Ācɛ ōhī nōo gē jé ɛga ku Ubáyíbu nyā fiyaa fiyaa a, gē da ɔka nōo yɔ ɛhico a. Amáŋ aɔgba ku Ubáyíbu ɔɔma yɔ i kɛla lɛyikwu ācɛ ɛyɛɛyɛyi ɛpa, néē hi iyē ku uwa ka Umɛfibossɛti. Alɔ kē lɔfu nwu ɛlā ŋma ō leyi ya ɔdā nōo ya eko ɔɔma a.

Usɔlu nōo wɛ Ɔcɛ́ ku ācɛ Isrɛlu a, lɛ ayinɔnyilɔ ahaapa mla ayinɔnya ɛpa. Ɔyi aflɛyi ku Usɔlu wɛ Ujonatan. Igbihaajɛ ɔnyā nɛ Usɔlu gē cikpo nu néē hi ka Uríspa a lɛ ɔyi éyi ma lɛ ɔ, iyē ku nu lé ka Umɛfibossɛti. Ujonatan kē lɛ ɔyi éyi néē hi ka Umɛfibossɛti duu. Ɛnyā mafu ka Usɔlu nōo wɛ Ɔcɛ́ a lɛ ɔyi abɔyi nu néē hi ka Umɛfibossɛti, mla ɔyɔɔyi ɔhá néē hi ka Umɛfibossɛti duu.

Ó lɛ eko éyi nɛ Usɔlu nōo wɛ Ɔcɛ́ a, gbɔɔ ō wɔtu ācɛ Ugibeyɔn nɛɛnɛhi klla dɔka ō lɛ ɛjɛɛji uwa kpo ŋmo. Ó lɛ aafu ŋ, ó lɛ ōhī ku uwa ŋmo duu ɛɛ. Ɛnyā i kē wɛ ɔdā olɔhi fluflu ŋ. Ɔdiya a? Ohigbu ka ɛpleeko ku Ujossuwa, aotrɛyi ku ācɛ Isrɛlu cokonu ku ɛbɔ mla ācɛ ku Ugibeyɔn.—Ujós. 9:3-27.

Okonu ō ce ɔɔma kē yɔ i yuklɔ jāā kwu eko nɛ Usɔlu wɛ Ɔcɛ́ a. Naana nɛ okonu ō ce ɔɔma yɔ i yuklɔ kpɔ a, Usɔlu nōo wɛ ɔcɛ́ a dɔka ō lɛ ɛjɛɛji ācɛ Ugibeyɔn kpo ŋmo. Ohigbu ɛnyā, “Usɔ́ɔlu mɛ́mla ācɛ ɔlɛ́ nū lɛ ɛpɔ̄bí ācɛ ō ŋmó lé.” (2 Usám. 21:1) Igbihaajɛ Udefidi kwu piya ɔcɛ́. Ācɛ Ugibeyɔn ōhī nōo wi ŋma ifi ɔɔma a lɛ ɛlā a ka lɛ ɔ. Udefidi lɛ ɔka ku ɛbɔ da uwa lɛyikwu ɔdā néē cɛgbá ohigbu ɔdā obɔbi nɛ Usɔlu ya a, o ya ɛɛ ka Ujehofa kóō lɛ ɔhā hɛ ce ajɛ a. Ikɔkɔ néē géē da Udefidi ɔ̄kā kóō je ije lɛ uwa a, ācɛ Ugibeyɔn a ku aa tine kóō lɛ ayi nɔnyilɔ ahaapa ku ɔcɛ nōo “tíne ō lɛ aá kpó yíífi ŋmá odúúdú ajɛ” a kpo lɛ aa, ku aa lɛ uwa kpo ŋmo. (Áluk. 35:30, 31) Anɔɔ Udefidi kē lɛ ɛga ɔɔma je lɛ uwa a.—2 Usám. 21:2-6.

