1-2. (a) Ɔdiya nɛ Amagɛdɔn wɛ ɔkoolɔhi lɛ alɛɛcɛ a? (b) Aɔka nyá nɛ alɔ gáā cila ipu ikpɛyi ɛlā nyā a?

ĀCƐ alɛwa gbɛla ku “Amágɛ̄dɔn” wɛ ɔdobɔbi nɛhi. Amáŋ ó wɛ ɔdā nɛ Ubáyíbu nwu a yɔ abɔɔ a ŋ. Ɔdā nɛ Ubayibu ka lɛyikwu Amagɛdɔn a lɛ ō ya mla ɔkoolɔhi nōo cika ō cɛ lɛ alɔ gweeye! (Mafú 1:3) Ɛfú ō kpo ku Amagɛdɔn i gáā kpo ɛjɛɛji alɛɛcɛ yiifi ŋ, amáŋ ó géē nya uwa ta! Ɛgɛnyá a?

² Ubáyíbu mafu ka ɛfú ō kpo ku Amagɛdɔn géē nya alɛɛcɛ ta ŋma lɛ ō bi ɔcɛ́ ō lé ku alɛɛcɛ wa oŋmɛyi. Ɔwɛ ɔhá wɛ ka ó géē lɛ ācɛ ō ya ɔdobɔbi kpo yiifi klla ya ku ācɛ nōo gē ya ɔdā okpaakpa a kéē yeeyi. Ó klla géē nya alɛɛcɛ ta ŋma lɛ ō gbo ɛcɛ ku alɔ nyā ŋma aɔdā nōo gē je ɔ biya a. (Mafú 11:18) O ya ɛɛ ku alɔ jé ɛlā ō nwu nyā lɔɔlɔhi, alɔ géē leyi yɛ aɔka ɛnɛ: Ɔdi wɛ Amagɛdɔn a? Ɔdi wɛ aɔdā nōo géē ya gbɔbu lɛ Amagɛdɔn a? Ɔdi nɛ alɔ cika ō ya, o ya ɛɛ ku alɔ lɛ onyata lɛ eko ku Amagɛdɔn a? Ɛgɛnyá nɛ alɔ géē hayi kpaakpa abɔ Amagɛdɔn le ba ō wa ɛ ma?

3. (a) Ɔdi wɛ ɛyi ku “Amágɛ̄dɔn” a? (b) Oŋma ɛla noo yɔ ipu ɔkpa ku Ɔdā Nēé Mafú Lɛ Ujɔ́ni 16:14, 16 a, ɔdiya nɛ alɔ lɔfu ka ka Amagɛdɔn i wɛ ɛga éyi ipu ɛcɛ nyā nɛ ɔcɛ lɔfu eyī caa ŋ ma?

³ Jé Ɔdā Nēé Mafú Lɛ Ujɔ́ni 16:14, 16. Ɛlā néē i hi ka “Amágɛ̄dɔn” a bɛɛcɛ ɛga éyi foofunu ipu Ubáyíbu. É kē je ɔ ŋma ɛlā éyi ipu uce ku Uhibru néē i hi ka “Ɛfu ku Umegído” a. (Mafú 16:16) Umegido wɛ igeli nɛhi éyi nōo yɔ ipu ajɛ ku Isrɛlu ku eko igble a. (Ujós. 17:11) Amáŋ Amagɛdɔn i wɛ ɛga éyi ipu ɛcɛ nyā nóó. Ku ɛlā ɔkwɛyi, ó wɛ eko nɛ “odúúdú aɔ́cɛ́ kú ɛcɛ ā” géē lɛ iyi uwa tuba, o ya ɛɛ kéē wa i kpo ɛfú ta Ujehofa. (Mafú 16:14) Amáŋ ipu ikpɛyi ɛlā nyā, alɔ klla géē je “Amagɛdɔn” kóō kwɛyi ɛfú néē géē kpo igbihi nɛ aɔcɛ́ ku ɛcɛ nyā géē tu iyi uwa ba a. Ɛgɛnyá nɛ alɔ bi le jé ka Amagɛdɔn kwɛyi odee a? Aflɛyi, ó lɛ ɛfu duuma néē gē hi ka ɛfu ku Umegido ŋ. Ɔmpa, ajɛ nōo yɔ kwu Umegido ajaajɛ  a le nyɛ i bi, ó gáā lɔfu bi “odúúdú aɔ́cɛ́ kú ɛcɛ ā” mla aicɔɔja ku uwa mla iyɛfu ku uwa gla ŋ. Ɔmɛta, abɔ alɔ géē má igbihaajɛ ipu oklɔcɛ nyā a, Amagɛdɔn géē gbɔɔ eko nɛ “aɔ́cɛ́” ku ɛcɛ a géē wa i kpo ɛfú ta ācɛ ɔlɛ Ɔwɔico nōo lā ɛbɛɛbɛ ipu oduudu ɛcɛ a.

