IKPƐYI ƐLĀ Ō KLƆCƐ ƆMƐ 10
Ɔdiya Nɛ A Cika Ō Ya Ubatisim A?
‘Éyééye kú aá kóō lɛ Ubatísim yá.’—ĀCOT. 2:38.
IJÉ ƆMƐ 34 Walking in Integrity
ƆDĀ NƐ ALƆ GÁĀ NWU A a
1-2. Ɔdi gē ya igbɛlawa eko nɛ ācɛ gē ya ubatisim a, ɔdi nɛ a kē cika ō leyi yɛ ɔ a?
A MÁ ígwu ku ācɛ nōo gáā ya ubatisim a jeeje ɛ? A gē má ɛgɛ néē cɛ ɛlā ɔkwɛyi a lɛ, eko néē gē cila ohi ku aɔka ɛpa néē gē da uwa gbɔbu ɛɛ kéē ya ubatisim a. A gē má ɛgɛ nɛ eeye gē wɛ omoomu ɔtu ku ācɛ apɔlɛ ku uwa mla aɔkpa ku uwa a. Eko nɛ ācɛ nōo ya ubatisim a gɛɛcɛ ŋma ipu eŋkpɔ, a gē má ɛgɛ nɛ ācɛ apɔlɛ ku uwa mla aɔkpa ku uwa gē gwo abɔ klla gē bi ɛhɛ kwu okonu lɛ a. Oŋma aya ku aluka alɔ géē ka, ka ipu alaadi doodu utajan ku ācɛ gē je iyi uwa gwɛɛya lɛ Ujehofa klla gē ya ubatisim.
2 Awɔ a bɛɛ? Ɔdaŋ ku a yɔ i gbɛla ō ya ubatisim, ayika wɛ ɔcɛ ocɛgbá nɛhi ipu ɛcɛ obɔbi nyā ohigbu ku a yɔ i “tíne ō gbā Ɔwɔicō ɛ̄gbā.” (Aíjē 14:1, 2) Ikpɛyi ɛlā oklɔcɛ nyā yɔ i kɛla lɛyikwu uwɔ ɔdaŋ ku a wɛ ɛdrɔ amāŋ ka kwu hilokplici ɛ. Alɔ nōo lɛ ubatisim ya gbɔbu ɛ ma klla dɔka ō lɛ ɔtu ya ekponu fiyɛ ō gba Ujehofa ɛ̄gbā piyoo. Ó lɛ a, alɔ kɛla lɛyikwu aɔdā ɛta ŋma ipu aɔdā alɛwa nōo ya ɛɛ nɛ alɔ dɔka ō gba Ujehofa ɛ̄gbā a.
A YIHƆTU ƐLĀ ƆKWƐYI MLA ƆDĀ OKPAAKPA
Usetan lɛ iye olɔhi ku Ujehofa biya ihayi alɛwa ŋma lɛ ɛkɛmgbɛ ō ka, ó klla gɔbu yɔ i ya ɔɔma kpɔ (Má ogwotu ɔmɛ 3-4)
3. Ɔdiya nɛ ācɛ nōo gē gba Ujehofa ɛ̄gbā a yihɔtu ɛlā ɔkwɛyi mla ɔdā okpaakpa a? (Aíjē Kú Ɛ̄gbā 119:128, 163)
3 Ujehofa je ɔ́da lɛ ācɛ ɔlɛ nu kéē ‘yihɔtu ɛlā ɔ̄kwɛ̄yi’ a. (Usak. 8:19) Ujisɔsi kē ta ayikpo ku nu ɔtu kwu ɔtu kéē ceyitikwu ō ya ɔdā nɛ Ɔwɔico tine kéē ya a. (Umát. 5:6) Ɛnyā wɛ ka ɔcɛ cɛgbá ō lɛ ɔtu caca ō ya ɔdā nɛ Ɔwɔico ka, ka ó wɛ ɔdā okpaakpa mla