1. Ɔdi ta ācɛ ɔlɛ Ujehofa abɔ kéē gɔbu yɔ i gba ɔ ɛ̄gbā naana néē gē má unwalu ɛyɛɛyɛyi a?

 UBÁYÍBU ka ka alɔ lā ɛpleeko nōo lɔnɔ nɛɛnɛhi a. (2 Utím. 3:1) Ācɛ ɔlɛ Ujehofa gē má unwalu nɛ ɛjɛɛji ācɛ nōo yɔ ipu ɛcɛ obɔbi ku Usetan a gē má a. Amáŋ, é klla gē ya alɔ ŋmo ohigbu ka alɔ gē gba Ujehofa ɛ̄gbā. Ɔdi gē ta alɔ abɔ ō gɔbu yɔ i gba Ujehofa ɛ̄gbā naana nɛ alɔ gē má aunwalu nyā a? Ɔdā okpɔcii éyi nōo ya a wɛ ka alɔ gē má ɛgɛ nɛ Ujehofa gē je otabɔ lɛ alɔ a, alɔ klla jé ka ó wɛ “Ɔwɔicō nōo yēeyī.”—Ujɛr. 10:10; 2 Utím. 1:12.

 2. Ɔdi nɛ alɔ jé lɛyikwu Ujehofa nōo lɔfu ta alɔ iyē gla a?

² Ujehofa gē má ɛjɛɛji unwalu nɛ alɔ gē má a, ó klla le tutu eko doodu ō ta alɔ abɔ. (2 Úklɔ́ 16:9; Aíjē 23:4) Eko duuma nɛ alɔ bla ka Ɔwɔico ku alɔ lɛ ɛlá wu alɔ klla le tutu eko doodu ō ta alɔ abɔ, alɔ géē lɛ ɔfu nɛ alɔ cɛgbá ō lɔtu unwalu duuma. Leyi yɛ ɛgɛ nɛ ɛlā nyā wɛ ɔkwɛyi ipu āhɔ̄ ku Udefidi nōo wɛ Ɔcɛ́ a.

 3. Ɔdi wɛ ɛyi ɛlā ku Udefidi eko nɛ ó ka ka “Óndú ā yēeyī” a?

³ Udefidi jé Ujehofa klla gbolo ce ɔ. Eko nɛ Usɔlu nōo wɛ Ɔcɛ́ a mla ācɛ ɔhá yɔ i ceyitikwu ō lɛ Udefidi ŋmo a, Udefidi gbɔɔkɔ lɛ Ujehofa ku otabɔ. (Aíjē 18:6) Igbihi nɛ Ujehofa lɛ ɔkɔ ō gba ku nu cila klla lɛ ɔ hɛta a, Udefidi ka tɛɛcɛ kahinii: “Óndú ā yēeyī.” (Aíjē 18:46) Ɔdi wɛ ɛyi ɛlā ku Udefidi a, ɛlā ō jila má éyi ka ka Udefidi yɔ i lɛ ɔ teyi peee ka Ujehofa wɛ Ɔwɔico ɔkwɛyi nōo géē yɔ i je otabɔ lɛ ācɛ nōo gē gba ɔ ɛ̄gbā a eko doodu. Udefidi jé ka Ɔwɔico ku nu jé lɛyikwu ɛjɛɛji ɔdā doodu nōo yɔ i ya da ɔ a, ka ó klla le tutu ō ta ɔ abɔ. Ɔɔma ta  Udefidi abɔ kóō gɔbu yɔ i gba Ujehofa ɛ̄gbā mla ō je owoofu lɛ ɔ.—Aíjē 18:​28, 29, 49.

 4. Ɛgɛnyá nɛ alɔ gē lɛ itene ŋma lɛ ō leyi má Ujehofa ka Ɔwɔico nōo yeeyi a?

⁴ Ō jé kpɔcii ka Ujehofa wɛ Ɔwɔico nōo yeeyi a lɔfu ta alɔ abɔ ō gba ɔ ɛ̄gbā mla ɔtu caca. Alɔ géē lɔfu nɛ alɔ cɛgbá ō lɔtu unwalu ɛyɛɛyɛyi mla ō gɔbu yɔ i yuklɔ lɔfu lɔfu ipu ɛ̄gbā ō gba ku Ɔwɔico. Alɔ klla géē lɛ ɔtu yekponu ō yɔ kwu Ujehofa ajaajɛ.

