Ó LƐ uklɔ duuma nōo he uwɔ ɔtu ō ya ipu ujɔ ku Ujehofa amáŋ nɛ a ya ɔ babanya gla ŋ? Ó lɔfu wɛ uklɔ nɛ ɔcɛ ɔhá bi yɔ i ya, amāŋ ɛnɛɛnɛ ɛga nɛ a tɛtɛ lɛ ipu ujɔ. Amáŋ, ihayi ku uwɔ, ōcē, ɔkpɛta, amāŋ uklɔ alɛwa nōo yɔ ipu apɔlɛ ku uwɔ a i jɛga gā awɔ ku a ya ɛgɛ nɛ a tɛtɛ gē ya a gɛ ŋ. Kɛɛ ka ó lɛ uklɔ nɛ a humayi ya gboji gboji ɛ, amáŋ ohigbu opiyabɔ nɛ ɔwa ku alɔ gē ya a, uklɔ ɔɔma gáā kwu hɛ uwɔ abɔ? O duuma nōó wɛ, ó lɔfu yɔ i ya uwɔ bɛɛká gē ya ɛjɛɛji ɔdā nɛ a dɔka ō ya ipu ɛ̄gbā ō gba ku Ujehofa a gɛ ŋ. Ipu āhɔ̄ ɛyɛɛyɛyi nōo ba nyā, ó wɛ ɔkwɛyi ka ekoohi abɔ géē lɔfu hɛ uwɔ iyē. Naana a, ɔdi gáā ta uwɔ abɔ ku a lɔfu iyē, ku ɔtu kóō hii bēē biya gā awɔ amāŋ ya ku a bi icɔnu ipu ɔtu ŋ ma? Ɔdi nɛ a cika ō ya ku a yɔ i gweeye eko doodu a?

Ocabɔ mafu ku Ujɔni o ya ubatisim lɔfu nwu alɔ ɔdā ō cɛgbá nɛhi lɛyikwu ɛgɛ nɛ alɔ géē yɔ i gweeye a. Ujɔni jɔɔnyɛ ɛnɛɛnɛ ɛga alɛwa. Amáŋ aɔdā nɛ ó gáā má ipu oyeeyi ku nu igbihaajɛ a i wɛ aɔdā nɛ ó leyice a ŋ. Ó lɔfu wɛ ka Ujɔni i gbɛla ka eko nɛ ó géē yɔ inu agba a géē nwune fiyɛ eko nōo bi le tɔɔna a ŋ. Naana a, ó lɛ eeye jaa gā oŋmɛyi ku oyeeyi ku nu. Ɔdi ta ɔ abɔ a? Ɔdi nɛ alɔ abɔyi alɔ cika ō ya ku alɔ kóō yɔ i gweeye, ɔdaŋ nɛ alɔ kóō i má aɔdā nōo gē biya alɔ ɔtu a?

Ipu ihayi ku 29 eko ku Ukraist a, Ujɔni gbɔɔ ō yuklɔ nɛ Ujehofa je lɛ ɔ kóō ya a. Uklɔ a kē lɛ ō ya mla ō lɛ ācɛ tutu lɛyikwu ō wa ku Ohɔnyɛta a. Ó da uwa kahinii: “Aá lɛ odo kú aá pīyabɔ̄, ohígbū ka ajɔ̄ɔ̄cɛ́ kú ɔkpánco le kwajaajɛ ɛɛ́.” (Umát. 3:2; Ulúk. 1:12-17) Acɛ alɛwa jahɔ lɛ ɔ. Ɛwa ku ācɛ kóō wa ŋma ɛga ō ligbo kéē wa i jahɔ tu ɛlā ku nu. Ācɛ alɛwa le piyabɔ klla lɛ ubatisim ya. Ujɔni klla lɛ ɔtu da aotrɛyi ku ɛga ō gba ɛ̄gbā nōo gē má iyi uwa kéē lɔhi fiyɛ duu a lɛyikwu ɛpɔ nōo gē gbeyi uwa, ɔdaŋ ka é piyabɔ ŋ. (Umát. 3:5-12) Igbihaajɛ ku odee bɛɛka ɔya ɛhili ipu ihayi ekponu ɔɔma piii a, Ujɔni ya ɔdā nōo cɛgbá fiyɛ duu ipu uklɔ ku ɔna ō ta ku nu, eko nɛ ó ya Ujisɔsi ubatisim a. Oŋma eko ɔɔma gɔbu a, ó gbɔɔ ō da ācɛ kéē yɛce Ujisɔsi nōo wɛ Ohɔnyɛta néē cokonu nu a.—Ujɔ́n. 1:32-37.

