1-2. (a) Ahɔ̄ nyá nɛ Ujisɔsi pi ayikpo ku nu a? (b) Ɔdiya nɛ ayikpo a habɔ Ujisɔsi ta a? (Má ifoto a.)

 “ƆKWƆ̄Ɔ̄KWƐ̄YI, odo le tútū, amáŋ ɔkpíyē ā le gbagbafú.” (Umát. 26:41b) Mla aɛlā nyā, Ujisɔsi mafu ka ó jé ku alɔ wɛ alɛɛcɛ nōó jila iyē ŋ, ka alɔ klla géē ya inyileyi. Amáŋ ó klla kɛla nyā o ya ɛɛ kóō pi alɔ ahɔ̄: Alɔ hii gbɛla ka alɔ géē lɛ ɔfu jɛ eko doodu ō ya ɔdā okpaakpa a ŋ. Eko kpii gbɔbu ɛɛ ku Ujisɔsi kóō ka aɛlā nyā a, ayikpo ku nu ka ka é gáā habɔ ta gboogboo ŋ. (Umát. 26:35) É dɔka ō ya ɔdā okpaakpa a. Naana kpɔ a, é jé ka ɔfu ku uwa lɔfu mɛ fiyaa eko néē yɔ ipu āhɔ̄ olɔnɔ ŋ. Ɔɔma ya ɛɛ nɛ Ujisɔsi pi uwa ahɔ̄ kahinii: “Aá leyī kwɛɛcɛ kú aá kē gbɔ̄ɔkɔ kú [aa hii gā ipu ojama] ŋ́.”—Umát. 26:41a.

² Ó wɛ ɔdā okwiye, ka ayikpo a i ya ɔdā nɛ Ujisɔsi da uwa kéē ya a ŋ. Eko néē lɛ Ujisɔsi kwu a, é yɔ mla Ujisɔsi, kɛɛ ku ufi gbɔɔ ō ya uwa néē klla le pɛ kwu? Ohigbu ka é leyi kwɛɛcɛ ŋ ma, ayikpo a lɛ ɔdā néē ka ku aa i gáā ya gboogboo ŋ ma ya—é habɔ Ujisɔsi ta.—Umát. 26:56.

3. (a) O ya ɛɛ ku alɔ yɔ kwu Ujehofa gā ajaajɛ, ɔdiya nɛ alɔ hii cikā ō gbɛla ka alɔ géē lɔfu jɛ eko doodu ō ya ɔdā okpaakpa ŋ ma? (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

³ Alɔ i cika ō gbɛla ka alɔ géē lɛ ɔfu jɛ eko doodu ō ya ɔdā okpaakpa a ŋ. Ó wɛ ɔkwɛyi, ka alɔ lɛ ɔtu ku alɔ ya ekponu ō hii ya ɔdā duuma nōo géē biya Ujehofa ɔtu ŋ. Naana kpɔ a, alɔ wɛ alɛɛcɛ nōó jila iyē ŋ, ó klla gē tɔɔtɛ lɛ alɔ ō má ojama ō nyɔ gáā ya ɔdobɔbi. (Uróm 5:12; 7:​21-23) Eko nɛ alɔ i leyice ŋ, alɔ lɔfu má ojama ō ya ɔdā nōó lɔhi ŋ. O ya ɛɛ ku alɔ yɔ kwu Ujehofa mla Ɔyinɔnyilɔ ku nu gā ajaajɛ, alɔ cɛgbá ō yɛce ukɔ́  ku Ujisɔsi lɛyikwu ō leyi kwɛɛcɛ o ya ɛɛ ku alɔ ta ojama ō gáā biya íne. Ikpɛyi ɛlā oklɔcɛ nyā lɔfu ta alɔ abɔ ō ya ɔɔma. Aflɛyi, alɔ géē kɛla lɛyikwu ɛdɔ āhɔ̄ nɛ alɔ cɛgbá ō leyi kwɛɛcɛ lɛyikwu ɔ fiyɛ duu a. Oŋma ɔɔma, alɔ géē kɛla lɛyikwu ɛgɛ nɛ alɔ lɔfu gbo iyi alɔ ŋma ō gā ipu ojama a. Amoomɛ, alɔ géē kɛla lɛyikwu ɛgɛ nɛ alɔ géē gɔbu ō leyi kwɛɛcɛ a.

