1. Ɛgɛnyá nɛ ɔwa ku Ujehofa piyatɔha eko ku Ācɛ O Yɛce Ukraist ku eko aflɛyi a?

 EKO duuma nɛ Ujehofa lɛ uklɔ je lɛ ācɛ ɔlɛ nu ō ya, ó dɔka kéē ya ɔ ɔwɛ igbaji ŋ. (1 Ukɔ́r. 14:33) Ocabɔ mafu, ó wɛ ococɛ ku Ɔwɔico kéē tɔɔna ku ɔkoolɔhi a ipu oduudu ɛcɛ a. (Umát. 24:14) Ujehofa lɛ Ujisɔsi fu kóō leyi kwu uklɔ ɔɔma a. Ujisɔsi kē le má ka é yɔ i yuklɔ ɔɔma ɔwɛ néē piyatɔha, ó wɛ ɔwɛ igbaji ŋ. Ɛpleeko ku Ācɛ O Yɛce Ukraist ku eko aflɛyi, eko néē lɛ aujɔ ɛyɛɛyɛyi kwaajɛ a, é lɛ anyakwɔcɛ ku ujɔ fu kéē tu ayinɛ a ukɔ́ klla bi uwa jé ɔwɛ. (Ācot. 14:23) Ipu Ujerusalem ɛpleeko ku Ācɛ O Yɛce Ukraist ku eko aflɛyi a, ígwu nōo gē leyi kwu ujɔ eko ɔɔma nōo lɛ ō ya mla ayikpo ku Ujisɔsi mla anyakwɔcɛ nōo yɔ Ujerusalɛm a, gē ya ōmiya nɛ ɛjɛɛji aujɔ a géē cɛgbá ō yɛce a. Abɔ é kē yɔ i lɛ aujɔ kwaajɛ ɛga ɛyɛɛyɛyi a, anyakwɔcɛ ku ujɔ nōo yɔ eyeeye ku aujɔ a gē da ayinɛ a lɛyikwu aōmiya nyā a. (Ācot. 15:2; 16:4) Ohigbu ku ayinɛ a yɛce ukɔ́ néē miyɛ a, “é lɔfú tū [ujɔ] ā iyē kéē cɛ̄ɛ̄lā ā lɔɔlɔhi, anɔ́ɔ áluka kú ācɛ nēe ī cɛ̄lɔ̄ɔwɔicō gē lɛwa tōōtɔ̄ɔ̄ ɛ̄cī dóódu á.”—Ācot. 16:5.

2. Ŋmiifi ihayi ku 1919, ɛgɛnyá nɛ Ujehofa ma ɔwɛ fu lɛ ācɛ ɔlɛ nu klla je ɔdole ku ɛlā Ɔwɔico lɛ uwa a?

² Ujehofa gɔbu yɔ i piya ācɛ ɔlɛ nu tɔha icɛ duu. Ŋmiifi ihayi ku 1919 mla otabɔ ku Ujehofa, Ujisɔsi humayi bi ígwu ligii ku acɛnyilɔ néē lɛ anɔ tu uwa ɛyi a le ma ɔwɛ fu lɛ alɔ ɛgɛ nɛ alɔ géē piyatɔha ō yuklɔ ku ɔna ō ta a, mla ō je ɔdole ku Ɛlā Ɔwɔico lɛ alɔ eko okpaakpa a. a (Ulúk. 12:42) Ó kē teyi peee ka Ujehofa  yɔ i hɔha ce uklɔ nɛ ígwu ɔɔma yɔ i ya a.—Ayis. 60:22; 65:​13, 14.