 Ohigbu ɛgɛ nɛ uklɔ ku Ujɔni cɛgbá nɛhi lɛ a, anu ya ɛɛ nɛ Ujisɔsi kahinii: “Ipú ācɛ nɛ̄ ācɛnyā ma ā, o fíyɛ́ Ujɔ́ni oyúbatísim dúúmā í yɔ̄ ɛ́ɛ́ ŋ́.” (Umát. 11:11) Ó lɛ aafu ŋ, Ujɔni gweeye nɛhi ohigbu ɔhā nɛ ó miyɛ a. Bɛɛka Ujɔni a, ācɛ alɛwa icɛ lɛ ɔhā alɛwa miyɛ ŋma ɛgiyi Ujehofa ɛ. Bɛɛka ɔyinɛ alɔ nɔnyilɔ Uterry a. Anu mɛmla ɔnyā nu Usandra lɛ ihayi ofu ɛpa ce igwo (50) ya ipu uklɔ ō ya lɛ Ujehofa eko doodu ɛ. Uterry kahinii: “N jɔɔnyɛ ɛnɛɛnɛ ɛga alɛwa ɛ. Bɛɛka ō wɛ ɔcɛ ō gbɔbu ɔna ō ta, ō yuklɔ ipu Ubɛtɛlu, uklɔ ku ɔcɛ ō gbɔbu ɔna ō ta ɛdɔ ɛyɛɛyi (special pioneer), ɔcɛ ō leyi kwu usɛkut, mla district overseer, babanya n kē wɛ ɔcɛ ō gbɔbu ɔna ō ta ɛdɔ ɛyɛɛyi (special pioneer) kpɔ.” Ō lɛ ɛnɛɛnɛ ɛga ipu ɔwa ku Ujehofa wɛ ɔdā nōo gē cɛ lɛ ɔcɛ gweeye. Amáŋ, ipu ocabɔ mafu ku Ujɔni, alɔ géē má kóō yɔ i gweeye cɛgbá uklɔ nɛhi ŋma ɛgiyi alɔ, ɔdaŋ ka āhɔ̄ ku alɔ kwu piyabɔ.

Ujɔni lɛ eeye nɛhi ohigbu ka ɛnɛɛnɛ ɛga nɛ ó lɛ a jɛ ɔ eyī nɛhi. Má ocabɔ éyi. Abɔ Ujisɔsi lɛ ubatisim ya a, ayikpo ku nu gbɔɔ ō nwune fiyɛ ayikpo ku Ujɔni. Ɛlā a gáā gbɔɔ ō junwalu lɛ ayikpo ku Ujɔni nɛhi, anu néē gáā lɛ ɔka da ɔ kahinii: “Ɔ̄cɛ nōo yɔ̄ mla awɔ ogbeé kú Ujɔ́dan, nāa cē ijáalí kú nū ā, yɔ̄ ī yá ācɛ Ubatísim abɔ̄yī nū, ācɛ dóódu gē pɛ́ nyɔ̄ ɛgiyí nū.” (Ujɔ́n. 3:26) Ujɔni ta uwa ohi kahinii: “Ɔ̄cɛ nōo lɛ ɔnyā ā, anú wɛ ɔbá ɔnyā á. Amáŋ oklóbīya kú ɔbɔ́nyā ā nōo háyi kóō pó ɔkɔ kú ɔbɔ́nyā, gē gwéeyē nwuné eko nōó le ɔkɔ kú ɔbɔ́nyā pó. Ohígbū ɔ́ɔmā, n gwéeyē nɛ̄ɛ̄nɛ̄hi.” (Ujɔ́n. 3:29) Ujɔni i kweyi mla Ujisɔsi ŋ, ó kē gbɛla ka abɔ uklɔ ku Ujisɔsi cɛgbá fiyɛ aku nu a, ohigbu ɔɔma uklɔ ku nu i tiile ŋ. Ikɔkɔ ɔɔma a, ó gweeye ohigbu ka ɛnɛɛnɛ ɛga nɛ ó lɛ ō wɛ “oklóbīya kú ɔbɔ́nyā ā” jɛ ɔ eyī nɛhi.

Uce ō ya ku Ujɔni ta ɔ abɔ kóō yɔ i gweeye naana nɛ uklɔ ku nu i tɔɔtɛ lɛ ɔ ŋ ma. Má ocabɔ éyi, Ujɔni wɛ ɔcɛ Unazirite ŋma eko néē ma ɔ a, ohigbu ɔɔma ó cika ō gwa ejé ŋ. (Ulúk. 1:15) Ujisɔsi klla kɛla lɛyikwu ɛdɔ oyeeyi nɛ Ujɔni lā a kahinii: “Eko nɛ̄ Ujɔ́ni wā ā, ó lé ɔdōlé ŋ́, ó kē gwá ɔdā dúúmā ŋ́.” Amáŋ, Ujisɔsi mla ayikpo ku nu i wɛ ācɛ Unazirite ŋ, ohigbu ɔɔma é lɔfu lā oyeeyi ku uwa ɛgɛ nɛ ācɛ ɔlamu gē lā a. (Umát. 11:18, 19) Ɔdā ɔhá kpɔ, naana nɛ Ujɔni i ya uklɔ idaago duuma ŋ ma a, ó jé ka ayikpo ku Ujisɔsi, kwu aɛ̄nɛ̄ ō kóō yɔ i yɛce ɔ gbɔbu a, lɔfu yuklɔ idaago. (Umát. 10:1; Ujɔ́n. 10:41) Ujɔni lɛ ɔtu ku nu kwu uklɔ nɛ Ujehofa je lɛ ɔ a, ikɔkɔ ō yɔ i gbɛla fiyɛ ɔfu lɛyikwu ɛyɛɛyɛyi ku ayikpo ku nu mla aku Ujisɔsi a.

