1-2. Ɔdi nɛ ɔcɛ cika ō ya gbɔbu ɛɛ kóō ya ubatisim a?

 ŊMA ihayi ɛhɔ nōo gáā yɛ a, ācɛ nōo fiyɛ umiliyɔn éyi lɛ ubatisim ya kwu piya Ācɛ Ocijali Ku Ujehofa ɛ. Alɛwa ku ācɛ nyā lɛbɛɛka Utimoti Ɔcɛ O Yɛce Ukraist ku eko aflɛyi, néē nwu ɔ ɛlā ɔkwɛyi “oŋmá eko ɔyípɛ̄ obene” a. (2 Utím. 3:​14, 15) Ācɛ ɔhá nwu ɛlā lɛyikwu Ujehofa eko néē wɛ ijinkpa a, ōhī kē wɛ eko néē kwu hila a. Ɔnyā éyi nōo klɔcɛ mla Ācɛ Ocijali Ku Ujehofa a, ya ubatisim eko nɛ ó wɛ ihayi ofu ɛnɛ ce igwo ahaapa [97] a!

² Ɔdaŋ ku a wɛ ɔcɛ néē yɔ i klɔcɛ mla uwɔ amāŋ ku a jɛ ipu apɔlɛ ku Ācɛ Ocijali Ku Ujehofa, a yɔ i gbɛla lɛyikwu ō ya ubatisim? Ɔɔma wɛ ɛnɛɛnɛ ōmiya! Amáŋ gbɔbu ɛɛ ku a ya ubatisim, a géē cɛgbá ō je iyi uwɔ gwɛɛya lɛ Ujehofa. Ikpɛyi ɛlā oklɔcɛ nyā géē je ɔ ta eyī peee ɔdā nōó wɛ ō je iyi uwɔ gwɛɛya lɛ Ɔwɔico a. Ó klla géē ta uwɔ abɔ ō má ɔdā nōo ya ɛɛ nɛ á cika ō pi ɔkwu ajɛ ō je iyi uwɔ gwɛɛya lɛ Ɔwɔico mla ō lɛ ubatisim ya, eko nɛ a le tutu ō ya lɛ a ŋ ma.

ƆDI NŌÓ WƐ Ō JE IYI ƆCƐ GWƐƐYA A?

3. Je ocabɔ mafu ku ācɛ ŋma ipu Ubáyíbu néē le gwɛɛya lɛ Ujehofa a.

³ Ipu Ubáyíbu, ɔcɛ néē kwu gwɛɛya lɛ Ujehofa wɛ ɔcɛ néē le tu ɛyɛɛyi ohigbu ɔdā ocɛgbá éyi. Éwo ku Isrɛlu wɛ éwo nōo le gwɛɛya lɛ Ujehofa. Amáŋ ó lɛ ōhī ku ācɛ a néē je gwɛɛya lɛ Ujehofa ɔwɛ ɛyɛɛyi. Ocabɔ mafu, Arɔni lɛ ili nōo “cābɔ̄ keé kwú ɔ̄ lɛ Óndú ā” wiye. Umɛdalu ku ugoolu nōo gē ceyi yɔ iyɔbu ku ɔlawoni ku nu a. Umɛdalu ku ugoolu ɔɔma mafu ka é lɛ ɔ fu ō gba Ujehofa ɛ̄gbā ɔwɛ ɛyɛɛyi, ō wɛ otrɛyi nɛhi ku ācɛ o gwɛɛya ku Isrɛlu. (Ulīf. 8:9) Aatamɔkpa klla wɛ ācɛ ɔhá nōo le gwɛɛya  ɔwɛ ɛyɛɛyi lɛ Ujehofa. Ɛlā nōo wɛ “átámɔ̄kpá” néē je ŋma ipu uce ku Uhibru nōo wɛ u nazirʹ a, ɛyi nu wɛ ka “Ɔcɛ Néē Le Tu Ɛyɛɛyi,” amāŋ “Ɔcɛ Néē Le Gwɛɛya.” Aatamɔkpa cɛgbá ō lɛyitaajɛ lɛ Íne ku Umosisi néē ta lɛ uwa, nɛ ācɛ Isrɛlu ohile i gáā cɛgbá ō lɛyitaajɛ lɛ ɔ ŋ ma.—Áluk. 6:​2-8.

