▪ Ɛnɛɛnɛ ɔgba ku Ubáyíbu nyā kahinii: “Ó híī hɛ́ aá idáagó ŋ́, eko nɛ̄ aá má ka aígabɔ̄ kú ipɔ́lɛ́ gē pīya aólɛhɔ́cɛ tū, klla nyá uwā ɛpɔ̄ okpaakpa, klla í gē yá uwá ɔdā olɔhi ŋ́. Igabɔ̄ dóódu lɛ igabɔ̄ ɔhá nōo yɔ̄ ɛhícō gē gbō ɔ̄, ɔhá kē yɔ̄ nōo kē wɛ otrɛ̄yí kú odúúdú aígabɔ̄ nōo gē gbō odúúdú uwā.”—Ɔ̄cok. 5:8.

Amāŋ ɔdaŋ ku alɔ i leyi yɛ ɔdā nɛ Ujehofa gbɛla lɛyikwu ɛlā nyā a ŋ, ó géē ya alɔ bɛɛka ɔgba nyā yɔ i kɛla lɛyikwu ācɛ nōo lɛ íkwu ipu igɔmenti a ofoofunu. Amāŋ ɔdaŋ ku alɔ gbɛla tu ɔ lipu lipu, ó kɛla ɔkwɛyi lɛyikwu Ujehofa nōo tu alɔ ɔtu kwu ɔtu klla ya ku eyiyoce ku alɔ kóō lɔfu tōōtɔ̄ɔ̄.

Ɔkpá ku Ɔ̄cokóītá 5:8 kɛla lɛyikwu ɔcɛ́ éyi, nōo gē piya ācɛ nōó lɛ ije ŋ ma tu klla gē nyá uwa ɛpɔ okpaakpa. Ɔcɛ́ a cika ō bla ka ɔcɛ ɔhá nōo fiyɛ anuɔ, amāŋ lɛ íkwu fiyɛ anuɔ ipu igɔmɛnti yɔ i má anuɔ. Ó kóō lɛ ācɛ ɔhá nōo yɔ abɔɔ nɛ íkwu néē lɛ a klla fiyɛ kpɔ. O wɛ ɔdā ō kwiye, ka ipu igɔmɛnti ku alɛɛcɛ, ɛjɛɛji aɔcɛ́ nōo ba nyā lɔfu bɔbiipu, ācɛ nōó kē lɛ ije ŋ ma kē i moowe nɛhi, ohigbu ɔbiipu ku ācɛ néē yɔ ɛhaajɛ uwa a.

Ɛgɛ duuma nɛ āhɔ̄ a kóō bɔbi lɛ naana, alɔ lɔfu miyɛ ɔtu ō tu kwu ɔtu ŋma ō jé ka Ujehofa, gē ‘má ɛjɛɛji ɔdā nɛ ācɛ nōo yɔ ɛhico ku igɔmɛnti’ gē ya a. Alɔ lɔfu gbɔɔkɔ lɛ Ɔwɔico klla ma unwalu ku alɔ ta ce ɔ. (Aijé 55:22; Ufíl. 4:6, 7) Alɔ jé ka “Óndú ā gē leyī kwɛɛcɛ gɛɛ, kóō je ɔfú lɛ ɔ̄cɛ dóódu nōo kwu ɔtu ku nu u ce ɔ.”—2 Úklɔ́. 16:9.

Ɛlā nōo yɔ ipu ɔkpá ku Ɔcokoita 5:8 a, gē cɛ lɛ alɔ blakwu ɔdā nōo gē ya ipu igɔmɛnti a ɔkwɔɔkwɛyi, ācɛ yɔ nōo lɛ íkwu fiyɛ ɔmpa uwa. Ɛ̄nɛ̄ ō kóō cɛgbá fiyɛ duu a, wɛ ka ɛga ku Ubáyíbu ɔɔma géē ta alɔ abɔ bla, ka Ujehofa lɛ íkwu fiyɛ oduudu ācɛ a. Babanya, Ujehofa yɔ i lé ɔcɛ́ o bu ipu Ɔyinɔnyilɔ ku nu nōo lé ka Ujisɔsi a, nōo klla wɛ Ɔcɛ́ ku Ajɔɔcɛ Ku Ɔwɔico a. Ɔwɔico nōo lɔfu fiyɛ duu a gē má ɔdā nɛ ɛjɛɛji ācɛ gē ya a. Ɔwɔico i kē gáā piya ɔcɛ tu gboogboo gla ŋ. Ɛgɔɔma nɛ Ujisɔsi nōo wɛ ɔyi ku nu a lɛ duu a.