JÉ ƆDĀ NŌO GĒ JÉ UWƆ MÁ FIYƐ DUU A

4-5. Ɔdiya nōó cɛgbá ku alɔ hii biya íne nōo kóō le ligii ŋ ma?

⁴ Aíne obiya ɛ̄nɛ̄ o lɛbɛɛka é bɔbi nɛhi ŋ ma lɔfu ya ku ɛma nɛ alɔ lɛ mla Ujehofa a ka ó hii lɔfu ŋ. É klla lɔfu ya ku alɔ nyɔ gáā biya íne bɔbi bɔbi.

⁵ Ɛjɛɛji alɔ gē má ojama ō nyɔ gáā ya ɔdā nōó lɔhi ŋ. Amáŋ alɔ lɛ ɛga ɛyɛɛyɛyi nɛ alɔ i gē ya lɔhi ŋ, ohigbu ɛnyā, aɔdā ōhī lɔfu jé alɔ má fiyɛ ō nyɔ gáā ya ɔdā nōó lɔhi ŋ. Ocabɔ mafu, ɔcɛ éyi lɔfu yɔ i nya mla ojama ō nyɔ gáā gbo aja amāŋ ce ikpo ɔnyā ɔhá. Ɔcɛ ɔhá lɔfu yɔ i nya mla ojama ō ya uce nōó le yeŋee ŋ, bɛɛka ō lɛ abɔ ya iyē bɛɛka ó yɔ i ce ikpo iyi nu, amāŋ ō má ifoto ku ācɛ o tohɛwa. Ó lɛ ɔcɛ ɔhá nōo klla lɔfu yɔ i ceyitikwu lɔfu lɔfu kóō wɛ ɔcɛ nōó gē cɔnu fiyaa ŋ, ɔcɛ nōó gē yɔbɔɔcɛ ŋ, amāŋ ɔcɛ nōó gē kwu ŋma ō ya ɔdā okpaakpa a ohigbu ka ó gē yuufi ɔdā nɛ ācɛ ɔhá lɔfu gbɛla a ŋ. Ɛgɛ nɛ Ujemisi ka a, “ɔ̄cɛ ī lɛ ojámá eko nɛ̄ ó le púla tá ukpa kú ɔdā nōó ī tíne lɔfú lɔfú abɔ̄yīnū ā.”—Ujɛ́m. 1:14.

6. Ɔdi nɛ alɔ cika ō ka ɔkwɛyi lɛ iyi alɔ lɛyikwu ɔ a?

⁶ A jé aɔdā nōo gē jé uwɔ má fiyɛ duu a? Ó bɔbi nɛhi ku alɔ leyi gwu ɛga nɛ alɔ i gē ya lɔhi ŋ ma bonu, amāŋ ō gbɛla ku alɔ lɛ ɔfu jɛ nɛ alɔ i gáā biya íne gla ŋ. (1 Ujɔ́n. 1:8) Bla, ka Upɔlu ka ka ācɛ nɛ “alelékwū kú Ɔwɔicō gē nā tɔ́ɔwɛ” a, lɔfu ya ku ojama kóō lɛ uwa yale ɔdaŋ ka é gɔbu ō leyi kwɛɛcɛ ŋ. (Ugal. 6:1) Alɔ cika ō ka ɔkwɛyi a lɛ iyi alɔ, klla jé aɛga nɛ alɔ i gē ya lɔhi ŋ ma.—2 Ukɔ́r. 13:5.

7. Ɔdi nɛ alɔ cɛgbá ō gbo iyi alɔ ŋma anu fiyɛ duu a? Je ocabɔ mafu nōo lɛ ɛlā nyā teyi peee.

