IPU Ubáyíbu, alɔ gē jé ɛlā ku ‘ācɛ ɔlamu bɛ̄ɛka alɔ ā’ nōo gē lɛ abɔ kwu alɔ ɔtu. (Ujɛ́m. 5:17) Alɔ lɔfu jɛyi ɛlā ku Upɔlu nōo yɔ ipu ɔkpá ku Ācɛ Uróm 7:21-24 nōo kahinii: “Eko nɛ̄ n dɔɔ̄kā ō yá ɔdā olɔhi nɛɛ, ɔdōbɔ̄bí ā gē yɔ̄ kwu um ajaajɛ ō yá á. . . . N gebí ɛɛ́!” Eko duuma nɛ alɔ gē nya mla inyileyi ku alɔ, ɛlā nyā géē ta alɔ ɔtu kwu ɔtu ō jé ka ɔcɛ ō hayi kpaakpa bɛɛka Upɔlu a lɛ ɛdɔ unwalu ɛgɔɔma duu.

Ó lɛ ɔdā ɔhá kpɔ nɛ Upɔlu má nɛ ó kɛla lɛyikwu ɔ. Ipu ɔkpá ku Ācɛ Ugalésīya 2:20, abɔɔ a, ó kɛla lɛyikwu ɛgɛ nɛ ó kpɔtuce ka Ujisɔsi “yíihɔtū [nu] klla cɛ̄ gekwú o yá ɛ́ɛ́ kóō lɛ [ɔ] nyatá a.” Ó gē ya uwɔ lɛ a ŋ nɛɛ? Ó lɔfu ya uwɔ lɛ a ekoohi.

Ɔdaŋ ka ɔtu gē biya lɛ alɔ, ohigbu íne nɛ alɔ tɛtɛ biya a, ó gáā tɔɔtɛ lɛ alɔ ō kpɔtuce ka Ujehofa yihɔtu alɔ, ku ó klla kwu ya alɔ ɛhi ɛ ŋ. Ó géē lɔnɔ ta alɔ ō cɛ ka ikwū ku Ujisɔsi wɛ ɛhi lɛ eyeeye ku alɔ. Ujisɔsi dɔka ku alɔ má ikwū ku nu bɛɛka ɛhi nɛɛ? Ó lɛ a, ɔdi gáā ta alɔ abɔ ku alɔ má ɔ ɔwɛ ɛgɔɔma a? Alɔ leyi yɛ aɔka ɛpa ɔɔma.

Aku ɔkwɛyi a, Ujisɔsi dɔka ku alɔ má ikwū ku nu ka ó wɛ ɛhi lɛ eyeeye ku alɔ. Ɛgɛnyá nɛ alɔ jé a? Gbɛla lɛyikwu ɛlā nyā nōo yɔ ipu ɔkpá ku Ulúk. 23:39-43 ɛ. É lɛ adā éyi hɛ ba ɔcí pi Ujisɔsi. Adā a cɛ peee ka anuɔ lɛ ɔdobɔbi ya ɛ. Ɔdā nɛ ó ya a bɔbi nɛhi, ohigbu ka ācɛ nōo gē ya ɔdobɔbi nɛhi néē gē ŋmo ba ɔcí á. Ɔtu gbɔɔ ō junwalu lɛ adā a nɛɛnɛhi, anu ó gbɔɔkɔ lɛ Ujisɔsi kahinii: “Gbɛlá kwú um, Ujísɔ̄si, eko nɛ̄ a géē wā í cɔcɛ́ ā!”

