1. Eko nyá nōó lɔfu lɔnɔ tu alɔ ō gba Ujehofa ɛ̄gbā a?

EKO nyá nɛ a gbɛla kóō lɔfu lɔnɔ ō gba Ujehofa ɛ̄gbā fiyɛ duu a? Eko nɛ a yɔ i má unwalu ɛyɛɛyɛyi kɛɛ ka eko nɛ a yɔ ɛbɔ? Eko duuma nɛ alɔ yɔ i má unwalu, ó gē tɔɔtɛ lɛ alɔ ō lɛyitaajɛ lɛ Ujehofa fiyɛ. Amāŋ ɔdi nɛ alɔ gē ya eko duuma nɛ alɔ yɔ ɛbɔ a? Alɔ gē je mlanyi ku alɔ cika ō gba Ɔwɔico ɛ̄gbā a? Ujehofa pi ācɛ Isrɛlu ahɔ̄ ka ɛnyā lɔfu ya uwa gla.—Obla. 6:10-12.

2. Ɛnɛɛnɛ ocabɔ nyá nɛ Asa le taajɛ a?

² Asa nōo wɛ ɔcɛ́ a wɛ ɛnɛɛnɛ ocabɔ mafu ku ɔcɛ nōo ya ɛlā ipu ijeeyi, ŋma lɛ ō gbolo ce Ujehofa duudu. Ó gba Ujehofa ɛ̄gbā eko nɛ ó yɔ i má unwalu a foofunu ŋ, amáŋ eko nɛ ɛbɔ yɔ duu a. Ŋma eko ɔyipɛnɛŋcɛ ku nu, ó “lɛyítáajɛ lɛ Óndú ā klla ī yá ucē nōo ī he Óndú ā ɔtū ā kpaakpa odúúdú oyēeyī kú nū.” (1 Aɔ́cɛ́. 15:14) Asa mafu kóō lɛyitaajɛ lɛ Ɔwɔico ɛjɛɛji oyeeyi ku nu, eko nɛ ó lɛ ɛjɛɛji ɔwɛ ō gba ɛ̄gbā ɛkɛmgbɛ nōo yɔ Ujuda a cataajɛ a. Ubáyíbu kahinii: “Ó le ede kú ɛcí kú éwɔhá mɛ́mla íkpɛ́cí mɛ́mla aɔ́kpa nēé bu tāajɛ ā kpó ca bónū. Ó klla kwú ojibó kú Ássɛ̄ra, ɛcí nēé ma ā ú ca dúú.” (2 Úklɔ́ 14:3, 5) Ó kóō lɛ Umaaka ɛ́nɛ́ ɔnyakwɔcɛ ku nu fu, ŋma ɛnɛɛnɛ ɛga nɛ ó yɔ a. Ɔdiya? Ohigbu ku anu yɔ i ta ācɛ a ɔtu kwu ɔtu kéē gba aɔwɔ ɔhá ɛ̄gbā a.—1 Aɔ́cɛ́ 15:11-13.

3. Ɔdi nɛ alɔ gáā leyi yɛ ɔ ipu ikpɛyi ɛlā nyā a?

³ Asa i ca ikpɛci a taajɛ foofunu ŋ. Ó klla ta ācɛ ku Ujuda abɔ kéē gáā gbɔɔ ō gba Ujehofa ɛ̄gbā ɔwɛ okpaakpa kpɔ. Ujehofa lɛ ɔ̄hā hɛ ce Asa mla ācɛ ku Ujuda oŋma lɛ ō ya  kéē lɛ eko ku ɛbɔ. * Ihayi igwo ɛpleeko nɛ Asa wɛ ɔcɛ́ a, “ó kpɛ́fú mla ɔcɛ́ ɔhá dúúmā ŋ́.” (2 Úklɔ́ 14:1, 4, 6) Ipu ikpɛyi ɛlā nyā, alɔ géē kɛla lɛyikwu ɛgɛ nɛ Asa bi eko nɛ ɛbɔ yɔ ɔɔma le yuklɔ lɛ a. Bɛɛka Asa a, alɔ klla géē leyi yɛ ocabɔ mafu ku Ācɛ O Yɛce Ukraist eko igble, nōo bi eko nɛ ɛbɔ yɔ le yuklɔ lɔɔlɔhi a. Amoomɛ, alɔ géē cila ɔka nyā: Ɔdaŋ ku a lā ipu éwo nɛ igɔmɛnti ku abɔɔ jɛga lɛ Ācɛ Ocijali Ku Ujehofa kéē gba ɛ̄gbā ɛgɛ duuma nōo he uwa ɔtu, ɛgɛnyá nɛ a lɔfu bi eko ku ɛbɔ ɔɔma le yuklɔ ɔwɛ ijeeyi a?