⁷ Boobu nɛ alɔ lɛ aɔdā nōo gē wɛ ojama lɛ alɔ fiyɛ duu a jé, ɔdi nɛ alɔ cika ō ya a? Ceyitikwu lɔfu lɔfu kóō tɔɔtɛ gā uwɔ lɔɔlɔhi ō lɛ aojama ɔɔma yale! Ocabɔ mafu, ɛpleeko néē ta Ubáyíbu a, aya ku igeli nōó lɔfu ŋ fiyɛ duu a wɛ ɔdongwɔwɛ ku nu a. Ɔɔma ya ɛɛ nɛ acogbaajɛ alɛwa géē cɛgbá ō yɔ ɛgiyi ɔdongwɔwɛ a o ya ɛɛ kéē je ogbotu lɛ igeli a. Ɔwɛ ekponu ɔɔma, alɔ cɛgbá ō ya odee lɛyikwu aɛga nɛ alɔ jé ka alɔ i ge ya lɔhi ŋ ma.—1 Ukɔ́r. 9:27.

 ƐGƐ NƐ ALƆ LƆFU GBO IYI ALƆ ŊMA Ō YA ƆDĀ NŌÓ LƆHI Ŋ MA

8-9. Ɛgɛnyá nɛ ɔyipɛ oklobiya néē kɛla lɛyikwu ɔ ipu ɔkpá ku Aíita ɛyi 7 a, gē yɛ i lɔfu lɛ abɔ ci ō nyɔ gáā biya íne bɔbi bɔbi a? (Aíita 7:​8, 9, 13, 14, 21)

⁸ Ɛgɛnyá nɛ alɔ lɔfu gbo iyi alɔ ŋma ō biya íne a? Leyi yɛ ɛlā nɛ alɔ lɔfu nwu ŋma ɛgiyi ɔyipɛ oklobiya néē kɛla lɛyikwu ɔ ipu ɔkpá ku Aíita ɛyi 7 a. Ó lɛ ikpo ku ɔnyā o gbo aja éyi ce. Ɔgba 22 da alɔ ku ɔyipɛ oklobiya a gbɔɔ ō nyɔ mla ɔnyā a “igbledū.” Amáŋ ɛgɛ nɛ aɔgba gbɔbu lɛ ɔɔma a mafu a, ó ya aōmiya obɔbi ɔhá gbɔbu lɛ ɛnyā nōo ya ɛɛ nōó tɔɔtɛ lɛ ɔ ō biya íne.

⁹ Ɔdi nɛ ɔyipɛ oklobiya ɔɔma ya gbɔbu ɛɛ kóō nyɔ gáā biya íne bɔbi bɔbi a? Aflɛyi, eko ɔnɔɔnɛ, ó gē “yɛ úláyi pī ɛga nɛ̄ ɔnyā [o gbo aja a] lā ā.” Ó gáā lɛ iyawu yɛ gā ɔwɛ ɔlɛ nu. (Jé Aíita 7:​8, 9.) Oŋma ɔɔma, eko nɛ ó lɛ ɔnyā a má a, ó nyɛɛ ŋma abɔɔ ŋ. Ikɔkɔ ɔɔma, ó cɛ ku ɔnyā a kóō lɛ okonu kwu ɔ okonu, klla jahɔ tu ɔ abɔ ó yɔ i kɛla lɛyikwu ɛya kóō lé tɔha nɛ ó ya a, á jé ŋ, ohigbu ka ó dɔka ku ɔyipɛ okobiya a kóō gbɛla ka ó wɛ ɔcɛ o bɔbi ŋ. (Jé Aíita 7:​13, 14, 21.) Ɔdaŋ ka ó gē yɛ i ya aɔdā nōó mafu ijeeyi nyā ŋ, ó gē yɛ i le kwu ŋma ojama ō ya ɔdā nōó lɔhi ŋ, ó klla gē yɛ i biya íne ŋ.

10. Ɛgɛnyá nɛ ɔcɛ icɛ lɔfu ya inyileyi ekponu nɛ ɔyipɛ oklobiya ɔɔma ya a?

