Upapa ku um wɛ ipu anyakwɔcɛ ku icɔɔci éyi ipu Canada, ohigbu ɛnyā ɔcɔɔci ku Alaadi doodu ó gē bi alɔ gā uklasi néē gē nwu ayipɛ ɛlā a. Cɛɛ eko nɛ 11:00 ku ɔcɔɔci le ya, alɔ gē gáā ba ɔ iyē. Eko ɔlɛɛnɔ, alɔ gē ba umama ku um iyē gā Agbla Ku Ajɔɔcɛ. Alɔ lɛ ɛyɛɛyɛyi ku ɔwɛ o gba ɛ̄gbā ɛplɛɛpa nyā má peee.

Umama ku um gbɔɔ ō da u Bob mla u Marion Hutcheson, nōo wɛ ɛnɛɛnɛ aɔkpa ku nu a ɛlā ɔkwɛyi nɛ ó yɔ i nwu ŋma ipu Ubáyíbu a. É kē kwu piya Ācɛ Ocijali Ku Ujehofa duu. Ipu ihayi ku 1958, apɔlɛ ku Hutchesons bi ami mla ayi nɔnyilɔ ku nu ɛta gā ojileyi nɛhi ku oduudu ɛcɛ néē ya ɛ̄cī ahata ipu New York City nōo lɛ ikpɛyi ɛlā nōo ka u, Divine Will a. Babanya, n gáā le jé ka ó tɔɔtɛ lɛ uwa ō bi um gā ojileyi nɛhi ɔɔma ŋ, amáŋ ō gā ojileyi ɔɔma wɛ ɛnɛɛnɛ ɔdā nōo ya ipu oyeeyi ku um.

Eko nɛ um wɛ ɔyipɛ a, alɔ lā ipu ɛhɔ ɛga nɛ alɔ gē bi aɛbɛ́ jɛ, n kē i jɔɔnyɛ ō leyikwu uwa nɛhi. N gáā gbɔɔ ō gbɛla ō gā inɔkpa nɛhi cɛɛ ku um kwu piya idɔkitɔ nōo gē leyikwu aɛbɛ́. Umama ku um lɛ ɛlā nyā ka lɛ ɔnyakwɔcɛ ku ujɔ éyi. Ó bi ɔwɛ ogbonɛnɛ le ta um ɛlá kwu ɔ ka alɔ lā eko nɛ “ɛcɛ gáā mɛ ā,” klla da um ɔka ɛgɛ nōo gā inɔkpa nɛhi ipu ihayi alɛwa géē lɛ abɔ kwu ɛma ku um mla Ujehofa a. (2 Utím. 3:1) Ohigbu ɛnyā, n le miya ō gā inɔkpa nɛhi gɛ ŋ.

 N klla yɔ i gbɛla ɔdā nɛ um géē ya igbihi nɛ um le ya mɛ ŋma inɔkpa ɛhili a. Naana nɛ um gē yuklɔ ku ɔna ō ta Alaadi doodu a, ń gē jɔɔnyɛ uklɔ ku ɔna ō ta ŋ klla gbɛla ka ń gáā wɛ ɔcɛ o gbɔbu ɔna ō ta gla ŋ. Upapa ku um mla ɔyinɛ nu nɛ ó wɛ Ɔcɛ Ocijali Ku Ujehofa ŋ ma, yɔ i ta um ɔtu kwu ɔtu ō yuklɔ eko doodu lɛ ukɔmpeni nɛhi éyi ku insurance nōo yɔ u Toronto a. Ɔyinɛ upapa ku um a lɛ ɛnɛɛnɛ ɛga éyi ipu ukɔmpeni a, ohigbu ɛnyā n cɛ ō yuklɔ a.