ɔdā olɔhi a. A yihɔtu ɛlā ɔkwɛyi mla ɔdā okpaakpa? Alɔ jé ku a ya lɛ a. A gē wɔtu ɛkɛmgbɛ ō ka mla ɛjɛɛji ɔdobɔbi ɔhá. (Jé Aíjē Kú Ɛ̄gbā 119:128, 163.) Ɔcɛ nōo gē kɛmgbɛ gē ya ɛgbla ku Usetan nōo yɔ i lé ɔcɛ́ ku ɛcɛ a. (Ujɔ́n. 8:44; 12:31) Ɔdā éyi nɛ Usetan bi ɔtu ō ya a, wɛ ō bi ɛkɛmgbɛ lɛ iye otiihɔ ku Ujehofa nōo wɛ Ɔwɔico a biya. Usetan humayi kɛmgbɛ ba Ɔwɔico ku alɔ ŋmiifi nɛ alɛɛcɛ ya ikpɛyi olɔfu tu Ɔwɔico ipu Iga ku Idɛn a. Ó gē ceyitikwu ya ku ācɛ kéē gbɛla ka Ujehofa wɛ ɔcɛ nōo gē gbɛla iyi nu foofunu mla ɔcɛ o kɛmgbɛ, ka ó klla wɛ Ɔcɛ́ nōo gē je ɔdā olɔhi tayinu ŋma ɛgiyi alɛɛcɛ. (Ohút. 3:1, 4, 5) Ɛkɛmgbɛ nɛ Usetan gē ka ba Ujehofa nyā ya ku ācɛ kéē gɔbu yɔ i gbɛla obɔbi lɛyikwu Ujehofa. Ɔdaŋ ka alɛɛcɛ le miya ku aa i gáā ‘yihɔtu ɛlā ɔ̄kwɛ̄yi’ a ŋ, Usetan lɔfu ya kéē gbɔɔ ō ya aɔdobɔbi doodu.—Uróm 1:25-31.
4. Ɛgɛnyá nɛ Ujehofa mafu ka ó wɛ ‘Ɔwɔico ku ɔkwɛyi’ a? (Má ifoto a.)
4 Ujehofa wɛ ‘Ɔwɔico ku ɔkwɛyi,’ ó kē gbonɛnɛ gē nwu ɛjɛɛji ācɛ nōo yihɔtu nu a ɛlā ɔkwɛyi. (Aíjē 31:5) Oŋma lɛ ō ya lɛ a, ó gē ta uwa abɔ ku Usetan ku ó hii plla uwa mla aɛlā ɛkɛmgbɛ gɛ ŋ. Ujehofa klla gē nwu ācɛ ɔlɛ nu kéē wɛ ācɛ nōo gē ka ɔkwɛyi mla ācɛ ō ya uce okpaakpa. Ɛnyā gē ta uwa abɔ kéē lɛ ojilima mla ɛbɔ ku ɔtu. (Aíit. 13:5, 6) Ó ya ɛnyā gā uwɔ ŋmiifi nɛ a gbɔɔ ō klɔcɛ ku Ubáyíbu a ɛ? A gáā le nwu ka ɔwɛ ku Ujehofa lɔhi lɛ ɛjɛɛji ācɛ fiyɛ duu a, kwu awɔ abɔyi uwɔ. (Aíjē 77:13) Ohigbu ɔɔma, a dɔka ō ya ɔdā nɛ Ɔwɔico ka ka ó wɛ ɔdā okpaakpa a. (Umát. 6:33) A dɔka ku ācɛ kéē wa i lɛ ɛlā ɔkwɛyi a jé, klla mafu ka ɛlā nɛ Usetan ka lɛyikwu Ɔwɔico nōo wɛ Ujehofa a wɛ ɛkɛmgbɛ. Ɛgɛnyá nɛ a lɔfu ya ɔɔma a?
5. Ɛgɛnyá nɛ a gáā lɔfu mafu peee ku a gē cɛtra ɛlā ɔkwɛyi mla ɔdā okpaakpa a?