¹⁰ Ɔ̄kā nyā mafu ɔdā nōo lɔfu ya da ɔcɛ duuma nōo gē gba Ujehofa ɛ̄gbā a. Ɔcɛ a lɔfu biya íne bɔbi bɔbi, cɛɛ igbihaajɛ ɔtu gbɔɔ ō ya ɔ ka ɛjɛɛji odee ya “igbledū.” Amāŋ ó lɔfu ka kahinii: “Ń jé ɛgɛ nōó bi le ya lɛ a ŋ.” Amáŋ ɔdaŋ ka ó gbɛla lɛyikwu ɔdā nōo ya a, ó géē lɔfu má ka ó lɛ aɔdā nōó mafu ijeeyi ŋ ma ya gbɔbu ɛɛ nɛ ó gáā biya íne bɔbi bɔbi a. Á jé ŋ, ó fu aɔkpa nōó yihɔtu ku Ujehofa ŋ. Amāŋ ó lɔfu wɛ ka aɔdā ōhī nɛ ó fu ō bi le jɔɔnyɛ iyi nu, auwɛbsaiti nɛ ó gē nyɔ gáā jila, amāŋ aɛga nɛ ó gē nyɔ a i lɔhi lɛ Ācɛ O Yɛce Ukraist ŋ. Á jé ŋ, ó klla lɔfu lɛ abɔ ci ō gbɔɔkɔ, ō jé Ubáyíbu, ō gā ōjila ku ujɔ, amāŋ ō yuklɔ ku ɔna ō ta. Bɛɛka ɔyipɛ oklobiya néē kɛla lɛyikwu ɔ ipu ɔkpá ku Aíita a, ohigbu aōmiya obɔbi alɛwa nɛ ó ya a, ya ɛɛ nɛ ó biya íne bɔbi bɔbi a.

11. Ɔdi nɛ alɔ cɛgbá ō ya, o ya ɛɛ ku alɔ hii biya íne bɔbi bɔbi ŋ ma?

¹¹ Ɔdi wɛ ɛlā ō nwu lɛ alɔ a? Ó wɛ íne obiya a abɔyi nu nɛ alɔ cɛgbá ō kwu ŋma anu foofunu a ŋ, amáŋ alɔ cɛgbá ō kwu ŋma ō ya aɔdā nōó mafu ijeeyi ŋ nōo lɔfu ya ku alɔ nyɔ gáā biya íne a. Ɛnyā wɛ ɔdā nɛ Usolomɔn je teyi peee yiili igbihi nɛ ó lɛ ɛlā ka lɛyikwu ɔdā nōo ya da ɔyipɛ oklobiya mla ɔnyā o gbo aja a. Lɛyikwu ɔnyā a, ó kahinii: “Ā híī yɛce ɔ́, ɛ́ɛ́ nāa ī tá ɔ̄ ɔkwu tɔlɔ́tɔlɔ́ ŋ́.” (Aíit. 7:25) Ó klla kóō ka kahinii: “Le kwu ŋmá ɛgiyí ɔnyā ōgbajā ā. Ā kōō híī túbla okómpíinu kú ɔlɛ́ nū ŋ́.” (Aíit. 5:​3, 8) O ya ɛɛ ku alɔ gbo iyi alɔ ŋma ō nyɔ gáā biye íne, alɔ cɛgbá ō le kwu ŋma aɔdā amāŋ āhɔ̄ nōo lɔfu ya ku alɔ nyɔ gáā ya ɔdā nōó lɔhi ŋ ma. a Ɛnyā wɛ ka ɔdaŋ ka ó lɛ odee nōó kóō bɔbi lɛ Ācɛ O Yɛce Ukraist ŋ naana, alɔ i gáā cɛ ō ya ɔ ŋ, ɔdaŋ ka alɔ jé ka ó lɔfu jé alɔ má ō nyɔ gáā ya ɔdā nōó lɔhi ŋ.—Umát. 5:​29, 30.