4. Oŋma ɛlā nōo yɔ ipu ɔkpá ku 2 Úklɔ́ kú Aɔ́cɛ́ 14:2, 6, 7 a, ɛgɛnyá nɛ Asa bi eko ku ɛbɔ le yuklɔ a?

⁴ Jé 2 Úklɔ́ kú Aɔ́cɛ́ 14:2, 6, 7. Asa da ācɛ a ku Ujehofa wɛ ɔcɛ nōo “gē gbō [uwa] āyā dóódu á.” Asa i gbɛla ku eko ku ɛbɔ ɔɔma, i wɛ ō le jɔɔnyɛ oyeeyi foofunu ŋ. Ikɔkɔ ɔɔma, ó gbɔɔ ō gwo igeli, ɔdɔ, inɔɔda, mɛmla ɔdā néē géē bi le gwū igeli a. Ó da ācɛ ku Ujuda a kahinii: “Abɔ̄ kú alɔ bī ajɛ kú alɔ ícɛ.” Ɔdi wɛ ɛyi ɛlā ku Asa a? Ɔdā nōo wɛ ɛyi ɛlā ku nu a, wɛ ku aolɛla duuma i yɔ ipu ajɛ a nōo géē ci uwa, ŋma ō yɛ ipu aya doodu ku ajɛ a mla ō gwo igeli a ŋ. Ó ta ācɛ a ɔtu kwu ɔtu kéē bi eko ku ɛbɔ ɔɔma le yuklɔ lɔɔlɔhi.

5. Ɔdiya nɛ Asa lɛ ɔfu tu aicɔɔja ku nu iyē a?

⁵ Asa klla bi eko nɛ ɛbɔ yɔ ɔɔma lɛ ɔfu tu aicɔɔja ku nu iyē. (2 Úklɔ́ 14:8) Ɔɔma wɛ ku ó kpɔtuce Ujehofa ŋ nɛɛ? Ehee. Asa jé ku ó wɛ uklɔ ku nu ō lɛ ācɛ a tutu ku unwalu néē lɔfu má ɛcɔbu a. Asa jé ku eko ku ɛbɔ nɛ ācɛ Ujuda yɔ i jɔɔnyɛ nu a i gáā yɔ piyoo ŋ, ɛlā nyā kē wɛ ɔkwɛyi.

6. Ɛgɛnyá nɛ Ācɛ O Yɛce Ukraist ku eko igble a yuklɔ eko nɛ ɛbɔ yɔ a?

⁶ Naana néē ya Ācɛ O Yɛce Ukraist eko igble owe ojigogo a, é jɔɔnyɛ eko ku ɛbɔ duu. Ɔdi néē ya ɛpleeko ɔɔma a? Acɛnyilɔ mla acɛnya nōo hayi kpaakpa eko ɔɔma i cɛ lɛ ɛ̄jɛ̄ je uwa ŋ, é tɔɔna ku ɔkoolɔhi a. Ɛlā nōo yɔ ipu ɔkpá ku Úklɔ́ kú Ācotɛ̄hɔ̄ a kahinii: “É yēeyī ipú ufi kú Óndú ā.” É ceyitikwu yɔ i tɔɔna ku ɔkoolɔhi a, ohigbu ɛnyā, “é le nyīla.” Ó lɛ aafu ŋ, Ujehofa lɛ ɔ̄hā hɛ ce ɔtu caca néē lɛ ō tɔɔna eko nɛ ɛbɔ yɔ a.—Ācot. 9:26-31.

7-8. Ɔdi nɛ Upɔlu mla ācɛ ɔhá ya eko néē lɛ ɛnɛɛnɛ ɛga a? Je ocabɔ mafu éyi.

⁷ Ācɛ O Yɛce Ukraist ku eko igble a bi ɛga duuma néē lɛ a le tɔɔna ku ɔkoolɔhi a. Ocabɔ mafu, eko nɛ Upɔlu má kóō lɔfu tɔɔna lɛ ācɛ alɛwa nōo yɔ Ɛfɛsɔsi a, ó yɔ igeli a gbɔɔ ō tɔɔna ku ɔkoolɔhi a abɔɔ.—1 Ukɔ́r. 16:8, 9.