4. (a) Ŋma eko nɛ a je iyi uwɔ gwɛɛya lɛ Ujehofa a, ɔdi gáā cɛgbá gā uwɔ fiyɛ duu a? (b) Ɔdi nōó wɛ ō “leyī gwū iyī [uwɔ] bónū” a? (Má ifoto a.)

⁴ Eko nɛ a je iyi uwɔ gwɛɛya lɛ Ujehofa a, a le miya ō kwu piya ɔyikpo ku Ujisɔsi Ukraist, mla ō kwu ɔdā nōo wɛ ococɛ ku Ujehofa a i piya ɔdā aflɛyi ipu oyeeyi ku uwɔ. Ɔdi nɛ ɛnyā lɛ ō ya mla ɔ a? Ujisɔsi kahinii: “Ɔ́dāŋ ka ɔ̄cɛ dúúmā tíne kóō yɛce um, ayíka kóō leyī gwū iyī nū bónū.” (Umát. 16:24) Ɛlā ku Ugriisi néē cɔwɔ ka ō “leyī gwū iyī [ɔcɛ] bónū” a, é lɔfu bi ɔ le yuklɔ kóō “ta ō ya ɔdā nōo gē he ɔcɛ ɔtu ō ya a.” Abɔ a kwu iyi uwɔ i gwɛɛya lɛ Ujehofa ɛ ma, a géē cɛgbá ō ta ɔdā duuma nōó he Ujehofa ɔtu ŋ. (2 Ukɔ́r. 5:​14, 15) Ɛnyā wɛ ku a géē ta ō ya ɔdā nɛ “alɛɛcɛ gē yá ā,” bɛɛka aja ō gbo amāŋ ikpo ɔnyā ō ce. (Ugal. 5:​19-21; 1 Ukɔ́r. 6:18) Ō lɛyitaajɛ lɛ ɛdɔ íne ɛgɛnyā géē ya ku oyeeyi kóō lɔnɔ tu uwɔ nɛɛ? Ɔdaŋ ku a yihɔtu ku Ujehofa, a géē jé peee kóō lɛyitaajɛ lɛ íne ku nu wɛ ohigbu olɔhi ku uwɔ. (Aíjē 119:97; Ayis. 48:​17, 18) Ɔyinɛ alɔ nɔnyilɔ éyi nōo lé ka u Nicholas a kahinii: “A lɔfu leyi má ɔwɛ nɛ Ujehofa dɔka ku alɔ lā oyeeyi ku alɔ a bɛɛka oje néē bi le ya ɔwɛ ku inu agba nōo gē ci uwɔ ŋma ō ya ɔdā duuma nɛ a dɔka, amāŋ oje néē bi le ya ɔwɛ ku inu néē kpo aagaba tu ɔ, o ya ɛɛ kóō gbo uwɔ ŋma agbe néē lɔfu ya uwɔ a.”

5. (a) Ɛgɛnyá nɛ a lɔfu je iyi uwɔ gwɛɛya lɛ Ujehofa a? (b) Ɔdi wɛ ɛyɛɛyɛyi ipu ō je iyi ɔcɛ gwɛɛya lɛ Ujehofa mla ō ya ubatisim a? (Má ifoto a.)

⁵ Ɛgɛnyá nɛ a lɔfu je iyi uwɔ gwɛɛya lɛ Ujehofa a? A géē cokonu lɛ ɔ ipu ɔkɔ ō gba ku a géē gba anu foofunu ɛ̄gbā, ku a klla géē lɛ ɔdā nōo wɛ ococɛ ku nu a ta aflɛyi ipu oyeeyi ku  uwɔ. Ō ya ɛnyā mafu ku a yɔ i ce Ujehofa okonu ku a géē gɔbu yɔ i yihɔtu nu ‘ŋmá ɛjɛ̄ɛ̄jī ɔtū kú uwɔ, ŋmá ɛjɛ̄ɛ̄jī odo kú uwɔ, ŋmá ɛjɛ̄ɛ̄jī ɛlá nɛ̄ gē gbo ā, mɛ́mla ɛjɛ̄ɛ̄jī ɔfú kú uwɔ!’ (Umák. 12:30) Ō je iyi uwɔ gwɛɛya wɛ ɔdā nōo géē ya ɔtahɛ ku uwɔ mla Ujehofa foofunu. Amáŋ abɔ ɔhá ku nu, ubatisim wɛ ɔdā nɛ a géē ya ipeyi ɛjɛɛji ācɛ kóō mafu ku a kwu iyi uwɔ i gwɛɛya lɛ Ujehofa ɛ. Okonu nɛ a ce lɛ Ujehofa ō je iyi uwɔ gwɛɛya lɛ ɔ a, i wɛ ɔdā nɛ a cika ō bi hija fluflu ŋ. Ɔdā nɛ a cika ō miya ō ya a wɛ ō lɛ okonu ō ce ɔɔma tu, ɔdā nɛ Ujehofa kē leyice ku a géē ya a yɔ abɔɔ duu a.—Ɔ̄cok. 5:​4, 5.

