1-2. Ɔdaŋ ku á tutu ō ya ubatisim ɛ ŋ, ɔdiya nɛ á ciká ō cɛ lɛ abɔ hɛ uwɔ iyē ŋ ma? (Má ifoto nōo yɔ iyɔbu ku Ɔda Ō Gbaajɛ nyā a.)

 ƆDAŊ ku a yɔ i ya ōmiya ō ya ubatisim, ayika ɛnɛɛnɛ ōmiya nɛ a ya lɛ iyi uwɔ a. A le tutu ō fu ikpo ɔɔma babanya ɛ? Ɔdaŋ ku a má ku a le tutu ɛ nɛ anyakwɔcɛ ku ujɔ ku uwɔ kē cɛ, a hii pi ɔkwu ajɛ ō ya ubatisim ɛga ɔhá nɛ a géē lɛ a ŋ. Ɔdaŋ ku a ya lɛ a, ayika géē jɔɔnyɛ oyeeyi ku uwɔ nɛɛnɛhi ipu uklɔ ō ya lɛ Ujehofa.

² Amáŋ, ó lɛ ɔcɛ duuma nōo da uwɔ jeeje ɛ ku a géē cɛgbá ō ya lɔhi fiyɛ gbɔbu ɛɛ ku a cika jɛ ō ya ubatisim? Amāŋ awɔ a má ɔ lɛ a? Ɔdaŋ ka ó lɛ a, a hii cɛ lɛ abɔ hɛ uwɔ iyē ŋ. A lɔfu ya lɔhi fiyɛ ō ya ɛnɛɛnɛ ōmiya nyā ɔdaŋ ku a wɛ ɛdrɔ amāŋ okplici.

3. Ɔka nyá nɛ igabɔ ku Itiyopiya éyi da Ufilipu a, ɔka nyá kē lɔfu wa ipu ɔtu ku alɔ a? (Úklɔ́ kú Ācotɛ̄hɔ̄ 8:36, 38)

³ Jé Úklɔ́ kú Ācotɛ̄hɔ̄ 8:36, 38. Igabɔ ku Itiyopiya éyi da Ufilipu nōo wɛ ɔcɛ ō tɔɔna ɛlā Ɔwɔico a ɔka kahinii: “Ɔdí géē ci ubatísim ō yá um mɛ́ ā?” Ɔcɛ Itiyopiya nyā yɔ i ya ɔtu caca ō ya ubatisim, amáŋ ó le tutu ɔkwɔɔkwɛyi ō ya ubatisim ɛ?

4. Ɛgɛnyá nɛ ɔcɛ Itiyopiya a mafu ka ó lɛ ɔtu caca ō yɔ i nwu ɛlā gɔbu a?

⁴ Ɔcɛnyilɔ ku Itiyopiya nyā gā “Ujerúsālɛm gaá gbā Ɔwɔicō ɛ̄gbā.” (Ācot. 8:27) Ɛnyā kē lɛ a ohigbu ku ó le piyabɔ klla miyɛ cɛ ō gbɔɔ ō gba Ɔwɔico ɛ̄gbā ɛgɛ nɛ ācɛ Ujiyu gē ya a. Ó lɛ aafu ŋ, ó nwu ɛlā lɛyikwu Ujehofa ŋma Ɔkpiihɔ Ŋma Okonu Ku Ācɛ Uhibru a. Naana kpɔ a, ó ya ɔtu caca ō nwu ɛlā fiyɛ. Eko nɛ Ufilipu má igabɔ ɔɔma ɔwɛ a, ɔdi nɛ Ufilipu má ɔ yɔ i  ya a? Ó yɔ i jé ɔkpá nɛ ɔcomɛɛbɛ Ayisaya ta a. (Ācot. 8:28) Ɔɔma wɛ aɛlā ɔkwɛyi nōo ŋma ipu Ubáyíbu. Aɛlā ɔkwɛyi ōhī nɛ igabɔ ku Itiyopiya nyā nwu ŋma ipu Ubáyíbu a i jɛ ɔ ŋ, ó dɔka ō yɔ i nwu ɛlā gɔbu.