5 A lɔfu lā oyeeyi ku uwɔ ɔwɛ nōo géē mafu lɛ ɛjɛɛji ācɛ peee ka ta aɛlā ɛkɛmgbɛ ku Usetan, ku a kē cɛtra ɛlā ɔkwɛyi a. A lɔfu mafu ka dɔka ku Ujehofa kóō wɛ Ɔcɛ́ ku uwɔ, klla dɔka ō ya ɔdā nɛ ó ka ka ó wɛ ɔdā okpaakpa a. Ɛgɛnyá nɛ a lɔfu ya ɛnyā gla a? Da Ujehofa ipu ɔkɔ ō gba ku a cokonu ō gba ɔ ɛ̄gbā piyoo mla ō lɛ ubatisim ya. Ihɔtu nɛ alɔ lɛ lɛ ɛlā ɔkwɛyi mla ɔdā okpaakpa a, wɛ ɔdā okpɔcii nōo gē lɛ abɔ kwu alɔ ɔtu ō ya ubatisim a.
A YIHƆTU KU UJISƆSI UKRAIST
6. Ɛgɛ nɛ ɔkpá ku Aíjē Kú Ɛ̄gbā 45:4 ka a, ɔdiya nɛ a yihɔtu ku Ujisɔsi Ukraist a?
6 Ɔdiya nɛ a yihɔtu ku Ujisɔsi Ukraist a? Leyi bi aɔdā olɔhi ōhī nōo ya nɛ a yihɔtu ku nu nōo yɔ ipu ɔkpá ku Aíjē Kú Ɛ̄gbā 45:4 a. (Jé.) Ujisɔsi ya ku ɛlā ɔkwɛyi, ō tu iyi ɔcɛ waajɛ, mla ɔdā okpaakpa ō ya kóō gɔbu. Ɔdaŋ ku a yihɔtu ɛlā ɔkwɛyi mla ɔdā okpaakpa, ɔɔma mafu ku a yihɔtu ku Ujisɔsi Ukraist duu. Gbɛla tu ɛgɛ nɛ Ujisɔsi lɛ ɔtu ō hayi lɛ ɛlā ɔkwɛyi mla ɔdā okpaakpa a. (Ujɔ́n. 18:37) Ɛgɛnyá nɛ Ujisɔsi ya ku uce ō tu iyi ɔcɛ waajɛ kóō yɔ i gɔbu a?
7. Ɔdi he uwɔ ɔtu fiyɛ duu lɛyikwu ɛgɛ nɛ Ujisɔsi tu iyi nu waajɛ a?
7 Ujisɔsi ya ku uce kóō ta iyi ɔcɛ waajɛ kóō yɔ i gɔbu oŋma lɛ ocabɔ ku nu. Ocabɔ mafu, ó gē je ɛjɛɛji owoofu lɛ Adā nu, ó gē je lɛ iyi nu ŋ. (Umák. 10:17, 18; Ujɔ́n. 5:19) Ɛgɛnyá nɛ ɔwɛ nɛ Ujisɔsi tu iyi nu waajɛ a lɛ abɔ kwu uwɔ ɔtu a? Ku ɛlā ɔkwɛyi a, ó lɛ abɔ kwu uwɔ ɔtu ō yihɔtu Ɔyinɔnyilɔ ku Ɔwɔico fiyɛ mla ō yɛce ocabɔ ku nu. Ɔdiya nɛ Ujisɔsi tu iyi nu waajɛ a? Ohigbu ka ó yihɔtu klla yɛce ocabɔ ku Adā nu nōo wɛ ɔcɛ o tu iyi nu waajɛ a. (Aíjē 18:35; Uhíb. 1:3) Ɛnyā i ya ku a tubla Ujisɔsi nōo gē yɛce ocabɔ ku auce ō ya ku Ujehofa mɛɛlɛ a ŋ?
8. Ɔdiya nɛ alɔ gē gweeye ka Ujisɔsi wɛ Ɔcɛ́ ku alɔ a?