⁸ Upɔlu mla acocɛhɔ ɔhá lɛ ɛga ō tɔɔna lɛ ācɛ alɛwa. Ihayi ku 49 Eko Ku Ukraist a, acocɛhɔ mla anyakwɔcɛ nōo yɔ Ujerusalɛm a lɛ ōmiya ya lɛyikwu api ō hɛ. (Ācot. 15:23-29) Igbihi nɛ Upɔlu mla ācɛ ɔhá le da ayinɛ a lɛyikwu ōmiya nyā a, ɛjɛɛji uwa ceyitikwu kéē “kɛlā kú Óndú ā lɛ ācɛ” lɔfu lɔfu. (Ācot. 15:30-35) Ɔdā olɔhi nyá bɛɛcɛ a? Ubáyíbu kahinii: “É lɔfú tū ācɛ ā iyē kéē cɛ̄ɛ̄lā a lɔɔlɔhi, anɔ́ɔ áluka kú ācɛ nēe ī cɛ̄lɔ̄ɔwɔicō gē lɛwa tōōtɔ̄ɔ̄ ɛ̄cī dóódu á.”—Ācot. 16:4, 5.

9. Ɔdi wɛ āhɔ̄ ku éwo alɛwa icɛ a, ɔka nyá nɛ alɔ kē cika ō da iyi alɔ a?

⁹ Ipu éwo alɛwa icɛ, é gē junwalu lɛ alɔ abɔ alɔ gē tɔɔna a ŋ. A lā ipu ɛdɔ éwo ɛgɛnyā? Ó lɛ a, da iyi uwɔ ɔka nyā, ‘Ɛgɛnyá nɛ um yɔ i bi ɛga nɛ um lɛ nyā le yuklɔ a?’ Ó wɛ eeye lɛ ācɛ o gba Ujehofa ɛ̄gbā kéē yɔ eko amoomɛ, ohigbu ku é yɔ i yuklɔ ku ɔna ō ta nɛ ɛdɔ ku nu i ya ipu ɛcɛ nyā jeeje ɛ ma. (Umák. 13:10) Ó lɛ aɔdā alɛwa nɛ alɔ lɔfu ya ipu uklɔ nyā duu.

10. Ɔdi nɛ ɔkpá ku 2 Utímōti 4:2 tu alɔ ɔtu kwu ɔtu ku alɔ ya a?

¹⁰ Ɛgɛnyá nɛ a gáā bi eko nɛ ɛbɔ yɔ a le yuklɔ lɔɔlɔhi a? (Jé 2 Utímōti 4:2.) A lɔfu leyi yɛ āhɔ̄ ku uwɔ amāŋ ɔcɛ apɔlɛ ku uwɔ duuma, ɔdāŋ kóō ya opiyabɔ o ya ɛɛ kóō ya nwune ipu uklɔ ku ɔna ō ta a, a jé ŋ, ō kwu piya ɔcɛ ō gbɔbu ɔna ō ta a? Alɔ i cika ō gbɛlá ō lɛ aɔdā agbenu nɛhi babanya gɛ ŋ, ohigbu ku ɔdā nɛ alɔ lɛ a i gáā behe eko ku owe nɛhi a gla ŋ.—Aíit. 11:4; Umát. 6:31-33; 1 Ujɔ́n. 2:15-17.

11. Ɔdi nɛ ācɛ ōhī ya, o ya ɛɛ kóō tɔɔtɛ lɛ uwa o tu ācɛ ɔhá abɔ kéē gáā lɛ ɔkwɛyi a jé a?

¹¹ Ācɛ o tɔɔna ɛlā Ɔwɔico alɛwa icɛ gē nwu uce ɛyɛɛyɛyi o ya ɛɛ kéē tu ācɛ ɔhá abɔ gā lɛ Ujehofa jé. Ɔwa ku Ujehofa klla ya aɔdā alɛwa tɔɔtɛ lɛ alɔ icɛ, o ya ɛɛ kóō tu alɔ abɔ tɔɔna ipu uce ɛyɛɛyɛyi. Ocabɔ mafu, ihayi ku 2010, aɔkpá ku alɔ yɔ ipu uce bɛɛka ula ce ofu ɛhɔ (500). Amáŋ icɛ, aɔkpá ku alɔ yɔ ipu uce nōo fiyɛ ula ɛpa ce ofu igwo (1,000)!

