1. Ɛdɔ aafu nyá nɛ ācɛ ōhī nōo gē gba Ujehofa ɛ̄gbā kpaakpa a lɔfu lɛ a?

 Ó WƐ ɔdā ō ta ɔtu kwu ɔtu nɛhi ō jé ka ɛlā ku ɛjɛɛji ācɛ ɔlɛ Ujehofa he ɔ ɔtu! Ubáyíbu kahinii: “Ācɛ kú Óndú ā he ɔ́ ɔtū.” (Aíjē 149:4) Amáŋ ekoohi, ɔtu gē gbenyi lɛ ācɛ ōhī nɛhi nōo gē ya kéē lɛ aafu ɔdaŋ ka ɛlā ku uwa he Ujehofa ɔtu. Ɛdɔ aafu ɛgɛnyā ya ku ɔtu kóō gbenyi lɛ ācɛ alɛwa nōo gba Ujehofa ɛ̄gbā kpaakpa néē kɛla lɛyikwu uwa ipu Ubáyíbu a.—1 Usám. 1:​6-10; Ujób. 29:​2, 4; Aíjē 51:11.

2. Ɛlā ku anyɛ lɔfu he Ujehofa ɔtu a?

² Ubáyíbu lɛ ɔ teyi peee ka ɛlā ku alɛɛcɛ nōó jila iyē ŋ ma lɔfu he Ujehofa ɔtu. Ɛgɛnyá a? Alɔ cɛgbá ō kpɔtuce Ujisɔsi Ukraist mla ō lɛ ubatisim ya. (Ujɔ́n. 3:16) O bu ɔwɛ nyā, alɔ gē mafu lɛ ācɛ ɔhá ku alɔ le piyabɔ ŋma íne obiya ku alɔ ɛ, klla lɛ okonu ce ka alɔ géē ya ɔdā nōo wɛ ococɛ ku Ɔwɔico a. (Ācot. 2:38; 3:19) Ujehofa gē gweeye mla alɔ nɛhi eko duuma nɛ alɔ ya aɔdā nōo ba nyā, o ya ɛɛ ku alɔ kwu piya ɔya ku nu nōo kwu ɔ ajaajɛ a. Ɔdaŋ ku alɔ ceyitikwu ō ya ɛji ɔfu ku alɔ ō lɛ okonu nɛ alɔ ce ō gba ɔ ɛ̄gbā a tu, ɛlā ku alɔ gē he Ujehofa ɔtu, ó klla gē leyi má alɔ ka alɔ wɛ ɔya ku nu nōo kwu ɔ ajaajɛ.—Aíjē 25:14.

3. Aɔka ɛta nyá nɛ alɔ gáā kɛla lɛyikwu ɔ a?

³ Ɔdiya nɛ ɔtu gē ya ācɛ ōhī ekoohi ka ɛlā ku uwa i he Ujehofa ɔtu ŋ ma? Ɛgɛnyá nɛ Ujehofa gē bi le mafu ka ɛlā ku alɔ he ɔ ɔtu a? Ɛgɛnyá nɛ Ɔcɛ O Yɛce Ukraist kē lɔfu jé kpɔcii ka ɛlā ku nu he Ujehofa ɔtu a?

ƆDĀ NŌO YA ƐƐ NƐ ƆTU LƆFU YA ĀCƐ ŌHĪ KA ƐLĀ KU UWA I HE UJEHOFA ƆTU Ŋ MA

4-5. Ɔdaŋ ka ɔtu gē ya alɔ bɛɛka alɔ i cɛgbá ŋ, ɔdi nɛ alɔ lɔfu jé kpɔcii a?

