1. Ɔdi nɛ Ujehofa cɛgbá ŋma ɛgiyi alɔ a?

 EKO nɛ ɔba mla ɔnyā gē lɛ eeye ipu oyeeyi ku uwa fiyɛ duu a, wɛ eko néē lɛ ɔyi ma ɛpɛpɛ. Amáŋ, naana nōó wɛ ka ɛ́nɛ́ mla adā yihɔtu ɔyi néē ma ɛpɛpɛ nɛhi a, é gáā dɔka kóō wɛ ɔyipɛ piyoo ŋ. Ku ɛlā ɔkwɛyi a, é géē junwalu lɛ iyi uwa nɛhi ɔdaŋ ka ɔyi néē ma ɛpɛpɛ ɔɔma i jɛ ŋ. Ɔwɛ ekponu ɔɔma, Ujehofa gweeye nɛhi eko nɛ alɔ gbɔɔ ō nwu ɛlā lɛyikwu ɔ ɛpɛpɛ a, amáŋ ó dɔka ku alɔ kwɛji abɔɔ ŋ. (1 Ukɔ́r. 3:1) Ikɔkɔ ɔɔma, ó cɛgbá ku alɔ wɛ Ācɛ O Yɛce Ukraist nōo kwu “pīya ijimkpa.”—1 Ukɔ́r. 14:20.

2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

² Ɔdi nōó wɛ ō kwu piya ijimkpa ipu ɛlā ku Ɔwɔico a? Ɛgɛnyá nɛ alɔ lɔfu je piya ijimkpa ipu ɛlā ku Ɔwɔico a? Ɛgɛnyá nōo klɔcɛ ku aɛlā ō nwu olipu ku Ubáyíbu lɔfu ta alɔ abɔ ō je piya ijimkpa a? Ɔdiya nɛ alɔ i kē cika ō lɔtuce iyi alɔ fiyɛ ɔfu ŋ ma? Ipu ikpɛyi ɛlā nyā, alɔ géē cila ohi ku aɔka nyā.

ƆDI NŌÓ WƐ Ō KWU PIYA IJIMKPA IPU ƐLĀ KU ƆWƆICO A?

3. Ɔdi nōó wɛ ō kwu piya ijimkpa ipu ɛlā ku Ɔwɔico a?

³ Ipu Ubáyíbu, ɛlā ku Ugriisi néē cɔwɔ kóō je “pīya ijímkpa” a, ɛyi nu lɔfu wɛ ɔcɛ nōo le “jikoko.” (1 Ukɔ́r. 2:6) Ohigbu ɛnyā, ɛgɛ nɛ ɔyipɛ nɛ́ŋcɛ̄ gē jɛ jaa gbeeko nɛ ó kwu piya ɔcɛ o jikoko a, alɔ abɔyi alɔ cika ō gɔbu yɔ i jɛ ipu ɛma nɛ alɔ lɛ mla Ujehofa a. O bu ɔwɛ nyā, alɔ géē je piya ijimkpa ipu ɛlā ku Ɔwɔico. Ku ɛlā ɔkwɛyi, eko nɛ alɔ kē kwu piya ijimkpa ipu ɛlā ku Ɔwɔico, alɔ hii ma ō yɔ i ya ō jɛ gɔbu ŋ. (1 Utím. 4:15) Ɛjɛɛji alɔ kwu aɛdrɔ lɔfu je piya ijimkpa ipu ɛlā ku Ɔwɔico. Amáŋ, ɛgɛnyá nɛ alɔ gáā bi le jé ɔdaŋ ka alɔ kwu piya ijimkpa ipu ɛlā ku Ɔwɔico ɛ ma?

4. Ɛgɛnyá nɛ alɔ lɔfu jé ɔcɛ nōo kwu piya ijimkpa ipu ɛlā ku Ɔwɔico ɛ ma?