ƆWƆICO NŌO YEEYI A GÉĒ LƆFU TA UWƆ IYĒ

 5. Eko duuma nɛ alɔ yɔ i má unwalu, ɔdi lɔfu je eyiyoce lɛ alɔ a? (Ācɛ Ufílipāyi 4:13)

⁵ Ó géē tɔɔtɛ lɛ alɔ ō lɔtu unwalu duuma oligii amāŋ ɛnɛhi, ɔdaŋ ka alɔ bla ka Ujehofa yeeyi ka ó klla yɔ abɔɔ ō je otabɔ lɛ alɔ. Ó lɔfu ta alɔ abɔ ō bu unwalu duuma nɛ alɔ lɛ a, ohigbu ka ó lɛ unwalu duuma nōo gbɛ fiyɛ Ɔwɔico ku alɔ ŋ. Anu wɛ Ɔwɔico nōo lɔfu fiyɛ duu a, ó kē lɔfu je ɔfu nɛ alɔ cɛgbá ō lɔtu a lɛ alɔ. (Jé Ācɛ Ufílipāyi 4:13.) Ɛnyā gē ya ku alɔ lɔtu unwalu ku alɔ mla ɔtu ō ce. Eko duuma nɛ alɔ kē má ɛgɛ nɛ Ujehofa je otabɔ lɛ alɔ ɛpleeko nɛ alɔ yɔ i má unwalu nōo kóō le ligii a, alɔ lɔfu lɔtuce kpɔcii ka ó géē ta alɔ abɔ eko nɛ alɔ yɔ i má unwalu nōo gbɛ.

 6. Ɔdi ya da Udefidi eko nɛ ó wɛ ɛdrɔ nōo ya kóō lɔtuce Ujehofa tōōtɔ̄ɔ̄ fiyɛ a?

⁶ Leyi yɛ aɔdā ɛpa nōo ya ipu oyeeyi ku Udefidi nōo ya kóō lɔtuce Ujehofa tōōtɔ̄ɔ̄ fiyɛ a. Eko nɛ Udefidi wɛ ɔcogbaala nōo wɛ ɛdrɔ a, ɔgwu mɛmla agaba eyeeye ku uwa lɛ alá ku adā nu je. Ipu āhɔ̄ ɛpa ɔɔma, Udefidi mafu ɔtu ō lɛ nu aɛ́bɛ́ a inya klla lɛ aalá a hɛta. Udefidi i gbɛla ka ó ya ɛnyā oŋma lɛ ɔfu ku nu ŋ. Ó jé ka Ujehofa je ɔfu lɛ ɔ ō ya lɛ a. (1 Usám. 17:​34-37) Udefidi i je aɔdā nōo ya ipu oyeeyi ku nu nyā mlanyi ŋ. Ŋma lɛ ō gbɛla tu aɔdā nōo ya nyā, ó lɛ ɔtu ō ce lɛ ka Ɔwɔico nōo yeeyi a géē lɔfu tu ɔ iye ɛcɔbu.

 7. Ɔdi nɛ Udefidi lɛ ɔtu ku kwu ɔ a, ɛgɛnyá nɛ ɔɔma kē ta ɔ abɔ ō nuunu ta Ugoliyati a?