⁴ Ŋma eko nɛ alɔ wɛ ɔyipɛ a, ɔtu ya alɛwa ku alɔ bɛɛka alɔ i cɛgbá ŋ ma. (Aíjē 88:15) Ɔyinɛ alɔ nɔnyilɔ éyi nōo lé ka Adrián a kahinii: “Eko doodu ɔtu gē ya um bɛɛka ń cɛgbá ŋ ma. Eko nɛ um wɛ ɔyipɛ a, n bla ka um gē gbɔɔkɔ ku ācɛ apɔlɛ ku um kóō  yɔ ipu Uparadais, naana nɛ ɔtu gē ya um ka ń cika jɛ ō yɔ abɔɔ ŋ ma.” Tony, nɛ ācɛ apɔlɛ ku nu i wɛ Ācɛ Ocijali Ku Ujehofa ŋ ma kahinii: “Apɔlɛ ku um i da um jejee ka é yihɔtu ku um, amāŋ gē mafu ka ɛlā ku um he uwa ɔtu ŋ. Ɛnyā gē ya ku ɔtu kóō ya um ka ó lɛ ɔdā duuma nɛ um lɔfu ya nōo géē cɛ lɛ ɔtu he uwa ŋ.”

⁵ Ɔdaŋ ka ɔtu gē ya alɔ ekoohi bɛɛka alɔ i cɛgbá ŋ, alɔ cika ō bla ka Ujehofa abɔyi nu pi alɔ bla iyi nu a. (Ujɔ́n. 6:44) Ó gē má auce ō ya olɔhi nɛ alɔ lɛ a nɛ alɔ abɔyi alɔ i kóō jé lɛyikwu ɔ ŋ ma, ó kē jé ɛdɔ ɔcɛ nɛ alɔ wɛ ɔkwɔɔkwɛyi a. (1 Usám. 16:7; 2 Úklɔ́ 6:30) Ohigbu ɛnyā, alɔ lɔfu lɔtuce ɔ eko nɛ ó ka ka alɔ cɛgbá nɛhi a.—1 Ujɔ́n. 3:​19, 20.

6. Ɛgɛnyá nɛ ɔtu ya ɔyikpo Upɔlu lɛyikwu íne nɛ ó biya ŋma igbihi a?

⁶ Gbɔbu ɛɛ ku alɔ nwu ɛlā ɔkwɛyi a, ōhī ku alɔ ya aɔdā ōhī nōo gē cɛ lɛ ɔtu je unwalu lɛ alɔ jaa kwu icɛ. (1 Upít. 4:3) Ācɛ ōhī nōo kóō yɔ i gba Ujehofa ɛ̄gbā kpaakpa a, lɔfu yɔ i nya mla ɛga néē gē ya lɔhi ŋ ma. Awɔ a bɛɛ? Ɔtu gē ya uwɔ ekoohi bɛɛka Ujehofa i gáā je íne obiya ku uwɔ ya uwɔ ɛhi gla ŋ? Ɔdaŋ ka ó lɛ a, alɔ lɔfu lɛ ɔtu ō tu kwu ɔtu ō jé ka ācɛ ōhī nōo kóō yɔ i gba Ujehofa ɛ̄gbā kpaakpa a, yɔ i nya mla ɔtu ogbenyi ɛgɔɔma duu. Ocabɔ mafu, ɔtu biya lɛ ɔyikpo Upɔlu nɛɛnɛhi eko nɛ ó gbɛla lɛyikwu aíne obiya ku nu a. (Uróm 7:24) Ku ɛlā ɔkwɛyi a, Upɔlu le piyabɔ ŋma íne ō biya ku nu klla lɛ ubatisim ya ɛ. Naana kpɔ a, ó leyi má iyi nu ka anu i “tīile ŋ́ fíyɛ́ dúú ipú odúúdú ācotɛ̄hɔ̄ á,” klla hi iyi nu ka “otrɛ̄yí” ku ācɛ o biya íne.—1 Ukɔ́r. 15:9; 1 Utím. 1:15.

7. Ɔdi nɛ alɔ cika ō bla lɛyikwu íne nɛ alɔ biya ŋma igbihi a?