5. Ɔdi nɛ ɔcɛ Itiyopiya a ya mla ɛlā nɛ ó nwu a?

⁵ Ɔcɛnyilɔ nyā wɛ ɔcɛ ojilima nɛhi ɛhaajɛ Ɔcanya ku Ukandesi ku Itiyopiya, anu klla wɛ ɔcɛ o “bī ije lɛ ɔcányā” a. (Ācot. 8:27) Ohigbu ɛnyā, ó wɛ ɔcɛ nōo lɛ ɔdā alɛwa abɔ ō ya. Naana kpɔ a, ó lɛ eko taajɛ ō gba Ujehofa ɛ̄gbā. Ō jé ɛlā ɔkwɛyi nɛ ó nwu a i jɛ ɔ ŋ, amáŋ ó bi ɛlā nɛ ó nwu a le yuklɔ. Ohigbu ɛnyā, ó yɛ ŋma Itiyopiya jaa gā Agbiihɔ nōo yɔ Ujerusalɛm a, o ya ɛɛ kóō gba Ujehofa ɛ̄gbā. Iyawu nyā géē cɛgbá eko mla ije, amáŋ ɛ̄gbā ō gba Ujehofa nɛ ɔcɛnyilɔ nyā dɔka fiyɛ ɔdā duuma ɔhá a.

6-7. Ɛgɛnyá nɛ ihɔtu nɛ ɔcɛ Itiyopiya a lɛ lɛ Ujehofa a gɔbu yɔ i lɔfu tōōtɔ̄ɔ̄ a?

⁶ Ɔcɛ Itiyopiya nyā nwu ɛlā ɔkwɛyi ocɛgbá ɛpɛpɛ ōhī ŋma ɛgiyi Ufilipu. Éyi ku aɛlā nɛ ó nwu a wɛ ka Ujisɔsi wɛ Umɛsayiya a. (Ācot. 8:34, 35) Igabɔ ku Itiyopiya nyā gweeye nɛhi ō nwu ɛlā lɛyikwu ɔdā nɛ Ujisɔsi ya lɛ ɔ a. Ɔdi nɛ ó ya igbihi nɛ ó lɛ aɛlā nyā nwu a? Ó lɔfu miya ō yɔ ɛgɛ nɛ ó yɔ gbɔbu a, ɔcɛ ojilima nōo je piya ta ɔwɛ o gba Ɔwɔico ɛ̄gbā ku ācɛ Ujiyu a. Amáŋ ó ya lɛ a ŋ, ikɔkɔ ɔɔma ihɔtu nɛ ó lɛ lɛ Ujehofa mla Ɔyi nu a kwu lɔfu tōōtɔ̄ɔ̄. Ɛnyā kē lɛ abɔ kwu ɔ ɔtu ō lɛ ōmiya ocɛgbá fiyɛ duu a ya ipu oyeeyi ku nu. Ōmiya nyā kē wɛ ō lɛ ubatisim ya cɛɛ kóō kwu piya ɔcɛ o yɛce Ujisɔsi Ukraist. Abɔ Ufilipu má ka adā a le tutu a, ó lɛ ubatisim ya ɔ.

⁷ Ɔdaŋ ku a yɛce ocabɔ ku ɔcɛ Itiyopiya nyā, a lɔfu le tutu ō ya ubatisim. Ó géē tɔɔtɛ gā uwɔ ō ka mla ɔtu caca kahinii: “Ɔdí géē ci ubatísim ō yá um mɛ́ ā?” Alɔ kɛla lɛyikwu ɛgɛ nɛ a lɔfu ya ɔdā ekponu nɛ ɔcɛ Itiyopiya a ya a. Ó gɔbu yɔ i nwu ɛlā klla bi ɛlā nɛ ó nwu a le yuklɔ, ó klla ya ku ihɔtu nɛ ó lɛ lɛ Ɔwɔico a kóō yɔ i lɔfu tōōtɔ̄ɔ̄.

8. Ɔdi nɛ ɔkpá ku Ujɔ́ni 17:3 ka ku a géē ya piii a?