12. Ɔdi nɛ Ujobu lɛ ɔtu ku nu ya ekponu lɔfu lɔfu ō ya a, ɛgɛnyá nɛ ɛnyā kē lɔfu gbo ɔ ŋma ojama a? (Ujóbu 31:1)

¹² O ya ɛɛ ku alɔ le kwu ŋma āhɔ̄ nōo lɔfu ya ku alɔ biya íne, alɔ cɛgbá ō lɛ ōmiya olɔfu ya ō leyi kwɛɛcɛ lɔɔlɔhi. Ɔɔma wɛ ɔdā nɛ Ujobu ya a. Ó “lɛ̄ ɔkpá ce iyī [nu] ka [anuɔ i] gáā hɔ́ɔkɔ ɔyípɔ̄nɔ̄nyā dúúmā” mla unwu kóō ce ikpo nu gboogbooo ŋ. (Jé Ujóbu 31:1.) Ō ya ɔdā nɛ ó lɛ ɔtu ku nu ya ekponu ō ya a, géē ta ɔ abɔ ka ó hii yɔ ipu āhɔ̄ obɔbi nōo lɔfu ya kóō ce ikpo ɔnyā ɔhá ŋ. Alɔ abɔyi alɔ lɔfu lɛ  ɔtu ku alɔ ya ekponu ō kwu ŋma ɔdā duuma nōo lɔfu ya ku alɔ gā ipu ojama a.

13. Ɔdiya nɛ alɔ cika ō leyi kwɛɛcɛ lɛyikwu ɔdā nɛ alɔ gē gbɛla lɛyikwu ɔ a? (Má aifoto a.)

¹³ Alɔ cɛgbá ō leyi kwɛɛcɛ ku ɔdā nɛ alɔ gē gbɛla lɛyikwu ɔ a. (Oyɛb. 20:17) Ācɛ ōhī gē gbɛla ka ó bɔbi ō yɔ i gbɛla lɛyikwu aɔdobɔbi ŋ, ɔdaŋ ka é ya ɔdobɔbi ɔɔma ɔkwɔɔkwɛyi ŋ. Amáŋ ɛdɔ ɛlá ō gbo ɛgɔɔma i lɔhi ŋ. Ɔcɛ nōo gɔbu yɔ i gbɛla lɛyikwu ɔdā nōó lɔhi ŋ, géē lɛ unwu ō ya ɔdā nɛ ó gē gbɛla lɛyikwu ɔ ɔɔma fiyɛ. Ɔdaŋ ka ó ya lɛ a, ó yɔ i ya kóō lɔnɔ tu ɔ fiyɛ ō ta ojama. Ó wɛ ɔkwɛyi, ka aɛlá ō gbo obɔbi géē wa ipu ɔtu ku alɔ ekoohi. Eko duuma nɛ ɔɔma le ya, ɔdā ocɛgbá nɛhi ō ya a wɛ ō ta aɛlá ō gbo ɔɔma boobu, mla ō lɛ aɛlá ō gbo olɔhi kwɛyi uwa. Ɔdaŋ ku alɔ ya lɛ a, alɔ gē gbo iyi alɔ ŋma ō nyɔ gáā biya íne bɔbi bɔbi, ohigbu ku alɔ i jɛga lɛ ɛlá ō gbo obɔbi kóō je piya unwu olɔfu tu alɔ ŋ.—Ufíl. 4:8; Ukól. 3:2; Ujɛ́m. 1:​13-15.

14. Ɔdā ɔhá nyá lɔfu ta alɔ abɔ ŋma ō gā ipu ojama a?

¹⁴ Ɔdā ɔhá nyá nɛ alɔ ya ō gbo iyi alɔ ŋma ō gā ipu ojama a? Alɔ cɛgbá ō miyɛ cɛ lɔfu lɔfu ka alɔ géē lɛ itene eko doodu ŋma ō lɛyitaajɛ lɛ aíne ku Ujehofa. Ekoohi, ó lɔfu lɔnɔ tu alɔ ō gbɛla amāŋ ku ɔtu kóō ya alɔ ɛgɛ nɛ Ujehofa dɔka ku alɔ ya a. Amáŋ ɔdaŋ ku alɔ ceyitikwu lɔfu lɔfu ō ya lɛ a, alɔ géē lɛ eeye ɔkwɔɔkwɛyi.

