ yɛce ocabɔ ku ācɛ nōo lɛ oyeeyi ku  uwa ya tɔɔtɛ o ya ɛɛ kéē lɛ ɛlā ku Ajɔɔcɛ a ta aflɛyi ipu oyeeyi ku uwa a. b

10. Ɛgɛnyá nɛ ihɔtu nɛ alɔ lɛ lɛ Ujehofa mla ācɛ ɔhá gē ta alɔ abɔ ō lɔtu ipu uklɔ ku ɔna ō ta a?

¹⁰ Ihɔtu klla wɛ uce ō ya nōo cɛgbá nɛhi nōo gē ta alɔ abɔ ō leyi kwɛɛcɛ klla gbeyigɔɔ. (Umát. 22:37-39) Ihɔtu nɛ alɔ lɛ lɛ Ɔwɔico a gē ta alɔ abɔ ō lɔtu ipu uklɔ ku ɔna ō ta, ɔdaŋ ka ō ya lɛ a géē bi unwalu gē lɛ alɔ naana. (2 Utím. 1:7, 8) Ohigbu ka alɔ yihɔtu ācɛ nōó gē gba Ujehofa ɛ̄gbā ŋ duu a, alɔ gɔbu yɔ i tɔɔna ɛga nɛ ujɔ ku alɔ gē tɔɔna a, alɔ kóō gē ya ɛnyā o bu ipu ɔdā ō le gwo uwaya mla uleta ō ta. Ɛ̄jɛ̄ i gē jɛ alɔ ō leyice ka ɛci éyi ācɛ a géē ya opiyabɔ cɛɛ é gbɔɔ ō ya ɔdā okpaakpa a ŋ.—Isík. 18:27, 28.

11. Ɛgɛnyá nɛ ihɔtu nɛ alɔ lɛ ayinɛ alɔ a lɔfu ta alɔ abɔ a? (1 Ācɛ Utesaloníka 5:11)

¹¹ Alɔ klla yihɔtu ayinɛ alɔ duu. Alɔ gē mafu ihɔtu nyā oŋma lɛ ō ‘tá iyī alɔ ɔtū kwu ɔtū, mla ō tū iyī alɔ abɔ̄.’ (Jé 1 Ācɛ Utesaloníka 5:11.) Bɛɛka aicɔɔja nōo gē yuklɔ tɔha eko néē yɔ i kpo ɛfú a, alɔ gē ta iyi alɔ ɔtu kwu ɔtu. Ku ɛlā ɔkwɛyi a, icɔɔja lɔfu ya inyileyi ya icɔɔja ɔmpa nu agbe eko néē yɔ i kpo ɛfú, amáŋ ó gáā kweyi gedee ya lɛ a ŋ. Ɔwɛ ekponu ɔɔma, alɔ i gáā kweyi gedee ya ayinɛ alɔ ɔdā nōo géē kwu uwa iyē, amāŋ bi obɔbi le cila uwa ule ku ɔdobɔbi néē ya alɔ ŋ. (1 Utes. 5:13, 15) Alɔ klla géē mafu ka alɔ yihɔtu ayinɛ alɔ oŋma lɛ ō lɛ ojilima ce ayinɛ nōo gē leyikwu alɔ ipu ujɔ a. (1 Utes. 5:12) Eko nɛ ɔyikpo Upɔlu ta ɔkpá nyā a, é lɛ ujɔ nōo yɔ Utesaloníka a kwaajɛ gaajɛ ihayi éyi ɛ ŋ. Ohigbu ɛnyā, ayinɛ néē fu kéē leyikwu ujɔ a i lɔfu jé ɔdā alɛwa ɛpleeko ɔɔma ŋ, klla lɔfu ya inyileyi alɛwa. Naana kpɔ a, é cɛgbá ojilima. Abɔ eko ku owe nɛhi a le ba ajaajɛ a, alɔ cɛgbá ō lɛyitaajɛ lɛ ɔwɛ nɛ anyakwɔcɛ ku ujɔ ku alɔ yɔ i mafu lɛ lɛ alɔ a fiyɛ ɛgɛ nɛ alɔ yɔ i ya babanya a. Ó gáā lɔfu tɔɔtɛ lɛ ayinɛ alɔ nōo yɔ ɔlɛ ɔtahɛ ku ɛga o yuklɔ ku alɔ, mla ayinɛ alɔ nōo yɔ abɔ ku ɛga o yuklɔ ku alɔ a kéē mafu ɔwɛ lɛ alɔ ŋ. Ohigbu ɛnyā, ó cɛgbá nɛhi ku alɔ nwu ō yihɔtu klla lɛ ojilima ce  anyakwɔcɛ ku ujɔ babanya. Ɔdā duuma nōo kóō ya naana, alɔ gbeyigɔɔ. Alɔ hii lɛ ɔtu kwu ɛga néē gē nyileyi a ŋ, amáŋ alɔ lɛ ɔtu ku alɔ kwu ɛlā ɔkpɔcii nyā ka Ujehofa o bu Ujisɔsi, yɔ i bi acɛnyilɔ nōo hayi kpaakpa nyā jé ɔwɛ a.