⁸ Jé Ujɔ́ni 17:3. Aɛlā ku Ujisɔsi nyā ta uwɔ abɔ cɛɛ ku a ya ōmiya ō gbɔɔ klɔcɛ ku Ubáyíbu a? Ó wɛ ɔkwɛyi lɛ alɛwa ku alɔ. Amáŋ aɛlā nyā piii a da alɔ ku alɔ gɔbu yɔ i nwu ɛlā tōōtɔ̄ɔ̄? Ii gboo. Alɔ i gáā ma ō gáā “jé . . . Ɔwɔicō” ɔkwɛyi a gboogboo ŋ. (Ɔ̄cok. 3:11) Alɔ géē gɔbu yɔ i nwu ɛlā jaa gā ogboogboo ɛcɛ. Abɔ alɔ yɔ i nwu ɛlā lɛyikwu Ujehofa tōōtɔ̄ɔ̄ a, ɛgɔɔma nɛ alɔ gáā tubla ɔ ajaajɛ fiyɛ lɛ a.—Aíjē 73:28.

9. Ɔdi nɛ alɔ cɛgbá ō ya igbihi nɛ alɔ lɛ aɛlā ɔkpɔci ku Ubáyíbu nwu a?

⁹ Eko duuma nɛ alɔ gbɔɔ ō nwu ɛlā lɛyikwu  Ujehofa, aɛlā ɔkpɔci ku Ubáyíbu nɛ alɔ gē nwu eko aflɛyi a. Ipu ɔkpá nɛ ɔyikpo Upɔlu ta gē lɛ ācɛ Uhibru a, ó ka aɛlā o kpɔci ku Ubáyíbu nyā wɛ “ɔdā aflɛ́yí nēé nwū aá kú ɛlɔ̄ɔwɔicō” a. Ó yɔ i ka ka “ɔdā aflɛ́yí . . . kú ɛlɔ̄ɔwɔicō” nyā i cɛgbá ŋ nɛ nóó. Ikɔkɔ ɔɔma, ó yɔ i mafu ka é lɛbɛɛka amɛ nɛ ayipɛ nɛ̄ŋcɛ́ gē gwa ku iye ku nu kóō lɔhi a. (Uhíb. 5:12; 6:1) Amáŋ ó klla ta Ācɛ O Yɛce Ukraist ɔtu kwu ɔtu kéē gɔbu yɔ i nwu aɛlā ɔkwɛyi nōo yɔ ipu Ɛlā Ɔwɔico a tōōtɔ̄ɔ̄, néē gáā kwɛji lɛ aɛlā ɔkpɔci ku Ubáyíbu néē nwu gbɔbu a ŋ. A lɔtu caca ō nwu aɛlā ɔkwɛyi nōo yɔ ipu Ubáyíbu a? A le tutu ō yɔ i jɛ gɔbu amāŋ ō gɔbu yɔ i nwu ɛlā lɛyikwu Ujehofa mla ɔdā nɛ ó bi ɔtu ō ya a?

10. Ɔdiya nōó gē tɔɔtɛ lɛ ācɛ ōhī ō ya oklɔcɛ ŋ ma?

¹⁰ Ku ɛlā ɔkwɛyi a ba, ó gē tɔɔtɛ lɛ ōhī ku alɔ ō lɛ eko taajɛ ō ya oklɔcɛ ŋ. Awɔ a bɛɛ? Eko nɛ a yɔ inɔkpa a, a nwu ɛgɛ nɛ a géē jé ō jé ɔkpá klla klɔcɛ lɔɔlɔhi? A gē jɔɔnyɛ ō klɔcɛ nɛ ɔtu klla gē ya uwɔ ku a yɔ i nwu ɛlā alɛwa? Amāŋ a lɛ ɛlā ŋmɛyi abɔ iyi uwɔ ka ó gē tɔɔtɛ gā uwɔ ō nwu ɛlā ŋma ipu ɔkpá ŋ? Ɔdaŋ ka ó lɛ a, jé ka ɔtu gē ya ācɛ alɛwa lɛ a duu. Ujehofa lɔfu ta uwɔ abɔ. Ó jila iyē klla wɛ itica nōo jé ō nwu ɛlā fiyɛ duu nɛ ɔcɛ cika ō lɛ a.