⁷ Adā alɔ nōo yɔ ɔkpanco a cokonu ō je ya alɔ ɛhi ɔdaŋ ka alɔ le piyabɔ. (Aíjē 86:5) Ohigbu ɛnyā, ɔdaŋ ku alɔ le piyabɔ ɔkwɔɔkwɛyi ŋma íne nɛ alɔ biya a, alɔ lɔfu lɔtuce ɛlā nɛ Ujehofa ka a ka ó kwu je ya alɔ ɛhi ɛ.—Ukól. 2:13.

8-9. Ɛgɛnyá nɛ alɔ lɔfu yale lɛyikwu ɔtu nōo gē ya alɔ ku alɔ i gáā lɔfu ya nwune gboogboo nōo géē ya ku ɛlā ku alɔ kóō he Ujehofa ɔtu ŋ ma?

⁸ Ɛjɛɛji alɔ dɔka ō ya ɔdā nɛ alɔ ya gla a o ya ɛɛ ku alɔ gba Ujehofa ɛ̄gbā. Amáŋ, ɔtu lɔfu ya ācɛ ōhī ka ɔdā nōo gē tɔɔtɛ lɛ uwa ō ya a, i gáā jɛ Ujehofa eyī gboogboo nōo géē ya ku ɛlā ku uwa kóō he ɔ ɔtu ŋ. Ɔyinɛ alɔ nɔnya éyi nōo lé ka Amanda a kahinii: “Igbalɛwa, n gē gbɛla kóō ya ɛji ɔfu ku um lɛ Ujehofa wɛ ka um cɛgbá ō yɔ i ya nwune lɛ ɔ fiyɛ eko doodu. Ohigbu ɛnyā, n gē ceyitikwu lɔfu lɔfu ō ya fiyɛ ɔdā nɛ ɔfu ku um jɛ ɔ a. Eko duuma nɛ ń kē ya fu ɛji nɛ um yɔ i leyice a ŋ, n gē gbɛla ka um kwu iyi um abɔ i gaajɛ ɛ, ka ɛgɔɔma nōó kē gáā lɛ mla Ujehofa duu a.”

⁹ Ɛgɛnyá nɛ alɔ lɔfu yale lɛyikwu ɔtu nōo gē ya alɔ ka ɔdā nōo gē tɔɔtɛ lɛ alɔ ō ya a, i gáā jɛ Ujehofa eyī gboogboo nōo géē ya ku ɔtu he ɔ ŋ ma? Alɔ bla ka Ujehofa i gē pi ojigogo ka aku nu le kpaakpa piii a ŋ. Ó gē leyice ku alɔ géē ya fiyɛ ɛji ku alɔ ŋ. Ɔdā duuma nōo tɔɔtɛ lɛ alɔ ō ya lɛ ɔ a gē jɛ ɔ eyī, ɔdaŋ ka ɔɔma wɛ ofiyɛ duu ku alɔ a. Klla gbɛla lɛyikwu ocabɔ ku ācɛ ŋma ipu Ubáyíbu nōo gba Ujehofa ɛ̄gbā mla ɛjɛɛji ɔtu ku uwa a. Ocabɔ mafu, gbɛla lɛyikwu Upɔlu. Ó ceyitikwu yuklɔ lɔfu lɔfu ihayi alɛwa, yɔ i gā iyawu nōo ligbo nɛhi klla yɔ i lɛ aujɔ ɛyɛɛyɛyi kwaajɛ. Amáŋ, eko nɛ āhɔ̄ ku nu kwu piyabɔ nōó tɔɔtɛ lɛ ɔ ō yuklɔ ku ɔna ō ta a nwune ɛgɛ nɛ ó tɛtɛ gē ya gbɔbu a ŋ ma, ɔɔma wɛ ka ɛlā ku nu i he Ujehofa ɔtu gɛ ŋ? Ehee. Ó gɔbu yɔ i ya ɛji ɔfu ku nu, Ujehofa kē lɛ ɔhā hɛ ce ɔ. (Ācot. 28:​30, 31) Ɔwɛ ekponu ɔɔma, ekoohi ɔdā nɛ alɔ gē ya lɛ Ujehofa a lɔfu piyabɔ. Amáŋ ɔdā nōo cɛgbá lɛ ɔ fiyɛ duu a, wɛ ɔdā nōo gē lɛ abɔ kwu alɔ ō ya ɔdā ɔɔma a. Babanya, alɔ leyi yɛ ɔwɛ ōhī nɛ Ujehofa gē mafu ka ɛlā ku alɔ he ɔ ɔtu a.