12. Ɛgɛnyá nɛ ācɛ alɛwa lɛ abahi, ŋma ō po ɔkoolɔhi a ipu uce ku uwa a? Lɛ ocabɔ mafu éyi da alɔ.

¹² Ɛgɛnyá nɛ ɔtu gē ya ācɛ lɛ, eko duuma néē yɔ i nwu ɛlā lɛyikwu Ujehofa ipu uce ku uwa a? Ku alɔ má ocabɔ mafu ku ɔyinɛ alɔ éyi nōo gā ojileyi nɛhi ku alɔ Umemphis, Tennessee, U.S.A. a. É ya ojileyi a ipu uce ku Uknyarwanda, néē gē ka ipu éwo ku Rwanda, Congo (Kinshasa), mla Uganda a. Eko néē lɛ ojileyi nɛhi a ya kwɛyi a, ɔyinɛ alɔ nɔnyā nōo gā ojileyi a  ipu uce ku nu nōo wɛ Ukinyarwanda a kahinii: “Ŋmifi ihayi 17 nɛ um wa United States a, ɛnyā wɛ ojileyi nɛhi aflɛyi nɛ um jɛyi ku ɛjɛɛji odee néē ya ipu ojileyi a.” Ó teyi peee, kóō lɛ abɔ kwu ɔyinɛ alɔ nɔnya ɔtu nɛɛnɛhi eko nɛ ó yɔ i po ɛlā a ipu uce ku nu a. Ɔdaŋ ku āhɔ̄ ku uwɔ je ɛga gā uwɔ, alɔ lɔfu nwu uce ɛpɛɛpɛ gla, o ya ɛɛ ku a tu ācɛ nōo yɔ ɔwɛ ɛga nɛ a gē tɔɔna a abɔ? Ɛnyā géē lɔhi fiyɛ ɔdāŋ ku ɔwɛ ɛga nɛ gē tɔɔna a, ó gē he ācɛ ɔtu ō ka uce ɔhá. O ceyitikwu ku uwɔ géē cɛ gā uwɔ gweeye.

13. Ɛgɛnyá nɛ ayinɛ alɔ nōo yɔ Urussia a, bi eko nɛ ɛbɔ yɔ lɛ uwa a le yuklɔ ɔwɛ olɔhi a?

¹³ Ó wɛ ɛjɛɛji ayinɛ alɔ nōó tɔɔtɛ lɛ uwa ō tɔɔna ŋma ɔlɛ gā ɔlɛ a ŋ. Ipu éwo nɛ igɔmɛnti lɛ uklɔ ku alɔ ci, ó gē tɔɔtɛ lɛ ayinɛ alɔ kéē tɔɔna ŋma ɔlɛ gā ɔlɛ gɛ ŋ. Ocabɔ mafu, leyi yɛ ayinɛ alɔ nōo yɔ Urussia a. É ya ayinɛ alɔ ŋmo ihayi alɛwa, amáŋ Ɔya Ɔmɛta ku ihayi ku 1991 igɔmɛnti lɛ ɛga je lɛ uwa kē gbɔɔ ō gba ɛ̄gbā. Eko ɔɔma a, Ācɛ Ocijali Ku Ujehofa nōo yɔ Urussia a lɛ bɛɛka 16,000 a. Igbihi nɛ ihayi ofu gā le yɛ a, aluka ku uwa kwu nwune nɛɛnɛhi fiyɛ 160,000! Ó ta eyī peee, ku ayinɛ alɔ yuklɔ ɔwɛ ijeeyi eko néē lɛ ɛga ō tɔɔna ŋma ɔlɛ gā ɔlɛ a. Eko ku ɛbɔ ɔɔma i gboji ŋ. Amáŋ naana nɛ ɛjɛɛji odee kwu piyabɔ ipu éwo ɔɔma a, é lɛ ɔtu caca lɛ Ujehofa kpɔ. É yɔ i ceyitikwu ya ɔdā duuma néē ya gla a, o ya ɛɛ kéē gba Ujehofa ɛ̄gbā.

14-15. Ɛgɛnyá nɛ Ujehofa bi ɔfu ku nu le ta Asa abɔ a?

