É lɔfu je íne obiya ku alɔ ya alɔ ɛhi foofunu o bu ipu ɛya nɛ Ujisɔsi bi oyi ku nu gwo a. (Āfi. 1:7) Naana kpɔ a, Ubáyíbu da alɔ kahinii: “Ɔwɔicō lɔtū lé, anɔ́ɔ ó leyī gwō íne nɛ̄ ācɛ bīya [gbɔbu] ā bónū á,” ɛnyā wɛ u gbɔbu ɛɛ ku Ujisɔsi kóō je oyeeyi ku nu fula alɔ a. (Uróm 3:25) Ɛgɛnyá nōó tɔɔtɛ ku Ujehofa kóō je íne obiya yɛhi gbɔbu lɛ ofula a, klla wɛ Ɔwɔico nōo gē ya odee ɔwɛ okpaakpa kpɔ a?

Ujehofa cokonu ku “Ɔyí” éyi nōo géē nya ācɛ nōo kpɔtuce ɔ mla aokonu nɛ ó ce a ta. Eko nɛ ó cokonu ɔɔma a, ó lɛbɛɛka é kwu ɛhi kóō ofula a i gba ɛ ma. (Ohút. 3:15; 22:18) Ɔwɔico jé kpɔcii ka eko nɛ eko kpaakpa nɛ ó bi ɔtu a le ya, Ɔyinɔnyilɔ ku nu a géē cɛ ŋma ɔtu ō je iyi nu gwɛɛya eko nɛ Ɔwɔico dɔka a. (Ugal. 4:4; Uhíb. 10:​7-10) Ɛpleeko nɛ Ujisɔsi yɔ ipu ɛcɛ nyā a, Ujehofa je íkwu lɛ ɔ ō je íne obiya yɛhi gbɔbu ɛɛ nɛ ó je oyeeyi ku nu fula alɔ a. Ó tɔɔtɛ lɛ Ujisɔsi ō je íne obiya ku ācɛ nōo kpɔtuce ɔ a ya uwa ɛhi, ohigbu ka ó jé ka ɛya nɛ ó gáā gwo a géē je íne ō biya ku uwa ŋmonyi.—Umát. 9:​2-6.