 ƐGƐNYÁ NƐ UJEHOFA GĒ BI LE MAFU KA ƐLĀ KU ALƆ HE Ɔ ƆTU A?

10. Ɛgɛnyá nɛ alɔ lɔfu po ɛlā ŋma ɛgiyi Ujehofa ka ɛlā ku alɔ he ɔ ɔtu a? (Ujɔ́ni 16:27)

¹⁰ O bu ipu Ubáyíbu. Ujehofa gē dɔka ɔwɛ ɛyɛɛyɛyi nɛ ó géē bi le mafu lɛ ācɛ ɔlɛ nu ka ó yihɔtu ku uwa, ka ɛlā ku uwa klla he ɔ ɔtu nɛhi. Ubáyíbu da alɔ lɛyikwu āhɔ̄ ɛpa nɛ Ujehofa da Ujisɔsi ka ó yihɔtu nu, ka ɛlā ku nu klla he ɔ ɔtu nɛhi a. (Umát. 3:17; 17:5) A géē dɔka ku Ujehofa kóō da uwɔ ka ɛlā ku uwɔ he ɔ ɔtu? Ujehofa i gē kɛla lɛ alɔ ŋma ɔkpanco ŋ, amáŋ ó gē kɛla lɛ alɔ o bu ipu Ubáyíbu. Eko duuma nɛ alɔ yɔ i jé ɛlā ku ihɔtu nɛ Ujisɔsi ka lɛ ayikpo ku nu a, ó gē ya alɔ bɛɛka Ujehofa wɛ ɔcɛ nōo yɔ i ka aɛlā ɔɔma lɛ alɔ a. (Jé Ujɔ́ni 16:27.) Ujisɔsi ya ɛgbla ku uce ō ya ku Adā nu mɛɛlɛ. Ohigbu ɛnyā, eko duuma nɛ alɔ yɔ i jé ɔ̄kā ku Ubáyíbu lɛyikwu ɛgɛ nɛ Ujisɔsi mafu ka ɛlā ku ayikpo ku nu nōó jila iyē ŋ amáŋ nōo hayi kpaakpa a he ɔ ɔtu a, alɔ lɔfu bi ipu ɔtu ka Ujehofa wɛ ɔcɛ nōo yɔ i da alɔ aɛlā ɔɔma a.—Ujɔ́n. 15:​9, 15.

11. Eko duuma nɛ alɔ yɔ i má unwalu, ɔdiya nɛ ɔɔma i mafu ka ɛlā ku alɔ i he Ujehofa ɔtu gɛ ŋ ma? (Ujɛ́mīsi 1:12)

¹¹ O bu ipu uce ō ya ku nu. Ujehofa le tutu eko doodu ō ta alɔ abɔ, bɛɛka ō je aɔdā nɛ alɔ cɛgbá a lɛ alɔ. Amáŋ ekoohi, Ujehofa gē jɛga ku aɔdobɔbi kóō ya da alɔ ɛgɛ nɛ ó ya ipu āhɔ̄ ku Ujobu a. (Ujób. 1:​8-11) Eko duuma nɛ alɔ yɔ i má unwalu, ɔɔma i wɛ ka ɛlā ku alɔ i he Ujehofa ɔtu gɛ ŋ. Ikɔkɔ ɔɔma, ó gē je ɛnɛɛnɛ ɛga lɛ alɔ ō mafu lɛ Ujehofa ɛgɛ nɛ alɔ yihɔtu ku nu klla kpɔtuce ɔ nɛhi lɛ a. (Jé Ujɛ́mīsi 1:12.) Ɛpleeko nɛ alɔ kē yɔ i má unwalu ɔɔma a, alɔ géē má ɛgɛ nɛ ó yihɔtu ku alɔ mla ɛgɛ nɛ ó ta alɔ abɔ ō lɔtu a.

