IKPƐYI ƐLĀ Ō KLƆCƐ ƆMƐ 39
“Má Ɛwa Nɛ̄hi Kú Ācɛ”
“Anɔ́ɔ n má ɛwa nɛ̄hi kú ācɛ, nɛ̄ ɔ̄cɛ dúú í gbaálūka glá ŋ́, . . . É hayi iyɔ̄bū akpa kú ɔcɛ́ mɛ́mla iyɔ̄bū kú Ɔyí álá ā.”—MAFÚ 7:9.
IJÉ ƆMƐ 60 Ó Géē Ya Kéē Gáā Lɛ Oyeeyi
ƆDĀ NƐ ALƆ GÁĀ NWU A *
1. Ɔdi wɛ āhɔ̄ ku Ujɔni ɔcocɛhɔ ɛpleeko ku ihayi ofu ɛnɛ ce igwo ɛhɔ a?
ƐPLEEKO ku ihayi ofu ɛnɛ ce igwo ɛhɔ a, Ujɔni nōo wɛ ɔcocɛhɔ ku Ujisɔsi a yɔ ipu āhɔ̄ olɔnɔ. Ó kwu hila ɛ, é kē lɛ ɔ ta agba ipu idɔ ku Upatimɔsi. Ó lɔfu wɛ ka anu foofunu wɛ ɔcocɛhɔ nōo yeeyi mɛɛ a. (Mafú 1:9) Ó jé ka ācɛ nōo cigbihi kwu ɔwɛ ō gba Ujehofa ɛ̄gbā a yɔ i nwu aɛlā ɛkɛmgbɛ klla yɔ i lɛ Ācɛ O Yɛce Ukraist kɔ ɛpa. Ó géē lɛbɛɛka eko yɛɛ a, Ɔcɛ O Yɛce Ukraist ɔkwɛyi duuma i gáā yɔ ipu ɛcɛ a gɛ ŋ.—Ujúd. 4; Mafú 2:15, 20; 3:1, 17.
Ujɔni ɔcocɛhɔ a má “ɛwa nɛ̄hi kú ācɛ” nōo lɛ awulu nɛhɛ wiye klla bi ankpali abɔ (Má ogwotu ɔmɛ 2)
2. Oŋma ɛlā nōo yɔ ipu Ɔdā Nēé Mafú Lɛ Ujɔ́ni 7:9-14 a, ɛbɛ olɔhi nyá nɛ Ɔwɔico mafu lɛ Ujɔni a? (Má ifoto nōo yɔ iyɔbu ku Ɔda O Gbaajɛ nyā.)
2 Ipu āhɔ̄ olɔnɔ nɛ Ujɔni yɔ ipu nu nyā a, Ɔwɔico lɛ ɛbɛ olɔhi mafu lɛ ɔ lɛyikwu ɛcɔbu a. Ipu ɛbɛ ɔɔma, alelekwu otɛhɔ ku Ɔwɔico éyi da aalelekwu otɛhɔ ku Ɔwɔico ɛnɛ ɔhá ka é bi owu ku owe nɛhi nōo gē je odee kpo biya a, jaa gbeeko néē lɛ ígwu ku acocɛhɔ ku Ɔwɔico fukɔ udɔbu. (Mafú 7:1-3) Ígwu ku acocɛhɔ ɔɔma lɛ ō ya mla ācɛ ula ofigwaahata (144,000) nōo géē ce ɔcɛ́ mla Ujisɔsi ɔkpanco. (Ulúk. 12:32; Mafú 7:4) Ujɔni klla kɛla lɛyikwu ígwu ɔhá, é lɛwa nɛɛnɛhi nōo ya nɛ ó kahinii: “Igbīhi ɛ̄nyā, n pīyeyī, anɔ́ɔ n má ɛwa nɛ̄hi kú ācɛ, nɛ̄ ɔ̄cɛ dúú í gbaálūka glá ŋ́, nēe ŋmá éwo mɛ́mla ipɔ́ɔma mɛ́mla ācɛ mɛ́mla ucē ɛyɛ́ɛyɛ́yí dóódu á. É hayi iyɔ̄bū akpa kú ɔcɛ́ mɛ́mla iyɔ̄bū kú Ɔyí álá ā.” (Jé Ɔdā Nēé Mafú Lɛ Ujɔ́ni 7:9-14.) Abɔ Ujɔni má ɛbɛ nyā a, ó géē lɔfu yɔ i gweeye nɛɛnɛhi ō jé ka ɛcɔbu, ó géē lɛ ācɛ alɛwa nōo géē yɔ i gba Ujehofa ɛ̄gbā ɔwɛ okpaakpa!