8 Alɔ gē gweeye ka Ujisɔsi wɛ Ɔcɛ́ ku alɔ a, ohigbu ka anu wɛ Ɔcɛ́ nōo lɔhi fiyɛ duu a. Ujehofa abɔyi nu wɛ ɔcɛ nōo nwu Ɔyinɔnyilɔ ku nu ɛlā klla fu ɔ kóō wɛ ɔcɛ́ a. (Ayis. 50:4, 5) Gbɛla tu ɛdɔ ihɔtu nōó lɛ ɛdɔ ŋ nɛ Ujisɔsi mafu lɛ alɔ a. (Ujɔ́n. 13:1) Ohigbu ka Ujisɔsi wɛ Ɔcɛ́ ku uwɔ a, ó cɛgbá ku a yihɔtu ku nu. Ó lɛ ɔ teyi peee ka ó gē hi ācɛ nōo yihɔtu ku nu ɔkwɔɔkwɛyi a ku aɔya. Ó klla ka ka é géē mafu ka é yihɔtu ku anuɔ ŋma lɛ ō lɛyitaajɛ lɛ ɔ́da nɛ ó je a. (Ujɔ́n. 14:15; 15:14, 15) Ó wɛ ɔdā ojilima nɛhi ō wɛ ɔya ku Ɔyinɔnyilɔ ku Ujehofa!
9. Ɛgɛnyá nɛ ubatisim ku Ācɛ O Yɛce Ukraist gbla ubatisim ku Ujisɔsi a?
9 Ɔ́da éyi nɛ Ujisɔsi je a, wɛ ku ācɛ nōo gē yɛce ɔ a kéē lɛ ubatisim ya. (Umát. 28:19, 20) Ó lɛ ocabɔ nyā taajɛ lɛ alɔ. Amáŋ, ó lɛ ɔwɛ ōhī nɛ ubatisim ku Ujisɔsi wɛ ɛyɛɛyi gwu aku ayikpo ku nu ta. (Má ikpati nōo kahinii: “ Ubatisim Ku Ujisɔsi Mla Ubatisim Ku Ācɛ Nōo Gē Yɛce Ɔ A—Ɛgɛ Néē Wɛ Ɛyɛɛyi A.”) Amáŋ, ó lɛ aɔwɛ ɔhá néē gbla iyi uwa. Eko nɛ Ujisɔsi ya ubatisim a, ó kwu iyi nu u taajɛ ō ya ɔdā nɛ Adā nu tine a. (Uhíb. 10:7) Ɔwɛ ekponu ɔɔma, eko nɛ ācɛ nōo gē yɛce Ujisɔsi a lɛ ubatisim ya, ó gē mafu peee ka é kwu oyeeyi ku uwa u gwɛɛya lɛ Ujehofa nōo wɛ Ɔwɔico a ɛ. Babanya, ɔdā nōo cɛgbá lɛ uwa fiyɛ duu ipu oyeeyi a wɛ ō ya ɔdā nɛ Ujehofa tine a, ó wɛ aku uwa ŋ. Ɛnyā mafu ka é yɔ i yɛce ocabɔ ku Ɔkpani ku uwa.
10. Ɔdiya nɛ ihɔtu nɛ a lɛ lɛ Ujisɔsi a cika ō lɛ abɔ kwu uwɔ ɔtu ku a lɛ ubatisim ya a?
10 A kpɔtuce ka Ujisɔsi wɛ Ɔyinɔnyilɔ ekponu ku Ujehofa a. A klla gweeye ka anu wɛ Ɔcɛ́ nɛ Ujehofa fu kóō lé ɔcɛ́ ikpɛyi ku alɔ a. A kē jé ka Ujisɔsi tu iyi nu waajɛ nɛhi klla gē yɛce ocabɔ ku Adā nu mɛɛlɛ. A klla le nwu duu ɛɛ ka Ujisɔsi je ɔdole lɛ ācɛ nɛ ɛmiyɛ yɔ i ŋmo uwa, ka ó je ɔtu ō tu kwu ɔtu lɛ ācɛ nɛ ɔtu le gbenyi lɛ uwa, klla hɛ ācɛ o doōcē ta. (Umát. 14:14-21) A klla má ɛgɛ nɛ ó yɔ i bi ujɔ ku nu jé ɔwɛ icɛ a. (Umát. 23:10) A kē jé ka abɔ anu wɛ Ɔcɛ́ ku Ajɔɔcɛ Ku Ɔwɔico a, ó géē ya ɔdā alɛwa lɛ alɔ ɛcɔbu. Ɛgɛnyá nɛ a gáā mafu ku a yihɔtu nu a? Oŋma lɛ ō yɛce ocabɔ ku nu. (Ujɔ́n. 14:21) Ɔdā éyi nɛ a lɔfu ya o ya ɛɛ ku a yɛce ocabɔ ku nu a, wɛ ō lɛ iyi uwɔ gwɛɛya lɛ Ujehofa klla lɛ ubatisim ya.