11. Ɛgɛnyá nɛ Ujehofa mafu ka anu wɛ itica nōo jé ō ‘Nwu Ɛlā Fiyɛ Duu’ a?

¹¹ Ujehofa abɔyi nu ka anuɔ wɛ ɔcɛ nōo jé ō ‘Nwu Ɛlā Fiyɛ Duu’ a. (Ayis. 30:20, 21) Ó wɛ itica nōo gē gbeyi cii, nōo gbonɛnɛ, klla jé alɔ lɔɔlɔhi. Ó gē leyi taajɛ kóō má uce ō ya olɔhi ku ācɛ nɛ ó gē nwu uwa ɛlā a. (Aíjē 130:3) Ó gē dɔka ɔdā nōo fiyɛ alɔ ɔfu ŋma ɛgiyi alɔ ŋ. Bla ka anu ya ɔkɔtɔ ku uwɔ a, ó kē wɛ ɛnɛɛnɛ ɛhi. (Aíjē 139:14) Ó wɛ ɔdā ɔlamu lɛ alɛɛcɛ ō lɛ ɔtu caca ō nwu ɛlā. Ɔcɛ nōo Ya alɔ a dɔka ku alɔ gɔbu yɔ i nwu ɛlā piyoo, klla yɔ i jɔɔnyɛ ɛlā ō nwu a. Ohigbu ɔɔma, ó géē wɛ ɔdā ijeeyi ō “yúnwū” ō nwu ɛlā ɔkwɛyi nōo yɔ ipu Ubáyíbu a. (1 Upít. 2:2) Lɛ ɔdā nɛ a jé ku anuɔ lɔfu ya gla a miya taajɛ, cɛɛ ku a yɔ i jé mla ō klɔcɛ ku Ubáyíbu ojigogo. (Ujós. 1:8) Mla otabɔ ku Ujehofa, a géē nwu ō jɔɔnyɛ ō jé aɛlā lɛyikwu Ujehofa mla ō yɔ i gbɛla lɛyikwu ɔ tōōtɔ̄ɔ̄.

12. Ɔdiya nɛ alɔ cika ō klɔcɛ lɛyikwu oyeeyi ku Ujisɔsi mla uklɔ ku ɔna ō ta nɛ ó ya a?

¹² Bēē lɛ eko taajɛ eko doodu ku a yɔ i gbɛla lɛyikwu oyeeyi ku Ujisɔsi mla uklɔ ku ɔna ō ta nɛ ó ya a. Ó cɛgbá nɛhi ku alɔ yɛce ocabɔ ku Ujisɔsi lɔɔlɔhi ɔdaŋ ku alɔ dɔka ō gba Ujehofa ɛ̄gbā, ofiyɛ duu ɛpleeko olɔnɔ nyā. (1 Upít. 2:21) Ujisɔsi da ayikpo ku nu ka é géē má ojama ɛyɛɛyɛyi. (Ulúk. 14:27, 28) Naana kpɔ a, ó lɔtuce ku ayikpo ku nu ɔkwɔɔkwɛyi géē hayi kpaakpa lɛ Ɔwɔico ɛgɛ nɛ ó ya a. (Ujɔ́n. 16:33) Klɔcɛ lipu lipu lɛyikwu oyeeyi ku Ujisɔsi, cɛɛ ku a lɛ ɔ ya ōmiya ku uwɔ ō yɛce ocabɔ ku nu abɔ a gē lā oyeeyi ku uwɔ ɛ̄cī doodu a.

13. Ɔdi nɛ a cika ō yɔ i ba Ujehofa ɛba ku nu a, ɔdi kē ya a?

