1-2. Ɛgɛnyá nɛ ɔkpá ku Ɔ̄cokóītá 11:6 tɛɛma kwu uklɔ ku ɔna ō ta a?

IPU éwo ōhī, ācɛ alɛwa gē dɔɔka ō jé gɔɔbu eko duuma néē lɛ ɔkoolɔhi a po. Ohigbu ku ɔdā néē yɔ i dɔka a yɔ abɔ a! Amáŋ ipu éwo ōhī, ācɛ alɛwa i gē dɔka ō po ɛlā duuma, nōo lɛ ō ya mla Ɔwɔico amāŋ Ubáyíbu ŋ. Ɛgɛnyá nɛ ācɛ nōo yɔ ɔwɛ ɛga nɛ a gē tɔɔna a, gē ya eko duuma néē lɛ ɔkoolɔhi a po a? Ɛgɛ duuma nɛ ō ya ku uwa wɛ naana, Ujehofa dɔka ku alɔ yɔ i ceyitikwu yuklɔ ku ɔna ō ta kpɔ, jaa gbeeko nɛ ó ka uklɔ a ɔ jɛ ɛ.

² Ɔdaŋ ka eko ku Ujehofa le ya, uklɔ ku ɔna ō ta a géē wa oŋmɛyi, “cɛ́ɛ́ eko nɛ̄ ɛcɛ í mɛ ā le yá.” (Umát. 24:14, 36) Amáŋ gbɔbu lɛ eko ɔɔma a, ɛgɛnyá nɛ alɔ gáā lɛyitaajɛ lɛ ɛlā nōo kahinii: “Nyi īkpɔ́dɛ̄hɔ̄ kú uwɔ eko dóódu” a? *—Jé Ɔ̄cokóītá 11:6.

3. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Ikpɛyi ɛlā oklɔcɛ nōo gā yɛ a, mafu ɔdā ɛnɛ nɛ alɔ cɛgbá ō ya, o ya ɛɛ ku alɔ kwu “pīya ācɛ nēe í kwú ācɛ bɛ̄ɛka ɛ́gɛ́nɛ̄ ācɛ gē kwú ɛbéenyi ā.” (Umát. 4:19) Ikpɛyi ɛlā oklɔcɛ nyā géē kɛla lɛyikwu ɔdā ɛta nɛ alɔ géē ya, ku ɔtu caca ku alɔ lɛyikwu uklɔ ku ɔna ō ta a kóō lɔfu, naana nɛ alɔ kóō yɔ i má unwalu a. Alɔ géē nwu ɔdā nōo ya ɛɛ nɛ ó cɛgbá (1) ō lɛ uklɔ ku ɔna ō ta a ta aflɛyi ipu oyeeyi ku alɔ, (2) ō bēē lɔtule, mla (3) ō ya ku ɔtu okpoce ku alɔ kóō lɔfu a.

4. Ɔdiya ɛɛ nɛ alɔ cɛgbá ō je uklɔ nɛ Ujehofa je lɛ alɔ a ta aflɛyi a?

⁴ Ujisɔsi le da ayikpo ku nu taajɛ, lɛyikwu ɛgɛ nɛ uce ō ya  ku ācɛ géē lɛ mla aɔdā nōo géē ya ɛpleeko amoomɛ a. Ó jé ku aɔdā ɛgɛnyā lɔfu ya ku ayikpo ku nu kéē lɛ uklɔ ku ɔna ō ta a ta aflɛyi ipu oyeeyi ku uwa gɛ ŋ. Ó da ayikpo ku nu kéē “lɛ eyī kwɛcɛ.” (Umát. 24:42) Ɛpleeko ku Unowa a, ó lɛ aɔdā alɛwa nōo ya, nōo cɛ lɛ abɔ kóō hɛ uwa iye kéē jahɔ tu ukɔ́ nɛ Unowa yɔ i tu uwa a ŋ. (Umát. 24:37-39; 2 Upít. 2:5) Ɛnyā ya ɛɛ nɛ alɔ cɛgbá ō je uklɔ ku ɔna ō ta, nɛ Ujehofa je lɛ alɔ a ta aflɛyi a.