3. (a) Ɔdiya nɛ ɛbɛ nɛ Ujɔni má a cika ō ya ku ɔtu okpoce ku alɔ kóō lɔfu a? (b) Ɔdi nɛ alɔ gáā nwu ipu ikpɛyi ɛlā nyā a?
3 Alɔ jé kpɔcii ka ɛbɛ nɛ Ujɔni má ɔɔma ya ku ɔtu okpoce ku nu kóō lɔfu. Ó klla cika ō ya ku ɔtu okpoce ku alɔ kóō lɔfu fiyɛ,
ohigbu ku alɔ lā ɛpleeko amoomɛ nɛ ɛbɛ ɔɔma géē ya jila a. Ɛpleeko ku alɔ nyā, umiliyɔn alɛwa ku ācɛ gbɔɔ ō gba Ujehofa ɛ̄gbā ɛ, é kē leyice ō lɛ onyata ɛpleeko ku owe nɛhi a klla lā oyeeyi opiyoo ipu ɛcɛ nyā. Ipu ikpɛyi ɛlā nyā, alɔ géē nwu ɛgɛ nɛ Ujehofa mafu ācɛ nōo wɛ ɛwa nɛhi a lɛ ācɛ ɔlɛ nu, odee nōo fiyɛ ihayi ofu ɛnɛ nōo gáā yɛ ɛ ma. Oŋma ɔɔma a, alɔ géē ka ɔdā ɛpa lɛyikwu ɛwa nɛhi ɔɔma: (1) ɛgɛ néē lɛwa lɛ mla (2) ɛga ɛyɛɛyɛyi néē ŋma a. Ɛlā ɛpa nyā géē ya ku ɔtu okpoce ku ɛjɛɛji ācɛ nōo lɛ eyiyoce ō wɛ ipu ígwu ɔɔma néē hɔha ce uwa a kóō lɔfu nɛɛnɛhi.IMI NƐ ƐWA NƐHI KU ĀCƐ A GÁĀ LĀ A?
4. Ɔkwɛyi nōo yɔ ipu Ubáyíbu nyá nɛ ācɛ aicɔɔci ɛkɛmgbɛ i jɛyi nu ŋ ma, ɛgɛnyá nɛ Ācɛ Ō Klɔcɛ Ku Ubáyíbu wɛ ɛyɛɛyi gwu uwa ta a?
4 Aicɔɔci ɛkɛmgbɛ i gē nwu ācɛ ɛlā ɔkwɛyi nōo yɔ ipu Ubáyíbu a ŋ. É gē nwu ɔkwɛyi ka ɛ̄cī éyi yɔ i wa, nɛ ɛjɛɛji ācɛ nōo gē lɛyitaajɛ lɛ Ujehofa a géē lā ipu ɛcɛ nyā piyoo ŋ. (2 Ukɔ́r. 4:3, 4) Icɔɔci alɛwa icɛ gē nwu ka ɛjɛɛji ācɛ nōo gē ya ɔdā olɔhi a géē gā ɔkpanco ɔdaŋ ka é gekwu. Amáŋ, ó lɛ ígwu ligii ku ācɛ nōo gē ya Watch Tower ɛpleeko ku ihayi ku 1879 a. É gē hi uwa ka Ācɛ Ō Klɔcɛ Ku Ubáyíbu. Uwa a i kpɔtuce ɛlā ɔɔma ŋ. É kpɔtuce ka Ɔwɔico géē lɛ ɛcɛ nyā piya uparadais kpɔ, ka umiliyɔn ku ācɛ nōo kē i lɛyitaajɛ lɛ Ɔwɔico a géē lā ipu ɛcɛ nyā, ó wɛ ɔkpanco ŋ. Amáŋ, ó kpo uwa eko nɛhi gbɔbu ɛɛ néē gáā jé ācɛ nōo géē wɛ ācɛ nōo gē lɛyitaajɛ lɛ Ɔwɔico a.—Umát. 6:10.
5. Ɔdi nɛ Ācɛ Ō Klɔcɛ Ku Ubáyíbu kpɔtuce lɛyikwu ācɛ ula ofigwaahata (144,000) a?
5 Ācɛ Ō Klɔcɛ Ku Ubáyíbu a klla gáā le jé ŋma ipu Ubáyíbu ka ó lɛ ígwu ku ācɛ ōhī “ŋmá ipú odúúdú ācɛ kú ipú ɛcɛ” nōo géē ce ɔcɛ́ mla Ujisɔsi ɔkpanco. (Mafú 14:3) Ígwu ɔɔma wɛ Ācɛ O Yɛce Ukraist ula ofigwaahata (144,000), nōo lɛ oyeeyi ku uwa gwɛɛya lɛ Ujehofa klla gba ɔ ɛ̄gbā mla ɔtu caca eko néē yɔ ipu ɛcɛ a. Ɔdi néē kē kpɔtuce lɛyikwu ɛwa nɛhi ku ācɛ a?