15. Ɔdiya nōo lɛ unwu olɔfu ku ɔdā olɔhi ō ya lɔfu ta alɔ abɔ ō ta ojama a?

¹⁵ Alɔ cɛgbá ō ya ku alɔ lɛ unwu ku ɔdā olɔhi ō ya. Ɔdaŋ ku alɔ nwu ō ya ku “aɔ́dā nōo bɔ̄bí ā kóō wú [alɔ] ɔtū, [ku] aɔ́dā nēe lɔhi ā kéē he [alɔ] ɔtū,” alɔ géē lɛ ɔtu ku alɔ ya ekponu fiyɛ ō ya ɔdā okpaakpa a, mla ō kwu ŋma āhɔ̄ duuma nōo lɔfu ya ku alɔ gáā biye íne a. (Émɔ̄s. 5:15) Ɔdaŋ ka alɔ lɛ unwu ku ɔdā olɔhi ō ya, ó géē tɔɔtɛ lɛ alɔ lɔɔlɔhi fiyɛ ō ya ojama lé, ɔdaŋ ka alɔ kóō lɛ iyi alɔ má acigili ipu āhɔ̄ nɛ alɔ i lɔfu leyice amāŋ ci ɔ gla ŋ ma.

16. Ɛgɛnyá nōo ya aɔdā nōo géē ta alɔ abɔ ō tubla Ujehofa ajaajɛ lɔfu ta alɔ abɔ ō ta ojama a? (Má aifoto a.)

¹⁶ Ɛgɛnyá nɛ alɔ lɔfu ya ku alɔ lɛ unwu ku ɔdā olɔhi ō ya a? Alɔ lɔfu ya ɛnyā ɔdaŋ ku alɔ gɔbu yɔ i ya aɔdā nōo géē ya ku ihɔtu nɛ alɔ lɛ  lɛ Ujehofa a kóō lɔfu fiyɛ. Eko duuma nɛ alɔ yɔ ōjila ku ujɔ amāŋ yɔ i yuklɔ ku ɔna ō ta, ó gē tɔɔtɛ lɛ alɔ ō má ojama ō nyɔ gáā ya ɔdobɔbi ŋ. Ikɔkɔ ɔɔma, alɔ gē ya ku unwu nɛ alɔ lɛ ō ya ɔdā nōo he Ujehofa ɔtu a kóō lɔfu fiyɛ. (Umát. 28:​19, 20; Uhíb. 10:​24, 25) Ŋma lɛ ō jé mla ō klɔcɛ ku Ɛlā ku Ɔwɔico mla ō gbɛla lipu lipu tu ɔ, alɔ gē ya ku ihɔtu nɛ alɔ lɛ ō ya ɔdā olɔhi mla ō wɔtu ɔdobɔbi a kóō lɔfu fiyɛ. (Ujós. 1:8; Aíjē 1:​2, 3; 119:​97, 101) Bla, ka Ujisɔsi da ayikpo kahinii: “Aá leyī kwɛɛcɛ kú aá kē gbɔ̄ɔkɔ kú [aa hii gā ipu ojama] ŋ́.” (Umát. 26:41) Eko duuma nɛ alɔ gē gbɔɔkɔ lɛ Adā alɔ nōo yɔ ɔkpanco, alɔ gē je ɛnɛɛnɛ ɛga lɛ ɔ kóō ta alɔ abɔ, alɔ klla gē ya ku ɔtu nɛ alɔ le ya ekponu ō ya ɔdā nōo he ɔ ɔtu a kóō lɔfu fiyɛ.—Ujɛ́m. 4:8.

GƆBU KU A LEYI KWƐƐCƐ

17. Ɛga nyá nɛ Upita i gē ya lɔhi ŋ nōo yɔ i wɛ unwalu ku nu a?