3-4. (a) Je ocabɔ nōo mafu ɛgɛ nɛ alɔ gē lɛ itene abɔ alɔ piyatɔha a. (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Ɔdaŋ ku alɔ i gē yɛ i piyatɔha ŋ, ó gē yɛ i tɔɔtɛ lɛ alɔ ō yuklɔ nɛ Ujisɔsi je lɛ alɔ ō ya a ŋ. (Umát. 28:​19, 20) Ocabɔ mafu, ɔdaŋ ku ayinɛ nōo yɔ i bi alɔ jé ɔwɛ a i gē yɛ i ya ku alɔ piyatɔha ō yuklɔ ku ɔna ō ta a ɛjɛɛji ɛga nɛ ujɔ ku alɔ cika ō tɔɔna a ŋ, ɔɔma lé ka alɔ lɔfu tɔɔna ɛga duuma nōo he alɔ ɔtu a. Alɔ lɔfu yɔ i tɔɔna ɔwɛ ɛga éyi foofunu ŋma eko teeko, ó kē lɛ ɛga ɔhá nɛ alɔ i kóō gáā lɔfu tɔɔna ŋ duudu. A lɔfu gbɛla lɛyikwu aɔwɛ ɔhá nɛ alɔ gē lɛ itene ohigbu ku alɔ piyatɔha a?

⁴ Ɛgɛ nɛ Ujisɔsi ya ku ayikpo ku nu kéē piyatɔha eko nɛ ó yɔ ipu ɛcɛ nyā a, ó gɔbu yɔ i piya ācɛ ɔlɛ Ɔwɔico tɔha icɛ duu. Ipu ikpɛyi ɛlā nyā, alɔ géē kɛla lɛyikwu ocabɔ nɛ Ujisɔsi le taajɛ a, mla ɛgɛ nɛ ɔwa ku alɔ gē yɛce ocabɔ ɔɔma a. Alɔ klla géē kɛla lɛyikwu ɛgɛ nɛ alɔ lɔfu mafu ku alɔ lɔtuce ɔwa ku Ujehofa a.

ƆWA KU ALƆ GĒ YƐCE OCABƆ KU UJISƆSI

5. Ɔwɛ éyi nyá nɛ ɔwa ku alɔ gē yɛce ocabɔ ku Ujisɔsi a? (Ujɔ́ni 8:28)

⁵ Ujisɔsi nwu ɛlā ŋma ɛgiyi Adā nu nōo yɔ ɔkpanco a ɔdā nōo géē ya mla ɛlā nɛ ó géē ka a. Ɔwa ku Ujehofa gē yɛce ocabɔ ku Ujisɔsi ŋma lɛ ō bi Ɛlā ku Ɔwɔico le ta alɔ abɔ ō jé ɔdā okpaakpa mla ɔdobɔbi, mla ō tu alɔ ukɔ́ lɛyikwu ɛgɛ nɛ alɔ cika ō lā oyeeyi ku alɔ a. (Jé Ujɔ́ni 8:28; 2 Utím. 3:​16, 17) Ŋma eko teeko, alɔ gē miyɛ ɛlá ō tu kwu ō jé Ɛlā ku Ɔwɔico mla ō bi ɛlā nɛ alɔ jé a le yuklɔ. Ɛgɛnyá nɛ alɔ gē lɛ itene ŋma ō bi ukɔ́ nyā le yuklɔ a?

6. Itene nyá nɛ alɔ gē lɛ ɔdaŋ ka alɔ bi aɔkpá ku alɔ le ya oklɔcɛ ku Ubáyíbu a?

⁶ Alɔ gē lɛ itene nɛhi eko duuma nɛ alɔ bi aɔkpá ku alɔ le ya oklɔcɛ ku Ubáyíbu. Ocabɔ mafu, ó gē tɔɔtɛ lɛ alɔ ō lɛ ɛlā nɛ Ubáyíbu ka a miya mla ukɔ́ nɛ alɔ gē miyɛ ŋma ɛgiyi ɔwa ku alɔ o bu ipu aɔkpá ku alɔ a. Ohigbu ku alɔ má peee ka ukɔ́ nɛ ɔwa ku alɔ gē tu alɔ a ŋma ipu Ubáyíbu a, ó gē ya ku alɔ lɔtuce ɔwa ku alɔ tōōtɔ̄ɔ̄ fiyɛ.—Uróm 12:2.

7. Ɛlā nyá nɛ Ujisɔsi tɔɔna a, ɛgɛnyá nɛ ɔwa ku Ujehofa kē i yɛce ocabɔ ku nu a?

