Ɛka ō gbo wɛ “ɛlā nɛ ɔcɛ gē ka tɛɛcɛ kpɔcii amāŋ okonu nɛ ó gē ce ku anuɔ géē ya odee, igbalɛwa oŋma lɛ ō hi iyē ku Ɔwɔico kóō wɛ ijaali.” É lɔfu ka ɔ ŋma okonu amāŋ ta ɔ taajɛ.

Ācɛ ōhī gbɛla ka ɛka ō gbo wɛ ɔdobɔbi ohigbu ka Ujisɔsi kahinii: “Aá híīī gbɛka fúlufúlu ŋ́ . . . Aá kóō yá ka, ‘Īī’ kú aá kóō wɛ ‘Īī’ ɔkwɛ̄yi. Ká ‘Ehée’ kú aá kóō kē wɛ ‘Ehée’ ɔkwɛ̄yi. Ɔdā dúúmā nōo le fíyɛ́ ɛ̄nyā wɛ ɔdōōbɔ̄bí.” (Umát. 5:33-37) Aku ɔkwɛyi a, Ujisɔsi jé ka ó lɛ íne ku Umosisi ōhī nōo cɛgbá ku ɔcɛ kóō gbo ɛka, ācɛ ō gba Ɔwɔico ɛ̄gbā kpaakpa ōhī kē gbo ɛka gbɔbu duu ɛ. (Ohút. 14:22, 23; Oyɛb. 22:10, 11) Ó klla jé ka Ujehofa abɔyi nu gbo ɛka gbɔbu duu ɛ. (Uhíb. 6:13-17) Ohigbu ɛnyā, Ujisɔsi i yɔ i ka ku alɔ hii gbo ɛka ŋ nɛɛ ŋ. Ikɔkɔ ɔɔma, ó yɔ i pi ācɛ ahɔ̄ lɛyikwu ō gbo ɛka ohigbu odee ligii amāŋ ɔdā nōó lɛyi ŋ. Alɔ cika ō yɔ i lɛ aɔdā nɛ alɔ cokonu ku nu a ya, ohigbu ku ɔdā nɛ Ujehofa dɔka a yɔ abɔɔ a.

Ó lɛ a, ɔdi nɛ a cika ō ya ɔdaŋ kéē da uwɔ ku a gbo ɛka a? Aflɛyi, le má ku a géē lɔfu ya ɔdā nɛ a yɔ i gbo ɛka ku nu a gla. Ɔdaŋ ku a jé ku a gáā ya ɔ gla ŋ, ó géē lɔhi fiyɛ ɔdaŋ ku a gbo ɛka ɔɔma ŋ. Ɛlā ku Ɔwɔico pi alɔ ahɔ̄ kahinii: “Ó géē lɔhi fíyɛ́, ɔ́dāŋ ka á cokónu ŋ́, fíyɛ́ o le okónu ce, nɛ̄ á yá ɔdā nāa cokónu nū ɔ́ɔmā ŋ́.” (Ɔ̄cok. 5:5) Ɔdā ɔhá, leyi yɛ aukɔ́ ku Ubáyíbu nōo tɛɛma kwu ɛka néē dɔka ku a gbo a, cɛɛ ku a miya ɔdā nɛ a géē ya oŋma lɛ ɛgɛ nɛ a nwu ɔtu ku uwɔ jé lɛ a. Ɔdi wɛ ōhī ku aukɔ́ ku Ubáyíbu nyā a?