6. Ɔdi nɛ Ācɛ Ō Klɔcɛ Ku Ubáyíbu a kpɔtuce lɛyikwu ɛwa nɛhi ku ācɛ a?
6 Ipu ɛbɛ nɛ Ujɔni má a, ó má ígwu ku ɛwa nɛhi ku ācɛ “hayi iyɔ̄bū akpa kú ɔcɛ́ mɛ́mla iyɔ̄bū kú Ɔyí álá ā.” (Mafú 7:9) Ohigbu ɛlā nyá, Ācɛ Ō Klɔcɛ Ku Ubáyíbu a gáā le cɛtɔha ka ɛwa nɛhi ku ācɛ a géē lā ɔkpanco, bɛɛka ācɛ ula ofigwaahata a. Amáŋ ɔdaŋ ku ācɛ ula ofigwaahata a mla ɛwa nɛhi ku ācɛ a géē lā ɔkpanco tɔha, ɛgɛnyá nɛ ígwu éyi géē wɛ ɛyɛɛyi gwu ígwu ɔhá ta a? Ācɛ Ō Klɔcɛ Ku Ubáyíbu a gáā gbɔɔ ō gbɛla, ka ɛwa nɛhi ka ācɛ a géē wɛ Ācɛ O Yɛce Ukraist, nōó lɛyitaajɛ lɛ Ɔwɔico duudu ŋ eko néē yɔ ipu ɛcɛ a. Ācɛ ōhī ku uwa lɔfu yɔ i gā icɔɔci ɛkɛmgbɛ kpɔ, naana néē gē lā oyeeyi nōo cɛtɔha mla Ubáyíbu a. Ācɛ Ō Klɔcɛ Ku Ubáyíbu a gáā le cɛtɔha, ka ɛwa nɛhi ka ācɛ a lɛ ihɔtu lɛ Ɔwɔico, amáŋ ihɔtu néē lɛ a i jɛ ō ya kéē lé ɔcɛ́ mla Ujisɔsi ŋ. Abɔ é lɛ ihɔtu nɛhi lɛ Ɔwɔico ŋ ma a, é géē cika jɛ ō gā ɔkpanco nyɔ i hayi iyɔbu akpa ku ɔcɛ́ a, amáŋ, é gáā yaajɛ ɛyi akpa ku ɔcɛ́ a ŋ.
7. Anyɛ nɛ Ācɛ Ō Klɔcɛ Ku Ubáyíbu a kpɔtuce kéē géē lā ipu ɛcɛ nyā ɛpleeko nɛ Ujisɔsi géē ce ɔcɛ́ ku ɛcɛ nyā a, ɔdi néē klla kpɔtuce lɛyikwu acɛnyilɔ ku eko ikee nōo hayi kpaakpa a?
7 Ó lɛ a, anyɛ gáā lā ipu ɛcɛ a mɛ? Ācɛ Ō Klɔcɛ Ku Ubáyíbu a kpɔtuce, ku ɔdaŋ ku ācɛ ula igwaahata a, mla ɛwa nɛhi ku ācɛ a le yɛ gā ɔkpanco, ka Ɔwɔico géē cɛ lɛ umiliyɔn alɛwa ɔhá ku ācɛ kéē lā ipu ɛcɛ nyā. É klla géē jɔɔnyɛ ɔhā alɛwa ihayi ula ɛpa ce ofu igwo ɛhaajɛ ɔcɛ́ ō lé ku Ujisɔsi. Ācɛ Ō Klɔcɛ Ku Ubáyíbu a i gbɛla ku umiliyɔn ku ācɛ nōo ba nyā, géē wɛ ācɛ nōo gba Ɔwɔico ɛ̄gbā gbɔbu ku ɔcɛ́ ō lé ku Ujisɔsi kóō gbɔɔ ŋ. Amaŋ, é gbɛla ka é géē nwu ācɛ nōo ba nyā lɛyikwu Ujehofa ipu ihayi ula ɛpa ce ofu igwo, ɛpleeko ku ɔcɛ́ ō lé ku Ujisɔsi a. Oŋma ɔɔma, oduuma ku uwa nōo cɛ, gbɔɔ ō lā oyeeyi ɔwɛ nɛ Ujehofa dɔka a géē lɛ ɔhā ō lā Aíjē 45:16.