⁴ Ɔcɛ O Yɛce Ukraist nōo kwu piya ijimkpa ipu ɛlā ku Ɔwɔico ɛ, wɛ ɔcɛ nōo gē ya ɔdā doodu nɛ Ujehofa da ɔ kóō ya a. Ó gē  ya ɔdā nōo gē he ɔ ɔtu ō ya a foofunu ŋ. Ku ɛlā ɔkwɛyi a, abɔ ó jila iye ŋ ma ó géē ya inyileyi ekoohi. Amáŋ ɛ̄cī doodu, ó géē ya ɔdā duuma nɛ ó ya gla a ō gbɛla klla ya odee ɔwɛ nɛ Ujehofa dɔka a. Ɔcɛ ɛgɔɔma kwu piya ɔcɛ ɛyipɛ a, klla gē ceyitikwu ō gbɛla lɔɔlɔhi bɛɛka Ujehofa a. (Āfi. 4:​22-24) Ó le nwu ō ya ōmiya ku ijeeyi ŋma lɛ ō gbɛla tu aíne ku Ujehofa mla aukɔ́ ku nu. Ohigbu ɛnyā, ó cɛgbá aíne alɛwa nōo géē yɔ i da ɔ ɔdā nɛ ó cika ō ya ŋ. Eko duuma nɛ ó lɛ ōmiya ya, ó gē ceyitikwu lɔfu lɔfu ō lɛ ɔdā nɛ ó miya a ya jila.—1 Ukɔ́r. 9:​26, 27.

5. Ɔdi lɔfu ya da Ɔcɛ O Yɛce Ukraist nōó wɛ ijimkpa ipu ɛlā ku Ɔwɔico ŋ ma? (Ācɛ Ɛ́fēsɔsi 4:​14, 15)

⁵ Abɔ ɔhá ku nu, Ɔcɛ O Yɛce Ukraist nōó wɛ ijimkpa ipu ɛlā ku Ɔwɔico ŋ, gē tɔɔtɛ lɛ “ācɛ nēe gē plla ācɛ” mla “ācɛ nēe gē yá kú ācɛ kéē cɛ̄ɛ̄lā nōó wɛ ɔkwɛ̄yi ŋ́” ma kéē plla ɔ fiyaa. Ó lɔfu kpɔtuce ācɛ nōo gē nyila aɔ̄kā nōo gē plla ācɛ, aɔ̄kā awanda, mla aɔ̄kā ɛkɛmgbɛ nōo gē bɛɛcɛ ipu ɛga o kɔka ku intanɛti a. Amāŋ ācɛ nōo cigbihi kwu ɛ̄gbā ō gba ku Ujehofa a lɔfu plla ɔ. a (Jé Ācɛ Ɛ́fēsɔsi 4:​14, 15.) Ó lɔfu gbɔɔ ō mimalanyi ācɛ ɔhá, gē ya ikpɛla mla uwa, amāŋ ɔcɛ nōó gē gboji ō cɔnu ŋ. Igbalɛwa, ó kē lɔfu ya aɔdobɔbi eko nɛ ó yɔ i má ojama.—1 Ukɔ́r. 3:3.

6. Ɛgɛnyá nɛ alɔ lɔfu je ō je piya ijimkpa ipu ɛlā ku Ɔwɔico gbla ō jɛ ku ɔyipɛ a? (Má ifoto a.)