⁷ Ujisɔsi “tɔ́ɔna kú ɔ̄kōolɔhi ā.” (Ulúk. 4:​43, 44) Ujisɔsi klla je ɔ́da lɛ ayikpo ku nu kéē tɔɔna lɛyikwu Ajɔɔcɛ a. (Ulúk. 9:​1, 2; 10:​8, 9) Icɛ, ɛjɛɛji ācɛ nōo piyatɔha mla ɔwa ku Ujehofa a gē tɔɔna ku ɛlā ku Ajɔɔcɛ a, ɛga duuma néē lā amāŋ ɛga ku uklɔ duuma néē kóō lɛ a.

8. Ɛga ojilima nyá nɛ alɔ lɛ a?

⁸ Ó wɛ ɔdā ojilima nɛhi lɛ alɔ ō da ācɛ ɔhá lɛyikwu Ajɔɔcɛ Ku Ɔwɔico! Ó wɛ ɛjɛɛji ācɛ lɛ ɛnɛɛnɛ ɛga nyā a ŋ. Ocabɔ mafu, eko nɛ Ujisɔsi yɔ ipu ɛcɛ nyā a, ó jɛga lɛ aalelekwu obɔbi kéē kɛla lɛyikwu ɔ ŋ. (Ulúk. 4:41) Icɛ, gbɔbu ɛɛ ku ɔcɛ duuma kóō gbɔɔ ō tɔɔna mla ācɛ ɔlɛ Ujehofa, ɔcɛ ɔɔma cika ō yɔ i lā oyeeyi ɔwɛ nōo he Ujehofa ɔtu a. Alɔ gē mafu ku ɛnɛɛnɛ ɛga nɛ alɔ lɛ ō tɔɔna a jɛ alɔ eyī, ŋma lɛ ō da ācɛ ɔhá lɛyikwu Ajɔɔcɛ Ku Ɔwɔico ɛga duuma mla eko duuma nōo tɔɔtɛ lɛ alɔ a. Alɔ dɔka ō lɛbɛɛka Ujisɔsi, ohigbu ɛnyā, alɔ gē ya ɔdā duuma nɛ alɔ ya gla a ō tɔɔna lɛ ācɛ ɔhá mla ō nwu uwa ɛlā ɔkwɛyi a.—Umát. 13:​3, 23; 1 Ukɔ́r. 3:6.

9. Ɛgɛnyá nɛ ɔwa ku alɔ ya ku ācɛ kéē jé iye ku Ɔwɔico a?

⁹ Ujisɔsi ya ku ācɛ kéē lɛ iye ku Ɔwɔico jé. Ipu ɔkɔ nɛ ó gba lɛ Adā nu nōo yɔ ɔkpanco a, Ujisɔsi kahinii: “N le yá kéē lɛ [iye ku] uwɔ jé” ɛ. (Ujɔ́n. 17:26) Ɔwa ku Ujehofa gē yɛce ocabɔ ku Ujisɔsi, ŋma lɛ ō ya ɔdā duuma nōo tɔɔtɛ lɛ uwa a ō ta ācɛ ɔhá abɔ kéē wa i lɛ iye ku Ɔwɔico jé. Ɔwɛ éyi nɛ ɔwa ku alɔ ya ɛnyā a, wɛ o bu ipu Ubáyíbu ku New World Translation of the Holy Scriptures a. Ubáyíbu néē cɔwɔ nyā lɛ iye  ku Ɔwɔico cigbihi gā ɛga okpaakpa nōó cika ō yɔ a. Aya amāŋ oduudu aɛga ku Ubáyíbu néē cɔwɔ nyā yɔ ipu uce nōo fiyɛ ofu igwɛɛpa ce igwo (270). Ipu Appendixes A4 mla u A5 ku Ubáyíbu néē cɔwɔ nyā, a géē nwu ɛlā fiyɛ lɛyikwu ɔdā nōo ya ɛɛ néē lɛ iye ku Ɔwɔico cigbihi gā ɛga okpaakpa nōó cika ō yɔ, mla ɛgɛ néē bi le ya ɔɔma a. Appendix C, nōo yɔ ipu Study Bible a, lɛ ɔ ta alɔ eyī peee ka ó le kpaakpa ka iye ku Ɔwɔico cika ō bɛɛcɛ ɛga ofu igwoleyi ce igwo ahaapa (237) ipu Ɔkpiihɔ Ŋma Okonu Ku Ācɛ Ugriisi Aku Ācɛ O Yɛce Ukraist a.