⁷ Igbihaajɛ eko nɛ Udefidi wɛ ɛdrɔ kpɔ nɛ ó faajɛ ihayi ofu ɛɛ ŋ ma, ó le yɛ gā ɛga nɛ aicɔɔja ku Isrɛlu jila kéē kpɛfu a. Ó gáā le má ka aicɔɔja a yɔ i yuufi nɛhi ohigbu ka ɔcɛ Ufilistiya éyi nōo lé ka Ugoliyati nōo wɛ agwu nɛhi a, wa gáā “lɛ abɔ̄ gbo [uwa] ɔtū.” (1 Usám. 17:​10, 11) Ufi lɛ aicɔɔja a kwu ohigbu ka é lɛ ɔtu ku uwa kwu ɛgɛ nɛ Ugoliyati gbɛ nɛhi a mla ɛlā nɛ ó yɔ i ka lɛ uwa a. (1 Usám. 17:​24, 25) Amáŋ Udefidi lɛ ɔtu ku nu kwu ɔdā ɔhá. Udefidi jé ka eko nɛ Ugoliyati yɔ i ŋmo aicɔɔja ku Isrɛlu a okonu a, ó yɔ i “ca aícɔ́ɔja kú Ɔwɔicō nōo yēeyī ā ɛcá.” (1 Usám. 17:26) Udefidi yɔ i gbɛla lɛyikwu Ujehofa. Udefidi lɔtuce ka Ɔwɔico nōo ta ɔ abɔ eko nɛ ó wɛ ɔcogbaala a, géē ta ɔ abɔ kpɔ ipu āhɔ̄ nyā. Ohigbu ka ó lɔtuce lɔfu lɔfu ka Ɔwɔico yɔ mla ɔ a, Udefidi lɛ unu nu ta Ugoliyati ó kē le yale!—1 Usám. 17:​45-51.

 8. Ɔdi lɔfu ya ku ɔtu nɛ alɔ le ce Ujehofa ka ó géē ta alɔ abɔ eko nɛ alɔ yɔ i má unwalu a kóō lɔfu tōōtɔ̄ɔ̄ fiyɛ a? (Má ifoto a.)

⁸ Alɔ abɔyi alɔ lɔfu lɔtu aunwalu nɛ alɔ lɛ a mɛɛlɛ, ɔdaŋ ka alɔ bla ka Ɔwɔico nōo yeeyi a le tutu eko doodu ō ta alɔ abɔ. (Aíjē 118:6) Alɔ lɔfu ya ku ɔtu nɛ alɔ le ce Ujehofa ka ó géē ta alɔ abɔ a kóō lɔfu fiyɛ ŋma lɛ ō leyi yɛ ɔdā nɛ ó ya ŋma igbihi ɛɛ ma. Jé aɔka ŋma ipu Ubáyíbu nōo géē ta uwɔ ɛlá kwu ɛgɛ nɛ Ujehofa nya ācɛ nōo gē gba ɔ ɛ̄gbā eko ikee a ta a. (Ayis. 37:​17, 33-37) A klla lɔfu jé amāŋ má aɔ̄kā nōo gē bɛɛcɛ ipu uwɛbsati ku jw.org ku alɔ, nōo mafu ɛgɛ nɛ Ujehofa je otabɔ lɛ ayinɛ alɔ nōo gē gba ɔ ɛ̄gbā ɛpleeko ku alɔ nyā a. O ka tu ɔ, gbɛla lɛyikwu eko ɛyɛɛyi nɛ Ujehofa ya odee kóō ta uwɔ abɔ ɛɛ ma. Á jé ŋ, ɔtu lɔfu ya uwɔ ka Ujehofa i ya odee ō hɛ  uwɔ ta ɔwɛ ohidaago ɛɛ ŋ. Bɛɛka ō hɛ uwɔ ta ŋma ɛgiyi aagaba amāŋ ɔgwu, ɛgɛ nɛ ɔcɛ i kɛla a. Amáŋ ɔkwɛyi a wɛ kahinii: Ujehofa lɛ aɔdā alɛwa ya gā uwɔ ipu oyeeyi ku uwɔ ɛɛ! Ujehofa hi uwɔ igwú ō kwu piya ɔya ku nu. (Ujɔ́n. 6:44) Jaa kwu obabanyā, oŋma lɛ ɔfu ku nu foofunu ya ɛɛ nɛ ó tɔɔtɛ gā uwɔ nɛ a gɔbu yɔ i gba ɔ ɛ̄gbā kpɔ a. Ohigbu ɛnyā, ba Ujehofa ɛba kóō ta uwɔ abɔ ō blakwu eko ɛyɛɛyi nɛ ó cila ɔkɔ ō gba ku uwɔ ɛɛ ma, eko nɛ ó je aɔdā nɛ a cɛgbá yiili a gā uwɔ eko kpaakpa a, amāŋ eko nɛ ó leyi kwu uwɔ ipu āhɔ̄ nōo lɔnɔ nɛhi a. Ō gbɛla lɛyikwu aɔdā ɛgɔɔma géē ya ku ɔtu nɛ a le ce Ujehofa ka ó géē gɔbu yɔ i ya odee o ya ɛɛ kóō ta uwɔ abɔ a kóō lɔfu tōōtɔ̄ɔ̄ fiyɛ.