oyeeyi opiyoo ipu ɛcɛ nyā. Amáŋ, é géē je aɛ̄nɛ̄ ō ya ikpɛyi olɔfu a kpo yiifi. Ācɛ Ō Klɔcɛ Ku Ubáyíbu a klla gbɛla ka ācɛ nōo géē wɛ ‘ayi ku ɔcɛ́’ ipu ɛcɛ nyā ɛpleeko ku ihayi ula ɛpa ce ofu igwo a, géē gā ɔkpanco oŋmɛyi ku ihayi ula ɛpa ce ofu igwo a. É kpɔtuce ka ‘ayi ku ɔcɛ́’ a klla géē lɛ ō ya mla “ācɛ ku eko ikee nōo gba Ujehofa ɛ̄gbā” (acɛnyilɔ nōo hayi kpaakpa nōo kwū gbɔbu lɛ Ukraist a), néē géē je uwa heyi ŋma ɔlekwu ɛpleeko ku ihayi ula ɛpa ce ofu igwo a.—8. Ígwu ɛta nyá nɛ Ācɛ Ō Klɔcɛ Ku Ubáyíbu a gbɛla ka é yɔ ipu ōmiya ku Ɔwɔico a?
8 Ohigbu ɛnyā, Ācɛ Ō Klɔcɛ Ku Ubáyíbu a gbɛla ka é wɛ ígwu ɛta: (1) ācɛ ula igwaahata (144,000) nōo géē ce ɔcɛ́ mla Ujisɔsi ɔkpanco, (2) ɛwa nɛhi ku ācɛ nōo lɛ ō ya mla Ācɛ O Yɛce Ukraist nōó lɛ ihɔtu nɛhi lɛ Ɔwɔico ŋ, nōo géē hayi iyɔbu akpa ku ɔcɛ́ ku Ujisɔsi ipu ɔkpanco, mɛmla (3) umiliyɔn ku ācɛ néē géē nwu uwa lɛyikwu Ujehofa ipu ɛcɛ nyā ɛpleeko ku ɔcɛ́ ō lé ku Ujisɔsi ipu ihayi ula ɛpa ce ofu igwo a. * Amáŋ igbihaajɛ, Ujehofa gáā ta uwa abɔ kéē gáā jɛyi ɛlā nyā peee.—Aíit. 4:18.
ƆLA KU ƆKWƐYI A GBƆƆ Ō FIYAAJƐ TŌŌTƆ̄Ɔ̄
Ipu ojileyi nɛhi ku ihayi ku 1935 a, ɛwa nɛhi ku ācɛ nōo lɛ eyiyoce ō lā ipu ɛcɛ nyā a lɛ ubatisim ya (Má ogwotu ɔmɛ 9)
9. (a) Ɔwɛ nyá nɛ ɛwa nɛhi ku ācɛ nōo yɔ ipu ɛcɛ a gáā lɔfu hayi “iyɔ̄bū akpa kú ɔcɛ́ mɛ́mla iyɔ̄bū kú Ɔyí álá ā”? (b) Ɔdiya nɛ ɔwɛ néē gáā jɛyi ɛlā nōo yɔ ipu ɔkpá ku Ɔdā Nēé Mafú Lɛ Ujɔ́ni 7:9 a lɛyi fiyɛ a?
9 Ipu ihayi ku 1935, Ācɛ Ocijali Ku Ujehofa gáā lɛ ācɛ nōo wɛ ɛwa nɛhi ku ācɛ nɛ Ujɔni má ipu ɛbɛ ku nu a jé. É gáā le má ka ó cɛgbá ku ɛwa nɛhi ku ācɛ a kéē gā ɔkpanco eyī caa klla gáā hayi “iyɔ̄bū akpa kú ɔcɛ́ mɛ́mla iyɔ̄bū kú Ɔyí álá ā” ŋ. Ikɔkɔ ɔɔma, ō hayi ku uwa kwɛyi odee. Ɛyi ku nu kē wɛ kahinii, naana nɛ ɛwa nɛhi ku ācɛ a géē lā ipu ɛcɛ nyā a, é lɔfu hayi “iyɔ̄bū akpa kú ɔcɛ́” a, ŋma lɛ ō cɛ kpɔcii ku Ujehofa foofunu cika ō wɛ ɔcɛ́ ku oduudu ɛcɛ a. Ɔwɛ ɔhá néē géē ya ɛnyā wɛ ō lɛyitaajɛ lɛ Ujehofa, ohigbu ka ɔɔma géē mafu ka é cɛ ka ó lɛ íkwu ɔɔma. (Ayis. 66:1) É géē hayi “iyɔ̄bū kú Ɔyí álá ā,” ŋma lɛ ō mafu ka é kpɔtuce ikwū nɛ Ujisɔsi kwū a. Ɔdā ɔhá kpɔ, ipu ɔkpá ku Umátiyu 25:31, 32 a, abɔ mafu ka é géē “tū odúúdú aéwo,” kwu ācɛ ō ya ɔdobɔbi a “bá iyɔ̄bū” Ujisɔsi ɛyi akpa ku ɔcɛ́ ku nu. Ó teyi peee ka oduudu aewo nyā i yɔ ɔkpanco ŋ ma, amáŋ ipu ɛcɛ nyā néē yɔ a. Opiyabɔ néē gáā ya nyā ipu ihayi ku 1935 a lɛyi fiyɛ. Ó mafu ɔdā nōo ya ɛɛ nɛ Ubáyíbu i ka ka é géē je ɛwa nɛhi ka ācɛ a gā ɔkpanco ŋ ma. Ígwu éyi foofunu néē cokonu lɛ uwa ka é géē lā oyeeyi opiyoo ɔkpanco a, uwa a kē wɛ ācɛ ula igwaahata nōo géē “cɔcɛ́” mla Ujisɔsi a.—Mafú 5:10.