A YIHƆTU KU UJEHOFA NŌO WƐ ƆWƆICO A
11. Ɔdi wɛ ɔdā ocɛgbá fiyɛ duu nōo ya nɛ alɔ gē ya ubatisim a, ɔdiya nōó kē lɛ a?
11 Ɔdi wɛ ɔdā ocɛgbá fiyɛ duu nōo ya nɛ alɔ gē ya ubatisim a? Ujisɔsi lɛ ɔ́da ku Ɔwɔico nōo fiyɛ duu a mafu lɛ alɔ eko nɛ ó kahinii: “Aá í yíihɔtū tá Óndú, Ɔwɔicō kú aá ŋmá ɛjɛ̄ɛ̄jī ɔtū kú aá, ŋmá ɛjɛ̄ɛ̄jī odo kú aá, ŋmá ɛjɛ̄ɛ̄jī ɛlá nɛ̄ gē gbo ā, mɛ́mla ɛjɛ̄ɛ̄jī ɔfú kú aá!” (Umák. 12:30) Aɛlā nyā mafu ɛgɛ nɛ a yihɔtu ku Ɔwɔico lɛ a?
Ɛgiyi Ujehofa nɛ ɛjɛɛji aɔdā olɔhi doodu nɛ a humayi jɔɔnyɛ nu nɛ a klla géē gɔbu yɔ i jɔɔnyɛ nu a ŋma a (Má ogwotu ɔmɛ 12-13)
12. Ɔdiya nɛ a yihɔtu ku Ujehofa a? (Má ifoto a.)
12 Ó lɛ ɔdā alɛwa nōo ya nɛ alɔ cika ō yihɔtu ku Ujehofa. Ocabɔ mafu, a gáā le nwu ɛ ka “ɔdā dóódu nōo yēeyī á” ŋma ɛgiyi Ujehofa, ka anu klla je “ɛhi olɔhi dóódu mɛ́mla ɛhi dúúmā nōo ī jōōjīla ā” lɛ alɔ a. (Aíjē 36:9; Ujɛ́m. 1:17) Ɛjɛɛji aɔdā olɔhi nɛ a gē jɔɔnyɛ nu a ŋma ɛgiyi Ɔwɔico nōo yihɔtu alɔ, nōo klla gē nwula abɔ nɛhi a.
13. Ɔdiya nōo ofula a wɛ ɛnɛɛnɛ ɛhi a?
13 Ofula a wɛ ɛnɛɛnɛ ɛhi nɛ Ujehofa je lɛ alɔ. Ɔdiya nɛ alɔ lɔfu ka lɛ a? Gbɛla lɛyikwu ɛdɔ ɛma nōo yɔ ɔtahɛ ku Ujehofa mla Ɔyi nu a. Ujisɔsi kahinii: “Ádā ā yíihɔtū tū um,” ó klla kahinii: “N yíihɔtū tá Ádā um.” (Ujɔ́n. 10:17; 14:31) Ɛma ku uwa a kwu lɔfu fiyɛ eko néē yɔ tɔha ɔkpanco ihayi ubiliyɔn alɛwa a. (Aíit. 8:22, 23, 30) Gbɛla tu ɛdɔ ɔnɔ nɛ Ɔwɔico je eko nɛ ó jɛga lɛ Ɔyinɔnyilɔ ku nu kóō má owe klla kwū a. Ujehofa yihɔtu ɛjɛɛji alɛɛcɛ kwu awɔ abɔyi uwɔ nɛɛnɛhi, ɔɔma ya ɛɛ nɛ ó cɛ ō je Ɔyinɔnyilɔ ku nu nōo he ɔ ɔtu nɛhi a gwɛɛya, o ya ɛɛ kóō tɔɔtɛ lɛ awɔ mɛmla ācɛ ɔhá ō lā oyeeyi opiyoo a. (Ujɔ́n. 3:16; Ugal. 2:20) Ɛnyā wɛ ɔdā nōo fiyɛ ɛjɛɛji ɔdā doodu ɔhá nōo ya ɛɛ nɛ alɔ cika ō yihɔtu ku Ɔwɔico a.