5. Ɛgɛnyá nɛ Úklɔ́ kú Ācotɛ̄hɔ̄ 1:6-8 mafu ɛgɛ nɛ uklɔ ku ɔna ō ta gáā nyila lɛ a?

⁵ Babanya nōó cɛgbá fiyɛ duu nɛ alɔ cika ō je uklɔ ku ɔna ō ta a tu aflɛyi ipu oyeeyi ku alɔ a. Ujisɔsi da ayikpo ku nu kéē géē yuklɔ ku ɔna ō ta nyā gā ɛga ō ligbo fiyɛ ɛnɛ ó ya eko nɛ ó yɔ ipu ɛcɛ a. (Ujɔ́n. 14:12) Eko nɛ Ujisɔsi gekwu a, ayikpo ku nu ōhī kwu cigbihi gā uklɔ ku ɛbeenyi ō kwu ku uwa kpɔ. Amāŋ eko nɛ Ujisɔsi kwu heyi ŋma ɔlekwu a, ó yuklɔ idaago oŋma lɛ ō ta ayikpo ku nu abɔ kéē lɛ ɛbeenyi kwu nɛɛnɛhi. Igbihi uklɔ idaago nyā, Ujisɔsi mafu lɛ ayikpo ku nu ɔdā nōo ya ɛɛ nɛ uklɔ ku ɔna ō ta mla ō lɛ ācɛ piya ayikpo ku Ukraist a cɛgbá fiyɛ uklɔ duuma ɔhá a. (Ujɔ́n. 21:15-17) Gbɔbu ɛɛ ku Ujisɔsi kóō gā ɔkpanco a, ó da ayikpo ku nu ka uklɔ ku ɔna ō ta nyā, géē nyila ŋma Isrɛlu gā oduudu ɛcɛ. (Jé Úklɔ́ kú Ācotɛ̄hɔ̄ 1:6-8.) Eko nɛ ihayi alɛwa le yɛ a, Ujisɔsi lɛ ɔdā nōo gáā ya “ɛ̄cī kú Óndú ā” mafu lɛ Ujɔni ɔyikpo ku nu.  * Éyi ku ɔdā nɛ Ujɔni má a, wɛ ɛbɛ ohidaago ku alelekwu otɛhɔ éyi nōo “bī olɛhɔ̄ kú ɔ̄kōolɔhi nōo ī mɛ ŋ́ mā wā gaá ka tɛ́ɛcɛ lɛ ācɛ,” ó wa gáā ka tɛɛcɛ lɛ ācɛ ku ipu ɛcɛ “kwú ɛjɛ̄ɛ̄jī ācɛ, mɛ́mla ipɔ́ɔ́ma, mɛ́mla ucē, mɛ́mla éwo.” (Mafú 1:10; 14:6) Ó teyi peee ku Ujehofa dɔka ku ɛjɛɛji alɔ, kóō lɛ abɔ ipu uklɔ ku ɔna ō ta nōo yɔ i gɔbu ipu oduudu ɛcɛ nyā a, jaa gbeeko nɛ Ujehofa ka ɔ jɛ ɛ.

6. Ɛgɛnyá nɛ alɔ gáā ceyitikwu lɛ uklɔ ku ɔna ō ta a, ta aflɛyi ipu oyeeyi ku alɔ a?