⁶ Ɛgɛ nɛ alɔ ka gbɔbu a, Ubáyíbu lɛ ɛgɛ nɛ ɔcɛ gē jɛ ō je piya ijimkpa ipu ɛlā ku Ɔwɔico a, gbla ɛgɛ nɛ ɔyipɛ gē jɛ ō je piya ijimkpa a. Ó lɛ ɔdā alɛwa nɛ ɔyipɛ i jé ŋ, ohigbu ɛnyā ó cɛgbá otabɔ ku ɔcɛ nōo wɛ ijimkpa kóō je otabɔ lɛ ɔ klla bi ɔ jé ɔwɛ. Ocabɔ mafu, ɛ́nɛ́ lɔfu da ɔyi nu nɔnya nɛ́ŋcɛ̄ kóō bi ɔ abɔ eko néē gáā hɛ ɔwɛ. Abɔ ɔyi nɔnya a kē yɔ i je piya ijimkpa a, ɛ́nɛ́ a lɔfu da ɔ kóō hɛ ɔwɛ abɔyi nu, amáŋ ó géē ta ɔ ɛlá kwu ɔ kpɔ kóō lɛ ɔwɛ má lɔɔlɔhi ka umoto duuma i yɔ i wa eko nɛ ó gáā hɛ ɔwɛ ŋ. Eko nɛ ɔyi a kwu piya ijimkpa, ó géē lɔfu jé ɛgɛ nɛ ó géē gbo iyi nu ŋma unwalu ɛgɛnyā a. Ɛgɛ nɛ ayipɛ cɛgbá otabɔ ŋma ɛgiyi ijimkpa ō gbo uwa ŋma unwalu a, Ācɛ O Yɛce Ukraist nōó wɛ ijimkpa ipu ɛlā ku Ɔwɔico ŋ ma cɛgbá otabɔ ku ācɛ nōo wɛ ijimkpa ipu ɛlā ku Ɔwɔico a, kéē gbo uwa ŋma ɔdā duuma nōo lɔfu biya ɛma ku uwa mla Ujehofa, ka é klla ya ōmiya olɔhi. Abɔ ɔhá ku nu, eko nɛ Ācɛ O Yɛce Ukraist nōo wɛ  ijimkpa ipu ɛlā ku Ɔwɔico cɛgbá ō ya ōmiya, é gē gbɛla lipu lipu tu ɛlā nɛ Ubáyíbu ka a, o ya ɛɛ kéē lɔfu jé ɛlá ō gbo ku Ujehofa lɛyikwu ɛlā ɔɔma. Oŋma ɔɔma, é gē bi ɛlā néē nwu a le yuklɔ.

7. Ɔcɛ O Yɛce Ukraist nōo kwu piya ijimkpa ipu ɛlā ku Ɔwɔico ɛ, cɛgbá otabɔ ku ācɛ ɔhá a?

⁷ Ɛnyā wɛ ka Ɔcɛ O Yɛce Ukraist nōo kwu piya ijimkpa ipu ɛlā ku Ɔwɔico ɛ, í gáā cɛgbá otabɔ ŋma ɛgiyi ɔcɛ duuma gɛ ŋ? Ehee. Ekoohi, Ɔcɛ O Yɛce Ukraist nōo wɛ ijimkpa ipu ɛlā ku Ɔwɔico lɔfu cɛgbá otabɔ ŋma ɛgiyi ācɛ ɔhá. Amáŋ ɔcɛ nōó wɛ ijimkpa ipu ɛlā ku Ɔwɔico ŋ, lɔfu da ācɛ ɔhá kéē da ɔ ɔdā nɛ ó cika ō ya, amāŋ ya ōmiya nɛ anu abɔyi nu cɛgbá ō ya a lɛ ɔ. Ɔdā nōo wɛ ɛyɛɛyi a wɛ ka eko duuma nɛ Ɔcɛ O Yɛce nōo wɛ ijimkpa ipu ɛlā ku Ɔwɔico da ācɛ nōo jijeeyi fiyɛ ɔ klla má ɔdā alɛwa ipu oyeeyi ɛ kéē ta ɔ abɔ, ó jé ka anu lɛ uklɔ kóō ya ōmiya ku abɔyi nu a, klla jé ka ó “géē bī iyó kú iyī nū.”—Ugal. 6:5.