 9. Ɔdi nɛ alɔ cɛgbá ō blakwu ɔ eko duuma nɛ alɔ yɔ i má unwalu a? (Aíita 27:11)

⁹ Eko duuma nɛ alɔ yɔ i má unwalu, alɔ cɛgbá ō lɛ ɔtu ku alɔ kwu ɔdā nōo cɛgbá fiyɛ duu a. Ebilii ka ka eko duuma nɛ alɔ yɔ ipu āhɔ̄ olɔnɔ, alɔ géē cigbihi kwu Ujehofa. Ohigbu ɛnyā ɛgɛ nɛ alɔ gē ya ɛlā lɛ eko duuma nɛ alɔ yɔ ipu unwalu a, gē lɛ abɔ kwu ɔwɛ nɛ ɔtu gē ya Ujehofa a. (Ujób. 1:​10, 11; jé Aíita 27:11.) Ɔdaŋ ka alɔ yɔ kwu Ujehofa gā ajaajɛ naana nɛ alɔ yɔ i má unwalu a, alɔ gē mafu ihɔtu nɛ alɔ lɛ lɛ Ujehofa a klla gē mafu ka Ebilii wɛ ɔcɛ okɛmgbɛ. A yɔ i má o ya ŋmo ŋma ɛgiyi igɔmɛnti, yɔ i lɛ unwalu ku ije, ācɛ i gē jahɔ eko nɛ a gē tɔɔna ŋ, amāŋ ɛdɔ unwalu duuma ɔhá a? Ɔdaŋ ka ó lɛ a, bla ka āhɔ̄ ku uwɔ ā je ɛnɛɛnɛ ɛgā gā uwɔ ō ya ku ɔtu kóō he Ujehofa. Ó klla lɔhi ku a bla, ka Ujehofa i gáā je ɛga ku a má unwalu ɛ̄nɛ̄ ofiyɛ uwɔ ɔfu ŋ. (1 Ukɔ́r. 10:13) Ó géē je ɔfu nɛ a cɛgbá ō lɔtu a gā uwɔ.

ƆWƆICO NŌO YEEYI A GÉĒ CILA UWƆ ULE

10. Ɔdi nɛ Ɔwɔico nōo yeeyi a géē ya lɛ ācɛ nōo gē gba ɔ ɛ̄gbā a?

¹⁰ Ujehofa gē cila ācɛ nōo gē gba ɔ ɛ̄gbā a ule eko doodu. (Uhíb. 11:6) Ó je ɛbɔ lɛ alɔ klla ya ku odee kóō jɛ alɔ eyi babanya klla géē je oyeeyi opiyoo lɛ alɔ ɛcɔbu. Alɔ lɔtuce Ujehofa duudu ka ó yɔ i ŋmo ɔ unwu ō cila  alɔ ule klla lɛ ɔfu ō ya lɛ a. Ohigbu ɔɔma, alɔ gɔbu yɔ i je ofiyɛ duu ku alɔ lɛ ɔ ipu ɛ̄gbā ō gba ku alɔ ɛgɛ nɛ ācɛ nōo gba ɔ ɛ̄gbā ikee a ya a. Ɛnyā wɛ ɔdā nɛ Utimoti ya yiili a.—Uhíb. 6:​10-12.