 ⁶ Alɔ géē yɔ i ceyitikwu yuklɔ ku ɔna ō ta a, ɔdaŋ ku alɔ gē gbɛla tu ɛjɛɛji ɔdā nɛ Ujehofa yɔ i ya, o ya ɛɛ kóō tu alɔ abɔ a. Ocabu mafu ó gē nwu alɔ ɛlā ku nu, o ŋma lɛ aɔkpá ku alɔ néē ya wɛɛcɛ, mla aɛnyā nōo yɔ ipu ɔdā ō le gwo uwaya ku alɔ, aɔkɛlā mla uvideo, mla JW Broadcasting duu! (Umát. 24:45-47) Ācɛ ipu ɛcɛ icɛ le kɔ igwiigwu, ohigbu ku ɔnyɔɔnyɛ ku uwa lɛ abɔ ipu ɔwɛ imeli éyi amāŋ ɔhá, ɔnyɔɔnyɛ lɛ ɔwɛ ō gba ɛ̄gbā ku nu, ācɛ ōhī klla lɛ aɔdā agbenu, ɛɛ nɛ ōhī ku ācɛ kē wɛ ogbɛha a. Naana a, ācɛ o gba Ujehofa ɛ̄gbā ipu oduudu ɛcɛ a, nōo fiyɛ umiliyɔn ahata a, yɔ tɔha bɛɛka apɔlɛ ekponu kpɔ. Ocabɔ mafu, ɛ̄cī ajuma nōo wɛ ɛ̄cī 19 ku Ɔya Ɔmɛnɛ ku 2019 a, Ācɛ Ocijali Ku Ujehofa ipu oduudu ɛcɛ a ya ɛ̄gbā ō gba ku ɔcɔɔci ku ɛ̄cī ɔɔma tɔha, ohigbu kéē má uvidio a tɔha. Ɔnɔɔnɛ ku ɛ̄cī ɔɔma, ɛwa nɛhi ku ācɛ bɛɛka 20,919,041 jila tɔha, kéē ya oblatu ku ikwū ku Ujisɔsi. Ō má ka ó wɛ ɔdā ojilima nɛhi ō wɛ, klla má ɛnɛɛnɛ aɔdā nyā yɔ i ya, géē ya ku alɔ kóō yɔ i yuklɔ ku ɔna ō ta a mla ɔtu caca tōōtɔ̄ɔ̄.

7. Ɛgɛnyá nɛ ocabɔ mafu ku Ujisɔsi gē tu alɔ abɔ, o ya ɛɛ ku alɔ ceyitikwu tɔɔna a?

⁷ Ɔwɛ ɔhá nɛ alɔ gáā ceyitikwu, lɛ uklɔ ku ɔna ō ta a ta aflɛyi ipu oyeeyi ku alɔ a, wɛ ō yɛce ocabɔ ku Ujisɔsi. Ó cɛ ku ɔdā duuma kóō ci ɔ ŋma ō tɔɔna ku ɔkoolɔhi a ŋ. (Ujɔ́n. 18:37) Ó cɛ ku Ebilii kóō lɛ ɔ plla, eko nɛ ó da ɔ ka anuɔ géē je “odúúdu aájɔ̄ɔ̄cɛ́ kú ɛcɛ mɛ́mla agbénú kú uwā” lɛ ɔ a ŋ, amāŋ cɛ kéē lɛ ɔ plla eko néē da ɔ ku aa géē je ɔ piya ɔcɛ́ a ŋ. (Umát. 4:8, 9; Ujɔ́n. 6:15) Ó cɛ ku ɔdā agbenu ku ɛcɛ nyā kóō lɛ ɔ plla ŋ, amāŋ cɛ ku ufi kóō gbɔɔ ō ya ɔ ohigbu ojama duuma nɛ ó gáā má a ŋ. (Ulúk. 9:58; Ujɔ́n. 8:59) Eko duuma nɛ alɔ yɔ i má ojama ohigbu ɔtu okpoce ku alɔ, alɔ ceyitikwu tɔɔna klla gbɛla lɛyikwu ukɔ́ nɛ ɔyikpo Upɔlu je lɛ Ācɛ O Yɛce Ukraist a. Ó da uwa kéē yɛce ocabɔ mafu ku Ujisɔsi o ya ɛɛ ku alɔ “cɛ̄ lɛ ɔtū kú [alɔ] gbagbafú, cɛ́ɛ́ ká [alɔ] kwúcē ŋ́”!—Uhíb. 12:3.