4. Ɔdiya nɛ Ɔwɔico bi ɛga néē i hi ka Umegido a le hi ɛfú ō kpo nɛhi amoomɛ ku nu a?

⁴ Ɔdiya nɛ Ɔwɔico bi ɛga néē i hi ka Umegido a le hi ɛfú ō kpo nɛhi amoomɛ ku nu a? Ɛpleeko néē ta Ubáyíbu a, é gē kpo ɛfú alɛwa ipu Umegido mla ɔpɛ ku Ujesirili nōo yɔ kwu Umegido ajaajɛ a. Ekoohi, Ujehofa gē ta ācɛ ɔlɛ nu abɔ kéē yale ipu ɛfú ō kpo a. Ocabɔ mafu, ɛgiyi “ɔkpá kú Umegído ā,” Ujehofa ta Ubaraki nōo wɛ ɔcohɛpɔ ku Isrɛlu abɔ kóō lɛ aicɔɔja ku ācɛ Ukenan nɛ Usisɛra kpo trɛyi a yale. Ubaraki mla Udɛbɔra nōo wɛ ɔcomɛɛbɛ a ta Ujehofa ahinya ɛgɛ nɛ ó ta uwa abɔ kéē yale ɔwɛ ohidaago a. É gwiije kahinii: “Aínyílɔ́ɔwɔ bá ī nuunu ŋmá ɔkpáncō, . . . tá Usisɛ́ra. Éŋkpɔ̄ ō cēnyi kú ísu kú Ukíssɔn lɛ uwá kpó.”—Ācoh. 5:19-21.

5. Ɔwɛ nyá nɛ ɛfú ō kpo ku Amagɛdɔn géē wɛ ɛyɛɛyi gwo ɛfú nɛ Ubaraki kpo a?

⁵ Ubaraki mla Udɛbɔra lɛ ijé ku uwa ŋmɛyi mla ɛlā nōo kahinii: “Odúúdú aólɛlā kú uwɔ ké gekwú bɛ̄ɛka ɛ́gɛ́nɛ̄ Usisɛ́ra kwú ā, Óndú. Amáŋ ayípōklóbīya ɔlɛ́ uwɔ kéē fíyajɛ bɛ̄ɛka ɛnɔ ā.” (Ācoh. 5:31) Ɛgɔɔma nɛ aolɛla ku Ɔwɔico gáā kwū ɛpleeko ku Amagɛdɔn á. Amáŋ, ācɛ nōo wɛ aoklobiya ku Ɔwɔico amāŋ ācɛ nōo yihɔtu Ɔwɔico a géē nyata. Amáŋ ɛfú ō kpo ɛpa nyā lɛ ɛyɛɛyɛyi. Ɛpleeko ku Amagɛdɔn a, ācɛ ɔlɛ Ɔwɔico i gáā nuunu ŋ. É kóō gáā bi iyɛfu duuma ŋ! É géē lɛ ɔfu iyē ɔdaŋ ka é ba cii, lɛ ɔtu kpoce Ujehofa mla aicɔɔja ku nu nōo yɔ ɔkpanco a.—Ayis. 30:15; Mafú 19:11-15.