8. Aɔwɛ nyá nɛ Ācɛ O Yɛce Ukraist nōo wɛ ijimkpa ipu ɛlā ku Ɔwɔico a wɛ ɛyɛɛyɛyi gwu iyi uwa ta a?

⁸ Ɛgɛ nɛ ō má eyī ku ācɛ nōo wɛ ijimkpa a i wɛ ekponu ŋ ma, ɛgɔɔma nɛ Ācɛ O Yɛce Ukraist nōo wɛ ijimkpa ipu ɛlā ku Ɔwɔico a i wɛ ekponu ŋ duu a. Ocabɔ mafu, ōhī ku uwa lɔfu jijeeyi nɛhi, ācɛ ɔhá kē i mafu ɔtu ō lɛ nɛhi, ācɛ ōhī gē nwula abɔ, ācɛ ɔhá kē i meyinyinyi nɛhi. O ka tu ɔ, eko nɛ Ācɛ O Yɛce Ukraist ɛpa nōo kwu piya ijimkpa ipu ɛlā ku Ɔwɔico ɛ yɔ i má ɛdɔ unwalu ekponu, é lɔfu ya ōmiya ɛyɛɛyɛyi, amáŋ aōmiya a géē cɛtɔha mla ukɔ́ ku Ubáyíbu. Ɛnyā gē ya igbalɛwa, eko duuma nɛ Ɔcɛ O Yɛce Ukraist cɛgbá ō ya ōmiya ŋma lɛ ɛgɛ nɛ ɔtu ku nu jɛga lɛ ɔ lɛ a. Ohigbu ɛnyā, é gáā kɛpɔ tu iyi uwa ɔdaŋ ka aōmiya ku uwa wɛ ɛyɛɛyɛyi ŋ. Ikɔkɔ ɔɔma, é géē piyatɔha kpɔ.—Uróm 14:10; 1 Ukɔ́r. 1:10.

ƐGƐNYÁ NƐ ALƆ LƆFU JE PIYA IJIMKPA IPU ƐLĀ KU ƆWƆICO A?

9. Alɔ gē je piya ijimkpa ipu ɛlā ku Ɔwɔico acigili nɛɛ? Lɛ ɔ teyi peee.

⁹ Ɔyi géē jɛ abɔ eko yɔ i nyɔ a, amáŋ ó lɛ ɔcɛ duuma nōo géē jɛ ipu ɛma ku nu mla Ujehofa ɔdaŋ ka ó ya oceyitikwu duuma ŋ. Ocabɔ mafu, Ācɛ O Yɛce Ukraist nōo yɔ Ukɔrinti a miyɛ ɔkoolɔhi a, lɛ ubatisim ya, miyɛ alelekwu ihɔ ku Ɔwɔico, klla nwu ɛlā alɛwa ŋma ɛlā nɛ ɔyikpo Upɔlu nwu uwa a. (Ācot. 18:​8-11) Naana kpɔ a, ihayi ōhī igbihi néē lɛ ubatisim ya a, alɛwa ku uwa i je piya ijimkpa ipu ɛlā ku Ɔwɔico ŋ kpɔ. (1 Ukɔ́r. 3:2) Ɛgɛnyá nɛ alɔ gáā leyi kwɛɛcɛ ku ɔdā ekponu nyā kóō hii ya da alɔ ŋ ma?

10. Ɔdi nɛ alɔ cɛgbá ō ya piii o ya ɛɛ ku alɔ kwu piya ijimkpa ipu ɛlā ku Ɔwɔico a? (Ujúudu 20)

¹⁰ O ya ɛɛ ku alɔ kwu piya ijimkpa ipu ɛlā ku Ɔwɔico, aflɛyi, alɔ géē lɛ unwu ɔɔma. Ācɛ nōó “jé ɔdá dúúmā ŋ́” klla dɔka ō yɔ ɛgɔɔma a, i gáā je piya ijimkpa gboogboo gla ŋ. (Aíit. 1:22) Alɔ i dɔka ō lɛbɛɛka ācɛ nōo kwu piya ijimkpa ɛ, amáŋ yɔ i gbolo ce adā mɛmla ɛ́nɛ́ uwa kéē ya ōmiya lɛ uwa a ŋ. Ikɔkɔ ɔɔma, alɔ géē dɔka ō ceyitikwu lɔfu lɔfu ō ya ōmiya abɔyi alɔ, nōo géē ya ku ɛma ku alɔ mla Ujehofa kóō yɔ i lɔfu tōōtɔ̄ɔ̄ a. (Jé Ujúudu 20.) Ɔdaŋ ku a yɔ i ceyitikwu ō je piya ijimkpa ipu ɛlā Ɔwɔico, gbɔɔkɔ lɛ Ujehofa kóō ya ku a lɛ ‘ɔtu caca mla ɔfu ō ya ɔdā nɛ ó dɔka ku alɔ ya a.’—Ufíl. 2:13.