14. Ɔdi wɛ ɔdā nōo lɔhi fiyɛ duu nɛ a lɔfu miya ō ya ipu oyeeyi ku uwɔ a?
14 Ihɔtu nɛ a lɛ lɛ Ujehofa a kwu lɔfu fiyɛ ohigbu ku a lɛ ɔdā alɛwa nwu lɛyikwu ɔ ɛ. Ó lɛ aafu ŋ, a dɔka ō tubla ɔ ajaajɛ fiyɛ babanya mla ogboogboo ɛcɛ. A kē ya ɔ gla. Ó ta uwɔ ɔtu kwu ɔtu ɔwɛ ogbonɛnɛ ku a ya ɔdā nōo géē cɛ lɛ ɔtu he ɔ. (Aíit. 23:15, 16) A lɔfu ya ɛnyā ó wɛ o bu ipu ɛlā ō ka foofunu nóó, amáŋ ipu uce ō ya ku uwɔ duu. Ɔwɛ nɛ a gē lā oyeeyi ku uwɔ a géē mafu ɔkwɔɔkwɛyi ku a yihɔtu ku Ujehofa. (1 Ujɔ́n. 5:3) Ɔɔma kē wɛ ɔdā nōo lɔhi fiyɛ duu nɛ a lɔfu miya ō ya ipu oyeeyi ku uwɔ a.
15. Ɛgɛnyá nɛ a gáā lɔfu mafu ihɔtu ku uwɔ lɛ Ujehofa a?
15 Ɛgɛnyá nɛ a gáā lɔfu mafu ihɔtu ku uwɔ lɛ Ujehofa a? Aflɛyi, a géē je iyi uwɔ gwɛɛya lɛ Ɔwɔico ekponu nōo wɛ Ɔwɔico ɔkwɛyi a ipu ɔkɔ ō gba. (Aíjē 40:8) Oŋma ɔɔma, a géē ya ubatisim nōo géē mafu lɛ ɛjɛɛji ācɛ ku a kwu iyi uwɔ gwɛɛya lɛ Ɔwɔico ɛ. Ɛgɛ nɛ alɔ ka o gbɔɔ ŋmaajɛ ku ikpɛyi ɛlā nyā a, ɛ̄cī ku ubatisim ku uwɔ wɛ ɛ̄cī ku eeye nōo klla cɛgbá fiyɛ duu ipu oyeeyi ku uwɔ a. A géē gbɔɔ ō lā oyeeyi ɛpɛpɛ, ó wɛ ō lā oyeeyi ɔwɛ ku uwɔ gɛ nóó, amáŋ ō lā oyeeyi lɛ Ujehofa. (Uróm 14:8; 1 Upít. 4:1, 2) Ɛnyā lɔfu lɛbɛɛka ōmiya nɛhi ō ya a, ó kē lɛ a ɔkwɔɔkwɛyi. Ó géē ya ɔ tɔɔtɛ gā uwɔ ō lā oyeeyi nōo lɔhi fiyɛ duu a. Ɛgɛnyá a?
16. Ɔdi nɛ ɔkpá ku Aíjē Kú Ɛ̄gbā 41:12 ka ka Ujehofa géē ya lɛ ācɛ nōo bi oyeeyi ku uwa le gba ɔ ɛ̄gbā a?