Ɔdi nɛ Ujisɔsi ya a? Gbɛla lɛyikwu ɛdɔ ɔnɔ nɛ Ujisɔsi yɔ i má, eko nɛ ó piyeyi kwu adā a. Ipu ɔnɔ nɛhi nyā, ó ceyitikwu lɛ ɛhɛ yɛ anu nɛ ó da adā a kahinii: ‘Ɔkwɛyi, n da uwɔ icɛ, a géē yɔ mla am ipu uparadais.’ Ó géē yɛ i tɔɔtɛ lɛ Ujisɔsi kóō ta adā a ɛlá kwu ɔ ka “Ɔyínɔ̄nyīlɔ kú Ɔ̄cɛ . . . wā . . . kóō kē je oyēeyī kú nū bɛ̄ɛka ɔdā o le ōfūla ācɛ alɛwa ā.” (Umát. 20:28) Amáŋ, ikɔkɔ ɔɔma, ó bi ɔkɔ ō gbonɛnɛ le mafu lɛ adā a ɛgɛ nɛ ikwū ku nu géē tiile lɛ ɔ a. Ó gbonɛnɛ lɛ adā nɛhi, ó klla bi ɛlā bɛɛka “a” mɛmla “am” a le kɛla lɛ ɔ. Ó kē da adā a ka ó géē lā ipu uparadais ipu ɛcɛ nyā.

Ó lɛ aafu ŋ, Ujisɔsi dɔka ku adā a kóō jé ku ikwū ku nu, géē tiile lɛ anu abɔyi nu. Ɔdaŋ ka ɛlā ka ɔcɛ nōo wɛ uwi, nōó kóō lɛ ɛga ō gba Ɔwɔico ɛ̄gbā ŋ ma lɛ abɔ kwu Ujisɔsi ɔtu lɛ a, á gbɛla ka aku ɔcɛ nōo gē gba Ɔwɔico ɛ̄gbā, nōo lɛ ubatisim ya ɛ ma géē lɛ abɔ kwu ɔ ɔtu fiyɛ ŋ? Ɔdi gáā ta alɔ abɔ ku alɔ kpɔtuce ka ikwū ku Ujisɔsi géē tiile lɛ eyeeye ku alɔ, naana nɛ alɔ lɛ ɔdobɔbi ya gbɔbu ɛ ma?

Ó gáā ta Upɔlu eyī peee ka Ujisɔsi kwū lɛ anuɔ, ohigbu uklɔ nɛ Ujisɔsi je lɛ ɔ kóō tɔɔna a. Ɛgɛnyā a? Upɔlu kahinii: “N tá Ohɔ́nyɛtá Ujísɔ̄si Óndú alɔ ahínyá, anú nōo je ɔfú gā um kú um yúklɔ́ kú um ā. N tá ɔ̄ ahínyá  ohígbū ka ó lɛ um fu ka n cíkā ō cɛ̄ ɔ̄ ɛhɔ̄. Nááná nɛ̄ n tɛtɛ gē ka obɔ̄bí kú nū, yá ɔ̄ ōwē nɛ̄ɛ̄nɛ̄hi klla kōō cá ɔ̄ ɛcá bɔ̄bíbɔ̄bí dúú” a. (1 Utím. 1:12-14) Uklɔ nɛ Ujisɔsi je lɛ Upɔlu kóō tɔɔna, naana nɛ ó ya ɔdobɔbi alɛwa gbɔbu a, mafu lɛ Upɔlu ka Ujisɔsi meyinyinyi nu, ó yihɔtu nu klla kpɔtuce ɔ. Icɛ, Ujisɔsi lɛ uklɔ ō nyɔ gáā tɔɔna ku ɔkoolɔhi a je lɛ ɔnyɔɔnyɛ ku alɔ. (Umát. 28:19, 20) Uklɔ a géē ta alɔ abɔ ku alɔ má peee ka Ujisɔsi kwū ohigbu alɔ duu?

Albert néē je taajɛ ŋma ipu ujɔ ihayi ofu ce igwo ɛnɛ (34), nōó gboji nɛ ó je cigbihi wa ipu ujɔ ɛ ŋ ma kahinii: “Ɛlá ku um gē kwu aɔdobɔbi nɛ um ya a eko doodu. Amáŋ eko duuma nɛ um gē tɔɔna, ɔtu gē ya um bɛɛka Upɔlu a, Ujisɔsi lɛ uklɔ ō nyɔ i tɔɔna a je gā um ka n ya. Ɛlā ɔɔma gē cɛ gā um gweeye, ó klla gē cɛ gā um má iyi um, oyeeyi ku um, mla ɛcɔbu ku um ɔwɛ olɔhi.”—Aíjē 51:3.