¹³ Ɔdā ō jé foofunu i jɛ nóó. Ɔdā nōo ya ɛɛ nɛ a cɛgbá ɔdā ō jé a, wɛ o ya ɛɛ ku a nwu ɛlā lɛyikwu Ujehofa fiyɛ, klla ya yihɔtu nu mla ō kpɔtuce ɔ. (1 Ukɔ́r. 8:1-3) Abɔ a kē yɔ i nwu ɛlā lɛyikwu Ujehofa tōōtɔ̄ɔ̄ a, ba ɔ ɛbɔ kóō ta uwɔ abɔ ō lɛ ɔtu okpoce nwune fiyɛ. (Ulúk. 17:5) Ó gē cila ohi ku ɛdɔ ɔkɔ ō gba ɛgɛnyā. Ɔtu okpoce ɔkwɔɔkwɛyi nōo gbolo ce ɔdā ō jé nōo le kpaakpa nōo ŋma ɛgiyi Ɔwɔico a, géē ta uwɔ abɔ ō jɛ gɔbu fiyɛ.—Ujɛ́m. 2:26.

14. Ɛgɛnyá nɛ ɔyikpo Upita mafu ɔdā nōo ya ɛɛ nōó cɛgbá ku alɔ bi ɔdā nɛ alɔ nwu a le yuklɔ a? (Má ifoto a.)

¹⁴ Ɔyikpo Upita kɛla lɛyikwu ɔdā nōo ya ɛɛ nōó cɛgbá ku Ācɛ O Yɛce Ukraist kéē bi ɛlā néē nwu a le yuklɔ a. Ó kɛla lɛyikwu ɔ̄kā ku ɔdā nōo ya ipu Ubáyíbu ɛpleeko ku Unowa a.  Ujehofa da Unowa ka ó géē bi eŋkpɔ ō cenyi le ca ācɛ obɔbi nōo yɔ ɛpleeko ɔɔma a taajɛ. Ō jé ka Ujehofa géē bi eŋkpɔ ō cenyi le ca ācɛ obɔbi a taajɛ foofunu i jɛ ō nya Unowa mla ācɛ apɔlɛ ku nu ta nóó. Leyi bi ɔ ka Upita yɔ i kɛla lɛyikwu eko nɛ eŋkpɔ ō cenyi a i ya ɛ ŋ, néē klla “yɔ̄ gē gbā úgbéenyi ā” kpɔ ɛ ma. (1 Upít. 3:20) Ku ɛlā ɔkwɛyi a ba, Unowa mla ācɛ apɔlɛ ku nu yuklɔ mla ɛlā néē nwu ŋma ɛgiyi Ɔwɔico a, ŋma lɛ ō gba ugbeenyi nōo gbɛ nɛɛnɛhi a. (Uhíb. 11:7) Upita lɛ ɔdā nɛ Unowa ya a gbla ubatisim ō ya, ó kahinii: “Ɛ̄nyā wɛ ocābɔ̄ kú Ubatísim nōo nya alɔ tá abālɔbányā á.” (1 Upít. 3:21) Ohigbu ɛnyā, alɔ lɔfu lɛ uklɔ nɛ a yɔ i ya babanya o ya ɛɛ ku a tutu ō lɛ ubatisim ya a, gbla uklɔ nɛ Unowa mla ācɛ apɔlɛ ku nu ya ihayi alɛwa o ya ɛɛ kéē gwo ugbeenyi a. Uklɔ nyá nɛ a cɛgbá ō ya o ya ɛɛ ku a le tutu ō ya ubatisim a?

15. Ɛgɛnyá nɛ alɔ gáā mafu ku alɔ le piyabɔ ɔkwɔɔkwɛyi ɛ ma?