ƆDIYA NƐ A CIKA Ō JE IYI UWƆ GWƐƐYA LƐ UJEHOFA A?

6. Ɔdi gē lɛ abɔ kwu ɔcɛ ɔtu kóō je iyi nu gwɛɛya lɛ Ujehofa a?

⁶ Ɔdā okpɔcii nōo ya ɛɛ nɛ a je iyi uwɔ gwɛɛya lɛ Ujehofa a wɛ ohigbu ku a yihɔtu ku nu. Ihɔtu nɛ a lɛ lɛ ɔ a i wɛ ɛgɛ nɛ ɔtu gē ya uwɔ lɛ a foofunu ŋ. A gáā lɛ ɛlā nwu lɛyikwu ococɛ ku nu klla lɛ “ɔdā nōó dɔɔ̄kā ā jé lɔɔlɔhi,” ɔɔma kē lɛ abɔ kwu uwɔ ɔtu ō yihɔtu ku nu a. (Ukól. 1:9) Oklɔcɛ ku Ubáyíbu ku uwɔ gáā cɛ gā uwɔ le jé kpɔcii (1) ka Ujehofa yɔ ɔkwɔɔkwɛyi, (2) ka Ubáyíbu wɛ Ɛlā ku nu, klla (3) yɔ i bi ɔwa ku nu le ya ɔdā nōo wɛ ococɛ ku nu a. 

7. Aɔdā ōhī nyá nɛ alɔ cika ō yɔ i ya gbɔbu ɛɛ ku alɔ je iyi alɔ gwɛɛya lɛ Ɔwɔico a?

⁷ Ācɛ nōo je iyi uwa gwɛɛya lɛ Ujehofa a cika ō jé aɛlā ō nwu okpɔcii nōo yɔ ipu ɛlā ku Ɔwɔico a, klla gē lɛyitaajɛ lɛ ɔwɛ nɛ Ujehofa dɔka ku alɔ lā oyeeyi ku alɔ a. É gē ya ɔdā duuma néē ya gla a ō da ācɛ ɔhá lɛyikwu ɛlā néē nwu ŋma ipu Ubáyíbu a. (Umát. 28:​19, 20) Ihɔtu néē lɛ lɛ Ujehofa a kwu lɔfu tōōtɔ̄ɔ̄, ohigbu ɛnyā, ɔdā néē bi ɔtu ō ya a wɛ ō gba anu foofunu  ɛ̄gbā. Ó lɛ ɛgɔɔma mla uwɔ duu? Ɔdaŋ ku a yihɔtu ku Ujehofa ŋma ɛjɛɛji ɔtu ku uwɔ, á gáā dɔka ō je iyi uwɔ gwɛɛya klla ya ubatisim ohigbu ku a dɔka ku ɔcɛ nōo gē klɔcɛ ku Ubáyíbu mla uwɔ, amāŋ ācɛ apɔlɛ ku uwɔ kéē gweeye ŋ, amāŋ ohigbu ka ɔdā nɛ ɛjɛɛji aoklobiya amāŋ ancɛnya ku uwɔ yɔ i ya a yɔ abɔɔ a ŋ.