12. Ɛlā nyá nɛ alɔ lɔfu nwu ŋma ocabɔ ku Dmitrii a?

¹² Leyi yɛ ocabɔ ku ɔyinɛ alɔ nɔnyilɔ éyi nōo lé ka u Dmitrii nōo ŋma Asia a. Uklɔ ku nu hɛ ɔ abɔ, ó kē má uklɔ duuma ŋ ɔya alɛwa. Ó le miya ō mafu ɔtu okpoce ku nu lɛ Ujehofa, ŋma lɛ ō yuklɔ ku ɔna ō ta a fiyɛ ɛgɛ nɛ ó tɛtɛ gē ya eko nɛ ó lɛ uklɔ a. Ɔya alɛwa gáā le gla, ó kē má uklɔ duuma ŋ kpɔ. Igbihaajɛ, ó gbɔɔ ō doōcē nɛɛnɛhi nɛ ó kóō nyanjɛ ŋma agodo gla gɛ ŋ. Ó gáā gbɔɔ ō gbɛla ka ó wɛ ɔba mla adā olɔhi gɛ ŋ, klla gbɔɔ ō gbɛla ɔdaŋ ka ɛlā ku nu he Ujehofa ɔtu kpɔ. Ɔnɔɔnɛ ku ɛ̄cī éyi, ɔyinɔnya ku nu lɛ aɛlā nōo yɔ ipu ɔkpá ku Ayisáya 30:15 a ya wɛɛcɛ. Abɔɔ kahinii: “N géē lɛ ɔfú tū aá iyē ɔ́dāŋ nɛ̄ aá lɛ ɔtū kpóce um bá cíí.” Ó lɛ ɔkpá nɛ ó ya wɛɛcɛ a bi wa ɛga nɛ adā nu  gwuta ɛyi agodo a, anu ó kahinii, “Upapa, eko duuma nɛ ɔtu yɔ i biya gā uwɔ, a lɔfu gbɛla tu ɛga ku Ubáyíbu nyā.” Ó gáā le ta u Dmitrii eyī peee ka Ujehofa lɛ ɔ ya tɔɔtɛ lɛ ācɛ apɔlɛ ku nu ō lɛ ɔdole jɛ ō lé, ili ō le wiye, mla ɛga ō lā. Ó kahinii: “Ɔdā nɛ um cɛgbá ō ya a, wɛ ō yɔ cii klla gɔbu yɔ i kpɔtuce Ɔwɔico.” Ɔdaŋ ku a yɔ i má ɛdɔ unwalu ekponu nyā, a lɔfu lɔtuce kpɔcii ka Ujehofa géē leyi kwu ɔ klla géē ta uwɔ abɔ ō lɔtu.