Gbɔbu ɛɛ ku Allan kóō gáā nwu ɛlā ɔkwɛyi a, ó tɛtɛ gē ya ɔdobɔbi alɛwa, ó kahinii: “Jaa kwu icɛ, n gē gbɛla lɛyikwu aɔdobɔbi nɛ um ya ācɛ a. Ekoohi, ó gē cɛ lɛ abɔ hɛ um iyē. Amáŋ n ta Ujehofa ahinya ɛgɛ nɛ ó jɛga lɛ ɔcɛ ō biye íne bɛɛka ami, ō nyɔ i da ācɛ ɔhá lɛyikwu ɔkoolɔhi a. Eko duuma nɛ um má ɛgɛ nɛ ācɛ gē po ɔkoolɔhi a, ó gē tu ɛlá kwu ɛgɛ nɛ Ujehofa lɔhi klla yihɔtu alɔ nɛhi a. N yɔ i má ka Ujehofa yɔ i bi um le je otabɔ lɛ ācɛ ɔhá nōo lɛ ɔdobɔbi ya ɛ ma.”

Eko duuma nɛ alɔ gē tɔɔna, alɔ gē ya ɔdā olɔhi klla gē gbɛla ɔdā olɔhi. Ó gē mafu ɛgɛ nɛ Ujisɔsi meyinyinyi alɔ, yihɔtu alɔ klla kpɔtuce alɔ a.

Ɔtu ku alɔ gē yɔ i ŋmo alɔ ɛpɔbi lɛyikwu aɔdobɔbi nɛ alɔ tɛtɛ ya a, jaa gbeeko néē géē wa i lɛ ɛcɛ obɔbi ku Ebilii nyā cataajɛ. Ɔdaŋ ka ɔtu ku alɔ gbɔɔ ō ŋmo alɔ ɛpɔbi, ɔdi gáā ta alɔ abɔ a?

Jean ɔcɛ éyi nɛ ɔtu gē ŋmo ɔ ɛpɔbi ohigbu oyeeyi ɛpa nɛ ó lā eko nɛ ó wɛ ɔyipɔnɔnya a kahinii: “Ɔtu ku um gē gbo nɛɛ, ō jé ka Ɔwɔico nwune fiyɛ ɔtu ku alɔ.” (1 Ujɔ́n. 3:19, 20) Bɛɛka Ujean a, ɔtu ku alɔ géē gbo nɛɛ, ɔdaŋ ku alɔ jé ka Ujehofa mla Ujisɔsi jé ku alɔ wɛ ācɛ ō biya íne. A hii mlanyi nóó, Ujehofa i ta Ujisɔsi ɛhɔ kóō gáā kwū ohigbu ācɛ nōo jila iyē ŋ, amáŋ, ó kwū ohigbu ācɛ nōó jila iyē ŋ nōo le piyabɔ ɛ ma.—1 Utím. 1:15.

Alɔ géē wa i kpɔtuce ka Ujisɔsi kwū lɛ eyeeye ku alɔ, ɔdaŋ ku alɔ gē gbɔɔkɔ klla gē gbɛla tu ɛgɛ nɛ Ujisɔsi ya mla ācɛ nōó jila iyē ŋ ma, mla ɔdaŋ ku alɔ gē ya ɔdā duuma nɛ alɔ ya gla, o ya ɛɛ ku alɔ yuklɔ ku ɔna ō ta nɛ Ujisɔsi je lɛ alɔ a. Ɔdaŋ ku alɔ gē ya lɛ a, alɔ géē lɔfu kɛla bɛɛka Upɔlu nōo kahinii: Ujisɔsi “yíihɔtū tá um klla cɛ̄ gekwú o yá ɛ́ɛ́ kóō lɛ um nyatá.”