8. Ɛgɛnyá nōo mafu ka odee jɛ uwɔ eyī lɔfu ta uwa abɔ ō je iyi uwɔ gwɛɛya lɛ Ujehofa a? (Aíjē Kú Ɛ̄gbā 116:​12-14)

⁸ Eko duuma nɛ a gbɛla lɛyikwu ɛjɛɛji aɔdā nɛ Ujehofa ya gā uwɔ ɛ ma, ó géē lɛ abɔ kwu uwɔ ɔtu cɛɛ ku a dɔka ō kwu iyi uwɔ i gwɛɛya lɛ ɔ. (Jé Aíjē Kú Ɛ̄gbā 116:​12-14.) Ubáyíbu ka ka Ujehofa gē je “ɛhi olɔhi dóódu mɛ́mla ɛhi dúúmā nōo ī jōōjīla ā” lɛ alɔ a. (Ujɛ́m. 1:17) Ɛhi nōo fiyɛ duu nɛ ó je lɛ alɔ a, wɛ ɛya nɛ Ɔyinɔnyilɔ ku nu Ujisɔsi gwo kwɛyi alɔ a. Gbɛla lɛyikwu ɛgɛ nɛ ɛhi nyā cɛgbá nɛhi lɛ a! Ɛhi kóō ofula a lɛ ɔ ya tɔɔtɛ gā uwɔ ō lɛ ɛma olɔhi mla Ujehofa. Ó klla lɛ ɛnɛɛnɛ ɛga je gā uwɔ ō lā oyeeyi opiyoo. (1 Ujɔ́n. 4:​9, 10, 19) Ō je iyi uwɔ gwɛɛya lɛ Ujehofa wɛ ɔwɛ olɔhi fiyɛ duu ō mafu, ka ihɔtu nōó lɛ ɛdɔ ŋ nɛ Ujehofa mafu gā uwɔ, mla ɛjɛɛji aɔdā olɔhi ɛyɛɛyɛyi nɛ ó ya gā uwɔ ɛ ma a jɛ uwɔ eyī nɛhi. (Obla. 16:17; 2 Ukɔ́r. 5:15) Aɔwɛ ōhī nɛ alɔ klla géē mafu ka ɛhi nyā jɛ alɔ eyī a, yɔ ipu ɛlā ō nwu ɔmɛ 46, ogwotu ɔmɛ 4, ku ɔkpá ku Jɔɔnyɛ Oyeeyi Nōó Gáā Mɛ Gboogboo Ŋ!, mla uvidio ku uminiti ɛta nōo yɔ anu nōo kahinii: Ō Je Ɛhi Ku Uwɔ Lɛ Ɔwɔico.

A LE TUTU Ō JE IYI UWƆ GWƐƐYA MLA Ō YA UBATISIM Ɛ?

9. Ɔdiya néē cika ō kwu ɔcɛ abɔfu ō je iyi nu gwɛɛya lɛ Ujehofa ŋ ma?

⁹ Ɔtu lɔfu ya uwɔ ku á tutu ō je iyi uwɔ gwɛɛya mla ō ya ubatisim ɛ ŋ. Á jé ŋ, a klla cɛgbá ō ya opiyabɔ ōhī ipu oyeeyi ku uwɔ o ya ɛɛ ku a lɛyitaajɛ lɛ ɔwɛ nɛ Ujehofa dɔka ku alɔ lā oyeeyi ku alɔ a, amāŋ a cɛgbá eko fiyɛ ō ya ku ɔtu okpoce ku uwɔ kóō lɔfu. (Ukól. 2:​6, 7) Ācɛ nɛ alɔ gē klɔcɛ mla uwa a i gáā jɛ gɔbu ō yihɔtu ku Ujehofa ɔwɛ ekponu ŋ. Ó kē wɛ ɛjɛɛji aɛdrɔ gáā ya o jɛ gɔbu ō je iyi uwa gwɛɛya klla ya ubatisim ihayi ekponu a ŋ. Ceyitikwu ku a lɛ opiyabɔ nɛ a cɛgbá ō ya jé, cɛɛ ku a ya ɔdā nōo tɔɔtɛ gā uwɔ ō ya a, ó wɛ ō miya iyi uwɔ mla ācɛ ɔhá ŋ.—Ugal. 6:​4, 5.

10. Ɔdi nɛ a lɔfu ya ɔdaŋ ka ɔtu yɔ i ya uwɔ ku á tutu ō je iyi uwɔ gwɛɛya mla ō ya ubatisim ɛ ŋ ma? (Má ikpati nyā nōo kahinii: “ Aɛdrɔ Nɛ Ɛ́nɛ́ Mla Adā Uwa Wɛ Ācɛ Ocijali Ku Ujehofa.”)