11. Ɔdi nɛ Ujehofa je lɛ alɔ o ya ɛɛ ku alɔ kwu piya ijimkpa ipu ɛlā ku Ɔwɔico a? (Ācɛ Ɛ́fēsɔsi 4:​11-13)

¹¹ Ujehofa i leyice ka alɔ géē ya ō jɛ gɔbu ō je piya ijimkpa abɔyi alɔ ŋ. Ipu ujɔ, ó je ācɛ nōo géē leyi kwu alɔ klla nwu alɔ ɛlā a lɛ alɔ. Ācɛ nōo ba nyā gē ta alɔ abɔ ku alɔ lɛ ɛma olɔfu mla Ujehofa klla “je pīya ijímkpa ɔwɛ dóódu bɛ̄ɛka Ohɔ́nyɛtá ā.” (Jé Ācɛ Ɛ́fēsɔsi 4:​11-13.) Ujehofa klla je alelekwu ihɔ ku nu lɛ alɔ nōo géē ta alɔ abɔ ō “jé ɛ́gɛ́nɛ̄ Ohɔ́nyɛtá ā gē gbɛlá lɛ ā.”  (1 Ukɔ́r. 2:​14-16) O ka tu ɔ, Ɔwɔico klla je ɔkpá ku Umatiyu, Umaki, Uluku mla Ujɔni lɛ alɔ nōo gē nwu alɔ ɛgɛ nɛ Ujisɔsi gē gbɛla, gē kɛla, klla gē ya odee ɛpleeko nɛ ó yɔ ipu ɛcɛ nyā a. Oŋma lɛ ō yɛce ɔwɛ nɛ Ujisɔsi gē gbɛla klla gē ya odee a, a lɔfu ya ōmiya ku uwɔ ō je piya ijimkpa ipu ɛlā ku Ɔwɔico a jila.

ƐGƐNYÁ NŌO KLƆCƐ KU AƐLĀ Ō NWU OLIPU KU UBÁYÍBU LƆFU TA ALƆ ABƆ Ō JE PIYA IJIMKPA A

12. Ɔdi wɛ aɛlā ō nwu okpɔcii ku Ubáyíbu a?

¹² O ya ɛɛ ku alɔ kwu piya ijimkpa ipu ɛlā ku Ɔwɔico, alɔ géē cɛgbá ō yɛ gɔbu gā “ɔdā nēé ī nwū aíjímkpa ā cɛ́ɛ́ kú ālɔ̄ kwú igbīhi kú alɔ ú cē kwu ɔdā aflɛ́yí nēé nwū ācɛ o hútu ō jé olɛhɔ̄ kú ācɔ̄lóhɔ́nyɛtá ŋmá ajɛ ā.” Ɛnyā kē wɛ aɛlā ō nwu okpɔcii ku Ubáyíbu. Ocabɔ ku aɛlā ō nwu okpɔcii ku Ubáyíbu nyā lɛ ō ya mla opiyabɔ, ɔtu okpoce, ubatisim, mla oheyi ŋma ɔlekwu. (Uhíb. 6:​1, 2) Ɛnyā wɛ aɛlā ō nwu okpɔcii ku Ubáyíbu nɛ ɛjɛɛji Ācɛ O Yɛce Ukraist kpɔtuce a. Ohigbu ɛnyā, eko nɛ Upita tɔɔna lɛ ācɛ ɛ̄cī ku upɛntikɔsi a, ó kɛla lɛyikwu aɛlā nyā. (Ācot. 2:​32-35, 38) Alɔ géē cɛgbá ō miyɛ aɛlā ō nwu nyā piii gbɔbu ɛɛ ku alɔ je piya ayikpo ku Ukraist. Ocabɔ mafu, Upɔlu ka peee ka ɔdaŋ ka alɔ i kpɔtuce oheyi ŋma ɔlekwu a ŋ, alɔ i gáā lɔfu wɛ ayikpo ku Ukraist ŋ. (1 Ukɔ́r. 15:​12-14) Alɔ cɛgbá ō nwu ɛlā fiyɛ aɛlā ō nwu okpɔcii ku Ubáyíbu nyā, o ya ɛɛ ku alɔ kwu piya ijimkpa ipu ɛlā ku Ɔwɔico.