Alɔ icɛ bɛ? Ɔdaŋ ku uklɔ duuma nɛ alɔ gē ya babanya jɛ alɔ eyī nɛhi, ó géē ya ku alɔ kóō yɔ i lɛ eeye nɛhi. Uterry nɛ alɔ kɛla lɛyikwu ɔ gbɔbu a kahinii: “N lɛ ɔtu ku um kwu uklɔ eyeeye néē je gā um a.” Eko duuma nɛ ó gē gbɛla lɛyikwu ɛgɛ nɛ ó lā oyeeyi ku nu ipu uklɔ ō ya lɛ Ujehofa eko doodu a, ó gē kahinii: “N jɔɔnyɛ aɔdā alɛwa, n hijema duuma ŋ.”

Alɔ géē lɛ eeye fiyɛ, ɔdaŋ ku alɔ gē gbɛla lɛyikwu ɔdā nōo gē cɛ lɛ alɔ jɔɔnyɛ uklɔ duuma nɛ alɔ gē ya ipu ɔwa ku Ujehofa a. Ó wɛ ɛnɛɛnɛ ɛga ō “yúklɔ́ tɔ̄há mla Ɔwɔicō.” (1 Ukɔ́r. 3:9) Ɛgɛ nōo teyi tu ɔdā nōo cɛgbá gā uwɔ nɛhi gē cɛ lɛ ɔdā ɔɔma kóō heyifuu tōōtɔ̄ɔ̄ a, ɛgɔɔma nɛ alɔ gáā bēē lɛ eeye ɔdaŋ ku alɔ gē gbɛla kwu ɛga nɛhi nɛ alɔ lɛ ō yuklɔ mla Ujehofa a. Alɔ i gáā lɛ ɛgɛ nɛ alɔ gē ceyitikwu ipu ɛ̄gbā ō gba ku Ujehofa lɛ a, le miya ɛgɛ nɛ ācɛ ɔhá gē ceyitikwu lɛ a ŋ. Alɔ i gáā yɔ i gbɛla ka uklɔ nɛ Ujehofa je lɛ alɔ a i cɛgbá bɛɛka aku ācɛ ɔhá a ŋ.—Ugal. 6:4.

Ujɔni lɔfu jé ka ó gáā yuklɔ ku ɔna ō ta a gboji ŋ, amáŋ ó leyice ka uklɔ a géē ŋmɛyi igbekponu ŋ. (Ujɔ́n. 3:30) Ipu ihayi ofu ce igwo eko ku Ukraist a, odee bɛɛka ɔya ɛhilii ŋma eko nɛ Ujɔni ya Ujisɔsi ubatisim a, Uhɛrɔdu nōo wɛ ɔcɛ́ a gáā lɛ Ujɔni ta agba. Amáŋ, ɛ̄jɛ̄ i jɛ Ujɔni ō kɛla lɛyikwu ɔdā okpaakpa ŋ. (Umák. 6:17-20) Ɔdi gáā ta Ujɔni abɔ kóō lɛ eeye ipu āhɔ̄ opiyabɔ nyā a? Ó lɛ ɔtu ku nu kwu aɔdā nōo cɛgbá lɛ Ujehofa a.