¹⁴ Ɛpleeko ku Asa a, eko ku ɛbɔ a gáā mɛ igbihaajɛ. Aicɔɔja alɛwa nōo fiyɛ umiliyɔn éyi gā ŋma ajɛ ku Itiyopiya. Otrɛyi ku uwa Usɛra jé kpɔcii ku anu mla aicɔɔja  ku nu lɔfu ya ācɛ ku Ujuda lé. Amáŋ, Asa nōo wɛ ɔcɛ́ a i kpɔtuce aluka ku aicɔɔja nɛ ó lɛ a ŋ, amáŋ ó kpɔtuce Ujehofa. Asa gbɔɔkɔ kahinii: “Tá alɔ abɔ̄ abālɔbányā, Óndú, Ɔwɔicō kú alɔ, ohígbū ka alɔ lɔtūce uwɔ. Iyē kú uwɔ nɛ̄ alɔ bī wā gáā kpɛ́fú tá aícɔɔja o lɛwa nɛ̄hi nyā má.”—2 Úklɔ́ 14:11.

¹⁵ Aicɔɔja ku Itiyopiya fiyɛ aicɔɔja nɛ Asa lɛ a ɛga ɛpa, amáŋ Asa jé ku Ujehofa wɛ ɔcɛ nōo lɔfu nɛhi klla gē je otabɔ lɛ ācɛ ɔlɛ nu a. Ujehofa i kē je uwa abɔ gaajɛ ŋ, é lɛ aicɔɔja ku Itiyopiya a yale.—2 Úklɔ́ 14:8-13.

16. Ɛgɛnyá nɛ alɔ jé ku eko nɛ ɛbɔ yɔ a i gáā yɔ piyoo ŋ ma?

¹⁶ Alɔ i jé ɔdā okpɔcii nōo gáā ya da ɔnyɔɔnyɛ ku alɔ ɛcɔbu a ŋ, amáŋ alɔ jé ku ɛbɔ nɛ ācɛ ō gba Ujehofa ɛ̄gbā yɔ i jɔɔnyɛ nu babanya a i gáā yɔ piyoo ŋ. Bla ka Ujisɔsi le ka taajɛ ku eko amoomɛ a, “odúúdú ācɛ í wɔ́tū” ayikpo ku nu. (Umát. 24:9) Upɔlu nōo wɛ ɔcocɛhɔ a klla kahinii: “É géē yá ɛjɛ̄ɛ̄jī ācɛ nēe dɔɔ̄kā o lā oyēeyī olɔhi kú ācɔ̄lóhɔ́nyɛtá ipú opīyatɔ̄há mla Ohɔ́nyɛtá Ujísɔ̄si ā ōwē piíí.” (2 Utím. 3:12) Ebilii yɔ i “cɔ̄nū nɛ̄hi.” Ɔdaŋ ku alɔ gbɛla ku icɔnu ku nu i gáā lɛ abɔ kwu alɔ iyē ŋ, ayika alɔ yɔ i plla iyi alɔ.—Mafú 12:12.

17. Aɔwɛ nyá néē gáā lɔfu je ɔtu okpoce ku alɔ ma a?

¹⁷ Ó gáā gboji gɛ ŋ, ɛjɛɛji alɔ géē má ojama nōo géē je ɔtu okpoce ku alɔ ma. “Ōwē nɛ̄hi géē yɔ̄ nɛ̄ ɛdɔ nū í yɔ̄ jéjéē ɛ́ɛ́ ŋ́, ŋmá eko nɛ̄ ɛcɛ gbɔɔ́ ā jāā kwu abālɔbányā.” (Umát. 24:21) Ɛpleeko ɔɔma, ācɛ apɔlɛ ku alɔ lɔfu lɛ igbihi ce kwu alɔ. Igɔmɛnti lɔfu lɛ abɔ ci uklɔ ku alɔ duu. (Umát. 10:35, 36) Bɛɛka Asa a, ɔnyɔɔnyɛ ku alɔ géē kpɔtuce ka Ujehofa géē ta alɔ abɔ klla géē gbo alɔ?