10. Ɔdiya nōó cɛgbá ku ɛwa nɛhi ku ācɛ a kéē nwu ɛlā lɛyikwu Ujehofa gbɔbu ɛɛ ku ɔcɛ́ ō lé ku Ujisɔsi kóō gbɔɔ a?
10 Ŋmiifi ihayi ku 1935, Ācɛ Ocijali Ku Ujehofa gáā le jé ka ɛwa nɛhi ka ācɛ nɛ Ujɔni má a, lɛ ō ya mla ígwu ku Ācɛ O Yɛce Ukraist nōo hayi kpaakpa, klla lɛ eyiyoce ō lā oyeeyi opiyoo ipu ɛcɛ nyā a. O ya ɛɛ ku ɛwa nɛhi ku ācɛ nōo ba nyā kéē lɔfu lɛ onyata eko ku owe nɛhi a, é cika ō gáā nwu ɛlā lɛyikwu Ujehofa klla gba ɔ ɛ̄gbā gbɔbu ɛɛ ku ɔcɛ́ ō lé ku Ujisɔsi kóō gbɔɔ. É klla cika ō mafu kéē lɛ ɔtu okpoce olɔfu nɛhi, o ya ɛɛ kéē lɔfu ‘má ɛ́nyɔ́ nōo géē bī uwa bū ipú aɔ́dā nōo géē yá” gbɔbu ɛɛ ku ɔcɛ́ ō lé ku Ujisɔsi kóō gbɔɔ.—Ulúk. 21:34-36.
11. Ɔdiya nɛ ōhī ku Ācɛ Ō Klɔcɛ Ku Ubáyíbu a gbɛla ka é géē je ācɛ ōhī gā ɔkpanco oŋmɛyi ku ihayi ula ɛpa ce ofu igwo a?
11 Ɔdā néē gbɛla lɛyikwu ācɛ ōhī eko ikee nōo hayi kpaakpa nōo yɔ ipu ɛcɛ, nōo géē gā ɔkpanco oŋmɛyi ku ihayi ula ɛpa ce ofu igwo a bɛɛ? É kɛla ɔɔma aflɛyi ihayi alɛwa nōo gáā yɛ a ipu Watch Tower ku ɛ̄cī 15 ku Ɔya Ɔmpa ku ihayi ku 1913. Ɔcɛ lɔfu yɔ i gbɛla
kahinii: ‘Ɔdiya ɛɛ néē gáā cɛ lɛ ācɛ nōo hayi kpaakpa eko ikee nōo heyi ŋma ɔlekwu a kéē lā ipu ɛcɛ nyā foofunu, amáŋ nɛ Ācɛ O Yɛce Ukraist nōó hayi kpaakpa bɛɛka uwa ŋ ma géē lɛ ule ō lā ɔkpanco a?’ Ku ɛla ɔkwɛyi a, é gbɛla lɛ a ohigbu ɛlá ō gbo ɛpa nōó kpaakpa ŋ: (1) é gbɛla ku ɛwa nɛhi ku ācɛ a géē lā ɔkpanco, (2) ku ācɛ nōo kē wɛ ipu ígwu ku ɛwa nɛhi a kē wɛ Ācɛ O Yɛce Ukraist nōó lɛ ɔtu caca ipu ɛlā Ɔwɔico lɛ a ŋ.12-13. Ɔdi nɛ ācɛ nōo i gā ɔkpanco mla ɛwa nɛhi ku ācɛ a jé lɛyikwu ule ku uwa a?