11. Ɔdiya nɛ Utimoti yuklɔ lɔfu lɔfu ipu ujɔ a? (1 Utímōti 4:10)

¹¹ Jé 1 Utímōti 4:10. Utimoti lɛ ɔtu okpoce olɔfu ka Ɔwɔico géē cila ɔ ule. Ɔɔma ya ɛɛ nɛ ó yuklɔ lɔfu lɔfu lɛ Ujehofa mla ācɛ ɔhá a. Ɔdi nɛ ó ya a? Ɔyikpo Upɔlu ta ɔ ɔtu kwu ɔtu kóō kwu piya itica olɔhi fiyɛ ipu uklɔ ku ɔna ō ta mla ipu ujɔ. Upɔlu klla da ɔ kóō lɛ ɛnɛɛnɛ ocabɔ taajɛ lɛ Ācɛ O Yɛce Ukraist ɔmpa nu kwu aɛdrɔ mla ācɛ nōo le hilokplici ɛɛ. É klla je uklɔ olɔnɔ nɛhi ōhī lɛ ɔ kóō ya nōo lɛ ō ya mla ō tu ukɔ́ olɔfu nōo klla wɛ ukɔ́ ku ihɔtu a lɛ ācɛ nōo cɛgbá nu a. (1 Utím. 4:​11-16; 2 Utím. 4:​1-5) Ekoohi, ācɛ ɔhá i gē má uklɔ nɛ Utimoti gē ya a ŋ, amāŋ uklɔ nɛ ó gē ya a i kóō gē jɛ uwa eyi ŋ, amáŋ ó lɔtuce lɔfu lɔfu ka Ujehofa géē cila lɛ ɔ ule.—Uróm 2:​6, 7.

12. Ɔdiya nɛ anyakwɔcɛ ku ujɔ gē yuklɔ lɔfu lɔfu ipu ujɔ a? (Má ifoto a.)

¹² Icɛ, anyakwɔcɛ ku ujɔ lɔfu lɔtuce lɔfu lɔfu ka Ujehofa gē má uklɔ olɔhi néē gē ya a ka uklɔ a klla jɛ ɔ eyi. Batu uklɔ kóō je ɔtu ō tu kwu ɔtu lɛ ayinɛ, ɔkpá ō nwu, ō yuklɔ ku ɔna ō ta, alɛwa ku anyakwɔcɛ ku ujɔ klla gē je otabɔ lɛ uklɔ ku ɔlɛ ō gwo mla ō tabɔ eko nɛ ɔdā amiya le ya. Ōhī ku anyakwɔcɛ ku ujɔ a klla gē yuklɔ mla ācɛ ku Patient Visitation Groups amāŋ Hospital Liaison Committees. Anyakwɔcɛ ku ujɔ nōo fu iyi uwa tɛɛcɛ ō yuklɔ ɛyɛɛyɛyi nōo ba nyā, jé ka ujɔ a wɛ aku Ujehofa, ó wɛ aku ɔlɛɛcɛ duuma ŋ. Ohigbu ɛnyā, é gē yuklɔ lɔfu lɔfu ipu ujɔ klla lɔtuce lɔfu lɔfu ka Ujehofa géē cila uwa ule ku ɔdā néē gē ya a.—Ukól. 3:​23, 24.

13. Ɛgɛnyá nɛ ɔtu gē ya Ujehofa lɛyikwu ɔdā nɛ alɔ gē ya lɛ ɔ a?

¹³ Ó wɛ ɛjɛɛji ācɛ gáā lɔfu wɛ anyakwɔcɛ ku ujɔ gla a ŋ. Amáŋ, ɛjɛɛji alɔ lɔfu je odee lɛ Ujehofa. Ó gē má ɛhi nɛ alɔ gē je gā ipu uklɔ  nɛ alɔ gē ya ipu oduudu ɛcɛ a ɔdaŋ nōó kóō tɔɔtɛ lɛ alɔ ō je nwune ŋ naana. Ó gē gweeye nɛɛnɛhi eko duuma nɛ ó gē má alɔ gē je abɔ gico ipu ojila ku ujɔ ō ta ōhī naana nɛ alɔ wa ācɛ o ya uweyi a. Ó klla gē gweeye eko duuma nɛ alɔ kwu je ya ācɛ nōo ya alɔ cɔnu a ɛhi. Ɔdaŋ nɛ ɔtu kóō ya uwɔ ku á ya nwune lɛ Ujehofa ɛgɛ nɛ a géē dɔka ō ya a ŋ naana, lɔtuce lɔfu lɔfu ka ɔdā nɛ a gē ya a jɛ Ujehofa eyi. Ó yihɔtu ku uwɔ ku aɔdā nɛ a gē ya a, ó kē géē cila uwɔ ule.—Ulúk. 21:​1-4.