6. Ɔwɛ nyá nɛ Ujehofa lɔfu bi le ŋmo aolɛla ku nu ɛpleeko ku Amagɛdɔn a?

⁶ Ɛgɛnyá nɛ Ɔwɔico gáā bi le ya aolɛla ku nu le ɛpleeko ku Amagɛdɔn a? Ó lɔfu bi ɔwɛ alɛwa le ya ɔ gla. Ó lɔfu bi ajɛ ojiliye klla hɛ wulu, ɛcɔ ɔwɔ, mla ɔwɔ olimanya. (Ujób. 38:22, 23; Isík. 38:19-22) Ó kóō lɔfu ya ku aolɛla ku nu kéē gbɔɔ ō kpo ɛfú ta iyi uwa. (2 Úklɔ́ 20:17, 22, 23) Ó kē lɔfu bi aalelekwu otɛhɔ ku nu le ŋmo ācɛ ō ya ɔdobɔbi. (Ayis. 37:36) Ɔwɛ duuma nɛ Ɔwɔico kóō bi naana, alɔ jé ka ó géē yale piii. Ɛjɛɛji aolɛla ku nu géē kwū, amáŋ ɛjɛɛji ācɛ ō ya ɔdā okpaakpa a géē nyata.—Aíit. 3:25, 26.

7-8. (a) Oŋma ɛlā nōo yɔ ipu ɔkpá ku 1 Ācɛ Utesaloníka 5:1-6 a, ɛdɔ ɛlā nyá nɛ aotrɛyi ku ɛcɛ nyā géē ka tɛɛcɛ a? (b) Ɔdiya nɛ ɛlā ō ka tɛɛcɛ ɔɔma gáā wɛ ɛkɛmgbɛ obɔbi nɛhi a?

⁷ Eko nɛ ācɛ géē ba i ka kahinii: “Ɔdā dóódu í je unwalu lɛ alɔ gɛ ŋ́, alɔ kē bá ɛbɔ́” a géē ya gbɔbu lɛ ‘ɛ̄cī ku Ujehofa.’ (Jé 1 Ācɛ Utesaloníka 5:1-6.) Ɛlā nōo ka ‘ɛ̄cī ku Ujehofa’ ipu ɔkpá ku 1 Ācɛ Utesaloníka 5:2 (NW ) a, lɛ ō ya mla “eko kú ákanya [amāŋ owe] nɛ̄hi ā.” (Mafú 7:14) Ɛgɛnyá nɛ alɔ gáā jé eko nɛ akanya amāŋ owe nɛhi a gáā gbɔɔ a? Ubáyíbu da alɔ ka é géē ka ɛlā ō ya eyijii éyi tɛɛcɛ. Ɛlā ō ka tɛɛcɛ ɔɔma gáā wɛ ɔdā ocabɔ nōo géē mafu ku eko ku akanya amāŋ owe nɛhi a gáā gbɔɔ ɛ.