13. Anyɛ nɛ Ujehofa lɔfu bi le mafu lɛ alɔ ka ɛlā ku alɔ he ɔ ɔtu a, ɛgɛnyá nɛ ó kē i bi le ya ɔɔma a?

¹³ O bu ipu ayinɛ alɔ. Ujehofa gē bi ayinɛ alɔ le mafu lɛ alɔ ka ɛlā ku alɔ he ɔ ɔtu. Ocabɔ mafu, ó lɔfu lɛ abɔ kwu ācɛ ɔhá ɔtu kéē kɛla ō ta ɔtu kwu ɔtu lɛ alɔ eko okpaakpa nɛ alɔ cɛgbá nu a. Ɛnyā wɛ ɔdā nōo ya da ɔyinɛ alɔ nɔnya éyi nōo ŋma Asia a eko nɛ ó yɔ i má unwalu nɛhi a. Uklɔ ku nu hɛ ɔ abɔ, ó klla gbɔɔ ō doōcē nɛɛnɛhi. Ɔba nu klla gáā lɛ íne biya bɔbi bɔbi, ohigbu ɛnyā é kwu ɔ i taajɛ ŋma ō wɛ ɔnyakwɔcɛ ku ujɔ. Ó kahinii: “Ń kóō jé ɔdā nōo ya ɛɛ nɛ aɔdā nōo ba nyā yɔ i ya da um a ŋ. N gbɛla ku á jé ŋ, n lɛ ɔdobɔbi éyi ya ɛ, ka ɛlā ku um i klla he Ujehofa ɔtu gɛ ŋ.” Ɔyinɛ alɔ nɔnya a gbɔɔkɔ lɛ Ujehofa kóō cɛ lɛ ɔ jé ka ɛlā ku nu he ɔ ɔtu kpɔ. Ɛgɛnyá nɛ Ujehofa bi le cila ɔkɔ ō gba ku nu a? Ó kahinii: “Anyakwɔcɛ ku ujɔ kɛla mla um klla cɛ gā um jé kpɔcii ka Ujehofa yihɔtu ku um kpɔ.” Amáŋ abɔ eko dēē gla ligii a, ó klla ba Ujehofa ɛba kóō ta ɔ abɔ kpɔ. Ó kahinii: “Ɛ̄cī ɔɔma piii a, n miyɛ uleta ŋma ɛgiyi ígwu ku ayinɛ alɔ ōhī ipu ujɔ. Abɔ um yɔ i jé aɛlā ō ta ɔtu kwu ɔtu néē ta a, ɔtu ya um ka Ujehofa lɛ ɔkɔ ō gba ku um po ɛ.” Ku ɛlā ɔkwɛyi a, igbalɛwa Ujehofa gē mafu lɛ alɔ ka ɛlā ku alɔ he ɔ ɔtu, o bu ipu aɛlā ogbonɛnɛ nɛ ācɛ ɔhá gē da alɔ a.—Aíjē 10:17.

14. Ɔwɛ ɔhá nyá nɛ Ujehofa klla gē bi le mafu lɛ alɔ ka ɛlā ku alɔ he ɔ ɔtu a?

¹⁴ Ujehofa klla gē mafu ka ɛlā ku alɔ he ɔ ɔtu  ŋma lɛ ō bi ayinɛ alɔ le tu alɔ ukɔ́ eko nɛ alɔ cɛgbá nu. Ocabɔ mafu, ɛpleeko ku Ācɛ O Yɛce Ukraist ku eko aflɛyi a, Ujehofa bi ɔyikpo Upɔlu le ta ɔkpá igwo ɛnɛ gē lɛ ayinɛ a. Ipu aɔkpá nɛ ó ta ɔɔma, Upɔlu tu ayinɛ nu a ukɔ́ ku ihɔtu lɛyikwu ɔwɛ néē cika ō ya lɔhi fiyɛ a. Ɔdiya nɛ Ujehofa ya ku Upɔlu kóō tu ayinɛ a ukɔ́ ɔɔma ipu ɔkpá nɛ ó ta fu uwa a? Ujehofa wɛ Adā olɔhi, ó kē gē ya ayipɛ ɔlɛ nu itala ohigbu ka é he ɔ “ɔtū.” (Aíit. 3:​11, 12) Ohigbu ɛnyā, eko duuma nɛ ɔcɛ lɛ ukɔ́ tu alɔ ŋma ipu Ubáyíbu, ɔɔma i wɛ ka Ujehofa yɔ i cɔnu mla alɔ ŋ. Ikɔkɔ ɔɔma, ó gē mafu ka Ujehofa yihɔtu alɔ kpɔ. (Uhíb. 12:6) Ɔdi wɛ aɔwɛ ɔhá nɛ Ujehofa gē bi le mafu ka ɛlā ku alɔ he ɔ ɔtu a?