10. Ɔdi nɛ a nwu ŋma ɛlā nɛ ɔnyā éyi nōo lā ipu Myanmar a ka a?

¹⁰ Bɛɛka Ujisɔsi a, alɔ dɔka ō je otabɔ lɛ ācɛ alɛwa nōo tɔɔtɛ gla a kéē wa i lɛ iye ku Ɔwɔico jé. Eko nɛ ɔnyā éyi nōo lā ipu Myanmar nōo wɛ ihayi ofu ɛta ce ahaapa (67) a gáā le nwu ka Ɔwɔico lɛ iye a, ó gbɔɔ ō jikwu anu ó da ɔcɛ nōo gē klɔcɛ ku Ubáyíbu mla ɔ a kahinii: “Ɛnyā wɛ eko aflɛyi ipu oyeeyi ku um nɛ um po ka iye ku Ɔwɔico lé ka Ujehofa a. . . . A lɛ ɛlā ocɛgbá nɛ um cika ō nwu fiyɛ duu a nwu um ɛ.” Ɛgɛ nɛ alɔ má ŋma ipu ɔ̄kā nyā a, eko duuma nɛ ācɛ lɛ iye ku Ɔwɔico jé, ó lɔfu je oyeeyi ku uwa piyabɔ.

GƆBU KU A YƆ I MAFU KU A LƆTUCE ƆWA KU ALƆ

11. Ɛgɛnyá nɛ anyakwɔcɛ ku ujɔ lɔfu mafu ka é lɔtuce ɔwa ku Ujehofa a? (Má ifoto a.)

¹¹ Ɔwɛ éyi nyá nɛ anyakwɔcɛ ku ujɔ lɔfu mafu ka é lɔtuce ɔwa ku Ɔwɔico a? Eko duuma nɛ ɔwa ku alɔ lɛ ɔwɛ mafu lɛ anyakwɔcɛ ku ujɔ lɛyikwu ɛgɛ néē cika ō ya odee, é cɛgbá ō jé ɔ lɔɔlɔhi mla ō ya ɔdā duuma néē ya gla a ō bi uwa le yuklɔ. Ocabɔ mafu, é gē miyɛ ɔwɛ o mafu lɛyikwu ɛgɛ néē géē ya aya ɛyɛɛyɛyi mla ɛgɛ néē géē gbɔɔkɔ kwɛyi ujɔ foofunu ŋ, amáŋ é klla gē da uwa ɛgɛ néē géē teyi kwu aala ku Ukraist a. Ɔdaŋ ka anyakwɔcɛ ku ujɔ bi ɛjɛɛji ukɔ́ nɛ ɔwa ku alɔ gē tu uwa a le yuklɔ, ayinɛ a géē má ka Ujehofa yihɔtu ku uwa klla gē teyi kwu uwa.

12. (a) Ɔdiya nɛ alɔ cika ō lɛyitaajɛ lɛ ācɛ nōo yɔ i bi alɔ jé ɔwɛ a? (Ācɛ Uhíbru 13:​7, 17) (b) Ɔdiya nɛ alɔ cika ō leyi kwu uce ō ya olɔhi ku ācɛ nōo yɔ i bi alɔ jé ɔwɛ a?