13. Ɔdi nɛ alɔ cɛgbá ō ya o ya ɛɛ ku alɔ lɛ itene ŋma aɛlā ō nwu olipu nɛ ɔkpá ku Ācɛ Uhíbru 5:14 kɛla lɛyikwu ɔ a? (Má ifoto a.)

¹³ Aɛlā ō nwu olipu ku Ubáyíbu wɛ ɛyɛɛyi gwu aɛlā ō nwu okpɔcii ku Ubáyíbu a ta. Aɛlā ō nwu olipu ku Ubáyíbu i lɛ ō ya mla aíne ku Ujehofa foofunu ŋ, amáŋ mla aukɔ́ ku nu duu, nōo gē ta alɔ abɔ ō jɛyi ku ɛlá ō gbo ku nu a. O ya ɛɛ ku alɔ lɛ itene ŋma aɛlā ō nwu olipu ku Ubáyíbu a, alɔ géē cɛgbá ō klɔcɛ, gbɛla lipu lipu tu ɔ, klla ya ɛji ɔfu ku alɔ ō bi aɛlā nɛ alɔ nwu a le yuklɔ. Abɔ alɔ gē ya lɛ a, alɔ gē nwu ō ya ōmiya nōo géē cɛ lɛ ɔtu he Ujehofa. b—Jé Ācɛ Uhíbru 5:14.

14. Ɛgɛnyá nɛ Upɔlu ta ayinɛ nōo yɔ Ukɔrinti a abɔ kéē kwu piya ijimkpa ipu ɛlā ku Ɔwɔico a?

¹⁴ Ó gē tɔɔtɛ lɛ Ɔcɛ O Yɛce Ukraist nōó wɛ ijimkpa ipu ɛlā ku Ɔwɔico ŋ ma, kóō ya ōmiya  olɔhi eko duuma nɛ ukɔ́ ku Ubáyíbu i yɔ nōo tɛɛma kwu āhɔ̄ ku nu a ŋ. Ɔdaŋ ka íne ku Ubáyíbu duuma i yɔ ŋ, ɔtu lɔfu ya ācɛ ōhī ka é lɔfu ya ɔdā duuma néē dɔka a. Ācɛ ōhī lɔfu dɔka íne amāŋ ukɔ́, ɛga nɛ íne amāŋ ukɔ́ duuma i kóō cɛgbá ŋ ma. Ocabɔ mafu, ó lɛbɛɛka Ācɛ O Yɛce Ukraist nōo yɔ Ukɔrinti a da ɔyikpo Upɔlu ɔka, ɔdaŋ ka ó lɛ íne amāŋ ukɔ́ duuma nōo yɔ ɔdaŋ ka ɔcɛ cika ō lé ɔdole duuma néē le gwɛɛya lɛ ɛcí. Ikɔkɔ ō da uwa ɔdā néē géē ya a, Upɔlu le mafu ka eyeeye ku uwa lɛ íkwu ō “yá ɔdā dúú nōo he [ɔ] ɔtū ā,” oŋma lɛ ɛgɛ nɛ ɔtu ku uwa jɛga lɛ uwa lɛ a. Ó kɛla lɛyikwu aukɔ́ ku Ubáyíbu ōhī nōo lɔfu ta uwa abɔ ya ōmiya olɔhi, nōo géē ya ku ɔtu kóō ŋmo uwa ɛpɔbi amāŋ hɛ ācɛ ɔhá gwonu ŋ. (1 Ukɔ́r. 8:​4, 7-9) Upɔlu yɔ i nwu ayinɛ nōo yɔ Ukɔrinti a kéē bi Ubáyíbu le ya ōmiya ku abɔyi uwa, ikɔkɔ ō gbolo ce ācɛ ɔhá amāŋ yɔ i dɔka ukɔ́ mla íne foofunu a. O bu ɔwɛ nyā, ó yɔ i ta uwa abɔ kéē kwu piya ijimkpa.

15. Ɛgɛnyá nɛ Upɔlu ta Ācɛ Uhibru nōo wɛ Ācɛ O Yɛce Ukraist a abɔ kéē yɔ i jɛ gɔbu ipu ɛlā ku Ɔwɔico a?