Ɛka ō gbo ōhī i biya íne ku Ɔwɔico ŋ. Ocabɔ mafu, Ācɛ Ocijali Ku Ujehofa gē cokonu eko duuma néē yɔ i lɛ iyi uwa. Okonu ō ce ɛgɛnyā kē wɛ ɛdɔ ku ɛka ō gbo. Iyɔbu ku Ɔwɔico mla ɛjɛɛji ɛwa nōo yɔ abɔɔ a, ɔba mla ɔnyā a gē cokonu kéē géē yihɔtu iyi uwa, géē leyi kwu iyi uwa, klla géē lɛ ojilima ce iyi uwa “jaa gbeeko nɛ uwa ɛplɛɛpa géē yeeyi gáā kwu a.” (Ó lɛ ɔba mla ɔnyā ōhī nōó gáā lɔfu ka ɛdɔ ɛlā ekponu nyā eko néē yɔ i lɛ iyi uwa ŋ, amáŋ é géē cokonu lɛ iyi uwa iyɔbu Ɔwɔico kpɔ.) Cɛɛ é géē hi uwa ka ɔba mla ɔnyā, obatɔha ku uwa kē wɛ ɔdā nōo cika ō yɔ jaa gbeeko néē gekwu. (Ohút. 2:24; 1 Ukɔ́r. 7:39) Okonu ō ce nɛ ɔba mla ɔnyā gē ya nyā le kpaakpa klla cɛtɔha mla ococɛ ku Ɔwɔico.

Ɛka ō gbo ōhī i cɛtɔha mla íne ku Ɔwɔico ŋ. Ɔcɛ O Yɛce Ukraist ɔkwɛyi i gē gbo ɛka ka anuɔ géē bi iyɛfu le je ogbotu lɛ éwo ku nu, amāŋ ō ka ku anuɔ i gáā gba Ɔwɔico ɛ̄gbā gɛ ŋ. Ō ya ɛnyā géē wɛ ō biya íne ku Ɔwɔico. Ācɛ O Yɛce Ukraist i “wɛ ákú ɛcɛ” nyā ŋ, ohigbu ɔɔma alɔ i gē lɛ abɔ ipu unwalu amāŋ ɛfú ō kpo ku ɛcɛ nyā ŋ.—Ujɔ́n. 15:19; Ayis. 2:4; Ujɛ́m. 1:27.

Ɛka ō gbo ōhī kē lɛ ō ya mla ɔdā nōo wɛ ɔtu ku ɔcɛ a. Ekoohi, gbɔbu ɛɛ ku alɔ miya ɔdaŋ ku alɔ géē gbo ɛka, alɔ cɛgbá ō gbɛla lɔɔlɔhi lɛyikwu ukɔ́ ku Ujisɔsi nōo kahinii: “Aá je ɔdā nōo wɛ  ákú Usísa lɛ Usísa, amáŋ aá je aɔ́dā nōo wɛ ákú Ɔwɔicō lɛ Ɔwɔicō.”—Ulúk. 20:25.

Alɔ je ɔ ka Ɔcɛ O Yɛce Ukraist yɔ i nyɔ gáā miyɛ ɔkpá amāŋ je ifoto nōo géē ya ɔ tɔɔtɛ lɛ ɔ kóō kwu piya ɔyi ajɛ ipu éwo ɔhá, anu ó gáā le jé ka ó géē cɛgbá ō gbo ɛka ō lɛyitaajɛ lɛ ɛjɛɛji íne ku éwo a. Ɔdaŋ ka ipu éwo a, ō gbo ɛka ɔɔma wɛ ka ó géē ya odee ɔwɛ nōó gáā cɛtɔha mla íne ku Ɔwɔico ŋ, ɔtu ku nu nɛ ó nwu jé mla Ubáyíbu a i gáā jɛga lɛ ɔ kóō gbo ɛka ɔɔma ŋ. Naana a, igɔmɛnti lɔfu jɛga lɛ ɔ kóō lɛ aɛlā nɛ ó gáā ka ipu ɛka nɛ ó gáā gbo a piyabɔ gā ɛ̄nɛ̄ ɔtu ku nu géē jɛga lɛ ɔ ō gbo ɛka ɔɔma gla.