¹⁰ Ɔdaŋ ku a gáā le má ku á tutu ō je iyi uwɔ gwɛɛya lɛ Ujehofa mla ō ya ubatisim ɛ ŋ, gɔbu yɔ i lɛ ɔɔma ya ōmiya ku uwɔ. Gbɔɔkɔ lɛ Ujehofa kóō ta uwɔ abɔ, o ya ɛɛ ku a ya opiyabɔ duuma nōo cɛgbá ipu oyeeyi ku uwɔ a. (Ufíl. 2:13; 3:16) A lɔfu lɔtuce kpɔcii ka ó géē po ɔkɔ ō gba ku uwɔ klla géē ta uwɔ abɔ.—1 Ujɔ́n. 5:14.

ƆDĀ NŌO YA ƐƐ NƐ ĀCƐ ŌHĪ GĒ PI ƆKWU AJƐ Ō JE IYI UWA GWƐƐYA KLLA YA UBATISIM A

11. Ɛgɛnyá nɛ Ujehofa géē ta alɔ abɔ ō hayi kpaakpa lɛ ɔ a?

¹¹ Ācɛ ōhī nōo le tutu ō je iyi uwa gwɛɛya mla ō ya ubatisim a yɔ i pi ɔkwu ajɛ ō ya lɛ a. É lɔfu yɔ i yuufi ka igbihi néē lɛ ubatisim ya, é lɔfu biya íne bɔbi bɔbi cɛɛ é kwu uwa i baajɛ ŋma ipu ujɔ. Ɔdaŋ ku a yɔ i lɛ ɛdɔ ufi ɛgɛnyā, le jé kpɔcii ka Ujehofa géē je ɛjɛɛji aɔdā nɛ a cɛgbá a gā uwɔ, ‘cɛ́ɛ́ a géē lɔfú yɔ̄ ɛ́gɛ́nɛ̄ o he Óndú ā ɔtū ā, ku a yá ɔdā nōo í yá kú ɔtū kóō he Óndú ā.’ (Ukól. 1:10) Ó klla géē je ɔfu gā uwɔ ō ya ɔdā okpaaka a. Ó ta ācɛ alɛwa abɔ ō ya ɔdā okpaakpa a ɛ. (1 Ukɔ́r. 10:13) Ɛnyā wɛ ɔdā éyi nōo ya ɛɛ nōó wɛ ācɛ ligii foofunu néē je baajɛ ŋma ipu ujɔ a. Ujehofa gē ta ācɛ ɔlɛ nu abɔ kéē hayi kpaakpa lɛ ɔ.

12. Ɛgɛnyá nɛ alɔ gáā lɔfu kwu ŋma íne obiya bɔbi bɔbi a?

 ¹² Ɛjɛɛji alɛɛcɛ nōó jila iyē ŋ ma gē má ojama ō nyɔ gáā ya ɔdobɔbi. (Ujɛ́m. 1:14) Amáŋ, a lɛ ɛga ō fu ɔdā nɛ a géē ya eko duuma nɛ a yɔ i má ojama ō nyɔ gáā ya ɔdobɔbi. Ɔkwɛyi a wɛ ka awɔ gáā fu ɛgɛ nɛ a géē dɔka ō lā oyeeyi ku uwɔ a. Ācɛ ōhī gē ka ka ó gē tɔɔtɛ lɛ alɔ ō kwu iyi alɔ bi lɛyikwu ɛgɛ nɛ ɔtu gē ya alɔ mla ɔdā nɛ alɔ gē ya a ŋ. Amáŋ ɛlā ɔɔma i wɛ ɔkwɛyi ŋ. A lɔfu nwu ō kwu iyi uwɔ bi lɛyikwu ɛgɛ nɛ ɔtu gē ya uwɔ mla ɔdā nɛ a gē ya a. Ohigbu ɛnyā, eko duuma nɛ a yɔ i má ojama, a lɔfu miya ó hii ya ɔdobɔbi ŋ. Ó klla lɛ aɔdā ōhī nōo lɔfu ta uwɔ abɔ o ya ɛɛ ku a hii biya íne ŋ. Ocabɔ mafu, bēē gbɔɔkɔ lɛ Ujehofa ɛ̄cī doodu. Bēē yɛce ōmiya ku Ubáyíbu oklɔcɛ ku abɔyi uwɔ. Bēē gā ōjila ku ujɔ. Bēē kɛla lɛyikwu ɔtu okpoce ku uwɔ mla ācɛ ɔhá. Ō ya aɔdā nōo ba nyā eko doodu géē je ɔfu gā uwɔ ō hayi kpaakpa lɛ Ujehofa. A kē hii je mlanyi ka Ujehofa géē ta uwɔ abɔ ō ya lɛ a ŋ.—Ugal. 5:16.

