Eko duuma nɛ alɔ gē klɔcɛ ku Ubáyíbu, alɔ lɔfu jila ɛlā má o ya ɛɛ ku alɔ jɛyi ɛlā nɛ alɔ yɔ i jé a lɔɔlɔhi fiyɛ. Amáŋ, alɔ i gáā dɔka ō klɔcɛ o ya ɛɛ ku alɔ nwu aɛlā nōo yɔ ipu Ubáyíbu a foofunu ŋ. Alɔ dɔka ō klɔcɛ o ya ɛɛ ku alɔ má ɛnɛɛnɛ auce ō ya ku Ujehofa nōo géē ya ku ihɔtu nɛ alɔ lɛ lɛ ɔ a kóō lɔfu fiyɛ. O ya ɛɛ ku alɔ ya ɛnyā, alɔ lɔfu da iyi alɔ ɔka kahinii: ‘Ɔdi nɛ ɛga ku Ubáyíbu nyā nwu um lɛyikwu Ujehofa a?’

Ocabɔ mafu, a lɔfu ceyitikwu ku a jila ɛlā má fiyɛ lɛyikwu ɛgɛ nɛ Ujehofa mafu ihɔtu, ijeeyi, ɔdā okpaakpa ō ya, mla ɔfu ku nu a. Amáŋ, ó wɛ auce ō ya nyā foofunu nɛ Ujehofa lɛ a nóó. Ó lɛ ɛnɛɛnɛ auce ō ya ku Ujehofa ɔhá nɛ a lɔfu nwu ɛlā lɛyikwu ɔ. Imi nɛ a lɔfu nwu ɛlā lɛyikwu auce ō ya ku nu fiyɛ a?

Leyi yɛ auce ō ya ku Ujehofa ofu ɛpa ce igwo [50] ɔhá nōo yɔ ipu Watch Tower Publications Index ɛhaajɛ ikpɛyi ɛlā nōo kahinii: “Jehovah,” mla ikpɛyi ɛlā oce kpii kpii nōo kahinii: “Qualities by Name.” Jila ɛlā má lɛyikwu ɛ̄nɛ̄ o cika lɛ ɛga ku Ubáyíbu nɛ a yɔ i jé a. (Ɔdaŋ ka ɛga ō gā ipu Research Guide for Jehovah’s Witnesses, foofunu nɛ a lɛ a, leyi yɛ ikpɛyi ɛlā nōo kahinii: “Jehovah God” mla ikpɛyi ɛlā oce kpii kpii nōo kahinii: “Jehovah’s Qualities.”)