Ō gbo ɛka ɔɔma ŋma lɛ ɛgɛ nɛ ó piya aɛlā nōo yɔ ipu nu abɔ a lɔfu cɛtɔha mla ukɔ́ nōo yɔ ipu ɔkpá ku Ācɛ Uróm 13:1 nōo kahinii: “Ɛjɛ̄ɛ̄jī aá kóō lɛyítáajɛ lɛ igɛ́mɛ́nti nēe ī gbāājɛ ā.” Ohigbu ɛnyā, Ɔcɛ O Yɛce Ukraist a lɔfu miya ka ɔdā duuma i bɔbi lɛyikwu ō gbo ɛka ō ya odee nɛ Ɔwɔico cɛgbá ku Ācɛ O Yɛce Ukraist kéē ya a.

Ó cɛgba ku a yɛce ɔtu ku uwɔ nɛ a nwu jé ŋma Ubáyíbu, ɔdaŋ kē da uwɔ ku a gbo ɛka ŋma lɛ ō ya iyē amāŋ abɔ ɛdɔ éyi, amāŋ ō bi odee le gbo ɛka ɔɔma. Ācɛ Urom mla ācɛ u Scythia ku ikee gē bi ɔkpacɛŋgeli ku uwa le gbo ɛka, ɛnyā kē wɛ kē gē bi odee ku ɔwɔ ku ɛfú ō kpo le mafu ku ɔdā nɛ ɔcɛ ɔɔma yɔ i ka a tōō lɔtuce. Ācɛ Ugrisi kē i je abɔ ku uwa gico kwu ɔkpanco eko duuma néē yɔ i gbo ɛka. Eko duuma néē ya lɛ a, é mafu ka ó lɛ ɔcɛ éyi nōo lɔfu nōo yɔ ɔkpanco nōo yɔ i po klla yɔ i má ɔdā néē yɔ i ya a, nɛ alɛɛcɛ klla géē kpo ohi lɛ ɔ ku ɛjɛɛji ɔdā néē ya a.

Ku ɛlā ɔkwɛy a ba, ɔcɛ ō gba Ujehofa ɛ̄gbā i gáā gbo ɛka mla ɔdā ocabɔ ku éwo nōo tɛɛma kwu ɛ̄gbā ō gba ku ɛkɛmgbɛ ŋ. Amáŋ ɔdi nɛ a géē ya ɔdaŋ kē da uwɔ ipu inu ō ka ɛpɔ ku a kwu abɔ ku uwɔ i ci Ubáyíbu ku a gbo ɛka ku a géē cijali ɔkwɛyi a? Ipu āhɔ̄ ɔɔma, a lɔfu miya ō ya lɛ a, ohigbu ku Ubáyíbu da alɔ lɛyikwu ācɛ ō gba Ujehofa ɛ̄gbā kpaakpa ɛ̄nɛ̄ ō gbo ɛka ŋma lɛ ō ya iyē amāŋ abɔ ɛdɔ éyi. (Ohút. 24:2, 3, 9; 47:29-31) Ó cɛgbá ku a bla ku ɔdaŋ ku a lɛ ɛdɔ ɛka ɛgɔɔma gbo, a yɔ i gbo ɛka iyɔbu ku Ɔwɔico ku a géē ka ɔkwɛyi a. A cɛgbá ō le tutu ō je ohi okpaakpa lɛ ɔka duuma ɛ̄nɛ̄ é géē da uwɔ a.

Ohigbu ku ɛma ku alɔ mla Ujehofa wɛ ɔdā nōo jɛ alɔ eyī a, alɔ cika ō gbɔɔkɔ klla leyi yɛ ɔ lɔɔlɔhi eko duuma ɛ̄nɛ̄ é da alɔ ku alɔ gbo ɛka, alɔ klla cika ō le jé peee ku ɔdaŋ ku alɔ lɛ ɛka a gbo, ó gáā biya ukɔ́ ku Ubáyíbu duuma amāŋ ya ku alɔ hii lɛ ɔtu oyeŋee gɛ ŋ. Ɔdaŋ ku a kē le miya ō gbo ɛka, a cika ō lɛ ɔ tu.—1 Upít. 2:12.