⁸ Ɛlā néē gáā ka tɛɛcɛ a wɛ kahinii: “Ɔdā dóódu í je unwalu lɛ alɔ gɛ ŋ́, alɔ kē bá ɛbɔ́.” Ɔdiya nɛ aotrɛyi ku ɛcɛ nyā gáā ka lɛ a? Aotrɛyi ku ɛga ō gba ɛ̄gbā géē yɛce uwa duu nɛɛ? Alɔ i jé kpaakpa ŋ. Amáŋ, alɔ jé ka ɔdaŋ ka aotrɛyi ku ɛcɛ nyā le ka tɛɛcɛ ka “ɔdā dóódu í je unwalu lɛ alɔ gɛ ŋ́, alɔ kē bá ɛbɔ́,” ɛnyā géē wɛ ɛkɛmgbɛ nɛhi nōo wa ŋma ɛgiyi aalelekwu obɔbi a. Ɛkɛmgbɛ a géē bɔbi gaaga ohigbu ka ó géē ya ku ācɛ kéē gbɛla ka é yɔ ɛbɔ, amáŋ ɔkwɛyi a kē wɛ ka akanya amāŋ owe nɛhi nōó kóō ya jejee ɛ ma gáā gbɔɔ ɛ. Ku ɔkwɛyi a, “ōwē ā géē wā eko nɛ̄ [uwa] i leyīce ŋ́ ɛ́gɛ́nɛ̄ ɔnɔ ɔ̄ma géē wā ɛgiyí ɔnyā nōo gáā ma ɔyí ā.” Amáŋ ɔdi gáā ya ācɛ nōo hayi kpaakpa gē gba Ujehofa ɛ̄gbā a? Abɔ uwa a i  jé eko nɛ akanya nɛhi a gáā gbɔɔ ŋ ma a, ó géē lɔfu hɛ uwa idaago eko nōó gbɔɔ, amáŋ é géē lɛ iyi uwa tutu taajɛ i gbeyi nu.

9. Ujehofa géē je ɛjɛɛji ɛcɛ obɔbi ku Ebilii yiifi igbekponu? Da alɔ ɛgɛ nɛ ó gáā ya ɔ a

⁹ Ujehofa i gáā je ɛjɛɛji ɛcɛ obɔbi ku Ebilii yiifi igbekponu ɛgɛ nɛ ó ya eko ku Unowa a ŋ. Ikɔkɔ ɔɔma, ó géē lɛ aya éyi yiifi gbɔbu, cɛɛ ó kwu aya ohile a u yiifi igbihaajɛ. Aflɛyi, ó géē je Ubabilɔn Nɛhi nōo kwɛyi ɛjɛɛji ɔwɛ ō gba ɛ̄gbā a kpo cataajɛ. Cɛɛ, ɛpleeko ku Amagɛdɔn a, ó géē je aya ohile ku ɛcɛ ku Ebilii a yiifi, kwu aya ku imeli, aya ku ɛfú ō kpo, mɛmla aya ku ɔ́hi ō ta. Babanya, alɔ géē kɛla lɛyikwu aɔdā ɛpa nyā nōo géē ya nōo cɛgbá nɛhi a.

10. Oŋma ɛlā nōo yɔ ipu ɔkpá ku Ɔdā Nēé Mafú Lɛ Ujɔ́ni 17:1, 6 mla 18:24 a, ɔdiya nɛ Ujehofa géē ca ɛ̄gbā ō gba ku ɛkɛmgbɛ taajɛ a?

¹⁰ “Ɛ́gɛ́nɛ̄ é gáā yá akwuna olōofu nɛ̄hi ā italā ā.” (Jé Ɔdā Nēé Mafú Lɛ Ujɔ́ni 17:1, 6; 18:24.) Ɛ̄gbā ō gba ku ɛkɛmgbɛ gē ya ku ācɛ alɛwa kéē hii lɛ ojilima ce iye ku Ujehofa ŋ. É gē nwu ācɛ ɛlā ɛkɛmgbɛ lɛyikwu Ɔwɔico. Bɛɛka ɔnyā nōo gē gbo aja a, ɛ̄gbā ō gba ku ɛkɛmgbɛ i yɔ kwu Ujehofa ŋ, ohigbu ka é gē cɛtra igɔmɛnti ku alɛɛcɛ. Ɛ̄gbā ō gba ku ɛkɛmgbɛ gē da ācɛ ɔlɛ uwa ɛyi taajɛ klla gē miyɛ ije ku uwa. É lɛ ācɛ alɛwa ŋmo ɛ, kwu ācɛ nōo gē gba Ujehofa ɛ̄gbā a. (Mafú 19:2) Ɛgɛnyá nɛ Ujehofa gáā ca uwa taajɛ a?