8. Ɔdi wɛ ɛyi ō lɔtule a, ɔdi ya ɛɛ nōó kē cɛgbá nɛɛnɛhi babanya a?

⁸ Ō lɔtule wɛ ō gbeyicii o ya ku āhɔ̄ éyi amāŋ ɔhá kóō le piyabɔ. Alɔ cɛgbá ō lɔtule ipu āhɔ̄ ɛyɛɛyɛyi. Alɔ lɔfu yɔ i dɔka ku āhɔ̄ obɔbi éyi kóō mɛ amāŋ yɔ i gbeeyi ɔdā olɔhi éyi gboji ɛ. Ɛgɔɔma nɛ ɔcomɛɛbɛ Uhabakuku leyice ku ācɛ ōhī nōo lā Ujuda a géē lɛ abɔ ci uce o bɔbi ku uwa a. (Uháb. 1:2) Ayikpo ku Ujisɔsi a kē leyice ku Ajɔɔcɛ a géē “wɛ̄ɛcɛ bóobū” gā hɛ uwa ta ŋma abɔ nɛ ācɛ Urom yɔ i le da uwa ɛyi taajɛ a. (Ulúk. 19:11) Alɔ a yɔ i leyice eko nɛ Ajɔɔcɛ ku Ɔwɔico géē ya, ku ɔdobɔbi kóō mɛ ŋma ipu ɛcɛ, cɛɛ ku ɛcɛ ɛyipɛ a kóō gā nɛ ɔdā okpaakpa géē yɔ i ya ipu nu a. (2 Upít. 3:13) Naana a, alɔ cɛgbá ō lɔtule klla gbeeyi eko nɛ Ujehofa je o ya ɛnyā a. Ku alɔ leyi yɛ ɔwɛ ōhī nɛ Ujehofa gē nwu alɔ o lɔtule a.

9. Aocabɔ mafu nyá cɛ lɛ alɔ jé ka Ujehofa lɛ ɔtoole a?

⁹ Ujehofa wɛ ɔcɛ nōo lɛ ocabɔ fiyɛ duu ku ɔtoole taajɛ lɛ alɔ a. Ó je eko lɛ Unowa nɛɛnɛhi o ya ɛɛ kóō lɛ ugbeenyi gwo, kóō klla “tɔ́ɔna kú ācɛ kéē yá ɔdā o kpaakpa” a. (2 Upít. 2:5; 1 Upít. 3:20) Ujehofa lɔtule klla yɔ i jahɔ, eko nɛ Ebraham yɔ i da ɔ ɔka igbalɛwa, ka ɔdi ya ɛɛ nɛ ó je o lɛ ācɛ ku Usɔdɔm mla Ugomora cataajɛ a. (Ohút. 18:20-33) Eko ikee a, Ujehofa mafu ɔtoole, lɛ éwo ku Isrɛlu nɛɛnɛhi. (Uneh. 9:30, 31) Alɔ klla má ku Ujehofa lɔtule jaa kwu icɛ, ohigbu eko nɛ ó le taajɛ lɛ ɛjɛɛji  ācɛ nɛ ó higwu a, o ya ɛɛ “ka odúúdú uwā kéē le pīyabɔ̄ ŋmá íne nēé bīya ā.” (2 Upít. 3:9; Ujɔ́n. 6:44; 1 Utím. 2:3, 4) Ɔtoole ku Ujehofa wɛ ɛnɛɛnɛ ocabɔ lɛ alɔ ō lɔtule, abɔ alɔ yɔ i tɔɔna klla yɔ i nwu ācɛ ɛlā a. Ujehofa klla bi aciije éyi nōo yɔ ipu Ubáyíbu a le nwu alɔ ɛgɛ nɛ alɔ géē lɔtule a.