¹² Eko duuma nɛ anyakwɔcɛ ku ujɔ lɛ ɔdā nɛ alɔ cika ō ya a da alɔ, alɔ cika ō cɛ ŋma ɔtu ō ya lɛ a. Ŋma lɛ ō ya lɛ a, alɔ géē ya kóō tɔɔtɛ lɛ ācɛ nōo yɔ i bi alɔ jé ɔwɛ a ō yuklɔ ku uwa. Ubáyíbu ta alɔ ɔtu kwu ɔtu ō lɛyitaajɛ lɛ ācɛ nōo gē bi alɔ jé ɔwɛ a. (Jé Ācɛ Uhíbru 13:​7, 17.) Ekoohi ō ya ɛnyā lɔfu lɔnɔ nɛhi. Ɔdiya a? Ohigbu ka acɛnyilɔ nyā wɛ ācɛ nōó jila iyē ŋ. Amáŋ, ɔdaŋ ku alɔ gbɔɔ ō leyi ku alɔ kwu ɛga néē gā ya lɔhi ŋ ma, ikɔkɔ ō leyi kwu uce ō ya olɔhi ku uwa, alɔ gē yɔ i ta aolɛla ku alɔ abɔ. Ɔwɛ ɛgɛnyá a? Aolɛla ku alɔ dɔka ku alɔ lɛ aafu ka Ɔwɔico i yɔ i bi ɔwa ku nu le ma ɔwɛ fu lɛ alɔ ŋ. Ohigbu ɛnyā, ɔdaŋ ka alɔ gbɔɔ ō gbɛla obɔbi lɛyikwu anyakwɔcɛ ku ujɔ, alɔ lɔfu gbɔɔ ō gbɛla obɔbi lɛyikwu ɔwa ku alɔ duu. Ɛnyā kē géē ya ku alɔ hii lɔtuce ɔwa ku alɔ gɛ ŋ. Ɔdi nɛ alɔ lɔfu ya, o ya ɛɛ ku alɔ jé aɛlā ɛkɛmgbɛ nɛ aolɛla ku alɔ gē ka, mla ō ta aɛlā ɛkɛmgbɛ ɔɔma a?

A CƐ LƐ ĀCƐ ƆHÁ YA KU A HII LƆTUCE ƆWA KU ALƆ GƐ Ŋ

13. Ɛgɛnyá nɛ aolɛla ku Ɔwɔico ceyitikwu ya ku ācɛ kéē bi eyī obɔbi le má ɔwa ku alɔ a?

¹³ Ācɛ nōo gē bɛyikwu Ɔwɔico a, gē ceyitikwu ya ku aɔdā olɔhi nɛ ɔwa ku Ujehofa gē ya a kóō lɛbɛɛka ɔdobɔbi ipeyi ācɛ ɔhá. Ocabɔ mafu, Ujehofa dɔka ku alɔ lɛ ɔkpiye ku alɔ mla uce ō ya ku alɔ tu yeŋee, mla ō gba ɔ ɛ̄gbā ɔwɛ nɛ ó dɔka a. Ó ka ka ɔcɛ duuma nōo gɔbu yɔ i ya ɔdobɔbi, nōó klla dɔka ō piya uce ō ya obɔbi ku nu a abɔ ŋ, i gáā gɔbu wɛ ipu ujɔ ku nu ŋ. (1 Ukɔ́r. 5:​11-13; 6:​9, 10) Alɔ gē lɛyitaajɛ lɛ ɔ́da ku Ubáyíbu ɔɔma. Amáŋ ohigbu ku alɔ gē  lɛyitaajɛ lɛ ɔ́da nyā a, ācɛ nōo gē bɛyikwu alɔ a ka ka alɔ i yihɔtu ācɛ ŋ, ka alɔ gē ŋmo ācɛ ɛpɔbi, ka alɔ i klla gē ya ɛla ɛmɛɛma mla ācɛ nōo lɛ uce ō ya nōo wɛ ɛyɛɛyi a ŋ.

14. Ɔnyɛ yɔ igbihi ku aɛlā ɛkɛmgbɛ néē gē ka lɛyikwu ɔwa ku alɔ a?