Ɛpleeko nɛ Ujɔni yɔ inu agba a, ó po ɔ̄kā lɛyikwu ɛgɛ nɛ ɔna ō ta ku Ujisɔsi yɔ i nyila a. (Umát. 11:2; Ulúk. 7:18) Ujɔni jé kpɔcii ka  Ujisɔsi wɛ Ohɔnyɛta a a, amáŋ ó lɔfu yɔ i gbɛla lɛyikwu ɛgɛ nɛ Ujisɔsi géē ya ɛjɛɛji ɔdā nɛ ɔkpiihɔ ka ka Ohɔnyɛta a géē ya jila a. Abɔ Ohɔnyɛta wɛ ɔcɛ nōo géē lé ɔcɛ́ a, Ujɔni lɔfu gbɛla, ɔdaŋ ka ɔcɛ́ ō lé ku Ujisɔsi géē gbɔɔ boobu. Ó klla lɔfu gbɛla ɔdaŋ ku Ujisɔsi géē hɛ ɔ ta ŋma inu agba. Abɔ ɔtu caca yɔ i ya Ujɔni ō jé ɔdā nɛ Ujisɔsi géē ya a, ó lɛ ɛhɔ tu ayikpo ku nu ɛpa kéē nyɔ i lɛ ɔka da Ujisɔsi kahinii: “Awɔ wɛ ɔ̄cɛ [néē] . . . ka ka a gē wā á nɛɛ kɛ̄ɛ kā ālɔ̄ leyītáajɛ ɔ̄cɛ ɔhá?” (Ulúk. 7:19) Eko néē piyɛyi a, ó teyi peee ka Ujɔni géē yɔ i jahɔ lɔɔlɔhi abɔ é yɔ i da ɔ lɛyikwu uklɔ idaago néē má a, mla ɛhɔ nɛ Ujisɔsi tu uwa fu Ujɔni a kahinii: “Ācɛ opeyī gē mɛ́ɛbɛ, ācɛ ocikpó gē yāwu, é lɛ aólagwú ā hɛ́tá, aódahɔ̄ gbɔɔ́ ō páhɔ̄, é lɛ ācɛ nēe gekwú ā héyī ŋmá ɔlékwū, é klla ke lɛ ɔna kú ɔ̄kōolɔhi tá lɛ ācogbɛhá.”—Ulúk. 7:20-22.

Ó lɛ aafu ŋ, ɔ̄kā nyā néē bi wa i ka Ujɔni a lɛ ɔfu tu ɔ iyē. Ó mafu ku Ujisɔsi yɔ i lɛ aakacɛ lɛyikwu Ohɔnyɛta a ya jila. Naana nɛ Ujisɔsi i hɛ Ujɔni ta ŋma inu agba ŋ ma a, Ujɔni jé ka uklɔ nɛ anu abɔyi nu ya a, ka ó ya ɔ bonu ŋ. Ó lɛ ɔdā nōo géē cɛ lɛ ɔ gweeye kpɔ, naana nɛ ó kóō yɔ ipu āhɔ̄ olɔnɔ a.

Bɛɛka Ujɔni a, ɔdaŋ ku alɔ lɛ ɔtu ku alɔ kwu ō gba Ujehofa ɛ̄gbā, alɔ géē lɔtu klla gbeyi cii mla eeye. (Ukól. 1:9-11) Ubáyíbu ō jé mla ō gbɛla tu ɔdā nɛ alɔ jé a géē ta alɔ abɔ ku alɔ lɔtu. Ɛnyā kē i ta alɔ abɔ ku alɔ jé ka ɔdā duuma nɛ alɔ ya ipu ɛ̄gbā ō gba ku Ujehofa a jɛ ɔ eyī nɛhi. (1 Ukɔ́r. 15:58) Usandra kahinii: “Ō jé ɛyi ekponu ku Ubáyíbu ɛ̄cī doodu gē cɛ gā um tubla Ujehofa ajaajɛ. Ó gē ya ku um lɛ ɔtu kwu ɛ̄gbā ō gba ku Ujehofa, ikɔkɔ ō gbɛla lɛyikwu iyi um foofunu.” Ō gbɛla lɛyikwu uklɔ nɛ ayinɛ alɔ ipu oduudu ɛcɛ gē ya lɛ Ujehofa a, géē ya ku alɔ kóō hii gbɛla lɛyikwu iyi alɔ foofunu ŋ. Usandra gɔbu kahinii: “Ōmiya ku JW Broadcasting^® néē gē ya ɔya doodu a, gē ta alɔ abɔ ku alɔ tubla ɔwa ku Ujehofa fiyɛ, é klla gē ta alɔ abɔ ku alɔ lɛ eeye ipu uklɔ nɛ alɔ i ya a.”

Eko kpii nɛ Ujɔni o ya ubatisim yuklɔ ku ɔna ō ta ku nu a, ó yuklɔ mla “alelékwū mɛ́mla ɔfú bɛ̄ɛka ákú Ɛláyíja” a. Bɛɛka Ɛlayija a, ó “wɛ ɛdɔ ɔ̄cɛ ɔlamu bɛ̄ɛka alɔ ā.” (Ulúk. 1:17; Ujɛ́m. 5:17) Ipu āhɔ̄ duuma nɛ alɔ yɔ a, alɔ géē lɛ eeye ipu ɛ̄gbā ō gba ku Ujehofa, ɔdaŋ ku alɔ gbla Ujɔni ya, ɛgɛ nɛ odee jɛ ɔ eyī, mla ɛgɛ nɛ ó klla lɛ ɔtu ku nu kwu ɛ̄gbā ō gba ku Ujehofa a.