¹⁵ Alɔ klla nwu ɛlā ocɛgbá ɔhá ŋma ɔkpá nɛ Upɔlu ta gē lɛ Ācɛ O Yɛce Ukraist nōo yɔ Uhibru a. Ōhī ku uwa i ya ku ɛma néē lɛ mla Ujehofa a kóō lɛ ɔfu ŋ. ‘Ikɔkɔ néē í lé ɔdōlé olɔfú ā, é cɛgbá kéē gwá amɛ̄ kpɔ́’ ɛgɛ nɛ ɔcɛ i kɛla a. (Uhíb. 5:12) É nwu klla cɛ mla aɛlā ɛpɛpɛ nɛ Ujehofa yɔ i nwu uwa ŋma ōjila ku ujɔ a ŋ. (Aíit. 4:18) Ocabɔ mafu, alɛwa ku ācɛ Ujiyu nōo kpɔtuce Ujisɔsi a yɔ i yɛce Íne ku Umosisi a kpɔ, naana nɛ ɛya ō gwo ku Ujisɔsi lɛ Íne ku Umosisi a ŋmonyi ihayi ofu ce igwo gbɔbu lɛ eko ɔɔma a. (Uróm 10:4; Utáy. 1:10) Ihayi ofu ce igwo nōo gáā yɛ a, je ɛnɛɛnɛ ɛga lɛ Ācɛ O Yɛce Ukraist a kéē jé ka é cɛgbá ō yɛce Íne ku Umosisi a gɛ ŋ! Ohigbu ɛnyā, Upɔlu yɔ i ceyitikwu ō ta uwa abɔ kéē miyɛ aɛlā ɔkwɛyi olipu nɛ ó yɔ i nwu uwa a. Ɔkpá nɛ ó ta gē lɛ uwa a, ta uwa abɔ ō má ka ɔwɛ ɛpɛpɛ nɛ Ujisɔsi le kwaajɛ ō gba Ujehofa ɛ̄gbā a lɔhi fiyɛ a. Ó klla je ɔtu ō lɛ lɛ uwa kéē gɔbu yɔ i tɔɔna, naana néē yɔ i má o ya ŋmo bɔbi bɔbi ŋma ɛgiyi ācɛ Ujiyu a.—Uhíb. 10:​19-23.

ƆDIYA NƐ ALƆ I CIKA Ō LƆTUCE IYI ALƆ FIYƐ ƆFU Ŋ MA?

16. Ɔdā ɔhá nyá nɛ alɔ géē cɛgbá ō ya batɔ ō jɛ gɔbu ō kwu piya ijimkpa ipu ɛlā ku Ɔwɔico a?

¹⁶ Alɔ i cɛgbá ō ceyitikwu ō kwu piya ijimkpa foofunu ŋ, amáŋ alɔ cika ō wɛ ijimkpa ɔɔma gɔbu. Ɛnyā wɛ ka alɔ i cika ō yɔ i lɔtuce iyi alɔ  fiyɛ ɔfu ŋ. (1 Ukɔ́r. 10:12) Alɔ cɛgbá ō yɔ i “jila iyī [alɔ] má,” o ya ɛɛ ku alɔ le má ku alɔ yɔ i jɛ gɔbu.—2 Ukɔ́r. 13:5.

17. Ɛgɛnyá nɛ ɔkpá nɛ Upɔlu ta gē lɛ ācɛ Ukolosi a mafu ɛgbá ō gɔbu wɛ ijimkpa ipu ɛlā ku Ɔwɔico a?