¹⁴ Jé ɔcɛ nōo yɔ i bɛyikwu ɔwa ku alɔ a. Usetan wɛ ɔcɛ nōo yɔ igbihi ku aɛlā ɛkɛmgbɛ néē gē ka lɛyikwu alɔ a. Ó wɛ “ádā kú ɛ̄kɛ̄mgbɛ̄.” (Ujɔ́n. 8:44; Ohút. 3:​1-5) Ohigbu ɛnyā, alɔ cika ō leyice ka Usetan géē bi aolɛla ku alɔ le nyila aɔ̄kā ɛkɛmgbɛ lɛyikwu ɔwa ku Ujehofa. Ɛnyā wɛ ɔdā nōo ya da Ujisɔsi mla Ācɛ O Yɛce Ukraist ku eko aflɛyi a.

15. Ɔdi nɛ aotrɛyi ku ɔwɛ o gba ɛ̄gbā ya Ujisɔsi mla ayikpo ku nu a?

¹⁵ Naana nɛ Ujisɔsi nōo wɛ Ɔyinɔnyilɔ ku Ɔwɔico a wɛ ɔcɛ nōo jila iyē klla ya auklɔ idaago alɛwa a, Usetan bi ācɛ ōhī le nyila aɛlā ɛkɛmgbɛ alɛwa lɛyikwu ɔ. Ocabɔ mafu, aotrɛyi ku ɔwɛ o gba ɛ̄gbā a da ācɛ a ka “ɔcɛ́ kú aébilíi” je ɔfu nɛ Ujisɔsi gē bi le na alelekwu obɔbi a lɛ ɔ a. (Umák. 3:22) Eko néē kwu Ujisɔsi yɔ i da ɔ ɔka a, aotrɛyi ku ɔwɛ o gba ɛ̄gbā a le ije ce ba Ujisɔsi ka ó gē ka obɔbi lɛyikwu Ɔwɔico, klla ya ku ācɛ a kéē cɛ ō kwu Ujisɔsi i ŋmo. (Umát. 27:20) Igbihaajɛ, eko nɛ ayikpo ku Ujisɔsi yɔ i tɔɔna lɛyikwu ɔkoolɔhi a, ācɛ nōo gē bɛyikwu uwa a “lɛ ɔtū kú aílɔ́wá ā wu klíicō, é kla lɛ uwá ɔtū bīya” ō ya Ācɛ O Yɛce Ukraist a ŋmo. (Ācot. 14:​2, 19) Lɛyikwu ɔkpá ku Úklɔ́ kú Ācotɛ̄hɔ̄ 14:​2, Ɔda Ō Gbaaje ku Ɔya Ɔmigwɛɛpa 1, 1998, lɛ ɛlā nyā teyi peee kahinii: “Ācɛ nōo cɛ ɛlā ku Ebilii a ta ɛlā nɛ Ācɛ O Yɛce Ukraist a gē tɔɔna a, é klla ka aɛlā obɔbi lɛyikwu uwa, o ya ɛɛ ku ācɛ ka é hii jahɔ tu uwa ŋ, mla ō ya ku ācɛ kéē wɔtu uwa.”

16. Ɔdi nɛ alɔ cika ō bla ɔdaŋ ku alɔ lɛ aɔ̄kā ɛkɛmgbɛ po a?

¹⁶ Usetan gɔbu yɔ i kɛmgbɛ icɛ. Ó gɔbu yɔ i  “plla odúúdú ācɛ kú ipú ɛcɛ á.” (Mafú 12:9) Ɔdaŋ ku a po aɔ̄kā obɔbi lɛyikwu ɔwa ku alɔ amāŋ lɛyikwu ayinɛ nōo gē bi alɔ jé ɔwɛ a, blakwu ɛgɛ nɛ aolɛla ku Ɔwɔico ya ɛlā mla Ujisɔsi mla Ācɛ O Yɛce Ukraist ku eko aflɛyi a. Ujisɔsi tɛtɛ le ka taajɛ ka ācɛ géē bɛyikwu ācɛ nōo gē gba Ujehofa ɛ̄gbā a, klla géē ka aɛlā ɛkɛmgbɛ lɛyikwu uwa. Ɔɔma kē wɛ ɔdā nōo yɔ i ya yiili icɛ a. (Umát. 5:​11, 12) Ɔdaŋ ku alɔ jé ɔcɛ nōo yɔ i nyila aɛlā ɛkɛmgbɛ nyā a, alɔ i gáā kpɔtuce aɛlā ɛkɛmgbɛ néē gē ka lɛyikwu alɔ a ŋ, alɔ klla géē ya odee boobu ō je ogbotu lɛ iyi alɔ. Ɛgɛnyá nɛ alɔ lɔfu je ogbotu lɛ iyi alɔ a?

