A Jé?
Ɔdiya nɛ acɛnyilɔ nōó wɛ ācɛ ku Isrɛlu ŋ ma wɛ ipu aicɔɔja ku Udefidi nōo wɛ Ɔcɛ́ a?
ACƐNYILƆ nōó wɛ ācɛ ku Isrɛlu ŋ ma wɛ ipu aicɔɔja ku Udefidi nōo wɛ Ɔcɛ́ a. Ocabɔ mafu, Useleki nōo wɛ ācɛ Amɔn a, Uriya nōo wɛ ɔcɛ Uhɛti a, mla Ituma ɔcɛ Umowabu a. a (1 Uklɔ. 11:39, 41, 46) Ācɛ nōo ŋma ‘Ukereti, Upɛliti, mla Ugati’ a wɛ ipu aicɔɔja ku Udefidi a duu. (2 Usám. 15:18) Ó lɛbɛɛka ācɛ Ukereti mla Upɛliti a wɛ ācɛ nōo lɛ ɛma mla ācɛ Ufilistiya a. (Isík. 25:16) Ācɛ Ugati a wɛ ācɛ nōo lā ipu igeli ku Ufilistiya nōo yɔ Ugati a.—Ujós. 13:2, 3; 1 Usám. 6:17, 18.
Ɔdiya nɛ Udefidi jɛga lɛ acɛnyilɔ ɛgɛnyā kéē wɛ ipu aicɔɔja ku nu a? Ó lɔtuce lɔfu lɔfu ka é wɛ ācɛ nōo yɔ kwu ɔ gā ajaajɛ, ɛ̄nɛ̄ o kē cɛgbá fiyɛ duu a wɛ ka é yɔ kwu Ujehofa gā ajaajɛ duu. Ocabɔ mafu, lɛyikwu ācɛ Ukereti mla Upɛliti a, ɔkpá néē hi ka u The New Interpreter’s Dictionary of the Bible a kahinii: “É yɔ kwu Udefidi gā ajaajɛ ɛpleeko nɛ āhɔ̄ lɔnɔ lɛ ɔ fiyɛ duu eko nɛ ó yɔ i lé ɔcɛ́ a.” Ɛgɛnyá néē mafu ka é yɔ kwu Udefidi gā ajaajɛ a? Eko nɛ “odúúdú ācɛ kú Ísrɛ̄lu” nyɛɛ ŋma ɛgiyi Udefidi nōo wɛ Ɔcɛ́ a gbɔɔ ō “yɛce Usséba” a, ācɛ Ukereti mla Upɛliti a yɔ kwu Udefidi gā ajaajɛ, klla ta ɔ abɔ ō lɛ abɔ ci ikpɛyi olɔfu nɛ Usseba yɔ i ya ta ɔcɛ́ ō lé ku Udefidi a. (2 Usám. 20:1, 2, 7) Ipu āhɔ̄ ɔhá, Adonija nōo wɛ ɔyi nɔnyilɔ ku Udefidi nōo wɛ Ɔcɛ́ a ceyitikwu kóō kwu piya ɔcɛ́ ikɔkɔ Usolomɔn. Ācɛ Ukereti mla Upɛliti a yɔ kwu Udefidi gā ajaajɛ kpɔ, klla ta ɔ abɔ ō kwu Usolomɔn i piya ɔcɛ nōo géē lé ɔcɛ́ kwɛyi Udefidi ohigbu ka anuɔ nɛ Ujehofa fu a.—1 Aɔ́cɛ́ 1:24-27, 38, 39.
Ɔcɛ ɔhá nōó wɛ ɔcɛ ku Isrɛlu ŋ nōo klla yɔ kwu Udefidi gā ajaajɛ a, wɛ Itayi ɔcɛ Ugati a. Itayi mla aicɔɔja ku nu nōo wɛ ācɛ ula ce ofu igwo (600) a je otabɔ lɛ Udefidi nōo wɛ Ɔcɛ́ a, eko nɛ ɔyinɔnyilɔ ku Udefidi nōo lé ka Absalɔm a yɔ i ceyitikwu ō ya ku ācɛ Isrɛlu a kóō kwu ɔ i piya ɔcɛ́ ikɔkɔ Udefidi a. Udefidi da Itayi ka ohigbu ka ó wɛ ɔcɛ Isrɛlu ŋ ma, ka ó cɛgbá ō nuunu ohigbu nu ŋ. Amáŋ Itayi da Udefidi kahinii: “N gbo Ɔwɔicō, mɛ́mla awɔ nōo wɛ Ágábáidu ā, n géē ga ɛga dóódu nɛ̄ a í nyɔ̄ ā mɛ́mla uwɔ. Ɔ́dāŋ kōō cɛ̄ ikwū nááná n le tútū ō kwú mɛ́mla uwɔ dúú!”—2 Usám. 15:6, 18-21.
Itayi yɔ kwu Udefidi nōo wɛ ɔcɛ nɛ Ujehofa lɛ anɔ tu ɔ ɛyi kóō wɛ ɔcɛ́ a gā ajaajɛ
Naana nɛ ācɛ Ukereti, ācɛ Upɛliti mla ācɛ Ugati i wɛ ācɛ Isrɛlu ŋ ma, é lɛ ojilima nɛhi lɛ Ujehofa nōo wɛ Ɔwɔico ɔkwɛyi mla Udefidi nɛ Ujehofa lɛ anɔ tu ɔ ɛyi kóō wɛ ɔcɛ́ a. Ó géē jɛ Udefidi eyī nɛhi ka ó lɛ ɛdɔ acɛnyilɔ ɛgɛnyā nōo yɔ kwu ɔ gā ajaajɛ!
a Íne ku Ɔwɔico nōo yɔ ipu ɔkpá ku Oblatūkíne 23:3-6 a, ci ācɛ Amɔn mla ācɛ Umowabu a ŋma ō gā ipu ujɔ ku ācɛ Isrɛlu a. Amáŋ, ó lɛbɛɛka íne nyā yɔ i kɛla lɛyikwu íkwu nɛ ɔcɛ lɛ ō je piya éyi ku ācɛ Isrɛlu a. Ó kē ci ācɛ nōó wɛ ācɛ Isrɛlu ŋ ma ŋma ō piyatɔha mla ācɛ Isrɛlu amāŋ ō lā mla ācɛ ɔlɛ Ɔwɔico ŋ. Má Insight on the Scriptures, Volume 1, p. 95.