Ipu Toronto, n gē bi eko alɛwa le yuklɔ mla ō piyatɔha mla ācɛ nōó wɛ Ācɛ Ocijali ku Ujehofa ŋ, ɛnyā kē ya ń gē gā ōjila mla ō yuklɔ ku ɔna ō ta ojigogo gɛ ŋ. Eko aflɛyi a, n lā mla upapa ku um nōó wɛ Ɔcɛ Ocijali Ku Ujehofa ŋ, amáŋ igbihi nɛ ó gekwu a n cɛgbá ō gáā lā ɛga ɔhá.

Apɔlɛ ku Hutchesons nōo bi um gā ojileyi nɛhi néē ya ihayi ku 1958 a, lɛbɛɛka ɛ́nɛ́ mla adā gā um a. É lɛ um higwu ō gáā lā ɔlɛ uwa klla ta um abɔ ō ya ku ɛma nɛ um lɛ mla Ujehofa a kóō lɔfu fiyɛ. Ipu ihayi ku 1960, n lɛ ubatisim ya mla ɔyi nɔnyilɔ ku uwa nōo lé ka u John a. John gbɔɔ ō yuklɔ ku ɔcɛ o gbɔbu ɔna ō ta, ɛnyā kē ta um ɔtu kwu ɔtu ō ya nwune fiyɛ ipu uklɔ ku ɔna ō ta a. Ayinɛ nɔnyilɔ nōo yɔ ipu ujɔ ku um a le má ka um yɔ i ya lɔhi fiyɛ ipu ɛ̄gbā ō gba ku um lɛ Ujehofa, igbihaajɛ é lɛ um fu ō wɛ ɔcɛ nōo géē yɔ i leyikwu ōmiya ku Oyeeyi Ku Alɔ Ācɛ O Yɛce Ukraist Mla Uklɔ Ku Alɔ.

Ipu ihayi ku 1966, n kwu Randi Berge nōo wɛ ɔcɛ o gbɔbu ɔna ō ta nōo lɛ ɔtu caca ō yuklɔ ɛga nɛ ɛgbá ku ācɛ ō tɔɔna ɛlā Ɔwɔico yɔ fiyɛ a u lɛ. Ɛlā ku alɔ he ɔcɛ o leyikwu usɛkut a ɔtu nɛhi, ó klla ta alɔ ɔtu kwu ō ta ɔ abɔ ō leyikwu ujɔ nōo yɔ u Orillia, Ontario a. Ohigbu ɛnyā, alɔ le yɛ gā abɔɔ boobu.

Boobu nɛ alɔ lɛ yɛ fu Orillia a, n gáā ba u Randi iyē ō wɛ ɔcɛ o gbɔbu ɔna ō ta eko doodu. N gbɔɔ ō lɛ eeye ɛgɛ nɛ ó gē lɛ a! Igbihi nɛ um gbɔɔ ō ceyitikwu lɔfu lɔfu ō wɛ ɔcɛ o gbɔbu ɔna ō ta olɔhi a, n gbɔɔ ō lɛ eeye ō bi Ubáyíbu le yuklɔ lɔɔlɔhi mla ō má ɛgɛ nɛ ācɛ a yɔ i jɛyi nu a. Ó wɛ ɔdā eeye nɛhi ō je otabɔ lɛ ɔba mla ɔnyā éyi kéē ya opiyabɔ nɛhi ipu oyeeyi ku uwa, ka é klla kwu piya ācɛ o gba Ujehofa ɛ̄gbā.

Ɛpleeko nɛ alɔ gā u Toronto a, alɔ má u Arnold MacNamara nōo wɛ ipu ayinɛ nɔnyilɔ nōo yɔ i gbɔbu ipu Ubɛtɛlu a. Ó da alɔ ɔka ɔdaŋ ka ó géē he alɔ ɔtu ō yuklɔ ku ācɛ o gbɔbu ɔna ō ta ɛdɔ ɛyɛɛyi. N ta ɔ ohi boobu kahinii: “Ii gboo! Amáŋ ó gáā wɛ ipu Quebec ŋ!” Ɛlá ō gbo obɔbi nɛ ācɛ nōo gē ka uce ku Oyibo nōo yɔ aya ku Canada lɛ lɛyikwu ācɛ nōo gē ka uce ku French nōo yɔ Quebec a, lɛ abɔ kwu um iyē ɔwɛ obɔbi. Ɛpleeko ɔɔma, ācɛ a yɔ i ya uce ku á cɛ ŋ á cɛ ŋ tu igɔmɛnti, ohigbu ka é dɔka ku Quebec kóō yɔ ɛhaajɛ ku Canada gɛ ŋ.