12 Alɔ le má ɛ ka oŋmiifi ihayi ku 1935 a, Ācɛ Ocijali Ku Ujehofa le má peee ku ɛwa nɛhi ku ācɛ nɛ Ujɔni má a, wɛ ācɛ nōo géē wi ɛ̄cī ku Amagɛdɔn nɛ. É géē “wi ŋmá eko kú ákanya nɛ̄hi” nōo géē ya ipu ɛcɛ nyā. É kē i “lɛ ɔkɔ cɛyí dɛ̄gba kahíníī, “Ɔwɔicō kú alɔ nōo cīce akpa kú ɔcɛ́ ā mɛ́mla Ɔyí álá lɛ alɔ nyatá ɛɛ́.” ” (Mafú 7:10, 14) Ó wɛ ɔɔma foofunu ŋ, Ubáyíbu klla mafu ka ācɛ nōo heyi ŋma ɔlekwu gā ɔkpanco a géē miyɛ eyiyoce olɔhi fiyɛ ācɛ nōo hayi kpaakpa eko ikee a. (Uhíb. 11:40) Abɔ ɛlā nyā gáā le teyi peee lɛ a, ayinɛ alɔ gbɔɔ ō bi ɔtu caca le hi ācɛ igwú kéē gáā gba Ujehofa ɛ̄gbā, o ya ɛɛ kéē lɛ eyiyoce ku oyeeyi opiyoo ipu ɛcɛ nyā.
13 Ācɛ nōo wɛ ipu ɛwa nɛhi ku ācɛ a gē gweeye, ohigbu eyiyoce ku uwa. É jé ka Ujehofa foofunu lɛ íkwu ō da ɔnyɔɔnyɛ ku ācɛ ɔlɛ nu nōo hayi kpaakpa a ɛga néē géē yɔ kéē gba ɔ ɛ̄gbā a, ɔdaŋ ka ó wɛ ɔkpanco nɛɛ o amāŋ ipu ɛcɛ nyā. Amáŋ ācɛ nōo i gā ɔkpanco mɛmla ɛwa nɛhi ku ācɛ a jé ka ó wɛ ohigbu ka é cika jɛ ɔ a ya ɛɛ nɛ Ujehofa gē cila uwa ule a ŋ, amáŋ ó tɔɔtɛ foofunu ohigbu ka Ujehofa ta Ujisɔsi ɛhɔ kóō gáā kwu oyeeyi ku nu gwɛɛya.—Uróm 3:24.
ALUKA A NWUNE
14. Igbihaajɛ ku ihayi ku 1935 a, ɔdiya nɛ ācɛ alɛwa yɔ i gbɛla lɛyikwu ɛgɛ nɛ akacɛ ku ɛwa nɛhi ku ācɛ a géē ya jila a?
14 Naana nɛ ɛlā a le teyi peee lɛ Ācɛ Ocijali Ku Ujehofa ipu ihayi ku 1935 ɛ ma, ācɛ alɛwa klla gē gbɛla ɛgɛ nɛ aluka ku ācɛ nōo géē lā ipu ɛcɛ nyā géē wɛ ɛwa nɛhi a. Ocabɔ mafu, Uronald Parkin wɛ ihayi igwo ɛpa (12) eko nɛ ɛlā lɛyikwu ɛwa nɛhi a je teyi peee a, ó kahinii: “Ɛpleeko ɔɔma, ācɛ ō tɔɔna ɛlā Ɔwɔico ipu oduudu ɛcɛ a wɛ 56,000 foofunu, ɛyinɛhi ku uwa kē wɛ ācɛ néē lɛ anɔ tu uwa ɛyi a. Ó lɛ a, aluka ku ɛwa nɛhi ku ācɛ a i nwune nɛhi lɛ a nóó.”
15. Ɛgɛnyá néē humayi tu ɛwa nɛhi ku ācɛ a ba a?
15 Ipu ihayi igwo nōo gboce ɔ a, é lɛ ācɛ ō tɔɔna ipu éwo ɔhá (missionaries) tɛhɔ gā ajɛ alɛwa. Ɛnyā cɛ lɛ aluka ku Ācɛ Ocijali Ku Ujehofa kóō gbɔɔ ō nwune tōōtɔ̄ɔ̄. Ipu ihayi ku 1968, é lɛ ōmiya lɛyikwu oklɔcɛ ku Ubáyíbu kwaajɛ, ɔkpá néē kē i bi le ya oklɔcɛ a wɛ ɔkpá néē gē hi kahinii: The Truth That Ayis. 60:22) Ɛpleeko ku alɔ nyā, ɔwa ku Ujehofa lɛ aɔkpá mla aɔdā ɔhá alɛwa ya, nōo géē ta ācɛ abɔ kéē nwu ɛlā nōo yɔ ipu Ubáyíbu a. Babanya, ɛwa nɛhi ku ācɛ a fiyɛ umiliyɔn ahata. Ó teyi peee ka é lɛ uwa tuba ɛ.