YƆ KWU ƆWƆICO NŌO YEEYI A AJAAJƐ

14. Ɛgɛnyá nōo yɔ kwu Ujehofa ajaajɛ gē ta alɔ abɔ ō hayi kpaakpa lɛ ɔ a? (Má ifoto a.)

¹⁴ Ɔdaŋ ka alɔ wɛ ɔya ku Ujehofa nōo yɔ kwu ɔ ajaajɛ, ó géē tɔɔtɛ lɛ alɔ fiyɛ ō hayi kpaakpa lɛ ɔ. Ɔɔma wɛ ɔkwɛyi ipu āhɔ̄ ku Ujosɛfu. Ó lɛ ɔtu yekponu ta ō ce ikpo ɔnyā ɔhá, ohigbu ka ó jé ka Ujehofa lɛ ɛlá wu ɔdā nɛ ó gē ya a ó kē dɔka ō ya ɔdā duuma nōo géē biya ɔ ɔtu ŋ. (Ohút. 39:9) O ya ɛɛ ku alɔ wɛ ɔya ku Ujehofa nōo yɔ kwu ɔ ajaajɛ, alɔ cɛgbá ō lɛ eko taajɛ ō gbɔɔkɔ lɛ ɔ mla ō klɔcɛ ku Ɛlā ku nu. Ɛnyā géē ya ku ɛma nɛ alɔ lɛ mla ɔ a kóō lɔfu tōōtɔ̄ɔ̄. Bɛɛka Ujosɛfu a, ɔdaŋ ka alɔ wɛ ɔya ku Ujehofa nōo yɔ kwu ɔ ajaajɛ, alɔ i gáā dɔka ō ya ɔdā duuma nōo géē biya ɔ ɔtu ŋ.—Ujɛ́m. 4:8.

15. Ɛlā nyá nɛ alɔ lɔfu nwu ŋma ɔdā nōo ya da ācɛ ku Isrɛlu ipu igbili a? (Ācɛ Uhíbru 3:12)

¹⁵ Ācɛ nōo ma ō kpɔtuce Ujehofa a, ó lɔfu tɔɔtɛ lɛ uwa kē hii yɔ kwu Ujehofa gā ajaajɛ ŋ. Leyi yɛ ɔdā nōo ya da ācɛ Isrɛlu a eko néē yɔ ipu igbili a. É jé ka Ujehofa wɛ Ɔwɔico nōo yeeyi, amáŋ é gbɔɔ ō lɛ aafu ɔdaŋ nɛ ó géē ya ɛgbá ku uwa lɛ uwa gla. É kóō dɔka kahinii: “Óndú ā yɔ̄ mla alɔ kɛ̄ɛ, ka ó yɔ̄ mla alɔ ŋ́?” (Oyɛb. 17:​2, 7) Ɛnyā ya kéē lɛ ikpɛyi olɔfu ya ta Ɔwɔico igbihaajɛ. Ó lɛ aafu ŋ, alɔ i gáā dɔka ō yɛce ocabɔ obɔbi ku uwa a ŋ.—Jé Ācɛ Uhíbru 3:12.

16. Ɔdi lɔfu jé ɔtu okpoce ku alɔ má a?