11. Ɔdi nɛ “ɛbɛ́ obɔ̄bí nɔ̄wá yōōō” a kwɛyi nu a, ɛgɛnyá nɛ Ɔwɔico kē gáā bi ɔ le nuunu ta Ubabilɔn Nɛhi a?

¹¹ Ujehofa géē bi “ɛbɛ́ obɔ̄bí nɔ̄wá yōōō éyi” mla “ajī igwó” a lɛ “akwuna olōofu nɛ̄hi” a cataajɛ. Ɛbɛ obɔbi ɔɔma kwɛyi United Nations. Aji igwo a kwɛyi aigɔmɛnti nōo gē ta ɔwa ku United Nations abɔ a. Eko ku Ɔwɔico yiili a, aigɔmɛnti nōo gē ta uwa abɔ a géē gbɔɔ ō nuunu ta Ubabilɔn Nɛhi nōo kwɛyi ɛ̄gbā ō gba ku ɛkɛmgbɛ a. É “géē kpó ɛjɛ̄ɛ̄jī ɔdā nōó lɛ ā, cɛ́ɛ́ é habɔ̄tá tóohɛ́ɛwa.” É géē ya ɛnyā ŋma lɛ ō miyɛ ɛjɛɛji aɔdā agbenu nɛ ó lɛ a, mɛmla ō mafu lɛ ɛjɛɛji ācɛ ɛgɛ nɛ ó bɔbi ɔtu nɛhi lɛ a. (Mafú 17:3, 16) Ocataajɛ ku nu géē ya kpaa, bɛɛka ɔdā nōo géē ya ipu ɛ̄cī ekponu a. Ācɛ nōo gē ta ɛ̄gbā ō gba ku  ɛkɛmgbɛ abɔ géē le kpo hidaago, ofiyɛ duu, ohigbu ka ó humayi ya ɔbɔɔcɛ klla gē ka okonu kahinii: “Ami cīīce ɛyí akpa kú ɔcɛ́ kú um yɔ̄ ī gbāajɛ mɛ́mla odúúdu íkwu yɔ̄ á! Ń wɛ ɔnyōkwū gboogboo ŋ́, ń kē gáā jé ɔtūnōbí kú ɔnyōkwū gbóógbóō ŋ́.”—Mafú 18:7, 8.

12. Ɔdi nɛ Ujehofa i gáā cɛ ku aéwo a kéē ya ŋ ma, ɔdiya nɛ ó kē gáā cɛ lɛ uwa ŋ ma?

¹² Ujehofa i gáā cɛ ku aéwo a kéē lɛ ācɛ ɔlɛ nu yiifi ŋ. Ācɛ ɔlɛ nu gē gweeye ō lé iye ku nu, é lɛyitaajɛ lɛ ɔ́da ku nu klla bɛɛcɛ ŋma Ubabilɔn Nɛhi. (Ācot. 15:16, 17; Mafú 18:4) É klla ceyitikwu ta ācɛ alɛwa abɔ kéē nyɛɛ ŋma anu duu. Ohigbu ɛnyā, Ujehofa géē gbo uwa eko nɛ ó géē lɛ ɛ̄gbā ō gba ku ɛkɛmgbɛ cataajɛ. Amáŋ, naana nɛ ó géē gbo uwa a, é géē cɛgbá ɔtu okpoce olɔfu, o ya ɛɛ kéē lɔfu lɔtu ɔdā nōo yɔ i wa a.

13. (a) Ɔnyɛ wɛ Ugɔgu a? (b) Oŋma ɛlā nōo yɔ ipu ɔkpá ku Isíkɛ̄lu 38:2, 8, 9 a, ɔdi gáā ya nɛ Ugɔgu géē wa i dɔka ō kpo ɛfú ta ācɛ ɔlɛ Ujehofa a?