AƆWƐ ƆHÁ NƐ ALƆ LƆFU BI LE JÉ KA ƐLĀ KU ALƆ HE UJEHOFA ƆTU A

15. Anyɛ nɛ Ujehofa gē je alelekwu ihɔ ku nu lɛ uwa a, ɔdiya nɛ ɛnyā kē lɔfu ya ku alɔ lɔtuce ɔ lɔfu lɔfu a?

¹⁵ Ujehofa gē je alelekwu ihɔ ku nu lɛ ācɛ doodu nɛ ɛlā ku uwa he ɔ ɔtu a. (Umát. 12:18) Alɔ lɔfu da iyi alɔ aɔka nyā kahinii: ‘N gē mafu auce ō ya ōhī ku ikpo ku alelekwu ihɔ a?’ N gē lɛ ɔtule lɛ ācɛ ɔhá babanya fiyɛ eko nɛ ń jé Ujehofa ŋ ma a? Ɛgɛ nɛ a ceyitikwu ō ya ku a lɛ ɛnɛɛnɛ auce ō ya ku ikpo ku alelekwu ihɔ a, ɛgɔɔma nɛ a gáā lɔtuce lɔfu lɔfu ka ɛlā ku uwɔ he Ujehofa ɔtu a!—Má ikpati nyā nōo kahinii: “ Īkpō Kú Alelékwū Ā Wɛ . . . ”

16. Anyɛ nɛ Ujehofa gē bi le yuklɔ ku ɔna ō ta a, ɛgɛnyá nɛ ɛnyā kē lɛ abɔ kwu uwɔ ɔtu lɛ a? (1 Ācɛ Utesaloníka 2:4)

¹⁶ Ujehofa je uklɔ ku ɔna ku ɔkoolɔhi ō ta a lɛ ācɛ nɛ ɛlā ku uwa he ɔ ɔtu a. (Jé 1 Ācɛ Utesaloníka 2:4.) Leyi yɛ ɛgɛ nɛ ɔyinɛ alɔ nɔnya éyi nōo lé ka u Jocelyn a lɛ itene ŋma ō tɔɔna ku ɔkoolɔhi a lɛ ācɛ ɔhá a. Ɛ̄cī éyi, Jocelyn nyaŋjɛ ŋma agodo mla ɔtu ogbenyi. Ó kahinii: “Ń kóō lɛ ɔfu duuma ŋ, ɔtu klla ya um bɛɛka ń cɛgbá ŋ ma. Amáŋ n wɛ ɔcɛ o gbɔbu ɔna ō ta, ɛ̄cī ɔɔma kē wɛ ɛ̄cī ku uklɔ ku ɔna ō ta ku um. Ohigbu ɛnyā, n lɛ ɔkɔ gba anu n le yɛ gā uklɔ ku ɔna ō ta a.” Ɔci ku ɛ̄cī ɔɔma, Jocelyn lɛ u Mary má nōo wɛ ɔnyā nōo gbonɛnɛ nōo klla cɛ ō klɔcɛ ku Ubáyíbu a. Abɔ ɔya ōhī le gla a, Mary ka ka anuɔ humayi gbɔɔkɔ lɛ Ɔwɔico kóō ta anuɔ abɔ, eko nɛ u Jocelyn lɛ abɔ gbo ɔwɛ ku nu a. Ɔdi nɛ u Jocelyn nwu ŋwu ɔdā nōo ya nyā a? Ó kahinii: “Ɔtu ya um bɛɛka Ujehofa yɔ i da um kahinii, ‘Ɛlā [ku] uwɔ he um ɔtū nɛ̄hi.’” Ku ɛlā ɔkwɛyi a, ó wɛ ɛjɛɛji ācɛ gáā cɛ ō jahɔ tu alɔ eko nɛ alɔ yɔ i yuklɔ ku ɔna ō ta  a ŋ. Amáŋ alɔ lɔfu lɔtuce kpɔcii ka ɔtu gē he Ujehofa, eko duuma nɛ alɔ ceyitikwu ō ya ɛji ɔfu ku alɔ ō tɔɔna ku ɔkoolɔhi a lɛ ācɛ ɔhá.