12. Ɛgɛnyá nɛ eyiyoce nɛ alɔ lɛ a gē gbo ɛlá ō gbo ku alɔ a?

¹² Ɛgɛ nɛ ɔkpu ō je kwɛyi gē gbo ɛyi ku icɔɔja a, ɛgɔɔma nɛ eyiyoce ka alɔ géē lɛ onyata a gē gbo ɛlá ō gbo ku alɔ duu a. Eyiyoce olɔfu nɛ alɔ lɛ a gē cɛ lɛ alɔ jé kpɔcii ka ɔdā duuma nɛ ɛcɛ nyā lɔfu je lɛ alɔ a, i wɛ ɔdā duuma ŋ. (Ufíl. 3:8) Eyiyoce nɛ alɔ lɛ a gē ta alɔ abɔ ō yɔ cii, klla i gē cɛ lɛ alɔ lɛ ɔtooplico iciici ŋ. Ɛlā nyā kē wɛ ɔkwɛyi ipu āhɔ̄ ku ɔyinɛ alɔ Wallace mla u Laurinda, nōo wɛ acɛ̄ yuklɔ Ubɛtɛlu ipu éwo ku Africa a. Ipu alaadi ɛta foofunu, ɛ̄nɛ̄ u Laurinda mla adā u Wallace gekwu. Ohigbu ōcē ku Corona nōo kē tu ipu oduudu ɛcɛ ɛpleeko ɔɔma a, ó tɔɔtɛ lɛ oduuma ku uwa ō gā ɔlɛ cɛɛ kéē ta ācɛ apɔlɛ ku uwa a ɔtu kwu ɔtu ŋ. Wallace ta ɔkpá kahinii: “Eyiyoce ka oheyi ŋma ɔlekwu ta um abɔ ō gbɛla lɛyikwu uwa, ó wɛ ɛgɛ nɛ āhɔ̄ ku uwa lɛ eko amoomɛ gbɔbu ɛɛ néē kwū a ŋ, amāŋ ɛgɛ nɛ āhɔ̄ ku uwa géē lɛ ipu Ajɔɔcɛ ku Ɔwɔico a. Eyiyoce nyā ge tu um ɔtu waajɛ eko duuma nɛ ɔtu le biya gā um, amāŋ eko nɛ um gbɔɔ ō gbɛla lɛyikwu ikwū ku uwa.”

13. Ɔdi nɛ alɔ lɔfu ya o ya ɛɛ ku alɔ miyɛ ɛhi ku alelekwu ihɔ a?

¹³ “Aá gwū ɔwɛ tū Alelékwū Ihɔ ŋ́.” (1 Utes. 5:19) Upɔlu ka ka alelekwu ihɔ ku Ɔwɔico gē bi alɔ yuklɔ. Ɔdaŋ ku alɔ i ya ɔdā duuma nōo géē gwu ɔwɛ tu alelekwu ihɔ a ŋ, alɔ géē yɔ i lɛ ɔtu caca ō ya ɔdā nōo le kpaakpa mla ō lɛ ɔfu nɛ alɔ cɛgbá ō yuklɔ lɛ Ujehofa a. (Uróm 12:11) Ɔdi nɛ alɔ lɔfu ya o ya ɛɛ ku alɔ miyɛ ɛhi ku alelekwu ihɔ ku Ɔwɔico a? Alɔ lɔfu gbɔɔkɔ ō lɛ alelekwu ihɔ a, ō klɔcɛ ku Ubáyíbu, mla ō ya aɔdā nɛ ɔwa ku Ujehofa gē da alɔ ku alɔ ya bɛɛka ō gā ōjila ku ujɔ. Ō ya ɛnyā géē ta alɔ abɔ lɛ “īkpō kú Alelékwū ā.”—Ugal. 5:22, 23.

14. Ɔdi nɛ alɔ i cika ō ya ŋ, o ya ɛɛ ku alɔ gɔbu yɔ i miyɛ ɛhi ku alelekwu ihɔ ku Ɔwɔico a? (Má ifoto a.)

¹⁴ Ɔdaŋ ka Ɔwɔico lɛ alelekwu ihɔ ku nu je lɛ alɔ, alɔ cika ō ceyitikwu ku alɔ hii “gwū ɔwɛ tū Alelékwū Ihɔ [a] ŋ́.” Ɔwɔico gē je alelekwu ihɔ  ku nu lɛ ācɛ nɛ ɛlá ō gbo mla uce ō ya ku uwa le yeŋee a. Ó gáā gɔbu yɔ i je alelekwu ihɔ ku nu lɛ alɔ ŋ, ɔdaŋ ka alɔ gɔbu yɔ i gbɛla aɔdobɔbi klla yɔ i ya aɔdobɔbi ɔɔma. (1 Utes. 4:7, 8) O ya ɛɛ ku alɔ gɔbu yɔ i miyɛ ɛhi ku alelekwu ihɔ ku Ɔwɔico a, alɔ i cika ō “leyī gwō olɛhɔ̄ kú ācomɛ́ɛbɛ kú Ɔwɔicō bónū ŋ́.” (1 Utes. 5:20) Ipu ɔgba nyā, “olɛhɔ̄” a lɛ ō ya mla ɛlā nɛ Ujehofa gē nwu alɔ o bu ipu alelekwu ihɔ ku nu, kwu aɛ̄nɛ̄ ō tɛɛma kwu ɛ̄cī ku Ujehofa mla eko nɛ alɔ lā anu babanya a. Alɔ i gē gbɛla ka ɛ̄cī ku Ujehofa amāŋ Amagɛdɔn i gáā wa eko nɛ alɔ yeeyi a ŋ. Ikɔkɔ ɔɔma, alɔ gē mafu ku alɔ leyice ka ó géē wa fiyaa, amāŋ ō yɔ i gbɛla lɛyikwu ɛ̄cī ɔɔma ŋma lɛ ō yɔ i lā oyeeyi ku alɔ “ɛ́gɛ́nɛ̄ Ɔwɔicō dɔɔ̄kā ā” ɛ̄cī doodu.—2 Upít. 3:11, 12.