16 Ujehofa wɛ ɔcɛ nōo gē nwula abɔ fiyɛ duu a. Ɔdā duuma nɛ a je lɛ ɔ, ó géē je ofiyɛ ɔɔma gā uwɔ. (Umák. 10:29, 30) Ó géē ya ku a lā oyeeyi nōo lɔhi fiyɛ duu nɛ a géē jɔɔnyɛ nu ipu ɛcɛ obɔbi nyā. Ɔɔma kē wɛ o gbɔɔ ŋmaajɛ ku aɔdā olɔhi nɛ a géē jɔɔnyɛ nu a. Oyeeyi nɛ a géē gbɔɔ ō lā ŋma eko nɛ a ya ubatisim a géē yɔ i gɔbu piyoo. A lɔfu gɔbu yɔ i gba Adā uwɔ nɛ a yihɔtu nu nɛhi a ɛ̄gbā piyoo. Ihɔtu nōo yɔ ɔtahɛ ku awɔ mla Adā uwɔ a géē gɔbu yɔ i lɔfu tōōtɔ̄ɔ̄, a klla géē lā oyeeyi ɛgɛ nɛ ó lā a, ɔɔma wɛ ku a géē yeeyi piyoo.—Jé Aíjē Kú Ɛ̄gbā 41:12.
17. Ɔdi nɛ Ujehofa cɛgbá ŋma ɛgiyi alɔ a?
17 Ɔdaŋ ku a kwu iyi uwɔ gwɛɛya lɛ Ujehofa klla lɛ ubatisim ya, a lɛ ɛnɛɛnɛ ɛga ō je odee nōo cɛgbá ɔkwɔɔkwɛyi a lɛ Adā uwɔ. Ó je ɛjɛɛji aɔdā olɔhi, ɛjɛɛji aɔdā nōo gē cɛ gā uwɔ gweeye nɛ a humayi jɔɔnyɛ nu a gā uwɔ. O ya ɛɛ ku a mafu ku aɔdā nɛ ó ya gā uwɔ a jɛ uwɔ eyī a, a lɔfu je ɛ̄gbā ō gba nɛ ó cɛgbá ŋma ɛgiyi uwɔ a lɛ ɔ. (Ujób. 1:8; 41:11; Aíit. 27:11) Ɛnyā wɛ ɔwɛ olɔhi fiyɛ duu nɛ a lɔfu lā oyeeyi ku uwɔ a. Ó lɛ aafu ŋ, ihɔtu nɛ a lɛ lɛ Ujehofa a wɛ ɔdā ocɛgbá fiyɛ duu nōo ya nɛ a cika ō ya ubatisim a.
A LE TUTU Ō YA UBATISIM Ɛ?
18. Aɔka nyá nɛ a lɔfu da iyi uwɔ a?
18 A le tutu ō ya ubatisim ɛ? Awɔ foofu uwɔ gáā cila ohi ku ɔka nyā gla a. Amáŋ, ó lɔfu ta uwɔ abɔ ɔdaŋ ku a da iyi uwɔ ɔka nyā kahinii: ‘Ɔdiya nɛ ń ya ubatisim ɛ ŋ ma?’ (Ācot. 8:36) Blakwu aɔdā ɛta nɛ alɔ leyi yɛ ɔ ɛ ma. Aflɛyi, a yihɔtu ku ɛlā ɔkwɛyi mla ɔdā okpaakpa. Da iyi uwɔ ɔka, ‘N dɔka ō má ɛ̄cī nɛ ɛjɛɛji ācɛ géē ka ɛlā ɔkwɛyi klla ya ɔdā nōo le kpaakpa a?’ Ɔmpa, a yihɔtu ku Ujisɔsi Ukraist. Da iyi uwɔ ɔka, ‘N dɔka ku Ɔyinɔnyilɔ ku Ɔwɔico kóō wɛ Ɔcɛ́ ku um? N klla dɔka ō yɛce ocabɔ ku nu?’ Ɔmɛta, ɔdā nōo cɛgbá fiyɛ duu a wɛ ku a yihɔtu ku Ujehofa. Da iyi uwɔ ɔka, ‘N dɔka ō ya ku ɔtu kóō he Ujehofa ŋma lɛ ō gba ɔ ɛ̄gbā?’ Ɔdaŋ ka ohi ku aɔka nyā wɛ u ii, ó lɛ a, ɔdi yɔ i ci uwɔ ŋma ō ya ubatisim a?—Ācot. 16:33.