10. Ɔdi nɛ ocabɔ ku ɔcɛ o hɛhɔ ipu ɔkpá ku Ujemisi 5:7, 8, nwu alɔ a?

¹⁰ Jé Ujɛ́mīsi 5:7, 8. Ocabɔ mafu ku ɔcɛ o hɛhɔ gē nwu alɔ ɛgɛ nɛ alɔ géē lɛ ɔtoole. Ɔkwɛyi, ɔdɛhɔ ōhī gē ya fiyaa. Amáŋ ōhī nōo gē gwa ikpo a, gē je eko nɛɛnɛhi gbɔbu ɛɛ kéē ya. Ō jɛ ku ɔdɛhɔ ɛgɛnyā ōhī ipu éwo ku Isrɛlu gē je eko bɛɛka Ɔya Ɛhili a, gbɔbu ɛ kóō ya. Ɔcɛ o hɛhɔ a géē nyi ikpɔdɛhɔ a eko nɛ ɔwɔ aflɛyi gaajɛ, ikpɔdɛhɔ a kē i ya eko nɛ ɔwɔ gbɔɔ ō mɛ ŋma ajɛ a. (Umák. 4:28) O wɛ ɔdā ijeeyi nɛhi, ɔdāŋ ku alɔ gbla ɔtoole ku ācɛ o hɛhɔ ya. Naana a, ɛnyā i wɛ ɔdā ō tɔɔtɛ ō ya ekoohi ŋ.

11. Ɛgɛnyá nɛ ō lɔtule gáā ta alɔ abɔ ipu uklɔ ku ɔna ō ta a?

¹¹ Alɔ alɛɛcɛ nōó jila iye ŋ ma, gē dɔka ō miyɛ ule amāŋ má itene ku uklɔ ku alɔ boobu. Naana a, ɔdaŋ ku alɔ dɔka ku ɔdɛhɔ ku alɔ kóō le ya ku alɔ le ce ŋma anu, alɔ cika ō teyi ta ɔ eko doodu. Alɔ cɛgbá ō lɛ ɛhɔ a hi, lɛ ikpɔdɛhɔ a nyi, ŋmo áci tu ɔ klla wu eŋkpɔ tu ɔ. Uklɔ ku ɔna ō ta a cɛgbá ō ceyitikwu lɔfu lɔfu lɛ a duu. Ó gē je eko o ya ku alɔ ta ācɛ nɛ alɔ yɔ i klɔcɛ ku Ubáyíbu mla uwa a abɔ, o ya kéē yihɔtu ācɛ klla leyi gwu ācɛ ɔhá bonu ŋ. Ɔdaŋ ku ācɛ ta ō jahɔ tu alɔ, ō lɔtule géē ta alɔ abɔ ku ɔtu ku alɔ kóō hii gbenyi ŋ. Ɔdaŋ ku ācɛ ta ō jahɔ klla nwu ɛlā ku Ubáyíbu nɛ alɔ gē da uwa a ŋ, alɔ gē lɔtule kpɔ. Alɔ i ya ku ācɛ nɛ alɔ gē klɔcɛ ku Ubáyíbu mla uwa a kéē lɛ ɔtu okpoce abɔfu gla ŋ. Ó lɛ ekoohi nōó je ayikpo ku Ujisɔsi eko ɛɛ kéē jɛyi ku ɛlā nɛ ó yɔ i nwu uwa a. (Ujɔ́n. 14:9) Alɔ bla, ku alɔ lɔfu tɔɔna klla nwu ācɛ ɛlā, amāŋ Ɔwɔico gē ta ācɛ abɔ kéē lɛ ɔtu okpoce a.—1 Ukɔ́r 3:6.

12. Ɛgɛnyá nɛ alɔ géē lɔtule eko nɛ alɔ yɔ i tɔɔna lɛ ācɛ apɔlɛ ku alɔ, néē wɛ Ācɛ Ocijali Ku Ujehofa ŋ ma?