¹³ Ɛfú nɛ Ugɔgu gáā kpo a. (Jé Isíkɛ̄lu 38:2, 8, 9.) Ɔdaŋ ka Ɔwɔico lɛ ɛjɛɛji ɔwɛ ō gba ɛ̄gbā ku ɛkɛmgbɛ cataajɛ kwɛyi, ɔwɛ ō gba ɛ̄gbā éyi foofunu gáā hile ipu ɛcɛ nyā mɛɛ a. Ācɛ ō gba Ujehofa ɛ̄gbā foofunu gáā hile a. Ɛnyā géē cɛ lɛ Ebilii cɔnu nɛɛnɛhi. Ó géē bi “aálelékwū oblínyī” le mafu icɔnu ku nu. Aalelekwu oblinyi a géē wɛ aɛlā ɛkɛmgbɛ ŋma ɛgiyi aalelekwu obɔbi nōo géē ya ku aéwo alɛwa kéē piyatɔha ō gáā nuunu ta ācɛ nōo gē gba Ujehofa ɛ̄gbā a. (Mafú 16:13, 14) Opiyatɔha ku aéwo a néē gē hi ka ‘Ugɔ́gu kú Umágōgu’ a. Eko néē géē wa kéē wa i kpo ɛfú ta ācɛ ɔlɛ Ujehofa a, eko ɔɔma nɛ Amagɛdɔn gáā gbɔɔ a.—Mafú 16:16.

14. Ɔdi nɛ aéwo a néē hi ka Ugɔgu géē wa i jé peee a?

¹⁴ Ugɔgu géē lɛ ɔtuce “ɔfú kú ɔlɛɛcɛ.” Ɔfu ku ɔlɛɛcɛ a kē wɛ aicɔɔja ku nu a. (2 Úklɔ́ 32:8) Amáŋ alɔ a géē lɛ ɔtuce Ujehofa, ɛnyā kē i ya ku aéwo a kéē má alɔ bɛɛka aolila a. Ɔdiya a? Ohigbu ku naana nɛ Ubabilɔn Nɛhi lɔfu gaaga a, aɔwɔ ku uwa i nya uwa ta ŋma ɛgiyi “ɛbɛ́ obɔ̄bí” a, mla “ajī igwó” ku ɛbɛ a gla ŋ! (Mafú 17:16) Ohigbu ɛnyā, aéwo a géē gbɛla ka ó géē tɔɔtɛ lɛ uwa kéē ya alɔ le. É géē wa ō gáā kpo ɛfú ta ācɛ ɔlɛ Ujehofa “bɛ̄ɛka  ojuja nɛ̄hi nōo ī klá ajɛ kpímm ā.” (Isík. 38:16) Amáŋ, eko ɔɔma nōó gáā wa i ta aéwo a eyī peee ka é le gwo tu ipu ukpa ɛ. Bɛɛka Ufero eko nɛ ó yɔ ipu isu igwɛbɛ a, ó géē wa i ta uwa eyī peee ka Ujehofa néē yɔ i nuunu ta ɔ a. —Oyɛb. 14:1-4; Isík. 38:3, 4, 18, 21-23.

15. Ɔdi nɛ Ujisɔsi gáā ya ɛpleeko néē gáā kpo ɛfú ku Amagɛdɔn a?

¹⁵ Ujisɔsi mla aicɔɔja ku nu nōo yɔ ɔkpanco a géē lɛ ɛjɛɛji aéwo ɛyɛɛyɛyi a mla aicɔɔja ku uwa kpo cataajɛ kpɛmm. (Mafú 19:11, 14, 15) Ebilii nōo wɛ olɛla ku Ujehofa fiyɛ duu a, nōo ya nɛ aéwo ɛyɛɛyɛyi a dɔka ō gáā nuunu ta ācɛ ɔlɛ Ujehofa ipu ɛfú ō kpo ku Amagɛdɔn a bɛɛ? Ɔdi kē gáā ya ɔ a? Ujisɔsi géē lɛ anu mɛmla alelekwu obɔbi ku nu ta ɛcɔ gā ipu ɔgɔ nōó lɛ oŋmɛyi ŋ ma, cɛɛ ó lɛ ɔgɔ a gwu. É géē kla abɔɔ ihayi ula ɛpa ce ofu igwo.—Mafú 20:1-3.