¹⁵ Ɔdā éyi nɛ alɔ cɛgbá ō ya aflɛyi a, wɛ ō le piyabɔ ɔkwɔɔkwɛyi ŋma íne ō biya ku alɔ. (Ācot. 2:37, 38) Ɔdaŋ ku alɔ le piyabɔ ɔkwɔɔkwɛyi, ó géē ta alɔ abɔ lɛ uce ō ya olɔhi. A habɔ ō ya aɔdā nōo gē wu Ujehofa ɔtu a ta ɛ? Aodee bɛɛka aja ō gbo amāŋ ikpo ɔnyā ɔhá ō ce, itaba ō gwa, amāŋ ɛlā obɔbi ō ka ŋma okonu. (1 Ukɔ́r. 6:9, 10; 2 Ukɔ́r. 7:1; Āfi. 4:29) Ɔdaŋ ku á ya lɛ a ɛ ŋ, ceyitikwu ku a lɛ opiyabɔ nōo cɛgbá a ya. Kɛla mla ɔcɛ nōo gē ya oklɔcɛ ku Ubáyíbu mla uwɔ a amāŋ da anyakwɔcɛ ku ujɔ ku uwɔ ɔka kéē ta uwɔ abɔ klla bi uwɔ jé ɔwɛ. Ɔdaŋ ku a wɛ ɛdrɔ nɛ a lā ɔlɛ ekponu mla ɛ́nɛ́ amāŋ adā uwɔ, bēē da uwa kéē ta uwɔ abɔ ō habɔ auce ō ya obɔbi duuma nōo lɔfu ci uwɔ ŋma ō ya ubatisim a ta.

16. Ɔdi nɛ alɔ cika ō ya ɔdaŋ ku alɔ dɔka ō gba Ujehofa ɛ̄gbā ojigogo a?

¹⁶ Ó klla lɛ aɔdā ocɛgbá ōhī nɛ a cika ō yɔ i ya ojigogo nōo wɛ ipu ɛ̄gba ō gba ku uwɔ lɛ Ujehofa. Ɛnyā lɛ ō ya mla ō bēē gā ōjila ku ujɔ mla ō toohi ipu ōjila a. (Uhíb. 10:24, 25) Ɔdaŋ nɛ a kē le cika jɛ ō wɛ ɔcɛ ō tɔɔna ɛlā Ɔwɔico, le má ku a yɔ i ya ɔɔma ojigogo. Abɔ a gē ceyitikwu ō yuklɔ ku ɔna ō ta fiyɛ a, ɛgɔɔma nɛ a gáā yɔ i jɔɔnyɛ nu a. (2 Utím. 4:5) Ɔdaŋ ku a wɛ ɛdrɔ nɛ a lā ɔlɛ ekponu mla ɛ́nɛ́ amāŋ adā uwɔ, da iyi uwɔ ɔka nyā kahinii: ‘Adā um amāŋ ɛ́nɛ́ um géē cɛgbá ō ta um ɛlá  kwu ɔ piii gbɔbu ɛɛ ku um jé ku um cika ō gā ōjila ku ujɔ amāŋ gɛɛcɛ ku uklɔ ku ɔna ō ta a? Kɛɛ ka ami gē ya ɔɔma abɔyi um a?’ Ŋma lɛ ō ya aɔdā nōo ba nyā abɔyi uwɔ, a gē mafu ku a lɛ ɔtu okpoce ku a klla yihɔtu Ujehofa nōo wɛ Ɔwɔico a, ka aɔdā nɛ ó klla je gā uwɔ a jɛ uwɔ eyī nɛhi. Ɛhi ɛgɛnyā nɛ a je lɛ Ujehofa a, wɛ ɔdā nɛ “Ɔwɔicō dɔɔ̄kā ā.” (2 Upít. 3:11; Uhíb. 13:15) Ɛjɛɛji ɛhi nɛ alɔ je ŋma ipu ɔtu lɛ Ujehofa néē kwu alɔ ba ɔ ŋ ma, gē he Ɔwɔico ɔtu nɛhi. (Má 2 Ācɛ Ukɔ́rīnti 9:7.) Alɔ gē ya aɔdā nōo ba nyā ohigbu ka ó gē cɛ lɛ alɔ gweeye eko duuma nɛ alɔ je ofiyɛ duu ku alɔ lɛ Ujehofa.