19. Ɔdiya nɛ á cika ō piya ɔkwu ajɛ ō ya ubatisim ŋ ma? Lɛ ɔ teyi peee. (Ujɔ́ni 4:34)
19 Ɔdaŋ ku a yɔ i piya ɔkwu ajɛ ō ya ubatisim, leyi yɛ aciije éyi nɛ Ujisɔsi ta a. (Jé Ujɔ́ni 4:34.) Leyi bi ɔ ka Ujisɔsi lɛ ō ya ɔdā nɛ Adā nu tine a gbla ɔdole. Ɔdiya a? Ɔdole lɔhi lɛ ɛjɛɛji alɔ. Ujisɔsi jé ka ɛjɛɛji ɔdā nɛ Ujehofa dɔka ku alɔ ya a lɔhi lɛ alɔ. Ujehofa i dɔka ku alɔ ya ɔdā duuma nōo géē ya alɔ agbe ŋ. Ujehofa dɔka ku a ya ubatisim? Ii gboo. (Ācot. 2:38) Ohigbu ɛnyā, a lɔfu kpɔtuce lɔfu lɔfu kóō lɛyitaajɛ lɛ ɔ́da nōo ku a lɛ ubatisim ya a géē lɛ itene gā uwɔ. Ɔdaŋ ku á gáā piya ɔkwu ajɛ ō lé ɔdole nōo lɔnyɛ nɛhi a ŋ, ɔdiya nɛ a yɔ i piya ɔkwu ajɛ ō ya ubatisim a?
20. Ɔdi nɛ alɔ gáā kɛla lɛyikwu ɔ ipu ikpɛyi ɛlā ɔhá a?
20 Ɔdiya nɛ ācɛ ōhī gē piya ɔkwu ajɛ ō ya ubatisim a? Ācɛ ōhī lɔfu cila ohi ku ɔka ɔɔma kahinii: “Ń tutu ɛ ŋ.” Ɔkwɛyi a wɛ ka ōmiya ō je iyi uwɔ gwɛɛya lɛ Ujehofa mla ō lɛ ubatisim ya a, wɛ ōmiya ocɛgbá fiyɛ duu nɛ a lɔfu ya a. Ohigbu ɛnyā, a cika ō gbɛla lɛyikwu ōmiya ɔɔma lɔɔlɔhi, ó kē géē cɛgbá eko mla oceyitikwu gbɔbu ɛɛ ku a cika jɛ ō ya ubatisim. Amáŋ, ɔdaŋ ku a lɛ ɔtu caca ɔkwɔɔkwɛyi ō ya ubatisim, ɔdi nɛ a lɔfu ya babanya ō lɛ iyi uwɔ tutu a? Alɔ géē cila ohi ku ɔka ɔɔma ipu ikpɛyi ɛlā nōo gboce ɛnyā a.
IJÉ ƆMƐ 28 Ō Wɛ Ɔya Ku Ujehofa
a Ō lɛ ubatisim ya wɛ ikpo nɛ ɛjɛɛji ācɛ nōo gē klɔcɛ ku Ubáyíbu a cika ō fu. Ɔdi gáā lɛ abɔ kwu ɔcɛ nōo gē klɔcɛ ku Ubáyíbu a ɔtu kóō fu ikpo ɔɔma? Ihɔtu nɛ. Amáŋ ihɔtu lɛ ɔdi amāŋ ɔnyɛ? Ipu ikpɛyi ɛlā nyā, alɔ géē má ohi ku ɔka nyā klla géē kɛla lɛyikwu ɛgɛ nɛ oyeeyi ku alɔ géē lɛ ɔdaŋ ku alɔ lɛ ubatisim ya.