Leads to Eternal Life. Ɛgɛ nɛ ɔkpá a mafu ɛlā ɔkwɛyi nōo yɔ ipu Ubáyíbu ɔwɛ ō teyi peee a, pi ācɛ alɛwa wa ɛgiyi Ujehofa fiyɛ. Ipu ihayi ɛnɛ, ācɛ nōo fiyɛ ō kɔ ɛpa ku umiliyɔn a gáā lɛ ubatisim ya. Abɔ íkwu nɛ ācɛ Ucatholic lɛ ipu Latin America mla aéwo ɔhá gbɔɔ ō waajɛ, néē klla gáā je íkwu lɛ alɔ ipu Eastern Europe mla aya ku ɛga ōhī ipu Africa, ɛga néē tɛtɛ je uklɔ ku alɔ ci a, umiliyɔn ku ācɛ gáā lɛ ubatisim ya kpɔ. (ƐWA NƐHI KU ĀCƐ NŌO WA ŊMA ƐGA ƐYƐƐYƐYI
16. Imi néē gē tu ɛwa nɛhi ku ācɛ a ba ŋma a?
16 Eko nɛ Ujɔni yɔ i ta ɔkpá lɛyikwu ɛbɛ nɛ ó má a, ó ka ɛwa nɛhi ku ācɛ a géē wa “ŋmá éwo mɛ́mla ipɔ́ɔma mɛ́mla ācɛ mɛ́mla ucē ɛyɛ́ɛyɛ́yí dóódu.” Gbɔbu ɛɛ ku Ujɔni kóō má ɛbɛ nyā a, Usakariya nōo wɛ ɔcomɛɛbɛ a tɛtɛ lɛ ɔdā nōo gbla ɛnyā a kacɛ taajɛ ɛ. Ó ta kahinii: “Ɛ̄cī ɔ́ɔmā, ācɛ kú aéwo ɔhá igwó géē wā ɛgiyí ɔ̄cɛ Ujíyu ékpónú gaá lɛ abɔ̄ bī okónōgwu kú awulú kú nū, géē da ɔ́, ‘Ká ālɔ̄ nyɔ̄ mla awɔ, ohígbū ka alɔ le pó ka Ɔwɔicō yɔ̄ mla awɔ.’ ”—Usak. 8:23.
17. Ɔdi néē gē ya babanya o ya ɛɛ kéē je otabɔ lɛ ācɛ nōo ŋma ipu éwo mla uce ɛyɛɛyɛyi a?
17 Ācɛ Ocijali Ku Ujehofa jé ka é cika ō tɔɔna lɛyikwu ɔkoolɔhi a ipu uce alɛwa, o ya ɛɛ kéē lɔfu tu ācɛ ba ŋma uce ɛyɛɛyɛyi a. Ohigbu ɛnyā, ŋmiifi ihayi ofu ɛhilii ce igwo (130) a, alɔ humayi cɔwɔ aɔkpá mla aɔdā ɔhá nɛ alɔ gē bi le nwu ācɛ Ubáyíbu a gā ipu uce ɛyɛɛyɛyi. Amáŋ babanya, ɛgɛ nɛ alɔ gē cɔwɔ aɔkpá ku alɔ gā ipu uce alɛwa a ba, alɔ i ya lɛ a jejee ɛ ŋ. Ó teyi peee ka Ujehofa yɔ i yuklɔ idaago ɛpleeko ku alɔ nyā, ó yɔ i tu ɛwa nɛhi ku ācɛ ba ŋma ipu éwo ɛyɛɛyɛyi. Ohigbu Ubáyíbu mla aɔkpá mla aɔdā ɔhá ku alɔ nōo yɔ ipu uce alɛwa a, ígwu ku ācɛ nōo ba nyā yɔ i gba Ujehofa ɛ̄gbā ipu ɛbɔ, naana néē kóō ŋma ɛga ɛyɛɛyɛyi ipu oduudu ɛcɛ a. Ācɛ alɛwa kē jé Ācɛ Ocijali Ku Ujehofa lɔɔlɔhi ɛgɛ néē gē tɔɔna mla ɔtu caca klla gē mafu ihɔtu lɛ iyi uwa a. Ɛnyā wɛ ɔdā ō ta ɔtu kwu ɔtu nɛhi!—ƆDI WƐ ITENE KU ƐBƐ ƆƆMA GĀ UWƆ A?