¹⁷ Á jé ŋ, alɔ lɔfu ya aunwu obɔbi ōhī nɛ alɔ lɛ a lé duudu gla. Amáŋ alɔ lɔfu má ka ó lɛ aunwu obɔbi ōhī nōo lɔfu je alɔ eko ō yale. Leyi yɛ ocabɔ ku ɔyikpo Upita. Ohigbu ufi ku ɔlɛɛcɛ, ó lɛ iho hɛ igbo ɛta ka anuɔ i jé Ujisɔsi ŋ. (Umát. 26:​69-75) Igbihaajɛ tu Upita, ó ya ɔ bɛɛka ó lɛ ɛga nɛ ó gē ya lɔhi ŋ nyā yale ɛ ma, ohigbu ka ó tɔɔna mla ɔtu ō lɛ lɛyikwu Ujisɔsi iyɔbu ōjila ku ācɛ o hɛpɔ a. (Ācot. 5:​27-29) Amáŋ igbihi nɛ ihayi ōhī le gla a, ó lɛ abɔ ci ō lé ɔdole mla Ācɛ O Yɛce Ukraist nōó wɛ ācɛ Ujiyu ŋ ma, ohigbu ka ó yɔ i yuufi ɔdā nɛ ācɛ Ujiyu nōo wɛ Ācɛ O Yɛce Ukraist a géē gbɛla lɛyikwu ɔ a. (Ugal. 2:​11, 12) Ufi nɛ Upita gē ya gbɔbu a le cigbihi kpɔ ɛ. Á jé ŋ, ó ya ɔ lé duudu ŋ.

18. Ɔdi klla lɔfu ya lɛyikwu aunwu obɔbi ōhī nɛ alɔ gbɛla ku alɔ le yale ɛ ma?

¹⁸ Bɛɛka Upita a, ekoohi alɔ lɔfu cɛgbá ō ceyitikwu lɔfu lɔfu ō ya unwu obɔbi lé, nɛ alɔ gbɛla ku alɔ le yale gbɔbu ɛ ma. Ocabɔ mafu, ɔyinɛ alɔ nɔnyilɔ éyi kahinii: “N lɛ abɔ ci ō má ifoto ku ācɛ tohɛwa ipu ihayi igwo, n klla cɛ lɛ iyi um jé kpɔcii ka unwalu ku um ɔɔma mɛ ɛ. Amáŋ ipu āhɔ̄ ōhī, ó gē jé um má ō má ifoto ku ācɛ o tohɛwa kpɔ.” Ó wɛ ɔdā olɔhi, ka ɛ̄jɛ̄ i jɛ ɔyinɛ alɔ nɔnyilɔ ɔɔma ŋ. Ó gáā le má ka ó cɛgbá ō ya odee ɛ̄cī doodu ō ceyitikwu lɔfu lɔfu ō ya ɛga nōó gē ya lɔhi ŋ ma lé, á jé ŋ, ó géē cɛgbá ō ya ɛnyā ipu ɛjɛɛji oyeeyi ku nu ipu ɛcɛ obɔbi nyā. Ó gē leyi kwɛɛcɛ lɔɔlɔhi  fiyɛ otɛtɛ ō le kwu ligbo ŋma ō má ifoto ku ācɛ o tohɛwa, ɔnyā nu mla anyakwɔcɛ ku ujɔ kē humayi ta ɔ abɔ nɛɛnɛhi.

19. Ɛgɛnyá nɛ alɔ lɔfu ya aunwu obɔbi ōhī noō lɔfu yɔ i wɛ unwalu ku alɔ a lé?