Ɛpleeko nyā Usɔlu mla Ujonatan gekwū ɔgbɛfu ɛɛ, amáŋ ɔyi Ujonatan néē hi ka Umɛfibossɛti a yeeyi kpɔ. Ó wɛ ocikpo ŋma eko nɛ ó wɛ ɔyipɛ a ohigbu amiya éyi nōo ya da ɔ a. Ohigbu ɛnyā, ɛpleeko nɛ adā nu ɔnyakwɔcɛ nyɔ gáā kpɛfu ta ācɛ Ugibeyɔn a ó lɛ abɔ anu ŋ. Udefidi mla Ujonatan cokonu lɛ iyi uwa ku aa géē wa ɔya, okonu nyā i tile lɛ Ujonotan ofoofunu ŋ amáŋ kwu ɔyi nu Umɛfibossɛti duu. (1 Usám. 18:1; 20:42) Ubáyíbu da alɔ kahinii: “Udéfīdi, ɔcɛ́ ā lɛ Umɛfíbōssɛ̄ti, ɔyɔ́ɔ́yí kú Usɔ́ɔlu hɛ́tá, ohígbū ɛka nɛ̄ Udéfīdi mɛ́mla ádā nū, Ujonátan gbo ā.”—2 Usám. 21:7.

Naana a, Udefidi lɛ ɔdā nɛ ācɛ Ugibeyɔn da ɔ a ya lɛ uwa. Ó kwu ayi ku Usɔlu ɛpa u lɛ uwa éyi ku uwa lé ka Umɛfibossɛti, mla ayaayi ku Usɔlu ɛhɔ ɔhá. (2 Usám. 21:8, 9) Ɛlā nɛ Udefidi ya nyā ya ku okonu ō ta nōo yɔ lɛ ajɛ a, ohigbu ɛpɔbi ku ācɛ ō ŋmo nɛ Usɔslu mɛmla ācɛ ɔlɛ nu lé a kóō gā oŋmɛyi.

Ɛlā nōo ya nyā fiyɛ ɔ̄kā ku ɔdā nōo ya anca. Íne ku Ɔwɔico teyi peee. Ó kahinii: “Ɛ́ɛ gē ŋmó ayí kwɛyí ɔdōbɔ̄bí nɛ̄ aɛ́nɛ́ ámāŋ aádā uwā yá ŋ́.” (Obla. 24:16) Ujehofa i gē yɛ i cɛ ku ɔdā nōo ya da ayi Usɔlu ɛpa, mla ayaayi nu ɛhɔ a kóō ya da uwa ŋ, ɔdaŋ ku é gē yɛ i lé ɛpɔbi ku ɛlā a ŋ. Íne a klla ka kpɔ kahinii: “Ó ka ɛ́ɛ lɔfú ŋmó ɔ̄cɛ ohígbū ɔdōbɔ̄bí nɛ̄ anú abɔ̄yī nū yá ā glá.” Ɛnyā mafu ka ó lɛbɛɛka ayi Usɔlu ahaapa nōo kwū a lɛ abɔ ipu ōmiya nɛ Usɔlu ya, o ya ɛɛ kóō lɛ ācɛ ku Ugibeyɔn kpo ŋmo a. Ohigbu ɛnyā uwa ahaapa a, le pɛ gekwu ohigbu ɔdā obɔbi ku uwa.

Ŋma ɔ̄kā nyā alɔ nwu ka ɔcɛ i gáā kweyi gedee yɔ i ya ɔdā obɔbi, cɛɛ kóō ka ka anuɔ i lɛpɔbi ŋ ohigbu ka ɔ́da nɛ anuɔ yɔ i yɛce ofoofunu a gla ŋ. Ita ku ijeeyi éyi kahinii: “Lɛ ɛlá kwu ɔ́ ká ā lɛ ojuju yá lɔɔlɔhi lɛyíkwu ɔdā dóódu nāa gáā yá ā. Le má ka ɔdā ɔ́ɔmā le yá lɔɔlɔhi.”—Aíit. 4:24-27; Āfi. 5:15.