16. (a) Ɛgɛnyá nɛ alɔ gáā mafu ku alɔ “jé Ɔwɔicō” a? (b) Ɔdi gáā ya ācɛ nōo jé Ɔwɔico eko ku ɛfú ō kpo ku Amagɛdɔn a?

¹⁶ Ɔdaŋ nɛ alɔ kóō yɔ i wa ipu ujɔ ku Ujehofa klɔɔdɔ, amāŋ ku alɔ humayi yɔ ipu ujɔ a gboji gboji ɛ, o ya ɛɛ ku alɔ lɛ onyata eko ku Amagɛdɔn a, ɛjɛɛji alɔ cika ō mafu ku alɔ “jé Ɔwɔicō” klla “lɛyítáajɛ lɛ ɔ̄kōolɔhi kú Óndú alɔ Ujísɔ̄si.” (2 Utes. 1:7-9) Alɔ géē ka ka alɔ “jé Ɔwɔicō” ɔdaŋ ku alɔ jé aɔdā nɛ ó dɔka, aɔdā nɛ ó dɔka ŋ, mla ɛgɛ nɛ ó gē ya odee lɛ a. Ɔwɛ ɔhá nɛ alɔ géē mafu ku alɔ jé Ɔwɔico a wɛ ō yihɔtu nu, ō lɛyitaajɛ lɛ ɔ, mɛmla ō yɔ i gba anu ofoofunu ɛ̄gbā. (1 Ujɔ́n. 2:3-5; 5:3) Ɔdaŋ ku alɔ gē mafu ku alɔ jé Ɔwɔico, ó géē “jé” alɔ duu, ɔɔma kē wɛ ka ɛlā ku alɔ géē bēē he ɔ ɔtu. (1 Ukɔ́r. 8:3) Ohigbu ɛnyā, ó géē nya alɔ ta eko ku ɛfú ō kpo ku Amagɛdɔn.

17. Ɔdi nɛ ó wɛ ku ɔcɛ kóō “lɛyítáajɛ lɛ ɔ̄kōolɔhi kú Óndú alɔ Ujísɔ̄si”?

¹⁷ “Ɔ̄kōolɔhi kú Óndú alɔ Ujísɔ̄si” lɛ o ya mla ɛjɛɛji ɛlā ɔkwɛyi nɛ Ujisɔsi nwu nɛ alɔ gē jé ŋma ipu Ubáyíbu a. Alɔ géē yɔ i mafu ku alɔ lɛyitaajɛ lɛ ɔkoolɔhi a ɔdaŋ ku alɔ gē bi ɔ le yuklɔ ipu oyeeyi ku alɔ. Ɔwɛ ɔhá wɛ ō ya ku uklɔ ku Ujehofa kóō wɛ ɔdā aflɛyi ipu oyeeyi ku alɔ, ō lɛyitaajɛ lɛ ɔdā nɛ Ɔwɔico ka kóō wɛ ɔdā olɔhi, mɛmla ō yɔ i tɔɔna lɛyikwu Ajɔɔcɛ ku Ɔwɔico. (Umát. 6:33; 24:14) Alɔ cika ō bēē ta ayinɛ ku Ukraist néē lɛ anɔ tu  uwa ɛyi a abɔ, ohigbu ka uklɔ néē yɔ i ya a i wɛ uklɔ ija ŋ, ó wɛ uklɔ nōo cɛgbá nɛɛnɛhi.—Umát. 25:31-40.

18. Ɔwɛ nyá nɛ ayinɛ ku Ujisɔsi néē lɛ anɔ tu uwa ɛyi a gáā cila aala ɔhá a ule ohigbu otabɔ néē je lɛ uwa eko néē yɔ ipu ɛcɛ a?