 ¹² O lɔfu lɔnɔ tu alɔ ō lɔtule, eko duuma nɛ alɔ yɔ i tɔɔna lɛ ācɛ apɔlɛ ku alɔ néē wɛ Ācɛ Ocijali Ku Ujehofa ŋ ma. Ukɔ́ nōo yɔ ipu ɔkpá ku Ɔ̄cokóītá 3:1, 7 a, géē ta alɔ abɔ. Ó kahinii: “Eko kú ɔdā dóódu nēe yā ipú ɛcɛ nya ā yɔ̄. Eko nɛ̄ ɔ̄cɛ ī lɛ okónu klá cíí yɔ̄, eko nɛ̄ ɔ̄cɛ ī kɛlā kē yɔ̄.” Uce ō ya olɔhi ku alɔ lɔfu ta aɔmaapu alɔ abɔ kéē dɔka ō jahɔ tu ɛlā ku alɔ gla. O wɛ ɔɔma foofunu ŋ, alɔ klla cika ō le tutu eko doodu o da uwa lɛyikwu Ujehofa. (1 Upít. 3:1, 2) Ó cɛgbá ku alɔ tɔɔna mla ɔtu caca, amāŋ alɔ cika ō lɔtule lɛ ɛjɛɛji ācɛ, kwu ācɛ ku apɔlɛ ku alɔ duu.

13-14. Ocabɔ ku ɔtuoole nyá nɛ alɔ lɔfu gblaya a?

¹³ Alɔ lɔfu nwu ɛgɛ nɛ alɔ géē lɛ ɔtoole ŋma ocabɔ mafu ku ācɛ nōo hayi kpaakpa eko ikee mla abalɔbanya a. Uhabakuku leyice eko nɛ ɔbiipu géē mɛ a, amāŋ ó lɔtule anɔɔ ó kahinii: “N géē lɛ icō inɔ̄ɔda kú um ā tū, kú n̄ gbēyī.” (Uháb. 2:1) Ɔyikpo Upɔlu ka anuɔ dɔka ō lɛ uklɔ ku ɔna ō ta a “yá kwɛyí.” Naana a, ó lɔtule yɔ i “tɔ́ɔna kú Ɔ̄kōolɔhi” a gɔbu.—Ācot. 20:24.

¹⁴ Leyi yɛ ocabɔ ku ɔba mla ɔnyā éyi, nōo ya mɛ ŋma inɔkpa ku Ugilɛdi a. É tu uwa ɛhɔ gā éwo éyi nɛ Ācɛ Ocijali Ku Ujehofa i nwune abɔɔ ŋ, nɛ ɛyinɛhi ku ācɛ nōo yɔ abɔ a i kē wɛ Ācɛ O Yɛce Ukraist ŋ ma. Ācɛ nōo dɔka ō klɔcɛ ku Ubáyíbu ŋma ipu uwa a i nwune ŋ duudu. Amáŋ, aɔmpa uwa néē tɛhɔ gā éwo ɔhá a, yɔ i da uwa eko doodu ɛgɛ néē yɔ i tu ācɛ, néē yɔ i klɔcɛ mla uwa abɔ gā je piya Ācɛ O Yɛce Ukraist a. Ɔba mla ɔnyā a lɔtule ceyitikwu yɔ i tɔɔna kpɔ, naana nɛ ācɛ nōo yɔ ɔwɛ ɛga néē gē tɔɔna a i dɔka ō jahɔ ŋ ma. Igbihi néē lɛ ihayi ahata ya a, ācɛ nōo yɔ i jahɔ a i nwune ŋ kpɔ, igbihaajɛ é gbɔɔ ō gweeye ku ɔcɛ éyi, ŋma ipu ācɛ néē i klɔcɛ ku Ubáyíbu mla uwa a lɛ ubatisim ya. Ɔdi nɛ ocabɔ ku ikee mla aku icɛ nyā nwu alɔ a? Aocabɔ ku ācɛ nōo ba nyā mafu kéē ma ɔtu caca ku uwa ta amāŋ habɔ ō nyi ikpɔdɛhɔ ku uwa ta eko doodu ŋ, Ujehofa kē lɛ ɔhá hɛ ce uwa abɔɔ é lɔtule a. Alɔ ceyitikwu “gbla ācɛ nēe cɛ̄ɛ̄lā ā nēe klla lɔtūlé, anɔ́ɔ é mīyɛ ɔdā nɛ̄ Ɔwɔicō cokónu ō je lɛ uwá ā á.”—Uhíb. 6:10-12.