18. Oŋma ɛlā nōo yɔ ipu ɔkpá ku Ācɛ Uhíbru 10:38, 39 a, ɔdi gáā ta alɔ abɔ ō lɛ iyi alɔ tutu gbɔbu lɛ eko ku owe a?

¹⁸ Ohigbu ɔdā nōo gáā ya ɛcɔbu a Ujehofa yɔ i ta alɔ tu babanya ku ɔtu okpoce ku alɔ kóō lɔfu. Ó yɔ i bi “ɔ̄cocɛ̄hɔ̄ nēe cíkā ō lɛ ɔtū ce ɔ, nōo jéeyī” a le yuklɔ kóō je ‘ɔdōlé lɛ alɔ teeko’ o ya ɛɛ kóō tu alɔ abɔ hayi kpaakpa ipu ɛ̄gbā ō gba ku  alɔ. (Umát. 24:45) Amáŋ ɛjɛɛji alɔ cika ō ya ɔdā duuma nɛ alɔ ya gla, o ya ɛɛ ku alɔ lɛ ɔtu okpoce olɔfu lɛ Ujehofa.—Jé Ācɛ Uhíbru 10:38, 39.

19-20. Oŋma ɛlā nōo yɔ ipu ɔkpá ku 1 Úklɔ́ kú Aɔ́cɛ́ 28:9 a, aɔka nyá nɛ alɔ cika ō da iyi alɔ a, ɔdiya nɛ alɔ kē cika ō da aɔka ɔɔma a?

¹⁹ Bɛɛka Asa nōo wɛ ɔcɛ́ a, alɔ cɛgbá ō “yá ɔdā nōo wɛ ɔtū kú Óndú ā.” (2 Úklɔ́. 14:4; 15:1, 2) Alɔ gē gbɔɔ ō ya ɔdā nōo wɛ ɔtu ku Ujehofa a, ŋma eko nɛ alɔ gbɔɔ ō nwu odee lɛyikwu ɔ klla lɛ ubatisim ya. Alɔ ya ɔdā duuma nɛ alɔ ya gla a, ku ɔtu okpoce ku alɔ lɛ Ujehofa kóō lɔfu iyē. Ó ya ɛɛ ku alɔ má ɛgɛ nɛ alɔ yɔ i ya lɔhi ipu aya nyā a, alɔ cika ō da iyi alɔ ɔka nyā: ‘N gē gā ōjila ku ujɔ ojigogo?’ Ipu ōjila ku ujɔ, alɔ gē po ɛlā nōo gē lɛ ɔfu tu alɔ iyē ō bēē gba Ujehofa ɛ̄gbā gɔbu, alɔ klla gē lɛ ɔtu ō tu kwu ɔtu ŋma ɛgiyi ayinɛ alɔ. (Umát. 11:28) Alɔ klla lɔfu da iyi alɔ ɔka kahinii: ‘N gē klɔcɛ ku Ubáyíbu eko doodu?’ Ɔdāŋ ku a lā mla apɔlɛ ku uwɔ, a gē lɛ eko taajɛ ipu alaadi doodu gē ya ɛ̄gbā ō gba ku apɔlɛ? Amāŋ ɔdaŋ ku a lā foofu uwɔ, a gē lɛ eko taajɛ bɛɛka a yɔ ipu apɔlɛ ku uwɔ a? A gē ya ɔdā duuma nɛ a ya gla, o ya ɛɛ ku a tɔɔna klla nwu ācɛ ɛlā Ɔwɔico?

²⁰ Ɔdiya nɛ alɔ cika ō da iyi alɔ aɔka nōo ba nyā a? Ubáyíbu da alɔ ka Ujehofa gē leyi yɛ ɛlá nɛ alɔ gē gbo, mla ɔdā nōo yɔ ipu ɔtu ku alɔ a, alɔ kē cika ō ya lɛ a duu. (Jé 1 Úklɔ́ kú Aɔ́cɛ́ 28:9.) Ɔdaŋ ku alɔ má ku alɔ cɛgbá ō ya opiyabɔ ōhī lɛyikwu ɔdā nɛ alɔ miya ō ya, uce ō ya ku alɔ, amāŋ ɛlá ō gbo ku alɔ, alɔ cika ō gbɔɔkɔ lɛ Ujehofa kóō ta alɔ abɔ ya opiyabɔ ɔɔma. Babanya wɛ eko nɛ alɔ cika ō lɛ iyi alɔ tutu ku ojama, nɛ alɔ gáā má ɛcɔbu a. Ɔdā duuma kóō ci uwɔ ŋma ō bi eko nɛ ɛbɔ yɔ a le yuklɔ ɔwɛ ku ijeeyi ŋ!