17-18. Ɛnɛɛnɛ uce ō ya nyá lɔfu ta uwɔ abɔ ō jɛ gɔbu ō gáā lɛ ubatisim ya a, ɔdi kē ya a? (Aíita 3:3-6)

¹⁷ Abɔ a yɔ i jɛ gɔbu ō gáā lɛ ubatisim ya a, a géē má unwalu ɛyɛɛyɛyi. Ācɛ ōhī lɔfu ŋmo uwɔ okonu ohigbu ɔtu okpoce ɛpɛpɛ ku uwɔ, é klla lɔfu ya uwɔ ŋmo duu. (2 Utím. 3:12) A lɔfu yɔ i ceyitikwu ō habɔ uce ō ya éyi nɛ a jé ka ó lɔhi ŋ ma ta, amáŋ ekoohi a lɔfu ya ɔdā obɔbi ɔɔma piii. Amāŋ ɔtu lɔfu ya uwɔ ku a gbeyi gla gɛ ŋ, amāŋ ɔtu lɔfu ya uwɔ bɛɛka ɔdā nɛ a miya a, a gáā ya ɔ jila gla ŋ ma. Ɔdi gáā ta uwɔ abɔ ō lɔtu a? Ɛnɛɛnɛ uce ō ya nyā nɛ, ihɔtu nɛ a lɛ lɛ Ujehofa a.

¹⁸ Ihɔtu nɛ a lɛ lɛ Ujehofa a wɛ ɛnɛɛnɛ uce ō ya, ucē ō ya nōo lɔhi fiyɛ duu ŋma ipu auce ō ya nɛ a lɛ a. (Jé Aíita 3:3-6.) Ihɔtu olɔfu nɛ a lɛ lɛ Ɔwɔico a lɔfu ta uwɔ abɔ ya āhɔ̄ olɔnɔ duuma nɛ a má ipu oyeeyi a lé gla. Igbalɛwa, Ubáyíbu gē kɛla lɛyikwu ihɔtu opiyoo nɛ Ujehofa lɛ lɛ ācɛ ɔlɛ nu. Ihɔtu nōo gē yɔ opiyoo a wɛ ka ó gáā habɔ ācɛ ɔlɛ nu ta gboogboo amāŋ ma ō yihɔtu ta uwa ŋ. (Aíjē 100:5) Ɔwɔico ya uwɔ gbla iyi nu. (Ohút. 1:26) Ɛgɛnyá nɛ a lɔfu mafu ɛdɔ ihɔtu ɛgɛnyā a?

19. Ɛgɛnyá nɛ a gáā lɔfu mafu ka ɛjɛɛji ɔdā nɛ Ujehofa ya gā uwɔ a jɛ uwɔ eyī nɛhi a? (Ācɛ Ugalésīya 2:20)

¹⁹ Mafu ka odee gē jɛ uwɔ eyī. (1 Utes. 5:18) Ɛ̄cī doodu, da iyi uwɔ ɔka kahinii, ‘Ɛgɛnyá nɛ Ujehofa mafu ihɔtu gā um ɛ ma?’ Oŋma ɔɔma, lɛ ahinya ta Ujehofa ipu ɔkɔ ō gba ku aɔdā nɛ ó ya gā uwɔ a, lɛ abɔ kwu aɔdā nɛ ó ya ga uwɔ a tɛɛcɛ. Le jé ka Ujehofa ya ɔdā olɔhi alɛwa gā uwɔ ohigbu ihɔtu nɛ ó lɛ gā uwɔ a, bɛɛka ɛgɛ nɛ ɔyikpo Upita wa gáā jé ɛnyā lɛyikwu Ujehofa duu a. (Jé Ācɛ Ugalésīya 2:20.) Da iyi uwɔ ɔka kahinii: ‘N dɔka ō mafu ku um yihɔtu ku nu duu?’ Ihɔtu nɛ a lɛ lɛ Ujehofa  a géē ta uwɔ abɔ ō yɔ i ta ojama, mla ō lɔtu ipu unwalu ɛyɛɛyɛyi nɛ a gē má a. Ó géē lɛ abɔ kwu uwɔ ɔtu ku a gɔbu yɔ i gba Ujehofa ɛ̄gbā ojigogo, mla ō mafu lɛ Adā uwɔ ku a yihɔtu nu ɛ̄cī doodu.