15. Ɔwɛ nyá nɛ ɔtu okpoce ku alɔ gē ya ku alɔ ceyitikwu tɔɔna a?

¹⁵ Alɔ kpɔtuce ɛlā nɛ alɔ gē tɔɔna a, ohigbu ɛnyā, alɔ dɔka ō da ācɛ alɛwa nɛ alɔ da uwa gla a. Alɔ kpɔtuce aokonu ō ce nōo yɔ ipu ɛlā Ɔwɔico a. (Aíjē 119:42; Ayis. 40:8) Alɔ yɔ i má akacɛ ku Ubáyíbu yɔ i ya jila icɛ. Alɔ klla má ɛgɛ nɛ oyeeyi ku ācɛ gē piyabɔ gā olɔhi, ɔdāŋ kéē gbɔɔ ō bi aukɔ́ ku Ubáyíbu le yuklɔ a. Ɛnyā gē cɛ lɛ alɔ jé kpɔcii ku ɔkoolɔhi ku Ajɔɔcɛ a wɛ ɔdā nɛ ɛjɛɛji ācɛ cika ō po.

16. Ɛgɛ nɛ ɔkpá ku Aíjē Kú Ɛ̄gbā 46:1-3 ka a, ɛgɛnyá nɛ ɔtu okpoce Ujehofa mla Ujisɔsi gē ya, ku alɔ ceyitikwu tɔɔna tōōtɔ̄ɔ̄ a?

¹⁶ Alɔ klla kpɔtuce Ujehofa, ɔcɛ nɛ alɔ gē tɔɔna lɛyikwu ɔ a, mla ɔyi nu Ujisɔsi nɛ Ujehofa je íkwu lɛ ɔ kóō wɛ ɔcɛ́ ku Ajɔɔcɛ ku Ɔwɔico a. (Ujɔ́n. 14:1) Ɛdɔ unwalu duuma nɛ alɔ yɔ i má, Ujehofa géē gbo alɔ klla gē je ɔfu lɛ alɔ. (Jé Aíjē Kú Ɛ̄gbā 46:1-3.) O ka tu ɔ, alɔ jé kpɔcii ka Ujisɔsi yɔ i leyi kwu uklɔ ku ɔna ō ta a ŋma ɔkpanco, ŋma lɛ ɔfu mla íkwu nɛ Ujehofa je lɛ ɔ a.—Umát. 28:18-20.