13. Ocabɔ olɔhi nyá nɛ Ujosɛfu le taajɛ lɛ alɔ a?

¹³ Ó géē tɔɔtɛ gā uwɔ ō hayi kpaakpa lɛ Ujehofa, ɔdaŋ ku a lɛ ɔdā nɛ a géē ya a miya taajɛ gbɔbu ɛɛ ku a má ojama. Ubáyíbu da alɔ lɛyikwu ācɛ ōhī nōo ya ɛgɛnyā naana nɛ uwa abɔyi uwa i jila iyē ŋ ma. Ocabɔ mafu, ɔnyā ku Upɔtifa ceyitikwu igbalɛwa ō kwu Ujosɛfu abɔfu kóō gwuta mla ɔ. Amáŋ, Ujosɛfu lɛ ɔdā nɛ ó géē ya a jé gbɔbu ɛ. Ubáyíbu da alɔ ka “Ujósɛ̄fu tá.” Ujosɛfu kahinii: “Ɔwɛ nyá nɛ̄ n géē yá ɔdōbɔ̄bí ɛ́gɛ́nyā cɛ́ɛ́ ká n lɛ íne kú Ɔwɔicō bīya āā?” (Ohút. 39:​8-10) Ó teyi peee, ka Ujosɛfu jé ɔdā nɛ ó géē ya a gbɔbu ɛɛ nɛ ɔnyā a yɔ i kwu ɔ abɔfu kóō gwuta mla ɔ a. Ɛnyā ya kóō le tɔɔtɛ lɛ ɔ ō lɛ ɔdā okpaakpa a ya eko nɛ ó yɔ i má ojama a.

14. Ɛgɛnyá nɛ alɔ lɔfu nwu ō ta ɔdobɔbi ō ya a?

¹⁴ Ɛgɛnyá nɛ a lɔfu gbla ocabɔ ku Ujosɛfu ya cɛɛ ku a hayi kpaakpa lɛ Ɔwɔico eko nɛ a yɔ i má ojama a? A lɔfu miya babanya ɔdā nɛ a géē ya eko nɛ a gbɔɔ ō má ojama a. Nwu ō ta ō ya ɔdā duuma nōo gē wu Ujehofa ɔtu a boobu, mla ō ta ō gbɛla lɛyikwu uwa. (Aíjē 97:10; 119:165) Ō ya ɛgɛnyā géē ta uwɔ abɔ ku a hii biya íne eko nɛ a yɔ i má ojama ŋ. A géē lɛ ɔdā nɛ a cika ō ya a jé gbɔbu ɛ.

15. Ɛgɛnyá nɛ ɔcɛ lɔfu mafu ka ó yɔ i “dɔɔ̄kā” Ujehofa ɔkwɔɔkwɛyi a? (Ācɛ Uhíbru 11:6)

¹⁵ Á jé ŋ, a lɔfu gáā le jé ka lɛ ɔkwɛyi a má ɛ, ku a dɔka ō gba Ujehofa ɛ̄gbā mla ɛjɛɛji ɔtu ku  uwɔ, amáŋ ɔtu klla gē ya uwɔ ku á tutu ō je iyi uwɔ gwɛɛya mla ō ya ubatisim ɛ ŋ. A lɔfu ya ɔdā nɛ Udefidi nōo wɛ Ɔcɛ́ a ya a. A lɔfu gbɔɔkɔ lɛ Ujehofa kahinii: “Ɔwɔicō, lɛ um jila, cɛ́ɛ́ ká ā má ɛlá nɛ̄ n gē gbo ā. Má ɔ̄, ɔ́dāŋ ka ɔwɛ kú ɔ́bíipú dúúmā yɔ̄ ipú oyēeyī kú um nɛɛ, cɛ́ɛ́ ká ā bī um jé ɔwɛ ō yɛ piyóó.” (Aíjē 139:​23, 24) Ō gba ɛdɔ ɔkɔ ɛgɛnyā gē mafu ku a dɔka otabɔ ku Ujehofa, ku a klla yɔ i ceyitikwu lɔfu lɔfu ō kwu iyi uwɔ i gwɛɛya lɛ Ujehofa mla ō lɛ ubatisim ya. Ujehofa kē gē hɔha ce “ācɛ nēe [gē] dɔɔ̄kā nū” kwɔɔkwɛyi a.—Jé Ācɛ Uhíbru 11:6.