20. Ɔdi nɛ a cɛgbá ō ya o ya ɛɛ ku a lɛ oyeeyi ku uwɔ gwɛɛya lɛ Ujehofa a, ɛgɛnyá nɛ ōmiya nyā kē cɛgbá nɛhi lɛ a?

²⁰ Abɔ eko yɔ i nyɔ a, ihɔtu nɛ a lɛ lɛ Ujehofa a géē lɛ abɔ kwu uwɔ ɔtu ō kwu iyi uwɔ gwɛɛya lɛ ɔ ipu ɔkɔ ō gba. Bla ka eko nɛ a kwu iyi uwɔ gwɛɛya lɛ Ujehofa, a géē lɛ ɛnɛɛnɛ eyiyoce nyā: A géē wɛ aku nu piyoo. Eko nɛ a kwu iyi uwɔ gwɛɛya lɛ Ujehofa, a cokonu ka anuɔ géē gba ɔ ɛ̄gbā eko olɔhi mɛmla eko nɛ āhɔ̄ le lɔnɔ. Á gáā cɛgbá ō cokonu ɔɔma igbo ɛpa ŋ. Ɔkwɛyi, eko nɛ alɔ kwu iyi alɔ i gwɛɛya, alɔ yɔ i ya ōmiya nōo cɛgbá nɛɛnɛhi. Gbɛla tu ɛlā nyā ɛ: A géē ya ōmiya alɛwa ipu oyeeyi ku uwɔ, ōhī ku uwa lɔhi, amáŋ ó lɛ ōmiya duuma nōo lɔhi fiyɛ ōmiya ō je iyi uwɔ gwɛɛya lɛ Ujehofa nɛ a ya a ŋ. (Aíjē 50:14) Usetan géē ceyitikwu ya ku ihɔtu nɛ a lɛ lɛ Adā uwɔ a kóō lɔfu gɛ ŋ, ó kē leyice ku a gáā hayi kpaakpa lɛ Ujehofa ŋ. A hii cɛ lɛ Usetan yale ŋ! (Ujób. 27:5) Ihɔtu olɔfu nɛ a lɛ lɛ Ujehofa a géē ta uwɔ abɔ ō lɛ okonu nɛ a ce ō gba Ujehofa ɛ̄gbā piyoo a tu, klla ya ku a jɛ gɔbu ipu ɛma nɛ a lɛ mla Adā uwɔ nōo yɔ ɔkpanco a.

21. Ɔdiya nɛ alɔ lɔfu ka ka ubatisim i wɛ oŋmɛyi ŋ amáŋ ō gbɔɔ ŋmaajɛ a?

²¹ Igbihi nɛ a kwu iyi uwɔ gwɛɛya lɛ Ujehofa, da anyakwɔcɛ ku ujɔ ku uwɔ lɛyikwu ikpo ɔhá nōo cɛgbá nɛhi a. Bi ɔ ipu ɔtu ku uwɔ eko doodu, ka ó wɛ ubatisim wɛ oŋmɛyi a nóó amáŋ ō gbɔɔ ŋmaajɛ. Ó wɛ ō gbɔɔ ku oyeeyi ipu ɛ̄gbā ō gba ku Ujehofa nōo géē gɔbu piyoo a. Ohigbu ɔɔma, ya ku ihɔtu nɛ a lɛ lɛ Adā uwɔ a kóō yɔ i lɔfu tōōtɔ̄ɔ̄ babanya. Bēē ya ōmiya nōo géē ya ku ihɔtu nɛ a lɛ a ɔ a kóō yɔ i lɔfu tōōtɔ̄ɔ̄ ɛ̄cī doodu. Ōmiya ɛgɛnyā géē lɛ abɔ kwu uwɔ ɔtu ō lɛ ubatisim ya. Ɛ̄cī ɔɔma géē wɛ ɛnɛɛnɛ ɛ̄cī ibi. Amáŋ ɛnyā wɛ ō gbɔɔ ŋmaajɛ. Kōōcō ya ku ihɔtu nɛ a lɛ lɛ Ujehofa mla Ɔyi nu a kóō yɔ i lɔfu tōōtɔ̄ɔ̄ piyoo!