17. Je ocabɔ éyi nōo mafu ku alɔ i cika ō ma ō tɔɔna ŋ ma.

¹⁷ Ɔtu okpoce gē cɛ lɛ alɔ jé kpɔcii ku Ujehofa géē hɔha ce ō ceyitikwu ku alɔ, ekoohi  ɔwɛ nɛ alɔ i leyi ce ŋ. (Ɔ̄cok. 11:6) Ocabɔ mafu, ɛ̄cī doodu ɛwa nɛhi ku ācɛ gē má ukati, nɛ alɔ gē kpo aɔkpá ku alɔ tu ɔ a ɛga ɛyɛɛyi. Ɔwɛ ō tɔɔna nyā gē lɛ abɔ kwu ācɛ ɔtu? Ii gbo! Our Kingdom Ministry ku Ɔya Ɔmigwoleyi ku 2014 ka ó lɛ ɔyinɔnya éyi nōo yɔ inɔkpa nɛhi, nōo dɔka ō ta ɔkpá lɛyikwu Ācɛ Ocijali Ku Ujehofa. Ó dɔka Agbla Ku Ajɔɔcɛ amāŋ ó má oduuma ŋ, anɔɔ ó gáā lɛ utebulu néē kpo ɔkpá ku alɔ ce ɔ má ipu inɔkpa ku nu a, ó klla lɛ ɔkpá nōo kɛla lɛyikwu ɔdā nɛ ó dɔka ō ta a má. Igbihaajɛ, ó gáā lɛ ubatisim ya kwu piya Ɔcɛ Ocijali Ku Ujehofa, babanya ó wɛ ɔcɛ o gbɔbu ɔna ō ta eko doodu. Aocabɔ ɛgɛnyā gē ta alɔ ɔtu kwu ɔtu ku alɔ yɔ i tɔɔna, ohigbu kóō gē mafu ku ó lɛ ācɛ nōo cɛgbá ō po ɔkoolɔhi ku Ajɔɔcɛ a kpɔ ɛ.

18. Ɔdiya nɛ alɔ jé kpɔcii ku alɔ géē lɛ uklɔ ku ɔna ō ta a ya kwɛyi ɛgɛ nɛ Ujehofa dɔka a?

¹⁸ Alɔ jé kpɔcii ka uklɔ ku ɔna ō ta nyā géē mɛ eko okpaakpa a. Leyi yɛ ɔdā nōo ya eko ku Unowa a. Ujehofa mafu ka anuɔ gē ya odee eko kpaakpa. Bɛɛka ihayi 120 gbɔbu ku ɔwɔ kóō gbɔɔ a, Ujehofa lɛ ō miya ya taajɛ ɛgɛ nɛ ó gáā ya a. Abɔɔ ihayi alɛwa gā le yɛ a, Ujehofa da Unowa kóō lɛ ugbeenyi gba. Á jé ŋ gbɔbu lɛ ihayi 40 gā ihayi 50 gbɔbu ɛɛ ku Eŋkpɔ O Ceenyi a kóō ya a, Unowa ceyitikwu yuklɔ lɔfu lɔfu eko ɔɔma. Naana nɛ ācɛ i jahɔ tu ɔ ŋ ma, ó ceyitikwu yɔ i tɔɔna ku ahɔ̄ o pi a lɛ uwa kpɔ, jaa gbeeko nɛ Ujehofa da ɔ, kóō gbɔɔ ō bi aɛ́bɛ́ gā ipu ugbeenyi a mɛɛnɛ. Abɔ eko kpaakpa a gā a, “Ɔwɔicō lɛ ɔwɛ kú ɔwú ā gwū.”—Ohút. 6:3; 7:1, 2, 16.

19. Ɔdi nɛ alɔ leyice ɛcɔbu, ɔdaŋ ku alɔ yɔ i nyi ikpɔdɛhɔ ku alɔ eko doodu a?

¹⁹ O gboji gɛ ŋ Ujehofa géē da alɔ, ku uklɔ ku ɔna ō ta ku Ajɔɔcɛ a ɔ jɛ ɛ. Cɛɛ ó kwu Eblilii mɛmla ɛcɛ ku nu i cataajɛ, cɛɛ ó kwu Ajɔɔcɛ ku nu i bi wa, nɛ ācɛ o kpaakpa mla ācɛ o ta ɛyi waajɛ lɛ Ɔwɔico foofunu gáā yɔ anu a. Jaa gbeeko ɔɔma, alɔ ceyitikwu gbla Unowa, Uhabakuku mɛmla ācɛ ɔhá nōo ceyitikwu nyi ikpɔdɛhɔ ku uwa eko doodu a. Ku alɔ ceyitikwu yɔ i yuklɔ ku ɔna ō ta a, klla lɔtule, mla ō ya ku ɔtu okpoce Ujehofa mla aokonu ō ce ku nu kóō lɔfu tōōtɔ̄ɔ̄.