Ɔdiya nɛ adā néē hi ka “Ɔ̄cɛ ā” ka ka ɔdā ugwu ku ayi anuɔ géē “cē nyɛ́ fíyɛ́,” ɔdaŋ ka ó kwu Urutu i lɛ a? (Urút. 4:1, 6)

Ɛpleeko ku Ubáyíbu a, ɔdaŋ ka ɔcɛnyilɔ i ma ɔyi ŋ anu ó gekwu a, ɔdi gáā ya da aɔdā agbenu ku nu a? Iye ku apɔlɛ ku nu géē bi piyoo nɛɛ? Íne ku Umosisi a ta alɔ abɔ ō cila ohi ku aɔka nyā.

Ɔdi gáā ya da ajɛ ku ɔcɛnyilɔ nōo gekwu amāŋ ohigbu ɛha kwu ajɛ ku nu u i je lá a? Éyi ku ɔyinɛ nu nɔnyilɔ amāŋ ɔcɛ apɔlɛ ku nu nōo kwu ɔ ajaajɛ lɔfu je ajɛ a lá cigbihi gla. Ɛnyā géē ya kóō wɛ aku ācɛ apɔlɛ a kpɔ.—Ulīf. 25:23-28; Áluk. 27:8-11.

Ɛgɛnyá nɛ ɛnyā gáā ya ku iye ku apɔlɛ ku ɔcɛ nōo kwū a kóō hii bi piyoo ŋ ma? Ɔdaŋ ka ɔyinɛ ku ɔcɛnyilɔ nōo kwū a kwu ɔnyā ku nu i lɛ ɔnyokwu, bɛɛka ɛ̄nɛ̄ ō ya ipu āhɔ̄ ku Urutu a. Ɔcɛnyilɔ lɔfu lɛ ɔnyā ku ɔyinɛ nu nōo kwū a o ya ɛɛ ku ɔnyā a kóō lɛ ɔyi ma lɛ ɔ, amáŋ ɔyi a géē lé iye ku ɔcɛnyilɔ nōo kwū a klla lugwu ku aɔdā agbenu ku nu. Ōmiya ku ihɔtu nyā klla gē tabɔ ya ku ɔcɛnyilɔ ɔɔma kóō leyikwu ɛgbá ku ɔnyokwu a.—Obla. 25:5-7; Umát. 22:23-28.

Leyi yɛ ocabɔ ku Unaomi. Adā éyi néē hi ka Ɛlimɛlɛki a lɛ ɔ a. Eko nɛ ɔba nu mla ayinɔyilɔ ku nu ɛpa a gekwu a, ó lɛ ɔcɛnyilɔ duuma ipu apɔlɛ a nōo géē leyikwu ɔ ɛɛ gɛ ŋ. (Urút. 1:1-5) Igbihi nɛ ó le cigbihi wa Ujuda mla ɔnyā ɔyi nu Urutu a, ó da Urutu kóō le da Ubowasi kóō lɛ ajɛ ku uwa lā cigbihi. Ubowasi wɛ ɔcɛ apɔlɛ nōo kwu ɔba nu Ɛlimɛlɛki ajaajɛ. (Urút. 2:1, 19, 20; 3:1-4) Amáŋ, Ubowasi jé ka ó lɛ ɔcɛ apɔlɛ ku nu éyi nɛ Ubáyíbu hi ka “Ɔ̄cɛ ā,” nōo kwu ɔ ajaajɛ fiyɛ. Ohigbu ɔɔma, anu wɛ ɔcɛ aflɛyi nōo lɛ ɛnɛɛnɛ ɛga ōmiya ɔdaŋ ka ó géē lá ajɛ a cigbihi a.—Urút. 3:9, 12, 13.

Eko aflɛyi a, adā ɔɔma néē hi ka “Ɔ̄cɛ ā” cɛ ō je otabɔ. (Urút. 4:1-4) Ó jé ka anuɔ géē cɛgbá ō ŋmo ije o ya ɛɛ kóō lɛ ajɛ a lá cigbihi, ó klla jé duu ka Unaomi ɔ kwu hilokplici ō ma ɔyi nōo géē lugwu ku ajɛ a ŋma ɛgiyi Ɛlimɛlɛki. Ɛnyā mafu ka ɔdā nɛ adā ɔɔma néē hi ka Ɔcɛ a bi ipu ɔtu a wɛ kéē kwu ajɛ a u lɛ ɔ kóō kwu piya ɔdā ugwu ku nu, ɛnyā géē wɛ itene nɛhi lɛ ɔ.