¹⁹ Ɔdi nɛ alɔ lɔfu ya, o ya ɛɛ ku unwu obɔbi nɛ alɔ yɔ i ceyitikwu lɔfu lɔfu ō yale a kóō kwu alɔ ō nyɔ gáā ya ɔdā nōó lɔhi ŋ ma? Oŋma lɛ ō yɛce ukɔ́ nɛ Ujisɔsi tu alɔ lɛyikwu ojama. Ó kahinii: “Aá leyī kwɛɛcɛ.” Ɛpleeko nɛ ɔtu kóō ya uwɔ ku a lɔfu, gɔbu ku a yɔ i kwu ŋma āhɔ̄ duuma nōo lɔfu bi uwɔ gā ipu ojama. (1 Ukɔ́r. 10:12) Gɔbu ku a yɔ i ya aɔdā nōo ta uwɔ abɔ ō ya ɛga nɛ á gē ya lɔhi ŋ ma lé a. “Cēyītīkwū” ku a yɔ i gbo iyi uwɔ ŋma ojama eko doodu.—2 Upít. 3:14.

ƐGƐ NƐ ALƆ GĒ LƐ ITENE ƆDAŊ KU ALƆ GƆBU LEYI KWƐƐCƐ A

20-21. (a) Aɔhā nyá nɛ alɔ géē jɔɔnyɛ nu ɔdaŋ ku alɔ gɔbu yɔ i leyi kwɛɛcɛ ō ta ojama a? (b) Ɔdaŋ ku alɔ ya aya ku alɔ, ɔdi nɛ Ujehofa géē ya lɛ alɔ a? (2 Ācɛ Ukɔ́rīnti 4:7)

²⁰ Alɔ lɔfu lɔtuce kpɔcii kóō gɔbu ō leyi kwɛɛcɛ ō ta ojama, wɛ ɔdā nōo lɔhi lɛ alɔ fiyɛ duu eko doodu a. Eko duuma nɛ alɔ lɛ íne biya, alɔ lɔfu jɔɔnyɛ “abahi kú ɔdā olɔnyɛ kú íne ōbīya nɛ̄ ó gē gbojī ŋ́ mā,” amáŋ ɔdaŋ ku alɔ lā oyeeyi ku alɔ ɛgɛ nɛ Ujehofa dɔka a, alɔ géē lɛ eeye fiyɛ. (Uhíb. 11:25; Aíjē 19:8) Ɛnyā lɛ a ohigbu ka Ujehofa ya alɔ ō lā oyeeyi ku alɔ ɛgɛ nɛ ó dɔka a. (Ohút. 1:27) Ɔdaŋ ka alɔ lā oyeeyi nōo he Ujehofa ɔtu, alɔ géē jɔɔnyɛ ɔtu oyeŋee, ɛ̄cī éyi ó klla géē tɔɔtɛ lɛ alɔ ō lā oyeeyi opiyoo.—1 Utím. 6:12; 2 Utím. 1:3; Ujúd 20, 21.

²¹ Ku ɛlā ɔkwɛyi a, “ɔkpíyē ā le gbagbafú.” Amáŋ ɛnyā i wɛ ku alɔ i lɛ otabɔ duuma ŋ nɛ ŋ. Ujehofa le tutu ō je ɔfu nɛ alɔ cɛgbá a lɛ alɔ. (Jé 2 Ācɛ Ukɔ́rīnti 4:7.) Amáŋ leyi bi ɔ, ka “ɔfu nɛɛnɛhi” nōó lɛ ɛdɔ ŋ ma nɛ Ɔwɔico gē je a. Amáŋ aflɛyi, alɔ géē cɛgbá ō bi ɔfu ku abɔyi alɔ le ceyitikwu lɔfu lɔfu ō ya ojama lé. Ɔdaŋ ka alɔ ya aya ku alɔ, alɔ lɔfu lɔtuce kpɔcii ka Ujehofa géē cila ɔkɔ ō gba ku alɔ, eko duuma nɛ alɔ ba ɔ ɛba kóō je ɔfu lɛ alɔ tōōtɔ̄ɔ̄ eko nɛ alɔ cɛgbá nu a. (1 Ukɔ́r. 10:13) Ii, mla otabɔ ku Ujehofa, alɔ lɔfu gɔbu yɔ i leyi kwɛɛcɛ ō ta ojama.