Arnold ta um ohi kahinii: “Quebec wɛ ɛga foofunu nɛ abɔ ku ɛga ō yuklɔ ku alɔ yɔ i ta ācɛ o gbɔbu ɔna ō ta ɛdɔ ɛyɛɛyi ɛhɔ nyɔ ɛpleeko ɔɔma a.” Boobu ɔɔma n cɛ ō gā abɔɔ. N tɛtɛ jé ka ó he u Randi ɔtu ō yuklɔ abɔɔ. Igbihaajɛ, n gáā le má ka ōmiya ɔɔma wɛ ōmiya olɔhi fiyɛ duu nɛ um ya ipu oyeeyi ku um a!

Igbihi nɛ alɔ lɛ alaadi ɛhɔ ya ipu uklasi néē gē nwu uce ku French a, ami mla u Randi mla ɔba mla ɔnyā ɔhá le yɛ gā u Rimouski nōo lɛbɛɛka 540 kilomita (umilu 336) nōo yɔ aya ku ɛhico ku Montreal a. Alɔ lɛ ɔdā alɛwa ō nwu kpɔ, ɛnyā kē gáā le teyi peee eko nɛ um cɛgbá ō jé aɛlā ō ka tɛɛcɛ ōhī ipu ōjila ku ujɔ a. N ka kahinii, ipu ojileyi nɛhi ku alɔ nōo yɔ i wa a, alɔ géē lɛ ācɛ “nōo ŋma u ostrich” ikɔkɔ ō ka ka “ācɛ nōo ŋma u Austria a.”

Ipu Rimouski, ayinɛ alɔ nɔnya nōó lɛ ɔba ɛ ŋ nōo lɛ ɔtu caca, mla apɔlɛ ku Huberdeaus mla ayi nɔnya ku uwa ɛpa a gáā ba alɔ ɛnɛ a iyē. Apɔlɛ ku Huberdeaus lɛ ɔlɛ nɛhi éyi nōo lɛ inu ahaapa, é kē lɛ inu nyā kɔ mla ācɛ o gbɔbu ɔna ō ta nōo yɔ abɔɔ a. Ācɛ o gbɔbu ɔna ō ta nyā kē i tabɔ ō gba ije ɔlɛ ɔɔma duu. Alɔ gē hi ɔ ka ɔlɛ nɛhɛ, ohigbu ku iyɔbu ku ɔlɛ a mla akanaba ku nu wɛ ɛnɛhɛ. Igbalɛwa, ācɛ bɛɛka igwɛɛpa amāŋ igwo ɛnɛ a gē lā abɔɔ a. Abɔ alɔ wɛ ācɛ o gbɔbu ɔna ō ta ɛdɔ ɛyɛɛyi a, ami mla u Randi gē yuklɔ ku ɔna ō ta eko ɔci, eko ɔlɛɛnɔ, mla eko ɔnɔɔnɛ. Ohigbu ɛnyā, ó jɛ alɔ eyī nɛhi ō lɛ ayinɛ alɔ nōo gē fu iyi uwa tɛɛcɛ ō ba alɔ iyē eko doodu, kwu eko nɛ ofu kóō gē ŋmo eko ɔnɔɔnɛ a.