18. (a) Oŋma ɛlā nōo yɔ ipu ɔkpá ku Ayisáya 46:10, 11 a, ɔdiya nōó ya alɔ eyijii ɛgɛ nɛ Ujehofa ya akacɛ lɛyikwu ɛwa nɛhi ku ācɛ a jila ŋ ma? (b) Ɔdiya nɛ ācɛ nōo lɛ eyiyoce ō lā ipu ɛcɛ nyā i gē gbɛla ka Ujehofa yɔ i nya uwa odee ŋ ma?
18 Alɔ yɔ i gweeye nɛhi lɛyikwu akacɛ ku ɛwa nɛhi ku ācɛ a! Ó ya alɔ eyijii ɛgɛ nɛ Ujehofa ya akacɛ ɔɔma jila ɔwɛ ō hɛ idaago a ŋ. (Jé Ayisáya 46:10, 11.) Ācɛ nōo yɔ ipu ígwu ɔɔma yɔ i ta Ujehofa ahinya ku eyiyoce nyā nɛ ó je lɛ uwa a. Ó gē ya uwa bɛɛka Ujehofa yɔ i nya uwa odee, abɔ é wɛ ipu ācɛ nōo géē cɔcɛ́ mla Ujisɔsi ipu ɔkpanco nóó. Ubáyíbu le mu mla ɔ̄kā ku acɛnyilɔ mla acɛnya nōo kpɔtuce Ɔwɔico, nɛ alelekwu ku Ɔwɔico klla ma ɔwɛ fu lɛ uwa, naana a, é wɛ ipu ígwu ku ācɛ nōo géē gā ɔkpanco a ŋ. Ɔcɛ bɛɛka Ujɔni O Ya Ubatisim. (Umát. 11:11) Udefidi kē wɛ ocabɔ ɔhá duu. (Ācot. 2:34) Uwa mla uluula igbingbidi ku ācɛ ɔhá géē heyi ŋma ɔlekwu klla lā oyeeyi opiyoo ipu uparadais ɛcɛ nyā. Ɛjɛɛji uwa mla ɛwa nɛhi ku ācɛ a géē lɛ ɛga ō mafu lɛ Ujehofa ka é tɛyi waajɛ lɛ ɔcɛ́ ō lé ku nu.
19. Ɔdi nɛ alɔ cika ō ya, ɔdaŋ ku alɔ jɛyi ɛbɛ nɛ Ujɔni má lɛyikwu ɛwa nɛhi ku ācɛ a?
19 Ɛgɛ nɛ Ujehofa yɔ i tu umiliyɔn alɛwa ku ācɛ ba ŋma éwo ɛyɛɛyɛyi, o ya ɛɛ kéē wa i gba ɔ ɛ̄gbā tɔha a, ó ya lɛ a jejee ɛ ŋ. Ɔdaŋ ka eyiyoce ku alɔ wɛ ō lā ɔkpanco, amāŋ ipu ɛcɛ nyā, ɛjɛɛji alɔ cika ō tabɔ, o ya ɛɛ ku ācɛ alɛwa kéē gáā wɛ ipu ɛwa nɛhi ku “aálá ɔhá” a. (Ujɔ́n. 10:16) Ó gáā gboji gɛ ŋ, Ujehofa géē bi owe amāŋ akanya nɛhi nɛ ó kacɛ lɛyikwu ɔ a wa, o ya ɛɛ kóō lɛ aigɔmɛnti mla ɔwɛ ō gba ɛ̄gbā ɛyɛɛyɛyi nōo humayi ya ku ācɛ kéē má owe nɛhi a cataajɛ. Ó wɛ ɛnɛɛnɛ ɛga ligii yɔ lɛ ācɛ nōo géē wɛ ipu ɛwa nɛhi ku ācɛ a nóó, é géē lɛ ɛga ō gba Ujehofa ɛ̄gbā ipu ɛcɛ nyā ogboogboo ɛcɛ!—Mafú 7:14.
IJÉ ƆMƐ 139 See Yourself When All Is New
^ par. 5 Ikpɛyi ɛlā nyā géē kɛla lɛyikwu ɛbɛ nɛ Ujɔni má lɛyikwu ō tuba ku “ɛwa nɛ̄hi kú ācɛ” a. Ó lɛ aafu ŋ, ɛbɛ ō má ɔɔma géē ya ku ɔtu okpoce ku ɛjɛɛji ācɛ nōo lɛ ɛnɛɛnɛ eyiyoce ɔɔma a kóō lɔfu.
^ par. 8 Má ɔkpá néē i hi kahinii: Jehovah’s Witnesses—Proclaimers of God’s Kingdom, upeji. 159-163.
^ par. 67 Aluka 1-8 kwɛyi aluka ku ācɛ ō tɔɔna ɛlā Ɔwɔico, ŋma umiliyɔn éyi gā umiliyɔn ahata.