¹⁸ Ó gáā gboji gɛ ŋ, ācɛ ɔlɛ Ɔwɔico néē lɛ anɔ tu uwa ɛyi a géē cila “aálá ɔhá” ule ku ɛjɛɛji otabɔ néē je lɛ uwa a. (Ujɔ́n. 10:16) Ɛgɛnyá néē gáā ya ɛnyā a? Gbɔbu ɛɛ ku ɛfú ō kpo ku Amagɛdɔn kóō gbɔɔ, ɛjɛɛji uwa nōo wɛ ula ofigwaahata (144,000) a géē je heyi ŋma ɔlekwu gā ɔkpanco. É géē je piya aalelekwu nōó gáā kwū gboogboo gɛ ŋ. É géē wa i wɛ ipu aicɔɔja nōo yɔ ɔkpanco nōo géē ca Ugɔgu taajɛ. É klla géē gbo “ɛwa nɛ̄hi” ku ācɛ nōo gē gba Ujehofa ɛ̄gbā a. (Mafú 2:26, 27; 7:9, 10) Ó lɛ aafu ŋ, ɛwa nɛhi ku ācɛ a géē gweeye nɛhi ohigbu otabɔ néē je lɛ ācɛ ɔlɛ Ujehofa néē lɛ anɔ tu uwa ɛyi a eko néē yɔ ipu ɛcɛ a!

19-20. Naana nɛ alɔ kóō yɔ i má unwalu ɛyɛɛyɛyi a, ɔdi nɛ alɔ cika ō ya, o ya ɛɛ ku alɔ hayi kpaakpa abɔ Amagɛdɔn le ba ō wa ɛ ma?

¹⁹ Ɛpleeko amoomɛ nyā nōo lɔnɔ nɛhi a, ācɛ ɔlɛ Ujehofa alɛwa yɔ i lɔtu unwalu ɛyɛɛyɛyi. Naana a, alɔ lɔfu lɔtu mla eeye kpɔ. (Ujɛ́. 1:2-4) Ɔdā éyi nōo géē ta alɔ abɔ nɛhi a wɛ ɔkɔ ō gba ŋma ɔtu lɛ Ujehofa eko doodu. (Ulúk. 21:36) Ó wɛ ɔkɔ ō gba foofunu ŋ, amáŋ alɔ cika ō bēē jé Ubáyíbu ɛ̄cī doodu klla gē gbɛla tu ɛlā nɛ alɔ jé a. Alɔ kóō bēē ya oklɔcɛ lɛyikwu aakacɛ ku aɔdā nōó gáā gboji ō ya gɛ ŋ ma. (Aíjē 77:12) Ɔdaŋ ku alɔ gē ya aɔdā nōo ba nyā, klla gē ceyitikwu ipu uklɔ ku ɔna ta, ó géē ya ku ɔtu okpoce mla eyiyoce ku alɔ kóō yɔ i lɔfu!

²⁰ Gbɛla lɛyikwu ɛdɔ eeye nɛhi nɛ a gáā lɛ a ɔdaŋ ka é lɛ Ubabilɔn nɛhi cataajɛ, klla lɛ ɛfú ka Amagɛdɔn kpo kwɛyi! Ó cɛgbá fiyɛ duu a, gbɛla kwu ɛgɛ nɛ a géē yɔ i gweeye lɛ, eko nɛ ɛjɛɛji ācɛ gbɔɔ ō lɛ ojilima ce iye ku Ujehofa mla íkwu ku ɔcɛ́ ō lé ku nu a! (Isík. 38:23) Ii gboo Amagɛdɔn wɛ ɔkoolɔhi lɛ ācɛ nōo jé Ɔwɔico. Ɔɔma ya ɛɛ nɛ ācɛ nōo jé Ɔwɔico, gē lɛyitaajɛ lɛ ɔyi nu, klla lɔtu jaa gā ajaajɛ a gē leyice ō wa ku Amagɛdɔn a.—Umát. 24:13.