Alɔ gáā kwu ācɛ o gbɔbu ɔna ō ta nōo hayi kpaakpa nyā ajaajɛ jaa gbeeko néē gáā lɛbɛɛka ācɛ apɔlɛ ku alɔ a. Ekoohi ɛjɛɛji alɔ gē yaajɛ ɛga nɛ alɔ gē jɛ ɔla a, amāŋ ó lɛ ɛ̄cī nɛ alɔ gē je taajɛ ō he ɔdole tɔha. Ó lɛ éyi ku ayinɛ alɔ nɔnyilɔ a nōo gē gwiije, ohigbu ɛnyā, ɔnɔɔnɛ ku ɛ̄cī Usati alɔ gē gwiije klla gē jije tɔha.

Ó gbɔɔ ō he ācɛ alɛwa nōo yɔ u Rimouski a ɔtu kéē nwu ɛlā ɔkwɛyi nōo yɔ ipu Ubáyíbu a! Ipu ihayi ɛhɔ, alɔ lɛ eeye nɛhi ō má ācɛ nɛ alɔ gē klɔcɛ mla uwa a ya ō jɛ gɔbu ō gáā lɛ ubatisim ya. Ujɔ a jɛ ō gáā lɛ ācɛ o tɔɔna ɛlā Ɔwɔico bɛɛka ofu ce igwo ɛhɔ (35) a.

Ipu Quebec, alɔ miyɛ ɛnɛɛnɛ ɛlā ō nwu ɛgɛ nɛ alɔ géē wɛ ācɛ o tɔɔna ɛlā Ɔwɔico olɔhi. Alɔ má ɛgɛ nɛ Ujehofa ta alɔ abɔ ipu uklɔ ku ɔna ō ta ku alɔ, mla ō ya aɔdā nōo wɛ ɛgbá ku alɔ a. O ka tu ɔ, alɔ nwu ō yihɔtu ācɛ nōo gē ka uce ku French, uce ku uwa, mla uculo ku uwa. Ɛnyā kē ya ku alɔ gbɔɔ ō dɔka uculo ɔhá duu.—2 Ukɔ́r. 6:13.

Acigili, abɔ ku ɛga ō yuklɔ ku alɔ da alɔ ku alɔ nyɔ gā igeli ku Tracadie, nōo yɔ aya ku ɛnɔɔci ku New Brunswick a. Ɛnyā dɔka ō wɛ unwalu lɛ alɔ, ohigbu ka ó gboji nɛ alɔ gba ije ɔlɛ nɛ alɔ yɔ anu a ɛ ŋ, alɔ klla lɛ uklɔ ku ɔkpá ō nwu ipu inɔkpa éyi nɛ alɔ gē ya ŋma eko teeko a. O ka tu ɔ, ó gboji nɛ ācɛ nɛ alɔ gē klɔcɛ mla uwa a je piya ācɛ o tɔɔna ɛlā Ɔwɔico ɛ ŋ, é klla lɛ ba ō gwo Agbla ku Ajɔɔcɛ éyi lɛ alɔ ɛ.

 Alɔ gē gbɔɔkɔ oŋmɛyi ku alaadi doodu lɛyikwu opiyabɔ a klla gē nyɔ gáā jila u Tracadie má, nōo wɛ ɛyɛɛyi gwu Rimouski ta a. Amáŋ alɔ le miya ka ohigbu ka Ujehofa dɔka ku alɔ gā abɔɔ a, alɔ géē nyɔ. Alɔ lɛ Ujehofa jama klla má ɛgɛ nɛ ó fu eyeeye ku aunwalu nɛ alɔ lɔfu má a. (Umál. 3:10) Ohigbu ka u Randi wɛ ɔcɛ nōo lɛ ɛma olɔhi mla Ujehofa, nōó gē gbɛla iyi nu foofunu ŋ, klla wɛ ɔcɛ nōo gē ya ɛlā ɛhɛ a, ō gā abɔɔ a klla gáā le tɔɔtɛ.