15. Ɛgɛnyá nɛ alɔ i gáā jɛga lɛ ɛlā nōó le kpaakpa ŋ amāŋ aɛlā ɛkɛmgbɛ ku Ebilii kóō pla alɔ ŋ ma? (1 Ācɛ Utesaloníka 5:21)

¹⁵ Ó gboji gɛ ŋ, ācɛ nōo gē bɛyikwu Ɔwɔico a géē ya ɛlā ō ka tɛɛcɛ éyi kahinii: “Ɔdā dóódu í je unwalu lɛ alɔ gɛ ŋ́, alɔ kē bá ɛbɔ́!” (1 Utes. 5:3) Ɛlā ɛkɛmgbɛ nōo ŋma ɛgiyi Ebilii nyā géē le mu oduudu ɛcɛ klla géē pla ācɛ alɛwa. (Mafú 16:13, 14) Alɔ a bɛɛ? Alɔ i gáā jɛga lɛ aɛlā ɛkɛmgbɛ ɛgɛnyā kóō pla alɔ ŋ, ɔdaŋ ku alɔ “lɛ ɔkwu olɛhɔ̄ ā bū.” (Jé 1 Ācɛ Utesaloníka 5:21) É bi ɛlā ku Ugrisii nōo wɛ ō “lɛ ɔkwu olɛhɔ̄ ā bū” a yuklɔ amanya, o ya ɛɛ kéē kɛla lɛyikwu ɛgɛ nɛ ācɛ gē bi le jila aɔdā ocɛgbá bɛɛka ugoolu amāŋ oje nɛhɛ a ma, o ya ɛɛ kéē jé ɔdaŋ ka é wɛ ugoolu amāŋ oje nɛhɛ ɔkwɔɔkwɛyi a. Ɔwɛ ekponu ɔɔma, alɔ cika ō bu ɔkwu ɛlā nɛ alɔ po amāŋ jé a lɔɔlɔhi o ya ɛɛ ku alɔ jé peee kē wɛ ɔkwɛyi. Ɛlā nyā cɛgbá nɛhi lɛ Ācɛ Utesaloníka a, amáŋ ó cɛgbá lɛ alɔ fiyɛ babanya abɔ eko ku owe nɛhi a le ba ajaajɛ a. Ikɔkɔ ō kpɔtuce ɛjɛɛji ɛlā nɛ ācɛ ɔhá gē ka a, alɔ gē bi ɛlá ō gbo ku alɔ lɛ ɛlā a miya mla ɛlā nɛ Ubáyíbu ka mla ɛlā nɛ ɔwa ku Ujehofa da alɔ a. Oŋma lɛ ō ya ɛnyā, alɔ i gáā jɛga lɛ aɛlā ɛkɛmgbɛ ku Ebilii a kóō pla alɔ ŋ.—Aíit. 14:15; 1 Utím. 4:1.

16. Eyiyoce okpɔcii nyá nɛ alɔ lɛ a, ɔdi nɛ alɔ kē lɛ ɔtu ku alɔ ya ekponu ō ya a?

¹⁶ Alɔ jé kpɔcii ka ācɛ ɔlɛ Ujehofa géē wi ɛpleeko ku owe nɛhi a. Amáŋ lɛ eyeeye ku alɔ, alɔ i jé ɛgɛ nɛ oci gáā wɛ a ŋ. (Ujɛ́m. 4:14) Amáŋ, ɔdaŋ ku alɔ le wi ɛpleeko ku owe nɛhi a amāŋ nɛ alɔ kóō gekwu gbɔbu lɛ eko ɔɔma naana, alɔ géē miyɛ ule ku oyeeyi opiyoo ɔdaŋ ku alɔ hayi kpaakpa jaa gā oŋmɛyi. Ācɛ néē lɛ anɔ ta uwa ɛyi a géē yɔ mla Ujisɔsi ɔkpanco. Aala ɔhá a géē lā uparadais ipu ɛcɛ nyā. Ɛjɛɛji alɔ kóō lɛ ɔtu ku alɔ kwu ɛnɛɛnɛ eyiyoce nɛ alɔ lɛ a, klla le tutu gbeyi ɛ̄cī ku Ondu a!