17. Ɛgɛnyá nɛ alɔ lɔfu kwu ŋma agbe nɛ aɔ̄kā ɛkɛmgbɛ lɔfu ya alɔ a? (2 Utímōti 1:13) (Má ikpati nyā nōo kahinii: “Ɔ dā Nɛ A Cika Ō Ya Eko Duuma Nɛ A Lɛ Aɔ̄kā Ɛkɛmgbɛ Po.”)

¹⁷ Ta aɔ̄kā ɛkɛmgbɛ. Upɔlu le ka peee ɔdā nɛ alɔ cika ō ya eko duuma nɛ alɔ lɛ aɔ̄kā ɛkɛmgbɛ po a. Ó le da Utimoti kóō le da ‘ācɛ a ka é hii jahɔ lɛ ācɛ o nwū ɔdā ɛ̄kɛ̄mgbɛ̄ ā ŋ.’ Ó klla da uwa ka é “híī tū iyi [uwa] kwu ɔ̄cā icííci nōo ge bɛ́yí kwu ɔkōolɔhi ā ŋ́.” (1 Utím. 1:​3, 4; 4:7) Gbɛla tu ocabɔ nyā ɛ. Ɔyipɛ ŋɛ́ŋcɛ̄ lɔfu je odee nōo le blinyi ŋmaajɛ le ta ipu okonu ku nu, amáŋ ɔcɛ nōo wɛ ijinkpa i gáā ya ɛgɔɔma gboogboo ŋ, ohigbu ka ó jé ka ɔɔma lɔfu ya kóō doōcē. Alɔ gē ta aɔ̄kā ɛkɛmgbɛ ohigbu ka alɔ jé ɛga nɛ aɔ̄kā ɛkɛmgbɛ ɛgɔɔma gē ŋma a. Ikɔkɔ ɔɔma, “ɔdā okpaakpa” nōo wɛ ɛlā ɔkwɛyi a foofunu nɛ alɔ gē jahɔ tu ɔ a.—Jé 2 Utímōti 1:13.

18. Ɛgɛnyá nɛ alɔ lɔfu mafu ku alɔ lɔtuce ɔwa ku Ujehofa a?

¹⁸ Alɔ leyi yɛ ɔwɛ ɛta ŋma ipu aɔwɛ alɛwa nɛ ɔwa ku Ɔwɔico gē yɛce ocabɔ ku Ujisɔsi a ɛ. Abɔ a gē klɔcɛ ku Ubáyíbu a, ceyitikwu ku a má aɔwɛ alɛwa ɔhá nɛ ɔwa ku alɔ gē yɛce ocabɔ ku Ujisɔsi a. Ta ācɛ ɔhá nōo yɔ ipu ujɔ ku uwɔ abɔ kéē lɔtuce ɔwa ku alɔ fiyɛ. Gɔbu ku a kē yɔ i mafu ku a lɔtuce ɔwa ku alɔ, ŋma lɛ ō gba Ujehofa ɛ̄gbā gā ajaajɛ, mla ō yɔ kwu ɔwa ku alɔ nɛ ó yɔ i bi le ya ococɛ ku nu jila a. (Aíjē 37:28) Alɔ kē gɔbu yɔ i mafu eko doodu, ka ó jɛ alɔ eyī nɛhi ō wɛ ipu ɔwa ku ācɛ o gba Ujehofa ɛ̄gbā nōo lɛ ihɔtu, nōo klla gē yɔ kwu iyi uwa gā ajaajɛ a.