Ɔnyakwɔcɛ ku ujɔ foofunu nɛ alɔ lɛ ipu ujɔ ɛpɛpɛ ku alɔ a wɛ u Robert Ross. Ó wɛ ɔcɛ nōo tɛtɛ gē gbɔbu ō ta abɔɔ mla u Linda nōo wɛ ɔnyā nu a, é kē le miya ō yɔ abɔɔ igbihi néē lɛ ɔyi aflɛyi ku uwa ma a. Naana néē kóō yɔ i leyikwu ɔyinɔnyilɔ ku uwa a, é ta alɔ ɔtu kwu ɔtu nɛhi ohigbu kē wɛ ācɛ nōo gē miyɛ ācɛ wa ɔlɛ, klla lɛ ɔtu caca ipu uklɔ ku ɔna ō ta a.

Igbihi nɛ alɔ lɛ uklɔ ku ācɛ o gbɔbu ɔna ō ta ya ihayi ɛpa ipu Tracadie a, alɔ klla lɛ igwú ō hi nɛ alɔ i leyice ŋ miyɛ yɔ i da alɔ ō kwu piya ācɛ o leyikwu usɛkut. Alɔ leyikwu aujɔ nōo gē ka uce ku Oyibo a ipu ihayi ahaapa, igbihaajɛ é gáā lɛ alɔ tɛhɔ ō gáā yuklɔ ipu Quebec néē gē ka uce ku French a. Léonce Crépeault nōo gē yuklɔ ku district overseer ipu Quebec a, gē ta um ahinya nɛɛnɛhi eko duuma nɛ um lɛ ɛlā ō ka tɛɛcɛ ya. Amáŋ igbihaajɛ, ó gē da um ɔka eko doodu kahinii: “Ɛgɛnyá nɛ a gáā ya ku ɛlā ō ka a kóō lɛ abɔ kwu ācɛ ɔtu fiyɛ a?” a Ɔka nɛ ó gē da um a ta um abɔ ō lɛ ɔtu ku um kwu ɔcɛla éyi nɛ um gē yɔ i kɛla lɛyikwu ɔ, nōo klla géē tɔɔtɛ lɛ ācɛ a ō jɛyi nu.

Uklɔ éyi nɛ um ya nɛ um gáā mlanyi gboogboo ŋ ma, wɛ ɛ̄nɛ̄ um ya ipu ihayi ku 1978 ipu ojileyi ku oduudu ɛcɛ néē ya ipu Montreal nōo lɛ ikpɛyi ɛlā nōo kahinii: “Victorious Faith” a. N yuklɔ aya ku Food Service. Alɔ yɔ i leyice ku ācɛ bɛɛka u 80,000 a géē wa, alɔ klla géē je ɔdole lɛ uwa ɔwɛ nɛ alɔ i ya jeeje ɛ ŋ. Ɛjɛɛji ɔdā doodu wɛ ɛyipɛ: aɔdā ō bi le he ɔdole a, ōmiya ku aɔdā nɛ alɔ gáā he a, mla ɔwɛ nɛ alɔ klla géē he ɔdole a wɛ ɛyɛɛyi kpanaa. Alɔ lɛ aufriji nɛhi bɛɛka ofu a, amáŋ ekoohi é gē yuklɔ ŋ. Gbɔbu lɛ ō gbɔɔ ku ojileyi ku ɛ̄cī aflɛyi a, ó tɔɔtɛ lɛ alɔ ō gā ipu ɛga ō ta ubɔlu a ō lɛ ɔdā doodu tutu taajɛ ŋ, jaa gbo ahaapa ɔtu ohigbu ubɔlu éyi néē lɛ ō ta a. Alɔ kē lɛ ɛga nɛ alɔ géē ya aubrɛdi néē géē bi le lé ɔdole ɔci a tutu gbɔbu ɛɛ ku eyī kóō nya! Ɛ̄jɛ̄ le jɛ alɔ, amáŋ n nwu ɛlā nɛhi ŋma uklɔ ō ya lɔfu ku ācɛ nōo fu iyi uwa tɛɛcɛ ō yuklɔ a, ɛgɛ néē wɛ ācɛ nōo lɛ uce ō ya olɔhi, mla ɛgɛ néē wɛ ācɛ ō ya ɛlā ɛhɛ a.  Alɔ wɛ aɔkpa jaa kwu obabanya. Ó wɛ ɔdā eeye nɛhi ō gā ojileyi ocɛgbá nyā néē ya ipu Quebec, nōo wɛ ɛga néē yɔ i ya ayinɛ alɔ ŋmo bɔbi bɔbi ɔtahɛ ku ihayi ku 1940 mla u 1960 a!