¹⁷ Naana nɛ Ācɛ O Yɛce Ukraist nōo yɔ Ukolosi a kwu piya ijimkpa ipu ɛlā ku Ɔwɔico ɛ ma, Upɔlu tu uwa ukɔ́ kéē leyi kwɛɛcɛ lɔɔlɔhi o ya ɛɛ ku ɛlá ō gbo ku ɛcɛ nyā kóō plla uwa ŋ. (Ukól. 2:​6-10) Epafrasi nōo kē jé ayinɛ nōo yɔ ipu ujɔ a lɔɔlɔhi a, gē gbɔɔkɔ eko doodu o ya ɛɛ kéē hayi kpaakpa lɔfu bɛɛka ācɛ nōo wɛ “ijímkpa ipú ɛlā Ɔwɔicō ā.” (Ukól. 4:12) Ɛlā nyá nɛ alɔ lɔfu nwu ŋma ɛnyā a? Upɔlu mla Epafrasi jé ka o ya ɛɛ ku alɔ gɔbu wɛ ijimkpa, alɔ cɛgbá otabɔ ku Ɔwɔico. Amáŋ alɔ klla cɛgbá ō jé, ka alɔ géē gɔbu yɔ i ya ku ɛma ku alɔ mla Ujehofa kóō yɔ i lɔfu tōōtɔ̄ɔ̄. É dɔka ku ācɛ Ukolosi a kéē gɔbu wɛ ijimkpa, amāŋ ācɛ nōo le jikoko ipu ɛlā ku Ɔwɔico, naana néē yɔ i má unwalu ɛyɛɛyɛyi a.

18. Ɔdi lɔfu ya da Ɔcɛ O Yɛce Ukraist nōo kwu piya ijimkpa ipu ɛlā ku Ɔwɔico ɛ ma? (Má ifoto a.)

¹⁸ Upɔlu pi ācɛ Uhibru a ahɔ̄ ka Ɔcɛ O Yɛce Ukraist nōó gɔbu ō wɛ ijimkpa ipu ɛlā ku Ɔwɔico ŋ, i gáā lɔfu teyi olɔhi ku Ɔwɔico gboogboo gɛ ŋ. Ɔdaŋ ka ó ta ō lɛyitaajɛ lɛ Ujehofa, ó lɔfu tu ŋma ɛgiyi nu ligbo ligbo, nɛ ó gáā lɔfu piyabɔ ŋma ipu íne ō biya ku nu cɛɛ kóō miyɛ ō je yɛhi ku Ɔwɔico ŋ. Alɔ kē gweeye nɛhi ka ācɛ Uhibru a i yɔ ipu ɛdɔ āhɔ̄ ɛgɛnyā ŋ. (Uhíb. 6:​4-9) Ó lɛ a, ayinɛ alɔ icɛ nōó gē wa ōjila ku ujɔ gɛ ŋ, amāŋ néē je baajɛ ŋma ipu ujɔ, amáŋ nōo gáā lɛ opiyabɔ ya igbihaajɛ a kē bɛɛ? Ɛgɛ néē tu iyi uwa waajɛ ya opiyabɔ a, mafu ka é wɛ ɛyɛɛyi gwu ācɛ nɛ Upɔlu ta ɔkpá lɛyikwu uwa a. Amáŋ eko néē le cigbihi wa ɛgiyi Ujehofa, é géē cɛgbá otabɔ nɛ ó gē je lɛ ācɛ a. (Isík. 34:​15, 16) Anyakwɔcɛ ku ujɔ lɔfu ya ōmiya ku ɔyinɛ nɔnyilɔ amāŋ ɔyinɛ nɔnya nōo wɛ ijimkpa ipu ɛlā ku Ɔwɔico, kéē ta uwa abɔ o ya ɛɛ kéē lɛ ɛma olɔfu lɛ mla Ujehofa kpɔ.

19. Ōmiya nyá nɛ alɔ cika ō lɛ a?

¹⁹ Ɔdaŋ ku a yɔ i ceyitikwu ō kwu piya ijimkpa ipu ɛlā ku Ɔwɔico, a lɔfu ya ōmiya ku uwɔ a jila! Gɔbu ku a yɔ i nwu aɛlā ɔkwɛyi olipu ŋma ipu Ubáyíbu, mla ō yɔ i ceyitikwu ɛ̄cī doodu ō gbɛla bɛɛka Ujehofa a. Ɔdaŋ nɛ a kē kwu piya ijimkpa ipu ɛlā ku Ɔwɔico ɛ, ceyitikwu ō ya ɔdā duuma nɛ a ya gla a ō gɔbu wɛ ijimkpa ɔɔma piyoo.