GƆBU YƆ I TUBLA UJEHOFA AJAAJƐ

16-17. Ɛgɛnyá nɛ Ujehofa gē pi ācɛ nɛ ɛ́nɛ́ mla adā uwa wɛ Ācɛ Ocijali Ku Ujehofa a bla iyi nu a? (Ujɔ́ni 6:44)

¹⁶ Ujisɔsi ka ka Ujehofa gē pi ācɛ wa ɛgiyi nu a. (Jé Ujɔ́ni 6:44.) Gbɛla lɛyikwu ɛgɛ nɛ ɛlā nyā cɛgbá klla lɛ abɔ kwu uwɔ lɛ a. Ujehofa má ɔdā olɔhi ɛgiyi eyeeye ku ācɛ nɛ ó pi wa ɛgiyi nu a. Ó gē leyi má ɔnyɔɔnyɛ ka ācɛ nɛ ó “fu ŋmá ipú odúúdú ācɛ.” (Obla. 7:6) Ɔwɛ nɛ ó gē leyi má uwɔ duu a yɔ abɔɔ a.

¹⁷ Á jé ŋ, ó lɔfu wɛ ka adā mla ɛ́nɛ́ uwɔ wɛ Ācɛ Ocijali Ku Ujehofa. Ohigbu ɔɔma, ɔtu lɔfu ya uwɔ ku a yɔ i gba Ujehofa ɛ̄gbā ohigbu ka adā mla ɛ́nɛ́ uwɔ yɔ i ya lɛ a, ó wɛ ohigbu ka Ujehofa pi uwɔ wa ɛgiyi nu ŋ. Naana kpɔ a, Ubáyíbu kahinii: “Aá túblá Ɔwɔicō, ó kē í túbla aá.” (Ujɛ́m. 4:8; 1 Uklɔ. 28:9) Eko duuma nɛ a lɛ ikpo ɔɔma fu ō tubla Ujehofa ajaajɛ, ó géē tubla uwɔ ajaajɛ duu. Ujehofa i gē leyi má uwɔ ku a wɛ ipu apɔlɛ ku ācɛ o gba Ujehofa ɛ̄gbā aŋca ŋ. Ó gē pi eyeeye ku ācɛ wa ɛgiyi nu—kwu eyeeye ku ācɛ nɛ ɛ́nɛ́ mla adā uwa yɔ i bi uwa jɛ ipu ɔkwɛyi a. Eko duuma nɛ ɔcɛ ɛgɔɔma lɛ ikpo ɔɔma fu ō tubla Ujehofa ajaajɛ, Ujehofa gē tubla ɔ ajaajɛ duu ɛgɛ nɛ ɔkpá ku Ujɛ́mīsi 4:8 ka a.—Má 2 Ācɛ Utesaloníka 2:13.

18. Ɔdi nɛ alɔ gáā kɛla lɛyikwu ɔ ipu ikpɛyi ɛlā ɔhá a? (Aíjē Kú Ɛ̄gbā 40:8)

¹⁸ Eko duuma nɛ a kwu iyi uwɔ i gwɛɛya lɛ Ujehofa klla lɛ ubatisim ya, a yɔ i mafu ɛdɔ uce ō ya ekponu ku Ujisɔsi a. Ó cɛ ŋma ɔtu kwu iyi nu i taajɛ lɛ Adā nu ō ya ɔdā duuma nɛ ó da ɔ kóō ya a. (Jé Aíjē Kú Ɛ̄gbā 40:8; Uhíb. 10:7) Ipu ikpɛyi ɛlā ɔhá a, alɔ géē kɛla lɛyikwu ɔdā nōo géē ta uwɔ abɔ ō yɔ i gba Ujehofa ɛ̄gbā kpaakpa igbihi nɛ a lɛ ubatisim ya a.