N nwu ɛlā alɛwa ŋma ɛgiyi ayinɛ alɔ ɔhá nōo gē gbɔbu ipu ojileyi nɛhi éyi néē ya ipu Montreal a. Ipu ihayi éyi, David Splane nōo wɛ ipu Ígwu Nōo Gē Leyi Kwu Ɔwa Ku Alɔ babanya a, leyikwu ōmiya ku ojileyi nɛhi néē ya ipu ihayi ɔɔma a. Ojileyi nɛhi ɔhá néē ya igbihaajɛ a, ami néē da um ku um yuklɔ ɔɔma mɛɛ a. Amáŋ David ta um abɔ nɛhi.

Ipu ihayi ku 2011, igbihi nɛ alɔ jɔɔnyɛ ō yuklɔ ku ācɛ o leyikwu usɛkut ipu ihayi ofu ce igwo ɛhili (36) a, é lɛ um higwu ō wɛ ɔcɛ ō nwu ɔkpá ipu Inɔkpa Ku Anyakwɔcɛ Ku Ujɔ. Ipu ihayi ɛpa foofunu, ami mla u Randi gwuta agodo ɛyɛɛyɛyi ofu ɛta ce igwo ɛhɔ, amáŋ alɔ i hijema ku nu ŋ. Oŋmɛyi ku alaadi doodu, ó gē jɛ anyakwɔcɛ ku ujɔ a eyī nɛhi ohigbu ka é má ka Ígwu Nōo Gē Leyikwu Ɔwa Ku Alɔ a lɛ ɛlá wu ɛma ku uwa néē lɛ mla Ujehofa a.

Igbihaajɛ, n lɛ ɛga ō nwu ɔkpá ipu Inɔkpa Ku Ācɛ O Tɔɔna Ku Ajɔɔcɛ Ku Ɔwɔico. Igbalɛwa, ɛ̄jɛ̄ gē jɛ ayipɛ inɔkpa a nɛhi é klla gē lɛ ɔtooplico ohigbu ka é lɛ aɔdā alɛwa ō ya: ō yaajɛ bɛɛka awa ahaapa ipu uklasi ɛ̄cī doodu, ō yuklɔ néē je lɛ uwa a awa ɛta ɔnɔɔnɛ doodu, mla ō leyikwu auklɔ ɛyɛɛyɛyi ɛnɛ amāŋ ɛhɔ ipu alaadi doodu. Ami mla ɔcɛ o nwu ɔkpá ɔhá lɛ ɔ ta uwa eyī peee, ka ó gáā tɔɔtɛ lɛ uwa ō ya ɔ gla ŋ ayika mla otabɔ ku Ujehofa nɛ. N géē bla eko doodu ō má ɛgɛ nōo hɛ ayipɛ inɔkpa a idaago ō má ka ohigbu ka é gbolo ce Ujehofa a, ó le tɔɔtɛ lɛ uwa ō ya fiyɛ ɔdā néē kóō leyice a.

Ɛlá nɛ umama ku um le wu ācɛ ɔhá a ta ācɛ nɛ ó gē ya oklɔcɛ ku Ubáyíbu mla uwa abɔ kéē ya ō jɛ gɔbu, klla ta upapa ku um abɔ kóō leyi má ɛlā ɔkwɛyi a ɔwɛ okpaakpa. Ɛ̄cī ɛta igbihi nɛ umama ku um gekwu a, ó le hɛ alɔ idaago ka upapa ku um wa ɛla ō ka tɛɛcɛ néē ya ipu Agbla ku Ajɔɔcɛ a, ó kē gɔbu yɔ i wa ōjila ku ujɔ ipu ihayi ofu ce ɛhili. Naana nɛ upapa ku um i ya ubatisim ŋ ma, anyakwɔcɛ ku ujɔ a da um ka anu wɛ ɔcɛ aflɛyi nōo gē wa ōjila ku ujɔ alaadi doodu a.