¹⁶ Ɛcɛ nɛ alɔ lā anu nyā gē ya kóō lɔnɔ tu alɔ ō yɔ kwu Ujehofa ajaajɛ. Ācɛ alɛwa i cɛ ka  Ɔwɔico yɔ ŋ. Igbalɛwa, ó gē lɛbɛɛka ācɛ nōo gē leyi gwu ɔwɛ nɛ Ɔwɔico dɔka ku alɔ lā oyeeyi ku alɔ bonu a gē ya lɔhi ipu oyeeyi ku uwa a. Eko duuma nɛ alɔ lɛ ɔɔma má le ya, ó lɔfu lɛ abɔ kwu ɔtu okpoce ku alɔ. Naana nɛ alɔ jé ka Ɔwɔico yɔ a, alɔ lɔfu gbɔɔ ō lɛ aafu ɔdaŋ nɛ ó géē ta alɔ abɔ. Ɔcɛ nōo ta ɔkpá ku Aíjē Kú Ɛ̄gbā 73 a, ɔtu ya ɔ ɔwɛ ekponu ɔɔma eko yɛɛ. Ó má ācɛ nōo lā yɛ jila ɔ ta a yɔ i leyi gwu íne ku Ɔwɔico bonu, amáŋ é klla yɔ i jɔɔnyɛ oyeeyi ku uwa. Ohigbu ɛnyā, ó gbɔɔ ō lɛ aafu ɔdaŋ ka ō gba Ɔwɔico ɛ̄gbā wɛ ɔdā nōo kóō cɛgbá.—Aíjē 73:​11-13.

17. Ɔdi gáā ta alɔ abɔ ō yɔ kwu Ujehofa ajaajɛ a?

¹⁷ Ɔdi ta ɔcɛ nōo ta ɔkpá ku Aije Ku Ɛ̄gbā ɔɔma abɔ kóō lɛ ɛlá ō gbo ku nu piyabɔ a? Ó gbɛla lipu lipu tu ɔdā nōo ya da ācɛ nōo ma ō kpɔtuce Ujehofa a. (Aíjē 73:​18, 19, 27) Ó klla gbɛla tu itene ɛyɛɛyɛyi nōo gē wa ŋma ō gba Ɔwɔico ɛ̄gbā a. (Aíjē 73:24) Alɔ abɔyi alɔ lɔfu gbɛla tu aɔwɛ ɛyɛɛyɛyi nɛ Ujehofa hɔha ce alɔ ɛ ma klla gbɛla lɛyikwu ɛgɛ nɛ oyeeyi ku uwɔ géē wɛ ɛyɛɛyi ɔdaŋ ku á géē yɔ i gba Ujehofa ɛ̄gbā ŋ ma. Ɔdaŋ ka alɔ gbɛla tu ɔdā nōo ya ɛɛ nōó lɔhi ku alɔ gba Ujehofa ɛ̄gbā a, ó géē ta alɔ abɔ ō hayi kpaakpa lɛ ɔ. Cɛɛ bɛɛka ɔcɛ nōo ta ɔkpá ku Aije Ku Ɛ̄gbā ɔɔma a, alɔ géē ka kahinii: “Amáŋ, ami ā, ó lɛ ɔhi gā um nɛ̄hi nɛ̄ n kwu Ɔwɔicō ajaajɛ” a.—Aíjē 73:28.

18. Ɔdiya nɛ alɔ i cɛgbá ō yuufi ɔdā nōo géē ya ɛcɔbu a ŋ ma?

¹⁸ Alɔ lɔfu lɔtu unwalu duuma nɛ alɔ géē má ɛpleeko amoomɛ nyā, ohigbu ka alɔ gē “cɛ̄ Ɔwɔicō ɔkwɛyí nōo yēeyī ā ɛhɔ̄.” (1 Utes. 1:9) Ɔwɔico ku alɔ lɛ ɛlā wu alɔ klla géē ta alɔ abɔ eko doodu. Ó yɔ mla ācɛ nōo gba ɔ ɛ̄gbā eko ku ikee a, ó kē yɔ mla alɔ icɛ duu. Ó gboji gɛ ŋ, alɔ géē má ɛdɔ ku owe nɛhi nōó ya ipu ɛcɛ nyā jejee ɛɛ ŋ ma. Amáŋ alɔ i gáā yɔ foofu alɔ ŋ, Ujehofa géē yɔ mla alɔ. (Ayis. 41:10) Ɛjɛɛji alɔ kóō “lɛ ɔtū yéékpó cɛ́ɛ́ kú ālɔ̄ ka ka Óndú alɔ wɛ ɔ̄cɛ otá alɔ abɔ̄, alɔ í kē gáā yúufi ŋ́.”—Uhíb. 13:​5, 6.