Amáŋ, adā ɔɔma néē hi ka Ɔcɛ a ta ō lá ajɛ a cigbihi, eko nɛ ó gáā le jé ka anuɔ géē cɛgbá ō lɛ Urutu ɔnyokwu a. Ó kahinii: “Ɔ́dāŋ ka ɔ́ɔ lɛ ā nɛɛ, ayíka anúɔ géē habɔ̄ íkwu ō lá ajɛ ā tá. Ohígbū nɛ̄ úgwū kú ayí anúɔ ɔ́ɔ géē cē nyɛ́ fíyɛ́.” (Urút. 4:5, 6) Ɔdiya nɛ ó piya ɔtu ku nu abɔ a?

Ɔdaŋ ka adā ɔɔma néē hi ka Ɔcɛ a amāŋ ɔcɛ ɔhá kwu Urutu i lɛ nɛ ó lɛ ɔyi ɔcɛnyilɔ ma, ajɛ ku Ɛlimɛlɛki géē je piya ɔdā ugwu ku ɔyi ɔɔma. Ɛgɛnyá nɛ ɛnyā lɔfu ya ku ɔdā “úgwū” ku adā ɔɔma néē hi ku Ɔcɛ a, kóō “cē nyɛ́ fíyɛ́” a? Ubáyíbu i da alɔ nóó, amáŋ má aɔdā ōhī nōo lɔfu ya a.

• Aflɛyi, ó lɔfu leyi má ije nɛ ó gáā bi le lá ajɛ a ka ije ō ŋmo bonu, ofiyɛ duu abɔ ajɛ ku Ɛlimɛlɛki a i gáā wɛ aku nu ma. Ó géē je piya aku ɔyi ku Urutu.

• Ɔmpa, ɛgbá kóō yɔ i leyi kwu Unaomi mɛmla Urutu géē je piya aku nu.

• Ɔmɛta, ɔdaŋ ka Urutu lɛ ayi ɔhá ma lɛ adā ɔɔma néē hi ka Ɔcɛ a, é géē kɔ ɔdā ugwu duuma nɛ ó lɛ a mla ayipɛ ɔlɛ nu.

• Ɔmɛnɛ, ɔdaŋ ka adā ɔɔma néē hi ka Ɔcɛ a i lɛ ɔyi ku abɔyi nu ŋ, ɔyi duuma nɛ Urutu gáā ma a géē lɛ íkwu ō je ajɛ ku nu mla aku Ɛlimɛlɛki ɔdā ugwu ku nu. Ohigbu ɛnyā eko nɛ ó gekwu, ajɛ ku nu géē je piya aku ɔyi ɔhá nōo yɔ i lé iye ku Ɛlimɛlɛki, ó wɛ iye ku nu ŋ. Adā ɔɔma néē hi ka Ɔcɛ a i dɔka ō lɛ ajɛ ku nu hija flu flu kóō kwu piya aku Unaomi ŋ. Ó he ɔ ɔtu fiyɛ ku Ubowasi nōo wɛ ɔcɛ ɔhá nōo lɛ íkwu ō lá ajɛ a cigbihi a kóō lɛ ajɛ a lá. Ubowasi kē le ya lɛ a ohigbu ka ó dɔka ō “lɛ agbénú ā tū iyē kú aókwūmā ā, cɛ́ɛ́ kú ipɔ́ɔma mɛ́mla ipɔ́ɔnū kú uwā í yɔ̄ ī gɔbū lɛ ācɛ ɔlɛ́ uwā mɛ́mla ipú ɔlɛ́ kú uwā.”—Urút. 4:10.

Ɔdā nōo he adā ɔɔma néē hi ka Ɔcɛ a ɔtu a, wɛ ō gɔbu yɔ i lé iye ku nu mla ō bi ɔdā agbenu ku nu. Ó wɛ ɔcɛ onwula abɔ flu flu ŋ. Amáŋ, naana nɛ adā ɔɔma néē hi ka Ɔcɛ a ceyitikwu kóō lɛ iye ku nu tu a, icɛ alɔ i kóō jé iye a ŋ. Ó klla miyɛ ɛnɛɛnɛ ɛga nɛ Ubowasi miyɛ a ŋ duu. Ubowasi wɛ ipu ācɛ nōo wɛ adaada ku Umɛsayiya, nōo wɛ Ujisɔsi Ukraist a. Ɛnyā wɛ ɔdā obɔbi nɛhi lɛ adā ɔɔma néē hi ka Ɔcɛ a, nōo ta ō je otabɔ lɛ ɔcɛ nɛ ɛgbá ce ɔ a!—Umát. 1:5; Ulúk. 3:23, 32.