Umama ku um wɛ ɛnɛɛnɛ ocabɔ lɛ ami mla ayinɛ um nɔnya ɔhá a. Ɛjɛɛji ayinɛ um nɔnya ɛta a mla aɔba uwa yɔ i gba Ujehofa ɛ̄gbā kpaakpa. Ɛpa ku uwa yɔ i yuklɔ abɔ ku ɛga ō yuklɔ ku alɔ—éyi yɔ i yuklɔ ipu Portugal, ɔhá a kē yɔ i yuklɔ ipu Haiti.

Babanya, ami mla u Randi yɔ i yuklɔ ku ācɛ o gbɔbu ɔna ō ta ɛdɔ ɛyɛɛyi ipu Hamilton, Ontario. Eko nɛ alɔ gē yuklɔ ku ācɛ o leyikwu usɛkut a, alɔ gē jɔɔnyɛ ō ba ayinɛ alɔ ɔhá iyē ō gáā ya oklɔcɛ mla ācɛ néē gē klɔcɛ mla uwa a. Amáŋ babanya, ó gē ŋmo alɔ unwu ō má ka ācɛ nɛ alɔ gē klɔcɛ mla uwa a géē wa i jé Ujehofa. Abɔ alɔ kwu piya aɔkpa ku ayinɛ alɔ nōo yɔ ipu ujɔ ɛpɛpɛ ku alɔ a, ó ta alɔ ɔtu kwu ɔtu ō má ɛgɛ nɛ Ujehofa je otabɔ lɛ uwa eko olɔhi mla eko nɛ āhɔ̄ le lɔnɔ tu uwa a.

Ɔdaŋ ku alɔ gbɛla gā igbihi, ó gē jɛ alɔ eyī nɛhi ku ɛlá nɛ ācɛ alɛwa le wu alɔ a. Alɔ abɔyi alɔ kē i ceyitikwu lɔfu lɔfu ō lɛ ‘ɛlá wu ācɛ ɔhá’ ŋma lɛ ō ta uwa ɔtu kwu ɔtu kéē gba Ujehofa ɛ̄gbā ɔwɛ néē ya gla a. (2 Ukɔ́r. 7:6, 7) Ocabɔ mafu, ipu apɔlɛ éyi, ɔnyā a, ɔyinɔnyilɔ ku uwa, ɔyinɔnya ku uwa, ɛjɛɛji uwa wɛ ācɛ o yuklɔ lɛ Ujehofa eko doodu. N da ɔba a ɔka ɔdaŋ ka ó gbɛla jeeje ō wɛ ɔcɛ o gbɔbu ɔna ō ta ɛ. Ó ta um ohi ka anuɔ yɔ i je otabɔ lɛ ācɛ o gbɔbu ɔna ō ta ɛta. Anu n da ɔ ɔka kahinii: “A géē je otabɔ lɛ uwa lɔɔlɔhi fiyɛ Ujehofa?” N ta ɔ ɔtu kwu ɔtu kóō jɔɔnyɛ ɔdā nɛ uwa yɔ i jɔɔnyɛ nu a. Igbihi nɛ ɔya ɛhili le gla a, ó kwu piya ɔcɛ o gbɔbu ɔna ō ta duu.

Ami mla u Randi géē gɔbu yɔ i da “aɛ́gɔ́ kú eko ɔhá nōo ī wā ā” lɛyikwu “úklɔ́ idáagó” ku Ujehofa, alɔ kē leyice ka é géē jɔɔnyɛ ō gba Ujehofa ɛ̄gbā ɛgɛ nɛ alɔ jɔɔnyɛ nu lɛ a.—Aíjē 71:17, 18.