17. Ɛlā nyá nɛ a nwu ŋma ɛlā nɛ u Vicky ka lɛyikwu ofula a? (Aíjē Kú Ɛ̄gbā 5:12)

¹⁷ Oŋma lɛ ɛhi kóō ofula a, Ujehofa gē je íne obiya ku ācɛ nɛ ɛlā ku uwa he ɔ ɔtu a ya uwa ɛhi. (1 Utím. 2:​5, 6) Amáŋ ɔdaŋ ka ɔtu klla gɔbu yɔ i ya alɔ ka ɛlā ku alɔ i he Ujehofa ɔtu ŋ, naana nɛ alɔ kóō kpɔtuce ofula a klla lɛ ubatisim ya a kē bɛɛ? Bla, ka alɔ i gáā lɔfu kpɔtuce ɛgɛ nɛ ɔtu gē ya alɔ lɛ a eko doodu gla ŋ, amáŋ alɔ kpɔtuce Ujehofa gla. Ó gē leyi má ācɛ nōo kpɔtuce ofula a ka ācɛ okpaakpa, klla cokonu ō hɔha ce uwa. (Jé Aíjē Kú Ɛ̄gbā 5:12; Uróm 3:26) Ō gbɛla tu ɛhi kóō ofula a ta u Vicky abɔ nɛɛnɛhi. Ɛ̄cī éyi, igbihi nɛ ó gbɛla tu ɛhi kóō ofula a lipu lipu a, ó gáā ka kahinii: “Ujehofa humayi lé ɔtu gā um gboji gboji ɛ. Amáŋ ó lɛbɛɛka um yɔ i da Ujehofa kahinii: ‘Á gáā yihɔtu ɛdɔ ɔcɛ bɛɛka ami a gboogboo gla ŋ. Ɛya nɛ Ɔyinɔnyilɔ ku uwɔ gwo a i gáā je íne obiya ku um ŋmonyi gla ŋ.’” Oŋma lɛ ō gbɛla tu ɛhi kóō ofula a lipu lipu, ɔtu gbɔɔ ō ya ɔ ka Ujehofa yihɔtu ku nu. Ɔtu lɔfu ya alɔ abɔyi alɔ ka Ujehofa yihɔtu alɔ ka ɛlā ku alɔ klla he ɔ ɔtu, ɔdaŋ ka alɔ gē gbɛla tu ɛhi kóō ofula a lipu lipu.

18. Ɔdi nɛ alɔ lɔfu lɔtuce kpɔcii ɔdaŋ ka alɔ gɔbu yɔ i yihɔtu tu Adā alɔ nōo yɔ ɔkpanco a?

¹⁸ Naana nɛ alɔ géē lɔfu ceyitikwu ō bi aɛlā nɛ alɔ nwu ŋma ipu ikpɛyi ɛlā oklɔcɛ nyā le yuklɔ a, ekoohi ɔtu klla lɔfu gbenyi lɛ alɔ nɛ alɔ lɔfu gbɔɔ ō gbɛla ɔdaŋ ka ɛlā ku alɔ he Ujehofa ɔtu. Eko duuma nɛ ɔɔma le ya, bla ka ɛlā ku “ācɛ nēe [gē] yíihɔtū tá ɔ̄ ā” he ɔ ɔtu nɛhi. (Ujɛ́m. 1:12) Ohigbu ɛnyā, gɔbu ku a yɔ i tubla Ujehofa ajaajɛ, cɛɛ ku a leyi taajɛ ō má aɔwɛ ɛyɛɛyɛyi nɛ ó gē mafu gā uwɔ ka ɛlā ku uwɔ he ɔ ɔtu a. Bi ipu ɔtu eko doodu ka Ujehofa i “yɔ̄ ligbó lɛ ɔ̄cɛ dúúmā kú alɔ ŋ́.”—Ācot. 17:27.